Kiraṇatantra, 1-6 with the commentary · Chapter 5

śaktipātādbhaveddīkṣā nipāto na vibhutvataḥ

śivasya samavetatvāt sarvadaiva sthitā paśau //

sthitatvātsarvadā śakter bhavocchittirna kiṃ bhavet

kālo vā sa ca kaḥ prokto yadi kālaḥ śivena kim //

upacāreṇa śabdānāṃ pravṛttiriha dṛśyate
yathā pumānvibhurgantā nityo 'pyukto vinaśvaraḥ //

pāśacchedo yathā prokto mantrarāḍ bhagavāñchivaḥ
evaṃ śaktinipāto 'pi procyate sopacārataḥ //

nipāto bhayado yadvad vastunaḥ sahasā bhavet
tadvacchaktinipāto 'pi prokto bhavabhayapradaḥ //

tasmādanyatra yātyeva tathātmā deśikaṃ prati

gururyathāgrataḥ śiṣyān suptāndaṇḍena bodhayet //

śivo 'pi mohanidrāyāṃ suptāñchaktyā prabodhayet
yadā svarūpavijñānaṃ patiteti tadocyate //

tasmācchaktinipātaḥ syān nipātaścihnavācakaḥ

tannipātasya saḥ kālaḥ karmaṇāṃ tulyataiva ca //

tulyatvaṃ karmaṇaḥ kālaḥ

kṣīṇaṃ vā yadi vāsamam

samatvaṃ tatkathaṃ gamyaṃ %//

nyūnādhikatuṭiḥ katham \

evaṃ sūkṣmaṃ samānatvaṃ yasminkāle tadaiva sā //

svarūpaṃ dyotayatyāśu bodhacihnabalena vai

karmāṃśo yo 'dhikaḥ pūrvaṃ bhogadastvitaraḥ punaḥ //

samatve sati yo bhogaḥ kathaṃ tasya prajāyate

miśraṃ vārambhakaṃ karma same bhogastadā na hi //

vaktavyaścādhikaḥ kaścid anyathā na sukhetaram

adhikanyūnasambandhād vyākulatvaṃ na jāyate //

adhikanyūnaśūnyatvāt tatsthānamabhigacchati

sa pāta iti mantavyas tasya bhaktirvilakṣaṇā //

kāla eva sa niṣṇātaḥ śakterātmaparigrahaḥ

anādikarmasambandhāc chivaḥ kālamapekṣate //

kālacchidramiti proktaṃ tajjñaśca bhagavāñchivaḥ

yathā kaściccale lakṣye kañcitkālamapekṣate //

tajjño 'pi sa śivastadvat samakālamapekṣate

abhāvāttatsamatvasya yugapanmuktiranyathā //

nopāyasādhanāpekṣā kramo yadi sa neṣyate

prabhuratra śivo jñeyaḥ prabhutvaṃ kiṃ tuṭermatam //

prabhutvaṃ jñasvabhāvatvād ajñatvānna tuṭiḥ prabhuḥ

sati kāle prabhutvaṃ syāt padmabodhe yathā raveḥ //

na ca kālādṛte tatra vikāsaḥ pratipadyate
tathāpi bhāskaraḥ prokto loke 'sminpadmabodhakaḥ //

kālo 'pi yogyatā sā ced dyotako 'pyupacārataḥ

evaṃ yadyapi tulyatvaṃ karmaṇaḥ kāla eva saḥ
tathāpi prabhuratreśaḥ śaktipātasya saṃsthitaḥ //

ekā satī bahūnāṃ sā kathaṃ bodhaṃ karoti cet

bahūnāmapyadoṣaḥ syād vibhutvānna nivāryate //

evaṃ śaktisamāyogaḥ proktaḥ sūkṣmo 'tra śāsane

evaṃ tacchaktisaṃyogād dīkṣā yadi ca saṃsthitā //

dīkṣitottarakāle 'pi tirobhāvaḥ pradṛśyate
tirobhāvakarī śaktir yadi tasya na nirvṛtiḥ //

tathā karotu sa svāmī yathāsau nānyathā bhavet

tirobhāvagatānāṃ sā puruṣāṇāṃ śivecchayā //

na tirobhāvakartṛtvād ucyate sā tirohikā
tirobhāvāya pāto na yato 'nugrahadharmiṇī //

yenāsannatamaḥ kālas tenātmānaṃ prakāśayet

prakāśya yāti vidyudvat sā śaktiḥ puṃprabodhinī //

yadi sarvātmanā vāyaṃ dīkṣito 'pi tirohitaḥ
dvividhe 'pi tirobhāve sthānaprāptiḥ kvacidbhavet //

tatra sthitasya tasyeha vāsanā saiva jāyate
tadyuktasya vimokṣaḥ syād ātmano nirvikalpakaḥ //

anena kramayogena tirobhāvagato bhavet
ānarthakyaprasaṅgaḥ syād yadi muktirna sā bhavet //

mandā mandatarā śaktiḥ karmasāmyavivakṣayā

na punastādṛśī śaktiḥ kṣīravatpariṇāminī //

yataḥ śaktimataḥ śaktiḥ kṛtyasaṃsthānabhedagā
dvijādivarṇaniśreṇī sā ca mocayati sphuṭam //