Jnaneshwari · Chapter 10

namo viśadabodhavidagdhā / vidyāraviṃdaprabodhā /
parāprameyapramadā / vilāsiyā

namo saṃsāratamasūryā / apratimaparamavīryā /
taruṇataratūryā / lālanalīlā

namo jagadakhilapālanā / maṃgaḻamaṇinidhānā /
sajjanavanacaṃdanā / ārādhyaliṃgā

namo caturacittacakoracaṃdrā / ātmānubhavanareṃdrā /
śrutisārasamudrā / manmathamanmathā

namo subhāvabhajanabhājanā / bhavebhakuṃbhabhaṃjanā /
viśvod‍bhavabhuvanā / śrīgururāyā

tumacā anugraho gaṇeśu / jaiṃ de āpulā saurasu /
taiṃ sārasvatīṃ praveśu / bāḻakāhī āthī

jī daivikīṃ udāra vācā / jaiṃ uddeśu de nābhikārācā /
taiṃ navarasasudhābdhīcā / thāvo lābhe

jī āpuliyā s‍nehācī vāgeśvarī / jarī mukeyāteṃ aṃgikārī /
to vācaspatīśīṃ karī / prabaṃdhuhoḍā

heṃ aso diṭhī jayāvarī jhaḻake / kīṃ hā padmakaru māthāṃ pārukhe /
to jīvaci pari tuke / maheśeṃsīṃ

evaḍheṃ jiye mahimeceṃ karaṇeṃ / teṃ vācābaḻeṃ vānūṃ mī kavaṇeṃ /
kāṃ sūryāciyā āṃgā uṭaṇeṃ / lāgata ase ?

keutā kalpataruvarī phulaurā ? / kāyaseni pāhuṇeru kṣīrasāgarā ? /
kavaṇeṃ vāsīṃ kāpurā / suvāsu devoṃ ?

caṃdanāteṃ kāyaseni carcāveṃ / amṛtāteṃ keuteṃ rāṃdhāveṃ /
gaganāvarī ubhavāveṃ / ghaḍe kevīṃ ?

taiseṃ śrīgurūceṃ mahimāna / ākaḻiteṃ keṃ ase sādhana ? /
heṃ jāṇoni miyāṃ namana / nivāṃta keleṃ

jarī prajñeceni āthilepaṇeṃ / śrīgurūsāmarthyā rūpa karūṃ mhaṇe /
tari teṃ motiyāṃ bhiṃga deṇeṃ / taiseṃ hoīla

kāṃ sāḍepaṃdharayā rajatavaṇī / taiśīṃ stutīṃcīṃ bolaṇīṃ /
ugiyāci māthā ṭhevije caraṇīṃ / heṃci bhaleṃ

maga mhaṇitaleṃ jī svāmī / bhaleni mamatveṃ dekhileṃ tumhīṃ /
mhaṇauni kṛṣṇārjunasaṃgamīṃ / prayāgavaṭu jāhaloṃ

māgāṃ dūdha de mhaṇataliyāsāṭhīṃ / āghaviyā kṣīrābdhīcī karūni vāṭī /
upamanyūpuḍheṃ dhūrjaṭī / ṭhevilī jaisī

nā tarī vaikuṃṭhapīṭhanāyakeṃ / rusalā dhruva kavatikeṃ /
bujhāvilā deūni bhātukeṃ / dhruvapadāceṃ

taisī je brahmavidyārāvo / sakaḻa śāstrāṃcā visaṃvatā ṭhāvo /
te bhagavad‍gītā voṃviye gāvoṃ / aiseṃ keleṃ

je bolaṇiyāce rānīṃ hiṃḍatāṃ / nāyakije phaḻaliyā akṣarācī vārtā /
pari te vācāci kelī kalpalatā / vivekācī

hotī dehabuddhī ekasarī / te ānaṃdabhāṃḍārā kelī vovarī /
mana gītārthasāgarīṃ / jaḻaśayana jāleṃ

aiseṃ ekeka devāṃceṃ karaṇeṃ / teṃ apāra boloṃ kevīṃ mī jāṇeṃ /
taऱhī anuvādaloṃ dhīṭapaṇeṃ / te upasāhijo jī

ātāṃ āpuleni kṛpāprasādeṃ / miyāṃ bhagavad‍gītā voṃvīprabaṃdheṃ /
pūrvakhaṃḍa vinodeṃ / vākhāṇileṃ

prathamīṃ arjunācā viṣādu / dujīṃ bolilā yogu viśadu /
pari sāṃkhyabuddhīsi bhedu / dāūniyāṃ

tijīṃ kevaḻa karma pratiṣṭhileṃ / teṃci caturthīṃ jñāneṃśīṃ pragaṭileṃ /
paṃcamīṃ gavharileṃ / yogatattva

teci ṣaṣṭhāmājīṃ pragaṭa / āsanālāgoni spaṣṭa /
jīvātmabhāva ekavaṭa / hotī jeṇeṃ

taisī je yogasthitī / āṇi yogabhraṣṭāṃ je gatī /
teṃ āghavīci upapattī / sāṃgitalī ṣaṣṭhīṃ

tayāvarī saptamīṃ / prakṛtiparihāra upakramīṃ /
karūni bhajatī je puruṣottamīṃ / te bolile cāऱhī

pāṭhīṃ saptamīṃcī praśnasiddhī / boloni prayāṇasamayasiddhī /
evaṃ te sakaḻavākyaavadhi / aṣṭamādhyāyīṃ

maga śabdabrahmīṃ asaṃkhyākeṃ / jetulā kāṃhīṃ abhiprāya pike /
tetulā mahābhārateṃ ekeṃ / lakṣeṃ joḍe

tiye āghavāṃci jeṃ mahābhāratīṃ / teṃ lābhe kṛṣṇārjunavācoktīṃ /
āṇi jo abhiprāvo sāteṃśatīṃ / to ekalāci navamīṃ

mhaṇauni navamīṃciyā abhiprāyā / sahasā mudrā lāvāvayā /
bihālā maga mī vāyāṃ / garva kāṃ karūṃ ?

aho gūḻāsākhare mālayāce / he bāṃdhe tarī ekāci rasāce /
pari svāda goḍiyece / ānaāna jaise

eka jāṇoniyāṃ bolatī / eka ṭhāyeṃ ṭhāvo jāṇavitī /
eka jāṇoṃ jātāṃ hārapatī / jāṇate guṇeṃśīṃ

heṃ aiseṃ adhyāya gītece / pari anirvācyapaṇa navamāceṃ /
to anuvādaloṃ heṃ tumaceṃ / sāmarthya prabhū

aho ekāci śāṭī tapinnalī / ekīṃ sṛṣṭīvarī sṛṣṭī kelī /
ekīṃ pāṣāṇīṃ vāūni utaralīṃ / samudrīṃ kaṭakeṃ

ekīṃ ākāśīṃ sūryāteṃ dharileṃ / ekīṃ cuḻīṃci sāgarāteṃ bharileṃ /
taiseṃ maja mukayākaravīṃ bolavileṃ / anirvācya tumhīṃ

pari heṃ aso etha aiseṃ / rāma rāvaṇa jhuṃjinnale kaise /
rāma rāvaṇa jaise / mīnale samarīṃ

taiseṃ navamīṃ kṛṣṇāceṃ bolaṇeṃ / teṃ navamīciyāci aiseṃ mī mhaṇeṃ /
yā nivāḍā tattvajñu jāṇeṃ / jayā gītārthu hātīṃ

evaṃ navahī adhyāya pahile / miyāṃ matīsārikhe vākhāṇile /
ātāṃ uttarakhaṃḍa uvāileṃ / graṃthāceṃ aikā

jetha vibhūti prativibhūtī / prastuta arjunā sāṃgijetī /
te vidagdhā rasavṛttī / mhaṇipaila kathā

deśiyeceni nāgarapaṇeṃ / śāṃtu śṛṃgārāteṃ jiṇeṃ /
tari oṃviyā hotī leṇeṃ / sāhityāsi

