Jnaneshwari · Chapter 9
tari avadhāna ekaveḻeṃ dīje / maga sarva sukhāsi pātra hoīje /
heṃ pratijñottara mājheṃ / ughaḍa aikā
pari prauḍhī na boleṃ ho jī / tumhāṃ sarvajñāṃcāṃ samājīṃ /
deyāveṃ avadhāna he mājhī / vinavaṇī salagīcī
kāṃ je laḻeyāṃce laḻeṃ saratī / manorathāce manaure puratī /
jarī māhereṃ śrīmaṃteṃ hotī / tumhā aisī
tumaceyā diṭhiveciyā vole / sāsinnale prasannatece maḻe /
te sāūlī dekhoni loḻeṃ / śrāṃtu jī mī
prabhū tumhī sukhāmṛtāce ḍoho / mhaṇoni āmhī āpuliyā svecchā volāvoṃ lāhoṃ /
yetha jarī salagī karū bihoṃ / tarī nivo keṃ pāṃ
nātarī bālaka bobaḍāṃ bolīṃ / kāṃ vākuḍāṃ vicukāṃ pāūlīṃ /
teṃ coja karūni māūlī / rijhe jevīṃ
tevī tumhā saṃtāṃcā paḍhiyāvo / kaiseni tari āmhāṃvarī ho /
yā bahuvā āḻukiyā jī āhoṃ / salagī karīta
vāṃcūni mājhiye bolatīye yogyate / sarvajña bhavādṛśa śrote /
kāya dhaḍyāvarī sārasvateṃ / paḍhoṃ sikije
avadhārāṃ āvaḍe tesaṇāṃ dhuṃdhuru / pari mahātejīṃ na mirave kāya karūṃ /
amṛtācyā tāṭī vogarūṃ / aisī rasasoya kaiṃcī
aho himakarāsī viṃjaṇe / kī nādāpuḍhe āikavaṇe /
leṇiyāsī leṇeṃ / heṃ kahīṃ āthī
sāṃgā parimaḻeṃ kāya turaṃbāveṃ / sāgareṃ kavaṇe ṭhāyīṃ nāhāveṃ /
heṃ gaganaci āḍeṃ āghaveṃ / aisā pavāḍu kaiṃcā
taiseṃ tumaceṃ avadhāna dhāye / āṇi tumhī mhaṇā heṃ hoye /
aiseṃ vaktṛtva kavaṇā āhe / jeṇe rijhā tumhī
tari viśvapragaṭatiyā gabhastī / hātiveni na kīje āratī /
kāṃ cuḻodakeṃ apāṃpatī / arghyu nedije
prabhu tumhī maheśāciyā mūrtī / āṇi mī dubaḻā arcitase bhaktī /
mhaṇoni bela jaऱhī gaṃgāvatī / taऱhī svīkārāla kī
bāḻaka bāpāciye tāṭīṃ rige / rigauni bāpāteṃca jevaūṃ lāge /
kī to saṃtoṣaleni vegeṃ / mukhaci voḍavī
taisā mī tumhāṃpratī / cāvaṭī karitase bāḻamatī /
tarī tumhīṃ saṃtoṣije aisī jātī / premācī yā
āṇi teṇe āpulepaṇāceni moheṃ / tumhī saṃta ghetale asā bahuve /
mhaṇoni keliye salagīcā nohe / ābhāru tumhāṃ
aho tānheyācī lāgatā jhaṭe / tarī adhikaci pānhā phuṭe /
roṣeṃ prema duṇavaṭe / paḍhiyaṃtayāceni
mhaṇaūni maja leṃkuravāceni boleṃ / tumaceṃ kṛpāḻūpaṇa nidaile /
te ceileṃ heṃ jī jāṇavaleṃ / yālāgīṃ boliloṃ mī
eऱhavīṃ cāṃdaṇe pikavijata āhe cepaṇī / kīṃ vārayā dhāpata āhe vāhaṇī /
hāṃ ho gaganāsī gaṃvasaṇī / ghālije kevī
āikāṃ pāṇī vothijāve na lage / navanītīṃ māthulā na rige /
teviṃ lājileṃ vyākhyāna na nige / dekhoni jayāṃte
heṃ aso śabdabrahma jiye bāje / śabda māvaḻaleyā nivāṃtu nije /
to gītārthu maऱhāṭiyā bolije / hā pāḍu kāī
pari aisiyāhī maja dhiṃvasā / to puḍhatiyāci yekī āśā /
je dhiṭīṃvā karūni bhavādṛśyāṃ / paḍhiyaṃtā hoāveṃ
pari ātāṃ caṃdrāpāsoni nivavite / jeṃ amṛtāhūni jīvaviteṃ /
teṇeṃ avadhāna kījo vāḍhateṃ / manorathā mājhiyā
kāṃ jaiṃ diṭhivā tumacā varuṣe / taiṃ sakaḻārthasiddhi matī pike /
eऱhavī koṃbhelā unmeṣu suke / jarī udāsa tumhī
sahajeṃ tarī avadhārā / vaktṛtvā avadhānācā hoya cārā /
tarī doṃdeṃ pelatī akṣarāṃ / prameyācīṃ
artha bolācī vāṭa pāhe / tetha abhiprāvo abhiprāyāteṃ viye /
bhāvācā phulaurā hota jāye / mativarī
mhaṇūni saṃvādācā suvāvo ḍhaḻe / tarī hṛdayākāśa sārasvateṃ voḻe /
āṇi śrotā duścitā tari vituḻe / māṃḍalā rasu
aho caṃdrakāṃtu dravatā kīra hoye / pari te hātavaṭī caṃdrī kīṃ āhe /
mhaṇaūni vaktā to vaktāci navhe / śroteni vīṇa
parī ātāṃ āmuteṃ goḍa karāveṃ / aise tāṃduḻī kāyasā vinavāve /
sāikhaḍiyāne kāi prārthāveṃ / sūtradhārāteṃ
kāya to bāhuliyāṃciyā kājā nācavī / kīṃ āpuliyeṃ jāṇivecī kaḻā vāḍhavī /
mhaṇaūni āmhāṃ yā ṭhevāṭhevī / kāya kāja
taṃva guru mhaṇatī kāi jāhaleṃ / heṃ samastahī āmhāṃ pāvaleṃ /
ātāṃ sāṃge jeṃ niropileṃ / nārāyaṇeṃ
yetha saṃtoṣoni nivṛttidāseṃ / jī jī mhaṇaūni ulhāseṃ /
avadhārāṃ śrīkṛṣṇa aise / bolate jāhale
nātari arjunā heṃ bīja / puḍhatī sāṃgijela tuja /
jeṃ heṃ aṃtaḥkaraṇīṃce guja / jīvaciye
yeṇeṃ māneṃ jīvāceṃ hiyeṃ phoḍāveṃ / maga tuja kāṃ pāṃ maja sāṃgāve /
aiseṃ kāhīṃ svabhāveṃ / kalpiśī jarī
tarī pariyesīṃ prājñā / tūṃ āsthecīca saṃjñā /
boliliye goṣṭīṃcī avajñā / neṇasī karuṃ
mhaṇoni gūḍhapaṇa āpuleṃ moḍo / vari na bolāveṃhī bolāveṃ ghaḍo /
pari āmucice jīvīṃceṃ paḍo / tujhāṃ jīvīṃ
agā thānīṃ kīra dūdha gūḍha / pari thānāsīci navhe kīṃ goḍa /
mhaṇoni saro kāṃ sevitayācī cāḍa / jarī ananya miḻe
muḍāhūni bīja kāḍhileṃ / maga nirvāḻaliye bhūmī perileṃ /
tarī teṃ sāṃḍīvikhurīṃ geleṃ / mhaṇoṃ ye kāyī
yālāgīṃ sumanu āṇi śuddhamatī / jo aniṃdaku ananyagatī /
paiṃ gā gaupyahī pari tayāpratī / cāvaḻijeṃ sukheṃ
tari prastuta ātāṃ guṇīṃ ihīṃ / tūṃ vāṃcūni āṇika nāhīṃ /
mhaṇoni guja tarī tujhāṃ ṭhāyīṃ / lapavūṃ naye
ātāṃ kitī nāvānāvā guja / mhaṇatāṃ kānaḍeṃ vāṭela tuja /
tari jñāna sāṃgena sahaja / vijñāneṃsīṃ
pari teṃci aiseni nivāḍeṃ / jaiseṃ bhesaḻaleṃ khareṃ kuḍeṃ /
maga kāḍhije phāḍovāḍeṃ / pārakhūniyāṃ
kāṃ cāṃcūceni sāṃḍaseṃ / khāṃḍije paya pāṇī rājahaṃseṃ /
tuja jñāna vijñāna taiseṃ / vāṃṭūni deūṃ
maga vārayāciyāṃ dhārasāṃ / paḍilā koṃḍā kāṃ nureci jaisā /
āṇi annakaṇācā āpaisā / rāśi joḍe
taiseṃ jeṃ jāṇitaleyāsāṭhīṃ / saṃsāra saṃsārāciye gāṃṭhī /
lāūni baisavī pāṭīṃ / mokṣaśriyecāṃ
jeṃ jāṇaṇeyāṃ āghaveyāṃcāṃ gāṃvīṃ / gurutvācī ācāryapadavī /
jeṃ sakaḻa guhyāṃcā gosāvī / pavitrāṃ rāvo
āṇi dharmāceṃ nijadhāma / teṃviṃci uttamāce uttama /
paiṃ jayā yetāṃ nāhīṃ kāma / janmāṃtarāceṃ
moṭakeṃ gurumukheṃ udaijata dise / āṇi hṛdayīṃ svayaṃbhaci ase /
pratyakṣa phāvo lāge taiseṃ / āpaisayā
teviṃci paiṃ gā sukhācāṃ pāuṭīṃ / caḍhatāṃ yeije jayāciyā bheṭī /
maga bheṭalyā kīra miṭhī / bhogaṇeyāhi paḍe
pari bhogāciyā ailīkaḍiliye mere / citta ubheṃ ṭheleṃci sukhā bhare /
aiseṃ sulabha āṇi sopāreṃ / vari parabrahma
paiṃ gā āṇikahī eka yāceṃ / jeṃ hātā āle tarī na vace /
āṇi anubhavitāṃ kāṃhīṃ na vece / vari viṭehi nā
yetha jarī tūṃ tārkikā / aisī hana ghesī śaṃkā /
nā yevaḍhī vastu he lokāṃ / uralī keviṃ pāṃ
ekottareyāciyā vāḍhī / je jaḻatiye āgīṃ ghālitī uḍī /
te anāyāseṃ svagoḍī / sāṃḍitī keviṃ
tari pavitra āṇi ramya / teviṃci sukhopāyeṃci gamya /
āṇi svasukha pari dharmya / vari āpaṇapāṃ joḍe
aisā avaghāci suravāḍu āhe / tarī janāhātīṃ keviṃ uro lāhe /
hā śaṃkecā ṭhāva kīra hoye / pari na dharāvī tuvāṃ
pāheṃ pāṃ dūdha pavitra āṇi goḍa / pāsīṃ tvaceciyā padarāāḍa /
pari teṃ avheruni gociḍa / aśuddha kāya neghatī
kāṃ kamalakaṃdā āṇi dardurīṃ / nāṃdaṇuka ekeci gharīṃ /
pari parāgu sevije bhramarīṃ / javaḻilāṃ cikhaluci ure
nātarī nidaivācāṃ parivarīṃ / lohyā rutaliyā āhāti sahastravarīṃ /
pari tetha baisoni upavāsu karī / kāṃ daridreṃ jiye
taisā hṛdayāmadhyeṃ mī rāmu / asatāṃ sarvasukhācā ārāmu /
kīṃ bhrāṃtāsī kāmu / viṣayāvarī
bahu mṛgajaḻa dekhoni ḍoḻāṃ / thuṃkije amṛtācā giḻitāṃ gaḻāḻā /
toḍilā parisu bāṃdhilā gaḻā / śuktikālābheṃ
taisīṃ ahaṃmamateciye lavaḍasavaḍī / māteṃ na pavatīci bāpuḍīṃ /
mhaṇoni janmamaraṇācī duthaḍī / ḍahuḻiteṃ ṭhelīṃ
eऱhavīṃ mī tarī kaisā / mukhāpratī bhānu kāṃ jaisā /
kahīṃ nase na dise aisā / vāṇīcā navheṃ
mayā tatamidaṃ sarvaṃ jagadavyaktamūrtinā /
