Kalika Purana · Chapter 23

kālikāpurāṇam trayoviṃśo'dhyāyaḥ
arundhatīvivāhavarṇanam
atha kālikā purāṇa adhyāya २३
// mārkaṇḍeya uvāca //
atha sā vavṛdhe devī tasmin munivarāśrame /
candrabhāgānadītīre tāpasāraṇyasaṃjñake

yathā candrakalā śuklapakṣe nityaṃ vivardhate /
yathā jyotsnā tathā sāpi prāpa vṛddhimarundhatī

samprāpte pañcame varṣe candrabhāgāṃ tadā guṇaiḥ /
tāpasāraṇyamapi sā pavitramakarot satī

tatra tīrthaṃ mahāpuṇyaṃ medhātithiniṣevitam /
krīḍāsthānamarundhatyāḥ pūtaṃ bālyocitaṃ kṛtam

adyāpi tāpasāraṇye candrabhāgānadījale /
arundhatītīrthatoye snātvā yāti hariṃ naraḥ

kārtikaṃ sakalaṃ māsaṃ candrabhāgānadījale /
srātvā viṣṇugṛhaṃ gatvā hyante mokṣamavāpnuyāt

māghe māsi paurṇamāsyāmamāyāṃ vā tathaiva ca /
candrabhāgājale snānaṃ yastu kuryāt sakṛt sakṛt

tasya vaṃśe rājayakṣmā na kadācid bhaviṣyati /
dehānte candrabhavanaṃ gatvā harergṛham

puṇyakṣayādihāgatya vedajño brāhmaṇo bhavet /
candrabhāgājalaṃ pītvā candralokamavāpnuyāt

sakṛt snātvā tu vidhivadvājimedhāyutaṃ labhet

candrabhāgājale snātvā krīḍantī bālyalīlayā /
pituḥ samīpe tattīre kadācittāmarundhatīm /
gacchannākāśamārgeṇa dadarśa kamalāsanaḥ

athāvatīrya bhagavān brahmā lokapitāmahaḥ /
arundhatyāstadā kālamupadeśe dadarśa ha

athovāca tadā brahmā munibhiḥ paripūjitaḥ /
medhātithiprabhṛtibhirucitaṃ taṃ mahāmunim

// brahmovāca //
upadeśasya kālo'yamarundhatyā mahāmune /
tasmādenāṃ satīnāntu strīṇāṃ tvaṃ kuru sannidhim

stribhistriyaścopadeśyāḥ kācidanyatra vidyate /
bahulāyāśca sāvitryāḥ putrīṃ tvaṃ sthāpayāntike

tayoḥ saṃsargamāsādya putrī tava mahāmune /
mahāguṇaiśvaryayutā mācirāt tu bhaviṣyati

medhātithirvacaḥ śrutvā brahmaṇa: paramātmanaḥ /
evameṣeti provāca taṃ tadā munisattamaḥ

tato gate suraśreṣṭhe putrīṃ medhātithirmuniḥ /
samādāya yayau sūryabhavanaṃ prati tatkṣaṇāt

dadarśa tatra sāvitrīṃ sūryamaṇḍalamadhyagām /
padmāsanagatāṃ devīmakṣamālādharāṃ sitām

dṛṣṭā sā tena muninā niḥsṛtya ravimaṇḍalāt /
bahulāṃ sā gatā tūrṇaṃ prasthaṃ mānasabhūbhṛta:

pratyahaṃ tatra sāvitrī gāyatrī bahulā tathā /
sarasvatī ca drupadā pañcaitā mānasācale

dharmākhyānaistathā sādhvīḥ kathāḥ kṛtvā parasparam /
svaṃ svaṃ sthānaṃ punaryānti lokānāṃ hitakāmyayā

medhātithistu tāḥ sarvā dṛṣṭvaikatra tapodhanaḥ /
mātṛḥ sarvasya lokasya praṇanāma pṛthak pṛthak

uvāca ca sa tāḥ sarvā ṛṣiḥ ślakṣṇaṃ tapodhanaḥ /
sasādhvaso vismitaśca tāsāmekatra darśanāt

