Jnaneshwari · Chapter 17

// ॐ śrī paramātmane namaḥ //
// atha śrīmadbhagavadgītā //
/ atha saptadaśo'dhyāyaḥ - adhyāya satarāvā / /
/ śraddhātrayavibhāgayogaḥ /
viśvavikāsita mudrā / jayā soḍī tujhī yogamudrā /
tayā namojī gaṇeṃdrā / śrīgururāyā

triguṇatripurīṃ veḍhilā / jīvatvadurgīṃ āḍilā /
to ātmaśaṃbhūneṃ soḍavilā / tujhiyā smṛtī

mhaṇauni śiveṃsīṃ kāṃṭāḻā / gurutveṃ tūṃci āgaḻā /
taऱhī haḻu māyājaḻā- / mājīṃ tārūni

je tujhyāvikhīṃ mūḍha / tayāṃlāgīṃ tūṃ vakratuṃḍa /
jñāniyāṃsī tarī akhaṃḍa / ujūci āhāsī

daivikī diṭhī pāhatāṃ sānī / taऱhī mīlanonmīlanīṃ /
utpatti praḻayo donhī / līlāci karisī

pravṛttikarṇācyā cāḻīṃ / uṭhalī madagaṃdhāniḻīṃ /
pūjījasī nīlotpalīṃ / jīvabhṛṃgāṃcyā

pāṭhīṃ nivṛttikarṇatāḻeṃ / āhāḻalī te pūjā vidhuḻe /
tevhāṃ miravisī mokaḻeṃ / āṃgāceṃ leṇeṃ

vāmāṃgīcā lāsyavilāsu / jo hā jagadrūpa ābhāsu /
to tāṃḍavamiseṃ kaḻāsu / dāvisī tūṃ

heṃ aso vismo dātārā / tūṃ hosī jayācā soyarā /
soirikeciyā vyavahārā / mukeci to

pheḍitāṃ baṃdhanācā ṭhāvo / tūṃ jagadbaṃdhu aisā bhāvo /
dharūṃ voḻage uvāvo / tujhāci āṃgīṃ

taṃva dujayāceni nāṃveṃ tayā / dehahī nureci paiṃ devarāyā /
jeṇeṃ tūṃ āpaṇapayāṃ / kelāsi dujā

tūṃteṃ karūni puḍheṃ / je upāyeṃ ghetī davaḍe /
tayāṃ ṭhāsī bahuveṃ pāḍeṃ / māgāṃci tūṃ

jo dhyāneṃ sūye mānasīṃ / tayālāgīṃ nāhīṃ tūṃ tyāce deśīṃ /
dhyānahī visare teṇeṃsīṃ / vālabha tuja

tūteṃ siddhaci jo neṇe / to nāṃde sarvajñapaṇeṃ /
vedāṃhī yevaḍheṃ bolaṇeṃ / neghasī kānīṃ

mauna gā tujheṃ rāśināṃva / ātāṃ stotrīṃ keṃ bāṃdhoṃ hāva /
disatī tetulī māva / bhajoṃ kāī

daivikeṃ sevaku hoṃ pāhoṃ / tarī bheditāṃ drohoci lāhoṃ /
mhaṇauni ātāṃ kāṃhīṃ nohoṃ / tujalāgīṃ jī

jaiṃ sarvathā sarvahī nohije / taiṃ advayā tūteṃ lāhije /
heṃ jāṇeṃ mī varma tujheṃ / ārādhya liṃgā

tarī nuroni vegaḻeṃpaṇa / rasīṃ bhajinnaleṃ lavaṇa /
taiseṃ namana mājheṃ jāṇa / bahu kāya boloṃ

ātāṃ ritā kuṃbha samudrīṃ rige / to ucaṃbaḻata bharoni nige /
kāṃ daśīṃ dīpasaṃgeṃ / dīpuci hoya

taisā tujhiyā praṇitīṃ / mī pūrṇu jāhaloṃ śrīnivṛttī /
ātāṃ āṇīna vyaktīṃ / gītārthu to

tarī ṣoḍaśādhyāyaśekhīṃ / tiye samāptīcyā ślokīṃ /
jo aisā nirṇayo niṣṭaṃkīṃ / ṭhevilā deveṃ

je kṛtyākṛtyavyavasthā / anuṣṭhāvayā pārthā /
śāstraci eka sarvathā / pramāṇa tuja

tetha arjuna mānaseṃ / mhaṇe heṃ aiseṃ kaiseṃ /
je śāstreṃvīṇa nase / suṭikā karmā

tarī takṣakācī phaḍe / ṭhākoni kaiṃ to maṇi kāḍhe /
kaiṃ nākīṃcā keśu joḍe / siṃhāciye ?

maga teṇeṃ to voṃvije / tarīca leṇeṃ pāvije /
eऱhavīṃ kāya asije / riktakaṃṭhīṃ ?

taisī śāstrāṃcī mokaḻī / yāṃ kaiṃ koṇa pāṃ veṃṭāḻī /
ekavākyatecyā phaḻīṃ / paisije kaiṃ ?

jālayāhī ekavākyatā / kāṃ lābheṃ veḻu anuṣṭhitāṃ /
kaiṃcā paisāru jīvitā / yetulāliyā

āṇi śāstreṃ artheṃ deśeṃ kāḻeṃ / yā cahūṃhī jeṃ ekaphaḻe /
to upāvo keṃ miḻe / āghavayāṃsī ?

mhaṇauni śāstrāceṃ ghaḍateṃ / noheṃ prakāreṃ bahuteṃ /
tarī murkhā mumukṣāṃ yetheṃ / kāya gati pāṃ ?

hā pusāvayā abhiprāvo / jo arjuna karī prastāvo /
to satarāviyā ṭhāvo / adhyāyā yetha

tarī sarvaviṣayīṃ vitṛṣṇu / jo sakaḻakaḻīṃ pravīṇu /
kṛṣṇāhī navala kṛṣṇu / arjunatveṃ jo

śauryā joḍalā ādhāru / jo somavaṃśācā śṛṃgāru /
sukhādi upakāru / jayācī līlā

jo prajñecā priyottamu / brahmavidyecā viśrāmu /
sahacaru manodharmu / devācā jo

to arjuna mhaṇe gā tamālaśyāmā / iṃdriyāṃ phāṃvaliyā brahmā /
tujhāṃ bolu āmhā / sākāṃkṣu paiṃ jī

jeṃ śāstreṃvāṃcūni āṇikeṃ / prāṇiyā svamokṣu na dekhe /
aiseṃ kāṃ kaiṃpakheṃ / bolilāsī

tarī na miḻeci to deśu / navheci kāḻā avakāśu /
jo karavī śāstrābhyāsu / tohī durī

āṇi abhyāsīṃ virajiyā / hotī jiyā sāmugriyā /
tyāhī nāhīṃ āpaitiyā / tiye veḻīṃ

ujū noheci prācīna / nedīci prajñā saṃvāhana /
aiseṃ ṭheleṃ āpādana / śāstrāceṃ jayā

kiṃbahunā śāstravikhīṃ / ekahī na lāhātīci nakhī /
mhaṇauni ukhivikhī / sāṃḍilī jihīṃ

parī nirdhārūni śāstreṃ / arthānuṣṭhāneṃ pavitreṃ /
nāṃdatāti paratreṃ / sācāreṃ je

tayāṃseṃ āmhīṃ hoāveṃ / aisī cāḍa bāṃdhoni jīveṃ /
ghetī tayāṃceṃ māgāve / ācarāvayā

dhaḍyāciyā ākharāṃ / taḻīṃ bāḻa lihe dātārā /
kāṃ puḍhāṃsūni paḍikarā / akṣamu cāle

taiseṃ sarvaśāstranipuṇa / tayāceṃ jeṃ ācaraṇa /
teṃci karitī pramāṇa / āpaliye śraddhe

maga śivādikeṃ pūjaneṃ / bhūmyādikeṃ mahādāneṃ /
āgnihotrādi yajaneṃ / karitī je śraddhā

tayāṃ sattvarajatamāṃ-/ / mājīṃ koṇa puruṣottamā /
gati hoya te āmhāṃ / sāṃgijo jī

taṃva vaikuṃṭhapīṭhīṃceṃ liṃga / jo nigamapadmācā parāga /
jiye jayāceni heṃ jaga / aṃgacchāyā

kāḻa sāviyāci vāḍhu / lokottara prauḍhu /
ādvitīya gūḍhu / ānaṃdaghanu

iyeṃ ślāghijatī jeṇeṃ bikeṃ / teṃ jayāceṃ āṃgīṃ asikeṃ /
to śrīkṛṣṇa svamukheṃ / bolata ase

mhaṇe pārthā tujhā atiso / heṃhī āmhī jāṇatasoṃ /
je śāstrābhyāsācā āḍaso / mānitosi kīṃ

nusadhiyācī śraddhā / jhoṃboṃ pāhasī paramapadā /
tarī taiseṃ heṃ prabuddhā / sohopeṃ nohe