mājheyā vistāralepaṇāceni nāṃveṃ / he jagaci nohe āghaveṃ /
jaiseṃ dūdha murāleṃ svabhāveṃ / tari teṃci dahīṃ
kāṃ bījaci jāhaleṃ taru / athavā bhāṃgāraci aḻaṃkāru /
taisā maja ekācā vistāru / teṃ heṃ jaga
heṃ avyaktapaṇeṃ thijaleṃ / teṃci maga viśvākāreṃ vothijaleṃ /
taiseṃ amūrtamūrti miyāṃ vistāraleṃ / trailokya jāṇeṃ
mahadādi dehāṃteṃ / iyeṃ aśeṣeṃhī bhūteṃ /
pari mājhāṃ ṭhāyīṃ biṃbate / jaise jaḻīṃ pheṇa
pari tayā pheṇāṃāṃtu pāhatāṃ / jevīṃ jaḻa na dise paṃḍusutā /
nātarī svapnīṃcī anekatā / ceiliyā nohije
taisīṃ bhūteṃ iyeṃ mājhāṃ ṭhāyīṃ / biṃbatī tayāṃmājī mī nāhīṃ /
iyā upapattī tuja pāhīṃ / sāṃgitaliyā māgāṃ
mhaṇaūni boliliyā bolācā ātiso / na kīje yālāgīṃ heṃ aso / tarī majāāṃta paiso / diṭhi tujhī
āmacā prakṛtīpailīkaḍīla bhāvo / jarī kalpanevīṇa lāgasī pāhoṃ /
tarī majamāji bhūteṃ heṃhī vāvo / je mī sarva mhaṇaūni
eऱhavīṃ saṃkalpāciye sāṃjaveḻe / nāveka timirejatī buddhīce ḍoḻe / mhaṇoni akhaṃḍita pari jhāṃvaḻeṃ / bhūtabhinna aiseṃ dekheṃ
teci saṃkalpācī sāṃja jaiṃ lope / taiṃ akhaṃḍitaci āhe svarupeṃ /
jaiseṃ śaṃkā jātakheṃvo lope / sāpapaṇa māḻeceṃ
eऱhavīṃ tarī bhūmīāṃtūni svayaṃbha / kāya ghaḍegāḍageyāṃce nighatī koṃbha / pari te kulālamatīce garbha / umaṭale kīṃ
nātarī sāgarīṃcāṃ pāṇīṃ / kāya taṃragāciyā āhātī khāṇī /
te avāṃtara karaṇī / vārayācī navhe
pāheṃ pāṃ kāpasācāṃ poṭīṃ / kāya kāpaḍācī hotī peṭī /
to veḍhitayāciyā diṭhī / kāpaḍa jāhalā
jarī soneṃ leṇeṃ hoūni ghaḍe / tarī tayāceṃ sonepaṇa na moḍe /
yera aḻaṃkāra he varacilīkaḍe / letayāceni bhāveṃ
sāṃgeṃ paḍisādācī pratyuttareṃ / kāṃ ārisāṃ jeṃ āviṣkare /
teṃ āpaleṃ kīṃ sācokāreṃ / tetheṃci hoteṃ
taisī iye nirmaḻe mājhāṃ svarupīṃ / jo bhūtabhāvanā āropī /
tayāsī tayācāṃ saṃkalpīṃ / bhūtābhāsu ase
teci kalpitī prakṛtī pure / āṇi bhūtābhāsu ādhīṃca sare /
maga svarupa ure ekasareṃ / nikhaḻa mājheṃ
heṃ aso āṃgīṃ bharaliyā bhavaṃḍī / jaiśā bhoṃvata disatī araḍīdaraḍī / taiśī āpuliyā kalpanā akhaṃḍīṃ / gamatī bhūteṃ
teci kalpanā sāṃḍūni pāhīṃ / tari mī bhūtīṃ bhūteṃ mājhiyā ṭhāyīṃ /
heṃ svapnīṃhī pari nāhīṃ / kalpāvayājogeṃ
ātāṃ mī eka bhūtāteṃ dhartā / athavā bhūtāmāji mī asatā /
yā saṃkalpasannipātā / āṃtuliyā boliyā
mhaṇoni pariyesīṃ gā priyottamā / yāparī mī viśveṃsīṃ viśvātmā /
jo iyā laṭakiyā bhūtagrāmā / bhāvyu sadā
raśmīceni ādhāreṃ jaiseṃ / navhateṃci mṛgajaḻa ābhāse /
mājhāṃ ṭhāyīṃ bhūtajāta taiseṃ / āṇi māteṃhī bhāvīṃ
mī ye parīcā bhūtabhāvanu / pari sarva bhūtāṃsi abhinnu /
jaisī prabhā āṇi bhānu / ekaci te
hā āmacā aiśvaryayogu / tuṃvā dekhilā kīṃ cāṃgu /
ātāṃ sāṃgeṃ kāṃhīṃ etha lāgu / bhūtabhedācā ase
paiṃ gagana jevaḍheṃ jaiseṃ / pavanu gaganīṃ tevaḍhāci ase /
sahajeṃ hālaviliyā vegaḻā dise / eऱhavīṃ gagana teṃci te
taiseṃ bhūtajāta mājhāṃ ṭhāyīṃ / kalpije tarī ābhāseṃ kāṃhīṃ /
nirvikalpīṃ tari nāhīṃ / tetha mīca mī āghave
mhaṇaūni nāhīṃ āṇi ase / heṃ kalpaneceni sauraseṃ /
je kalpanālopeṃ bhraṃśeṃ / āṇi kalpanesaveṃ hoya
teṃci kalpiteṃ mudala jāye / taiṃ aseṃ nāhīṃ heṃ keṃ āhe /
mhaṇaūni puḍhatī tūṃ pāheṃ / hā aiśvaryayogu
aisiyā pratītibodhasāgarīṃ / tūṃ āpaṇapeyāteṃ kalloḻu eka karīṃ /
maga jaṃva pāhāsī carācarīṃ / taṃva tūci āhāsī
yā jāṇaṇeyācā cevo / tuja ālā nā mhaṇatī devo /
tarī ātāṃ dvaitasvapna vāvo / jāleṃ kīṃ nā
tarī puḍhatī jarī vipāyeṃ / buddhīsi kalpanecī jhoṃpa ye /
tarī abhedabodhu jāye / jaiṃ svapnīṃ paḍije
mhaṇoni ye nidrecī vāṭa moḍe / nikhaḻa udbodhāceṃci āpaṇapeṃ ghaḍe /
aiseṃ varma jeṃ āhe phuḍeṃ / teṃ dāvo ātāṃ
tarī dhanurdharā dhairyā / nikeṃ avadhāna deīṃ bā dhanaṃjayā /
paiṃ sarva bhūtāṃteṃ māyā / kari hari gā
jiye nāṃva gā prakṛtī / je dvividha sāṃgitalī tujapratī /
ekī aṣṭadhā bhedavyaktī / dujī jīvarupā
hā prakṛtīvikho āghavā / tuṃvā māgāṃ parisilāse pāṃḍavā /
mhaṇoni aso kāi sāṃgāvā / puḍhatapuḍhatī
tarī ye mājhiye prakṛtī / mahākalpācāṃ aṃtī /
sarva bhūteṃ avyaktīṃ / aikyāsī yetī
grīṣmācāṃ atirasīṃ / sabīje tṛṇeṃ jaisīṃ /
māgutī bhūmīsī / sulīneṃ hotī
kāṃ vārṣiye ḍheṃḍheṃ phiṭe / jevhāṃ śāradīyecā anughaḍu phuṭe /
tevhāṃ ghanajāta āṭe / gaganīṃceṃ gaganīṃ
nātarī ākāśāciye khoṃpe / vāyu nivāṃtuci lope /
kāṃ taraṃgatā hārape / jaḻīṃ jevīṃ
athavā jāginaliye veḻe / svapna manīṃceṃ manīṃ māvaḻe /
taiseṃ prākṛta prakṛtī miḻe / kalpakṣayīṃ
maga kalpādīṃ puḍhatī / mīci sṛjīṃ aisī vadaṃtī /
tarī iyeviṣayīṃ nirutī / upapattī āika
tarī heci prakṛti kiriṭī / mī svakīyā sahajeṃ adhiṣṭhīṃ /
tetha taṃtusamavāyapaṭīṃ / jeviṃ viṇāvaṇī dise
maga tiye viṇāvaṇīceni ādhāreṃ / lahānāṃ caukaḍiyāṃ paṭatva bhare /
taisī paṃcātmake ākāreṃ / prakṛtici hoye
jaiseṃ virajaṇiyāceni saṃgeṃ / dūdhaci āṭejoṃ lāge /
taiśī prakṛti āṃgā rige / sṛṣṭipaṇāciyā
bīja jaḻāci javaḻīka lāhe / āṇi teṃci śākhopaśākhīṃ hoye /
taiseṃ maja karaṇeṃ āhe / bhūtāṃce heṃ
agā nagara heṃ rāyeṃ keleṃ / yā mhaṇaṇayā sācapaṇa kīra āleṃ /
pari niruteṃ pāhatāṃ kāya śiṇale / rāyāce hāta
āṇi mī prakṛti adhiṣṭhīṃ teṃ kaiseṃ / jaisā svapnīṃ jo ase /
maga toci praveśe / jāgṛtāvasthe
tari svapnauni jāgṛtī yetāṃ / kāya pāya dukhatī paṃḍusutā /
kīṃ svapnāmājīṃ asatāṃ / pravāsu hoya
yā āghaviyācā abhiprāvo kāyī / je heṃ bhūtasṛṣṭīceṃ kāṃhīṃ /
maja ekahī karaṇeṃ nāhīṃ / aisāci arthu
jaiśī rāyeṃ adhiṣṭhilī prajā / vyāpāre āpulāliyā kājā /
taisā prakṛtisaṃgu mājhā / yera karaṇeṃ teṃ iyeceṃ
pāheṃ pāṃ pūrṇacaṃdrāciye bheṭī / samudra bharateṃ apāra dāṭī /
tetha caṃdrāsi kāya kirīṭī / upakhā paḍe
jaḍa pari javaḻikā / loha caḻe tari caḻo kāṃ /
kavaṇu śīṇu bhrāmakā / sannidhānācā
kiṃbahunā yāparī / mī nijaprakṛti aṃgīkārīṃ /
āṇi bhūtasṛṣṭī ekasarī / prasavoṃci lāge
jo hā bhūtagrāmu āghavā / ase prakṛtiādhīna pāṃḍavā /
jaisī bījāciyā velapālavā / samartha bhūmi
nātari bāḻādikāṃ vayasāṃ / gosāvī dehasaṃgu jaisā /
athavā ghanāvaḻī ākāśā / vārṣiyeṃ jevīṃ
kāṃ svapnāsi kāraṇa nidrā / taisī prakṛti he nareṃdrā /
yā aśeṣāhi bhūtasamudrā / gosāviṇī gā
sthāvarā āṇi jaṃgamā / sthūḻā athavā sūkṣmā /
he aso bhūtagrāmā / prakṛtici mūḻa
mhaṇoni bhūteṃ hana sṛjāvīṃ / kāṃ sṛjilīṃ pratipāḻāvīṃ /
iyeṃ karaṇīṃ na yetī āghavīṃ / āmuciyā āṃgā
jaḻīṃ caṃdrikeciyā pasaratī velī / te vāḍhī caṃdre nāhīṃ vāḍhavilī /
tevi māteṃ pāvoni ṭhelīṃ / durī karmeṃ
āṇi suṭaliyā siṃdhujaḻācā loṭu / na śake dharuṃ saiṃdhavācā ghāṭu /
tevi sakaḻa karmā mīca śevaṭu / tī kāi bāṃdhatī māteṃ
dhūmrarajāṃcī piṃjarī / vājatiyā vāyuteṃ jarī hokārī /
kāṃ sūryabiṃbāmājhārīṃ / āṃdhāre rige
heṃ aso parvatāciye hṛdayīṃceṃ / jeviṃ parjanyadhārāstava na khoṃce /
teviṃ karmajāta prakṛtīceṃ / na lage maja
eऱhavīṃ iye prākṛtīṃ vikārīṃ / eku mīci āhe avadhārīṃ /
pari udāsīnāciyā pari / karīṃ nā karavī
dīpu ṭhevilā parivarīṃ / kavaṇāteṃ niyamī nā nivārī /
āṇi kavaṇa kavaṇiye vyāpārīṃ / rāhāṭe teṃhi neṇe
to jaisā kā sākṣibhūtu / gṛhavyāpārapravṛttihetu /
taisā bhūtakarmīṃ anāsaktu / mī bhūtīṃ aseṃ
