Mahabharata · Chapter 1.146

etasminneva kāle tu tasmiñjanasamāgame / datte'vakāśe puruṣairvismayotphullalocanaḥ /
viveśa raṅgaṃ vistīrṇaṃ karṇaḥ parapurañjayaḥ //

sahajaṃ kavacaṃ bibhratkuṇḍaloddyotitānanaḥ /
sa dhanurbaddhanistriṃśaḥ pādacārīva parvataḥ //

kanyāgarbhaḥ pṛthuyaśāḥ pṛthāyāḥ pṛthulocanaḥ /
tīkṣṇāṃśorbhāskarasyāṃśaḥ karṇo'rigaṇasūdanaḥ //

siṃharṣabhagajendrāṇāṃ balavīryaparākramaḥ /
dīptikāntidyutiguṇaiḥ sūryendujvalanopamaḥ //

prāṃśuḥ kanakatālābhaḥ siṃhasaṃhanano yuvā /
asaṅkhyeyaguṇaḥ śrīmānbhāskarasyātmasambhavaḥ //

sa nirīkṣya mahābāhuḥ sarvato raṅgamaṇḍalam /
praṇāmaṃ droṇakṛpayornātyādṛtamivākarot //

sa samājajanaḥ sarvo niścalaḥ sthiralocanaḥ /
ko'yamityāgatakṣobhaḥ kautūhalaparo'bhavat //

so'bravīnmeghagambhīrasvareṇa vadatāṃ varaḥ /
bhrātā bhrātaramajñātaṃ sāvitraḥ pākaśāsanim //

pārtha yatte kṛtaṃ karma viśeṣavadahaṃ tataḥ /
kariṣye paśyatāṃ nṝṇāṃ mā'tmanā vismayaṃ gamaḥ //

asamāpte tatastasya vacane vadatāṃ vara /
yantrotkṣipta ivottasthau kṣipraṃ vai sarvato janaḥ //

prītiśca manujavyāghra duryodhanamupāviśat /
hrīśca krodhaśca bībhatsuṃ kṣaṇenānvāviveśa ha //

tato droṇābhyanujñātaḥ karṇaḥ priyaraṇaḥ sadā /
yatkṛtaṃ tatra pārthena taccakāra mahābalaḥ //

atha duryodhanastatra bhrātṛbhiḥ saha bhārata /
karṇaṃ pariṣvajya mudā tato vacanamabravīt //

svāgataṃ te mahābāho diṣṭyā prāpto'si mānada /
ahaṃ ca kururājyaṃ ca yatheṣṭamupabhujyatām //
karṇa uvāca /

kṛtaṃ sarvamahaṃ manye sakhitvaṃ ca tvayā vṛṇe /
dvandvayuddhaṃ ca pārthena kartumicchāmyahaṃ prabho //
vaiśampāyana uvāca /

evamuktastu karṇena rājanduryodhanastadā / karṇaṃ dīrghāñcitabhujaṃ pariṣvajyedamabravīt //

bhuṅkṣva bhogānmayā sārdhaṃ bandhūnāṃ priyakṛdbhava /
durhṛdāṃ kuru sarveṣāṃ mūrdhni pādamarindama //
vaiśampāyana uvāca /

tataḥ kṣiptamivātmānaṃ matvā pārtho'bhyabhāṣata /
karṇaṃ bhrātṛsamūhasya madhye'calamiva sthitam //
arjuna uvāca /

anāhūtopasṛṣṭānāmanāhūtopajalpinām /
ye lokāstānhataḥ karṇa mayā tvaṃ pratipatsyase //
karṇa uvāca /

raṅgo'yaṃ sarvasāmānyaḥ kimatra tava phālguna /
vīryaśreṣṭhāśca rājāno balaṃ dharmo'nuvartate //

kiṃ kṣepairdurbalāyāsaiḥ śaraiḥ kathaya bhārata /
guroḥ samakṣaṃ yāvatte harāmyadya śiraḥ śaraiḥ //
vaiśampāyana uvāca /

tato droṇābhyanujñātaḥ pārtaḥ parapurañjayaḥ /
bhrātṛbhistvarayāśliṣṭo raṇāyopajagāma tam //