// medhātithiruvāca //
mātaḥ sāvitri bahule matputrīyaṃ mahāyaśāḥ /
kālo'yamupadeśe'syāstadarthamahamāgataḥ

jagatsraṣṭrā samādiṣṭā prayātu tava śiṣyatām /
eṣā tena bhavatpārśvamānītā putrikā mama

saucāritryaṃ yathāsyāḥ syāttathaināṃ bālikāṃ mama /
yuvāṃ vinayataṃ devyau mātarmātarnamo'stu vām

athovāca tadā devī sāvitrī munisattamam /
smitapūrvaṃ bahulayā sahitā tāñca bālikām

// te ūcatuḥ //
brahman viṣṇoḥ prasādena sucaritrā bhavatsutā /
pūrvameva mune bhūtā taduddeśena kiṃ punaḥ

kiṃ tvahaṃ brahmavākyeṇa bahulā ca mahāsatī /
vineṣyāvastava sutāṃ dhīrā syānnacirād yathā

brahmaṇa: pūrvaduhitā bhavatastu tapovalāt /
tathā viṣṇoḥ prasādena sutā te'bhūdarundhatī

kulaṃ punāti bhavataḥ satyasau vardhayiṣyati /
lokānāmatha devānāṃ śivameṣā kariṣyati

// mārkaṇḍeya uvāca //
atha tābhirvisṛṣṭaḥ sa munirmedhātithiḥ sutām /
āśvāsyārundhatīṃ natvā tāḥ svasthānaṃ jagāma ha

gate tasmin munivare saha tābhyāmarundhatī /
mātṛbhyāmiva nirbhītā pālitā modamāpa sā

kadācit saha sāvitryā rātrau yāti ravergṛham /
tathā bahulayā yāti śakragehaṃ kadācana

evaṃ tābhyāṃ samaṃ devī viharantī surālaye /
nināya divyamānena sā sapta parivatsarān

tābhyāṃ tathopaviṣṭā sā strīdharmamacirāt satī /
sarvaṃ jñātavatī bhūtā sāvitrī- bahulādhikā

atha tasyāstadā kāle samprāpte ucite'bhavat /
śobhano yauvanodbhedaḥ padminīnāṃ ruciryathā

udbhūta-yauvanā sā tu vasiṣṭhaṃ mānasācale /
viharantī dadaśaim̐kaṃ cārutejasvinaṃ munim

dṛṣṭvā tamicchayāñcakre kāmabhāvena sā satī /
bālasūryaprabhaṃ cārurūpaṃ brahmaśriyā yutam

atha so'pi mahātejā vasiṣṭho varavarṇinīm /
dṛṣṭaivodbhūtamadano vīkṣāñcake tvarundhatīm

tayoḥ parasparaṃ dṛṣṭvā vavṛdhe hṛcchayo mahān /
amaryādaṃ dvijaśreṣṭhāḥ prākṛte madano yathā //४२/
atha dhairyaṃ samālamvya tathā medhātitheḥ sutā /
ātmānaṃ dhārayāmāsa manaśca madaneritam

vasiṣṭho'pi mahātejā dhairyamālambya cātmanaḥ /
manaḥ saṃstambhayāmāsa madanonmathitaṃ tataḥ

arundhatī tato devī vihāya munisannidhim /
jagāma yatra sāvitrī nindantī svaṃ manoratham

bādhyamānātiduḥkhena mānasena mahāsatī /
satībhāvaḥ parityaktaścintayantī mayeti vai

tasyā manojaduḥkhena vivarṇamabhavanmukham /
śarīraṃ sakalaṃ mlānaṃ gatiśca valitābhavat

idaṃ vimamṛṣe sā ca garhayantī svakaṃ manaḥ /
mṛṇālatantuvat sūkṣmā chinnā ca tatkṣaṇādapi

sthiti: satīnāmalpena cāpalyenaiva naśyati /
iti strīdharmamadhyāpya māmāha caritavratā /
sāvitrī sārametad hi satīdharmasya coddhṛtam

tadadya nāśitaṃ puṃsi parakīye manoratham /
varddhayantyā tadā kiṃ me paratreha bhaviṣyati

iti sañcintayantī sā putrī medhātithestadā /
duḥkhārtā bahulāṃ devī sāvitrīṃ cāsasāda ha

tathāvidhāntu tāṃ dṛṣṭvā vivarṇavadanāṃ satīm /
dhyānacintāparā bhūtvā sāvitrī vimamarṣa ha

vimṛṣya divyajñānena sarvaṃ jñātavatī satī /
vasiṣṭhena tvarundhatyā yathābhuddarśanaṃ tathā