śraddhā mhaṇitaliyāsāṭhīṃ / pātejoṃ naye kirīṭī /
kāya dviju aṃtyajaghṛṣṭīṃ / aṃtyaju nohe ?

gaṃgodaka jarī jāleṃ / tarī madyabhāṃḍāṃ āleṃ /
teṃ gheūṃ naye kāṃhīṃ keleṃ / vicārīṃ pāṃ

caṃdanu hoya śītaḻu / parī agnīsī pāve meḻu /
taiṃ hātīṃ dharitāṃ jāḻūṃ / na śake kāī ?

kāṃ kiḍāciye āṭatiye puṭīṃ / paḍileṃ soḻeṃ kirīṭī /
ghetaleṃ cokhāsāṭhīṃ / nāgavīnā ?

taiseṃ śraddheceṃ daḻavāḍeṃ / aṃgeṃ kīra cokhaḍeṃ /
parī prāṇiyāṃcyā paḍe / vibhāgīṃ jaiṃ

te prāṇiye taṃva svabhāveṃ / ānādimāyāprabhāveṃ /
triguṇāceci āghave / vaḻile āhātī

tethahī dona guṇa khāṃcatī / maga eka dharī unnatī /
taiṃ taisiyāci hotī vṛttī / jīvāṃciyā

vṛttīseṃ mana dharitī / manāsī kriyā karitī /
keliyā aisī varītī / maroni deheṃ

bīja moḍe jhāḍa hoye / jhāḍa moḍe bījīṃ sāmāye /
aiseni kalpakoḍī jāye / parī jāti na naśe

tiyāparīṃ yiyeṃ apāreṃ / hota jāta janmāṃtareṃ /
parī triguṇatva na vyabhicareṃ / prāṇiyāṃceṃ

mhaṇūni prāṇiyāṃcyā paikīṃ / paḍilī śraddhā avalokīṃ /
te hoya guṇāsārikhī / tihīṃ yayāṃ

vipāyeṃ vāḍhe sattva śuddha / tevhāṃ jñānāsī karī sāda /
parī ekā doghe vokhada / yera āhātī

sattvāceni āṃgalageṃ / te śraddhā mokṣaphaḻā rige /
taṃva raja tama uge / kāṃ pāṃ rāhātī ?

moḍoni sattvācī trāye / rajoguṇa ākāśeṃ jāye /
tevhāṃ teci śraddhā hoye / karmakerasuṇī

maga tamācī uṭhī āgī / tevhāṃ teci śraddhā bhaṃgī /
hoṃ lāge bhogālāgīṃ / bhalateyā

evaṃ sattvarajatamā-/ / vegaḻī śraddhā suvarmā /
nāhīṃ gā jīvagrāmā-/ / mājīṃ yayā

mhaṇauni śraddhā svābhāvika / ase paiṃ triguṇātmaka /
rajatamasāttvika / bhedīṃ ihīṃ

jaiseṃ jīvanaci udaka / parī viṣīṃ hoya māraka /
kāṃ mirayāmājīṃ tīkha / uṃsīṃ goḍa

taisā bahuvaseṃ tameṃ / jo sadāci hoya nime /
tetha śraddhā parīṇame / teṃci hoūni

maga kājaḻā āṇi masī / na dise vivaṃcanā jaisī /
tevīṃ śraddhā tāmasī / sinī nāhīṃ

taisīca rājasīṃ jīvīṃ / rajomaya jāṇāvī /
sāttvikīṃ āghavīṃ / sattvācīca

aiseni hā sakaḻu / jagaḍaṃbaru nikhiḻu /
śraddhecāci kevaḻu / votalā ase

parī guṇatrayavaśeṃ / trividhapaṇāceṃ lāseṃ /
śraddhe jeṃ uṭhileṃ ase / teṃ voḻakha tūṃ

tarī jāṇije jhāḍa phuleṃ / kāṃ mānasa jāṇije boleṃ /
bhogeṃ jāṇije keleṃ / pūrvajanmīṃceṃ

taisīṃ jihīṃ cinhīṃ / śraddhecīṃ rūpeṃ tīnhīṃ /
dekhijatī te vānī / avadhārīṃ pāṃ

tarī sāttvika śraddhā / jayāṃcā hoya bāṃdhā /
tayāṃ bahutakarūni medhā / svargīṃ āthī

te vidyājāta paḍhatī / yajñakriye nivaḍatī /
kiṃbahunā paḍatī / devalokīṃ

āṇi śraddhā rājasā / ghaḍale je vīreśā /
te bhajatī rākṣasāṃ / khecarāṃ hana

śraddhāṃ je kāṃ tāmasī / te mī sāṃgena tujapāśīṃ /
je kāṃ kevaḻa pāparāśī / ātikarkaśī nirdayatveṃ

jīvavadheṃ sādhūni baḻī / bhūtapretakuḻeṃ maiḻīṃ /
smaśānīṃ saṃdhyākāḻīṃ / pūjitī je

te tamoguṇāceṃ sāra / kāḍhūni nirmile nara /
jāṇa tāmasiyeceṃ ghara / śraddheceṃ teṃ

aisī ihīṃ tihīṃ liṃgīṃ / trividha śraddhā jagīṃ /
paiṃ heṃ yayālāgīṃ / sāṃgatu aseṃ

je he sāttvika śraddhā / jatana karāvī prabuddhā /
yerī donī viruddhā / sāṃḍāviyā

he sāttvikamati jayā / nirvāhatī hoya dhanaṃjayā /
bāgula nohe tayā / kaivalya teṃ

to na paḍho kāṃ brahmasūtra / nāloḍho sarva śāstra /
siddhāṃta na hota svataṃtra / tayācyā hātīṃ

parī śrutismṛtīṃce artha / je āpaṇa hoūni mūrta /
anuṣṭhāneṃ jagā deta / vaḍīla je he

tayāṃcīṃ ācaratī pāuleṃ / pāūni sāttvikī śraddhā cāle /
to teṃci phaḻa ṭhevileṃ / aiseṃ lāhe

paiṃ eka dīpu lāvī sāyāseṃ / āṇika tetheṃ lāūṃ baiseṃ /
tarī to kāya prakāśeṃ / vaṃcije gā ?

kāṃ yekeṃ mola apāra / veṃconi keleṃ dhavaḻāra /
to suravāḍu vastīkara / na bhogī kāī ?

heṃ aso jo taḻeṃ karī / teṃ tayācīca tṛṣā harī /
kīṃ suārāsīci anna gharīṃ / yerāṃ nohe ?

bahuta kāya boloṃ paiṃ gā / yekā gautamāsīci gaṃgā /
yerāṃ samastāṃ kāya jagāṃ / vohoḻa jālī ?