hā ekaci abhiprāvo puḍhatapuḍhatī / kāya sāṃgo bahutāṃ upapattīṃ / yetha ekaveḻāṃ subhadrāpatī / yetuleṃ jāṇa pāṃ
je lokaceṣṭāṃ samastāṃ / jaisā nimittamātra kāṃ savitā /
taisā jagatprabhavīṃ paṃḍusutā / hetu mī jāṇeṃ
kāṃ jeṃ miyāṃ adhiṣṭhiliyā prakṛtī / hotī carācarāciyā saṃbhūtī / mhaṇoni mī hetu heṃ upapattī / ghaḍe yayā
ātāṃ yeṇeṃ ujivaḍeṃ niruteṃ / nyāhāḻīṃ pāṃ aiśvaryayogāteṃ /
je mājhāṃ ṭhāyīṃ bhūteṃ / parī bhūtīṃ mī naseṃ
athavā bhūteṃ nā mājhāṃ ṭhāyīṃ / āṇi bhūtāṃmāji mī nāhīṃ /
yā khuṇā tuṃ kahī / cukoṃ nako
heṃ sarvasva āmuceṃ gūḍha / pari dāvileṃ tuja ughaḍa /
ātāṃ iṃdriyāṃ deūni kavāḍa / hṛdayīṃ bhogīṃ
hā daṃśu jaṃva naye hātāṃ / taṃva mājheṃ sācokārepaṇa pārthā /
na saṃpaḍe gā sarvathā / jeviṃ bhusīṃ kaṇu
eऱhavīṃ anumānāceni paiseṃ / āvaḍe kīra kaḻaleṃ aiseṃ /
pari mṛgajaḻāceni volāṃśeṃ / kāya bhūmi time
jeṃ jāḻa jaḻīṃ pāṃgileṃ / tetha caṃdrabiṃba dise āṃtuḍaleṃ /
pari thaḍiye kāḍhūni jhāḍileṃ / tevhāṃ biṃba keṃ sāṃge
taiseṃ bolavari vācābaḻeṃ / vāyāṃci jhakavijatī pratītīce ḍoḻe /
maga sācokāreṃ bodhāveḻe / āthi nā hoīje
kiṃbahunā bhavā bihā yā / āṇi sāceṃ cāḍa āthi jarī miyāṃ /
tari tumhīṃ gā upapattī iyā / jatana kīje
eऱhavīṃ vedhalī diṭhī kavaḻeṃ / te cāṃdaṇiyāte mhaṇe piṃvaḻeṃ /
teviṃ mājhāṃ svarupīṃ nirmaḻe / dekhāla doṣa
nātarī jvareṃ viṭāḻale mukha / te dudhāteṃ mhaṇe kaḍū vikha /
teviṃ amānuṣā mānuṣa / mānāla māteṃ
mhaṇaūni puḍhatī tūṃ dhanaṃjayā / jhaṇeṃ visaṃbasī yā abhiprāyā /
je iyā sthūladṛṣṭī vāyāṃ / jāijela gā
paiṃ sthūladṛṣṭī dekhatī māteṃ / teṃci na dekhaṇeṃ jāṇa niruteṃ /
jaiseṃ svapnīṃceni amṛteṃ / amarā nohije
eऱhavīṃ sthūladṛṣṭī mūḍha / māteṃ jāṇatī kīra dṛḍha /
pari teṃ jāṇaṇeṃci jāṇaṇeyā āḍa / rigoni ṭhāke
jaisā nakṣatrāciyā ābhāsā- / sāṭhīṃ ghātu jhālā tayā haṃsā /
mājīṃ ratnabuddhīciyā āśā / rigoniyāṃ
sāṃge gaṃgā yā buddhī mṛgajaḻa / ṭhākoni āliyāceṃ kavaṇa phaḻa /
kāya surataru mhaṇoni bābuḻa / sevilī karī
hā niḻayācā dusarā / yā buddhī hātu ghātalā vikhārā /
kāṃ ratne mhaṇoni gārā / veṃcī jeviṃ
athavā nidhāna heṃ pragaṭaleṃ / mhaṇoni khadirāṃgāra khoḻe bharile /
kāṃ sāulī neṇatāṃ ghātaleṃ / kuhāṃ siṃheṃ
teviṃ mī mhaṇoni prapaṃcīṃ / jihīṃ buḍī didhalī kṛtaniścayācī /
tihīṃ caṃdrāsāṭhīṃ jeviṃ jaḻīṃcī / pratimā dharilī
taisā kṛtaniścaya vāyāṃ gelā / jaisā koṇhī eku kāṃjī pyālā /
maga pariṇāma pāhoṃ lāgalā / amṛtācā
taiseṃ sthūlākārīṃ nāśivaṃte / bharaṃvasā bāṃdhoni citteṃ /
pāhatī maja avināśāteṃ / tarī kaiṃcā diseṃ
kāi paścimasamudrāciyā taṭā / nighijata āhe pūrviliyā vāṭā /
kāṃ koṃḍā kāṃḍatāṃ subhaṭā / kaṇu ātuḍe
taiseṃ vikāraleṃ heṃ sthūḻa / jāṇitaleyā mī jāṇavataseṃ kevaḻa /
kāi pheṇa pitāṃ jaḻa / sevileṃ hoya
mhaṇoni mohileni manodharmeṃ / heṃci mī mānūni saṃbhrameṃ /
maga yethiṃcīṃ jiyeṃ janmakarmeṃ / tiyeṃ majaci mhaṇatī
yetuleni anāmā nāma / maja akriyāsi karma /
videhāsi dehadharma / āropitī
maja ākāraśūnyā ākāru / nirupādhikā upacāru /
maja vidhivivarjitā vyavahāru / ācārādika
maja varṇahīnā varṇu / guṇātītāsi guṇu /
maja acaraṇā caraṇu / apāṇiyā pāṇī
maja ameyā māna / sarvagatāsī sthāna /
jaiseṃ sejemājī vana / nidelā dekhe
taiseṃ aśravaṇā śrotra / maja acakṣūsī netra /
agotrā gotra / arupā rupa
maja avyaktāsi vyaktī / anārtāsī ārtī /
svayaṃtṛptā tṛptī / bhāvitī gā
maja anāvaraṇā prāvaraṇa / bhūṣaṇātītāsi bhūṣaṇa /
maja sakaḻakāraṇā kāraṇa / dekhatī te
maja sahajāteṃ karitī / svaṃyabhāteṃ pratiṣṭhitī /
niraṃtarāte āvhānitī / visarjitī gā
mī sarvadā svataḥsiddhu / to kīṃ bāḻa taruṇa vṛddhu /
maja ekarupā saṃbaṃdhu / jāṇatī aise
maja advaitāsi dujeṃ / maja akartāyāsi kājeṃ /
mī abhoktā kīṃ bhuṃjeṃ / aiseṃ mhaṇatī
maja akuḻāceṃ kuḻa vānitī / maja nityāceni nidhaneṃ śiṇatī /
maja sarvāṃtarāte kalpitī / ari mitra gā
mī svānaṃdābhirāmu / tayā maja anekāṃ sukhāṃcā kāmu /
avaghācī mī ase samu / kīṃ mhaṇatī ekadeśī
mī ātmā eka carācarīṃ / mhaṇatī ekācā kaiṃpakṣa karīṃ /
āṇi koponi ekāteṃ mārīṃ / heṃci vāḍhavitī
kiṃbahunā aise samasta / je he manuṣyadharma prākṛta /
tayāci nāṃva mī aiseṃ viparīta / jñāna tayāṃceṃ
jaṃva ākāru eka puḍhāṃ dekhatī / taṃva hā deva yeṇeṃ bhāveṃ bhajatī /
maga toci bighaḍaliyā ṭākitī / nāhīṃ mhaṇoni
māteṃ yeṇeṃ yeṇeṃ prakāreṃ / jāṇatī manuṣya aiseni ākāreṃ /
mhaṇaūni jñānaci teṃ āṃdhāreṃ / jñānāsi karī
yālāgīṃ janmaleci te mogha / jaiseṃ vārṣiyevīṇa megha /
kāṃ mṛgajaḻāce taraṃga / durunīci pāhāve
athavā kolherīce asivāra / nātarīṃ voḍaṃbarīce aḻaṃkāra /
kīṃ gaṃdharvanagarīce āvāra / ābhāsatī kāṃ
sāṃvarī vāḍhinnalyā saraḻā / vari phaḻa nā āṃtu pokaḻā /
kāṃ stana jāle gaḻāṃ / śeḻiye jaise
taiseṃ mūrkhāceṃ tayāṃ jiyāleṃ / āṇi dhik karma tayāṃceṃ nipajaleṃ /
jaiseṃ sāṃvarī phaḻa āleṃ / ghepe nā dīje
maga jeṃ kāṃhīṃ te paḍhinnale / teṃ markaṭeṃ nāraḻa toḍile /
kāṃ āṃdhaḻyā hātīṃ paḍileṃ / motī jaiseṃ
kiṃbahunā tayāṃcīṃ śāstreṃ / jaiśī kumārīṃhātī didhalīṃ śastreṃ /
kāṃ aśaucyā maṃtreṃ / bījeṃ kathilīṃ
taiseṃ jñānajāta tayāṃ / āṇi jeṃ kāṃhīṃ ācaraleṃ gā dhanaṃjayā /
teṃ āghaveṃci geleṃ vāyāṃ / je cittahīna
paiṃ tamoguṇācī rākṣasī / je sadbuddhīteṃ grāsī /
vivekācā ṭhāvoci pusī / niśācarī
tiye prakṛtī varapaḍe jāle / mhaṇaūni ciṃteceni kapoleṃ gele /
vari tāmasīyeciye paḍile / mukhāmājīṃ
jetha āśeciye lāḻe / āṃtu hiṃsā jībha loḻe /
tevīṃci saṃtoṣāce cākaḻe / akhaṃḍa caghaḻī
je anarthāce kānaverī / āvāḻuveṃ cāṭīta nighe bāherī /
je pramādaparvatīṃci darī / sadāci mātalī
jetha dveṣāciyā dāḍhā / khasakhasāṃ jñānācā karitī ragaḍā /
je agastīgavasaṇī mūḍhāṃ / sthūlabuddhī
aise āsuriye prakṛtīcāṃ toṃḍīṃ / je jāle gā bhūtoṃḍīṃ /
te buḍoni gele kuṃḍīṃ / vyāmohācāṃ
evaṃ tamāciye paḍile garte / na pavijatīci vicārāceni hāteṃ /
heṃ aso te gele jetheṃ / te śuddhīci nāhīṃ
mhaṇoni asotu iyeṃ vāyāṇīṃ / kāyaśīṃ mūrkhācīṃ bolaṇīṃ /
vāyāṃ vāḍhavitāṃ vāṇī / śiṇela hana
aiseṃ bolile deveṃ / tetha jī mhaṇitaleṃ pāṃḍaveṃ /
āikeṃ jetha vācā visave / te sādhukathā
tarī jayāṃciye cokhaṭe mānasīṃ / mī hoūni aseṃ kṣetrasaṃnyāsī /
jayāṃ nijeliyāṃteṃ upāsī / vairāgya gā
jayāṃciyā āstheciyā sadbhāvā / āṃtu dharma kari rāṇivā /
jayāṃceṃ mana olāvā / vivekāsī
je jñānagaṃge nāhāle / pūrṇatā jeūni dhāle /
je śāṃtīsi āle / pālava nave
je pariṇāmā nighāle koṃbha / je dhairyamaṃḍapāce staṃbha /
je āṃnadasamudrīṃ kuṃbha / cubakaḻoni bharile
jayāṃ bhaktīcī yetulī prāptī / je kaivalyāteṃ parauteṃ sara mhaṇatī / jayāṃciye līlemājīṃ nīti / jiyālī dise
je āghavāṃci karaṇīṃ / leile śāṃtīcī leṇīṃ /
jayāṃceṃ citta gavasaṇī / vyāpakā maja
aise je mahānubhāva / je daiviye prakṛtīceṃ daiva /
je jāṇoniyāṃ sarva / svarupa mājhe
maga vāḍhateni premeṃ / māteṃ bhajatī je mahātme /
pari dujepaṇa manodharmeṃ / śivataleṃ nāhī
aiseṃ mīca hoūni pāṃḍavā / karitī mājhī sevā /
pari navalāvo to sāṃgāvā / ase āika
tarī kīrtanāceni naṭanāceṃ / nāśile vyavasāya prāyaścittāṃce /
je nāmaci nāhīṃ pāpāceṃ / aiseṃ keleṃ
