Laghusiddhāntakaumudī · Verses 1003-1022

dityādibhyaḥ patyutatarapadācca prāgdīvyatiyeṣvartheṣu ṇyaḥ syāt / aṇo 'pavādaḥ / diterapatyaṃ daityaḥ / aditerādityasya vā //
halo yamāṃ yami lopaḥ

halaḥ parasya yamo lopaḥ syād vā yami / iti yalopaḥ / ādityaḥ / prājāpatyaḥ / ( devādyañañau ) / daivyam/ daivam / ( bahiṣaṣṭilopo yañca ) / bāhyaḥ ( īkakca ) //
kiti ca

kiti taddhite cācāmāderaco vṛddhiḥ syāt / vāhīkaḥ / ( gorajādiprasaṅge yat ) / gorapatyādi gavyam //
utsādibhyo 'ñ

autsaḥ //
ityapatyādivikārāntārtha sādhāraṇapratyayāḥ // 1 //
athāpatyādhikāraḥ
strīpuṃsābhyāṃ nañsnañau bhavanāt

dhānyānāṃ bhavana ityataḥ prāgartheṣu strīpuṃsābhyāṃ kramānnañsnañau staḥ / straiṇaḥ / paiṃsnaḥ //
tasyāpatyam

ṣaṣṭhyantātkṛtasandheḥ samarthādapatyer'the uktā vakṣyamāṇāśca pratyayā vā syuḥ //
orguṇaḥ

uvarṇāntasya bhasya guṇastaddhite / upagorapatyamaupagavaḥ / āśvapataḥ / daityaḥ / autsaḥ / straiṇaḥ / paiṃsnaḥ //
apatyaṃ pautraprabhṛti gotram

apatyatvena vivakṣitaṃ pautrādi gotrasaṃjñaṃ syāt //
eko gotre

gotre eka evāpatyapratyayaḥ syāt / upagorgotrāpatyamaupagavaḥ //
gargādibhyo yañ

gotrāpatye / gargasya gotrāpatyaṃ gārgyaḥ / vātsyaḥ //
yañañośca

gotre yadyañantamañantaṃ ca tadavayavayoretayorluk syāttatkṛte bahutve na tu striyām / gargāḥ / vatsāḥ //
jīvati tu vaṃśye yuvā

vaṃśye pitrādau jīvati pautrāderyadapatyaṃ caturthādi tadyuvasaṃjñameva syāt //
gotrādyūnyastriyām

yūnyapatye gotrapratyayāntādeva pratyayaḥ syāt, striyāṃ tu na yuvasaṃjñā //
yañiñośca

gotre yau yañiñau tadantātphak syāt //
āyaneyīnīyiyaḥ phaḍhakhachaghāṃ pratyayādīnām

pratyayādeḥ phasya āyan, ḍhasya ey, khasya īn, chasya īy, ghasya iy ete syuḥ/ gargasya yuvāpatyaṃ gārgyāyaṇaḥ / dākṣāyaṇaḥ //
ata iñ

apatyer'the / dākṣiḥ //
bāhvādibhyaśca

bāhaviḥ / auḍulomiḥ / ( lomno 'patyeṣu bahuṣvakāro vaktavya ḥ) / uḍulomāḥ / ākṛtigaṇo 'yam //
anṛṣyānantarye bidādibhyo 'ñ

ebhyo 'ñ gotre / ye tvatrānṛṣayastebhyo 'patye 'nyatra tu gotre / bidasya gotraṃ baidaḥ / baidau / bidāḥ / putrasyāpatyaṃ pautraḥ / pautrau / pautrāḥ / evaṃ dauhitrādayaḥ //
śivādibhyo 'ṇ

apatye / śaivaḥ / gāṅgaḥ //
ṛṣyandhakavṛṣṇikurubhyaśca

ṛṣibhyaḥ - vāsiṣṭhaḥ / vaiśvāmitraḥ / andhakebhyaḥ - śvāphalkaḥ / vṛṣṇibhyaḥ - vāsudevaḥ / kurubhyaḥ - nākulaḥ / sāhadevaḥ //
māturutsaṃkhyāsaṃbhadrapūrvāyāḥ