Kalika Purana · Chapter 30

kālikāpurāṇam triṃśo'dhyāyaḥ śarabhavārāhayuddhaḥ
atha kālikā purāṇa adhyāya ३०
// mārkaṇḍeya uvāca //
tato devāgaṇāḥ sarve sahitā devayonibhiḥ /
śakreṇa sahitā mantraṃ cakruḥ samyagjagaddhitam

tato niścitya te sarve śakrādyā munibhiḥ saha /
śaraṇyaṃ śaraṇaṃ jagmurnārāyaṇamajaṃ vibhum

taṃ samāsādya govindaṃ vāsudevaṃ jagatpatim /
praṇamya sarve tridaśāstusṭuvurgaruḍadhvajam

// devā ūcuḥ //
namaste deva deveśa jagatkāraṇa kāraka /
kālasvarūpin bhagavan pradhānapuruṣātmaka

sthūla sūkṣma jagadvyāpin pareśa puruṣottama

tvaṃ kartā sarva bhūtānāṃ tvaṃ pātā tvaṃ vināśakṛt /
tvaṃ hi māyāsvarūpeṇa sammohayasi vai jagat

yadbhūtaṃ yacca vai bhāvyaṃ yadidānīṃ pravartate /
tat sarvaṃ parameśatvaṃ sthāvaraṃ jaṅgamaṃ tathā

arthārthināṃ tvamarthastu kāmaḥ kāmārthināṃ tathā /
tvaṃ hi dharmārthināṃ dharmo mokṣo nirvāṇamicchatām

tvaṃ kāmukastvamevārthī dhārmikastvaṃ sadāgatiḥ

tvadvaktrād brāhmaṇā jātā bāhujāḥ kṣatriyāstava /
ūrvo vaiśyāstathā śūdrāḥ pādābhyāṃ tava nirgatāḥ

sūryo netrāttava vibho manojaścandramāstava /
śravaṇāt pavano jāto daśa prāṇāstathāpare

ūrdhvaṃ svargādibhuvanaṃ tava śīrṣādajāyata /
tava nābhestathākāśaṃ kṣitiḥ pādatalādabhūt

karṇābhyāṃ te diśo jātā jaṭharāt sakalaṃ jagat /
tvaṃ hi māyāsvarūpeṇa sammohayasi vai jagat

nirguṇo guṇavāṃstvaṃ hi śuddha ekaḥ parātparaḥ /
utpattisthitihīnastvaṃ tvamacyutaguṇādhikaḥ

ādityairvasubhirdevaiḥ sādhyairyakṣairmarudgaṇaiḥ /
tvaṃ cintyase jagannātha munibhiśca mumukṣubhiḥ

tvāṃ vai cidānandamayaṃ vidanti viśeṣavijñā munayo vibhogāḥ /
tvameva saṃsāra mahīruhasya bījaṃ jalaṃ sthānamatho phalaṃ ca

tvaṃ padmayā padmākaro vibhāsi varāsicakrābjadhanurdharastvam /
tvameva tārkṣe pratibhāsi nityaṃ svarṇācale toyayuto yathābdaḥ

tvameva pītāmbaraśaṅkarābjajāstvaṃ sarvametanna ca kiñcidanyat /
na te guṇā naḥ paricintanīyā vidherharasthāpi diśāṃ patīnām /
bhītena bhaktyā śaraṇaṃ prapannā gatā vayaṃ naḥ parirakṣa viṣṇo

// mārkaṇḍeya uvāca //
iti stuto devadevo bhūtabhāvanabhāvanaḥ /
sendrairdevagaṇairūce tān sarvānmeghanisvanaḥ

// śrībhagavānuvāca //
yadarthamāgatā yūyaṃ yadvā bhayamupasthitam /
tatra yadvā mayā kāryaṃ tad devāstūrṇamucyatām

// devā ūcuḥ //
śīryate vasudhā nityaṃ krīḍayā yajñapotriṇaḥ /
lokāśca sarve saṃkṣubdhā nāpnuvantyupaśāntvanam

