Mahabharata · Chapter 1.120

śūro nāma yaduśreṣṭho vasudevapitā'bhavat /
tasya kanyā pṛthā nāma rūpeṇāpratimā bhuvi //

pitṛṣvasrīyāya sa tāmanapatyāya bhārata /
agryamagre pratijñāya svasyāpatyaṃ sa satyavāk //

agrajāmatha tāṃ kanyāṃ śūro'nugrahakāṅkṣiṇe /
pradadau kuntibhojāya sakhā sakhye mahātmane //

niyuktā sā piturgehe brāhmaṇātithipūjane /
ugraṃ paryacarattatra brāhmaṇaṃ saṃśitabratam //

nigūḍhaniścayaṃ dharme yaṃ taṃ durvāsasaṃ viduḥ /
tamugraṃ saṃśitātmānaṃ sarvayatnairatoṣayat //

dadhyājyakādibhirnityaṃ vyañjanaiḥ pratyahaṃ śubhā /
sahasrasaṅkhyairyogīndramupacāradanuttamā //

durvāsā vatsarasyānte dadau mantramanuttamam / yaśasvinyai pṛthāyai tadāpaddharmānvavekṣayā /
abhicārābhisaṃyuktamabravīccaiva tāṃ muniḥ //

yaṃ yaṃ devaṃ tvametena mantreṇāvāhayiṣyasi /
tasya tasya prabhāveṇa tava putro bhaviṣyati //

tathoktā sā tu vipreṇa kuntī kautūhalānvitā /
kanyā satī devamarkamājuhāva yaśasvinī //

tato ghanāntaraṃ kṛtvā svamārgaṃ tapanastadā /
upatasthe sa tāṃ kanyāṃ pṛthāṃ pṛthulalocanām //

sā dadarśa tamāyāntaṃ bhāskaraṃ lokabhāvanam /
vismitā cānavadyāṅgī dṛṣṭvā tanmahadadbhutam //

sābravīdbhagavankastvamāvirbhūto mamāgrataḥ /
āditya uvāca /
āhūtopasthitaṃ bhadre ṛṣimantreṇa coditam /
viddhi māṃ putralābhāya devamarkaṃ śucismite //

putraste nirmitaḥ subhru śṛṇu mahādṛkchubhānane /
āditye kuṇḍale bibhratkavacaṃ caiva māmakam //

śastrāstrāṇāmabhedyaśca bhaviṣyati śucismite /
nāsya kiñcidadeyaṃ ca brāhmaṇebhyo bhaviṣyati //

codyamāno mayā cāpi na kṣamaṃ cintayiṣyati /
dāsyatyeva hi viprebhyo mānī caiva bhaviṣyati //
vaiśampāyana uvāca /

evamuktā tataḥ kuntī gopatiṃ pratyuvāca ha / kanyā pitṛsā cāhaṃ puruṣārtho na caiva me //

kaścinme brāhmaṇaḥ prādādvaraṃ vidyāṃ ca śatruhan /
tadvijijñāsayā'hvānaṃ kṛtavatyasmi te vibho //

etasminnaparādhe tvāṃ śirasā'haṃ prasādaye /
yoṣito hi sadā rakṣyāstvaparādhe'pi nityaśaḥ //
sūrya uvāca /

vedāhaṃ sarvamevaitadyaddurvāsā varaṃ dadau /
santyajya bhayameveha kriyatāṃ saṅgamo mama //

amoghaṃ darśanaṃ mahyamāhūtaścāsmi te śubhe /
vṛthā'hvāne'pi te bhīru doṣaḥ syānnātra saṃśayaḥ //

yadyevaṃ manyase bhīru kimāhvayasi bhāskaram /
yadi māmavajānāsi ṛṣiḥ sa na bhaviṣyati //

mantradānena yasmāttvamavalepena darpitā /
kulaṃ ca te'dya dhakṣyāmi krodhadīptena cakṣuṣā //
vaiśampāyana uvāca /

evamuktā bahuvidhaṃ sāntvapūrvaṃ vivasvatā /
sā tu naicchadvarārohā kanyāhamiti bhārata //

bandhupakṣabhayādbhītā lajjayā ca yaśasvinī /
tāmarkaḥ punarevedabravīdbharatarṣabha //

matprasādānna te rājñi bhavitā doṣa ityuta //
kuntyuvāca /

prasīda bhagavanmahyamavalepo hi nāsti me /
tvayaiva parihāryaṃ syātkanyābhāvasya dūṣaṇam //
āditya uvāca /

vyapayātu bhayaṃ te'dya kumāraṃ prasamīkṣase /
mayā tvaṃ cāpyanujñātā punaḥ kanyā bhaviṣyasi //
vaiśampāyana uvāca /

evamuktā tataḥ kuntī samprahṛṣṭatanūruhā /
saṅgatā'bhūttadā subhrūrādityena mahātmanā //

prakāśakarmā tapanaḥ kanyāgarbhaṃ dadau punaḥ / tatra vīraḥ samabhavatsarvaśastrabhṛtāṃ varaḥ //

