Kiraṇatantra, 1-6 with the commentary · Chapter 2

yo 'sāvātmā tvayā proktaḥ kiṃcijjñaḥ sarvavicchivaḥ
nimittamanayorbrūhi śuddhāśuddhasvarūpayoḥ //

anādimalasambandhāt kiñcijjño 'sau mayoditaḥ
anādimalamuktatvāt sarvajño 'sau tataḥ śivaḥ //

ādimattvaṃ yadā siddhaṃ nimittaṃ kalpyate tadā
īdṛgrūpaṃ smṛtaṃ tābhyāṃ śuddhāśuddhaṃ yathārthataḥ //

viśuddhaḥ sphaṭikaḥ kasmāt kasmāttāmraṃ sakālikam
yathāsminna nimittaṃ hi tathā naiva śivātmanoḥ //

kiṃnimittaṃ punarbaddho bandhenātmā kalādinā

sa māyāntargataḥ prokto vyāpakaśca tvayā vibho //

vyāpakatvātsa sarvatra sthito māyodare katham
parasparaviruddhatvāt kathametadbhaviṣyati //

muktyarthaṃ sa paśurbaddho nānyathā sāsya jāyate
yāvaccharīrasaṃśleṣo na sañjāto na bhogabhuk //

māyeyaṃ tadvapustasya tadabhāvānna nirvṛtiḥ
tena tenāsvatantratvān malino malinīkṛtaḥ //

yathā vastraṃ sadoṣatvān malāntaḥsthaṃ viśuddhyati
aśuddhaḥ pudgalo 'pyevaṃ māyodaragato 'pi san //

māyodaraṃ hi yatproktaṃ kalādyavanilakṣitam
tasminyaśca layaḥ proktaḥ sūkṣmadehavivakṣayā //

tvayānādirmalaḥ prokto māyeyo 'syātmano 'pi vā
guṇastadvyatirikto vā malo brūhi kimātmakaḥ //

sahajaḥ syānmalo māyā kāryamāgāmiko malaḥ

māyā no mohinī proktā svataḥ kāryātprakāśikā //

yataḥ svakāryasaṃśleṣāc caitanyadyotikātmanaḥ
malaṃ vidārya cidvyaktim ekadeśe karotyasau //

sthitā prakāśikā kāryān mohakatve na saṃsthitā

prakāśo vyaktiśabdena malaśabdena cāvṛtiḥ //

vyaktiryāṇormalaḥ proktaḥ sphuṭaṃ dīpāndhakāravat

māyāpi mohinī proktā viṣayāsvādabhogataḥ //

yatra tatra sthitasyāsya svakarmamalahetutaḥ
māyotthaṃ bandhanaṃ tasya sanimittaṃ pravartate //

anādimalamuktasya śivasyāpi na kiṃ bhavet
tasmānmāyā malo naiva vyatiriktaḥ sa yuktitaḥ //

māyākāryaṃ samastaṃ syāt kuto 'nyaḥ sahajo malaḥ

ātmasthaṃ tatpaśutvaṃ syāt paśurapyadhvamadhyagaḥ //

prokto yena matastena malastadbhinnalakṣaṇaḥ

malo 'jñānaṃ paśutvaṃ ca tiraskārakarastamaḥ //

avidyā hyāvṛtirmūrchā paryāyāstasya coditāḥ
sa cāvidyādiparyāya bhedaiḥ siddho mate mate //

tatsadbhāvātpaśuḥ pāśyaḥ śodhyo bodhyo matastviha

pāśyādivṛttayo yāstu tasya bhedāḥ prakīrtitāḥ //

male sati bhavantyetā bhoktṛtvaṃ ca na kevalam

yadyevaṃ saṃsthitaḥ pāśyo malo 'sya paśusaṃgataḥ //

ātmanaḥ kiṃ na dharmo 'sau yuktitaḥ kalpyate malaḥ

ātmano 'nādisambandhād dharma ityupacaryate //

kathaṃ tajjñānayuktatvād ajñānaguṇatāṃ gataḥ

tasya dharmo na dharmatve pariṇāmaḥ sphuṭo bhavet //

ciddharme puṃsi no dharmo yadi syātpariṇāmavān

ekasminvyajyate jñānam anyasmiṃstattirohitam //

pariṇāmo 'cetanasya cetanasya na yujyate

tayoścānādisambandhād viśleṣo na vibhutvataḥ //

sahajaprakṣaye prāpte tasya nāśo na kiṃ bhavet

vibhorapi malasyāsya tacchakteḥ kriyate vadhaḥ //

upāyācchaktisaṃrodhaḥ kathaṃcitkriyate male
yathāgnerdāhikā śaktir mantreṇāśu niruddhyate //

tadvattacchaktisaṃrodhād viśliṣṭa iti kathyate

kṛtvā tacchaktisaṃrodhaṃ kriyate bhavaniḥspṛhaḥ //

sahajā kālikā tāmre tatkṣayānna ca tatkṣayaḥ
yadvattāmre kṣayastadvat puruṣasya malakṣayaḥ //

yathā taṇḍulakambūke prakṣīṇe 'pi na tatkṣayaḥ

viṣasambandhinī śaktir yathā mantrairniruddhyate //

tathā na tadviṣaṃ kṣīṇam evaṃ puṃso malakṣayaḥ

phalaṃ katakavṛkṣasya kṣiptaṃ sakaluṣe jale //

kurute śaktisaṃrodhaṃ kiṃ kṣipatyanyato jalāt
śivajñānaṃ tathā tasya śaktisaṃrodhakārakam //