મહાભારત · અધ્યાય 1.108

ચેદિરાજસુતાં જ્ઞાત્વા દાશરાજેન વર્ધિતામ્ । વિવાહં કારયામાસ શાસ્ત્રદૃષ્ટેન કર્મણા ॥

તતો વિવાહે નિર્વૃત્તે સ રાજા શાન્તનુર્નૃપઃ ।
તાં કન્યાં રૂપસમ્પન્નાં સ્વગૃહે સન્ન્યવેશયત્ ॥

તતઃ શાન્તનવો ધીમાન્સત્યવત્યામજાયત ।
વીરશ્ચિત્રાઙ્ગદો નામ વીર્યવાન્પુરુષેશ્વરઃ ॥

અથાપરં મહેષ્વાસં સત્યવત્યાં સુતં પ્રભુઃ ।
વિચિત્રવીર્યં રાજાનં જનયામાસ વીર્યવાન્ ॥

અપ્રાપ્તવતિ તસ્મિંસ્તુ યૌવનં પુરુષર્ષભે ।
સ રાજા શાન્તનુર્ધીમાન્કાલધર્મમુપેયિવાન્ ॥

સ્વર્ગતે શાન્તનૌ ભીષ્મશ્ચિત્રાઙ્ગદમરિન્દનમ્ ।
સ્થાપયામાસ વૈ રાજ્યે સત્યવત્યા મતે સ્થિતઃ ॥

સ તુ ચિત્રાઙ્ગદઃ શૌર્યાત્સર્વાંશ્ચિક્ષેપ પાર્થિવાન્ ।
મનુષ્યં ન હિ મેન સ કઞ્ચિત્સદૃશમાત્મનઃ ॥

તં ક્ષિપન્તં સુરાંશ્ચૈવ મનુષ્યાનસુરાંસ્તથા ।
ગન્ધર્વરાજો બલવાંસ્તુલ્યનામાઽભ્યયાત્તદા ॥
ગન્ધર્વ ઉવાચ ।

ત્વં વૈ સદૃશનામાસિ યુદ્ધં દેહિ નૃપાત્મજ ।
નામ વાઽન્યત્પ્રગૃહ્ણીષ્વ યદિ યુદ્ધં ન દાસ્યસિ ॥

ત્વયાહં યુદ્ધમિચ્છામિ ત્વત્સકાશં તુ નામતઃ ।
આગતોસ્મિ વૃથાઽભાષ્ય ન ગચ્છેન્નામ તે મમ ॥

ઇત્યુક્ત્વા ગર્જમાનૌ તૌ હિરણ્વત્યાસ્તટં ગતૌ ।
તેનાસ્ય સુમહદ્યુદ્ધં કુરુક્ષેત્રે બભૂવ હ ॥

તયોર્બલવતોસ્તત્ર ગન્ધર્વકુરુમુખ્યયોઃ ।
નદ્યાસ્તીરે હિરણ્વત્યાઃ સમાસ્તિસ્રોઽભવદ્રણઃ ॥

તસ્મિન્વિમર્દે તુમુલે શસ્ત્રવર્ષસમાકુલે ।
માયાધિકોઽવધીદ્વીરં ગન્ધર્વઃ કુરુસત્તમમ્ ॥

સ હત્વા તુ નરશ્રેષ્ઠં ચિત્રાઙ્ગદમરિન્દમમ્ ।
અન્તાય કૃત્વા ગન્ધર્વો દિવમાચક્રમે તતઃ ॥

તસ્મિન્પુરુષશાર્દૂલે નિહતે ભૂરિતેજસિ ।
ભીષ્મઃ શાન્તનવો રાજા પ્રેતકાર્યાણ્યકારયત્ ॥

વિચિત્રવીર્યં ચ તદા બાલમપ્રાપ્તયૌવનમ્ ।
કુરુરાજ્યે મહાબાહુરભ્યષિઞ્ચદનન્તરમ્ ॥

વિચિત્રવીર્યઃ સ તદા ભીષ્મસ્ય વચને સ્થિતઃ ।
અન્વશાસન્મહારાજ પિતૃપૈતામહં પદમ્ ॥

સ ધર્મશાસ્ત્રકુશલં ભીષ્મં શાન્તનવં નૃપઃ ।
પૂજયામાસ ધર્મેણ સ ચૈનં પ્રત્યપાલયત્ ॥