śuṣkaṃ tumvīphalaṃ ghātairyathā jarjaratāṃ gatam /
vārāhakṣuraghātena tathā jarjaritā kṣitiḥ

tasya ye vā trayaḥ putrāḥ kālāgnisamatejasaḥ /
suvṛttaḥ kanako ghorastaiścāpyāghātitaṃ jagat

teṣāṃ kardamalīlābhiḥ sarāṃsi jagatāṃ pate /
mānasādīni bhagnāni prakṛtiṃ yānti nādhunā

bhagnāstairdevataravo mandārādyā mahābalaiḥ /
deva nādyāpi rohanti phalaṃ puṣpaṃ dalaṃ ca vā

yadā trikūṭamāruhya te suvṛttādayastrayaḥ /
plutaṃ kṛtvā mahābāho patanti lavaṇārṇave

tadā tat kṣubdhatoyaughaiḥ plāvyate sakalā mahī /
utplavanti janāḥ sarve prayānti ca diśo daśa /
jīvitaṃ rakṣamāṇāste prayānti ca diśo daśa

yadā triviṣṭapaṃ yānti yajñavārāha putrakāḥ /
itastatastadā bhagnā devāḥ śāntiṃ na lebhire // २७ /
sarve taiḥ parvatāḥ putrairvārāhasya jagatpate /
krīḍadbhiḥ śikhare nītārbhūribhāgamadhogatim

evaṃ vikrīḍatāṃ teṣāṃ krīḍābhiḥ sakalaṃ jagat /
nāśamāyāti vaikuṇṭha tasmādrakṣa jagatprabho

// mārkaṇḍeya uvāca //
iti teṣāṃ nigadatāṃ śrutvā vākyaṃ janārdanaḥ /
uvāca śaṅkaraṃ devaṃ brahmāṇaṃ ca viśeṣataḥ

yatkṛte devatāḥ sarvāḥ prajāśca sakalā imāḥ /
prāpnuvanti maha duḥkhaṃ śīryate sakalaṃ jagat

vārāhaṃ tadahaṃ kāyaṃ tyaktumicchāmi śaṅkara /
nirveśaśaktaṃ taṃ tyaktuṃ svecchayā na hi śakyate /
tvaṃ tyājayasva taṃ kāyaṃ yatnādvā śaṅkarādhunā

tvamāpyāyasva tejobhirbrahman smaraharaṃ muhuḥ /
āpyāyantu tathā devāḥ śaṅkaro hantu potriṇam

rajasvalāyāḥ saṃsargādviprāṇāṃ māraṇāttathā /
kāyaḥ pāpakaro bhūtastaṃ tyaktuṃ yujyate'dhunā

prāyaścittairapaityenaḥ prāyaścittamahaṃ tataḥ /
cariṣyāmi tadarthaṃ me tanuryatnena śāmyatām

prajāpālyā mama sadā sā hi sīdati nityaśaḥ /
matkṛte pratyahaṃ tasmāt tyakṣye kāyaṃ prajākṛte

// mārkaṇḍeya uvāca //
ityuktau vāsudevena tadā tau brahmaśaṅkarau /
tvayā tathoktaṃ tatkāryamiti govindamūcatuḥ

vāsudevo'pi tān sarvān visṛjya tridaśāṃstathā /
vārāhaṃ teja āhartuṃ svayaṃ dhyānaparo'bhavat

śanaiḥ śanairyadā tejo āharatyeṣa mādhavaḥ /
tadā dehaṃ tu vārāhaṃ sattvahīnamajāyata

tejohīnaṃ yadā dehaṃ jñātaṃ sarvaistadāmaraiḥ /
āsasāda tadā devo yajñavārāhamadbhutam

brahmādyāstridaśāḥ sarve mahādevamumāpatim /
anujagmustadā teja ādhātuṃ smaraśāsane

tataḥ sarvairdevagaṇaiḥ svaṃ svaṃ tejo vṛṣadhvaje /
ādadhe tena balavān so'tīva samajāyata

tataḥ śarabharūpī sa tatkṣaṇāt giriśo'bhavat

ūrdhvādhobhāgataścāṣṭapādayuktaḥ subhairavaḥ /
dvilakṣayojanocchrāyaḥ sārdhalakṣaikavistṛtaḥ

