Mahabharata · Chapter 1.164

tatra teṣu śayāneṣu hiḍimbo nāma rākṣasaḥ /
avidūre vanāttasmācchālavṛkṣaṃ samāśritaḥ //

krūro mānuṣamāṃsādo mahāvīryaparākramaḥ /
prāvṛḍjaladharaśyāmaḥ piṅgākṣo dāruṇākṛtiḥ //

daṣṭrākarālavadanaḥ karālo bhīmadarśanaḥ /
lambasphiglambajaṭharo raktaśmaśruśiroruhaḥ //

mahāvṛkṣagalaskandhaḥ śaṅkarṇo vibhīṣaṇaḥ /
yadṛcchayā tānapaśyatpāṇḍuputrānmahārathān //

virūparūpaḥ piṅgākṣaḥ karālo ghoradarśanaḥ /
piśitepsuḥ kṣudhārtaśca jighrangandhaṃ yadṛcchayā //

ūrdhvāṅguliḥ sa kaṇḍūyandhunvanrūkṣāñśiroruhān /
jṛmbhamāṇo mahāvaktraḥ punaḥpunaravekṣya ca //

hṛṣṭo mānuṣamāṃsasya mahākāyo mahābalaḥ /
āghrāya mānuṣaṃ gandhaṃ bhaginīmidamabravīt //

upapannaṃ cirasyādya bhakṣyaṃ mama manaḥpriyam /
jighrataḥ prasrutā snehājjihvā paryeti me mukhāt //

aṣṭau daṃṣṭrāḥ sutīkṣṇāgrāścirasyāpātaduḥsahāḥ /
deheṣu majjayiṣyāmi snigdheṣu piśiteṣu ca //

ākramya mānuṣaṃ kaṇṭhamācchidya dhamanīmapi /
uṣṇaṃ navaṃ prapāsyāmi phenaliṃ rudhiraṃ bahu //

gaccha jānīhi ke tvete śerate vanamāśritāḥ /
mānuṣo balavāngandho ghrāṇaṃ tarpayatīva me //

hatvaitānmānuṣānsarvānānayasva mamāntikam /
asmadviṣayasuptebhyo naitebhyo bhayamasti te //

eṣāmutkṛtya māṃsāni mānuṣāṇāṃ yatheṣṭataḥ /
bhakṣayiṣyāva sahitau kuru pūrṇaṃ vaco mama //

bhakṣayitvā ca māṃsāni mānuṣāṇāṃ prakāmataḥ /
nṛtyāva sahitāvāvāṃ dattatālāvanekaśaḥ //
vaiśampāyana uvāca /

evamuktā hiḍimbā tu hiḍimbena mahāvane /
bhrāturvacanamājñāya tvaramāṇeva rākṣasī //

āplutyāplutya ca tarūnagacchatpāṇḍavānprati / jagāma tatra yatra sma śerate pāṇḍavā vane //

dadarśa tatra sā gatvā pāṇḍavānpṛthayā saha /
śayānānbhīmasenaṃ ca jāgrataṃ tvaparājitam //

upāsyamānānbhīmena rūpayauvanaśālinaḥ /
sukumārāṃśca pārthānsā vyāyāmena ca karśitān //

duḥkhena samprayuktāṃśca sahajyeṣṭhānpramāthinaḥ / raudrī satī rājaputraṃ darśanīyapradarśanam //

dṛṣṭvaiva bhīmasenaṃ sā sālaskandhamivodyatam /
rākṣasī kāmayāmāsa rūpeṇāpratimaṃ bhuvi //

antargatena manasā cintayāmāsa rākṣasī /
ayaṃ śyāmo mahābāhuḥ siṃhaskandho mahādyutiḥ //

kambugrīvaḥ puṣkarākṣo bhartā yukto bhavenmama /
nāhaṃ bhrātṛvaco jātu kuryāṃ krūramasāmpratam //

patisneho'tibalavānna tathā bhrātṛsauhṛdam /
muhūrtamiva tṛptiśca bhaveddhāturmamaiva ca //

hatairetairahatvā tu modiṣye śāśvatīḥ samāḥ /
niścityetthaṃ hiḍimbā sā bhīmaṃ dṛṣṭvā mahābhujaṃ //

