Mahabharata · Chapter 1.11

sakhā babhūva me pūrvaṃ khagamo nāma vai dvijaḥ /
bhṛśaṃ saṃśitavāktāta tapobalasamanvitaḥ //

sa mayā krīḍatā bālye kṛtvā tārṇaṃ bhujangamam /
agnihotre prasaktastu bhīṣitaḥ pramumoha vai //

labdhvā sa ca punaḥ sañjñāṃ māmuvāca tapodhanaḥ /
nardahanniva kopena satyavāksaṃśitavrataḥ //

yathāvīryastvayā sarpaḥ kṛto'yaṃ madbibhīṣayā /
tathāvīryo bhujangastvaṃ mama śāpādbhaviṣyasi //

tasyāhaṃ tapaso vīryaṃ jānannāsaṃ tapodhana /
bhṛśamudvignahṛdayastamavocamahaṃ tadā //

praṇataḥ sambhramāccaiva prāñjaliḥ purataḥ sthitaḥ /
sakheti hasatedaṃ te narmārthaṃ vai kṛtaṃ mayā //

kṣantumarhasi me brahmañśāpo'yaṃ vinivartyatām /
so'tha māmabravīddṛṣṭvā bhṛśamudvignacetasam //

muhuruṣṇaṃ viniḥśvasya susambhrāntastapodhanaḥ /
nānṛtaṃ vai mayā proktaṃ bhavitedaṃ kathañcana //

yattu vakṣyāmi te vākyaṃ śṛṇu tanme tapodhana /
śrutvā ca hṛdi te vākyamidamastu sadā'nagha //

utpatsyati rururnāma pramaterātmajaḥ śuciḥ / taṃ dṛṣṭvā śāpamokṣaste bhavitā nacirādiva /
evamuktastu tenāhamuragatvamavāptavān //

sa tvaṃ rururiti khyātaḥ pramaterātmajo'pi ca /
svarūpaṃ pratipadyāhamadya vakṣyāmi te hitam //
sautiruvāca /

sa ḍauṇḍubhaṃ parityajya rūpaṃ viprarṣabhastadā /
svarūpaṃ bhāsvaraṃ bhūyaḥ pratipede mahāyaśāḥ //

idaṃ covāca vacanaṃ rurumapratimaujasam /
ahiṃsā paramo dharmaḥ sarvaprāṇabhṛtāṃ vara //

tasmātprāṇabhṛtaḥ sarvānna hiṃsyādbrāhmaṇaḥ kvacit /
brāhmaṇaḥ saumya eveha bhavatīti parā śrutiḥ //

vedavedāṅgavinnāma sarvabhūtābhayapradaḥ /
ahiṃsā satyavacanaṃ kṣamā ceti viniścitam //

brāhmaṇasya paro dharmo vedānāṃ dhāraṇāpi ca /
kṣatriyasya hi yo dharmaḥ sa neheṣyeta vai tava //

daṇḍadhāraṇamugratvaṃ prajānāṃ paripālanam /
tadidaṃ kṣatriyasyāsītkarma vai śṛṇu me ruro //

janamejayasya yajñe'sminsarpāṇāṃ hiṃsanaṃ purā /
paritrāṇaṃ ca bhītānāṃ sarpāṇāṃ brāhmaṇādapi //

tapovīryabalopetādvedavedāṅgapāragāt /
āstīkāddvijamukhyādvai sarpasatre dvijottama //