Mahabharata · Chapter 1.138

tataste mantrayāmāsurduryodhanapurogamāḥ /
prāṇavānvikramī cāpi śaurye ca mahati sthitaḥ //

spardhate cāpi satatamasmāneva vṛkodaraḥ /
taṃ tu suptaṃ purodyāne jale śūle kṣipāmahe //

tato jalavihārārthaṃ kārayāmāsa bhārata / pramāṇakoṭyāmuddeśe sthalaṃ kiñcidupetya ha //

bhakṣyaṃ bhojyaṃ ca peyaṃ ca coṣyaṃ lehyamathāpi ca /
upapāditaṃ naraistatra kuśalaiḥ sūdakarmaṇi //

nyavedayaṃstatpuruṣā dhārtarāṣṭrāya vai tadā /
tato duryodhanastatra pāṇḍavānāha durmatiḥ //

gaṅgāṃ caivānuyāsyāma udyānavanaśobhitām /
sahitā bhrātaraḥ sarve jalakrīḍāmavāpnumaḥ //

evamastviti taṃ cāpi pratyuvāca yudhiṣṭhiraḥ /
te rathairnagarākārairdeśajaiśca gajottamaiḥ //

niryayurnagarācchūrāḥ kauravāḥ pāṇḍavaiḥ saha /
udyānavanamāsādya visṛjya ca mahājanam //

viśanti sma tadā vīrāḥ siṃhā iva girerguhām /
udyānamabhipaśyanto bhrātaraḥ sarva eva te //

upasthānagṛhaiḥ śubhrairvalabhībhiśca śobhitam /
gavākṣakaistathā jālairyantraiḥ sāñcārikairapi //

sammārjitaṃ saudhakāraiścitrakāraiśca citritam /
dīrghikābhiśca pūrṇābhistathā puṣkariṇīṣu ca //

jalaṃ tacchuśubhe cchannaṃ phullairjalaruhaistathā /
upacchannā vasumatī tathā puṣpairyathartukaiḥ //

tatropaviṣṭāste sarve pāṇḍavāḥ kauravāśca ha /
upacchannānbahūnkāmāṃste bhuñjanti tatastataḥ //

athodyānavare tasmiṃstathā krīḍāgatāścate /
parasparasya vaktreṣu dadurbhakṣyāṃstatastataḥ //

tato duryodhanaḥ pāpastadbhakṣye kālakūṭakam /
viṣaṃ prakṣepayāmāsa bhīmasenajighāṃsayā //

svayamutthāya caivātha hṛdayena kṣuropamaḥ /
sa vācā'mṛtakalpaśca bhrātṛvacca suhṛdyathā //

svayaṃ prakṣipate bhakṣyaṃ bahu bhīmasya pākṛt /
prabhakṣitaṃ ca bhīmena taṃ vai doṣamajānatā //

tato duryodhanastatra hṛdayena hasanniva /
kṛtakṛtyamīvātmānaṃ manyate puruṣādhamaḥ //

tataste sahitāḥ sarve jalakrīḍāmakurvata /
pāṇḍavā dhārtarāṣṭrāśca tadā muditamānasāḥ //

vihārāvasatheṣveva vīrā vāsamarocayan /
bhīmastu balavānbhuktvā vyāyāmābhyadhikaṃ jale //

vāhayitvā kumārāṃstāñjalakrīḍāgatāṃstadā /
pramāṇakoṭyāṃ vāsārthī suṣvāpāvāpya tatsthalam //

śītaṃ vātaṃ samāsādya śrānto madavimohitaḥ /
viṣeṇa ca parītāṅgo niśceṣṭaḥ pāṇḍunandanaḥ //

tato baddhvā latāpāśairbhīmaṃ duryodhanaḥ svayam /
śūlānyapsu nikhāyāśu prādeśābhyantarāṇi ca //

latāpāśairdṛḍhaṃ baddhaṃ sthalājjalamapātayat /
saśeṣatvānna samprāpto jale śūlini pāṇḍavaḥ //

papāta yatra tatrāsya śūlaṃ nāsīdyadṛcchayā / sa niḥsañjño jalasyāntamavāgvai pāṇḍavo'viśat /
ākrāmannāgabhavane tadā nāgakumārakān //

tataḥ sametya bahubhistadā nāgairmahāviṣaiḥ /
adaśyata bhṛśaṃ bhīmo mahādaṃṣṭrairvipolbaṇaiḥ //

tato'sya daśyamānasya tadviṣaṃ kālakūṭakam /
hataṃ sarpaviṣeṇaiva sthāvaraṃ jaṅgamena tu //

daṃṣṭrāśca daṃṣṭriṇāṃ teṣāṃ marmasvapi nipātitāḥ /
tvacaṃ naivāsya bibhiduḥ sāratvātpṛthuvakṣasaḥ //

tataḥ prabuddhaḥ kaunteyaḥ sarvaṃ sañchidya bandhanam /
pothayāmāsa tānsarpānkecidbhītāḥ pradudruvuḥ //

hatāvaśeṣā bhīmena sarve vāsukimabhyayuḥ /
ūcuśca sarparājānaṃ vāsukiṃ vāsavopamam //

ayaṃ naro vai nāgarendra hyapsu baddhvā praveśitaḥ /
yathā ca no matirvrīra viṣapīto bhaviṣyati //

niśceṣṭo'smānanuprāptaḥ sa ca daṣṭo'nvabudhyata /
sasañjñaścāpi saṃvṛttaśchittvā bandhanamāśu naḥ //

pothayantaṃ mahābāhuṃ tvaṃ vai taṃ jñātumarhasi /
tato vāsukirabhyetya nāgairanugatastadā //

paśyati sma mahābāhuṃ bhīmaṃ bhīmaparākramam /
āryakeṇa ca dṛṣṭaḥ sa pṛthāyā āryakema ca //

tadā dauhitradauhitraḥ pariṣvaktaḥ supīḍitam /
suprītaścābhavattasya vāsukiḥ sa mahāyaśāḥ //

abravīttaṃ ca nāgendraḥ kimasya kriyatāṃ priyam /
dhanaugho ratnanicayo vasu cāsya pradīyatām //

evamuktastadā nāgo vāsukiṃ pratyabhāṣata /
yadi nāgendra tuṣṭo'si kimasya dhanasañcayaiḥ //

rasaṃ pibetkumāro'yaṃ tvayi prīte mahābalaḥ /
balaṃ nāgasahasrasya yasminkuṇḍe pratiṣṭhitam //

yāvatpibati bālo'yaṃ tāvadasmai pradīyatām /
evamastviti taṃ nāgaṃ vāsukiḥ pratyabhāṣata //

tato bhīmastadā nāgaiḥ kṛtasvastyayanaḥ śuciḥ /
prāṅmukhaścopaviṣṭaśca rasaṃ pibati pāṇḍavaḥ //

ekocchvāsāttataḥ kuṇḍaṃ pibati sma mahābalaḥ /
evamaṣṭau sa kuṇḍāni hyapibatpāṇḍunandanaḥ //

tatastu śayane divye nāgadatte mahābhujaḥ /
aśeta bhīmasenastu yathāsukhamarindamaḥ //