Mahabharata · Chapter 1.165

tāṃ viditvā ciragatāṃ hiḍimbo rākṣaseśvaraḥ /
avatīrya drumāttasmādājagāmāśu pāṇḍavān //

lohitākṣo mahābāhurūrdhvakeśo mahānanaḥ /
meghasaṅghātavarṣmā ca tīkṣṇadaṃṣṭro bhayānakaḥ //

talaṃ talena saṃhatya bāhū vikṣipya cāsakṛt /
udvṛttanetraḥ sankruddho dantāndanteṣu niṣkuṣan //

ko'dya me bhoktukāmasya vighnaṃ carati durmatiḥ /
na bibheti hiḍimbī ca preṣitā kimanāgatā //
vaiśampāyana uvāca /

tamāpatantaṃ dṛṣṭvai tathā vikṛtadarśanam /
hiḍimbovāca vitrastā bhīmasenamidaṃ vacaḥ //

āpatatyeṣa duṣṭātmā sankruddhaḥ puruṣādakaḥ /
sā'haṃ tvāṃ bhrātṛbhiḥ sārdhaṃ yadbravīmi tathā kuru //

ahaṃ kāmagamā vīra rakṣobalasamanvitā /
āruhemāṃ mama śroṇiṃ neṣyāmi tvāṃ vihāyasā //

prabodhayaitānsaṃsuptānmātaraṃ ca parantapa /
sarvāneva gamiṣyābhi gṛhītvā vo vihāyasā //
bhīma uvāca /

mā bhaistvaṃ pṛthusuśroṇi naiṣa kaścinmayi sthite /
ahamenaṃ haniṣyāmi paśyantyāste sumadhyame //

nāyaṃ pratibalo bhīru rākṣasāpasado mama /
soḍhuṃ yudhi parispandamathavā sarvarākṣasāḥ //

paśya bāhū suvṛttau me hastihastanibhāvimau /
ūrū parighasaṅkāśau saṃhataṃ cāpyuro mahat //

vikramaṃ me yathendrasya sā'dya drakṣyasi śobhane /
mā'vamaṃsthāḥ pṛthuśroṇi matvā māmiha mānuṣam //
hiḍimbovāca /

nāvamanye naravyāghra tvāmahaṃ devarūpiṇam /
dṛṣṭaprabhāvastu mayā mānuṣeṣveva rākṣasaḥ //
vaiśampāyana uvāca /

tathā sañjalpatastasya bhīmasenasya bhārata /
vācaḥ śuśrāva tāḥ kruddho rākṣasaḥ puruṣādakaḥ //

avekṣamāṇastasyāśca hiḍimbo mānuṣaṃ vapuḥ /
sragdāmapūritaśikhāṃ samagrendunibhānanām //

subhrūnāsākṣikeśāntāṃ sukumāranakhatvacam /
sarvābharaṇasaṃyuktāṃ susūkṣmāmbaradhāriṇīm //

tāṃ tathā mānuṣaṃ rūpaṃ bibhratīṃ sumanoharam /
puṃskāmāṃ śaṅkamānaśca cukrodha puruṣādakaḥ //

sankruddho rākṣasastasyā bhaginyāḥ kurusattama /
utphālya vipule netre tatastāmidamabravīt //

ko hi me bhoktukāmasya vighnaṃ carati durmatiḥ /
na bibheṣi hiḍimbe kiṃ matkopādvipramohitā //

dhiktvāmasati puṃskāme mama vipriyakāriṇi /
pūrveṣāṃ rākṣasendrāṇāṃ sarveṣāmayaśaskari //

yānimānāśritā'kārṣīrvipriyaṃ samuhanmama /
eṣa tānadya vai sarvānhaniṣyāmi tvayā saha //
vaiśampāyana uvāca /

evamuktvā hiḍimbāṃ sa hiḍimbo lohitekṣaṇaḥ /
vadhāyābhipapātaināndantairdantānupaspṛśan //

garjantamevaṃ vijane bhīmaseno'bhivīkṣya tam /
rakṣanprabodhaṃ bhrātṝṇāṃ mātuśca paravīrahā //

tamāpatāntaṃ samprekṣya bhīmaḥ praharatāṃ varaḥ /
bhartsayāmāsa tejasvī tiṣṭhatiṣṭheti cābravīt //
vaiśampāyana uvāca /

bhīmasenastu taṃ dṛṣṭvā rākṣasaṃ prahasanniva /
bhaginīṃ prati saṅkruddhamidaṃ vacanamabravīt //

kiṃ te hiḍimba etairvā sukhasuptaiḥ prabodhitaiḥ /
māmāsādaya durbuddhe tarasā tvaṃ narāśana //

mayyeva praharaihi tvaṃ na striyaṃ hantumarhasi /
viśeṣato'napakṛte pareṇāpakṛte sati //

na hīyaṃ svavaśā bālā kāmayatyadya māmiha /
coditaiṣā hyanaṅgena śarīrāntaracāriṇā //

bhaginī tava durvṛtta rakṣasāṃ vai yaśohara /
tvanniyogena caiveyaṃ rūpaṃ mama samīkṣya ca //

kāmayatyadya māṃ bhīrustava naiṣāparādhyati /
anaṅgena kṛte doṣe nemāṃ garhitumarhasi //

mayi tiṣṭhati duṣṭātmanna striyaṃ hantumarhasi /
sangacchasva mayā sārdhamekenaiko narāśana //