mūḻa graṃthīṃciyā saṃskṛtā / vari maऱhāṭhī nīṭa paḍhatāṃ /
abhiprāya mānaliyā ucitā / kavaṇa bhūmī heṃ na cojave

jaiseṃ aṃgāceni suṃdarapaṇeṃ / leṇiyā āṃgaci hoya leṇeṃ /
tetha aḻaṃkārileṃ kavaṇa kavaṇeṃ / heṃ nirvacenā

taisī deśī āṇi saṃskṛta vāṇī / ekā bhāvārthācyā sokāsanīṃ /
śobhatī āyaṇī / cokhaṭa āikā

uṭhāvaliyā bhāvā rūpa / karitāṃ rasavṛttīceṃ lāge vaḍapa /
cāturya mhaṇe paḍapa / joḍaleṃ āmhāṃ

taiseṃ deśiyeceṃ lāvaṇya / hironi āṇileṃ tāruṇya /
maga racileṃ agaṇya / gītātattva

jo carācara paramaguru / catura cittacamatkāru /
to aikā yādaveśvaru / bolatā jāhalā

jñānadeva nivṛttīcā mhaṇe / aiseṃ bolileṃ śrīharī teṇeṃ /
arjunā āghaviyācī mātu aṃtaḥkaraṇeṃ / dhaḍautā āhāsi

āmhīṃ māgīla jeṃ nirūpaṇa keleṃ / teṃ tujheṃ avadhānaci pāhileṃ /
tavaṃ ṭāceṃ navheṃ bhaleṃ / purateṃ āhe

ghaṭīṃ thoḍeseṃ udaka ghālije / teṇeṃ na gaḻe tarī varitā bharije /
aisā parisauni pāhilāsi taṃva parisavije / aiseṃci hotase

avacitayāvarī sarvasva sāṃḍije / maga cokha tarī toci bhāṃḍārī kīje /
taisā kirīṭī tūṃ ātāṃ mājheṃ / nijadhāma kīṃ

aiseṃ arjunā yeuteṃ sarveśvareṃ / pāhoni bolileṃ atyādareṃ /
girī dekhoni subhareṃ / meghu jaisā

taisā kṛpāḻuvāṃcā rāvo / mhaṇe āikeṃ gā mahābāho /
sāṃgitalāci abhiprāvo / sāṃgena puḍhatī

paiṃ prativarṣīṃ kṣetra perije / pikācī jaṃva jaṃva vāḍhī dekhije /
yālāgīṃ nubagije / vāho karitāṃ

puḍhatapuḍhatī puṭeṃ detāṃ / joḍe vāniyecī adhikatā /
mhaṇauni soneṃ paṃḍusutā / śodhūṃci āvaḍe

taiseṃ etha pārthā / tuja ābhāra nāhīṃ sarvathā /
āmhī āpuliyāci svārthā / boloṃ puḍhatī

jaiseṃ bāḻakā levavije leṇeṃ / tayā śṛṃgārā bāḻa kāi jāṇe ? /
pari te sukhāce sohaḻe bhogaṇeṃ / māuliye diṭhī

taiseṃ tujheṃ hita āghaveṃ / jaṃva jaṃva kāṃ tuja phāve /
taṃva taṃva āmuceṃ sukha duṇāve / aiseṃ āhe

ātāṃ arjunā aso he vikaḍī / maja ughaḍa tujhī āvaḍī /
mhaṇauni tṛptīcī savaḍī / bolatāṃ na paḍe

āmhāṃ yetuliyāci kāraṇeṃ / teṃci teṃ tujaśīṃ bolaṇeṃ /
pari aso heṃ aṃtaḥkaraṇeṃ / avadhāna deīṃ

tarī aikeṃ gā suvarma / vākya mājheṃ parama /
jeṃ akṣareṃ leūnī parabrahma / tuja kheṃvāsi āleṃ

parī kirīṭī tūṃ māteṃ / neṇasī nā niruteṃ /
tari to gā jo mī etheṃ / teṃ viśvaci heṃ

etha veda muke jāhāle / mana pavana pāṃguḻale /
rātīviṇa māvaḻale / raviśaśī jetha

agā udarīṃcā garbhu jaisā / na dekheṃ āpuliye mātecī vayasā /
mī āghaveyā devāṃ taisā / neṇave kāṃhīṃ

āṇi jaḻacarāṃ udadhīceṃ māna / maśakā nolāṃḍaveci gagana /
tevīṃ maharṣīṃceṃ jñāna / na dekheci māteṃ

mī kavaṇa pāṃ ketulā / kavaṇācā kaiṃ jāhalā /
yā nirutī karitāṃ bolā / kalpa gele

kāṃ je maharṣīṃ āṇi yā devāṃ / yerāṃ bhūtajātāṃ sarvāṃ /
mī ādi mhaṇauni pāṃḍavā / avaghaḍa jāṇatāṃ

utaraleṃ udaka parvata vaḻaghe / jarī jhāḍa vāḍhata muḻīṃ lāge /
tarī miyāṃ jāleni jageṃ / jāṇije māteṃ

kāṃ gābhevaneṃ vaṭu giṃvasave / jarī taraṃgīṃ sāgarū sāṃṭhave /
kāṃ paramāṇūmājīṃ sāmāve / bhūgolu hā

tarī miyāṃ jāliyā jīvāṃ / maharṣīṃ athavā devāṃ /
māteṃ jāṇāvayā hoāvā / avakāśu gā

aisāhī jarī vipāyeṃ / sāṃḍūni puḍhīle pāye /
sarveṃdriyāṃsi hoye / pāṭhimorā jo

pravartalāhī vegīṃ bahuḍe / deha sāṃḍūni māgalīkaḍe /
mahābhūtāṃciyā caḍhe / māthayāvarī

taisā rāhoni ṭhāyaṭhike / svaprakāśeṃ cokheṃ /
ajatva mājheṃ dekhe / āpuliyā ḍoḻāṃ

mī ādīsiṃ paru / sakaḻalokamaheśvaru /
aisiyā māteṃ jo naru / yāparī jāṇeṃ

to pāṣāṇāṃmājīṃ parisu / rasāṃmājī siddharasu /
taisā manuṣyākṛti aṃśu / to mājhāci jāṇa

to cālateṃ jñānāceṃ biṃba / tayāce avayava te sukhāce koṃbha /
pari māṇusapaṇācī bhāṃba / lokāci bhāgu

agā avacitā kāpurā- / mājīṃ sāṃpaḍalā hirā /
varī paḍiliyā nīrā / na nige kevīṃ

taisā manuṣyalokāāṃtu / to jarī jāhalā prākṛtu /
taऱhī prakṛtidoṣācī mātu / neṇije tetha

to āpasayeṃci sāṃḍije pāpīṃ / jaisā jaḻata caṃdanu sarpīṃ /
taisā māteṃ jāṇeṃ to saṃkalpīṃ / varjūni ghālije

teṃci māteṃ kaiseṃ jāṇije / aiseṃ kalpī jarī citta tujheṃ /
tarī mī aisā heṃ mājheṃ / bhāva aikeṃ

je vegaḻālāṃ bhūtīṃ / sārikhe hoūni prakṛtī /
vikhurale āhetī trijagatīṃ / āghaviye

te prathama jāṇa buddhī / maga jñāna jeṃ niravadhī /
asaṃmoha sahanasiddhī / kṣamā satya

maga śama dama donhī / sukha duḥkha vartata janīṃ /
arjunā bhāvābhāva mānīṃ / bhāvācimājīṃ

ātāṃ bhaya āṇi nirbhayatā / ahiṃsā āṇi samatā /
he mama rupacī pāṃḍusutā / oḻakha tū

dāna yaśa apakīrtī / te je bhāva sarvatra vasatī /
te majaci pāsūni hotī / bhūtāṃcā ṭhāyīṃ

jaisīṃ bhūteṃ āhāti sinānīṃ / taiseci hehī vegaḻāle mānīṃ /
eka upajatī mājhāṃ jñānīṃ / eka neṇatī māteṃ

agā prakāśa āṇi kaḍavaseṃ / heṃ sūryācistava jaiseṃ /
prakāśa udayīṃ dise / tama astusīṃ

