Mahabharata · Chapter 1.121

satvarūpaguṇopetā dharmārāmā mahāvratā /
duhitā kuntibhojasya pṛthā pṛthulalocanā //

tāṃ tu tejasvinīṃ kanyāṃ rūpayauvanaśālinīm /
vyāvṛṇvanpārthivāḥ kecidatīva strīguṇairyutām //

tataḥ sā kuntibhojena rājñāhūya narādhipān /
pitrā svayaṃvare dattā duhitā rājasattama //

tataḥ sā raṅgamadhyasthaṃ teṣāṃ rājñāṃ manasvinī /
dadarśa rājaśārdūlaṃ pāṇḍuṃ bharatasattamam //

siṃhadarpaṃ mahoraskaṃ vṛṣabhākṣaṃ mahābalam /
ādityamiva sarveṣāṃ rājñāṃ pracchādya vai prabhāḥ //

tiṣṭhantaṃ rājasamitau purandaramivāparam /
taṃ dṛṣṭvā sā'navadyāṅgī kuntibhojasutā śubhā //

pāṇḍuṃ naravaraṃ raṅge hṛdayenākulā'bhavat /
tataḥ kāmaparītāṅgī sakṛtpracalamānasā //

vrīḍamāna srajaṃ kuntī rājñaḥ skandhe samāsajat /
taṃ niśamya vṛtaṃ pāṇḍuṃ kuntyā sarve narādhipāḥ //

yathāgataṃ samājagmurgajairaśvai rathaistathā /
tatastasyāḥ pitā rājanvivāhamakarotprabhuḥ //

sa tayā kuntibhojasya duhitrā kurunandanaḥ /
yuyuje'mitasaubhāgyaḥ paulomyā maghavāniva //

kuntyāḥ pāṇḍośca rājendra kuntibhojo mahīpatiḥ / kṛtvodvāhaṃ tadā taṃ tu nānāvasubhirarcitam /
svapuraṃ preṣayāmāsa sa rājā kurusattama //

tato balena mahatā nānādhvajapatākinā /
stūyamānaḥ sa cāśīrbhirbrāhmaṇaiśca maharṣibhiḥ //

samprāpya nagaraṃ rājā pāṇḍuḥ kauravanandanaḥ /
nyaveśata tāṃ bhāryāṃ kuntīṃ svabhavane prabhuḥ //