ahameko gamiṣyāmi tvāmadya yamasādanam / adya madbalaniṣpiṣṭaṃ śiro rākṣasa dīryatām /
kuñjarasyeva pādena viniṣpiṣṭaṃ balīyasāḥ //

adya gātrāṇi te kaṅkāḥ śyenā gomāyavastathā /
karṣantu bhuvi saṃhṛṣṭā nihatasya mayā mṛdhe //

kṣaṇenādya kariṣye'hamidaṃ vanamarākṣasam /
purā yaddūṣitaṃ nityaṃ tvayā bhakṣayatā narān //

adya tvāṃ bhaginī rakṣaḥ kṛṣyamāṇaṃ mayā'sakṛt /
drakṣyatyadripratīkāśaṃ siṃheneva mahādvipam //

nirābādhāstvayi hate mayā rākṣasapāṃsana /
vanametaccariṣyanti puruṣā vanacāriṇaḥ //
hiḍimba uvāca /

garjitena vṛthā kiṃ te katthitena ca mānuṣa /
kṛtvaitatkarmaṇā sarvaṃ kattheyā mā ciraṃ kṛthāḥ //

balinaṃ manyase yaccāpyātmānaṃ saparākramam /
jñāsyasyadya samāgamya mayātmānaṃ balādhikam //

na tāvadetānhiṃsiṣye svapantvete yathāsukham /
eṣa tvāmeva durbuddhe nihanmyadyāpriyaṃvadam //

pītvā tavāsṛggātrebhyastataḥ paścādimānapi /
haniṣyāmi tataḥ paścādimāṃ vipriyakāriṇīm //
vaiśampāyana uvāca /

evamuktvā tato bāhuṃ pragṛhya puruṣādakaḥ /
abhyadravata sankruddho bhīmasenamarindamam //

tasyābhidravatastūrṇaṃ bhīmo bhīmaparākramaḥ /
vegena prahitaṃ bāhuṃ nijagrāha hasanniva //

nigṛhya taṃ balādbhīmo visphurantaṃ cakarṣa ha /
tasmāddeśāddhanūṃṣyaṣṭau siṃhaḥ kṣudramṛgaṃ yathā //

tataḥ sa rākṣasaḥ kruddhaḥ pāṇḍavena balārditaḥ /
bhīmasenaṃ samāliṅgya vyanadadbhairavaṃ ravam //

punarbhīmo balādenaṃ vicakarṣa mahābalaḥ /
mā śabdaḥ sukhasuptānāṃ bhrātṝṇāṃ me bhavediti //

haste gṛhītvā tadrakṣo dūramanyatra nītavān / pṛcche gṛhītvā tuṇḍena garuḍaḥ pannagaṃ yathā //

anyonyaṃ tau samāsādya vicakarṣaturojasā /
hiḍimbo bhīmasenaśca vikramaṃ cakratuḥ param //

babhañjatustadā vṛkṣām̐llatāścākarṣatustadā /
mattāviva caṃ saṃrabdhau vāraṇau ṣaṣṭihāyanau //

pādapānuddharantau tāvūruvegena vegitau /
sphoṭayantau latājālānyūrubhyāṃ gṛhya sarvaśaḥ //

vitrāsayantau tau śabdaiḥ sarvato mṛgapakṣiṇaḥ /
balena balinau mattāvanyonyavadhakāṅkṣiṇau //

bhīmarākṣasayoryuddhaṃ tadā'vartata dāruṇam /
purā devāsure yuddhe vṛtravāsavayoriva //

bhaṅūktvā vṛkṣānmahāśākhāṃstāḍayāmāsatuḥ krudhā /
sālatālatamālāmravaṭārjunavibhītakān //

nyagrodhaplakṣakharjūrapanasānaśmakaṇṭakān /
etānanyānmahāvṛkṣānutkhāya tarasā'khilān //

utkṣipyānyonyaroṣeṇa tāḍayāmāsatū raṇe /
yadā'bhavadvanaṃ sarvaṃ nirvṛkṣaṃ vṛkṣasaṅkulam //

tadā śilāśca kuñjāṃśca vṛkṣānkaṇṭakinastathā /
tatastau giriśṛṅgāṇi parvatāṃścābhralelihān //

śailāṃśca gaṇḍapāṣāṇānutkhāyādāya vairiṇau /
cikṣepaturuparyājāvanyonyaṃ vijayeṣiṇau //

tadvanaṃ paritaḥ pañcayojanaṃ nirmahīruham /
nirlatāgulmapāṣāṇaṃ nirmṛgaṃ cakraturbhṛśam //

tayoryuddhena rājendra tadvanaṃ bhīmarakṣasoḥ /
muhūrtenābhavatkūmarpṛṣṭhavacchlakṣṇamavyayam //

ūrubāhuparikleśātkarṣantāvitaretaram /
utkarṣantau vikarṣantau prakarṣantau parasparam //

tau svanena vinā rājangarjantau ca parasparam /
pāṣāṇasanghaṭṭanibhaiḥ prahārairabhijaghnatuḥ //

anyonyaṃ ca samāliṅgya vikarṣantau parasparam / bāhuyuddhamabhūddhoraṃ balivāsavayoriva /
yuddhasaṃrambhanirgacchatphūtkāraravanisvanam //

tayoḥ śabdena mahatā vibuddhāste nararṣabhāḥ /
saha mātrā ca dadṛśurhiḍimbāmagrataḥsthitām //