āṇi mājheṃ je jāṇaṇeṃ neṇaṇeṃ / teṃ taṃva bhūtāṃciyā daivāceṃ karaṇeṃ /
mhaṇauni bhūtīṃ bhāvāceṃ hoṇeṃ / viṣama paḍe

yāparī mājhāṃ bhāvīṃ / he jīvasṛṣṭi āhe āghavī /
guṃtalī ase jāṇāvī / paṃḍukumarā

ātāṃ iye sṛṣṭīce pālaka / tayāṃ ādhīna vartatī loka /
te akarā bhāva āṇika / sāṃgena tuja

tarī āghavāṃci guṇīṃ vṛddha / je maharṣīṃmājīṃ prabuddha /
kaśyapādi prasiddha / sapta ṛṣī

āṇikahī sāṃgijatīla / je caudā āṃtīla /
svāyaṃbhū mukhya muddala / cārī manu

aiseṃ he akarā / mājhāṃ manīṃ jāhāle dhanurdharā /
sṛṣṭīciyā vyāpārā- / lāgoniyāṃ

jaiṃ lokāṃcī vyavasthā na paḍe / jaiṃ yā tribhuvanāce kāṃhīṃ na māṃḍe /
taiṃ mahābhūtāṃce daḻavāḍeṃ / acuṃbita ase

taiṃci he jāhāle / ihīṃ lokapāḻa kele /
adhyakṣa racūni ṭhevile / ihīṃ jana

mhaṇauni akarā he rājā / maga yera loka yāṃciyā prajā /
aisā hā vistāru mājhā / oḻakha tūṃ

pāheṃ pāṃ āraṃbhīṃ bīja ekaleṃ / maga teṃci virūḍhaliyā būḍa jāhāleṃ / buḍīṃ koṃbha nighāle / khāṃdiyāṃce

khāṃdiyāṃpāsūni anekā / pasaraliyā śākhopaśākhā /
śākhāṃstava dekhā / pallavapāneṃ

pallavīṃ phūla phaḻa / evaṃ vṛkṣatva jāhāleṃ sakaḻa /
teṃ nirdhāritāṃ kevaḻa / bījaci teṃ

aiseṃ mī ekaci pahileṃ / maga mī teṃ manāteṃ vyāleṃ /
tetha saptaṛṣi jāhāle / āṇi cārī manu

ihīṃ lokapāḻa kele / lokapāḻīṃ vividha loka sṛjile /
lokāṃpāsūni nipajale / prajājāta

aiseni heṃ viśva yetheṃ / mīci prasavalā nā niruteṃ /
parī bhāvāceni hāteṃ / māne jayā

yālāgīṃ subhadrāpatī / he bhāva iyā mājhiyā vibhūtī /
āṇi yāṃciyā vyāptī / vyāpileṃ viśva

mhaṇoni gā yāparī / brahmādipipīlikāvarī /
mīvāṃcūni dusarī / goṭhī nāhīṃ

aiseṃ jāṇe jo sāceṃ / tayā ceireṃ jāhāleṃ jñānāceṃ /
mhaṇoni uttama madhyama bhedāceṃ / duḥsvapna tayāṃ

mī mājhiyā vibhūtī / vibhūtīṃ adhiṣṭhiliyā vyaktī /
heṃ āghaveṃ yogapratītī / ekaci mānī

mhaṇoni niḥśaṃkeṃ yeṇeṃ mahāyogeṃ / maja mīnalā manāceni āṃgeṃ /
etha saṃśaya karaṇeṃ na lage / to triśuddhī jāhalā

kāṃ je aiseṃ kirīṭī / māteṃ bhaje jo abhedā diṭhī /
tayāciye bhajanāciye nāṭīṃ / sūtī maja

mhaṇaūni abhedeṃ jo bhaktiyogu / tetha śaṃkā nāhīṃ naye khaṃgu /
karitāṃ ṭhelā tarī cāṃgu / teṃ sāṃgitaleṃ ṣaṣṭhīṃ

toci abhedu kaisā / heṃ jāṇāvayā mānasā /
sāda jālī tarī pariyesā / bolijela

tari mīci eka sarvāṃ / yā jagā janma pāṃḍavā /
āṇi majacipāsūni āghavā / nirvāho yāṃcā

kalloḻamāḻā anegā / janma jaḻīṃci paiṃ gā /
āṇi tayāṃ jaḻaci āśrayo taraṃgā / jīvanahī jaḻa

aiseṃ āghavāṃci ṭhāyīṃ / tayā jaḻaci jeviṃ pāhīṃ /
taisā mīvāṃcūni nāhīṃ / viśvīṃ iye

aisiyā vyāpakā māteṃ / mānūni je bhajatī bhalatetheṃ /
pari sācokāreṃ uditeṃ / premabhāveṃ

deśakāḻavartamāna / āghaveṃ majasīṃ karūni abhinna /
jaisā vāyu hoūna gagana / gaganīṃci vicare

aiseni je nijajñānī / kheḻata sukheṃ tribhuvanīṃ /
jagadrūpā manīṃ / sāṃṭhaūni māteṃ

jeṃ jeṃ bheṭe bhūta / teṃ teṃ mānije bhagavaṃta /
hā bhaktiyogu niścita / jāṇa mājhā

citteṃ mīci jāhāle / miyāṃci prāṇeṃ dhāle /
jīvoṃ maroṃ visarale / bodhāciyā bhulī

maga tayā bodhāceni māje / nācatī saṃvādasukhācīṃ bhojeṃ /
ātāṃ ekamekāṃ ghepe dīje / bodhaci varī

jaiśīṃ javaḻikeṃcīṃ sarovareṃ / ucaṃbaḻaliyā kālavatī paraspareṃ /
maga taraṃgāsi dhavaḻāreṃ / taraṃgaci hotī

taisī yerayerāṃciye miḻaṇī / paḍata ānaṃdakalloḻāṃcī veṇī /
tetha bodha bodhācīṃ leṇīṃ / bodheṃci miravī

jaiseṃ sūryeṃ sūryāteṃ voṃvāḻileṃ / kīṃ caṃdreṃ caṃdramyā kṣema didhaleṃ /
nā tarī sariseni pāḍeṃ mīnale / donī vogha

taiseṃ prayāga hota sāmarasyāceṃ / varī vosāṇa tarata sāttvikāceṃ /
te saṃvādacatuṣpathīṃce / gaṇeśa jāhale

tevhāṃ tayā mahāsukhāceni bhareṃ / dhāṃvoni dehāciye gāṃvābāhereṃ /
miyāṃ dhāle teṇeṃ udgāreṃ / lāgatī gājoṃ

paiṃ guruśiṣyāṃcāṃ ekāṃtīṃ / je akṣarā ekācī vadaṃtī /
te meghāciyāparī trijagatīṃ / garjatī saiṃgha

jaisī kamaḻakaḻikā jālepaṇeṃ / hṛdayīṃciyā makaraṃdāteṃ rākhoṃ neṇeṃ /
de rāyā raṃkā pāraṇeṃ / āmodāceṃ

taiseṃci māteṃ viśvīṃ kathita / kathiteni toṣeṃ kathūṃ visarata /
maga tayā visarāmājīṃ virata / āṃgeṃ jīveṃ

aiseṃ premāceni bahuvasapaṇeṃ / nāhīṃ rātī divo jāṇaṇeṃ /
keleṃ mājheṃ sukha avyaṃgavāṇeṃ / āpaṇapeyāṃ jihīṃ

tayāṃ maga jeṃ āmhī kāṃhīṃ / dyāveṃ arjunā pāhīṃ /
te ṭhāyīṃcīca tihīṃ / ghetalī sela

kāṃ je te jiyā vāṭā / nigāle gā subhaṭā /
te soya pāhoni avhāṃṭā / svargāpavarga

mhaṇoni tihīṃ jeṃ prema dharileṃ / teṃci āmuceṃ deṇeṃ upāileṃ /
pari āmhīṃ deyāveṃ heṃhi keleṃ / tihīṃcī mhaṇiyeṃ