ūrdhvaṃ vārāhakāyastu lakṣayojanavistṛtaḥ /
lakṣārdhavistṛtaḥ pārśve vardhamānastadābhavat

tataḥ śarabharūpaṃ taṃ mahādevamumāpatim /
dadarśa yajñapotrī saḥ spṛśantaṃ śirasā vidhum /
sudīrghanāsānakharaṃ kṛṣṇāṃgārasamaprabham

dīrghavaktraṃ mahākāyamaṣṭadaṃṣṭrāsamanvitam /
vibhrataṃ sa saṭaṃ pucchaṃ dīrghakarṇaṃ bhayānakam

caturaṃ pṛṣṭhataḥ pādānadhare caturastathā /
kurvantaṃ ghoramārāvamutpatantaṃ punaḥ punaḥ

tamāyāntaṃ tato dṛṣṭvā krodhāddhāvantamañjasā /
suvṛttaḥ kanako ghora āseduḥ krodhamūrcchitāḥ

tamāsādya mahākāyaṃ śarabhaṃ bhrātarastrayaḥ /
uccikṣipuste yugapat potraghātairmahābalāḥ

yāvat pramāṇa: śarabhastatpramāṇāstadābhavan /
śarabhotkṣepasamaye māyayā potriṇastrayaḥ

teṣāṃ potraprahāreṇa protkṣiptaḥ śarabhastadā /
papāta pṛthivīprānte gambhīre toyasāgare

tasmin nipatite tatra sāgare makarālaye /
utpatya te trayaḥ petuḥ krodhāttasmin mahodadhau

suvṛtte kanake ghore patite sāgarāmbhasi /
vārāho'pi sutasnehāt krodhācca dvijasattamāḥ /
utpatya sahasā tasmiṃstoyarāśau papāta ha

utpatantastadā te vai vārāhā: śarabhastathā /
vabhañjardivi devāṃstu nakṣatrāṇi grahāṃstathā

kecittu nihatā devā bhūmau petuśca kecana /
kecicca jñānino devā mahaloṃkamupāśritāḥ

nakṣatrāṇi vimānāttu patitāni mahītale /
adṛśyanta dvijaśreṣṭhā jvālāmālākulāni vai

teṣāmutpatane vego yo'bhūt paramadāruṇaḥ /
tenātivego janito vāyuḥ paramadāruṇaḥ

vāyunā tena saṃtrastā parvatāḥ pṛthivītale /
kecicchailāḥ parvateṣu patitāḥ punareva te

vimṛdya vṛkṣān jantūṃśca nipetuśca punaḥ punaḥ /
kecittu parvatāghātairnṛtyamānā mahītale /
vabhañjuracalāścāpi vrajanto bahuśa: prajāḥ //६०/
parvatā samadṛśyanta vātavegena bhūtale /
saṅghaṭṭamānāstebhyo'nye vrajanta iva te'calāḥ

ambhonidhau patadbhistairvārāhaiḥ śarabheṇa ca /
parvataiśca mahātuṅgairutkṣiptāstoyarāśayaḥ

teṣāṃ prapātavegena kṣipteṣu jalarāśiṣu /
nistoyā iva saṃjātāḥ kṣaṇaṃ vai sarvasāgarāḥ

taiḥ sarvairudakaiḥ kṣiptaiḥ pṛthivītalamāgataiḥ /
utplāvitāḥ prajāḥ sarvāḥ kṣaṇājjagmuḥ kṣayaṃ tataḥ

plavamānā: prajāstoye mriyamāṇāḥ samantataḥ

hā pitastvatha hā tāta hā mātarhā suteti ca /
vilapanti sma karuṇaṃ bhītāścārtā mumūrṣavaḥ

yasmin deśe nipatito vārāhaiḥ śarabhaḥ saha /
tatraivādhogatā bhūmiḥ pādavegena dāritā

aparaḥ pṛthivīprānta utthitaḥ parvataiḥ saha /
sasarja janalokeṣu calāṃ teṣāṃ prabhañjanaiḥ

janalokeṣu saṃyuktāṃ pṛthivīṃ śarabhastadā /
niḥśreṇīmiva sambaddhāmacalāmapi potribhiḥ /
dadarśa vismayāviṣṭaḥ sa bhītaḥ śrāntapīḍitaḥ

tataste yuyudhuḥ sarve potrāghātena potriṇaḥ /
khuraprahārairdaṃṣṭrābhirgātrakṣepaiśca dāruṇaiḥ

