Mahabharata · Chapter 1.12

kathaṃ hiṃsitavānsarpānsa rājā janamejayaḥ /
sarpā vā hiṃsitāstatra kimarthaṃ dvijasattama //

kimarthaṃ mokṣitāścaiva pannagāstena dhīmatā /
āstīkena dvijaśreṣṭha śrotumicchāmyaśeṣataḥ //
ṛṣiruvāca /

śroṣyasi tvaṃ ruro sarvamāstīkacaritaṃ mahat /
brāhmaṇānāṃ kathayatāṃ tvarāvāngamane hyaham //
sautiruvāca /

ityuktvāntarhite yogāttasminnṛṣivare prabhau / sambhramāviṣṭahṛdayo rururmene tadadbhutam //

balaṃ paramamāsthāya paryadhāvatsamantataḥ /
tamṛṣiṃ naṣṭamanvicchansaṃśrānto nyapatadbhuvi //

sa mohe paramaṃ gatvā naṣṭasañjña ivābhavat /
tadṛṣervacanaṃ tathyaṃ cintayānaḥ punaḥpunaḥ //

labdhasañjño ruruścāyāttadācakhyau pitustadā /
pitre tu sarvamākhyāya ḍuṇḍubhasya vaco'rthavat //

apṛcchatpitaraṃ bhūyaḥ sostīkasya vacastadā /
ākhyāpayattadā'khyānaṃ ḍuṇḍubhenātha kīrtitam //

tatkīrtyamānaṃ bhagavañśrotumicchāmi tattvataḥ / pitā cāsya tadākhyānaṃ pṛṣṭaḥ sarvaṃ nyavedayat //