Mahabharata · Chapter 1.139

duryodhanastu pāpātmā bhīmamāśīviṣahade /
prakṣipya kṛtakṛtyaṃ svamātmānaṃ manyate tadā //

prabhātāyāṃ rajanyāṃ ca praviveśa puraṃ tataḥ / bruvāṇo bhīmasenastu yāto hyagrata eva naḥ //

yudhiṣṭhirastu dharmātmā hyavidanpāpamātmani /
svenānumānena paraṃ sādhuṃ samanupaśyati //

so'bhyupetya tadā pārtho mātaraṃ bhrātṛvatsalaḥ /
abhivādyābravītkuntīmamba bhīma ihāgataḥ //

kva gato bhavitā mātarneha paśyāmi taṃ śubhe /
udyānāni vanaṃ caiva vicitāni samantataḥ //

tadarthaṃ na ca taṃ vīraṃ dṛṣṭavanto vṛkodaram /
manyamānāstataḥ sarve yāto naḥ pūrvameva saḥ //

āgatāḥ sma mahābhāge vyākulenāntarātmanā /
ihāgamya kva nu gatastvayā vā preṣitaḥ kva nu //

kathayasva mahābāhuṃ bhīmasenaṃ yaśasvini /
nahi me śudhyate bhāvastaṃ vīraṃ prati śobhane //

yataḥ prasuptaṃ manye'haṃ bhīm neti hatastu saḥ /
ityuktā ca tataḥ kuntī dharmarājena dhīmatā //

hāheti kṛtvā sambhrāntā pratyuvāca yudhiṣṭhiram /
na putra bhīmaṃ paśyāmi na māmabhyetyasāviti //

śīghramanveṣaṇe yatnaṃ kuru tasyānujaiḥ saha /
drutaṃ gatvā purodyānaṃ vicinvantisma pāṇḍavāḥ //

bhīmabhīmeti te vācā pāṇḍavāḥ samudairayan /
vicinvanto'tha te sarve na sma paśyanti bhrātaram //

āgatāḥ svagṛhaṃ bhūya idamūcuḥ pṛthāṃ tadā /
na dṛśyate mahābāhuramba bhīmo vane citaḥ //

vicitāni ca sarvāṇi hyudyānāni nadīstathā /
vaiśampāyana uvāca /
tato viduramānāyya kuntī sā svaṃ niveśanam //

uvāca balavānkṣattarbhīmaseno na dṛśyate //

udyānānnirgatāḥ sarve bhrātaro bhrātṛbhiḥ saha /
tatraikastu mahābāhurbhīmo nābhyeti māmiha //

na ca prīṇayate cakṣuḥ sadā duryodhanasya saḥ /
krūro'sau durmatiḥ kṣudro rājyalubdho'napatrapaḥ //

nihanyādapi taṃ vīraṃ jātamanyuḥ suyodhanaḥ /
tena me vyākulaṃ cittaṃ hṛdayaṃ dahyatīva ca //
vidura uvāca /

maivaṃ vadasva kalyāṇi śeṣasaṃrakṣaṇaṃ kuru /
pratyādiṣṭo hi duṣṭātmā śeṣe'pi praharettava //

dīrghāyuṣastava sutā yathovāca mahāmuniḥ /
āgamiṣyati te putraḥ prītiṃ cotpādayiṣyati //
vaiśampāyana uvāca /

evamuktvā yayau vidvānviduraḥ svaṃ niveśanam /
kuntī cintāparā bhūtvā sahāsīnā sutairgṛhe //

tato'ṣṭame tu divase pratyabudhyata pāṇḍavaḥ /
tasmiṃstadā rase jīrṇe so'prameyabalo balī //

taṃ dṛṣṭvā pratibudhyantaṃ pāṇḍavaṃ te bhujaṅgamāḥ /
sāntvayāmāsuravyagrā vacanaṃ cedamabruvan //

yatte pīto mahābāho raso'yaṃ vīryasambhṛtaḥ /
tasmānnāgāyutabalo raṇe'dhṛṣyo bhaviṣyasi //

gacchādya tvaṃ ca svagṛhaṃ snāto divyairimairjalaiḥ /
bhrātaraste'nutapyanti tvāṃ vinā kurupuṅgava //

tataḥ snāto mahābāhuḥ śuciśuklāmbarasrajaḥ /
tato nāgasya bhavane kṛtakautukamaṅgalaḥ //

oṣadhībhirviṣaghnībhiḥ surabhībhirviśeṣataḥ /
bhuktavānparamānnaṃ ca nāgairdattaṃ mahābalaḥ //

pūjito bhujagairvīra āśīrbhiścābhinanditaḥ /
divyābharaṇasañchanno nāgānāmantrya pāṇḍavāḥ //

udatiṣṭhatprahṛṣṭātmā nāgalokādarindamaḥ /
utkṣipya ca tadā nāgairjalājjalaruhekṣaṇaḥ //

tasminneva vanoddeśe sthāpitaḥ kurunandanaḥ /
te cāntardadhire nāgāḥ pāṇḍavasyaiva paśyataḥ //

tata utthāya kaunteyo bhīmaseno mahābalaḥ /
ājagāma mahābāhurmāturantikamañjasā //

tato'bhivādya jananīṃ jyeṣṭhaṃ bhrātarameva ca /
kanīyasaḥ samāghrāya śirassvarivimardanaḥ //

taiścāpi sampariṣvaktaḥ saha mātrā nararṣabhaiḥ /
anyonyagatasauhārdāddiṣṭyā diṣṭyeti cābruvan //

tatastatsarvamācaṣṭa duryodhanaviceṣṭitam /
bhrātṝṇāṃ bhīmasenaśca mahābalaparākramaḥ //

nāgaloke ca yadvṛttaṃ guṇadoṣamaśeṣataḥ /
tacca sarvamaśeṣeṇa kathayāmāsa pāṇḍavaḥ //

tato yudhiṣṭhiro rājā bhīmamāha vaco'rthavat /
tūṣṇīṃ bhava na te jalpyamidaṃ kāryaṃ kathañcana //

itaḥprabhṛti kaunteyaṃ rakṣatānyonyamādṛtāḥ /
evamuktvā mahābāhurdharmarājo yudhiṣṭhiraḥ //

bhrātṛbhiḥ sahitaḥ sarvairapramatto'bhavattadā /
yadā tvavagatāste vai pāṇḍavāstasya karma tat //

natveva bahulaṃ cakruḥ prayatā mantrarakṣaṇe /
dharmātmā vidurasteṣāṃ pradadau matimānmatim //

duryodhano'pi taṃ dṛṣṭvā pāṇḍavaṃ punarāgatam /
niśvasaṃścintayaṃścaivamahanyahani tapyate //

kumārānkrīḍamānāṃstāndṛṣṭvā rājātidurmadān /
guruṃ śikṣārthamanviṣya gautamaṃ tānnyavedayat //

śarastambe samudbhūtaṃ vedaśāstrārthapāragam / rājñā niveditāstasmai te ca sarve ca niṣṭhitāḥ /
adhijagmuśca kuravo dhanurvedaṃ kṛpāttu te //