mhaṇauni āpuliyāparī / śāstra anuṣṭhītī kusarī /
jāṇe tayāṃte śraddhāḻu jo varī / to mūrkhuhī tare

nā śāstrāceni kīra nāṃveṃ / khākaroṃhī neṇatī jīveṃ /
parī śāstrajñāṃhī śiveṃ / ṭeṃkoṃ neditī

vaḍilāṃciyā kriyā / dekhoni vātī vāṃkuliyā /
paṃḍitāṃ ḍākuliyā / vājavitī

āpalenīci āṭopeṃ / dhanitvāceni darpeṃ /
sācaci pākhaṃḍācīṃ tapeṃ / ādaritī

āpuliyā puḍhilāṃciyā / āṃgīṃ ghālūni kātiyā /
raktamāṃsā praṇītayā / bhara bharu

ricavitī jaḻatakuṃḍīṃ / lāvitī ceḍyācyā toṃḍīṃ /
navasiyāṃ detī uṃḍī / bāḻakāṃcī

āgrahāciyā ujariyā / kṣudra devatāṃ varīyā /
annatyāgeṃ sātarīyā / ṭhākatī eka

agā ātmaparapīḍā / bīja tamakṣetrīṃ suhāḍā /
peritī maga puḍhāṃ / teṃci pike

bāhu nāhīṃ āpuliyā / āṇi nāveteṃhī dhanaṃjayā /
na dharī hoya tayā / samudrīṃ jaiseṃ

kāṃ vaidyāteṃ karī saḻā / rasu sāṃḍī pāya khoḻāṃ /
to rogiyā jevīṃ jivhāḻā / savatā hoya

nānā paḍikarāceni saḻeṃ / kāḍhī āpuleci ḍoḻe /
teṃ vānavasāṃ āṃdhaḻeṃ / jaiseṃ ṭhāke

taiseṃ tayāṃ āsurāṃ hoye / niṃdūni śāstrāṃcī soye /
saiṃgha dhāṃvatātī moheṃ / āḍavīṃ je kāṃ

kāmu karavī teṃ karitī / krodhu māravī te māritī /
kiṃbahunā māteṃ puritī / duḥkhācā guṃḍāṃ

āpulāṃ parāvāṃ dehīṃ / duḥkha detī jeṃ jeṃ kāṃhīṃ /
maja ātmayā tetulāhī / hoya śīṇu

paiṃ vācecenihī pālaveṃ / pāpiyāṃ tayāṃ nātaḻāveṃ /
parī paḍileṃ sāṃgāveṃ / tyajāvayā

preta bāhireṃ ghālije / kāṃ aṃtyaju saṃbhāṣaṇīṃ tyajije /
heṃ aso hāteṃ kṣāḻije / kaśmalāteṃ ?

tetha śuddhīciyā āśā / to lepu na manave jaisā /
tayāṃteṃ sāṃḍāvayā taisā / anuvādu hā

parī arjunā tūṃ tayāṃteṃ / dekhasī taiṃ smara ho māteṃ /
je āna prāyaścitta yetheṃ / mānela nā

mhaṇauni je śraddhā sāttvikī / puḍhatī teci paiṃ yekī /
jatana karāvī nikī / sarvāṃparī

tarī dharāvā taisā saṃgu / jeṇeṃ pokhe sāttvika lāgu /
sattvavṛddhīcā bhāgu / āhāru ghepeṃ

eऱhavīṃ tarī pāhīṃ / svabhāvavṛddhīcyā ṭhāīṃ /
āhārāvāṃcūni nāhīṃ / baḻī hetu

pratyakṣa pāheṃ pāṃ vīrā / jo sāvadha ghe madirā /
to hoūni ṭhāke mājirā / tiyeci kṣaṇīṃ

kāṃ jo sāviyā annarasu sevī / to vyāpije vātaśleṣmasvabhāvīṃ /
kāya jvaru jāliyā nivavī / payādika ?

nātarī amṛta jayāparī / ghetaliyā maraṇa vārī /
kāṃ āpuliyāseṃ karī / jaiseṃ viṣa

tevīṃ jaisā ghepe āhāru / dhātu taisāci hoya ākāru /
āṇi dhātu aisā aṃtaru / bhāvo pokhe

jaiseṃ bhāṃḍiyāceni tāpeṃ / āṃtuleṃ udakahī tāpe /
taisī dhātuvaśeṃ āṭope / cittavṛttī

mhaṇauni sāttviku rasu sevije / taiṃ sattvācī vāḍhī pāvije /
rājasā tāmasā hoīje / yerī rasīṃ

tarī sāttvika koṇa āhāru / rājasā tāmasā kāyī ākāru /
heṃ sāṃgoṃ karīṃ ādaru / ākarṇanīṃ

āṇi ekasareṃ āhārā / kaiseni tinī moharā /
jāliyā tehī vīrā / rokaḍeṃ dāūṃ

tarī jevaṇārāciyā rucī / niṣpatti kīṃ boniyāṃcī /
āṇi jevitāṃ taṃva guṇāṃcī / dāsī yetha

je jīva kartā bhoktā / to guṇāstava svabhāvatā /
pāvoniyāṃ trividhatā / ceṣṭe tridhā

mhaṇauni trividhu āhāru / yajñuhī triprakāru /
tapa dāna hana vyāpāru / trividhaci te

paiṃ āhāra lakṣaṇa pahile? / sāṃgoṃ jeṃ mhaṇitaleṃ /
teṃ āīka gā bhaleṃ / rūpa karūṃ

tarī sattvaguṇākaḍe / jeṃ daiveṃ bhoktā paḍe /
taiṃ madhurīṃ rasīṃ vāḍhe / mecu tayā

āṃgeṃci dravyeṃ suraseṃ / je āṃgeṃci padārtha goḍase /
āṃgeṃci sneheṃ bahuvaseṃ / supakveṃ jiyeṃ

ākāreṃ navhatī ḍagaḻeṃ / sparśeṃ ati mavāḻeṃ /
jibhelāgīṃ snehāḻeṃ / svādeṃ jiyeṃ

raseṃ gāḍhīṃ varī ḍhilīṃ / dravabhāvīṃ āthilīṃ /
ṭhāyeṃ ṭhāvo sāṃḍilīṃ / agnitāpeṃ

āṃgeṃ sāneṃ parīṇāmeṃ thoru / jaiseṃ gurumukhīṃceṃ akṣaru /
taiśī alpīṃ jihīṃ apāru / tṛpti rāhe

āṇi mukhīṃ jaisīṃ goḍeṃ / taisīcihi te āṃtulekaḍe /
tiye annīṃ prīti vāḍhe / sāttvikāṃsī

evaṃ guṇalakṣaṇa / sāttvika bhojya jāṇa /
āyuṣyāceṃ trāṇa / nīca naveṃ heṃ

yeṇeṃ sāttvika raseṃ / jaṃva dehīṃ meho varīṣe /
taṃva āyuṣyanadī usase / dihāci dihā

sattvāciye kīra pāḻatī / kāraṇa hāci sumatī /
divasāciye unnatī / bhānu jaisā

āṇi śarīrā hana mānasā / baḻācā paiṃ kuvāsā /
hā āhāru tarī daśā / kaiṃcī rogāṃ

hā sāttviku hoya bhogyu / taiṃ bhogāvayā ārogyu /
śarīrāsī bhāgyu / udayaleṃ jāṇo

āṇi sukhāceṃ gheṇeṃ deṇeṃ / nikeṃ uvāyā ye yeṇeṃ /
heṃ aso vāḍhe sājaṇeṃ / ānaṃdeṃsīṃ

aisā sāttviku āhāru / parīṇamalā thoru /
karī hā upakāru / sabāhyāsī

ātāṃ rājasāsi prītī / jihīṃ rasīṃ āthī /
karūṃ tayāhī vyaktī / prasaṃgeṃ gā

tarī māreṃ uṇeṃ kāḻakuṭa / teṇeṃ māneṃ jeṃ kaḍuvaṭa /
kāṃ cuniyāhūni dāsaṭa / āmla hana

kaṇikīteṃ jaiseṃ pāṇī / taiseṃci mīṭha bāṃdhayā āṇī /
tetulīca meḻavaṇī / rasāṃtarāṃcī

aiseṃ khāraṭa apāḍeṃ / rājasā tayā āvaḍe /
ūnhāceni miṣeṃ toṃḍeṃ / āgīci giḻī

vāvadaḻa pāḍūni ṭhāye / sābaḻu ḍāhāralā āhe /
taiseṃ tīkha to khāye / jeṃ ghāyeviṇa rupe