āmuktakavacaḥ śrīmāndevagarbhaḥ śriyānvitaḥ /
sahajaṃ kavacaṃ bibhratkuṇḍaloddyotitānanaḥ //

ajāyata sutaḥ karṇaḥ sarvalokeṣu viśrutaḥ /
prādācca tasyai kanyātvaṃ punaḥ sa paramadyutiḥ //

dattvā ca tapatāṃ śreṣṭho divamācakrame tataḥ /
dṛṣṭvā kumāraṃ jātaṃ sā vārṣṇeyī dīnamānasā //

ekāgraṃ cintayāmāsa kiṃ kṛtvā sukṛtaṃ bhavet /
gūhamānāpacāraṃ sā bandhupakṣabhayāttadā //

mañjūṣāṃ ratnasampūrṇāṃ kṛtvā bālasamāśritām /
utsasarja kumāraṃ taṃ jale kuntī mahābalam //

tamutsṛṣṭaṃ jale garbhaṃ rādhābhartā mahāyaśāḥ /
putratve kalpayāmāsa sabhāryaḥ sūtanandanaḥ //

nāmadheyaṃ ca cakrāte tasya bālasya tāvubhau /
vasunā saha jāto'yaṃ vasuṣeṇo bhavatviti //

sa vardhamāno balavānsarvāstreṣūdyato'bhavat /
āpṛṣṭhatāpādādityamupātiṣṭhata vīryavān //

tasminkāle tu japatastasya vīrasya dhīmataḥ /
nādeyaṃ brāhmaṇeṣvāsītkiñcidvasu mahītale //

tataḥ kāle tu kasmiṃścitsvapnānte karṇamabravīt /
ādityo brāhmaṇo bhūtvā śṛṇu vīra vaco mama //

prabhātāyāṃ rajanyāṃ tvāmāgamiṣyati vāsavaḥ /
na tasya bhikṣā dātavyā viprarūpī bhaviṣyati //

niścayo'syāpahartuṃ te kavacaṃ kuṇḍale tathā /
atastvāṃ bodhayāmyeṣa smartāsi vacanaṃ mama //
karṇa uvāca /

śakro māṃ viprarūpeṇa yadi vai yācate dvija /
kathaṃ tasmai na dāsyāmi yathā cāsmyavabodhitaḥ //

viprāḥ pūjyāstu devānāṃ satataṃ priyamicchatām /
taṃ devadevaṃ jānanvai na śakto'smyavamantraṇe //
sūrya uvāca /

yadyevaṃ śṛṇu me vīra varaṃ te so'pi dāsyati /
śaktiṃ tvamapi yācethāḥ sarvaśatruvibādhinīm //
vaiśampāyana uvāca /

evamuktvā dvijaḥ svapne tatraivāntaradhīyata /
karṇaḥ prabuddhastaṃ svapnaṃ cintayāno'bhavattadā //

tamindro brāhmaṇo bhūtvā putrārthaṃ bhūtabhāvanaḥ /
kuṇḍale prārthayāmāsa kavacaṃ ca mahādyutiḥ //

utkṛtyāvimanāḥ svāṅgātkavacaṃ rudhirasravam /
karṇau pārśve ca dve chittvā prāyacchatsa kṛtāñjaliḥ //

pratigṛhya tu deveśastuṣṭastenāsya karmaṇā /
aho sāhasamityāha manasā vāsavo hasan //

devadānavayakṣāṇāṃ gandharvoragarakṣasām /
na taṃ paśyāmi yo hyetatkarma kartā bhaviṣyati //

prīto'smi karmaṇā tena varaṃ brūhi yadicchasi /
karṇa uvāca /
icchāmi bhagavaddattāṃ śaktiṃ śatrunibarhaṇīm //
vaiśampāyana uvāca /

śaktiṃ tasmai dadau śakro vismayādvākyamabravīt /
devadānavayakṣāṇāṃ gandharvoragarakṣasām //

yasmai kṣepsyasi ruṣṭaḥ sanso'nayā na bhaviṣyati / hatvaikaṃ samare śatruṃ tato māmāgamiṣyati /
ityuktvāntardadhe śakro varaṃ dattvā tu tasya vai //

prāṅnāma tasya kathitaṃ vasuṣeṇa iti kṣitau /
karṇo vaikartanaścaiva karmaṇā tena so'bhavat //