ātāṃ yāvarī yetuleṃ ghaḍe / jeṃ teṃci sukha āgaḻeṃ vāḍheṃ /
āṇi kāḻācī diṭhī na paḍe / heṃ āmhāṃ karaṇeṃ

laḻeyāciyā bāḻakā kirīṭī / gavasaṇī karūni s‍nehāciyā diṭhī / jaisī kheḻatāṃ pāṭhopāṭhīṃ / māulī dhāṃve

teṃ jo jo kheḻa dāvī / to to puḍheṃ sonayācā karūni ṭhevī /
taisī upāstīcī padavī / poṣita mī jāyeṃ

jiye padavīceni poṣakeṃ / te māteṃ pāvatī yathāsukheṃ /
he pāḻatī maja viśekheṃ / āvaḍe karūṃ

paiṃ gā bhaktāsi mājheṃ koḍa / maja tayāce ananyagatīcī cāḍa /
kāṃ je premaḻāṃceṃ sāṃkaḍa / āmute gharīṃ

pāheṃ pāṃ svarga mokṣa upāyile / donhī mārga tayāciye vāhaṇī kele / āmhīṃ āṃgahī śekhīṃ veṃcileṃ / lakṣmiyesīṃ

pari āpaṇapeṃvīṇa jeṃ eka / teṃ taiseṃci sukha sājuka /
sapremaḻālāgīṃ dekha / ṭhevileṃ jatana

hā ṭhāyavarī kirīṭī / āmhī premaḻu ghevoṃ āpaṇapayāsāṭhīṃ /
yā bolīṃ bolijata goṣṭī / taisiyā navhatī gā

mhaṇoni maja ātmayācā bhāvo / jihīṃ jiyāvayā kelā ṭhāvo /
eka mīvāṃcūni vāvo / yera mānileṃ jihīṃ

tayāṃ tattvajñāṃ cokhaṭāṃ / divī potāsācī subhaṭā /
maga mīci hoūni divaṭā / puḍhāṃ puḍhāṃ cāleṃ

ajñānāciye rātī- / mājīṃ tamāci miḻaṇī dāṭatī /
te nāśūni ghālīṃ parautī / karīṃ nityodayo

aiseṃ premaḻāceni priyottameṃ / bolileṃ jetha puruṣottameṃ /
tetha arjuna manodharmeṃ / nivāloṃ mhaṇatase

aho jī avadhārā / bhalā keru pheḍilā saṃsārā /
jāhaloṃ jananījaṭharajoharā- / vegaḻā prabhū

jī janmalepaṇa āpuleṃ / heṃ āji miyāṃ ḍoḻāṃ dekhileṃ /
jīvita hātāṃ caḍhaleṃ / āvaḍataseṃ

āji āyuṣyā ujavaṇa jāhalī / mājhiyā daivā daśā udayalī /
je vākyakṛpā lādhalī / daivikeni mukheṃ

ātāṃ yeṇeṃ vacana tejākāreṃ / phiṭaleṃ āṃtīla bāherīla āṃdhāreṃ /
mhaṇoni dekhataseṃ sācokāreṃ / svarūpa tujheṃ

tarī hosī gā tūṃ parabrahma / jeṃ yā mahābhūtāṃ visaṃvateṃ dhāma /
pavitra tūṃ parama / jagannāthā

tūṃ parama daivata tihīṃ devāṃ / tūṃ puruṣa jī paṃcavisāvā /
divya tūṃ prakṛtibhāvā- / pailīkaḍīla

anādisiddha tūṃ svāmī / jo nākaḻijasī janmadharmīṃ /
to tūṃ heṃ āmhī / jāṇitaleṃ ātāṃ

tūṃ yā kālayaṃtrāsi sūtrī / tūṃ jīvakaḻecī adhiṣṭhātrī /
tūṃ brahmakaṭāhadhātrī / heṃ kaḻaleṃ phuḍeṃ

paiṃ āṇikahī eka parī / iye pratītīcī yetase thorī /
je māgeṃ aiseṃci ṛṣīśvarīṃ / sāṃgitaleṃ tūṃteṃ

pari tayā sāṃgitaliyāceṃ sācapaṇa / heṃ ātāṃ mājheṃ dekhatase aṃtaḥkaraṇa / je kṛpā kelī āpaṇa / mhaṇoni devā

eऱhavīṃ nāradu akhaṃḍa javaḻāṃ ye / tohī aiseṃci vacanīṃ gāye /
pari artha na bujoni ṭhāye / gītasukhaci aikoṃ

jī āṃdhaḻeyāṃcāṃ gāṃvīṃ / āpaṇapeṃ pragaṭaleṃ ravī /
tarī tihīṃ votapalīci ghyāvī / vāṃcūni prakāśu kaiṃcā ?

yeravīṃ devarṣi adhyātma gātāṃ / āhāca rāgāṃgeṃsīṃ je madhuratā /
teci phāve yera cittā / nalageci kāṃhīṃ

paiṃ asitā devalācenihi mukheṃ / mī evaṃvidhā tūṃteṃ āikeṃ /
parī taiṃ buddhi viṣayavikheṃ / ghārilī hotī

viṣayaviṣācā paḍipāḍū / goḍa paramārthu lāge kaḍū /
kaḍū viṣaya to goḍū / jīvāsī jāhalā

āṇi heṃ āṇikāṃceṃ kāya sāṃgāveṃ / rāuḻā āpaṇaci yeūni vyāsadeveṃ / tujheṃ svarūpa āghaveṃ / sarvadā sāṃgije

pari to aṃdhārīṃ ciṃtāmaṇi dekhilā / jevīṃ navhe yā buddhī upekṣilā / pāṭhīṃ dinodayīṃ voḻakhilā / hoya mhaṇauni

taisīṃ vyāsādikāṃcīṃ bolaṇīṃ / tiyā majapāśīṃ cidrat‍nāṃciyā khāṇī / pari upekṣilyā jāta hotīyā taraṇī / tujavīṇa kṛṣṇā

te ātāṃ vākyasūryakara tujhe phāṃkale / āṇi ṛṣīṃ mārga hote je kathile /
tayāṃ āghaviyāṃceṃci phiṭaleṃ / anoḻakhapaṇa

jī jñānāceṃ bīja tayāṃce bola / mājīṃ hṛdayabhūmike paḍile sakhola / vari iye kṛpecī jāhālī vola / mhaṇoni saṃvādaphaḻeṃśīṃ uṭhaleṃ

aho nāradādikāṃ saṃtāṃ / tyāṃciyā uktirūpa saritā /
mī mahodadhīṃ jālāṃ anaṃtā / saṃvādasukhācā

prabhu āghaveni yeṇeṃ janmeṃ / jiyeṃ puṇyeṃ kelīṃ miyāṃ uttameṃ /
tayāṃcīṃ na ṭhakatīci aṃgīṃ kāmeṃ / sad‍guru tuvāṃ

eऱhavīṃ vaḍilavaḍilāṃceni mukheṃ / mī sadāṃ tūṃteṃ kānīṃ āikeṃ /
pari kṛpā na kījeci tuvāṃ ekeṃ / taṃva neṇaveci kāṃhīṃ

mhaṇoni bhāgya jaiṃ sānukūḻa / jāliyā kele udyama sadāṃ saphaḻa /
taiseṃ śrutādhīta sakaḻa / gurukṛpā sāca

jī banakaru jhāḍeṃ siṃpī jīveṃsāṭīṃ / pāḍūni janmeṃ kāḍhī āṭī /
pari phaḻeṃsī taiṃci bheṭī / jaiṃ vasaṃtu pāve

aho viṣamā jaiṃ vohaṭa paḍe / taiṃ madhura teṃ madhura āvaḍe /
paiṃ rasāyaneṃ taiṃ goḍeṃ / jaiṃ ārogya dehīṃ

kāṃ iṃdriyeṃ vācā prāṇa / yāṃ jāliyāṃce taiṃci sārthakapaṇa /
jaiṃ caitanya yeūni āpaṇa / saṃcare mājīṃ