āṇi rākhehūni koraḍeṃ / āṃta bāherī yeke pāḍeṃ /
to jivhādaṃśu āvaḍe / bahu tayā

paraspareṃ dāṃtāṃ / ādaḻu hoya khātāṃ /
to gā toṃḍīṃ ghetāṃ / toṣoṃ lāge

ādhīṃca dravyeṃ curamurīṃ / varī paravaḍijatī moharī /
jiyeṃ ghetāṃ hotī dhuvārī / nākeṃtoṃḍeṃ

heṃ aso ugeṃ āgīteṃ / mhaṇe taiseṃ rāiteṃ /
paḍhiyeṃ prāṇāparauteṃ / rājasāsi gā

aisā na puroni toṃḍā / jibhā kelā veḍā /
annamiṣeṃ agni bhaḍabhaḍāṃ / poṭīṃ bharī

taisāci lavaṃgā suṃṭhe / maga bhuīṃ gā seje khāṭe /
pāṇiyāceṃ na suṭe / toṃḍoni pātra

te āhāra navhatī ghetale / vyādhivyāḻa je sutale /
te cevavāvayā ghātaleṃ / mājavaṇa poṭīṃ

taiseṃ ekamekāṃ saḻeṃ / roga uṭhatī eke veḻe /
aisā rājasu āhāru phaḻe / kevaḻa duḥkheṃ

evaṃ rājasā āhārā / rūpa keleṃ dhanurdharā /
parīṇāmācāhi visurā / sāṃgitalā

ātāṃ tayā tāmasā / āvaḍe āhāru jaisā /
teṃhī sāṃgoṃ ciḻasā / jhaṇeṃ tumhī

tarī kuhileṃ uṣṭeṃ khātāṃ / na manije teṇeṃ anahitā /
jaiseṃ kāṃ upahitā / mhaisī khāya

nipajaleṃ anna taiseṃ / dupāharīṃ kāṃ yereṃ divaseṃ /
atikareṃ taiṃ tāmaseṃ / gheīje teṃ

nātarī ardha ukaḍileṃ / kāṃ nipaṭa karaponi geleṃ /
taiseṃhī khāya cukaleṃ / rasā jeṃ yevoṃ

jayā kāṃ āthi pūrṇa niṣpattī / jetha rasu dharī vyaktī /
teṃ anna aisī pratītī / tāmasā nāhīṃ

aiseni kahīṃ vipāyeṃ / sadannā varapaḍā hoye /
tarī ghāṇī suṭe taṃva rāhe / vyāghru jaisā

kāṃ bahuveṃ divaśīṃ volāṃḍileṃ / svādapaṇeṃ sāṃḍileṃ /
śuṣka athavā saḍaleṃ / gābhiṇeṃhī ho

teṃhī bāḻāce hātavarī / civaḍileṃ jaisī rāḍī karī /
kā saveṃ baisoni nārī / gotāṃbīla karī

aiseni kaśmaḻeṃ jaiṃ khāya / taiṃ tayā sukhabhojana aiseṃ hoya /
parī yeṇeṃhī na dhāya / pāpiyā to

maga camatkāru dekhā / niṣedhācā āṃbukhā /
jayā kā sadokhā / kudravyāsī

tayā apeyāṃcyā pānīṃ / akhādyāṃcyā bhojanīṃ /
vāḍhavije utānhī / tāmaseṃ teṇeṃ

evaṃ tāmasa jevaṇārā / aisaisī mecu he vīrā /
tayāceṃ phala dusarāṃ / kṣaṇīṃ nāhīṃ

je jevhāṃci heṃ apavitra / śive tayāceṃ vaktra /
tevhāṃci pāpā pātra / jālā to kīṃ

yāvarateṃ jeṃ jevīṃ / te jevitī voja na mhaṇāvī /
poṭabharatī jāṇāvī / yātanā te

śiracchedeṃ kāya hoye / kā āgīṃ righatāṃ kaiseṃ āhe /
heṃ jāṇāveṃ kāī pāheṃ / parī sāhātuci ase

mhaṇauni tāmasā annā / parīṇāmu gā sinānā /
na sāṃgoṃci gā arjunā / devo mhaṇe

ātāṃ yayāvarī / āhārāciyā parī /
yajñuhī avadhārīṃ / tridhā ase

parī tihīṃmājīṃ prathama / sāttvika yajñāceṃ varma /
āīka pāṃ sumahima -/ śiromaṇī

tarī eku priyottamu-/ / vāṃconi vāḍhoṃ nedī kāmu /
jaisā kā manodharmu / pativratecā

nānā siṃdhūteṃ ṭhākoni gaṃgā / puḍhārāṃ na karīci rigā /
kā ātmā dekhoni ugā / vedu ṭhelā

taiseṃ je āpulyā svahitīṃ / veṃcūniyāṃ cittavṛttī /
nuravitīci ahaṃkṛtī / phaḻālāgīṃ

pātaleyā jhāḍāceṃ mūḻa / māguteṃ saroṃ neṇeṃci jaḻa /
jirāleṃ gāṃ kevaḻa / tayācyāci āṃgīṃ

taiseṃ maneṃ dehīṃ / yajananiścayācyā ṭhāyīṃ /
hāraponi jeṃ kāṃhīṃ / vāṃchitīnā

tihīṃ phaḻavāṃcchātyāgīṃ / svadharmāvāṃcūni virāgīṃ /
kīje to yajñu sarvāṃgīṃ / aḻaṃkṛtu

parī ārisā āpaṇapeṃ / ḍoḻāṃ jaiseṃ ghepeṃ /
kāṃ taḻahātīṃceṃ dīpeṃ / ratna pāhije

nānā uditeṃ divākareṃ / gamāvā mārgu diṭhī bhare /
taisā vedu nirdhāreṃ / dekhoniyāṃ

tiyeṃ kuṃḍeṃ maṃḍapa vedī / āṇīkahī saṃbhārasamṛddhī /
te meḻavaṇī jaisī vidhī / āpaṇapāṃ kelī

sakaḻāvayava uciteṃ / leṇīṃ pātalīṃ jaisīṃ āṃgāteṃ /
taise padārtha jethiṃce tetheṃ / viniyogunī

kāya vānūṃ bahutīṃ bolīṃ / jaisī sarvābharaṇīṃ bharalī /
te yajñavidyāci rūpā ālī / yajanamiṣeṃ

taisā sāṃgopāṃgu / niphaje jo yāgu /
nuṭhaūniyāṃ lāgu / mahattvācā

pratipāḻu tarī pāṭācā / jhāḍīṃ kīje tuḻasīcā /
parī phaḻā phulā chāyecā / āśrayo nāhīṃ

kiṃbahunā phaḻāśevīṇa / aiseyā nigutī nirmāṇa /
hoya to yāgu jāṇa / sāttviku gā

ātāṃ yajñu kīra vīreśā / karī paiṃ yācisā /
parī śrāddhālāgīṃ jaisā / avaṃtilā rāvo

jarī rājā gharāsi ye / tarī bahuta upegā jāye /
āṇi kīrtīhī hoye / śrāddha na ṭhake

taisā dharūni āvāṃkā / mhaṇe svargu joḍela asikā /
dīkṣitu hoīna mānyu lokāṃ / ghaḍela yāgu

aisī kevaḻa phaḻālāgīṃ / mahattva phokārāvayā jagīṃ /
pārthā niṣpatti je yāgīṃ / rājasa paiṃ te

