Mahabharata · Chapter 1.119

guṇaiḥ samuditaṃ samyagidaṃ naḥ prathitaṃ kulam /
atyanyānpṛthivīpālānpṛthivyāmadhirājyabhāk //

rakṣitaṃ rājabhiḥ pūrvaṃ dharmavidbhirmahātmabhiḥ /
notsādamagamaccedaṃ kadācidiha naḥ kulam //

mayā ca satyavatyā ca kṛṣṇena ca mahātmanā /
samavasthāpita bhūyo yuṣmāsu kulatantuṣu //

taccaitadvardhate bhūyaḥ kulaṃ sāgaravadyathā /
tathā mayā vidhātavyaṃ tvayā caiva na saṃśayaḥ //

śrūyate yādavī kanyā svanurūpā kulasya naḥ /
subalasyātmajā caiva tathā madreśvarasya ca //

kulīnā rūpavatyaśca tāḥ kanyāḥ putra sarvaśaḥ /
ucitāścaiva sambandhe te'smākaṃ kṣatriyarṣabhāḥ //

manye varayitavyāstā ityahaṃ dhīmatāṃ vara /
santānārthaṃ kulasyāsya yadvā vidura manyase //
vidura uvāca /

bhavānpitā bhāvanmātā bhavānnaḥ paramo guruḥ /
tasmātsvayaṃ kulasyāsya vicārya kuru yaddhitam //
vaiśampāyana uvāca /

atha śuśrāva viprebhyo gāndhārīṃ subalātmajām /
ārādhya varadaṃ devaṃ bhaganetraharaṃ haram //

gāndhārī kila putrāṇāṃ śataṃ lebhe varaṃ śubhā /
iti śuśrāva tattvena bhīṣmaḥ kurupitāmahaḥ //

tato gāndhārarājasya preṣayāmāsa bhārata /
acakṣuriti tatrāsītsubalasya vicāraṇā //

kulaṃ khyātiṃ ca vṛttaṃ ca buddhyā tu prasamīkṣya saḥ /
dadai tāṃ dhṛtarāṣṭrāya gāndhārīṃ dharmacāriṇīm //

gāndhārī tvatha śuśrāva dhṛtarāṣṭramacakṣuṣam /
ātmānaṃ dipsitaṃ cāsmai pitrā mātrā ca bhārata //

tataḥ sā paṭamādāya kṛtvā bahuguṇaṃ tadā /
babandha netre sve rājanpativrataparāyaṇā //

nābhyasūyāṃ patimahamityevaṃ kṛtaniścayā /
tato gāndhārarājasya putraḥ śakunirabhyayāt //

svasāraṃ parayā lakṣmyā yuktāmādāya kauravān / tāṃ tadā dhṛtarāṣṭrāya dadau paramasatkṛtām /
bhīṣmasyānumate caiva vivāhaṃ samakārayat //

dattvā sa bhaginīṃ vīro yathārhaṃ ca paricchadam /
punarāyātsvanagaraṃ bhīṣmeṇa pratipūjitaḥ //

gāndhāryapi varārohā śīlācāraviciṣeṭitaiḥ /
tuṣṭiṃ kurūṇāṃ sarveṣāṃ janayāmāsa bhārata //

gāndhārī sā patiṃ dṛṣṭvā prajñācakṣuṣamīśvaram /
aticārādbhṛśaṃ bhītā bhartuḥ sā samacintayat //

sā dṛṣṭivinivṛttyā hi bhartuśca samatāṃ yayau /
nahi sūkṣmepyatīcāre bhartuḥ sā vavṛte tadā //

vṛttenārādhya tānsarvāngurūnpatiparāyaṇā /
vācāpi puruṣānanyānsuvratā nānvakīrtayat //

tasyāḥ sahodarīḥ kanyāḥ punareva dadau daśa /
gāndhārarājaḥ subalo bhīṣmeṇa ca vṛtastadā //

satyavratāṃ satyasenāṃ sudeṣṇāṃ cāpi saṃhitām /
tejaśśrvāṃ suśravāṃ ca tathaiva nikṛtiṃ śubhām //

śambhvaṭhāṃ ca daśārṇāṃ ca gāndhārīrdaśa viśrutāḥ /
ekāhnā pratijagrāha dhṛtarāṣṭro janeśvaraḥ //

tataḥ śāntanavo bhīṣmo dhānuṣkastāstatastataḥ / adadāddhṛtarāṣṭrasya rājaputrīḥ paraśśatam //