Mahabharata · Chapter 1.108

cedirājasutāṃ jñātvā dāśarājena vardhitām / vivāhaṃ kārayāmāsa śāstradṛṣṭena karmaṇā //

tato vivāhe nirvṛtte sa rājā śāntanurnṛpaḥ /
tāṃ kanyāṃ rūpasampannāṃ svagṛhe sannyaveśayat //

tataḥ śāntanavo dhīmānsatyavatyāmajāyata /
vīraścitrāṅgado nāma vīryavānpuruṣeśvaraḥ //

athāparaṃ maheṣvāsaṃ satyavatyāṃ sutaṃ prabhuḥ /
vicitravīryaṃ rājānaṃ janayāmāsa vīryavān //

aprāptavati tasmiṃstu yauvanaṃ puruṣarṣabhe /
sa rājā śāntanurdhīmānkāladharmamupeyivān //

svargate śāntanau bhīṣmaścitrāṅgadamarindanam /
sthāpayāmāsa vai rājye satyavatyā mate sthitaḥ //

sa tu citrāṅgadaḥ śauryātsarvāṃścikṣepa pārthivān /
manuṣyaṃ na hi mena sa kañcitsadṛśamātmanaḥ //

taṃ kṣipantaṃ surāṃścaiva manuṣyānasurāṃstathā /
gandharvarājo balavāṃstulyanāmā'bhyayāttadā //
gandharva uvāca /

tvaṃ vai sadṛśanāmāsi yuddhaṃ dehi nṛpātmaja /
nāma vā'nyatpragṛhṇīṣva yadi yuddhaṃ na dāsyasi //

tvayāhaṃ yuddhamicchāmi tvatsakāśaṃ tu nāmataḥ /
āgatosmi vṛthā'bhāṣya na gacchennāma te mama //

ityuktvā garjamānau tau hiraṇvatyāstaṭaṃ gatau /
tenāsya sumahadyuddhaṃ kurukṣetre babhūva ha //

tayorbalavatostatra gandharvakurumukhyayoḥ /
nadyāstīre hiraṇvatyāḥ samāstisro'bhavadraṇaḥ //

tasminvimarde tumule śastravarṣasamākule /
māyādhiko'vadhīdvīraṃ gandharvaḥ kurusattamam //

sa hatvā tu naraśreṣṭhaṃ citrāṅgadamarindamam /
antāya kṛtvā gandharvo divamācakrame tataḥ //

tasminpuruṣaśārdūle nihate bhūritejasi /
bhīṣmaḥ śāntanavo rājā pretakāryāṇyakārayat //

vicitravīryaṃ ca tadā bālamaprāptayauvanam /
kururājye mahābāhurabhyaṣiñcadanantaram //

vicitravīryaḥ sa tadā bhīṣmasya vacane sthitaḥ /
anvaśāsanmahārāja pitṛpaitāmahaṃ padam //

sa dharmaśāstrakuśalaṃ bhīṣmaṃ śāntanavaṃ nṛpaḥ /
pūjayāmāsa dharmeṇa sa cainaṃ pratyapālayat //