yathā tayoḥ sampravṛddho manojaścātiduḥsahaḥ /
mukhavaivarṇyahetuśca sāvitrī divyadarśinī

atha medhātitheḥ putryā mūrdhni hastaṃ niveśya sā /
idamāha mahādevī sāvitrī caritavratā

vatse tava mukhaṃ kasmādbhinnavarṇamabhūdidam /
chinnanālaṃ yathāpadmaṃ sūryāṃśuparitāpitam

kathaṃ śarīramabhavat mlānaṃ te guṇavattame /
yathā niśāpatervimbaṃ tanukṛṣṇābhrasaṃvṛtam

antarmanaśca te bhadre sacintamiva lakṣyate /
tanme kathaya te guhyaṃ naitaccedduḥ khakāraṇam

// mārkaṇḍeya uvāca //
atha sādhomukhī bhūtvā kiñcinnovāca lajjayā /
sāvitrīṃ mātaraṃ gurvīṃ tathā pṛṣṭāpyarundhatī

yadā noktavatī kiñcittadā medhātitheḥ sutā /
svayaṃ prakāśana sāvitrī tāmuvāca tapasvinī

vatse yo'sau tvayā dṛṣṭo munirbhāskarasannibhaḥ /
sa vasiṣṭho brahmasutastava svāmī bhaviṣyati /
tava tasya ca dāmpatyaṃ purā dhātraiva nirmitam

atastava satībhāvo na hīnastasya darśanāt /
yadvā tavābhūddhṛdayaṃ sakāmaṃ tasya darśanāt /
na taddoṣakaraṃ putri manoduḥkhaṃ tatastyaja

tvayā paraṃ tapaḥ kṛtvā pūrvajanmani śobhane /
vṛtaḥ sa eva dayitaḥ sakāmastena sa tvayi

śṛṇu pūrvaṃ tvayā vatse vasiṣṭho'yaṃ vṛtaḥ patiḥ /
yathā tapaḥ kṛtaṃ tatra yena bhāvena santatam

// mārkaṇḍeya uvāca //
ityuktvā sā ca sāvitrī yathā sandhyābhavat purā /
kṛtaṃ tapo yadarthantu candrabhāgāhvaye girau

vasiṣṭhena tathā pūrvaṃ varṇirūpeṇa vedhasaḥ /
vacanādupadiṣṭā sā tapaścaryāṃ duratyayām

yathā prasanno bhagavān viṣṇuḥ pratyakṣatāṃ gataḥ /
varaṃ yathā dadau tasyai maryādā sthāpitā yathā

yathā vā vāñchitaḥ svāmī vasiṣṭhaḥ sa tayā muniḥ /
medhātitheryathā yajñe vahnau tyaktaṃ tayā vapuḥ

yathā tattanayā jātā tasyaitadvistarāt tadā /
sāvitrī kathayāmāsa kramād bahulayā saha

atha tasyāḥ vacaḥ śrutvā yadabhūt pūrvajanmani

tacchrutvā vai tadā jñātaṃ mama sarvaṃ manogatam

ityatīvatrapāṃ prāpya sātīvābhūdadhomukhī /
sāvitrīvacanādbhūtā pūrvajanmasmarā ca sā

tathaivādhomukhī bhūtvā yadvṛttaṃ pūrvajanmani /
tasya sarvasya sasmāra divyajñārundhatī tadā //७३/
pūrvaṃ viṣṇuprasādena sā bhūtvā divyadarśinī /
adhunā bālyabhāvena pracchannā divyadarśanā

sāvitrīvacanānśrutvā vṛttāntaṃ pūrvajanmanaḥ /
pratyakṣamiva tat sarvaṃ pūrvajñānamavāpa sā

avāpya pūrvaṃ jñānaṃ tadyaddattaṃ viṣṇunā purā /
vasiṣṭho'yaṃ vṛtaḥ svāmī mayā vai pūrvajanmani

iti jñātavatī devī sāmodārundhatī svayam /
vasiṣṭhadarśanodbhūte pūrvaṃ tasyāstu hṛcchaye

yathātaṃkaḥ samutpannaḥ satītvasya nivāraṇe /
tañca svayaṃ sā tatyāja tadā medhātitheḥ sutā

tyaktacintāṃ tatastāntu vijñāyāruṃdhatī satīm /
sāvitrī sūryabhavanaṃ tayā sārdhaṃ jagāma ha

arundhatīṃ niveśyātha sāvitrīṃ sūryamandire /
jagāma brahmabhavanaṃ sarvajñā sāsatīvarā

atha praṇamya brahmāṇaṃ pṛṣṭā tenaiva tatkṣaṇāt /
idaṃ jagāda sāvitrī brahmāṇamamitaujasam