tato duryodhanenāpi sa bhrātrā samarodyataḥ /
pariṣvaktaḥ sthitaḥ karṇaḥ pragṛhya saśaraṃ dhanuḥ //

tataḥ savidyutstanitaiḥ sendrāyudhapurogamaiḥ /
āvṛtaṃ gaganaṃ meghairbalākāpaṅktihāsibhiḥ //

tataḥ snehāddharihayaṃ dṛṣṭvā raṅgāvalokinam /
bhāskaro'pyanayannāśaṃ samīpopagatānghanān //

meghacchāyopagūḍhastu tato'dṛśyata phālgunaḥ /
sūryātapaparikṣiptaḥ karṇo'pi samadṛśyata //

dhārtarāṣṭrā yataḥ karṇastasmindeśe vyavasthitāḥ /
bhāradvājaḥ kṛpo bhīṣmo yataḥ pārthastato'bhavan //

dvidhā raṅgaḥ samabhavatstrīṇāṃ dvaidhamajāyata /
kuntibhojasutā mohaṃ vijñātārthā jagāma ha //

tāṃ tathā mohamāpannāṃ viduraḥ sarvadharmavit /
kuntīmāśvāsayāmāsa preṣyābhiścandanodakaiḥ //

tataḥ pratyāgataprāṇā tāvubhau paridaṃśitau /
putrau dṛṣṭvā susambhrāntā nānvapadyata kiñcana //

tāvudyatamahācāpau kṛpaḥ śāradvato'bravīt /
dvandvayuddhasamācāre kuśalaḥ sarvadharmavit //

ayaṃ pṛthāyāstanayaḥ kanīyānpāṇḍunandanaḥ /
kauravo bhavatā sārdhaṃ dvandvayuddhaṃ kariṣyati //

tvamapyevaṃ mahābāho mātaraṃ pitaraṃ kulam /
kathayasva narendrāṇāṃ yeṣāṃ tvaṃ kulabhūṣaṇam //

tato viditvā pārthastvāṃ pratiyotsyati vā na vā /
vṛthākulasamācārairna yudhyante nṛpātmajāḥ //
vaiśampāyana uvāca /

evamuktasya karṇasya vrīḍāvanatamānanam /
babhau varṣāmbuviklinnaṃ padmamāgalitaṃ yathā //
duryodhana uvāca /

ācārya trividhā yonī rājñāṃ śāstraviniścaye /
satkulīnaśca śūraśca yaśca senāṃ prakarṣati //

adbhyo'gnirbrahmataḥ kṣatramaśmano lohamutthitam / teṣāṃ sarvatragaṃ tejaḥ svāsu yoniṣu śāmyati //

yadyayaṃ phālguno yuddhe nārājñā yoddhumicchati /
tasmādeṣo'ṅgaviṣaye mayā rājye'bhiṣicyate //
vaiśampāyana uvāca /

tato rājānamāmantrya gāṅgeyaṃ ca pitāmaham /
abhiṣekasya sambhārānsamānīya dvijātibhiḥ //

gosahasrāyutaṃ dattvā yuktānāṃ puṇyakarmaṇām /
arho'yamaṅgarājyasya iti vācya dvijātibhiḥ //

tatastasminkṣaṇe karṇaḥ salājakusumairghaṭaiḥ /
kāñcanaiḥ kāñcane pīṭhe mantravidbhirmahārathaḥ //

abhiṣikto'ṅgarāje sa śriyā yukto mahābalaḥ /
sa maulihārakeyūraḥ sahastābharaṇāṅgadaḥ //

rājaliṅgaistathā'nyaiśca bhūṣito bhūṣaṇaiḥ śubhaiḥ / sacchatravālavyajano jayaśabdottareṇa ca //

uvāca kauravaṃ rājanvacanaṃ sa vṛṣastadā /
asya rājyapradānasya sadṛśaṃ kiṃ dadāni te //

prabrūhi rājaśārdūla kartā hyasmi tathā nṛpa /
atyantaṃ sakhyamicchāmītyāha taṃ sa suyodhanaḥ //

evamuktastataḥ karṇastatheti pratyuvāca tam /
harṣāccobhau samāśliṣya parāṃ mudamavāpatuḥ //