āṇi paśupakṣivivāhīṃ / jośī kāmāparautā nāhīṃ /
taisā tāmasā yajñā pāhīṃ / āgrahoci mūḻa

vārayā vāṭa na vāhe / kīṃ maraṇa muhūrta pāhe /
niṣiddhāṃsīṃ bihe / āgī jarī

tarī tāmasāciyā ācārā / vidhīcā āthī voḍhāvārā /
mhaṇūni to dhanurdharā / utsṛṃkhaḻu

nāhīṃ vidhīcī tetha cāḍa / naye maṃtrādika tayākaḍa /
annajātāṃ na suye toṃḍa / māsiye jevīṃ

vairācā bodhu brāhmaṇā / tetha keṃ rigela dakṣiṇā /
agni jālā vāudhāṇā / varapaḍā jaisā

taiseṃ vāyāṃci sarvasva veṃce / mukha na dekhatī śraddheceṃ /
nāgavileṃ niputrikāceṃ / jaiseṃ ghara

aisā jo yajñābhāsu / tayā nāma yāgu tāmasu /
āikeṃ mhaṇe nivāsu / śriyecā to

ātā gaṃgeceṃ eka pāṇī / parī neleṃ ānānīṃ vāhaṇīṃ /
eka maḻīṃ eka āṇī / śuddhatva jaiseṃ

taiseṃ tihīṃ guṇīṃ tapa / yetha jāhaleṃ āhe trirūpa /
teṃ eka keleṃ de pāpa / uddharī eka

tarī teṃci tihīṃ bhedīṃ / kaiseni pāṃ mhaṇauni subuddhī /
jāṇoṃ pāhāsī tarī ādhīṃ / tapaci jāṇa

yetha tapa mhaṇaje kāī / teṃ svarūpa dāūṃ pāhīṃ /
maga bhedileṃ guṇīṃ tihīṃ / teṃ pāṭhīṃ boloṃ

tarī tapa jeṃ kāṃ samyak / teṃhī trividha āika /
śārīra mānasika / śābda gā

ātāṃ gā tihīṃ mājhārīṃ / śārīra taṃva avadhārīṃ /
tarī śaṃbhu kāṃ śrīharī / paḍhiyaṃtā hoya

tayā priyā devatālayā / yātrādikeṃ karāvayā /
āṭhahī pāhāra jaiseṃ pāyāṃ / uḻiga ghāpe

devāṃgaṇamiravaṇiyāṃ / aṃgopacāra puravaṇiyāṃ /
karāvayā mhaṇiyāṃ / śobhatī hāta

liṃga kāṃ pratimā diṭhī / dekhatakheṃvoṃ aṃgeṣṭī /
loṭije kāṃ kāṭhī / paḍalī jaisī

āṇi vidhivinayādikīṃ / guṇīṃ vaḍīla je lokīṃ /
tayā brāhmaṇācī nikī / pāikī kīje

athavā pravāseṃ kāṃ pīḍā / kā śiṇale je sāṃkaḍāṃ /
te jīva suravāḍā / āṇijatī

sakala tīrthāṃciye dhure / jiyeṃ kāṃ mātāpitareṃ /
tayāṃ sevesī kīra śarīreṃ / loṇa kīje

āṇi saṃsārāsā dāruṇu / jo bheṭalāci harī śīṇu /
to jñānadānīṃ sakaruṇu / bhajije guru

āṇi svadharmācā āgiṭhāṃ / deha jāḍyāciyā kiṭā /
āvṛttipuṭīṃ subhaṭā / jhāḍī kīje

vastu bhūtamātrīṃ namije / paropakārīṃ bhajije /
strīviṣayīṃ niyamije / nāṃveṃ nāṃveṃ

janmateni prasaṃge / strīdeha śivaṇeṃ āṃgeṃ /
tethūni janma āghaveṃ / soṃvaḻeṃ kīje

bhutamātrāceni nāṃveṃ / tṛṇahī nāsuḍāveṃ /
kiṃbahunā sāṃḍāve / cheda bheda

aisaisī jaiṃ śarīrīṃ / rahāṭīcī paḍe ujarī /
taiṃ śārīra tapa ghumarī / āleṃ jāṇa

pārthā samastahī heṃ karaṇeṃ / dehāceni pradhānapaṇeṃ /
mhaṇauni yayāteṃ mī mhaṇeṃ / śārīra tapa

evaṃ śārīra jeṃ tapa / tayāceṃ dāvileṃ rūpa /
ātāṃ āika niṣpāpa / vāṅmaya teṃ

tarī lohāceṃ āṃga tuka / na toḍitāṃci kanaka /
keleṃ jaiseṃ dekha / parīseṃ teṇeṃ

taiseṃ na dukhavitāṃ seje / jāvaḻiyā sukha nipaje /
aiseṃ sādhutva kāṃ dekhije / bolaṇāṃ jiye

pāṇī mudala jhāḍā jāye / tṛṇa te prasaṃgeṃci jiyeṃ /
taiseṃ ekā bolileṃ hoye / sarvāṃhi hita

joḍe amṛtācī surasarī / taiṃ prāṇāṃteṃ amara karī /
snāneṃ pāpa tāpa vārī / goḍīhī de

taisā avivekuhī phiṭe / āpuleṃ anāditva bheṭe /
āikatāṃ ruci na viṭe / pīyuṣīṃ jaisī

jarī koṇī karī pusaṇeṃ / tarī hoāveṃ aiseṃ bolaṇeṃ /
nātarī avartaṇeṃ / nigamu kā nāma

ṛgvedādi tinhī / pratiṣṭhījatī vāgbhuvanīṃ /
kelī jaisī vadanīṃ / brahmaśāḻā

nātarī ekādheṃ nāṃva / teṃci śaiva kā vaiṣṇava /
vāce vase teṃ vāgbhava / tapa jāṇāveṃ

ātāṃ tapa jeṃ mānasika / teṃhī sāṃgoṃ āika /
mhaṇe lokanāthanāyaka / nāyaku to

tarī sarovara taraṃgīṃ / sāṃḍileṃ ākāśa meghīṃ /
kā caṃdanāceṃ uragīṃ / udyāna jaiseṃ

nānā kaḻāvaiṣamyeṃ caṃdru / kāṃ sāṃḍilā ādhīṃ nareṃdru /
nātarī kṣīrasamudru / maṃdarācaḻeṃ

taisīṃ nānā vikalpajāḻeṃ / sāṃḍuni geliyā sakaḻeṃ /
mana rāhe kā kevaḻeṃ / svarūpeṃ jeṃ

tapaneṃvīṇa prakāśu / jāḍyeṃvīṇa rasīṃ rasu /
pokaḻīvīṇa avakāśu / hoya jaisā

taisī āpalī soya dekhe / āṇi āpaliyā svabhāvā muke /
hiṃvalī jaisī āṃgikeṃ / hivoṃ nedī nijāṃga

taiseṃ na calateṃ kaḻaṃkeṃvīṇa / śaśibiṃba jaiseṃ parīpūrṇa /
taiseṃ cokhī śṛṃgārapaṇa / manāceṃ jeṃ

bujālī vairāgyācī vorapa / jirālī manācī dhāṃpa kāṃpa /
tetha kevaḻa jālī vāpha / nijabodhācī

mhaṇauni vicārāvayā śāstra / rāhāṭavāveṃ jeṃ vaktra /
teṃ vāceceṃhī sūtra / hātīṃ na dharī

teṃ svalābha lābhalepaṇeṃ / mana manapaṇāhī dharūṃ neṇeṃ /
śivataleṃ jaiseṃ lavaṇeṃ / āpuleṃ nija

tetha keṃ uṭhitī te bhāva / jihīṃ iṃdriyamārgīṃ dhāṃva /
gheūni ṭhākāve gāṃva / viṣayāṃce te

mhaṇauni tiye mānasīṃ / bhāvaśuddhici ase apaisī /
romaśuci jaisī / taḻahātāsī

kāya bahu boloṃ arjunā / jaiṃ he daśā ye manā /
taiṃ manotapābhidhānā / pātra hoya tī

parī te aso heṃ jāṇa / mānasa tapāceṃ lakṣaṇa /
devo mhaṇe saṃpūrṇa / sāṃgitaleṃ

evaṃ dehavācācitteṃ / jeṃ pātaleṃ trividhatvāteṃ /
teṃ sāmānya tapa tūteṃ / parīsavileṃ gā