// sāvitryuvāca //
bhagavan jagatāṃ nātha vasiṣṭhaṃ bhavataḥ sutam /
mānasasya gireḥ sānau dadarśārundhatī satī

tayordarśanamātreṇa vavṛdhe hṛcchayo mahān /
parasparaṃ tau spṛhayāñcakratuśca prajāpate

tato dhairyāttu saṃstabhya manojaṃ tau suduḥkhitau /
vimanaskau gatau sthānaṃ lajjitau tau svakaṃ svakam

evampravṛtte yayogyaṃ tadā tvetadvidhīyatām /
āyatyāñca suraśreṣṭha lokānāṃ hitakāmyayā

// mārkaṇḍeya uvāca //
iti śrutvā vacastasyāḥ brahmā sarvajagadguruḥ /
dadarśa divyajñānena pravṛttiṃ bhāvikarmaṇaḥ

idañca svāgataṃ proce tadā lokapitāmahaḥ /
tayordāmpatyabhāvasya kālo'yaṃ samupasthitaḥ /
ato lokahitārthāya yāsye'haṃ tatpravṛttaye

iti niścatya manasā sāvitrīsahito vidhiḥ /
jagāma mānasaprasthaṃ yatrābhūddarśanaṃ tayoḥ

pitāmahe tatra yāte śarvaḥ suragaṇairyutaḥ /
nandibhṛṃgiprabhṛtibhiḥ samāyāto vṛṣadhvajaḥ

bhagavān vāsudevo'pi brahmaṇā paricintitaḥ /
bhaktyā so'pi jagannāthaḥ śaṅkhacakragadādharaḥ /
sthitau brahmāharau yatra tatraiva svayamāgataḥ

atha te jagatāṃ nāthāḥ brahmaviṣṇumaheśvarāḥ /
nāradaṃ preṣayāmāsurdūtaṃ medhātithiṃ prati

yāhi drutaṃ nārada tvaṃ candrabhāgāhvayaṃ girim /
munistasyopatyakāyāmāste medhātithi: paraḥ

tamānaya yathākāmamasmākaṃ vacanāt svayam /
medhātithiṃ samādāya bhavānāgacchatu drutam

brahmādīnāṃ vacaḥ śrutvā nārado'pi drutaṃ yayau /
medhātithiṃ samānetuṃ mahākāryasya siddhaye

medhātithiṃ samādāya yayau mānasaparvatam

sendrā devagaṇāḥ sarve munayaśca tapodhanāḥ /
sādhyā vidyādharā yakṣā gandharvāśca samāgatāḥ

devāśca sarve devyaśca ye devānucarāstathā /
te sarve mānasaprasthaṃ yātāścānye ca jantavaḥ

atha bhūte samāje tu devānāṃ kamalāsanaḥ /
medhātithiṃ muniṃ vākyamidamāhātideśayan

// brahmovāca //
medhātithe vasiṣṭhāya putrīṃ te caritavratām /
dehi brāhmeṇa vidhinā samāje tridivaukasām

badhūvaratvamanayoḥ pūrvaṃ sṛṣṭaṃ mayaiva hi /
hariṇā cāpyanujñātaṃ karma caitat samañjasam

evaṃ kṛte tava kule bhaviṣyati mahadyaśaḥ /
hitaṃ ca sarvabhūtānāṃ dehi tvaṃ mā ciraṃ kṛthāḥ

// mārkaṇḍeya uvāca //
tato brahmavacaḥ śrutvā hyatipramodito muniḥ /
evamastviti covāca natvā tān surapuṅgavān

eṣāṃ tu vacanāt putrīmādāyārundhatīṃ muniḥ /
dhyānasthasya vasiṣṭhasya devaiḥ saha jagāma ha

gatvā vasiṣṭhanikaṭaṃ devaiḥ parivṛto muniḥ /
brāhmaśriyā dīpyamānaṃ jvalantamiva pāvakam

dharmārthakāmamokṣeṣu dhṛtabuddhiṃ pṛthak pṛthak /
dadarśa munimāsīnaṃ mānasācalakandare /
vasiṣṭhamojasvivaraṃ bālasūryamivoditam

atha putrīmagragatāṃ kṛtvā medhātithirmuniḥ /
vasiṣṭhaṃ niyatātmānamuvācārundhatīpitā

