Scripture Library

Mahabharata · Chapter 1.111

1.111.1

ambāyāṃ nirgatāyāṃ tu bhīṣmaḥ śāntanavastadā /
nyāyena kārayāmāsa rājño vaivāhikīṃ kriyām //

1.111.2

ambikāmbālike caiva pariṇīyāgnisannidhau / tayoḥ pāṇī gṛhītvā tu kauravyo rūpadarpitaḥ /
vicitravīryo dharmātmā kāmātmā samapadyata //

1.111.3

te cāpi bṛhatīśyāme nīlakuñcitamūrdhaje /
raktatuṅganakhopete pīnaśroṇipayodhaṟe //

1.111.4

ātmanaḥ pratirūpo'sau labdhaḥ patiriti sthite /
vicitravīryaṃ kalyāṇyau pūjayāmāsatuḥ śubhe //

1.111.5

anyonyaṃ prati sakte ca ekabhāve iva sthite / sa cāśvirūpasadṛśo devatulyaparākramaḥ /
sarvāsāmeva nārīṇāṃ cittapramathano rahaḥ //

1.111.6

tābhyāṃ saha samāḥ sapta viharanpṛthivīpatiḥ /
vicitravīryastaruṇo yakṣmaṇā samagṛhyata //

1.111.7

suhṛdāṃ yatamānānāmāptaiḥ saha cikitsakaiḥ /
jagāmāstamivādityaḥ kauravyo yamasādanam //

1.111.8

dharmātmā sa tu gāṅgeyaḥ cintāśokaparāyaṇaḥ /
pretakāryāṇi sarvāṇi tasya samyagakārayat //

1.111.9

rājño vicitravīryasya satyavatyā mate sthitaḥ /
ṛtvigbiḥ sahito bhīṣmaḥ sarvaiśca kurupuṅgavaiḥ //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0