Mahabharata · Chapter 1.160

tāṃstu dṛṣṭvā sumanasaḥ parisaṃvatsaroṣitān /
viśvastāniva saṃlakṣya harṣaṃ cakre purocanaḥ //

sa tu sañcintayāmāsa prahṛṣṭenāntarātmanā /
prāptakālamidaṃ manye pāṇḍavānāṃ vināśane //

tamasyāntargataṃ bhāvaṃ vijñāya kurupuṅgavaḥ / cintayāmāsa matimāndharmaputro yudhiṣṭhiraḥ //

purocane tathā hṛṣṭe kaunteyo'tha yudhiṣṭhiraḥ /
bhīmasenārjunau cobhau yamau provāca dharmavit //

asmānayaṃ suviśvastānvetti pāpaḥ purocanaḥ /
vañcito'yaṃ nṛśaṃsātmā kālaṃ manye palāyane //

āyudhāgāramādīpya dagdhvā caiva purocanam /
ṣaṭprāṇino nidhāyeha dravāmo'nabhilakṣitāḥ //
vaiśampāyana uvāca /

atha dānāpadeśena kuntī brāhmaṇabhojanam /
cakre niśi mahārāja ājagmustatra yoṣitaḥ //

tā vihṛtya yathākāmaṃ bhuktvā pītvā ca bhārata /
jagmurniśiṃ gṛhāneva samanujñāpya mādhavīm //

purocanapraṇihitā pṛthāṃ yā sevate sadā /
niṣādī duṣṭahṛdayā nityamantaracāriṇī //

niṣādī pañcaputrā sā tasminbhojye yadṛcchayā /
purābhyāsakṛtasnehā sakhī kuntyāḥ sutaiḥ saha //

ānīya madhumūlāni phalāni vividhāni ca / annārthinī samabhyāgātsaputrā kālacoditā /
supāpā pañcaputrā ca sā pṛthāyāḥ sakhī matā //

sā pītvā madirāṃ mattā saputrā madavihvalā /
saha sarvaiḥ sutai rājaṃstasminneva niveśane //

suṣvāpa vigatajñānā mṛtakalpā narādhipa /
atha pravāte tumule niśi supte jane tadā //

tadupādīpayadbhīmaḥ śete yatra purocanaḥ /
tato jatugṛhadvāraṃ dīpayāmāsa pāṇḍavaḥ //

samantato dadau paścādagniṃ tatra niveśane /
pūrvameva gṛhaṃ śodhya bhīmaseno mahāmatiḥ //

pāṇḍavaiḥ sahitāṃ kuntīṃ prāveśayata tadbilam /
dattvāgniṃ sahasā bhīmo gṛhe tatparitaḥ sudhīḥ //

gṛhasthaṃ draviṇaṃ gṛhya nirjagāma bilena saḥ / jñātvā tu tadgṛhaṃ sarvamādīptaṃ pāṇḍunandanāḥ //

suraṅgāṃ viviśustūrṇaṃ mātrā sārdhamarindamāḥ /
tataḥ pratāpaḥ sumahāñchabdaścaiva vibhāvasoḥ //

prādurāsīttadā tena bubudhe sa janavrajaḥ /
tadavekṣya gṛhaṃ dīptamāhuḥ paurāḥ kṛśānanāḥ //

duryodhanaprayuktena pāpenākṛtabuddhinā /
gṛhamātmavināśāya kāritaṃ dāhitaṃ ca tat //

aho dhigdhṛtarāṣṭrasya buddhirnātisamañjasā /
yaḥ śucīnpāṇḍudāyādāndāhayāmāsa śatruvat //

diṣṭyā tvidānīṃ pāpātmādagdhvā dagdhaḥ purocanaḥ /
anāgasaḥ suviśvastānyo dadāha narottamān //
vaiśampāyana uvāca /

evaṃ te vilapanti sma vāraṇāvatakā janāḥ /
parivārya gṛhaṃ tacca tasthū rātrau samantataḥ //

pāṇḍavāścāpi te sarve saha mātrā suduḥkhitāḥ /
bilena tena nirgatya jagmurdrutamalakṣitāḥ //

tena nidroparodhena sādhvasena ca pāṇḍavāḥ /
na śekuḥ sahasā gantuṃ saha mātrā parantapāḥ //

bhīmasenastu rājendra bhīmavegaparākramaḥ /
jagāma bhrātṝnādāya sarvānmātarameva ca //

skandhamāropya jananīṃ yamāvaṅkena vīryavān /
pārthau gṛhītvā pāṇibhyāṃ bhrātarau sumahābalaḥ //

urasā pādapānbhañjanmahīṃ padbhyāṃ vidārayan /
sa jagāmāśu tejasvī vātaraṃhā vṛkodaraḥ //