ātāṃ guṇatrayasaṃgeṃ / heṃci viśeṣīṃ trividhīṃ rige /
teṃhī āika cāṃgeṃ / prajñābaḻeṃ

tarī heṃci tapa trividhā / jeṃ dāvileṃ tuja prabuddhā /
teṃci karīṃ pūrṇaśraddhā / sāṃḍūni phaḻa

jaiṃ puratiyā sattvaśuddhī / ācarije āstikyabuddhī /
taiṃ tayāteṃci gā prabuddhī / sāttvika mhaṇipe

nātarī tapasthāpanelāgīṃ / dujepaṇa māṃḍūni jagīṃ /
mahattvācyā śṛṃgīṃ / baisāvayā

tribhuvanīṃciyā sanmānā / na vacāveṃ ṭhāyā ānā /
dhureciyā āsanā / bhojanālāgīṃ

viśvāciyā stotrā / āpaṇa hoāvayā pātrā /
viśveṃ āpaliyā yātrā / karāviyā yāveṃ

lokāṃciyā vividhā pūjā / āśrayo na dharāvayā dujā /
bhoga bhogāve vojā / mahattvāciyā

aṃga bola mākhūni tapeṃ / vikāvayā āpaṇapeṃ /
aṃgahīna paḍape / jiyāparī

heṃ aso dhanamānīṃ āsa / vāḍhaunī tapa kīje sāyāsa /
taiṃ teṃci tapa rājasa / bolije gā

parī pahuraṇī jeṃ duhileṃ / taiṃ teṃ gurūṃ na dubheci vyāleṃ /
kā ubheṃ śeta cārileṃ / pikāvayā nure

taiseṃ phokāritāṃ tapa / kīje jeṃ sākṣepa /
teṃ phaḻīṃ taṃva sopa / niḥśeṣa jāya

aiseṃ nirphaḻa dekhoni karitāṃ / mājhārīṃ sāṃḍī paṃḍusutā /
mhaṇauni nāhīṃ sthiratā / tapā tayā

eऱhavīṃ tarī ākāśa māṃḍī / jo garjoni brahmāṃḍa phoḍī /
to avakāḻu meghu kāya ghaḍī / rāhāta āhe ?

taiseṃ rājasa tapa jeṃ hoye / teṃ phaḻīṃ kīra vāṃjha jāye /
parī ācaraṇīṃhī nohe / nirvāhateṃ gā

ātāṃ teṃci tapa puḍhatī / tāmasāciye rītī /
paiṃ paratrā āṇi kīrtī / mukoni kīje

kevaḻa mūrkhapaṇācā vārā / jīvīṃ gheūni dhanurdharā /
nāma ṭhevije śarīrā / vairiyāceṃ

paṃcāgnīcī daḍagī / kholavījatī śarīrālāgīṃ /
kā iṃdhana kīje heṃ āgī / āṃtu lāvī

māthāṃ jāḻijatī guguḻu / pāṭhīṃ ghālijatī gaḻu /
āṃga jāḻitī iṃgaḻu / jaḻatabhītāṃ

davaḍoni śvāsocchvāsa / kījatī vāyāṃci upavāsa /
kāṃ ghepatī dhūmāceṃ ghāṃsa / adhomukheṃ

himodakeṃ ākaṃṭheṃ / khaḍakeṃ sevijatī taṭeṃ /
jitayā māṃsāce cimuṭe / toḍitī jetha

aisī nānāparī he kāyā / ghāya sūtāṃ paiṃ dhanaṃjayā /
tapa kīje nāśāvayā / puḍhilāteṃ

āṃgabhāreṃ suṭalā dhoṃḍā / āpaṇa phuṭoni hoya khaṃḍakhaṃḍā /
kāṃ āḍa jāliyāteṃ ragaḍā / karī jaisā

tevīṃ āpaliyā āṭaṇiyā / sukheṃ asatayā prāṇiyā /
jiṇāvayā śirāṇiyā / kījatī gā

kiṃbahunā he vokhaṭī / gheūni kleśācī hātavaṭī /
tapa niphaje teṃ kirīṭī / tāmasa hoya

evaṃ sattvādikāṃcyā āṃgīṃ / pāḍileṃ tapa tihīṃ bhāgīṃ /
jāleṃ teṃhī tuja cāṃgī / dāvileṃ vyaktī

ātāṃ bolatāṃ prasaṃgā / āleṃ mhaṇauni paiṃ gā /
karūṃ rūpa dānaliṃgā / trividhā tayā

yetha guṇāceni boleṃ / dānahī trividha ase jāleṃ /
teṃci āika pahileṃ / sāttvika aiseṃ

tarī svadharmā āṃtauteṃ / jeṃ jeṃ miḻe āpaṇayāteṃ /
teṃ teṃ dīje bahuteṃ / sanmānayogeṃ

jālayā subījaprasaṃgu / paḍe kṣetravāphecā pāṃgu /
taisāci dānācā hā lāgu / dekhataseṃ

anarghya ratna hātāṃ caḍhe / taiṃ bhāṃgārācī voḍhī paḍe /
donī jālīṃ tarī na joḍe / leteṃ āṃga

parī saṇa suhṛda saṃpattī / he tinhī yekīṃ miḻatī /
je bhāgya dharī unnatī / āpulyāviṣayīṃ

taiseṃ niphajāvayā dāna / jaiṃ sattvāsi ye saṃvāhana /
taiṃ deśa kāḻa bhājana / dravyahī miḻe

tarī ādhīṃ taṃva prayatneṃsīṃ / hoāveṃ kurukṣetra kā kāśī /
nātarī tuke jo ihīṃsīṃ / to deśuhī ho

tetha ravicaṃdrarāhumeḻu / hotāṃ pāhe puṇyakāḻu /
kā tayāsārikhā nirmaḻu / ānuhī jālā

taiśā kāḻīṃ tiye deśīṃ / hoāvī pātra saṃpattī aisī /
mūrti āhe dharilī jaisī / śucitveṃci kāṃ

ācārāceṃ mūḻapīḻa / vedāṃcī utārapeṭha /
taiseṃ dvijaratna cokhaṭa / pāvoniyāṃ

maga tayācyā ṭhāīṃ vittā / nivartavāvī svasattā /
parī priyāpuḍheṃ kāṃtā / rige jaisī

kā jayāceṃ ṭhevileṃ tayā / deūni hoīje utarāiyā /
nānā haḍapeṃ viḍā rāyā / didhalā jaisā

taiseni niṣkāmeṃ jīveṃ / bhūmyādika arpāveṃ /
kiṃbahunā hāṃve / nedāveṃ uṭhoṃ

āṇi dāna jayā dyāveṃ / tayāteṃ aiseyā pāhāveṃ /
jayā ghetaleṃ numacave / kāyaseṃnahī

sāda ghātaliyā ākāśā / nedī pratiśabdu jaisā /
kā pāhilā ārasā / yerīkaḍe

nātarī udakāciye bhūmike / āphaḻileni kaṃdukeṃ /
udhaḻauni kavatikeṃ / na yeīje hātā

nānā vaso ghātalā cārū / māthāṃ turaṃbilā burū /
na karī pratyupakārū / jiyāparī

taiseṃ didhaleṃ dātayāceṃ / jo koṇehī āṃgeṃ numace /
arpilayā sāmya tayāceṃ / kīje paiṃ gā

aisiyā jeṃ sāmagriyā / dāna niphaje vīrarāyā /
teṃ sāttvika dānavaryā / sarvāṃhī jāṇa