// ṛṣiruvāca //
bhagavan brahmaṇaḥ putra putrīṃ me caritavratām /
dattāṃ pratigṛhāṇaināṃ mayā brāhmeṇa dharmataḥ

yatra yatrāśrame brahman svecchayā nivasiṣyasi /
tvadbhaktyeṣā bhavitrī ca cchāyevānugatā tava

tatra tatraiva me putrī samānavratadhāriṇī /
pativratā varārohā śuśrūṣāṃ te kariṣyati

// mārkaṇḍeya uvāca //
iti śrutvā vasiṣṭhastu munermedhātithervacaḥ /
dṛṣṭvā samāgatān devān brahmaviṣṇuśivādikān /
avaśyametadbhāvīti niścitya divyacakṣuṣā

brahmaṇaḥ sammate putrīṃ tadā medhātithermuneḥ /
vasiṣṭhaḥ pratijagrāha vāḍhamityuktavāṃśca ha

gṛhītapāṇiḥ sā devī vasiṣṭhena mahātmanā /
patyuḥ pādayuge cakṣuryugaṃ nyastavatī satī

tato brahmā ca viṣṇuśca rudraścānye tathāmarāḥ/
vivāhavidhinā tau tu modayāñcakrurutsavaiḥ

sāvitrī pramukhā devyo devāścendrādayastathā /
dakṣādyāḥ kaśyapādyāstu munayo'titapodhanāḥ

unmucya brahmavacanādvalkalañcājinaṃ jaṭāḥ /
mandākinījalenāśu snāpayitvā sutaṃ vidheḥ

jāmbunadaistathā divyairbhūṣaṇaiśca manoharaiḥ /
vasiṣṭhaṃ bhūṣayāṃcakrustathaivārundhatīṃ satīm

bhūṣayitvātha tau tatra samāpya munibhirvidhim /
vivāhāvabhṛthaṃcakrustayorvidhi harīśvarāḥ

nidhāya sarvatīrthānāṃ toyaṃ jāmbunade ghaṭe /
āśīrvādakarairmantrairgāyatryā drupadādibhiḥ

svayaṃ tau snāpayāñcakrurbrahmaviṣṇumaheśvarāḥ /
tato maharṣayaścānye tathā devarṣayaśca ye

te sarve ṛgyajuḥ sāmavedabhāgairmahāsvaraiḥ /
gaṅgādi saritāṃ toyaiścakruḥ śāntiṃ tayormuhuḥ

bhuvanatrayasañcāri vimānaṃ sūryavarcasam /
avyāhatagatiṃ brahmā satoyañca kamaṇḍalum

tābhyāṃ dāyaṃ dadau viṣṇurduprāpaṃ sthānamuttamam /
yadūrdhva sarvadevānāṃ marīcyādeḥ samīpataḥ /
saptakalpāntajīvitvaṃ rudraḥ prādāttayorvaram

aditiḥ kuṇḍalayugaṃ brahmaṇā nirmitaṃ svakam /
dadau svakarṇādākṛṣya putryai medhātithestadā

pativratātvaṃ sāvitrī bahulā bahuputratām /
devendro bahuranāni dhaneśena samaṃ dadau

evaṃ devāśca munayo devyaścānye ca ye sthitāḥ /
dadustatra yathāyogyaṃ dāyaṃ tābhyāṃ pṛthak pṛthak

evaṃ vivāhya vidhivat sauvarṇe mānasācale /
arundhatīṃ vasiṣṭhastu modamāpa tayā saha

tatra yat patitaṃ toyaṃ mānasācalakandare /
vivāhāvabhṛthārthāya śāntaye ca surāhṛtam

brahmaviṣṇumahādevapāṇibhiḥ samudīritam /
tattoyaṃ saptadhā bhūtvā patitaṃ mānasācalāt /
himādreḥ kandare sānau sarasyāñca pṛthak pṛthak