utsṛjya rākṣasaṃ rūpaṃ mānuṣaṃ rūpamāsthitā / sā kāmarūpiṇī rūpaṃ kṛtvā madanamohitā //

upatasthe mahātmānaṃ bhīmasenamaninditā /
iṅgitākārakuśalā sopāsarpacchanaiḥ śanaiḥ //

vinamyamāneva latā divyābharaṇabhūṣitā /
śanaiḥ śanaiśca tāṃ bhīmaḥ samīpamupasarpatīm //

harṣamāṇāṃ tadā paśyattanvīṃ pīnapayodharām /
candrānanāṃ padmanetrāṃ nīlakuñcitamūrdhajām //

kṛṣṇāṃ supāṇḍurairdantairbimboṣṭhīṃ cārudarśanām /
dṛṣṭvā tāṃ rūpasampannāṃ bhīmo vismayamāgataḥ //

upacāraguṇairyuktāṃ lalitairhāsasammitaiḥ /
samīpamupasamprāpya bhīmaṃ sātha varānatā //

vaco vacanavelāyāṃ bhīmaṃ provāca bhāminī / lajjayā namyamāneva sarvābharaṇabhūṣitā //

smitapūrvamidaṃ vākyaṃ bhīmasenamathābravīt /
kutastvamasi samprāptaḥ kaścāsi puruṣarṣabha //

ka ime śerate ceha puruṣā devarūpiṇaḥ /
keyaṃ vai bṛhatī śyāmā sukumārī tavānagha //

śete vanamidaṃ prāpya viśvastā svagṛhe yathā /
nedaṃ jānītha gahanaṃ vanaṃ rākṣasasevitam //

vasati hyatra pāpātmā hiḍimbo nāma rākṣasaḥ //

tenāhaṃ preṣitā bhrātrā duṣṭabhāvena rakṣasā /
bibhakṣayiṣatā māṃsaṃ yuṣmākamamaropamāḥ //

sā'haṃ tvamabhisamprekṣya devagarbhasamaprabham /
nānyaṃ bhartāramicchāmi satyametadbravīmi te //

etadvijñāya dharmajña yuktaṃ mayi samācara /
kāmopahatacittāṃ hi bhajamānāṃ bhajasva mām //

trāsyāmi tvāṃ mahābāho rākṣasātpuruṣādakāt /
vatsyāvo giridurgeṣu bhartā bhava mamānagha //

icchāmi vīra bhadraṃ te mā me prāṇānvihāsiṣaḥ / tvayā hyahaṃ parityaktā na jīveyamarindama //

antarikṣacarī hyasmi kāmato vicarāmi ca /
atulāmāpnuhi prītiṃ tatra tatra mayā saha //
bhīmasena uvāca /

eṣa jyeṣṭho mama bhrātā mānyaḥ paramako guruḥ / aniviṣṭo hi tannāhaṃ parividyāṃ kathañcana //

mātaraṃ bhrātaraṃ jyeṣṭhaṃ kaniṣṭhānaparānapi /
parityajeta konvadya prabhavanniha rākṣasi //

ko hi suptānimānbhrātṝndattvā rākṣasabhojanam /
mātaraṃ ca naro gacchetkāmārta iva madvidhaḥ //
rākṣasyuvāca /

ekaṃ tvāṃ mokṣayiṣyāmi saha mātrā parantapa /
sodarānutsṛjaināṃstvamāroha jaghanaṃ mama //
bhīma uvāca /

nāhaṃ jīvitumāśaṃse bhrātṝnutsṛjya rākṣasi /
yathāśraddhaṃ vrajaikā hi vipriyaṃ me prabhāṣase //
rākṣasyuvāca /

yatte priyaṃ tatkariṣye sarvānetānprabodhaya /
mokṣayiṣyāmyahaṃ kāmaṃ rākṣasātpuruṣādakāt //
bhīmasena uvāca /

sukhasuptānvane bhrātṝnmātaraṃ caiva rākṣasi /
na bhayādbodhayiṣyāmi bhrātustava durātmanaḥ //

na hi me rākṣasā bhīru soḍhuṃ śaktāḥ parākramam /
na manuṣyā na gandharvā na yakṣāścārulocane //

gaccha vā tiṣṭha vā bhadre yadvā pīcchasi tatkuru /
taṃ vā preṣaya tanvaṅgi bhrātaraṃ puruṣādakam //