Kiraṇatantra, 1-6 with the commentary · Chapter 1

kailāsaśikharāsīnaṃ somaṃ somārdhaśekharam
haraṃ dṛṣṭvābravīttārkṣyaḥ stutipūrvamidaṃ vacaḥ //

jayāndhakapṛthuskandha bandhabhedavicakṣaṇa
jaya pravaravīreśa saṃruddhapuradāhaka //

jayākhilasureśāna śiraśchedabhayānaka
jaya prathitasāmarthya manmathasthitināśana //

jayācyutatanudhvaṃsa kālakūṭabalāpaha
jayāvartamahāṭopa saridvegavidhāraṇa //

jaya dāruvanodyāna munipatnīvimohaka
jaya nṛttamahārambha krīḍāvikṣobhadāruṇa //

jayograrūpasaṃrambha trāsitatridaśāsura
jaya krūrajanendrāsya darśitāsṛksunirjhara //

jaya vīraparispanda dakṣayajñavināśana
jayādbhutamahāliṅga saṃsthānabalagarvita //

jaya śvetanimittogra mṛtyudehanipātana
jayāśeṣasukhāvāsa kāmamohitaśailaja //

jayopamanyusantāpa mohajālatamohara
jaya pātālamūlordhva lokālokapradāhaka //

bhaktasya mama bhītasya śivajñānaṃ paraṃ vada
yadavāpya narāḥ sarve muktimāyānti kevalām //

evamukto haraḥ prāha visphuraccandraśekharaḥ

bhadrametattvayā pṛṣṭaṃ śṛṇu jñānaṃ mahodayam //

kiraṇākhyaṃ mahātantraṃ parāmṛtasukhapradam
sarvānugrāhakaṃ śubhraṃ padārthoddyotakaṃ sphuṭam //

paśupāśapatijñāna vicārapratipādakam
kriyācaryāsamopetaṃ yogabhūtibharāvaham //

yadyevaṃ sa paśustāvat kīdṛśo badhyate katham
mucyate kathamākhyāhi saṃdehavinivṛttaye //

paśurnityo hyamūrto 'jño niṣkriyo nirguṇo 'prabhuḥ
vyāpī māyodarāntastho bhogopāyavicintakaḥ //

tasyāśuddhasya sambandhaṃ samāyāti śivātkalā

tayodbalitacaitanyo vidyākhyāpitagocaraḥ //

rāgeṇa rañjitaścāpi pradhānaṃ ca guṇātmanā
buddhyādikaraṇānīka sambandhādbadhyate paśuḥ //

tato niyatisaṃśleṣāt svārjite 'pi niyamyate

kālena kālasaṃkhyāna kāryabhogavimohitaḥ //

evaṃ tattvakalābaddhaḥ kiñcijjño dehasaṃyutaḥ
māyābhogapariṣvaktas tanmayaḥ sahajāvṛtaḥ //

tataḥ sukhādikaṃ kṛtsnaṃ bhogaṃ bhuṅkte svakarmataḥ

same karmaṇi sañjāte kālāntaravaśāttataḥ //

tīvraśaktinipātena guruṇā dīkṣito yadā
sarvajñaḥ sa śivo yadvat kiñcijjñatvavivarjitaḥ //

śivatvavyaktisampūrṇaḥ saṃsārī na punastadā

evaṃ kramādvibaddhaḥ san mucyate kramayogataḥ //

kevalaḥ sakalaḥ śuddhas tryavasthaḥ puruṣaḥ smṛtaḥ

paśurevaṃvidhaḥ proktaḥ kimanyatparipṛcchasi //