Mahabharata · Chapter 1.145

kururāje hi raṅgasthe bhīme ca balināṃ vare /
pakṣapātakṛtasnehaḥ sa dvidhevābhavajjanaḥ //

jaya he kururājeti jaya he bhīma ityuta /
puruṣāṇāṃ suvipulāḥ praṇādāḥ sahasotthitāḥ //

tataḥ kṣubdhārṇavanibhaṃ raṅgamālokya buddhimān /
bhāradvājaḥ priyaṃ putramaśvatthāmānamabravīt //

vārayaitau mahāvīryau kṛtayogyāvubhāvapi /
mā bhūdraṅgaprakopo'yaṃ bhīmaduryodhanodbhavaḥ //
vaiśampāyana uvāca /

tata utthāya vegena aśvatthāmā nyavārayat / gurorājñā bhīma iti gāndhāre guruśāsanam /
alaṃ śikṣākṛtaṃ vegamalaṃ sāhasamityuta //

tatastāvudyatagatau guruputreṇa vāritau /
yugāntānilasankṣubdhau mahāvelāvivārṇavau //

tato raṅgāṅgaṇagato droṇo vacanamabravīt /
nivārya vāditragaṇaṃ mahāmeghanibhasvanam //

yo me putrātpriyataraḥ sarvaśastraviśāradaḥ /
aindririndrānujasamaḥ sa pārtho dṛśyatāmiti //

ācāryavacanenātha kṛtasvastyayano yuvā /
baddhagodhāṅgulitrāṇaḥ pūrṇatūṇaḥ sakārmukaḥ //

kāñcanaṃ kavacaṃ bibhratpratyadṛśya phālgunaḥ /
sārkaḥ sendrāyudhataḍitsasandhya iva toyadaḥ //

tataḥ sarvasya raṅgasya samutpiñjalako'bhavat /
prāvādyanta ca vādyāni saśaṅkhāni samantataḥ //
prekṣakā ūcuḥ /

eṣa kuntīsutaḥ śrīmāneṣa madhyamapāṇḍavaḥ /
eṣa putro mahendrasya kurūṇāmeṣa rakṣitā //

eṣo'straviduṣāṃ śreṣṭha eṣa dharmabhṛtāṃ varaḥ /
eṣa śīlavatāṃ cāpi śīlajñānanidhiḥ paraḥ //
vaiśampāyana uvāca /

ityevaṃ tumulā vācaḥ śuśruvuḥ prekṣakeritāḥ /
kuntyāḥ prasravasaṃyuktairasraiḥ klinnamuro'bhavat //

tena śabdena mahatā pūrṇaśrutirathābravīt /
dhṛtarāṣṭro naraśreṣṭho viduraṃ hṛṣṭamānasaḥ //

kṣattaḥ kṣubdhārṇavanibhaḥ kimeṣa sumahāsvanaḥ /
sahasaivotthito raṅge bhindanniva nabhastalam //
vidura uvāca /

eṣa pārtho mahārāja phālgunaḥ pāṇḍunandanaḥ /
avatīrṇaḥ sakavacastatraiva sumihāsvanaḥ //
dhṛtarāṣṭra uvāca /

dhanyo'smyanugṛhīto'smi rakṣito'smi mahāmate /
pṛthāraṇisamudbhūtaistribhiḥ pāṇḍavavahnibhiḥ //
vaiśampāyana uvāca /

tasminpramudite raṅge kathañcitpratyupasthite /
darśayāmāsa bībhatsurācāryāyāstralāghavam //

āgneyenāsṛjadvahniṃ vāruṇenāsṛjatpayaḥ /
vāyavyenāsṛjadvahniṃ pārjanyenāsṛjaddhanān //

bhaumena prāsṛjadbhūmiṃ pārvatenāsṛjadgirīn /
antardhānena cāstreṇa punarantarhito'bhavat //

kṣaṇātprāṃśuḥ kṣaṇāddhrasvaḥ kṣaṇācca rathadhūrgataḥ /
kṣaṇena rathamadhyasthaḥ kṣaṇenāvataranmahīm //

sukumāraṃ ca sūkṣmaṃ ca guru cāpi gurupriyaḥ /
sauṣṭhavenābhisaṃyuktaḥ so'vidhyadvividhaiḥ śaraiḥ //

bhramataśca varāhasya lohasya pramukhe samam /
pañcabāṇānasanktānsammumocaikabāṇavat //

gavye viṣāṇakośe ca cale rajjvavalambini /
nicakhāna mahāvīryaḥ sāyakānekaviṃśatim //

ityevamādi sumahatkhaḍge dhanuṣi cānagha /
gadāyāṃ śastrakuśalo maṇḍalāni hyadarśayat //

tataḥ samāptabhūyiṣṭhe tasminkarmaṇi bhārata /
mandībhūte samāje ca vāditrasya ca niḥsvane //

dvāradeśātsamudbhūto māhātmyabalasūcakaḥ /
vajraniṣpeṣasadṛśaḥ śuśruve bhujaniḥsvanaḥ //

dīryante kiṃ nu girayaḥ kiṃsvidbhūmirvidīryate /
kiṃsvidāpūryate vyoma jaladhārāghanairghanaiḥ //

raṅgasyaivaṃ matirabhūtkṣaṇena vasudhādhipa /
dvāraṃ cābhimukhāḥ sarve babhūvuḥ prekṣakāstadā //

pañcabhirbhrātṛbhiḥ pārthairdroṇaḥ parivṛto vabhau /
pañcatāreṇa saṃyuktaḥ sāvitreṇeva candramāḥ //

aśvatthāmnā ca sahitaṃ bhrātṝṇāṃ śatamūrjitam /
duryodhanamamitraghnamutthitaṃ paryavārayat //

sa taistadā bhrātṛbhirudyatāyudhai- rgadāgrapāṇiḥ samavasthitairvṛtaḥ /
babhau yathā dānavasankṣaye purā punandaro devagaṇaiḥ samāvṛtaḥ //