yamadamā avakaḻā āṇilī / tīrtheṃ ṭhāyāvaruni uṭhavilī /
yamalokīṃ khuṃṭilī / rāhāṭī āghavī
yamu mhaṇe kāya yamāveṃ / damu mhaṇe kavaṇāteṃ damāveṃ /
tīrtheṃ mhaṇatī kāya khāveṃ / doṣa okhadāsi nāhīṃ
aise mājheni nāmaghoṣeṃ / nāhīṃ karitī viśvācīṃ duḥkheṃ /
avagheṃ jagaci mahāsukheṃ / dumadumita bharaleṃ
te pāhāṃṭevīṇa pāhāvita / amṛteṃvīṇa jīvavita /
yogeṃvīṇa dāvita / kaivalya ḍoḻāṃ
pari rāyā raṃkā pāḍa dharuṃ / neṇatī sāneyāṃ thorāṃ kaḍasaṇī karuṃ /
ekasareṃ āṃnadāce āvāru / hota jagā
kahīṃ ekādheni vaikuṃṭhā jāveṃ / teṃ tihīṃ vaikuṃṭhaci keleṃ āghaveṃ /
aiseṃ nāmaghoṣagauraveṃ / dhavaḻaleṃ viśva
tejeṃ sūrya taise sojvaḻa / pari tohi astave heṃ kiḍāḻa /
caṃdra saṃpūrṇa ekhāde veḻa / he sadā purate
megha udāra pari vosare / mhaṇaūni upamesī na pure /
he niḥśaṃkapaṇeṃ sapāṃkhare / paṃcānana
jayāṃce vācepuḍhāṃ bhoje / nāma nācata ase mājheṃ /
jeṃ janmasahastrīṃ voḻagije / ekaveḻa mukhāsi yāvayā
to mī vaikuṃṭhīṃ naseṃ / eka veḻa bhānubiṃbīṃhī na diseṃ /
varī yogiyāṃcīṃhī mānaseṃ / umaraḍoni jāya
pari tayāṃpāśīṃ pāṃḍavā / mī hārapalā giṃvasāvā /
jetha nāmaghoṣu baravā / karitī te mājhe
kaise mājhāṃ guṇīṃ dhāle / deśakāḻāteṃ visarale /
kīrtanasukheṃ jhāle / āpaṇapāṃci
kṛṣṇa viṣṇu hari goviṃda / yā nāmāce nikhaḻa prabaṃdha /
mājī ātmacarcā viśada / udaṃḍa gātī
heṃ bahu aso yāparī / kīrtita māteṃ avadhārīṃ /
eka vicaratī carācarīṃ / pāṃḍukumarā
maga āṇika te arjunā / sāviyā bahuvā jatanā /
paṃcaprāṇā manā / pāḍhāū gheunī
bāherī yamaniyamāṃcī kāṃṭī lāvilī / āṃtu vajrāsanācī pauḻī pannāsilī /
varī prāṇāyāmāṃcī māṃḍilīṃ / vāhātīṃ yaṃtreṃ
tetha ulhāṭaśaktīceni ulhāṭaśaktīceni / manapavanāceni suravāḍeṃ /
satarāviyeceṃ pāṇiyāṃḍe / baḻiyāvileṃ
tevhāṃ pratyāhāreṃ khyāti kelī / vikārāṃcī saṃpilī bohalī /
iṃdriyeṃ bāṃdhoni āṇilīṃ / hṛdayāāṃtu
taṃva dhāraṇāvāru dāṭile / mahābhūtāṃteṃ ekavaṭileṃ /
maga caturaṃga sainya nivaṭileṃ / saṃkalpāceṃ
tayāvarī jaita re jaita / mhaṇoni dhyānāceṃ jaita re jaita vājata /
dise tanmayāceṃ jhaḻakata / ekachatra
pāṃṭī samādhiśriyecā aśekhā / ātmānubhavarājyasukhā /
paṭṭābhiṣeku dekhāṃ / samaraseṃ jāhalā
aiseṃ heṃ gahana / arjunā mājheṃ bhajana /
ātāṃ aikeṃ sāṃgena / je karitī eka
tarī donhī pālavaverī / jaisā eka taṃtu aṃbarīṃ /
taisā mīvāṃcūni carācarīṃ / jāṇatī nā
ādi brahmā karunī / śevaṭīṃ maśaka dharunī /
mājī samasta heṃ jāṇonī / svarupa mājheṃ
maga vāḍa dhākuṭeṃ na mhaṇatī / sajīva nirjīva neṇatī /
dekhiliye vastū ujū luṃṭitī / mīci mhaṇoni
āpuleṃ uttamatva nāṭhave / puḍhīla yogyāyogya neṇave /
ekasareṃ vyaktimātrāceni nāṃveṃ / namūṃci āvaḍe
jaiseṃ uṃcīṃ udaka paḍileṃ / teṃ taḻavaṭavarī ye ugeleṃ /
taiseṃ namije bhūtajāta dekhileṃ / aisā svabhāvoci tayāṃcā
kāṃ phaḻaliyā tarucī śākhā / sahajeṃ bhūmīsī utare dekhā /
taiseṃ jīvamātrāṃ aśekhāṃ / khālāvatī te
akhaṃḍa agarvatā hoūni asatī / tayāṃteṃ vinayo heci saṃpattī /
je jayajayamaṃtreṃ arpitī / mājhāṃci ṭhāyīṃ
namitāṃ mānāpamāna gaḻāle / mhaṇoni avaciteṃ te mīci jahāle /
aise niraṃtara misaḻale / upāsitī
arjunā he guruvī bhaktī / sāṃgitalī tujapratī /
ātāṃ jñānayajñeṃ yajitī / te bhakta āikeṃ
pari bhajana karitī hātavaṭī / tūṃ jāṇata āhāsi kirīṭī /
je māgāṃ iyā goṣṭī / keliyā āmhīṃ
taṃva āthi jī arjuna mhaṇe / teṃ daivikiyā prasādāceṃ karaṇeṃ /
tari kāya amṛtāceṃ ārogaṇeṃ / pure mhaṇave
yā bolā anaṃteṃ / lāgaṭā dekhileṃ tayāteṃ /
kīṃ sukhāvaleni citteṃ / ḍolatu ase
mhaṇe bhaleṃ keleṃ pārthā / eऱhavīṃ hā anavasaru sarvathā /
pari bolavītase āsthā / tujhī māteṃ
taṃva arjuna mhaṇe heṃ kāyī / cakoreṃvīṇa cāṃdiṇeṃci nāhīṃ /
jaga nivavije hā tayācāṃ ṭhāyīṃ / svabhāvo kīṃ jī
yereṃ cakoreṃ tiyeṃ āpuliye cāḍe / cāṃcu karitī caṃdrākaḍe /
teviṃ āmhī vinavuṃ teṃ thokaḍe / devo kṛpāsiṃdhu
jī megha āpuliye prauḍhī / jagācī ārti davaḍī /
vāṃcūni cātakācī tāhāna kevaḍhī / to varṣāvo pāhunī
pari cuḻā ekāciyā cāḍe / jeviṃ gaṃgeteṃci ṭhākāveṃ paḍe /
teṃviṃ ārta kā bahu kāṃ thoḍeṃ / tari sāṃgāveṃ devā
tetheṃ deveṃ mhaṇitaleṃ rāheṃ / jo saṃtoṣu āmhāṃ jāhalā āhe /
tayāvarī stuti sāhe / aiseṃ uraleṃ nāhī
paiṃ parisatu āmhāsi nikiyāparī / teṃci vaktṛtvā vaऱhāḍīka karī / aiseṃ puraskaroni śrīharī / ādarileṃ boloṃ
tarī jñānayajñu to evaṃrupu / tetha ādisaṃkalpu hā yūpu /
mahābhūteṃ maṃḍapu / bhedu to paśu
maga pāṃcāṃce je viśeṣa guṇa / athavā iṃdriyeṃ āṇi prāṇa /
heci yajñopacārabharaṇa / ajñāna dhṛta
tetha manabuddhīciyā kuṃḍā- / āṃtu jñānāgni dhaḍaphuḍā /
sāmya teci suhāḍā / vedi jāṇeṃ
savivekamatipāṭava / teci maṃtravidyāgaurava /
śāṃti strukastruva / jīva yajvā
to pratītīceni pātreṃ / vivekamahāmaṃtreṃ /
jñānāgnihotreṃ / bhedu nāśī
tetha ajñāna saroni jāye / āṇi yajitā yajana heṃ ṭhāye /
ātmasamarasīṃ nhāye / avabhṛthīṃ jevhāṃ
tevhāṃ bhūteṃ viṣaya karaṇeṃ / heṃ vegaḻāleṃ kāhīṃ na mhaṇe /
āghaveṃ ekaci aiseṃ jāṇe / ātmabuddhī
jaisā ceilā to arjunā / mhaṇe svapnīṃcī heṃ vicitra senā /
mīci jāhāloṃ hotoṃ nā / nidrāvaśeṃ
ātāṃ senā te senā navhe / heṃ mīca eka āghaveṃ /
aiseṃ ekatveṃ mānave / viśva tayā
maga to jīvu he bhāṣa sare / ābrahma paramātmabodheṃ bhare /
aise bhajatī jñānādhvareṃ / ekatveṃ yeṇeṃ
athavā anādi heṃ aneka / je ānāsārikheṃ ekā eka /
āṇi nāmarupādika / teṃhī viṣama
mhaṇoni viśva bhinna / pari na bhede tayāṃceṃ jñāna /
jaise avayava tarī āna āna / pari ekeci dehīṃce
kāṃ śākhā sāniyā thorā / pari āhāti ekāciye taruvarā /
bahu raśmi pari dinakarā / ekāce jevīṃ
teviṃ nānāvidhā vyaktī / ānāneṃ nāmeṃ ānānī vṛttī /
aiseṃ jāṇatī bhedalāṃ bhūtīṃ / abhedā māteṃ
yeṇeṃ vegaḻālepaṇeṃ pāṃḍavā / karitī jñānayajñu baravā /
je na bheṃdatīṃ jāṇivā / jāṇate mhaṇauni
nā tarī jedhavāṃ jiye ṭhāyīṃ / dekhatī kāṃ jeṃ jeṃ kāṃhīṃ /
teṃ mīvāṃcūni nāhīṃ / aisāci bodhu
pāheṃ pāṃ buḍabuḍā jeutā jāye / teuteṃ jaḻaci eka tayā āhe /
maga vire athavā rāhe / taऱhī jaḻācimāji
kāṃ pavaneṃ paramāṇu ucalale / te pṛthvīpaṇāvegaḻe nāhīṃ gele /
āṇi māghauteṃ jarī paḍale / tarī pṛthvīcivarī
taiseṃ bhalatetha bhalateṇeṃ bhāveṃ / bhalateṃhī na ho athavā hoāveṃ /
pari teṃ mī aiseṃ āghaveṃ / hoūni ṭheleṃ
agā he jevhaḍī mājhī vyāpti / tevhaḍīci tayāṃci pratīti /
aise bahudhākārīṃ vartatī / bahuci houni
heṃ bhānubiṃba āvaḍetayā / sanmukha jaiseṃ dhanaṃjayā /
taiseṃ te viśvā yā / samora sadā
agā tayāṃciyā jñānā / pāṭhī poṭa nāhīṃ arjunā /
vāyu jaisā gaganā / sarvāṃgī ase
taisā mī jetulā āghavā / teṃci tuka tayāṃciyā sadbhāvā /
tarī na karitāṃ pāṃḍavā / bhajana jahāleṃ
eऱhavīṃ tarī sakaḻa mīci āheṃ / tarī kavaṇīṃ keṃ upāsilā noheṃ /
etha ekeṃ jāṇaṇevīṇa ṭhāye / aprāptāsī
pari teṃ aso yeṇeṃ uciteṃ / jñānayajñeṃ yajitasāṃte /
upāsitī māteṃ / te sāṃgitale
akhaṃḍa sakaḻa heṃ sakaḻāṃ mukhīṃ / sahaja arpata ase maja ekīṃ /
kīṃ neṇaṇeyāsāṭhīṃ mūrkhīṃ / na pavijeci māteṃ
toci jāṇivecā udayo jarī hoye / tarī mudala vedu mīci āheṃ /
āṇi to vidhānāteṃ jayā viye / to kratuhī mīci