śarabho'pyatha daṃṣṭrāyairnakhaistīkṣṇaiḥ khuraistathā /
lāṅgulasya prahāraistu tuṇḍaghātairmahāsvanaiḥ

caturbhiḥ potribhistaistu sa ekaḥ śarabho mahān /
ekāntaṃ yodhayāmāsa sahasraṃ parivatsarān

teṣāṃ prahārairvegaiśca bhramaṇaiśca gatāgataiḥ /
āsphoṭitaistathārāvairdehapātaiḥ pṛthak pṛthak /
pātāle pannagāḥ sarve vineśuḥ kadrujaiḥ saha

tataste sāgaraṃ tyaktvā pṛthivīmadhyamāgatāḥ /
parasparaṃ yudhyamānā tato'bhūt pṛthivī samā

śeṣo'pi mahatā yatnādvalenāṣṭabhyakacchapam /
dadhāra pṛthivīṃ duḥkhairbhagnaśīrṣaḥ pratāpitaḥ

anante vāmanībhūte samatvaṃ pṛthivītale /
gate'mbhobhiścaladbhiśca parvataiḥ sarvajantuṣu

naṣṭeṣu yudhyamāneṣu tripotriśarabheṣu ca /
sāgarairāplute sarvajagatyāpomaye harim /
cintāviṣṭaḥ surajyeṣṭhaḥ uvācātha pitāmahaḥ

// brahmovāca //
bhagavan bhuvanaṃ sarvaṃ sasurāsuramānuṣam /
vidhvastaṃ pṛthivī śīrṇā naṣṭāḥ sthāvarajaṅgamāḥ

devadānavagandharvā daityāścāpi sarīsṛpāḥ /
vidhvastā jagatāṃ nātha munayaśca tapodhanāḥ

tvaṃ pālako'si sarveṣāṃ tvameva jagataḥ prabhuḥ /
tasmāt pālaya naḥ sarvān pṛthivīṃ ca jagatpate

tvameva kāyaṃ vārāhaṃ svayamevopasaṃhara /
saṃsthāpaya mahābāho pṛthivīṃ ca carācaraiḥ

// mārkaṇḍeya uvāca //
iti tasya vacaḥ śrutvā brahmaṇo'tha janārdanaḥ /
yatnaṃ cakre tadā sarvaṃ saṃsthāpayitumacyutaḥ

tato harī rohitamatsyarūpī bhūtvā munīn sapta tadā savedān /
adhocchute rakṣaṇatatparo jagadhitāya sarvaśrutikovidāṃ varān

vasiṣṭhamatriṃ tvatha kaśyapaṃ ca viśvādimitraṃ ca sagautamaṃ munim /
mahātapasthaṃ jamadagnimukhyaṃ tathā bharadvājamuniṃ taponidhim

nidhāya pṛṣṭhe sa hi toyamadhye sthito mahānaupravare munīndrān /
tataḥ śivaṃ sāntvayituṃ janārdano jagāma yasmin yuyudhe sa potribhiḥ

śrāntaṃ vārāhairatipautraghaṭṭanai- rnipiḍītaṃ vyāttamukhaṃ śvaśantam /
athāgataṃ vīkṣya hari vārāha: sasmāra pūrvāṃ narasiṃhamūrtim

smṛtastadā tena samājagāma sakhā varāhasya hite nṛsiṃhaḥ /
tamāgataṃ vīkṣya tadā nṛsiṃhaṃ tadīyakāyān nijateja ādāt

dṛṣṭaṃ varāhai: śarabheṇa tejo yat sūryatulyaṃ praviveśa viṣṇau /
vijñāya tejorahitaṃ nṛsiṃhaṃ sasarja niśvāsacayaṃ varāhaḥ

tatastu jātā bahavo varāhā bahupramāṇādbhutatīkṣṇadaṃṣṭrāḥ /
te vai varāhā: śarabhaṃ girīśaṃ māyāvino vītabhayāstudantaḥ / / ८९ //
samaṃ nṛsiṃhena tadāpi yuddhaṃ cakrurmamarduśca bhṛśaṃ girīśam /
kṣaṇaṃ mahāpakṣisamānarūpāḥ kṣaṇaṃ tu gāvasturagā narāśca

