Mahabharata · Chapter 1.135

pāṇḍoruparamaṃ dṛṣṭvā devakalpā maharṣayaḥ /
tato mantravidaḥ sarve mantrayāñcakrire mithaḥ //
tāpasā ūcuḥ /

hitvā rājyaṃ ca rāṣṭraṃ ca sa mahātmā mahāyaśāḥ /
asmiṃsthāne tapastaptvā tāpasāñśaraṇaṃ gataḥ //

sa jātamātrānputrāṃśca dārāṃśca bhavatāmiha /
prādāyopanidhiṃ rājā pāṇḍuḥ svargamito gataḥ //

tasyemānātmajāndehaṃ bhāryāṃ ca sumahātmanaḥ /
svarāṣṭraṃ gṛhya gacchāmo dharma eṣa hi naḥ smṛtaḥ //
vaiśampāyana uvāca /

te parasparamāmantrya devakalpā maharṣayaḥ /
pāṇḍoḥ putrānpuraskṛtya nagaraṃ nāgasāhvayam //

udāramanasaḥ siddhā gamane cakrire manaḥ /
bhīṣmāya paṇḍavāndātuṃ dhṛtarāṣṭrāya caiva hi //

tasminneva kṣaṇe sarve tānādāya pratasthire /
pāṇḍordārāṃśca putrāṃśca śarīre te ca tāpasāḥ //

sukhinī sā purā bhūtvā satataṃ putravatsalā /
prapannā dīrghamadhvānaṃ sankṣiptaṃ tadamanyata //

sā tvadīrgheṇa kālena samprāptā kurujāṅgalam /
vardhamānapuradvāramāsasāda yaśasvinī //

dvāriṇaṃ tāpasā ūcū rājānaṃ ca prakāśaya /
te tu gatvā kṣaṇenaiva sabhāyāṃ viniveditāḥ //

taṃ cāraṇasahasrāṇāṃ munīnāmāgamaṃ tadā /
śrutvā nāgapure nṝṇāṃ vismayaḥ samapadyata //

muhūrtodita āditye sarve bālapuraskṛtāḥ /
sadārāstāpasāndraṣṭuṃ niryayuḥ puravāsinaḥ //

strīsaṅghāḥ kṣatrasaṅghāśca yānasaṅghasamāsthitāḥ /
brāhmaṇaiḥ saha nirjagmurbrāhmaṇānāṃ ca yoṣitaḥ //

tathā viṭśūdrasaṅghānāṃ mahānyatikaro'bhavat /
na kaścidakarodīrṣyāmabhavandharmabuddhayaḥ //

tathā bhīṣmaḥ śāntanavaḥ somadatto.ñatha bāhlikaḥ /
prajñācakṣuśca rājarṣiḥ kṣattā ca viduraḥ svayam //

sā ca satyavatī devī kausalyā ca yaśasvinī /
rājadāraiḥ parivṛtā gāndhārī cāpi niryayau //

dhṛtarāṣṭrasya dāyādā duryodhanapurogamāḥ /
bhūṣitā bhūṣaṇaiścitraiḥ śatasaṅkhyā viniryayuḥ //

tānmaharṣigaṇāndṛṣṭvā śirobhirabhivādya ca /
upopaviviśuḥ sarve kauravyāḥ sapurohitāḥ //

tathaiva śirasā bhūmāvabhivādya praṇamya ca /
upopaviviśuḥ sarve paurajānapadā api //

tamakūjamabhijñāya janaughaṃ sarvaśastadā /
pūjayitvā yathānyāyaṃ pādyenārghyeṇa ca prabho //

bhīṣmo rājyaṃ ca rāṣṭraṃ ca maharṣibhyo nyavedayat / teṣāmatho vṛddhatamaḥ pratyutthāya jaṭājinī /
ṛṣīṇāṃ matamājñāya maharṣiridamabravīt //

yaḥ sa kauravyadāyādaḥ pāṇḍurnāma narādhipaḥ /
kāmabhogānparityajya śataśṛṅgamito gataḥ //

rājā bhogānparityajya tapasvī sambabhūva ha /
sa yathoktaṃ tapastepe patramūlaphalāśanaḥ //