maga tayā karmāpāsūni baravā / jo sāṃgopāṃgu āghavā /
yajñu pragaṭe pāṃḍavā / tohī mī gā
svāhā mī svadhā / somādi auṣadhī vividhā /
ājya mī samidhā / maṃtru mī havi
hotā mī havana kīje / tetha agni to svarupa mājheṃ /
āṇi hutaka vastū jeṃ jeṃ / tehī mīci
paiṃ jayāceni aṃgesaṃgeṃ / iye prakṛtīstava aṣṭāṃge /
janma pāvijata ase jageṃ / to pitā mī gā
ardhanārīnaṭeśvarīṃ / jo puruṣa toci nārī /
teviṃ mī carācarīṃ / mātāhī hoya
āṇi jāhāleṃ jaga jetha rāhe / jeṃṇe jita vāḍhata āhe /
teṃ mīci vācūni nohe / āna niruteṃ
iyeṃ prakṛtipuruṣeṃ donhī / upajalīṃ jayāciyā amanamanīṃ /
to pitāmaha tribhuvanīṃ / viśvācā mī
āṇi āghaveyāṃ jāṇaṇeyāṃciyā vāṭā / jayā gāṃvā yetī gā subhaṭā /
je vedāṃciyāṃ cohaṭāṃ / vedya jeṃ mhaṇije
jetha nānā matāṃ bujhāvaṇī jāhālī / ekamekāṃ śāstrāṃcī anoḻakhī phiṭalī /
cukalīṃ jñāneṃ jetha miḻoṃ ālīṃ / je pavitra mhaṇije
pai brahmabījā jāhalā aṃkuru / ghoṣadhvanīnādākāru /
tayāṃceṃ gā bhuvana jo ॐkāru / tohī mī gā
jayā ॐkārāciye kuśī / akṣareṃ hotī aumakāreṃsīṃ /
jiyeṃ upajata vedeṃsīṃ / uṭhalīṃ tinhīṃ
mhaṇoni ṛgyajuḥsāmu / he tinhī mhaṇe mī ātmārāmu /
eṃva mīci kulakramu / śabdabrahmācā
heṃ carācara āghaveṃ / jiye prakṛtī āṃta sāṭhave /
te śiṇalī jetha visave / te paramagatī mī
āṇi jayāceni prakṛti jiye / jeṇeṃ adhiṣṭhilī viśva viye /
jo yeūni prakṛtī iye / guṇāteṃ bhogī
to viśvaśriyecā bhartā / mīci gā paṃḍusutā /
mī gosāvī samastā / trailokyācā
ākāśeṃ sarvatra vasāveṃ / vāyūneṃ nāvabharī ugeṃ nasāveṃ /
pāvakeṃ dahāveṃ / varṣāveṃ jaḻeṃ
parvatīṃ baisakā na saṃḍāvī / samudrīṃ rekhā nolāṃḍāvī /
pṛthvīyā bhūteṃ vāhāvīṃ / he ājñā mājhī
myā bolavilyā vedu bole / myāṃ cālavilyā sūryu cāle /
myāṃ hālavilyā prāṇu hāle / jo jagāteṃ cāḻitā
miyāṃci niyamilāsāṃtā / kāḻu grāsitase bhūtāṃ /
iyeṃ mhaṇiyāgateṃ paṃḍusutā / sakaḻeṃ jayācīṃ
aisā jo samarthu / to mī jagācā nāthu /
āṇi gaganāaisā sākṣibhūtu / tohi mīci
ihīṃ nāmarupīṃ āghavā / jo bharalā ase pāṃḍavā /
āṇi nāmarupāṃhi volhāvā / āpaṇaci jo
jaise jaḻāce kalloḻa / āṇi kalloḻa āthī jaḻa /
aiseni vasavitase sakaḻa / to nivāsu mī
jo maja hoya ananya śaraṇa / tyāceṃ nivārīṃ mī janma maraṇa /
yālāgīṃ śaraṇāgatā śaraṇya / mīci eku
mīci eka anekapaṇeṃ / vegaḻāleni prakṛtīguṇeṃ /
jīta jagāceni prāṇeṃ / vartata ase
jaisā samudra thillara na mhaṇatāṃ / bhalatetha biṃbe savitā /
taisā brahmādi sarvāṃ bhūtā / suhṛda to mī
mīci gā pāṃḍavā / yā tribhuvanāsī volāvā /
sṛṣṭikṣayaprabhāvā / mūḻa teṃ mī
bīja śākhāṃteṃ prasave / maga teṃ rukhapaṇa bījīṃ sāmāve /
taise saṃkalpeṃ hoya āghaveṃ / pāṭhīṃ saṃkalpīṃ miḻe
aiseṃ jagāceṃ bīja jo saṃkalpu / avyakta vāsanārupu /
tayā kalpāṃtīṃ jetha nikṣepu / hoya teṃ mī
iyeṃ nāmarupeṃ loṭatī / varṇavyaktī āṭatī /
jātīṃce bheda phiṭatī / jaiṃ ākāśa nāhīṃ
taiṃ saṃkalpu vāsanāsaṃskāra / māghauteṃ racāvayā ākāra /
jetha rāhoni asatī amara / teṃ nidhāna mī
mī sūryāceni veṣeṃ / tapeṃ taiṃ heṃ śoṣe /
pāṭhīṃ iṃdra hoūni varṣeṃ / taiṃ puḍhatī bhare
agni kāṣṭheṃ khāye / teṃ kāṣṭhaci agni hoye /
tevi marateṃ māriteṃ pāheṃ / svarupa mājheṃ
yālāgīṃ mṛtyūcāṃ bhāgīṃ jeṃ jeṃ / teṃhī paiṃ rupa mājheṃ /
āṇi na marateṃ taṃva sahajeṃ / avināśu mī
ātā bahu boloni sāṃgāveṃ / teṃ ekiheḻāṃ ghe pāṃ āghaveṃ /
tarī satāsatahī jāṇāveṃ / mīci paiṃ gā
mhaṇoni arjunā mī naseṃ / aisā kavaṇu ṭhāva ase /
pari prāṇiyāṃceṃ daiva kaise / je na dekhatī māteṃ
taraṃga pāṇiyeṃvīṇa sukatī / raśmi vātīvīṇa na dekhatī /
taise mīci te mī navhatī / vismo dekhe
heṃ ātabāhera miyāṃ koṃdaleṃ / jaga nikhila mājheṃci votileṃ /
kīṃ kaiseṃ karma tayāṃ āleṃ / je mīṃci nāhī mhaṇatī
pari amṛtakuhāṃ paḍije / kāṃ āpaṇayāteṃ kaḍiye kāḍhije /
aiseṃ āthī kāya kīje / aprāptāsi
grāsā ekā annāsāṭhīṃ / aṃdhu dhāṃvatāhe kirīṭī /
āḍaḻalā ciṃtāmaṇi pāyeṃ loṭī / āṃdhaḻepaṇe
taiseṃ jñāna jaiṃ sāṃḍuni jāye / taiṃ aisī he daśā āhe /
mhaṇoni kīje teṃ keleṃ nohe / jñāneṃvīṇa
āṃdhaḻeyā garuḍāce pāṃkha āhātī / te kavaṇā upegā jātī /
taiseṃ satkarmāce upakhe ṭhātī / jñāneṃvīṇa
dekha pāṃ gā kirīṭī / āśramadharmāciyā rāhāṭī /
vidhimārgā kasavaṭī / je āpaṇaci hotī
yajana karitāṃ kautukeṃ / tihīṃ vedāṃcā māthā tuke /
kriyā phaḻeṃsi ubhī ṭhāke / puḍhāṃ jayāṃ
aise dīkṣita je somapa / je āpaṇaci yajñāceṃ svarupa /
tīṃhīṃ tayā puṇyāceni nāṃveṃ pāpa / joḍileṃ dekheṃ
je śrutitrayāṃte jāṇoni / śatavarī yajña karuni /
yajiliyā māteṃ cukoni / svargu varitī
jaiseṃ kalpatarutaḻavaṭīṃ / baisoni jhoḻiye pāḍī gāṃṭhī /
maga nidaiva nighe kirīṭī / dainyaci karuṃ
taise śatakratūṃ yajileṃ māteṃ / kīṃ īpsitāti svargasukhāṃteṃ /
ātāṃ puṇya kīṃ heṃ niruteṃ / pāpa nohe
mhaṇoni majavīṇa pāvije svargu / to ajñānācā puṇyamārgu /
jñāniye tayāteṃ upasargu / hāni mhaṇatī
eऱhavīṃ tarī narakīṃceṃ duḥkha / pāvoni svargā nāma kīṃ sukha / vāṃcūni nityānaṃda gā nirdoṣa / teṃ svarupa mājheṃ
maja yetāṃ paiṃ subhaṭā / yā dvividhā gā avhāṃṭā /
svargu naraku yā vāṭā / corāṃciyā
svargā puṇyātmakeṃ pāpeṃ yeīje / pāpātmakeṃ pāpeṃ narakā jāije /
maga māteṃ jeṇeṃ pāvije / teṃ śuddha puṇya
āṇi majacimājīṃ asatāṃ / jeṇeṃ mī dūrī hoya pāṃḍusutā /
teṃ puṇya aiseṃ mhaṇatāṃ / jībha na tuṭe kāī
pari heṃ aso ātāṃ prastuta / aikeṃ yāpari te dīkṣita /
yajuni māteṃ yācita / svargabhogu
maga mī na pavije aiseṃ / jeṃ pāparupa puṇya ase /
teṇeṃ lādhaleni sauraseṃ / svargā yetī
jetha amaratva heṃci siṃhāsana / airāvatāsārikheṃ vāhana /
rājadhānībhuvana / amarāvatī
jetha mahāsiddhīṃcī bhāṃḍāreṃ / amṛtācīṃ koṭhāreṃ /
jiyeṃ gāṃvīṃ khillāreṃ / kāmadhenūṃcīṃ
jetha voḻage deva pāikā / saighaṃ ciṃtāmaṇīciyā bhūmikā / vinodavanavāṭikā / surataruṃciyā
gaṃdharvagāna gāṇīṃ / jetha raṃbheaiśiyā nācaṇī /
urvaśī mukhya vilāsinī / aṃtauriyā
madana voḻage śejāre / jetha caṃdra śiṃpe sāṃbareṃ /
pavanā aiseṃ mhaṇiyāreṃ / dhāṃvaṇeṃ jetha
paiṃ bṛhaspati āpaṇa / aise svastīśriyece brāhmaṇa /
tāṭiyece suragaṇa / vikāra jetheṃ
lokapāḻarāṃgece / rāuta jiye padīce /
ucaiḥśravā khāṃce / kholaṇiye
heṃ bahu aso je aise / bhoga iṃdrasukhāsarise /
te bhogijatī jaṃva ase / puṇyaleśu
maga tayā puṇyācī pāuṭī sare / saveṃci iṃdrapaṇācī uṭī utare /
āṇi yeūṃ lāgatī māghāreṃ / mṛtyulokā
jaisā veśyābhogīṃ kavaḍā veṃce / maga dārahī cepūṃ na ye tiyeceṃ /
taiseṃ lājiravāṇeṃ dīkṣitāṃceṃ / kāya sāṃgo
evaṃ thitiyā māteṃ cukale / jīhīṃ puṇyeṃ svarga kāmile /
tayāṃ amarapaṇa teṃ vāvoṃ jāleṃ / ātāṃ mṛtyuloku
māteciyā udarakuharīṃ / pacūni viṣṭhecāṃ dātharīṃ /
ukaḍūni navamāsavarī / janmajanmoni maratī
agā svapnīṃ nidhāna phāve / pari ceiliyā hārape āghaveṃ /
taiseṃ svargasukha jāṇāveṃ / vedajñāceṃ
arjunā vedu jaऱhī jāhalā / tarī māteṃ neṇatāṃ vāyāṃ gelā /
kaṇu sāṃḍūni upaṇilā / koṃḍā jaisā
mhaṇaūni maja ekeṃviṇa / he trayīdharma akāraṇa /
ātāṃ māteṃ jāṇoni kāṃhīṃ neṇa / tūṃ sukhiyā hosī
paiṃ sarvabhāveṃsī ukhiteṃ / je vopile maja citteṃ /
jaisā garbhagoḻu udyamāteṃ / koṇāhī neṇe