kṣaṇaṃ nṛsiṃhāśca varāharūpā gomāyavo vaikṛtikā: kṣaṇaṃ te /
anekarūpāṇi bhayaṅkarāṇi vitanyamānāti raṇe varāhaiḥ

nirīkṣya bhargaṃ ca nipīḍitaṃ tai rathāsadanmādhavastaṃ girīśam /
pasparśa viṣṇurgiriśaṃ kareṇa tejo nyadhāttatra nijaṃ punaḥ saḥ

atha saṃspṛṣṭamātraḥ sa viṣṇunā prabhaviṣṇunā /
atīva mudito hṛṣṭo balavān samajāyata

athoccaiḥ śarabho nādaṃ nanāda balavad dṛḍham /
āpūritāni yenaitadbhuvanāni caturdaśa

nadatastasya vadanācchīkarā ye viniḥsṛtāḥ /
tato gaṇāḥ samabhavan mahākāyā mahaujasaḥ

yathā varāhaniśvāsānnānārūpadharā gaṇāḥ /
varāhāstādṛśā ete tato'pyatibalāḥ punaḥ

śvavarāhoṣṭrarūpāśca plavagomāyugomukhāḥ /
ṛkṣamārjāramātaṃgaśiśumārasvarūpiṇaḥ

siṃhavyāghramukhāḥ kecit kecit sarpākhumūrtayaḥ /
hayagrīvā hayamukhā mahiṣākṛtayaḥ pare

anye tu manujākārā mṛgameṣamukhāḥ punaḥ /
kabandhā hīnapādāśca vihastā bahupāṇayaḥ

kecittu śarabhākārāḥ kṛkalāsamukhāḥ pare /
matsyavaktrā grāhavaktrā hrasvā dīrghābalāḥ kṛśāḥ

catuḥ pādāṣṭapādāśca tripādāḥ dvipadāḥ pare /
ekapādā bhūrihastā yakṣakiṃpuruṣopamāḥ

paśvākārāḥ pakṣayuktāḥ lambodaramahodarāḥ /
dīrghodarāḥ sthūlakeśā bahukarṇā vikarṇakāḥ /
sthūlādharā dīrghadantā dīrghaśmaśrudharāḥ pare

ye santi prāṇino viprā bhuvaneṣu samantataḥ /
caturdaśasu te teṣāṃ rūpeṇa samatāṃ gatāḥ

nehāsti bhuvane jantuḥ sthāvaro vā jagat punaḥ /
yattulyarūpeṇa gaṇo na jātaḥ śaṅkarasya ca

te bhindipālaiḥ khaḍgaiśca parighaistomaraistathā /
śaṅkulāsigadābhiśca pāśaiḥ śaṅkabhireva ca

khaṭvāṅgaiśca triśūlaiśca kapālaiḥ śaktibhistathā /
dātraiḥ sṛṇibhirīṣāyairyaṣṭibhiśca trikaṇṭakaiḥ

prāsaiḥ paraśubhirbāṇaiḥ kodaṇḍairatibhīṣaṇāḥ /
jaṭācandrakalāyuktāḥ sarva eva mahābalāḥ

kecidbhargasya rūpeṇa vāhanenātha bhūṣaṇaiḥ /
tulyā jaṭārdhaśubhrāṃśu śubhraśīrṣā mahābalāḥ

ardhanārīśvarāḥ kecid yathārudrastathaiva te

kecittu cārurūpeṇa mohanena manobhuvaḥ /
tulyena vanitāsaṃghaiḥ samaṃ jātā ratotsukāḥ

ākāśacāriṇaḥ sarve sarve svacchandagāminaḥ // १११ /
nīlotpaladalaśyāmāḥ śuklā: kecana lohitāḥ /
raktāḥ pītāstathā citrā haritāḥ kapilāḥ pare /
ardhapītā hyarddharaktā nīlārdhā dhavalāḥ pare

sakṛṣṇapītāḥ śuklena kṛṣṇenārdhena rañjitāḥ /
ekavarṇā dvivarṇāśca trivarṇāśca tathāpare /
catuḥṣaṭpañcavarṇāśca kecid daśavarṇāḥ dvijāḥ

