Mahabharata · Chapter 1.136

pāṇḍorvidura sarvāṇi pretakāryāṇi kāraya /
rājavadrājasiṃhasya mādryāścaiva viśeṣataḥ //

paśūnvāsāṃsi ratnāni dhanāni vividhāni ca /
pāṇḍoḥ prayaccha mādryāśca yebhyo yāvacca vāñchitam //

yathā ca kuntī satkāraṃ kuryānmādryāstathā kuru /
yathā na vāyurnādityaḥ paśyetāṃ tāṃ susaṃvṛtām //

na śocyaḥ pāṇḍuranaghaḥ praśasyaḥ sa narādhipaḥ /
yasya pañca sutā vīrā jātāḥ surasutopamāḥ //
vaiśampāyana uvāca /

vidurastaṃ tathetyuktvā bhīṣmeṇa saha bhārata /
pāṇḍuṃ saṃskārayāmāsa deśe paramapūjite //

tatastu nagarāttūrṇamājyagandhapuraskṛtāḥ /
nirhṛtāḥ pāvakā dīptāḥ pāṇḍo rājanpurohitaiḥ //

athaināmārtavaiḥ puṣpairgandhaiśca vividhairvaraiḥ /
śibikāṃ tāmalaṅkṛtya vāsasā'cchādya sarvaśaḥ //

tāṃ tathā śobhitāṃ mālyairvāsobhiśca mahādhanaiḥ /
amātyā jñātayaścainaṃ suhṛdaścopatasthire //

nṛsiṃhaṃ narayuktena paramālaṅkṛtena tam /
avahan yānamukhyena saha mādryā susaṃvṛtam //

pāṇḍureṇātapatreṇa cāmaravyajanena ca /
sarvavāditranādaiśca samalañcakrire tataḥ //

ratnāni cāpyupādāya bahūni śataśo narāḥ /
pradaduḥ kāṅkṣamāṇebhyaḥ pāṇḍostasyaurdhvadehike //

atha cchatrāṇi śubhrāṇi cāmarāṇi bṛhanti ca /
ājahruḥ kauravasyārthe vāsāṃsi rucirāṇi ca //

yājakaiḥ śuklavāsobhirhūyamānā hutāśanāḥ /
agacchannagratastasya dīpyamānāḥ svalaṅkṛtāḥ //

brāhmaṇāḥ kṣatriyā vaiśyāḥ śūdrāścaiva sahasraśaḥ /
rudantaḥ śokasantaptā anujagmurnarādhipam //

ayamasmānapāhāya duḥkhe cādhāya śāśvate /
kṛtvā cāsmānanāthāṃśca kva yāsyati narādhipaḥ //

krośantaḥ pāṇḍavāḥ sarve bhīṣmo vidura eva ca /
bāhlīkaḥ somadattaśca tathā bhūriśravā nṛpaḥ //

anyonyaṃ vai samāśliṣya anujagmuḥ sahasraśaḥ / ramaṇīye vanoddeśe gaṅgātīre same śubhe //

nyāsayāmāsurathaṃ tāṃ śibikāṃ satyavādinaḥ /
sabhāryasya nṛsiṃhasya pāṇḍorakliṣṭakarmaṇaḥ //

tatastasya śarīraṃ tu sarvagandhādhivāsitam /
śucikālīyakādigdhaṃ divyacandanarūṣitam //

paryaṣiñcañjalenāśu śātakumbhamayairghaṭaiḥ /
candanena ca śuklena sarvataḥ samalepayan //

kālāguruvimiśreṇa tathā tuṅgarasena ca /
athainaṃ deśajaiḥ śuklairvāsobhiḥ samayojayan //

sañchannaḥ sa tu vāsobhirjīvanniva narādhipaḥ /
śuśubhe sa navyāghro mahārhaśayanocitaḥ //

hayamedhāgninā sarve yājakāḥ sapurohitāḥ / vedoktena vidhānena kriyāñcakruḥ samantrakam //

yājakairabhyanujñāte pretakarmaṇyaniṣṭhite /
ghṛtāvasiktaṃ rājānaṃ saha mādryā svalaṅkṛtam //

tuṅgapadmakamiśreṇa candanena sugandhinā /
saralaṃ devadāruṃ ca guggulaṃ lākṣayā saha //

haricandanakāṣṭhaiśca hariberairuśīrakaiḥ / anyaiśca vividhairgandhairvidhinā samadāhayan //

tatastayoḥ śarīre dve dṛṣṭvā mohavaśaṃ gatā /
hāhā putreti kausalyā papāta sahasā bhuvi //

tāṃ prekṣya patitāmārtāṃ paurajānapado janaḥ /
ruroda duḥkhasantapto rājabhaktyā kṛpā'nvitaḥ //

kuntyāścaivārtanādena sarvāṇi ca vicukruśuḥ /
mānuṣaiḥ saha bhūtāni tiryagyonigatānyapi //

tathā bhīṣmaḥ śāntanavo viduraśca mahāmatiḥ /
sarvaśaḥ kauravāścaiva prāṇadanbhṛśaduḥkhitāḥ //

tato bhīṣmo'tha viduro rājā ca saha pāṇḍavaiḥ /
udakaṃ cakrire tasya sarvāśca kuruyoṣitaḥ //

cukruśuḥ pāṇḍavāḥ sarve bhīṣmaḥ śāntanavastathā /
viduro jñātayaścaiva cakruścāpyudakakriyāḥ //

kṛtodakāṃstānādāya pāṇḍavāñchokakarśitān /
sarvāḥ prakṛtayo rājañśocamānā nyavārayan //

yathaiva pāṇḍavā bhūmau suṣupuḥ saha bāndhavaiḥ /
tathaiva nāgarā rājañśiśyire brāhmaṇādayaḥ //

tadgatānandamasvasthamākumāramahṛṣṭavat /
babhūva pāṇḍavaiḥ sārdhaṃ nagaraṃ dvādaśa kṣapāḥ //