taiseṃ śabdajāta āloḍileṃ / athavā yogādika jeṃ abhyāsileṃ /
teṃ taiṃci mhaṇoṃ ye āpuleṃ / jaiṃ sānukūla guru

aisiye jāliye pratītīceni mājeṃ / arjuna niścayāci nācatuseṃ bhojeṃ / tevīṃci mhaṇe devā tujheṃ / vākya maja mānaleṃ

tari sācaci heṃ kaivalyapatī / maja triśuddhī ālī pratītī /
je tūṃ devadānavāṃciye matī- / jogā navhasī

tujheṃ vākya vyaktī na yetāṃ devā / jo āpuliyā jāṇe jāṇivā /
to kahīṃci nohe heṃ sa‍dbhāvā / bharaṃvaseni āleṃ

etha āpuleṃ vāḍapaṇa jaiseṃ / āpaṇaci jāṇije ākāśeṃ /
kāṃ mī yetulī ghanavaṭa aiseṃ / pṛthvīci jāṇe

taisā āpuliye sarvaśaktī / tuja tūṃci jāṇūṃ lakṣmīpatī /
yera vedādika matī / miravatī vāyāṃ

hāṃ gā manāteṃ māgāṃ sāṃḍāveṃ / pavanāteṃ vāvīṃ mavāveṃ /
ādiśūnya utaroni jāveṃ / keuteṃ bāhīṃ

taiseṃ heṃ tujheṃ jāṇaṇeṃ āhe / mhaṇoni koṇāhī ṭhākateṃ nohe /
ātāṃ tujheṃ jñāna hoye / tujacijogeṃ

jī āpaṇapayāteṃ tūṃci jāṇasī / āṇikāteṃ sāṃgāvayāhī tūṃ samartha hosī /
tarī ātāṃ eka veḻa ghāma pusīṃ / ārtīciye niḍaḻīṃcā

heṃ āikileṃ kīṃ bhūtabhāvanā / tribhuvanagajapaṃcānanā / sakaḻadevadevatārcanā / jagannāyakā

jarī thorī tujhī pāhāta āhoṃ / tarī pāsīṃ ubhe ṭhākāvayāhī yogya nohoṃ /
yā śocyatā jarī vinavūṃ bihoṃ / tarī āna upāyo nāhīṃ

bharale samudrasaritā cahūṃkaḍe / pari te bāpiyāsi koraḍe /
kāṃ jaiṃ meghauni theṃbuṭā paḍe / taiṃ pāṇī kīṃ tayā

taise guru jī sarvatra āthī / pari kṛṣṇā āmhāṃ tūṃci gatī /
heṃ aso majapratī / vibhūtī sāṃgeṃ

jī tujhiyā vibhūtī āghaviyā / pari vyāpitī śakti divyā jiyā / tiyā āpuliyā dāvāviyā / āpaṇa maja

jihīṃ vibhūtīṃ yayāṃ samastāṃ / lokāṃteṃ vyāpūni āhātī anaṃtā /
tiyā pradhānā nāmāṃkitā / pragaṭā karīṃ

jī kaiseṃ miyāṃ tūṃteṃ jāṇāveṃ / kāya jāṇoni sadā ciṃtāveṃ /
jarī tūṃci mhaṇoṃ āghaveṃ / tari ciṃtanaci na ghaḍe

mhaṇoni māgāṃ bhāva jaise / āpule sāṃgitale tuvāṃ uddeśeṃ /
ātāṃ vistāroni taise / eka veḻa boleṃ

jayāṃ jayāṃ bhāvācāṃ ṭhāyīṃ / tūṃteṃ ciṃtitāṃ maja sāyāsu nāhīṃ /
to vivaḻa karūni deīṃ / yogu āpulā

āṇi pusaliyā jiyā vibhūtī / tyāhī bolāviyā bhūtapatī /
yetha mhaṇasī jarī puḍhatī / kāya sāṃgoṃ

tarī hā bhāva manā / jhaṇeṃ jāya ho janārdanā /
paiṃ prākṛtāhī amṛtapānā / nā na mhaṇave jī

je kāḻakūṭāceṃ sahodara / jeṃ mṛtyūbheṇeṃ pyāle amara /
tari dihāce puraṃdara / caudā jātī

aisā kavaṇa eka kṣīrābdhīcā rasu / jayā vāyāṃci amṛtapaṇācā ābhāsu / tayācāhī mīṭhāṃśu / je pure mhaṇoṃ nedī

tayā pābaḻeyāhī yetulevarī / goḍiyeci āthi thorī /
maga heṃ taṃva avadhārīṃ / paramāmṛta sāceṃ

jeṃ maṃdarācaḻu na ḍhāḻitāṃ / kṣīrasāgaru na ḍahuḻitāṃ /
anādi svabhāvatā / āiteṃ āhe

jeṃ drava nā navhe baddha / jetha neṇijatī rasa gaṃdha /
jeṃ bhalatayāṃhī siddha / āṭhavaleṃci phāve

jayācī goṭhīci aikatakheṃvo / āghavā saṃsāru hoya vāvo /
baḻiyā nityatā lāge yevoṃ / āpaṇapeṃyā

janmamṛtyūcī bhākha / hāraponi jāya niḥśekha /
āṃta bāherī mahāsukha / vāḍhoṃci lāge

maga daivagatyā jarī sevije / tarī teṃ āpaṇaci hoūni ṭhākije /
teṃ tuja detāṃ citta mājheṃ / pureṃ mhaṇoṃ na śake

tavaṃ tujheṃ nāmaci āmhāṃ āvaḍe / vari bheṭī hoya āṇi javaḻika joḍe / pāṭhīṃ goṭhī sāṃgasī suravāḍeṃ / ānaṃdācenī

ātāṃ heṃ sukha kāyisayāsārikheṃ / kāṃhīṃ nirvacenā maja paritokheṃ /
tari yetuleṃ jāṇeṃ je yeṇeṃ mukheṃ / punaruktahī ho

hāṃ gā sūrya kāya śiḻā ? / agni mhaṇoṃ yeta āhe voṃviḻā /
kāṃ nitya vāhātayā gaṃgājaḻā / pārasepaṇa ase

tuṃvā svamukheṃ jeṃ bolileṃ / heṃ āmhīṃ nādāsi rūpa dekhileṃ /
āji caṃdanatarūcīṃ phuleṃ / turaṃbīta āhoṃ māṃ

yā pārthāciyā bolā / sarvāṃgeṃ kṛṣṇa ḍolalā /
mhaṇe bhaktijñānāsi jāhalā / āgaru hā

aisā patikarāciyā toṣā āṃtu / premācā vegu ucaṃbaḻatu /
sāyāseṃ sāṃvarūni anaṃtu / kāya bole

mī pitāmahācā pitā / heṃ āṭhavitāṃhī nāṭhave cittā /
kīṃ mhaṇatase bā paṃḍusutā / bhaleṃ keleṃ

arjunāteṃ bā mhaṇe etha kāṃhīṃ / āmhāṃ vismo karāvayā kāraṇa nāhīṃ / āṃgeṃ to leṃkarūṃ kāī / navheci naṃdāceṃ

pari prastuta aiseṃ aso / heṃ karavī āvaḍīcā atiso /
maga mhaṇe āikeṃ sāṃgatasoṃ / dhanurdharā

tarī tuvāṃ pusaliyā vibhūtī / tayāṃceṃ apārapaṇa subhadrāpatī /
jyā mājhiyāci pari mājhiye matī / ākaḻatī nā

āṃgīṃciyā romā kitī / jayāciyā tayāsi na gaṇavatī /
taisiyā mājhiyā vibhūtī / asaṃkhya maja

eऱhavīṃ tarī mī kaisā kevaḍhā / mhaṇoni āpaṇapayāṃhī navheci phuḍā / yālāgīṃ pradhānā jiyā rūḍhā / tiyā vibhūtī āikeṃ

jiyā jāṇataliyāsāṭhīṃ / āghavīyā jāṇitaliyā hotī kirīṭī / jaiseṃ bīja āliyā muṭhīṃ / tarūci ālā hoya

kāṃ udyāna hātā caḍhileṃ / tarī āpaisīṃ sāṃpaḍalīṃ phaḻeṃ phuleṃ /
tevīṃ dekhiliyā jiyā dekhavaleṃ / viśva sakaḻa

eऱhavīṃ sācaci gā dhanurdharā / nāhīṃ śevaṭu mājhiyā vistārā /
paiṃ gaganā aiśiyā apārā / majamājīṃ lapaṇeṃ