ḍiṇḍimān paṭahān śaṅkhān bheryānakasakāhalān

maṇḍūkān jharjharāṃścaiva jharjharīśca samardalāḥ /
vīṇāstantrī: pañcatantrīḥ śakaṭān dardarāṃstathā

gomukhānānakān kuṇḍān satālakaratālikān /
vādayanto gaṇāḥ sarve hasantaśca muhurmuhuḥ

varāhābhimukhā bhūtvā tasthuste hṛṣṭamānasāḥ /
tān sarvānāha śarabho bhagavān vṛṣabhadhvajaḥ

nidhnataitān varāhasya gaṇān vai krūrakarmabhiḥ /
krūradṛṣṭyā krūrayuddhaiḥ krūrā bhūtvā mahābalāḥ // ११८ /
tataste vai gaṇāḥ sarve nānākāravarāyudhāḥ /
sārdhaṃ varāhasya gaṇairyuyudhuḥ krūradarśanāḥ

ākāśacāriṇaḥ sarve jalapūrṇaṃ jagattrayam /
te parityajya yuyudhurviyatyevobhaye gaṇāḥ

tataḥ kṣaṇād varāhāsya gaṇān sarvān mahābalān /
harasya pramathā jaghnurmahāvātā ivāmbudān

hateṣu teṣu vīreṣu vārāheṣu gaṇeṣvatha /
dadhyau varāhaḥ kimiti prāk paścādvṛttamāsthitam

atha cintayatastasya svāntaṃ gatvā janārdanaḥ/
tat sarvaṃ jñāpayāmāsa varāhavapuṣo hitam /
tato deha – parityāgaṃ kartuṃ samayatastadā

tato daṃṣṭrāpraghātena narasiṃhaṃ mahābalaḥ /
śarabho bhagavān bhargo dvidhā madhye cakāra ha

narasiṃhe dvidhābhūte narabhāgeṇa tasya ca /
nara eva samutpanno divyarūpī mahāṛṣiḥ

tasya pañcāsyabhāgena nārāyaṇa itiśrutaḥ /
abhavat sumahātejā munirūpī janārdanaḥ

naro nārāyaṇaścobhau sṛṣṭihetū mahāmatī /
dvayoḥ prabhāvo durdharṣaḥ śāstre vede tapaḥsu ca

tau nāvi vinidhāyātha matsyamūrtyavitātmani /
āsasāda punardevo vārāhaḥ śarabhaṃ hariḥ

vapustyāgo mayāvaśyaṃ kartavyo jagatāṃ hite

iti pūrvaṃ pratijñātaṃ tadartho'yaṃ samudyamaḥ /
kriyate hariṇā sārdhaṃ śambhunā brahmaṇāpi ca

iti saṃcintya sa tadā śūkaraḥ parameśvaraḥ /
jagāda śarabhaṃ devaṃ mahādevaṃ mahābalam

// vārāha uvāca //
jahi māṃ tvaṃ mahādeva tyakṣye kāyamasaṃśayam /
hitāya sarvajagatāṃ devānāmapi ṛtvijān

mama dehapratīkau dhairyajñaṃ yūpaṃ prakalpya ca /
pṛthak pṛthak mahābhāgā saśāmitraṃ śruvādikam

tataste tān tribhiḥ putrairvidhadhvaṃ jagatāṃ hite /
kanakena suvṛttena ghoreṇa ca jaganmayīm

yajñād devāḥ prajāścaiva yajñādannān niyoginaḥ /
sarvaṃ yajñāt sadā bhāvi sarvaṃ yajñamayaṃ jagat

yamimaṃ pṛthivīgarbhamādhatta malinī punaḥ /
tamutpannaṃ svayaṃ devīṃ ciraṃ saṃgopayiṣyati

prāpte kāle yadā devī tadāyuṣmān subhāṣate /
vadhastasyātimārārtā tadaivainaṃ haniṣyatha

bhāratīṃ pṛthivīṃ magnāṃ yadādhaḥ śatayojanam /
śṛṅgivarāharūpeṇa proddhariṣye tadātvimām

kṛtakṛtyaṃ tu taṃ kāyaṃ tyājayiṣyati te sutaḥ /
yo bhāvī devasenānī rudrāt ṣāṇmāturāhvayaḥ