taisā mīvācūni kāṃhī / āṇika gomaṭeṃci nāhīṃ /
majaci nāma pāhīṃ / jiṇeyā ṭhevileṃ
aise ananyagatikeṃ citteṃ / ciṃtitasāṃte māteṃ /
je upāsitī tayāṃteṃ / mīci sevīṃ
te ekavaṭūni jiye kṣaṇīṃ / anusarale gā mājhiye vāhaṇī /
tevhāṃci tayāṃcī ciṃtavaṇī / majaci paḍalī
maga tīhīṃ jeṃ jeṃ karāve / teṃ majaci paḍileṃ āghaveṃ /
jaiśī ajātapakṣāṃceni jīveṃ / pakṣiṇī jiye
āpulī tahānabhūka neṇe / tānhayā nikeṃ teṃ māulīsīci karaṇeṃ /
taise anusarale je maja prāṇeṃ / tayāṃcena kāisenihi na lajeṃ mī
tayā mājhiyā sāyujyācī cāḍa / tari teṃci puravīṃ koḍa /
kāṃ sevā mhaṇatī tarī āḍa / prema suyeṃ
aisā manīṃ jo jo bhāvo / to to puḍhāṃ puḍhāṃ lāgeṃ tayāṃ devoṃ /
āṇi didhaliyācā nirvāho / tohi mīci karīṃ
hā yogakṣemu āghavā / tayāṃcā majaci paḍilā pāṃḍavā /
jayāṃciyāṃ sarvabhāvāṃ / āśrayo mī
ātāṃ āṇikahī saṃpradāyeṃ / pari māteṃ neṇatī samavāyeṃ /
je agni-iṃdra-sūrya-somāye / mhaṇaūni yajitī
teṃhī kīra māteṃci hoye / kāṃ je heṃ āghaveṃ mīci āheṃ /
pari te bhajatī ujarī navhe / viṣama paḍe
pāhe pāṃ śākhā pallava vṛkṣāce / he kāya navhatī ekāci bījāce /
pari pāṇī gheṇeṃ muḻāceṃ / teṃ muḻīṃci ghāpe
kāṃ dahāhīṃ iṃdriyeṃ āhātī / iyeṃ jarī ekeci dehīṃcīṃ hotī /
āṇi ihīṃ sevile viṣayo jātī / ekāci ṭhāyā
tari karoni rasasoya baravī / kānīṃ keviṃ bharāvī /
phuleṃ āṇoni bāṃdhāvīṃ / ḍoḻāṃ keviṃ
to rasu to mukheṃci sevāvā / parimaḻu to ghrāṇeṃci ghyāvā /
taisā mī to yajāvā / mīci mhaṇoni
yera māteṃ neṇoni bhajana / teṃ vāyāṃci gā āneṃāna /
mhaṇoni karmāce ḍoḻe jñāna / teṃ nirdoṣa hoāveṃ
eऱhavīṃ pāheṃ pāṃ paṃḍusutā / yā yajñopahārāṃ samastāṃ /
mīvāṃcūni bhoktā / kavaṇu āhe
mī sakaḻāṃ yajñāṃcā ādi / āṇi yajanā yā mīci avadhi /
kīṃ māteṃ cukoni durbuddhi / devāṃ bhajale
gaṃgece udaka gaṃge jaiseṃ / arpiṃje devapittaroddeśeṃ /
mājhe maja detī taiseṃ / pari ānānīṃ bhāvīṃ
mhaṇaūni te pārthā / māteṃ na pavatīci sarvathā /
maga manīṃ vāhilī je āsthā / tetha āle
maneṃ vācā karaṇīṃ / jayāṃcīṃ bhajaneṃ devāṃciyā vāhaṇī /
te śarīra jātiyekṣaṇīṃ / devaci jāle
athavā pitarāṃcīṃ vrateṃ / vāhatī jayāṃcīṃ citteṃ /
jīvita saraliyā tayāṃteṃ / pitṛtva varī
kāṃ kṣudradevatādi bhūteṃ / tiyeṃci jayāṃcīṃ paramadaivateṃ /
jīṃhīṃ abhicārikīṃ tayāṃteṃ / upāsileṃ
tayāṃ dehāṃcī javanika phiṭalī / āṇi bhūtatvācī prāptī jāhalī /
evaṃ saṃkalpavaśeṃ phaḻalīṃ / karmeṃ tayāṃ
maga mīci ḍoḻāṃ dekhilā / jīṃhīṃ kānīṃ mīci aikilā /
manīṃ mī bhāvilā / vānilā vācā
sarvāṃgīṃ sarvāṭhāyīṃ / mīci namaskārilā jihīṃ /
dānapuṇyādikeṃ jeṃ kāṃhīṃ / teṃ mājhiyāci moharā
jihīṃ māteṃci adhyayana keleṃ / je āṃtabāhera miyāṃci dhāle /
jayāṃce jīvitva joḍaleṃ / majacilāgīṃ
je ahaṃkāru vāhata āṃgīṃ / āmhī harīce bhūṣāvayālāgīṃ /
je lobhiye ekaci jagīṃ / mājheni lobheṃ
je mājheni kāmeṃ sakāma / je mājheni premeṃ saprema /
je mājhiyā bhulī sabhrama / neṇatī loka
jayāṃcīṃ jāṇatī maja śāstreṃ / mī joḍeṃ jayāceni maṃtreṃ /
aise je ceṣṭāmātreṃ / bhajale maja
te maraṇāailīcakaḍe / maja miḻoni gele phuḍe /
maga maraṇīṃ āṇikīkaḍe / jātīla keviṃ
mhaṇoni madyājī je jāhāle / te mājhiyā sāyujyā āle /
jihīṃ upacāramiṣeṃ didhaleṃ / āpaṇapeṃ maja
paiṃ arjunā mājhāṃ ṭhāyīṃ / āpaṇapevīṇa saurasu nāhīṃ /
mī upacārīṃ kavaṇāhī / nākaḻeṃ gā
etha jāṇiva karī toci neṇe / āthileṃpaṇa miravī teṃci uṇeṃ /
āmhī jāhaloṃ aiseṃ jo mhaṇe / to kāṃhīṃci navhe
athavā yajñadānādi kirīṭī / kāṃ tapeṃ hana je huṭahuṭī /
te tṛṇā ekāsāṭhīṃ / na sare etha
pāheṃ pāṃ jāṇiveceni baḻeṃ / koṇhī vedāpāsūni ase āgaḻeṃ /
kīṃ śeṣāhūni toṃḍāgaḻeṃ / bolakeṃ āthī
tohī āṃtharuṇātaḻavaṭī daḍe / yeru neti neti mhaṇoni bahuḍe /
etha sanakādika veḍe / pise jāhale
karitāṃ tāpasāṃcī kaḍasaṇī / kavaṇu javaḻāṃ ṭhevijaila śūḻapāṇī /
tohi abhimānu sāṃḍūni pāyavaṇī / māthāṃ vāhe
nātarī āthilepaṇeṃ sarisī / kavaṇī āhe lakṣmiyeaisī / śriyesārikhiyā dāsī / gharīṃ jiyeteṃ
tiyāṃ kheḻatāṃ karitī gharakulī / tayāṃ nāmeṃ amarapureṃ jari ṭhevilīṃ / tari na hotī kāya bāhulīṃ / iṃdrādika tayāṃcīṃ
tayāṃ nāvaḍoni jevhāṃ moḍatī / tevhāṃ maheṃdrāce raṃka hotī /
tiyāṃ jhāḍāṃ yeute jayāṃ pāhatī / te kalpavṛkṣa
aiseṃ jiyeciyāṃ javaḻikāṃ / sāmarthya gharīṃciyāṃ pāikāṃ /
te lakṣmī mukhyanāyakā / na maneci etha
maga sarvasveṃ karuni sevā / abhimāna sāṃḍūni pāṃḍavā /
te pāya dhuvāvayāciyā daivā / pātra jāhālī
mhaṇoni thorapaṇa paऱhāṃci sāṃḍije / vyutpatti āghavī visarije /
jaiṃ jagā dhākuṭeṃ hoije / taiṃ javaḻīka mājhī
agā sahastrakiraṇāciye diṭhī / puḍhā caṃdruhī lope kirīṭī /
tetha khadyota kā huṭahuṭī / āpuleni tejeṃ
taiseṃ lakṣmiyeceṃ thorapaṇa na sare / jetha śaṃbhūceṃhī tapa na pure /
tetha yera prākṛta heṃdareṃ / keviṃ jāṇoṃ lāhe
yālāgīṃ śarīrasāṃḍovā kīje / sakaḻaguṇāṃceṃ loṇa utarije / saṃpattimadu sāṃḍije / kuravaṃḍī karunī
maga nissīmabhāvaulhāseṃ / maja arpāvayāceni miseṃ /
phaḻa āvaḍe taiseṃ / bhalatayāceṃ ho
bhaktu mājhiyākaḍe dāvī / āṇi mī donhī hāta voḍavīṃ /
maga deṭhuṃ na pheḍitāṃ sevīṃ / ādareṃśī
paiṃ gā bhaktīceni nāṃveṃ / phūla eka maja dyāveṃ /
teṃ lekheṃ tari myāṃ turaṃbāveṃ / pari mukhīṃci ghālīṃ
heṃ aso kāyasīṃ phuleṃ / pānaci eka āvaḍe teṃ jāhaleṃ /
teṃ sājukahī na ho sukaleṃ / bhalataiseṃ
pari sarvabhāveṃ bharaleṃ dekheṃ / āṇi bhukelā amṛteṃ tokhe /
taiseṃ patraci pari teṇeṃ sukheṃ / ārogūṃ lāgeṃ
athavā aiseṃhī eka ghaḍe / je pālāhī pari na joḍe /
tari udakāceṃ taṃva sāṃkaḍeṃ / navhela kīṃ
teṃ bhalatetha nimoleṃ / na joḍitāṃ āhe joḍaleṃ /
teṃci sarvasva karuni arpileṃ / jeṇeṃ maja
teṇeṃ vaikuṭhāpāsoni viśāḻeṃ / majalāgīṃ kelīṃ rāūḻeṃ /
kaustubhāhoni nirmaḻeṃ / leṇīṃ didhalīṃ
dūdhācīṃ śejāreṃ / kṣīrābdhīaisīṃ manohare /
majalāgīṃ apāreṃ / sṛjilīṃ teṇeṃ
karpūra caṃdana agaru / aiseyā sugaṃdhācā mahāmeru /
maja hātīṃ lāvilā dinakaru / dīpamāḻe
garuḍāsārikhīṃ vāhaneṃ / maja surataṃrucīṃ udyāneṃ /
kāmadhenūṃcīṃ godhaneṃ / arpilīṃ teṇeṃ
maja amṛtāhūni suraseṃ / bonīṃ vogarilīṃ bahuvaseṃ /
aisā bhaktāṃceni udakaleśeṃ / paritoṣeṃ gā
heṃ sāṃgāveṃ kāya kirīṭī / tumhīṃci dekhileṃ āpuliyā diṭhī /
mī sudāmayāciyā soḍīṃ gāṭhīṃ / pavhayālāgīṃ
paiṃ bhakti ekī mī jāṇeṃ / tetha sāneṃ thora na mhaṇeṃ /
āmhī bhāvāce pāhuṇe / bhalateyā
yera patra puṣpa phaḻa / teṃ bhajāvayā misa kevaḻa /
vāṃcūni āmucā lāga niṣphaḻa / bhaktitatva
mhaṇoni arjunā avadhārīṃ / tūṃ buddhi ekī sopārī karīṃ /
tarī sahajeṃ āpuliyā manomaṃdirīṃ / na visaṃbeṃ māteṃ
je je kāṃhīṃ vyāpāra karisī / kāṃ bhoga hana bhogisī /
athavā yajñīṃ yajasī / nānāvidhīṃ
nātarī pātraviśeṣeṃ dāneṃ / kāṃ sevakāṃ desī jīvaneṃ /
tapādi sādhaneṃ / vrateṃ karisī
teṃ kriyājāta āghaveṃ / jeṃ jaiseṃ nipajela svabhāveṃ /
teṃ bhāvanā karoni karāveṃ / mājhiyā moharā
pari sarvathā āpulāṃ jīvīṃ / keliyācī śaṃkā kāṃhīṃci nuravīṃ /
aisīṃ dhuvoni karme dyāvīṃ / mājhiyāṃ hātīṃ
maga agnikuṃḍī bījeṃ ghātalīṃ / tiyeṃ aṃkuradaśe jeviṃ mukalīṃ /
tevi na phaḻatīci maja arpilīṃ / śubhāśubheṃ
agā karme jaiṃ urāveṃ / taiṃ tihīṃ sukhaduḥkhīṃ phaḻāveṃ /
