Mahabharata · Chapter 1.150

drupadasyāpi viprarṣe śrotumicchāmi sambhavam / kathaṃ cāpi samutpannaḥ kathamastrāṇyavāptavān //

etadicchāmi bhagavaṃstvattaḥ śrotuṃ dvijottama /
kautūhalaṃ janmasu me kīrtyamāneṣvanekaśaḥ //
vaiśampāyana uvāca /

rājā babhūva pāñcālaḥ putrārthī putrakāraṇāt /
vanaṃ gato mahārājastapastepe sudāruṇam //

ārādhayanprayatnena maharṣīnsaṃśitavratān /
tasya santapyamānasya vane mṛgagaṇāyute //

kālastu sumahānrājannatyayātsutakāraṇāt /
sa tu rājā mahātejāstapastīvraṃ samādade //

kañcitkālaṃ vāyubhakṣo nirāhārastathaiva ca /
tathaiva tu mahābāhorvartamānasya bhārata //

kālastasya mahārāja yāto vai nṛpasattama /
tato nāticirātkāle vasante kāmadīpane //

phullāśokavane caiva prāṇināṃ sumanohare /
nadyāstīraṃ tato gatvā gaṅgāyāḥ padmalocanaḥ //

niyamasthaśca rājāsīttadā bharatasattama /
tato nāticirātkāle vanaṃ tanmanujeśvara //

samprāptā hyapsarā rājanmenaketyabhiviśrutā /
puṣpadrumānsajjamānā rājño darśanamāgamat //

na dadarśa tu sā rājaṃstatra sthānagataṃ nṛpam /
dṛṣṭvā cāpsarasaṃ tāṃ tu śukraṃ rājño'patadbhuvi //

tataḥ sa rājā rājendra lajjayā nṛpatiḥ svayam /
padbhyāmākramatāyuṣmaṃstatastu drupado'bhavat //

tatastu tapasā tasya rājarṣerbhāvitātmanaḥ /
putraḥ samabhavacchīghraṃ padostasya krameṇa tu //

tenāsya ṛṣayaḥ sarve samāgamya tapodhanāḥ /
nāma cukrurhi vidvāṃso drupado'stviti bhārata //

sa tasyaivāśrame rājanbharadvājasya bhārata /
vavṛdhe sumukhaṃ tatra kāmaiḥ sarvairnṛpottama //

pāñcālo'pi hi rājendra svarājyaṃ gatavānprabhuḥ /
bharadvājasya vidyārthaṃ sutaṃ datvā mahātmanaḥ //

sa kumārastato rājandroṇena sahito vane /
vedāṃścādhijage sāṅgāndhanurvedāṃśca bhārata //

parayā sa mudā yukto vicacāra vane sukham /
tasyaivaṃ vartamānasya vane vanacaraiḥ saha //

kālenāticirādrājanpitā svargamupeyivān /
sa samāgamya pāñcālaiḥ pāñcāleṣvabhiṣecitaḥ //

prāptaśca rājyaṃ rājendra suhṛdāṃ prītivardhanaḥ /
rājyaṃ rarakṣa dharmeṇa yathā cendrastriviṣṭapam //

etanmayā te rājendra yathāvatparikīrtitam /
drupadasya ca rājarṣerdhṛṣṭadyumnasya janma ca //