āikeṃ kuṭilālakamastakā / dhanurvedatryaṃbakā /
mī ātmā aseṃ ekaikā / bhūtamātrācāṃ ṭhāyīṃ

āṃtulīkaḍe mīci yāṃcā aṃtaḥkaraṇīṃ / bhūtāṃbāherī mājhīca gaṃvasaṇī / ādi mī nirvāṇīṃ / madhyahī mīci

jaiseṃ meghāṃ yā taḻīṃ varī / eka ākāśaci āṃta bāherī /
āṇi ākāśīṃci jāle avadhārīṃ / asaṇeṃhī ākāśīṃ

pāṭhīṃ layā je veḻīṃ jātī / te veḻīṃ ākāśaci hoūni ṭhātī /
tevīṃ ādi sthitī aṃtagatī / bhūtāṃsi mī

aiseṃ bahuvasa āṇi vyāpakapaṇa / mājheṃ vibhūtiyogeṃ jāṇa /
tarī jīvaci karūni śravaṇa / āikoni āika

yāhīvarī tyā vibhūtī / sāṃgaṇeṃ ṭheleṃ tujaprati /
sāṃgena mhaṇitaleṃ tuja prītī / tyā pradhānā āikeṃ

heṃ boloni to kṛpāvaṃtu / mhaṇe viṣṇu mī ādityāṃāṃtu /
ravī mī raśmivaṃtu / suprabhāṃmājīṃ

marūd‍gaṇāṃcyā vargīṃ / marīci mhaṇe mī śāraṅgī /
caṃdra mī gaganaraṃgīṃ / tārāṃmājīṃ

vedāṃāṃtu sāmavedu / to mī mhaṇe goviṃdu /
devāṃmājī marud‍baṃdhu / maheṃdra to mī

iṃdriyāṃāṃtu akarāveṃ / mana teṃ mī heṃ jāṇāveṃ /
bhūtāṃmājī svabhāveṃ / cetanā te mī

aśeṣāṃhī rudrāṃmājhārīṃ / śaṃkara jo madanārī /
to mī yetha na dharīṃ / bhrāṃti kāṃhīṃ

yakṣarakṣogaṇāṃāṃtu / śaṃbhūcā sakhā jo dhanavaṃtu /
to kuberu mī heṃ anaṃtu / mhaṇatā jāhalā

maga āṭhāṃhī vasūṃmājhārīṃ / pāvaku to mī avadhārīṃ /
śikharāthiliyāṃ sarvoparī / meru to mī

jo svargasiṃhāsanā sāvāvo / sarvajñate ādīcā ṭhāvo /
to purohitāṃmājīṃ rāvo / bṛhaspatī mī

tribhuvanīṃciyā senāpatīṃ- / āṃta skaṃdu to mī mahāmatī /
jo haravīryeṃ agnisaṃgatī / kṛttikāāṃtu jāhalā

sakaḻikāṃ sarovarāṃsī / mājīṃ samudra to mī jaḻarāśī /
maharṣīṃāṃtu taporāśī / bhṛgu to mī

aśeṣāṃhī vācā / āṃtu naṭanāca satyācā /
teṃ akṣara eka mī vaikuṃṭhīṃcā / velhāḻu mhaṇe

samastāṃhī yajñāṃcā paikīṃ / japayajñu to mī ye lokīṃ /
jo karmatyāgeṃ praṇavādikīṃ / niphajavije

nāmajapayajñu to parama / bādhūṃ na śake s‍nānādi karma /
nāmeṃ pāvana dharmādharma / nāma parabrahma vedārtheṃ

sthāvarāṃ girīvarāṃ āṃtu / puṇyapuṃja jo himavaṃtu /
to mī mhaṇe kāṃtu / lakṣmiyecā

kalpadruma hana pārijātu / guṇeṃ caṃdanuhī vāḍa vikhyātu /
tari yayāṃ vṛkṣajātāṃ āṃtu / aśvatthu to mī

devaṛṣīṃāṃtu pāṃḍavā / nāradu to mī jāṇāvā /
citrarathu mī gaṃdharvāṃ / sakaḻikāṃmājīṃ

yayāṃ aśeṣāṃhī siddhāṃ- / mājīṃ kapilācāryu mī prabuddhā /
turaṃgajātāṃ prasiddhāṃ- / āṃta ucaiḥśravā mī

rājabhūṣaṇa gajāṃāṃtu / arjunā mī gā airāvatu /
payorāśī suramathitu / amṛtāṃśu to mī

yayāṃ narāṃmājīṃ rājā / to vibhūtiviśeṣa mājhā /
jayāteṃ sakaḻa loka prajā / hoūni sevitī

paiṃ āghaveyāṃ hātiyerāṃ / āṃta vajra teṃ mī dhanurdharā /
jeṃ śatamakhottīrṇakarā / ārūḍhoni ase

dhenūṃmadhyeṃ kāmadhenu / teṃ mī mhaṇe viṣvaksenu /
janmavitayāṃāṃta madanu / to mī jāṇeṃ

sarpakuḻāāṃta adhiṣṭhātā / vāsukī gā mī kuṃtīsutā /
nāgāṃmājīṃ samastāṃ / anaṃtu to mī

agā yādasāṃāṃtu / jo paścimapramadecā kāṃtu /
to varuṇa mī heṃ anaṃtu / sāṃgata ase

āṇi pitṛgaṇāṃ samastāṃ- / mājīṃ aryamā jo pitṛdevatā /
to mī heṃ tattvatā / bolata āheṃ

jagācīṃ śubhāśubheṃ lihitī / prāṇiyāṃcyā mānasāṃcā jhāḍā ghetī /
maga keliyānurūpa hotī / bhoganiyama je

tayāṃ niyamitayāṃmājīṃ yamu / jo karmasākṣī dharmu /
to mī mhaṇe rāmu / ramāpatī

agā daityāṃciyā kuḻīṃ / pralhādu to mī nyāhāḻīṃ /
mhaṇauni daityabhāvādimeḻīṃ / liṃpecinā

paiṃ kaḻitayāṃmājīṃ mahākāḻu / to mī mhaṇe gopāḻu /
śvāpadāṃmājīṃ śārdūḻu / to mī jāṇa

pakṣijātimājhārīṃ / garuḍa to mī avadhārīṃ /
yālāgīṃ jo pāṭhīvarī / vāhoṃ śake māteṃ

pṛthvīciyā paisārā- / mājīṃ ghaḍīṃ na lagatāṃ dhanurdharā /
ekeci uḍḍāṇeṃ sātāṃhi sāgarāṃ / pradakṣiṇā karī jo

tayāṃ vahiliyāṃ gatimaṃtāṃ- / āṃta pavanu to mī pāṃḍusutā /
śastradharāṃ samastāṃ- / mājīṃ śrīrāma to mī

jeṇeṃ sāṃkaḍaliyā dharmācena kaivāreṃ / āpaṇapayāṃ dhanuṣya karūni dusareṃ /
vijayalakṣmīye eka mohareṃ / keleṃ tretīṃ

pāṭhīṃ ubhe ṭhākūni suveḻīṃ / pratāpalaṃkeśvarācīṃ sisāḻīṃ /
gaganīṃ udo mhaṇatayā hastabaḻīṃ / didhalī bhūtāṃ

jeṇeṃ devāṃcā mānu giṃvasilā / dharmāsi jīrṇoddhāru kelā /
sūryavaṃśīṃ udelā / sūrya jo kāṃ

to hātiyeruparajitayā āṃtu / rāmacaṃdra mī jānakīkāṃtu /
makara mī pucchavaṃtu / jaḻacarāṃmājīṃ