āṇi tayāteṃ bhogāvayā yāveṃ / dehā ekā
teṃ ugāṇileṃ maja karma / tevhāṃci pusileṃ maraṇa janma /
janmāsaveṃ śrama / varacilahī gele
mhaṇaūni arjunā yāpari / pāhecā veḻu navhela bhārī /
he saṃnyāsayukti sopārī / didhalī tuja
yā dehāciyā bāṃdoḍī na paḍije / sukhaduḥkhāciyā sāgarīṃ na buḍije / sukheṃ sukharupā ghaḍije / mājhiyāci aṃgā
to mī pusasī kaisā / tari jo sarvabhūtīṃ sadā sarisā /
jetha āpaparu aisā / bhāgu nāhīṃ
je aisiyā māteṃ jāṇoni / ahaṃkārācā kuruṭhā moḍoni /
je jīveṃ karme karuni / bhajatī māteṃ
te vartata disatī dehīṃ / pari te dehīṃ nā mājhāṃ ṭhāyīṃ /
āṇi mī tayāṃcā hṛdayīṃ / samagra aseṃ
savistara vaṭatva jaiseṃ / bījakaṇikemājīṃ ase /
āṇi bījakaṇu vase / vaṭīṃ jevīṃ
tevīṃ āmhāṃ tayāṃ paraspareṃ / bāherī nāmācīṃci aṃtareṃ /
vāṃcuni āṃtuvaṭa vastuvicāreṃ / mī teci te
ātāṃ jāyāṃceṃ leṇeṃ / jaiseṃ āṃgāvarī āhācavāṇeṃ /
taiseṃ deha dharaṇeṃ / udāsa tayāṃceṃ
parimaḻu nighāliyā pavanāpāṭhīṃ / māgeṃ vosa phūla rāhe deṭhīṃ /
taiseṃ āyuṣyāciye muṭhī / kevaḻa deha
yera avaṣṭaṃbhu jo āghavā / to āruḍhoni madbhāvā /
majaci āṃtu pāṃḍavā / paiṭhā jāhalā
aiseṃ bhajateni premabhāveṃ / jayāṃ śarīrahī pāṭhīṃ na pave /
teṇeṃ bhalatayā vhāveṃ / jātīciyā
āṇi ācaraṇa pāhātāṃ subhaṭā / to duṣkṛtācā sela vāṃṭā /
pari jīvita vecileṃ cohaṭāṃ / bhaktīciyā kīṃ
agā aṃtīṃciyā matī / sācapaṇa puḍhile gatī /
mhaṇoni jīvita jeṇeṃ bhaktī / didhaleṃ śekhīṃ
to ādhīṃ jarī anācārī / tarī sarvottamuci avadhārīṃ /
jaisā buḍālā mahāpūrīṃ / na maratu nighālā
tayāceṃ jīvita ailathaḍiye āleṃ / mhaṇoni buḍālepaṇa jevīṃ vāyāṃ geleṃ /
tevīṃ nureci pāpa keleṃ / śevaṭaliye bhaktī
yālāgīṃ duṣkṛtī jaऱhī jāhalā / tari anutāpatīrthīṃ nhālā /
nhāūni majaāṃtu ālā / sarvabhāveṃ
tari ātāṃ pavitra tayāceṃci kuḻa / abhijātya teṃci nirmaḻa /
janmaleyā phaḻa / tayāsīca joḍaleṃ
to sakaḻahī paḍhinnalā / tapeṃ toci tapinnalā /
aṣṭāṃga abhyāsilā / yogu teṇeṃ
heṃ aso bahuta pārthā / to utaralā karme sarvathā /
jayācī akhaṃḍa gā āsthā / majacilāgīṃ
avaghiyā manobuddhīciyā rāhaṭī / bharoni ekaniṣṭheciyā peṭī /
jeṇeṃ majamājīṃ kirīṭī / nikṣepilī
kṣipraṃ bhavati dharmātmā śaśvacchāntiṃ nigacchati /
to ātāṃ avasareṃ majasārikhā hoila / aisāhī bhāva tuja jāila /
hāṃ gā amṛtāāṃta rāhīla / tayā maraṇa kaiceṃ
pai sūrya jo veḻu nudaije / tayā veḻā kīṃ rātra mhaṇije /
tevīṃ mājhiye bhaktīviṇa jeṃ kīje / teṃ mahāpāpa nohe
mhaṇoni tayāciyā cittā / mājhī javaḻīka pāṃḍusutā /
tevhāṃci to tatvatā / svarupa mājheṃ
jaisā dīpeṃ dīpu lāvije / tetha ādīla koṇa heṃ noḻakhije /
taisā sarvasveṃ jo maja bhaje / to mī hoūni ṭhāke
maga mājhī nitya śāṃtī / tayā daśā teci kāṃtī /
kiṃbahunā jitī / mājheni jīveṃ / ४२९ //
etha pārthā puḍhatapuḍhatī / teṃci teṃ sāṃgo kitī /
jarī miyāṃ cāḍa tarī bhaktī / na visaṃbije gā
agā kuḻāciyā cokhaṭapaṇā nalagā / abhijātya jhaṇīṃ ślāghā / vyutpattīcā vāugā / sosu kāṃ vahāvā
kāṃ rupe vayasā mājā / āthilepaṇeṃ kāṃ gājā /
eka bhāva nāhīṃ mājhā / tarī pālhāḻa teṃ
kaṇeṃviṇa sopaṭeṃ / kaṇaseṃ lāgalīṃ āthī eka dāṭeṃ /
kāya karāveṃ gomaṭeṃ / vosa nagara
nātarī sarovara āṭaleṃ / rānīṃ duḥkhiyā duḥkhī bheṭaleṃ /
kāṃ vāṃjha phulīṃ phulaleṃ / jhāḍa jaiseṃ
taiseṃ sakaḻa teṃ vaibhava / athavā kuḻajātīgaurava /
jaiseṃ śarīra āhe sāveva / pari jīvaci nāhīṃ
taiseṃ mājhiye bhaktīviṇa / jaḻo teṃ jiyāleṃpaṇa /
agā pṛthvīvarī pāṣāṇa / nasatī kāī
paiṃ hiṃvarācī dāṭa sāulī / sajjanīṃ jaisī vāḻilī /
taisīṃ puṇyeṃ ḍāvalūni gelīṃ / abhaktāṃteṃ
niṃba niṃboḻiyāṃ moḍoni ālā / tarī to kāuḻiyāṃsīci sukāḻu jāhalā /
taisā bhaktihīnu vāḍhinnalā / doṣāṃcilāgīṃ
kāṃ ṣaḍrasa khāparīṃ vāḍhile / vāḍhūni cohaṭāṃ rātrī sāṃḍile /
te suṇiyāṃceci aise jhāle / jiyāparī
taiseṃ bhaktīhīnāceṃ jiṇeṃ / jo svapnīṃhī pari sukṛta neṇe /
teṇe saṃsāraduḥkhāsī āvaṃtaṇeṃ / vogarileṃ gā
mhaṇoni kuḻa uttama nohāveṃ / jātī aṃtyāhī vhāveṃ /
vari dehāceni nāṃveṃ / paśūceṃhī lābho
pāheṃ pāṃ sāvajeṃ hātiruṃ dharileṃ / teṇeṃ tayā kākuḻatī māteṃ smarileṃ /
kīṃ tayāceṃ paśutva vāvo jāhaleṃ / pātaliyā māteṃ
agā nāṃveṃ ghetā vokhaṭīṃ / je āghaveyā adhamāṃciye śevaṭīṃ /
tiye pāpayonīhī kirīṭī / janmale je
te pāpayoni mūḍha / mūrkha aise je dagaḍa /
pari mājhāṃ ṭhāyīṃ dṛḍha / sarvabhāveṃ
jayāṃciye vāce mājhe ālāpa / dṛṣṭī bhogī mājheṃci rupa /
jayāṃceṃ mana saṃkalpa / mājhāci vāhe
mājhiyā kīrtīviṇa / jayāṃce rite nāhīṃ śravaṇa /
jayāṃ sarvāṃgīṃ bhūṣaṇa / mājhī sevā
jayāṃceṃ nāva viṣo neṇe / jāṇīva majaci ekāteṃ jāṇe /
jayā aiseṃ lābhe tarī jiṇeṃ / eऱhavīṃ maraṇa
aisā āghavāci pari pāṃḍavā / jihīṃ āpuliyā sarvabhāvā / jiyāvayālāgīṃ volāvā / mīci kelā
te pāpayonīhī hotu kāṃ / te śrutādhītahī na hotuṃ kāṃ /
pari majasīṃ tukitāṃ tukā / tuṭī nāhīṃ
pāheṃ pāṃ bhakticeni āthilepaṇeṃ / daityīṃ devāṃ āṇileṃ uṇeṃ /
mājheṃ nṛsiṃhatva leṇeṃ / jayāciye mahime
to pralhādu gā majasāṭhīṃ / ghetāṃ bahuteṃ sadā kirīṭī /
kāṃ jeṃ miyāṃ dyāveṃ te goṣṭī / tayāciyā joḍe
eऱhavīṃ daityakuḻa sācokāreṃ / pari iṃdrihī sarī na lāhe upareṃ /
mhaṇoni bhakti gā etha sare / jāti apramāṇa
rājājñecīṃ akṣareṃ āhātī / tiyeṃ cāmā ekā jayā paḍatī /
tayā cāmāsāṭhīṃ joḍatī / sakaḻa vastu
vāṃcūni soneṃ rupeṃ pramāṇa nohe / etha rājājñāci samartha āhe /
teṃci cāma eka jaiṃ lāhe / teṇeṃ vikatī āghavīṃ
taiseṃ uttamatva taiṃci tare / taiṃci sarvajñatā sare /
jaiṃ manobuddhi bhare / mājheni premeṃ
mhaṇoni kuḻa jāti varṇa / heṃ āghaveṃci gā akāraṇa /
etha arjunā mājhepaṇa / sārthaka eka
teṃci bhalateṇeṃ bhāveṃ / mana majāāṃtu yeteṃ hoāveṃ /
āleṃ tarī āghaveṃ / māgīla vāvo
jaise tavaṃci vahāḻa vohaḻa / jaṃva na pavatī gaṃgājaḻa /
maga hoūni ṭhākatī kevaḻa / gaṃgārupa
kāṃ khaira caṃdana kāṣṭheṃ / he vivaṃcanā taṃvaci ghaṭe /
jaṃva na ghāpatī ekavaṭeṃ / agnīmājīṃ
taise kṣatrī vaiśya striyā / kāṃ śūdra aṃtyādi iyā /
jātī taṃvaci vegaḻāliyā / jaṃva na pavatī māteṃ
maga jātī vyaktī paḍe biṃduleṃ / jevhāṃ bhāva hotī maja mīnale /
jaise lavaṇakaṇa ghātale / sāgarāmājīṃ
taṃvavarī nadānadīṃcīṃ nāṃveṃ / taṃvaci pūrvapaścimece yāve /
jaṃva na yetī āghave / samudrāmājīṃ
heṃci kavaṇeṃ ekeṃ miseṃ / citta mājhāṃ ṭhāyīṃ praveśe /
yetuleṃ ho maga āpaiseṃ / mī hoṇe ase
agā varī phoḍāvayāci lāgīṃ / loho miḻo kāṃ parisācāṃ āṃgīṃ /
kāṃ je miḻatiye prasaṃgīṃ / soneṃci hoīla
pāheṃ pāṃ vālabhāceni vyājeṃ / tiyā vrajāṃganāṃcīṃ nijeṃ /
maja mīnaliyā kāya mājheṃ / svarupa navhatīci
nātarī bhayāceni miseṃ / māteṃ na pavijeci kāya kaṃseṃ /
kīṃ akhaṃḍa vairavaśeṃ / caidyādikīṃ
agā soyarepaṇeṃci pāṃḍavā / mājheṃ sāyujya yādavāṃ /
kīṃ mamatveṃ vāsudevā- / dikāṃ sakaḻāṃ
nāradā dhruvā akrūrā / śukā hana sanatkumārā /
yāṃ bhaktī mī dhanurdharā / prāpyu jaisā
taisāci gopīsī kāmeṃ / tayā kaṃsā bhayasaṃbhrameṃ /
yerā ghātakeyāṃ manodharmeṃ / śiśupālādikāṃ
agā mī ekulāṇīceṃ khāgeṃ / maja yevoṃ ye bhalateni mārge /
bhaktī kāṃ viṣayeṃ virāgeṃ / athavā vaireṃ
