Mahabharata · Chapter 1.112

tataḥ satyavatī dīnā kṛpaṇā putragṛddhinī /
putrasya kṛtvā kāryāṇi snuṣābhyāṃ saha bhārata //

samāśvāsya snuṣe te ca bhartṛśokanipīḍite / dharmaṃ ca pitṛvaṃśaṃ ca mātṛvaṃśaṃ ca bhāminī /
prasamīkṣya mahābhāgā gāṅgeyaṃ vākyamabravīt //

duḥkhārditā tu sā devī majjantī śokasāgare / śantanordharmanityasya kauravyasya yaśasvinaḥ /
tvayi piṇḍaśca kīrtiśca santānaśca pratiṣṭhitaḥ //

bhrātā vicitravīryaste bhūtānāmantameyivān / yathākarma śubhaṃ kṛtvā svargopagamanaṃ dhruvam /
yathā cāyurdhruvaṃ satye tvayi dharmastathā dhruvaḥ //

vettha dharmāṃśca dharmajña samāsenetareṇa ca /
vividhāstvaṃ śrutīrvettha vedāṅgāni ca sarvaśaḥ //

vyavasthānaṃ ca te dharme kulācāraṃ ca lakṣaye /
pratipattiṃ ca kṛcchreṣu śukrāṅgirasayoriva //

tasmātsubhṛśamāśvasya tvayi dharmabhṛtāṃ vara /
kārye tvāṃ viniyokṣyāmi tacchrutvā kartumarhasi //

mama putrastava bhrātā vīryavānsupriyaśca te /
bāla eva gataḥ svargamaputraḥ puruṣarṣabha //

ime mahiṣyau bhrātuste kāśirājasute śubhe /
rūpayauvanasampanne putrakāme ca bhārata //

tayorutpādayāpatyaṃ santānāya kulasya naḥ /
manniyogānmahābāho dharmaṃ kartumihārhasi //

rājye caivābhiṣicyasva bhāratānanuśādhi ca /
dārāṃśca kuru dharmeṇa mā nimajjīḥ pitāmahān //
vaiśampāyana uvāca /

tathocyamāno mātrā sa suhṛdbhiśca parantapaḥ /
ityuvācātha dharmātmā dharmyamevottaraṃ vacaḥ //

asaṃśayaṃ paro dharmastvayā mātarudāhṛtaḥ /
tvamapatyaṃ prati ca me pratijñāṃ vettha vai parāṃ //

jānāsi ca yathāvṛttaṃ śulkahetostvadantare /
sa satyavati satyaṃ te pratijānāmyahaṃ punaḥ //

parityajeyaṃ trailokyaṃ rājyaṃ deveṣu vā punaḥ /
yadvā'pyadhikametābhyāṃ na tu satyaṃ kathañcana //

tyajecca pṛthivī gandhamāpaśca rasamātmanaḥ /
jyotistathā tyajedrūpaṃ vāyuḥ sparśaguṇaṃ tyajet //

prabhāṃ samutsṛjedarko dhūmaketustathoṣmatām /
tyajecchabdaṃ tathā'kāśaṃ somaḥ śītāṃśutāṃ tyajet //

vikramaṃ vṛtrahā jahyāddharmaṃ jahyācca dharmarāṭ /
na tvahaṃ satyamutsraṣṭuṃ vyavaseyaṃ kathañcana //

tanna jātvanyathā kuryāṃ lokānāmapi sankṣaye / amaratvasya vā hetostrailokyasya dhanasya ca //

evamuktā tu putreṇa bhūridraviṇatejasā /
mātā satyavatī bhīṣmamuvāca tadanantaram //

jānāmi te sthitiṃ satye parāṃ satyaparākrama /
icchansṛjethāstrīṃllokānanyāṃstvaṃ svena tejasā //

jānāmi caivaṃ satyaṃ tanmadarthe yacca bhāṣitam /
āpaddharmaṃ tvamāvekṣya vaha paitāmahīṃ dhuram //

yathā te kulatantuśca dharmaśca na parābhavet /
suhṛdaśca prahṛṣyeraṃstathā kuru parantapa //

ātmanaśca hitaṃ tāta priyaṃ ca mama bhārata / lālapyamānāṃ tāmevaṃ kṛpaṇāṃ putragṛddhinīm /
dharmādapetaṃ bruvatīṃ bhīṣmo bhūyo'bravīdidam //

rājñi dharmānavekṣasva mā naḥ sarvānvyanīnaśaḥ /
satyāccyutiḥ kṣatriyasya na dharmeṣu praśasyate //

śāntanorapi santānaṃ yathā syādakṣayaṃ bhuvi /
tatte dharmaṃ pravakṣyāmi kṣātraṃ rājñi sanātanam //

śrutvā taṃ pratipadyasva prājñaiḥ saha purohitaiḥ /
āpaddharmārthakuśalairlokatantramavekṣya ca //