Mahabharata · Chapter 1.110

anyapūrveti māṃ sālvo nābhinandati bāliśaḥ /
sāhaṃ dharmācca kāmācca vihīnā śokadhāriṇī //

apatiḥ kṣatriyānsarvānākrandāmi samantataḥ /
iyaṃ vaḥ kṣatriyā mālā yā bhīṣmaṃ nihaniṣyati //

ahaṃ ca bhāryā tasya syāṃ yo bhīṣmaṃ ghātayiṣyati /
tasyāścaṅkramyamāṇāyāḥ samāḥ pañca gatāḥ parāḥ //

nābhavaccharaṇaṃ kaścitkṣatriyo bhīṣmajādbhayāt /
agacchatsomakaṃ sā'mbā pāñcāleṣu yaśasvinam //

satyasandhaṃ maheṣvāsaṃ satyadharmaparāyaṇam /
sā sabhādvāramāgamya pāñcālairabhirakṣitam //

pāñcālarājamākrandatpragṛhya subhujā bhujau /
bhīṣmeṇa hanyamānāṃ māṃ majjantīmiva ca hrade //

yajñasenābhidhāveha pāṇimālambya coddhara /
tena me sarvadharmāśca ratibhogāśca kevalāḥ //

ubhau ca lokau kīrtiśca samūlau saphalau hṛtau /
***ntyevaṃ na vindāmi rājanyaṃ śaraṇaṃ kvacit //

kiṃ nu niḥkṣatriyo loko yatrānātho'vasīdati /
samāgamya tu rājāno mayoktā rājasattamāḥ //

śṛṇvantu sarve rājāno mayoktaṃ rājasattamāḥ /
ikṣvākūṇāṃ tu ye vṛddhāḥ pāñcālānāṃ ca ye varāḥ //

tvatprasādādvivāhe'sminmā dharmo mā parājayet /
prasīda yajñaseneha gatirme bhava somaka //
yajñasena uvāca /

jānāmi tvāṃ bodhayāmi rājaputri viśeṣataḥ /
yathāśakti yathādharmaṃ balaṃ sandhārayāmyaham //

anyasmātpārthivādyatte bhayaṃ syātpārthivātmaje /
tasyāpanayane hetuṃ saṃvidhātumahaṃ prabhuḥ //

nahi śāntanavasyāhaṃ mahāstrasya prahāriṇaḥ /
īśvaraḥ kṣatriyāṇāṃ hi balaṃ dharmo'nuvartate //

sā sādhu vraja kalyāṇi na māṃ bhīṣmo dahedbalāt /
na pratyagṛhṇaṃste sarve kimityeva na vedmyaham //

na hi bhīṣmādahaṃ dharmaṃ śakto dātuṃ kathañcana /
vaiśampāyana uvāca /
ityuktā srajamāsajya dvāri rājño vyapādravat //

vyudastāṃ sarvalokeṣu tapasā saṃśitavratām /
tāmanvagacchaddrupadaḥ sāntvaṃ jalpanpunaḥ punaḥ //

srajaṃ gṛhāṇa kalyāṇi na no vairaṃ prasañjaya //
ambovāca /

evameva tvayā kāryamiti sma pratikāṅkṣate /
na tu tasyānyathā bhāvo daivametadamānuṣam //

yaścaināṃ srajamādāya svayaṃ vai pratimokṣate /
sa bhīṣmaṃ samare hantā mama dharmapraṇāśanam //
vaiśampāyana uvāca /

tāṃ srajaṃ drupado rājā kañcitkālaṃ rarakṣa saḥ /
tato visrambhamāsthāya tūṣṇīmetāmupaikṣata //

tāṃ śikhaṇḍinyabadhnāttu bālā pituravajñayā /
tāṃ pitā tvatyajacchīghraṃ trasto bhīṣmasya kilbiṣāt //

iṣīkaṃ brāhmaṇaṃ bhītā sābhyagacchattapasvinam /
gaṅgādvāri tapasyantaṃ tuṣṭihetostapasvinī //

upacārābhituṣṭastāmabravīdṛṣisattamaḥ /
gaṅgādvāre vibhajanaṃ bhavitā nacirādiva //

tatra gandharvarājānaṃ tumburuṃ priyadarśanam /
ārādhayitumīhasva samyakparicarasva tam //

ahamapyatra sācivyaṃ kartāsmi tava śobhane /
taṃ tadācara bhadraṃ te sa te śreyo vidhāsyati //

tato vibhajanaṃ tatra gandharvāṇāmavartata /
tatra dvāvavaśiṣyetāṃ gandharvāvamitau jasau //

tayorekaḥ samīkṣyaināṃ strībubhūṣuruvāca ha /
idaṃ gṛhṇīṣva puṃliṅgaṃ vṛṇe strīliṅgameva te //

niyamaṃ cakratustatra strī pumāṃścaiva tāvubhau /
tataḥ pumānsamabhavacchikhaṇḍī paravīrahā //

strī bhūtvā hyapacakrāma sa gandharvo mudānvitaḥ /
labdhvā tu mahatīṃ prītiṃ yājñasenirmahāyaśāḥ //

tato budbudakaṃ gatvā punarastrāṇi so'karot /
tatra cāstrāṇi divyāni kṛtvā sa sumahādyutiḥ //

svadeśamabhisampade pāñcālaṃ kurunandana /
so'bhivādya pituḥ pādau maheṣvāsaḥ kṛtāñjaliḥ //

uvāca bhavatā bhīṣmānna bhetavyaṃ kathañcana //