મહાભારત · અધ્યાય 1.111

અમ્બાયાં નિર્ગતાયાં તુ ભીષ્મઃ શાન્તનવસ્તદા ।
ન્યાયેન કારયામાસ રાજ્ઞો વૈવાહિકીં ક્રિયામ્ ॥

અમ્બિકામ્બાલિકે ચૈવ પરિણીયાગ્નિસન્નિધૌ । તયોઃ પાણી ગૃહીત્વા તુ કૌરવ્યો રૂપદર્પિતઃ ।
વિચિત્રવીર્યો ધર્માત્મા કામાત્મા સમપદ્યત ॥

તે ચાપિ બૃહતીશ્યામે નીલકુઞ્ચિતમૂર્ધજે ।
રક્તતુઙ્ગનખોપેતે પીનશ્રોણિપયોધṟએ ॥

આત્મનઃ પ્રતિરૂપોઽસૌ લબ્ધઃ પતિરિતિ સ્થિતે ।
વિચિત્રવીર્યં કલ્યાણ્યૌ પૂજયામાસતુઃ શુભે ॥

અન્યોન્યં પ્રતિ સક્તે ચ એકભાવે ઇવ સ્થિતે । સ ચાશ્વિરૂપસદૃશો દેવતુલ્યપરાક્રમઃ ।
સર્વાસામેવ નારીણાં ચિત્તપ્રમથનો રહઃ ॥

તાભ્યાં સહ સમાઃ સપ્ત વિહરન્પૃથિવીપતિઃ ।
વિચિત્રવીર્યસ્તરુણો યક્ષ્મણા સમગૃહ્યત ॥

સુહૃદાં યતમાનાનામાપ્તૈઃ સહ ચિકિત્સકૈઃ ।
જગામાસ્તમિવાદિત્યઃ કૌરવ્યો યમસાદનમ્ ॥

ધર્માત્મા સ તુ ગાઙ્ગેયઃ ચિન્તાશોકપરાયણઃ ।
પ્રેતકાર્યાણિ સર્વાણિ તસ્ય સમ્યગકારયત્ ॥

રાજ્ઞો વિચિત્રવીર્યસ્ય સત્યવત્યા મતે સ્થિતઃ ।
ઋત્વિગ્બિઃ સહિતો ભીષ્મઃ સર્વૈશ્ચ કુરુપુઙ્ગવૈઃ ॥