āṇi toci deśu kāḻu / ghaḍe taisāci pātrameḻu /
dānabhāguhī nirmaḻu / nyāyagatu

parī manīṃ dharūni dubhateṃ / cārije jevīṃ gāīteṃ /
kā peṃva karūni āiteṃ / perūṃ jāije

nānā diṭhī ghāluni āherā / avaṃtuṃ jāije soyirā /
kā vāṇa dhāḍije gharā / vovasīyāce

paiṃ kaḻāṃtara gāṃṭhīṃ bāṃdhije / maga puḍhilāṃceṃ kāja kīje /
pūjā gheūni rasu dīje / pīḍitāṃsī

taiseṃ jayā jeṃ dāna deṇeṃ / to teṇeṃci gā jīvaneṃ /
puḍhatī bhuṃjāvā bhāveṃ yeṇeṃ / dīje jeṃ kā

athavā koṇī vāṭe jātāṃ / ghetaleṃ umacoṃ na śakatā /
miḻe jaiṃ paṃḍusutā / dvijottamu

tarī kavaḍyā ekāsāṭhīṃ / aśeṣāṃ gotrāṃcīṃca kirīṭī /
sarva prāyaścitteṃ suyeṃ muṭhīṃ / tayāciye

tevīṃci pāralaukikeṃ / phaḻeṃ vāṃchijatī anekeṃ /
āṇi dīje tarī bhuke / yekāhī nohe

teṃhī brāhmaṇu nevo sare / kīṃ hāṇiceni śiṇeṃ jhāṃsureṃ /
sarvasva jaiseṃ coreṃ / nāgaūni neleṃ

bahu kāya sāṃgoṃ sumatī / jeṃ dīje yā manovṛttī /
teṃ dāna gā trijagatīṃ / rājasa paiṃ

maga mleṃcchāṃce vasauṭeṃ / dāṃgāṇe hana kaikaṭe /
kā śibireṃ cohaṭe / nagarīṃce te

tehī ṭhāīṃ miḻaṇī / samayo sāṃjaveḻu kāṃ rajanī /
tevhāṃ udāra hoṇeṃ dhanīṃ / coriyecyā

pātreṃ bhāṭa nāgārī / sāmānya striyā kā juvārī /
jiye mūrtimaṃte bhurarīṃ / bhule tayā

rūpānṛtyācī puravaṇī / te puḍhāṃ ḍoḻebhāraṇī /
gīta bhāṭīva to śravaṇīṃ / karṇajapu

tayāhīvarī aḻumāḻu / jaiṃ ghe phulāgaṃdhācā guguḻu /
taṃva bhramācā to vetāḻu / avatare taisā

tetha vibhāṃḍūniyāṃ jaga / āṇile padārtha anega /
teṇeṃ ghālūṃ lāge mātaṃga / gavādī jaisī

evaṃ aiseni jeṃ deṇeṃ / teṃ tāmasa dāna mī mhaṇeṃ /
āṇi ghaḍe daivaguṇeṃ / āṇikahī aika

vipāyeṃ ghuṇākṣara paḍe / ṭāḻiye kāuḻā sāṃpaḍe /
taise tāmasāṃ parva joḍe / puṇyadeśīṃ

tetha dekhoni to āthilā / yogyu māgoṃhī ālā /
tohī darpā caḍhalā / bhāṃbāveṃ jarī

tarī śraddhā na dharī jivīṃ / tayā māthāhī na khālavī /
svayeṃ na karī nā karavī / arghyādika

āliyā na ghalī baisoṃ / tetha gaṃdhākṣatāṃcā kāya atiso /
hā aprasaṃgu kīra aso / tāmasīṃ narīṃ

paiṃ boḻavije riṇāitu / taisā jhakavī tayācā hātu /
tūṃ karaṇeṃ yācā bahutu / prayogu tetha

āṇi jayā jeṃ de kirīṭī / tayāteṃ umāṇī tayāsāṭhīṃ /
maga kuboleṃ kāṃ loṭī / avajñecyā

heṃ bahu aso yāparī / mola veṃcaṇeṃ jeṃ avadhārīṃ /
tayā nāṃva carācarīṃ / tāmasa dāna

aiśīṃ āpulālā cinhīṃ / aḻaṃkṛteṃ tinhīṃ /
dāneṃ dāvilīṃ abhidhānīṃ / rajatamāciyā

tetha mī jāṇata aseṃ / vipāyeṃ tūṃ gā aiseṃ /
kalpisīla mānaseṃ / vicakṣaṇā

jeṃ bhavabaṃdhamocaka / yekaleṃ karma sāttvika /
tarī kāṃ vekhāsī sadokha / yera bolāvīṃ ?

parī nosaṃtitāṃ vivasī / bheṭī nāhīṃ nidhīsī /
kā dhūṃ na sāhatāṃ jaisī / vātī na lage

taiseṃ śuddhasattvāāḍa / āhe rajatamāceṃ kavāḍa /
teṃ bhedaṇe yāteṃ kīḍa / mhaṇāveṃ kāṃ ?

āmhī śraddhādi dānāṃta / jeṃ samastahī kriyājāta /
sāṃgitaleṃ kāṃ vyāpta / tihīṃ guṇīṃ

tetha bharaṃvaseni tinhī / na sāṃgoṃci aiseṃ mānīṃ /
parī sattva dāvāvayā donhī / boliloṃ yereṃ

jeṃ dohīṃmājīṃ tijeṃ ase / teṃ donhī sāṃḍitāṃci dise /
ahorātratyāgeṃ jaiseṃ / saṃdhyārūpa

taiseṃ rajatamavināśeṃ / tijeṃ jeṃ uttama dise /
teṃ sattva heṃ āpaiseṃ / phāvāsi ye

evaṃ dākhavāvayā sattva tuja / nirūpileṃ tama raja /
teṃ sāṃḍūni sattveṃ kāja / sādhīṃ āpuleṃ

sattveṃci yeṇeṃ cokhāḻeṃ / karīṃ yajñādikeṃ sakaḻeṃ /
pāvasī taiṃ karataḻeṃ / āpuleṃ nija

sūryeṃ dāvileṃ sāṃteṃ / kāya eka na dise tetheṃ /
tevīṃ sattveṃ keleṃ phaḻāteṃ / kāya nedī ?

he kīra āvaḍatāṃvikhīṃ / śakti sattvīṃ āthī nikī /
parī mokṣeṃsī ekīṃ / misaḻaṇeṃ jeṃ

teṃ eka ānaci āhe / tayācā sāvāvo jaiṃ lāhe /
taiṃ mokṣācāhī hoye / gāṃvīṃ sarateṃ

paiṃ bhāṃgāra jaऱhīṃ paṃdhareṃ / taऱhī rājāvaḻīṃcīṃ akṣareṃ /
lāheṃ taiṃci sare / jiyāparī

svaccheṃ śītaḻeṃ sugaṃdheṃ / jaḻeṃ hotī sukhapradeṃ /
parī pavitratva saṃbaṃdheṃ / tīrthāceni

nayī ho kāṃ bhalataisī thorī / parī gaṃgā jaiṃ aṃgīkārī /
taiṃci tiye sāgarīṃ / praveśu gā

taiseṃ sāttvikā karmāṃ kirīṭī / yetāṃ mokṣāciye bheṭī /
na paḍe āḍakāṭhī / teṃ vegaḻeṃ āhe

hā bolu āikatakhevīṃ / arjunā ādhi na māye jīvīṃ /
mhaṇe deveṃ kṛpā karāvī / sāṃgāveṃ teṃ

tetha kṛpāḻucakravartī / mhaṇe āīka tayācī vyaktī /
jeṇeṃ sāttvika teṃ muktī- / ratna dekhe

tarī anādi parabrahma / jeṃ jagadādi viśrāmadhāma /
tayāceṃ eka nāma / tridhā paiṃ ase

teṃ kīra anāma ajātī / parī avidyāvargāciye rātī-/ /
mājī voḻakhāvayā śrutī / khūṇa kelī

upajaliyā bāḻakāsī / nāṃva nāhīṃ tayāpāsīṃ /
ṭhevileni nāṃveṃsī / o deta uṭhī

kaṣṭale saṃsāraśīṇeṃ / je devoṃ yetī gāऱhāṇeṃ /
tayāṃ o de nāṃveṃ jeṇeṃ / to saṃketu hā

brahmācā abolā phiṭāvā / advaitatattveṃ to bheṭāvā /
aisā maṃtru dekhilā kaṇavā / vedeṃ bāpeṃ

maga dāvileni jeṇeṃ ekeṃ / brahma āḻavileṃ kavatikeṃ /
māgāṃ asata ṭhāke / puḍhāṃ ubheṃ

parī nigamācaḻaśikharīṃ / upaniṣadārthanagarīṃ /
āhāti je brahmācyā yekāhārīṃ / tayāṃsīca kaḻe

heṃhī aso prajāpatī / śakti je sṛṣṭi karitī /
te jayā ekā āvṛttī / nāmāciye

paiṃ sṛṣṭīciyā upakramā-/ pūrvīṃ gā vīrottamā /
veḍā aisā brahmā / ekalā hotā

maja īśvarāteṃ noḻakhe / nā sṛṣṭihī karūṃ na śake /
to thoru kelā ekeṃ / nāmeṃ jeṇeṃ