// mārkaṇḍeya uvāca //
evaṃ yajñavarāhe tu bhāṣamāṇe mahābale /
niḥsṛtya sumahattejo jvālāmālātidīpitam

sūryakoṭipratīkāśaṃ varāhavapuṣastadā /
harerbhagavato dehe viveśa mahaddabhutam

tasmin viṣṇau praviṣṭe tu vārāhe tejasi dvijāḥ /
suvṛttāt kanakādghorātteja ādāt svayaṃ hariḥ

teṣāmapi śarīrebhyastejobhāgaḥ pṛthak pṛthak /
viniḥsṛtya viniḥsṛtya jvālāmālātidīpitaḥ /
praviveśa hareḥ kāye yathā teṣāṃ pitustathā

tato hariśca brahmā ca mahādevaśca tadvacaḥ /
vārāhasya pratiśrutya omityuktvā punaḥ punaḥ

teṣāṃ kāyaparityāge akārṣuryatnamuttamam

tatastuṇḍaprahāreṇa śarabhaḥ kaṇṭhamadhyataḥ /
bhitvā vapurvarāhasya pātayāmāsa tajjale

taṃ pātayitvā prathamaṃ suvṛttaṃ kanakaṃ tathā /
ghoraṃ ca kaṇṭhadeśeṣu bhitvā bhitvā jaghāna ha

tyaktaprāṇāstu te sarve petustoye mahārṇave /
jale śabdaṃ vitanvānāḥ kālānalasamatviṣaḥ

patiteṣu varāheṣu brahmāviṣṇurharastathā /
sṛṣṭyarthaṃ cintayāmāsuḥ punareva samāgatāḥ

harasya tu gaṇāḥ sarve tadā bhargaṃ samāgatāḥ /
upatasthurmahābhāgāścaturbhāgena bhājitāḥ

ṣaṭtriṃśattu sahasrāṇi pramathā dvijasattamāḥ /
tatraikatra sahasrāṇi bhāge ṣoḍaśa saṃsthitāḥ

nānārūpadharā te vai jaṭācandrārdhamaṇḍitāḥ /
te sarve sakalaiśvaryayuktā dhyānaparāyaṇāḥ

yogino madamātsaryadambhāhaṅkāra varjitāḥ /
kṣīṇapāpā mahābhāgāḥ śambhoḥ prītikarāḥ parāḥ

na te parigrahaṃ rāgaṃ kāṃkṣanti sma kadācana /
saṃsāra - vimukhāḥ sarve yatayo yogatatparāḥ

dhyānāvasthaṃ mahādevaṃ parivārya dhṛtavratāḥ /
kṛtvā pariṣadaṃ rucyā tiṣṭhanti vigataklamāḥ

yadaiva paramaṃ jyotiścintayatyambikāpatiḥ /
tadaiva te pāriṣadāḥ sarve saṃveṣṭayanti tam

te ṣoḍaśa samākhyātāḥ koṭayo ye yatavratāḥ /
siṃhavyāghrādi sārūpyā aṇimādisamāyutāḥ

apare kāminaḥ śambhoḥ sunarmasacivāḥ smṛtāḥ /
vicitrarūpābharaṇā jaṭācandrārdhamaṇḍitāḥ

harasya tulyarūpeṇa viśadā vṛṣabhadhvajāḥ /
umāsadṛśarūpābhiḥ pramadābhiḥ samāgatāḥ

vicitramālyābharaṇā divyasraggandhabhūṣitāḥ /
umāsahāyaṃ krīḍantamanugacchanti bhūṣitāḥ /
śṛṅgāraveṣābharaṇā aṣṭau te koṭayo gaṇāḥ

ardhanārīśvarāścānye hyardhanārīśvaraṃ haram /
dhyānasthaṃ praviviśuste tulyarūpā harasya ye

umāsahāyo hi yadā ramate sasukhaṃ haraḥ /
ardhanārīśarīrāstu dvārapālā bhavanti te