paiṃ samastāṃhī voghāṃ- / madhyeṃ je bhagīratheṃ āṇitāṃ gaṃgā /
janhūneṃ giḻilī maga jaṃghā / phāḍūni didhalī

te tribhūvanaikasaritā / jānhavī mī pāṃḍusutā /
jaḻapravāhāṃ samastāṃ- / mājhārīṃ jāṇeṃ

aiseni vegaḻālāṃ sṛṣṭīpaikīṃ / vibhūtī nāma sūtāṃ ekekīṃ /
sagaḻena janmasahasreṃ avalokīṃ / ardhyā navhatī

jaisīṃ avaghīṃci nakṣatreṃ veṃcāvīṃ / aisī cāḍa upajela jaiṃ jīvīṃ /
taiṃ gaganācī bāṃdhāvī / lotha jevīṃ

kāṃ pṛthvīye paramāṇūṃcā ugāṇā ghyāvā / tari bhūgoluci kākhe suvāvā /
taisā vistāru mājhā pahāvā / tari jāṇāveṃ māteṃ

jaiseṃ śākhāṃsī phūla phaḻa / ekiheḻāṃ veṭāḻūṃ mhaṇije sakaḻa /
tarī upaḍūniyāṃ mūḻa / jevīṃ hātīṃ ghepe

tevīṃ mājheṃ vibhūtiviśeṣa / jarī jāṇoṃ pāhijetī aśeṣa /
tarī svarūpa eka nirdoṣa / jāṇije mājheṃ

eऱhavīṃ vegaḻāliyā vibhūtī / kāyieka parisasī kitī /
mhaṇoni ekiheḻāṃ mahāmatī / sarva mī jāṇa

mī āghaviyeci sṛṣṭī / ādimadhyāṃtīṃ kirīṭī /
otaprota paṭīṃ / taṃtu jevīṃ

aisiyā vyāpakā māteṃ jaiṃ jāṇāveṃ / taiṃ vibhūtibhedeṃ kāya karāveṃ /
pari he tujhī yogyatā navhe / mhaṇoni aso

kāṃ je tuvāṃ pusiliyā vibhūtī / mhaṇoni tiyā āīka subhadrāpatī /
tarī ātāṃ vidyāṃmājīṃ prastutīṃ / adhyātmavidyā te mī

agā bolatayāṃciyā ṭhāyīṃ / vādu to mī pāhīṃ /
jo sakalaśāstrasaṃmateṃ kahīṃ / sarecinā

jo nirvacūṃ jātāṃ vāḍhe / āikatayāṃ utprekṣe saḻu caḍhe /
jayāvarī bolatayāṃcīṃ goḍeṃ / bolaṇīṃ hotīṃ

aisā pratipādanāmājīṃ vādu / to mī mhaṇe goviṃdu /
akṣarāṃmājīṃ viśadu / akāru to mī

paiṃ gā samāsāṃmājhārīṃ / dvaṃdva to mī avadhārīṃ /
maśakālāgoni brahmāverīṃ / grāsitā to mī

merumaṃdarādikīṃ sarvīṃ / sahita pṛthvīteṃ viravī /
jo ekārṇavāteṃhī jiravī / jethiṃcā tetheṃ

jo praḻayatejā deta miṭhī / sagaḻiyā pavanāteṃ giḻī kirīṭī /
ākāśa jayāciyā poṭīṃ / sāmāvaleṃ

aisā apāra jo kāḻu / to mī mhaṇe lakṣmīlīḻu /
maga puḍhatī sṛṣṭīcā meḻu / sṛjitā to mī

āṇi sṛjiliyā bhūtāṃteṃ mīci dharīṃ / sakaḻāṃ jīvanahī mīci avadhārīṃ /
śekhīṃ sarvāṃteṃ yā saṃhārīṃ / tevhāṃ mṛtyuhī mīci

ātāṃ strīgaṇāṃcāṃ paikīṃ / mājhiyā vibhūtī sāta āṇikī /
tiyā aika kavatikīṃ / sāṃgijatīla

tarī nīca navī je kīrti / arjunā te mājhī mūrtī /
āṇi audāryeṃsī je saṃpattī / tehī mīci jāṇeṃ

āṇi te gā mī vācā / je sukhāsanīṃ nyāyācā /
ārūḍhoni vivekācā / mārgīṃ cāle

dekhileni padārtheṃ / je āṭhavūni de māteṃ /
te smṛtihī paiṃ etheṃ / triśuddhī mī

paiṃ svahitā anujāyinī / medhā te gā mī iye janīṃ /
dhṛtī mī tribhuvanīṃ / kṣamā te mī

evaṃ nārīṃmājhārīṃ / yā sātahī śakti mīci avadhārīṃ /
aiseṃ saṃsāragajakesarī / mhaṇatā jāhalā

vedarāśīciyā sāmā- / āṃta bṛhatsāma jeṃ priyottamā /
teṃ mī mhaṇe ramā- / prāṇeśvaru

gāyatrīchaṃda jeṃ mhaṇije / teṃ sakaḻāṃ chaṃdāṃmājīṃ mājheṃ /
svarūpa heṃ jāṇije / nibhrāṃta tuvāṃ

māsāṃāṃta mārgaśīru / to mī mhaṇe śāraṅgadharu /
ṛtūṃmājīṃ kusumākaru / vasaṃtu to mī

chaḻitayāṃ viṃdāṇā- / mājīṃ jūṃ teṃ mī vicakṣaṇā /
mhaṇoni cohaṭāṃ corī parī kavaṇā / nivārūṃ na ye

agā aśeṣāṃhī tejasāṃ- / āṃta teja teṃ mī bharaṃvasā /
vijayo mī kāryoddeśāṃ / sakaḻāṃmājīṃ

jeṇeṃ cokhāḻata dise nyāya / to vyavasāyāṃta vyavasāya /
mājheṃ svarūpa heṃ rāya / surāṃcā mhaṇe

sattvāthiliyāṃāṃtu / sattva mī mhaṇe anaṃtu /
yādavāṃmājīṃ śrīmaṃtu / toci to mī

jo devakī-vasudevāstava jāhalā / kumārīsāṭhīṃ gokuḻīṃ gelā /
to mī prāṇāsakaṭa piyālā / pūtaneteṃ

nughaḍatāṃ bāḻapaṇācī phulī / jeṇeṃ miyāṃ adānavīṃ sṛṣṭi kelī /
karīṃ giri dharūni umāṇilī / maheṃdramahimā

kāliṃdīceṃ hṛdayaśalya pheḍileṃ / jeṇeṃ miyāṃ jaḻata gokuḻa rākhileṃ /
vāsaruvāṃsāṭhīṃ lāvileṃ / viraṃcīsa piseṃ

prathamadaśeciye pahāṃṭe- / mājīṃ kaṃsā aiśīṃ acāṭeṃ /
mahādheṃḍīṃ avacaṭeṃ / līḻāci nāsilīṃ

heṃ kāya kitīeka sāṃgāveṃ / tuvāṃhī dekhileṃ aikileṃ ase āghaveṃ /
tari yādavāṃmājīṃ jāṇāveṃ / heṃci svarūpa mājheṃ

āṇi somavaṃśīṃ tumhāṃ pāṃḍavāṃ- / mājīṃ arjuna to mī jāṇāvā /
mhaṇoni ekamekāṃciyā premabhāvā / vighaḍu na paḍe

saṃnyāsī tuvāṃ hoūni janīṃ / corūni nelī mājhī bhaginī /
taऱhī vikalpu nupaje manīṃ / mī tūṃ donhī svarūpa eka

munīāṃta vyāsadevo / to mī mhaṇe yādavarāvo /
kavīśvarāṃmājīṃ dhairyā ṭhāvo / uśanācārya to mī

agā damitayāṃmājhārīṃ / anivāra daṃḍu to mī avadhārīṃ /
jo muṃgiyelāgoni brahmāverīṃ / niyamita pāve

paiṃ sārāsāra nirdhāritayāṃ / dharmajñānācā pakṣu dharitayāṃ /
sakaḻa śāstrāṃmājīṃ yayāṃ / nītiśāstra teṃ mī

