Laghusiddhāntakaumudī · Verses 783-802

mṛjeḥ kyabvā / mṛjyaḥ //
ṛhalorṇyat

ṛvarṇāntāddhalantācca dhātorṇyat / kāryam / hāryam / dhāryam //
cajoḥ ku ghiṇṇyatoḥ

cajoḥ kutvaṃ syāt ghiti ṇyati ca pare //
mṛjervṛddhiḥ

mṛjeriko vṛddhiḥ sārvadhātukārdhadhātukayoḥ / mārgyaḥ //
bhojyaṃ bhakṣye

bhogyamanyat //
iti kṛtyaprakriyā //
atha pūrvakṛdantam
ṇvultṛcau

dhātoretau staḥ / kartari kṛditi kartrarthe //
yuvoranākau

yu vu etayoranākau staḥ / kārakaḥ / kartā //
nandigrahipacādibhyo lyuṇinyacaḥ

nandyāderlyuḥ, grahyāderṇiniḥ, pacāderac syāt / nandayatīti nandanaḥ / janamardayatīti janārdanaḥ / lavaṇaḥ / grāhī / sthāyī / mantrī / pacādirākṛtigaṇaḥ //
igupadhajñāprīkiraḥ kaḥ

ebhyaḥ kaḥ syāt / budhaḥ / kṛśaḥ / jñaḥ / priyaḥ / kiraḥ //
ātaścopasarge

prajñaḥ / suglaḥ //
gehe kaḥ

gehe kartari graheḥ kaḥ syāt / gṛham //
karmaṇyaṇ

karmaṇyupapade dhātoraṇ pratyayaḥ syāt / kumbhaṃ karotīti kumbhakāraḥ //
āto 'nupasarge kaḥ

ādantāddhātoranupasargātkarmaṇyupapade kaḥ syāt / aṇo 'pavādaḥ / āto lopa iṭi ca / godaḥ / dhanadaḥ / kambaladaḥ / anupasarge kim ? gosandāyaḥ / (vā.) mūlavibhujādibhyaḥ kaḥ / mūlāni vibhujati mūlavibhujo rathaḥ / ākṛtigaṇo 'yam / mahīdhraḥ / kudhraḥ //
careṣṭaḥ

adhikaraṇe upapade / kurucaraḥ //
bhikṣā senādāyeṣu ca

bhikṣācāraḥ / senācāraḥ / ādāyeti lyabantam / ādāyacaraḥ //
kṛño hetutācchīlyānulomyeṣu

eṣu dyotyeṣu karoteṣṭaḥ syāt //
ataḥ kṛkamikaṃsakumbhapātrakuśākarṇīṣvanavyayasya

āduttarasyānavyayasya visargasya samāse nityaṃ sādeśaḥ karotyādiṣu pareṣu / yaśaskarī vidyā / śrāddhakaraḥ / vacanakaraḥ //
ejeḥ khaś

ṇyantādejeḥ khaś syāt //
arurdviṣadajantasya mum

aruṣo dviṣato 'jantasya ca mumāgamaḥ syātkhidante pare na tvavyayasya / śittvācchabādiḥ / janamejayatīti janamejayaḥ //
priyavaśe vadaḥ khac

priyaṃvadaḥ / vaśaṃvadaḥ //
anyebhyo 'pi dṛśyante