ākāśamārge gacchantamanugacchanti nityaśaḥ /
dhyānasthaṃ paricaryanti salilādibhirīśvaram

nānāśastradharāḥ śambhorgaṇāste pramathāḥ smṛtāḥ // १६४ / /
pramathnanti ca yuddheṣu yudhyamānān mahābalān /
te vai mahābalāḥ śūrāḥ saṅkhyayā nava koṭayaḥ

apare gāyanāstālamṛdaṅgapaṇavādibhiḥ /
nṛtyanti vādyaṃ kurvanti gāyanti madhurasvaram

nānārūpadharāste vai saṅkhyayā koṭayastrayaḥ /
satataṃ cānugacchanti vicarantaṃ maheśvaram

sarve māyāvinaḥ śūrāḥ sarve śāstrārthapāragāḥ /
sarve sarvatra sarvajñāḥ sarve sarvatragāḥ sadā

muhūrtāt sarvabhuvanaṃ gatyā yānti punarbhavam /
aṇimādyaṣṭakaiśvaryayuktāste vai mahābalāḥ

apare rudranāmāno jaṭācandrārdhamaṇḍitāḥ /
devendrasya niyogena vartante tridive sadā /
teṣāṃ saṅkhyā caikakoṭiste sarve balavattarāḥ

kurvanti hi sadā sevāṃ harasya satataṃ gaṇāḥ /
vismayanti ca pāpiṣṭhān dharmiṣṭhān pālayanti ca

anugṛṇanti satataṃ dhṛtapāśupatavratān /
vighnāṃśca satataṃ ghnanti yogināṃ prayatātmanām

ṣaṭtriṃśat koṭayaścaite harasya sakalā gaṇāḥ /
varāhagaṇanāśārthaṃ hitāya jagatāṃ tathā // १७३ /
śaṅkarasyātha sevāyai samutpannā ime gaṇāḥ

varāhasya gaṇān dṛṣṭvā narasiṃhaṃ tathā harim /
svayaṃ śarabharūpaḥ san dhyāyannādaṃ tadākarot /
tacchītkarādyato jātāstatteṣāṃ bahurūpatā

krūradṛṣṭyā krūrayuddhaiḥ krūrakṛtyairimān gaṇān /
varāhasya ghnatetyevaṃ yataḥ proktaṃ kapardinā /
ataste krūrakarmāṇaḥ prajātāśca bhayaṅkarāḥ

na sadā krūrakarmāṇi te kurvanti mahaujasaḥ /
dṛṣṭimātrasya te krūrāḥ krūrāste na tu kāryataḥ

phalaṃ jalaṃ tathā puṣpaṃ patraṃ mūlaṃ tathaiva ca

niveditāni bhuñjanti vanaparvatasānuṣu /
āhṛtyāpi ca bhuñjanti patraṃ puṣpādikaṃ ca yat

bhavedbhargasya yaddhogyaṃ tadbhogāste mahaujasaḥ /
āmiṣāṇi ca nāśnanti hitvā caitracaturdaśīm

tatrāmiṣaṃ haro bhuṃkte caturdaśyā madhau sadā /
tataḥ sarve gaṇāstatra bhuṃjate palalānyapi

hate varāhasya gaṇe bhargamāsādya te gaṇāḥ /
caturbhāgāḥ svayaṃ bhūtvā bhūtakarmeti vai jaguḥ /
bhūtatvamabhavatteṣāṃ caturbhāgavatāṃ tadā /
vacanāt padmayostu bhūtagrāmastato mataḥ

yo lokaviditaḥ pūrvaṃ bhūtagrāmaścaturvidhaḥ /
yatastebhyo'dhiko yattadbhūtagrāmaḥ sa ucyate

iti vaḥ kathitaṃ sarvaṃ bhūtāḥ śambhugaṇāḥ yathā /
yadāhārā yadākārā yatkṛtyāste mahaujasaḥ // १८४ / /
ya idaṃ śṛṇuyānnityamākhyānaṃ mahadadbhutam /
sa dīrghāyuḥ sadotsāhī yogayuktaśca jāyate

iti śrīkālikāpurāṇe śarabhavārāhayuddho nāma triṃśo'dhyāyaḥ

kālikā purāṇa hindī anuvāda paḍhane ke lie dekheṃ-[https://ptvaishnavi.blogspot.com/2023/07/Kalika-puran-adhyay-30.html DP Karmakand]