patnībhyāṃ saha dharmātmā sañcitkālamatandritaḥ /
tena vṛttasamācāraistapasā ca tapasvinaḥ //

toṣitāstāpasāstatra śataśṛṅganivāsinaḥ /
svargalokaṃ gantukāmaṃ tāpasāḥ sannivārya tam //

udyantaṃ saha patnībhyāṃ viprā vacanamabruvan /
anapatyasya rājendra puṇyā lokā na santi te //

tasmāddharmaṃ ca vāyuṃ ca mahendraṃ ca tathā'śvinau /
ārādhayasva rājendra patnībhyāṃ saha devatāḥ //

prītāḥ putrānpradāsyanti ṛṇamukto bhaviṣyasi /
tapasā divyacakṣuṣṭvātpaśyāmaste tathā sutān //

asmākaṃ vacanaṃ śrutvā devānārādhayattadā / brahmacaryavratasthasya tasya divyena hetunā //

sākṣāddharmādayaṃ putrastatra jāto yudhiṣṭhiraḥ /
tathainaṃ balināṃ śreṣṭhaṃ tasya rājño mahātmanaḥ //

mātariśvā dadau putraṃ bhīmaṃ nāma mahābalam /
purandarādayaṃ jajñe kuntyāṃ satyaparākramaḥ //

asmiñjāte maheṣvāse pṛthāmindrastadā'bravīt /
matprasādādayaṃ jātaḥ kunti satyaparākramaḥ //

ajeyānapi jetā'rīndevatādīnna saṃśayaḥ / yasya kīrtirmaheṣvāsānsarvānabhibhaviṣyati //

yudhiṣṭhiro rājasūyaṃ bhrātṛvīryādavāpsyati /
eṣa jetā manuṣyāṃśca sarvāngandharvarākṣasān //

eṣa duryodhanādīnāṃ kauravāṇāṃ ca jeṣyati /
vīrasyaitasya vikrāntairdharmaputro yudhiṣṭhiraḥ //

yakṣyate rājasūyādyairdharma eva paraḥ sadā / yau tu mādrī maheṣvāsāvasūta puruṣottamau //

aśvibhyāṃ puruṣavyāghrāvimau tāvapi tiṣṭhataḥ / nakulaḥ sahadevaśca tāvapyamitatejasau //

caratā dharmanityena vanavāsaṃ yaśasvinā /
eṣa paitāmaho vaṃśaḥ pāṇḍunā punaruddhṛtaḥ //

putrāṇāṃ janma vṛddhiṃ ca vaidikādhyayanāni ca /
paśyantaḥ satataṃ pāṇḍoḥ parāṃ prītimavāpsyatha //

vartamānaḥ satāṃ vṛtte putralābhamavāpa ca /
pitṛlokaṃ gataḥ pāṇḍuritaḥ saptadaśe'hani //

taṃ citāgatamājñāya vaiśvānaramukhe hutam /
praviṣṭā pāvakaṃ mādrī hitvā jīvitamātmanaḥ //

sā gatā saha tenaiva patilokamanuvratā / tasyāstasya ca yatkāryaṃ kriyatāṃ tadanantaram //

pṛthāṃ ca śaraṇaṃ prāptāṃ pāṇḍavāṃśca yaśasvinaḥ /
yathāvadanumanyantāṃ dharmo hyeṣa sanātanaḥ //

ime tayoḥ śarīre dve putrāśceme tayorvarāḥ /
kriyābhiranugṛhyantāṃ saha mātrā parantapāḥ //

pretakārye nivṛtte tu pitṛmedhaṃ mahāyaśāḥ /
labhatāṃ sarvadharmajñaḥ pāṇḍuḥ kurukulodvahaḥ //
vaiśampāyana uvāca /

evamuktvā kurūnsarvānkurūṇāmeva paśyatām /
kṣaṇenāntarhitāḥ sarve tāpasā guhyakaiḥ saha //

gandharvanagarākāraṃ tathaivāntarhitaṃ punaḥ /
ṛṣisiddhagaṇaṃ dṛṣṭvā vismayaṃ te paraṃ yayuḥ //