āghaviyāci gūḍhāṃ- / mājīṃ mauna teṃ mī suhāḍā /
mhaṇoni na bolatayāṃ puḍhāṃ / straṣṭāhī neṇa hoya

agā jñāniyāṃciyā ṭhāyīṃ / jñāna teṃ mī pāhīṃ /
ātāṃ aso heṃ yayāṃ kāṃhīṃ / pāra na dekhoṃ

paiṃ parjanyāciyā dhārāṃ / varī lekha karavela dhanurdharā /
kāṃ pṛthvīciyā tṛṇāṃkurāṃ / hoīla ṭhī

paiṃ mahodadhīciyā taraṃgāṃ / vyavasthā dharūṃ naye jevīṃ gā /
tevīṃ mājhiyā viśeṣa liṃgāṃ / nāhīṃ mitī

aiśiyāhī sātapāṃca pradhānā / vibhūtī sāṃgitaliyā tuja arjunā /
to hā uddeśu jo gā manā / āhāca gamalā

yerāṃ vibhūtivistārāṃsi kāṃhīṃ / etha sarvathā lekha nāhīṃ /
mhaṇauni parisasīṃ tūṃ kāī / āmhīṃ sāṃgoṃ kitī

yālāgīṃ ekiheḻāṃ tuja / dāūṃ ātāṃ varma nija /
sarvabhūtāṃkureṃ bīja / virūḍhata ase teṃ mī

mhaṇoni sāneṃ thora na mhaṇāveṃ / uṃca nīca bhāva sāṃḍāve /
eka mīci aiseṃ mānāveṃ / vastujātāteṃ

tarī yāvarī sādhāraṇa / āīka pāṃ āṇikahī khūṇa /
tarī arjunā teṃ tūṃ jāṇa / vibhūti mājhī

jetha jetha saṃpatti āṇi dayā / donhī vasatī āliyā asatī ṭhāyā /
te te jāṇa dhanaṃjayā / vibhūti mājhī

athavā ekaleṃ eka biṃba gaganīṃ / tarī prabhā phāṃke tribhuvanīṃ /
tevīṃ ekākiyācī sakaḻa janīṃ / ājñā pāḻije

tayāṃteṃ ekaleṃ jhaṇīṃ mhaṇa / te nirdhana yā bhāṣā neṇa /
kāya kāmadhenūsaveṃ sarva sāhāna / cālata ase

tiyeteṃ jeṃ jedhavāṃ jo māge / teṃ te ekasareṃci prasavoṃ lāge /
tevīṃ viśvavibhava tayā aṃgeṃ / hoūni āhāti

tayāteṃ voḻakhāvayā heci saṃjñā / je jageṃ namaskārije ājñā /
aiseṃ āthi teṃ jāṇa prājñā / avatāra mājhe

ātāṃ sāmānya viśeṣa / heṃ jāṇaṇeṃ etha mahādoṣa /
kāṃ je mīci eka aśeṣa / viśva āhe mhaṇoni

tarī ātāṃ sādhāraṇa āṇi cāṃgu / aisā kaiseni pāṃ kalpāvā vibhāgu /
vāyāṃ āpuliyeci matī vaṃgu / bhedācā lāvāvā

eऱhavīṃ tarī tūpa kāsayā ghusaḻāveṃ / amṛta kāṃ rāṃdhūni ardheṃ karāveṃ /
hāṃ gā vāyūsi kāya pāṃ ḍāveṃ / ujaveṃ aṃga āhe

paiṃ sūryabiṃbāsi poṭa pāṭhīṃ / pāhatāṃ nāsela āpulī diṭhī /
tevīṃ mājhyā svarūpīṃ goṭhī / sāmānyaviśeṣācī nāhīṃ

āṇi sinānā ihīṃ vibhūtīṃ / maja apārāteṃ mavisīla kitī /
mhaṇoni kiṃbahunā subhadrāpatī / aso heṃ jāṇaṇeṃ

ātāṃ paiṃ mājheni ekeṃ aṃśeṃ / heṃ jaga vyāpileṃ ase /
yālāgīṃ bhedū sāṃḍūni sariseṃ / sāmyeṃ bhaja

aiseṃ vibudhavanavasaṃteṃ / teṇeṃ viraktāṃceni ekāṃteṃ /
bolileṃ jetha śrīmaṃteṃ / śrīkṛṣṇadeveṃ

tetha arjuna mhaṇe svāmī / yetuleṃ heṃ rābhasya boliletī tumhīṃ /
je bhedu eka āṇi āmhīṃ / sāṃḍāvā ekīṃ

hāṃ ho sūrya mhaṇe kāya jagāteṃ / aṃdhāreṃ davaḍā kāṃ parauteṃ /
tevīṃ dhasāḻa mhaṇoṃ devā tūṃteṃ / tarī adhika hā bolu

tujheṃ nāṃvaci eka koṇhī veḻe / jayāṃciye mukhāsi kāṃ kānāṃ miḻe /
tayāṃciyā hṛdayāteṃ sāṃḍūni paḻe / bhedu jī sāca

to tūṃ parabrahmaci asakeṃ / maja daiveṃ didhalāsi hastodakeṃ /
tarī ātāṃ bhedu kāyasā keṃ / dekhāvā kavaṇeṃ

jī caṃdrabiṃbācā gābhārāṃ / rigāliyāvarīhī ubārā /
parī rāṇepaṇeṃ śāraṅgadharā / bolā heṃ tumhīṃ

tetha sāviyāci paritoṣoni deveṃ / arjunāteṃ āliṃgileṃ jīveṃ /
maga mhaṇe tuvāṃ na kopāveṃ / āmuciyā bolā

āmhīṃ tuja bhedāciyā vāhāṇīṃ / sāṃgitalī je vibhūtīṃcī kahāṇī /
te abhedeṃ kāya aṃtaḥkaraṇīṃ / mānilī kīṃ na maneṃ

heṃci pāhāvayālāgīṃ / nāveka boliloṃ bāherisavaḍiyā bhaṃgīṃ /
taṃva vibhūtī tuja cāṃgī / āliyā bodhā

yetha arjuna mhaṇe deveṃ / heṃ āpuleṃ āpaṇa jāṇāveṃ /
parī dekhataseṃ viśva āghaveṃ / tuvāṃ bharaleṃ

paiṃ rāyā to pāṃḍusutu / aisiye pratītīsi jāhalā varaitu /
yā saṃjayāciyā bolā nivāṃtu / dhṛtarāṣṭra rāhe

kīṃ saṃjayo dukhavaleni aṃtaḥkaraṇeṃ / mhaṇatase navala navhe daiva davaḍaṇeṃ /
hā jīveṃ dhāḍasā āhe mī mhaṇeṃ / taṃva āṃtuhī āṃdhaḻā

parī aso heṃ to arjunu / svahitācā vāḍhavitase mānu /
kīṃ yāhīvarī tayā ānu / dhiṃvasā upanalā

mhaṇe heci hṛdayāāṃtulī pratītī / bāherī avataro kāṃ ḍoḻyāṃpratī /
iye ārtīcāṃ pāulīṃ matī / uṭhatī jāhalī

miyāṃ ihīṃca dohīṃ ḍoḻāṃ / jhoṃbāveṃ viśvarūpā sakaḻā /
evaḍhī hāṃva to daivāāgaḻā / mhaṇaūni karī

āji to kalpatarūcī śākhā / mhaṇoni vāṃjhoḻeṃ na lagatī dekhā /
jeṃ jeṃ yeīla tayāci mukhā / teṃ teṃ sācaci karitase yeru

jo pralhādāciyā bolā / viṣāhīsakaṭa āpaṇaci jāhalā /
to sad‍guru ase joḍalā / kirīṭīsī

mhaṇoni viśvarūpa pusāvayālāgīṃ / pārtha rigatā hoīla kavaṇeṃ bhaṃgīṃ /
teṃ sāṃgena puḍhiliye prasaṃgīṃ / jñānadeva mhaṇe nivṛttīcā