mhaṇoni pārthā pāhīṃ / praveśāvayā mājhāṃ ṭhāyīṃ /
upāyāṃcī nāhīṃ / keṇi etha
āṇi bhalatiyā jātī janmāveṃ / maga bhajije kāṃ virodhāveṃ /
pari bhakta kāṃ vairiyā vhāveṃ / mājhiyāci
agā kavaṇeṃ eke boleṃ / mājhepaṇa jaऱhī jāhāleṃ /
tarī mī hoṇeṃ āleṃ / hātā niruteṃ
yāpari pāpayonīhī arjunā / kāṃ vaiśya śūdra aṃganā /
māteṃ bhajatāṃ sadanā / mājhiyā yetī
maga varṇāṃmājīṃ chatracāmara / svarga jayāṃceṃ agrahāra /
maṃtravidyesi māhera / brāhmaṇa je
jetha akhaṃḍa vasije yāgīṃ / je vedāṃcī vajrāṃgī /
jayāciye diṭhīcāṃ utsaṃgīṃ / maṃgaḻa vāḍhe
je pṛthvītaḻīṃce deva / je tapovatāra sāvayava /
sakaḻa tīrthāṃsī daiva / udayaleṃ je
jayāciye āstheciye vole / satkarma pālhāḻīṃ geleṃ /
saṃkalpeṃ satya jiyāleṃ / jayāṃceni
jayāṃceni gā boleṃ / agnīsi āyuṣyā jāhāleṃ /
mhaṇoni samudreṃ pāṇī āpuleṃ / didhaleṃ yāṃciyā prītī
miyāṃ lakṣmī ḍāvaloni kelī parautī / pheḍoni kaustubha ghetalā hātīṃ / maga voḍhavilī vakṣasthaḻācī vākhatī / caraṇarajāṃ
ājhūni pāulāṃcī mudrā / mī hṛdayīṃ vāheṃ gā subhadrā /
je āpuliyā daivasamudrā / jatanelāgīṃ
jayāṃcā kopa subhaṭā / kāḻāgnirudrācā vasauṭā /
jayāṃcāṃ prasādīṃ phukaṭā / joḍatī siddhī
aise puṇyapūjya je brāhmaṇa / āṇi mājhāṃ ṭhāyīṃ ārtiṃnipuṇa /
ātāṃ māteṃ pāvatī heṃ kavaṇa / samarthaṇeṃ
pāheṃ pāṃ caṃdanāceni aṃgāniḻeṃ / śivatile niṃba hote je javaḻe /
tiṃhīṃ nirjivīṃhī devāṃcī niḍaḻeṃ / baisaṇīṃ kelīṃ
maga to caṃdanu tetha na pave / aiseṃ manīṃ kaiseni dharāveṃ /
athavā pātalā heṃ samarthāveṃ / tevhāṃ kāyi sāca
jetha nivavīla aisiyā āśā / hareṃ caṃdramā ādhā aisā /
vāhijata ase śirasā / niraṃtara
tetha nivavitā āṇi sagaḻā / parimaḻeṃ caṃdrāhūni āgaḻā /
to caṃdanu keviṃ avalīḻā / sarvāṃgī na baise
kāṃ rathyodakeṃ jiyeciye kāse / lāgaliyā samudra jālīṃ anāyāseṃ /
tiye gaṃgesi kāya anāriseṃ / gatyaṃtara ase
mhaṇoni rājarṣi kāṃ brāhmaṇa / jayāṃ gatī matī mīci śaraṇa /
tayāṃ triśuddhī mīca nirvāṇa / sthitihī mīci
yālāgīṃ śatajarjare nāve / rigoni keviṃ niściṃta hoāveṃ /
kaiseni ughaḍiyā asāveṃ / śastravarṣīṃ
aṃgāvarī paḍatāṃ pāṣāṇa / na suvāveṃ keviṃ voḍaṇa /
rogeṃ dāṭaliyā āṇi udāsapaṇa / vokhadeṃsīṃ
jetha cahūṃkaḍe jaḻata vaṇavā / tethūni na nigije keviṃ pāṃḍavā /
teviṃ lokā yeūniyā sopadravā / keviṃ na bhajije māteṃ
agā māteṃ na bhajāvayālāgīṃ / kavaṇa baḻa pāṃ āpulāṃ āṃgīṃ /
kāi gharīṃ kīṃ bhogīṃ / niściṃtī kelī
nātarī vidyā kīṃ vayasā / yāṃ prāṇiyāṃsi hā aisā /
maja na bhajatāṃ bharavasāṃ / sukhācā koṇa
tarī bhogyajāta jetuleṃ / teṃ ekā dehāciyā nikiyā lāgaleṃ /
āṇi yetha deha taṃva ase paḍileṃ / kāḻācāṃ toṃḍīṃ
bāpa duḥkhāceṃ keṇeṃ suṭaleṃ / jetha maraṇāce bhare loṭale /
tiye mṛtyulokīṃciye śevaṭile / yeṇeṃ jāhāleṃ hāṭaveḻe
ātāṃ sukheṃsi jīvitā / kaicī grāhikī kījela pāṃḍusutā /
kāya rākhoṃḍī phuṃkitā / dīpu lāge
agā viṣāce kāṃde vāṭunī / jo rasu gheije piḻunī /
tayā nāma amṛta ṭheunī / jaiseṃ amara hoṇeṃ
teviṃ viṣayāṃceṃ jeṃ sukha / teṃ kevaḻa parama duḥkha /
pari kāya kīje mūrkha / na sevitāṃ na sare
kāṃ śīsa khāṃḍūni āpuleṃ / pāyīṃcāṃ khatīṃ bāṃdhileṃ /
taiseṃ mṛtyulokīṃceṃ bhaleṃ / āhe āghaveṃ
mhaṇoni mṛtyulokīṃ sukhācī kahāṇī / aikijela kavaṇācāṃ śravaṇīṃ / kaiṃcī sukhanidrā āṃtharuṇīṃ / iṃgaḻācāṃ
jiye lokīcā caṃdra kṣayarogī / jetha udayo hoya astālāgīṃ /
duḥkha leūni sukhācī āṃgī / saḻita jagāteṃ
jethe maṃgaḻācāṃ aṃkurīṃ / saveṃci amaṃgaḻācī paḍe porī /
mṛtyu udarācāṃ parivarīṃ / garbhu giṃvasī
jeṃ nāhīṃ tayāṃteṃ ciṃtavī / taṃva teṃci neije gaṃdharvīṃ /
geliyācī kavaṇe gāṃvīṃ / śuddhī na labhe
agā giṃvasitāṃ āghavā vāṭī / parataleṃ pāulaci nāhīṃ kirīṭī /
saiṃgha nimāliyāṃciyāci goṭhī / tiṃye purāṇeṃ jethiṃcīṃ
jethīṃciye anityatecī thorī / karitayā brahmayāceṃ āyuṣyaverī /
kaiseṃ nāhīṃ hoṇeṃ avadhārīṃ / nipaṭūniyāṃ
aisī lokīṃcī jiye nāṃdaṇūka / tetha janmale āthi je loka /
tayāṃciye niściṃtīce kautuka / disata ase
paiṃ dṛṣṭādṛṣṭīciye joḍī / lāgīṃ bhāṃḍavala na suṭe kavaḍī /
jetha sarvasveṃ hāni tetha koḍī / veṃcitī gā
jo bahuveṃ viṣayavilāseṃ gupheṃ / to mhaṇatī uvāyeṃ paḍilā sāpeṃ /
jo abhilāṣabhāreṃ daḍape / tayāteṃ sajñāna mhaṇatī
jayāceṃ āyuṣya dhākuṭeṃ hoya / baḻa prajñā jirauni jāya /
tayāce namaskāritī pāya / vaḍila mhaṇuni
jaṃva jaṃva bāḻa baḻiyā vāḍhe / taṃva taṃva bhojeṃ nācatī koḍeṃ /
āyuṣya nimāleṃ āṃtuliyekaḍe / te glānīci nāhīṃ
janmaliyā divasadivaseṃ / hoṃ lāge kāḻāciyāci aiseṃ /
kīṃ vāḍhatī karitī ulhāseṃ / ubhavitī guḍhiyā
agā mara hā bolu na sāhatī / āṇi meliyā tarī raḍatī /
pari asateṃ jāta na gaṇitī / gahiṃsapaṇeṃ
dardura sāpeṃ giḻijatu āhe ubhā / kīṃ to māsiyā veṭāḻī jibhā /
taise prāṇiye kavaṇā / vāḍhavitī tṛṣṇā
ahā kaṭā heṃ vokhaṭeṃ / mṛtyulokīṃceṃ upharāṭeṃ /
etha arjunā jarī avacaṭeṃ / janmalāsī tūṃ
tari jhaḍajhaḍoni vahilā nigha / iye bhaktīciye vāṭe lāga /
jiyā pāvasī avyaṃga / nijadhāma mājheṃ
manmanā bhava madbhakto madyājī māṃ namaskuru /
tūṃ mana heṃ mīci karīṃ / mājhāṃ bhajanīṃ prema dharīṃ /
sarvatra namaskārīṃ / maja ekāteṃ
mājheni anusaṃdhāneṃ dekha / saṃkalpu jāḻaṇeṃ niḥśekha /
madyājī cokha / yāci nāṃva
aisā miyāṃ āthilā hosī / tetha mājhiyāci svarupā pāvasī /
heṃ aṃtaḥkaraṇīṃceṃ tujapāsīṃ / bolijata ase
agā āvaghiyā coriyā āpuleṃ / jeṃ sarvasva āmhī ase ṭhevileṃ /
teṃ pāvoni sukha saṃcale / hoūni ṭhāsī
aiseṃ sāṃvaḻeni parabrahmeṃ / bhaktakāmakalpadrumeṃ /
bolileṃ ātmārāmeṃ / saṃjayo mhaṇe
aho aikijata ase kīṃ avadhārā / taṃva iyā bolā nivāṃta mhātārā / jaisā mhaisā nuṭhī kāṃ purā / taisā ugāci ase
tetha saṃjayeṃ māthā tukilā / ahā amṛtācā pāūsa varṣalā /
kīṃ hā etha asatuci gelā / sejiyā gāṃvā
taऱhī dātāru hā āmucā / mhaṇoni heṃ bolatāṃ maiḻela vācā /
kāi jhāleṃ yayācā / svabhāvoci aisā
pari bāpa bhāgya mājheṃ / je vṛttāṃtu sāṃgāvayāceni vyājeṃ /
kaisā rakṣiloṃ munirājeṃ / śrīvyāsadeveṃ
yetuleṃ heṃ vāḍeṃ sāyāseṃ / jaṃva bolata ase dṛḍheṃ mānaseṃ /
taṃva na dharaveci āpuliyā aiseṃ / sātvikeṃ keleṃ
citta cākāṭaleṃ āṭu gheta / vācā pāṃguḻalī jethiṃcī tetha / āpādakaṃcukita / romāṃca āle
ardhonmīlita ḍoḻe / varṣatāti ānaṃdajaḻeṃ /
āṃtuliyā sukhormīceni baḻeṃ / bāheri kāṃpe
pai āghavāṃci romamūḻīṃ / ālī svedakaṇikā nirmaḻī /
leilā motiyāṃcīṃ kaḍiyāḻīṃ / āvaḍe taisā
aisā mahāsukhāceni ārtiṃrase / jetha āṭaṇī hoīla jīvadaśe /
tethe nirovileṃ vyāseṃ / teṃ nedīca hoṃ
āṇi kṛṣṇārjunāceṃ bolaṇeṃ / ghoṃ karī āleṃ śravaṇeṃ /
kīṃ dehasmṛtīcā teṇeṃ / vāpasā kelā
tevhāṃ netrīṃceṃ jaḻa visarjī / sarvāṃgīṃcā svedu parimārjī /
tevīṃci avadhāna mhaṇe ho jī / dhṛtarāṣṭrāteṃ
ātāṃ kṛṣṇavākyabījā nivāḍu / āṇi saṃjaya sātvikācā bivaḍu / mhaṇoni śrotayā hoīla suravāḍu / prameyapikācā
aho aḻumāḻu avadhāna deyāveṃ / yetuleni ānaṃdāce rāśīvara baisāveṃ / bāpa śravaṇeṃdriyā daiveṃ / ghātalī māḻa
mhaṇoni vibhūtīṃcā ṭhāvo / arjunā dāvīla siddhāṃcā rāvo /
to aikā mhaṇe jñānadevo / nivṛttīcā
Original text: jñāneśvarī · Marathi Wikisource contributors · Sanskrit Wikisource · CC BY-SA 4.0