tattoyaṃ patitaṃ śipre devabhogye sarovare /
tena śiprānadījātā viṣṇunā preritā kṣitau

mahākauṣī prapāte tu yadvāri patitaṃ tu vai /
kauṣikī nāma sā jātā viśvāmitrāvatāritā

umā kṣetre yat patitaṃ toyaṃ tena mahānadī //१३१/
kāverī nāma sā jātā mahākālasaraḥ sṛtā /
mahākāle saraḥ śreṣṭhe patitaṃ tajjalaṃ gireḥ

himādreḥ pārśvabhāge tu dakṣiṇe śaṃbhusannidhau /
gomatī nāma tairjātā nadī gomadudīritā

maināko nāma yaḥ putraḥ śailarājasya tatsamaḥ /
tasmin sānau samutpanno menakodarataḥ purā

yattatra patitaṃ toyaṃ tena jātā mahānadī /
devikākhyā mahādevaprerito sāgaraṃ prati

yattoyaṃ saṅgataṃ daryāṃ haṃsāvatārasannidhau /
tenābhūt sarayūrnāmnā nadī puṇyatamā smṛtā

yānyambhāṃsi mahāpārśve khāṇḍavāraṇyasannidhau /
himavatkandare yāmye irāyā hṛdamadhyataḥ /
irāvatī nāma nadī tairjātā ca saridvarā

etā: sarvāḥ snānapāna sevanairjāhnavī yathā /
phalaṃ dadati martyānāṃ dakṣiṇodadhigāḥ sadā

dharmārthakāmamokṣāṇāṃ bījabhūtāḥ sanātanāḥ /
mahānadyastu saptaitāḥ sarvadā devabhogadāḥ

evaṃ nadyaḥ saptajātāḥ sadāpuṇyatamodakāḥ /
arundhatyā vasiṣṭhasya vivāhe devasannidhau

evaṃ vivāhya sa tadā vasiṣṭhastāmarundhatīm /
devairdattaṃ tadā sthānaṃ vimānena jagāma ha

brahma viṣṇu maheśānāṃ vacanānmunisattamaḥ /
hitāya sarvajagatāṃ triṣu lokeṣu sarvadā

yasmin yasmin yuge yādṛk strīṇāṃ bhavati tādṛśam

veśaṃ bhāvaṃ śarīraṃ ca kṛtvā dharme niyojanam /
vicaratyeṣa lokāṃstrīnapramattaḥ prasannadhīḥ

evaṃ purā vasiṣṭhena pariṇītātvarundhatī

sā hitārthāya jagatāṃ devānāṃ vacanāt purā

ya idaṃ śṛṇuyānnityamākhyānaṃ dharmasādhanam /
sarvakalyāṇasaṃyuktaṃ cirāyurvittavān bhavet

yā strī śṛṇoti satatamarundhatyāḥ kathāmimām /
pativratā sā bhūtveha paratra svargamāpnuyāt

idaṃ paraṃ svastyayanamidaṃ dharmapradaṃ param /
ākhyānaṃ sarvadā kīrtiryaśaḥ puṇyavivardhanam

vivāhe puṃsi yātrāyāṃ yaḥ śrāddhe śrāvayettathā /
sthairyaṃ puṃsavanaṃ siddhiḥ pitṛprītiśca jāyate

iti vaḥ kathitaṃ sarvaṃ vasiṣṭhasya mahātmanaḥ /
arundhatī yathābhūtā bhāryā vāpi pativratā

yasya vā tanayā jātā yathotpannā ca yatra ca /
yathā brahmaharīśānāṃ vacanāt sa vṛtaḥ patiḥ

etat vaḥ sarvamākhyātaṃ guhyataraṃ param /
puṇyadaṃ pāpaharaṇamāyurārogyavardhanam

iti vipulavṛṣaugha kṣemakārītihāsaṃ sadasi sakṛdapīha śrāvayedyo dvijānām /
sa bhavati kaluṣaudyairhīna dehaḥ sameto munivarasahacaryāṃ pretya gīrvāṇa eva

// iti śrīkālikāpurāṇe vasiṣṭhārundhatīvivāho nāma trayoviṃśo'dhyāyaḥ

kālikā purāṇa hindī anuvāda paḍhane ke lie dekheṃ-[https://ptvaishnavi.blogspot.com/2023/03/Kalika-puran-adhyay-23.html DP Karmakand]