Kiraṇatantra, 1-6 with the commentary · Chapter 4

śivaśaktiprabhāvācca kilānantaḥ prabudhyati
prabodhikā ca sā śaktiḥ sarvagā paripaṭhyate //

anyeṣāṃ sannikṛṣṭāpi bodhaṃ sā kurute na kim
yogyānāmupakārī ced rāgavānsyācchivastadā //

yathārkaraśmisamparkāt padmabodhaḥ samo na kim
kānicitpratibudhyanti tathānyāni na jātucit //

rāgadveṣau na cārkasya tatheśasya na tau yataḥ
adhikārānniyogo 'sya na niyogaṃ vinā sthitiḥ //

tatsāmarthyādanantasya sarvajñatvaṃ bhavetkhaga

sarvajñatvaṃ tanau satyām anantasya na yujyate //

niyatāni yato 'kṣāṇi niyatagrāhakāṇi ca

māyātmakaṃ śarīraṃ tac chiṣṭakarmanimittajam //

yadi nāma viśeṣaḥ syāt sudūraśravaṇādikaḥ

śuddhayonimayaṃ tasya vapuruktamakarmajam //

tasyaivaṃ pāśamuktatvāj jñānaṃ kena nivāryate

tatsthaṃ sarpaṃ viṣaṃ yadvat tadgataṃ na vibādhate //

bādhate 'nantamevaṃ na tadgataḥ pāśasañcayaḥ

chinnā chinnodbhavā yadvat sthānāśrayavaśādbhavet //

sthānayogena mantreśe haṭhavattanudhāraṇam

mantraśaktyā yathā deho vidhṛtastiṣṭhate ciram //

prāpnotyabhīpsitaṃ sthānaṃ kāladaṣṭo 'pi śaktitaḥ
evaṃ tacchaktisāmarthyād āste tasya vapuryataḥ //

ataḥ sunirmalaṃ jñeyaṃ bisinīpattravadvapuḥ

tantrairupakṛtaḥ kalyo yathā dehagato rasaḥ //

sa tiṣṭhati śarīre 'smiṃs tadvadbodho mahābalaḥ

yathā bheṣajasāmarthyād aśaktānāṃ balaṃ param //

yāti tacchaktisāmarthyād anantasya pare balam
tena sāmarthyayogena yoniṃ prerayate kṣaṇāt //

prerako 'dhastane mārge māyāyāḥ prerakeṇa kim
svata eva vikāreṇa jagatyasminvikāriṇī //

jagadyoniryataḥ proktā tadvikārāḥ kalādayaḥ
vikārātsarvanāśaḥ syād vikāro na jagatkatham //

acetanatvātpreryā sā puruṣārthena hetunā
svato na vikṛtistasmād ananto 'syāḥ pracodakaḥ //

vāyuvegādyathodanvān uparyeva vikārabhāk
akṣobhyatvāttathā māyā savikārā kalādibhiḥ //

nākṣubdhā kāryakartrī cet

kṣobho 'syāḥ syāttadīraṇam
sā śaktiḥ preritā tena nityaṃ kāryakarī bhavet //

uktākṣobhyā vibhutvātsā kāraṇaṃ jagataḥ sthitā
yathā māyādhikā vyāpya na tatkāryagaṇo 'dhvani
bhāvānkalādikānvyāpya sthitākṣobhyā tataḥsmṛtā //

tatkāryakārikā śaktiḥ kriyākhyā sūkṣmarūpiṇī
sthūlakāryāsu sūkṣmāpi sthitā nyagrodhabījavat //

kāraṇaṃ tena sā jñeyā sthūlasyāsya samantataḥ

tasmātkalā tuṭiḥ saṃsthā bodhinī hyabhilāṣakṛt //

sūkṣmaṃ cāto guṇāstebhyo buddhirbuddherahaṃkṛtiḥ
tasmādekādaśākṣāṇi pañca tanmātrakāṇi ca
tebhyo bhūtāni jātāni sarvamīśaḥ sṛjatyadhaḥ //

so 'sṛjadbhagavānīśaḥ śivaśaktisamanvitaḥ
kṛtsnaṃ māyātmakaṃ kāryaṃ śuddhāśuddhavimiśritam //

yonijaṃ buddhibhedācca tadekaṃ ceddvidhā katham

dṛṣṭaṃ khadyotakādestad viruddhaṃ caikahetukam //

evaṃ tadbhinnasaṃsthānaṃ śuddhāśuddhāṅgasaṃyutam
jñeyaṃ kāraṇaśaktyutthaṃ kāryaṃ bījanimittajam

evametatsamādiṣṭaṃ tatkāryaṃ vigrahāśrayam //

yadyapyetanmithaḥ kāryaṃ viruddhamasitātmakam
tathāpyetatsusaṃśliṣṭam ekasminvastuni sphuṭam //

narārthaṃ sādhayedbhinnaṃ narasya śakaṭāṅgavat

evametadanantena sṛṣṭaṃ dehanibandhanam //

na dehena vinā muktir na bhogaścitkriyāguruḥ

etacca kurute śambhuḥ svatantratvātprabhutvataḥ
sarvānugrāhakaḥ śāntas tadvaśādakhilaṃ phalam //