jayācā arthu jīvīṃ dhyātāṃ / jeṃ varṇatrayaci japatāṃ /
viśvasṛjanayogyatā / ālī tayā

tedhavāṃ racileṃ brahmajana / tayāṃ veda didhaleṃ śāsana /
yajñā aiseṃ vartana / jīvikeṃ keleṃ

pāṭhīṃ neṇoṃ kitī yera / srajile loka apāra /
jāle brahmadatta agrahāra / tinhīṃ bhuvaneṃ

aiseṃ nāmamaṃtreṃ jeṇeṃ / dhātayā aḍhaṃca karaṇeṃ /
tayāceṃ svarūpa āika mhaṇe / śrīkāṃtu to

tarī sarva maṃtrāṃcā rājā / to praṇavo ādivarṇu bujhā /
āṇi tatkāru jo dujā / tijā satkāru

evaṃ ॐtatsadākāru / brahmanāma heṃ triprakāru /
heṃ phūla turaṃbī suṃdaru / upaniṣadāceṃ

yeṇeṃsīṃ gā hoūni eka / jaiṃ karma cāle sāttvika /
taiṃ kaivalyāteṃ pāika / gharīṃceṃ karī

parī kāpurāceṃ thaḻīṃva / āṇūna deīla daiva /
levoṃ jāṇaṇeṃci āḍava / tetha ase bāpā

taiseṃ ādarijela satkarma / uccarijela brahmanāma /
parī neṇijela jarī varma / viniyogāceṃ

tarī mahaṃtāciyā koḍī / gharā āliyāhī voḍhī /
mānūṃ neṇatāṃ paravaḍī / muddala tuṭe

kāṃ lyāvayā cokhaṭa / ṭīka bhāṃgāra ekavaṭa /
ghālūni bāṃdhilī moṭa / gaḻā jevīṃ

taiseṃ toṃḍīṃ brahmanāma / hātīṃ teṃ sāttvika karma /
viniyogeṃvīṇa kāma / viphaḻa hoya

agā anna āṇi bhūka / pāsīṃ ase parī dekha /
jeūṃ neṇatāṃ bālaka / laṃghanaci kīṃ

kā snehasūtra vaiśvānarā / jāliyāhī saṃsārā /
hātavaṭī neṇatāṃ vīrā / prakāśu nohe

taise veḻe kṛtya pāve / tethiṃcā maṃtruhī āṭhave /
parī vyartha teṃ āghaveṃ / viniyogeṃvīṇa

mhaṇauni varṇatrayātmaka / je heṃ parabrahmanāma eka /
viniyogu tūṃ āika / ātāṃ yācā

tarī yā nāmīṃcīṃ akṣareṃ tinhīṃ / karmā ādimadhyanidānīṃ /
prayojāvīṃ paiṃ sthānīṃ / ihīṃ tinhīṃ

heṃci ekī hātavaṭī / gheuni hana kirīṭī /
āle brahmavida bheṭī / brahmāciye

brahmeṃsīṃ hoāvayā ekī / te na vaṃcatī yajñādikīṃ /
je cāvaḻaleṃ voḻakhīṃ / śāstrāṃciyā

to ādi taṃva oṃkāru / dhyāneṃ karitī gocaru /
pāṭhīṃ āṇitī uccāru / vācehī to

teṇeṃ dhyāneṃ prakaṭeṃ / praṇavoccāreṃ spaṣṭeṃ /
lāgatī maga vāṭe / kriyāṃciye

āṃdhārīṃ abhaṃgu divā / āḍavīṃ samarthu boḻāvā /
taisā praṇavo jāṇāvā / karmāraṃbhīṃ

ucitadevoddeśe / dravyeṃ dharmyeṃ āṇi bahuvaseṃ /
dvijadvārāṃ hana hutāśeṃ / yajitī paiṃ te

āhavanīyādi vanhī / nikṣeparūpīṃ havanīṃ /
yajitī paiṃ vidhānīṃ / phuḍe haunī

kiṃbahunā nānā yāga / niṣpattīce gheuni aṃga /
karitī nāvaḍateyā tyāga / upādhīcā

kāṃ nyāyeṃ joḍalā pavitrīṃ / bhūmyādikīṃ svataṃtrīṃ /
deśakāḻaśuddha pātrīṃ / detī dāneṃ

athavā ekāṃtarāṃ kṛcchrīṃ / cāṃdrāyaṇeṃ māsopavāsīṃ /
śoṣoni gā dhāturāśī / karitī tapeṃ

evaṃ yajñadānatapeṃ / jiyeṃ gājatī baṃdharūpeṃ /
tihīṃca hoya sopeṃ / mokṣāceṃ tayāṃ

sthaḻīṃ nāvā jiyā dāṭije / jaḻīṃ tiyāṃci jevīṃ tarīje /
tevīṃ baṃdhakīṃ karmīṃ suṭije / nāmeṃ yeṇeṃ

parī heṃ aso aisiyā / yā yajñadānādi kriyā /
oṃkāreṃ sāvāyiliyā / pravartatī

tiyā moṭakiyā jetha phaḻīṃ / rigoṃ pāhātī nihāḻīṃ /
prayojitī tiye kāḻīṃ / tacchabdu to

jeṃ sarvāṃhī jagāparauteṃ / jeṃ eka sarvahī dekhateṃ /
teṃ tacchabdeṃ bolije teṃ / paila vastu

teṃ sarvādikatveṃ cittīṃ / tadrūpa dhyāvūniyāṃ sumatī /
uccāreṃhī vyaktī / āṇitī puḍhatī

mhaṇatī tadrūpā brahmā tayā / phaḻeṃsīṃ kriyā iyāṃ /
teṃci hotu āmhāṃ bhogāvayā / kāṃhīṃci nuro

aiseni tadātmakeṃ brahmeṃ / tetha ugāṇūni karmeṃ /
āṃga jhāḍitī na mameṃ / yeṇeṃ boleṃ

ātāṃ oṃkāreṃ ādarileṃ / tatkāreṃ samarpileṃ /
iyā ritī jayā āleṃ / brahmatva karmā

teṃ karma kīra brahmākāreṃ / jāleṃ teṇeṃhī na sare /
je karī teṇeṃsī dusareṃ / āhe mhaṇauni

mīṭha āṃgeṃ jaḻīṃ vire / parī kṣāratā vegaḻī ure /
taiseṃ karma brahmākāreṃ / game teṃ dvaita

āṇi duje jaṃva jaṃva ghaḍe / taṃva taṃva saṃsārabhaya joḍe /
heṃ devo āpuleni toṃḍeṃ / bolatī veda

mhaṇauni paratveṃ brahma ase / teṃ ātmatveṃ parīyavase /
sacchabda yā riṇādoṣeṃ / ṭhevilā deveṃ

tarī oṃkāra tatkārīṃ / karma keleṃ jeṃ brahmaśarīrīṃ /
jeṃ praśastādi bolavarī / vākhāṇileṃ

praśastakarmīṃ tiye / sacchabdā viniyogu āhe /
toci āikā hoye / taisā sāṃgoṃ

tarī sacchabdeṃ yeṇeṃ / āṭūni asatāceṃ nāṇeṃ /
dāvije avyaṃgavāṇeṃ / satteceṃ rūpa

jeṃ sat teṃci kāḻeṃ deśeṃ / hoūṃ neṇeci anārise /
āpaṇapāṃ āpaṇa ase / akhaṃḍita

heṃ disateṃ jetuleṃ āhe / teṃ asatapaṇeṃ jeṃ nohe /
dekhatāṃ rūpīṃ soye / lābhe jayācī

teṇeṃsīṃ praśasta teṃ karma / jeṃ jāleṃ sarvātmaka brahma /
dekhije karūni sama / aikyabodheṃ

tarī oṃkāra tatkāreṃ / jeṃ karma dāvileṃ brahmākāreṃ /
teṃ giḻūni hoīje ekasareṃ / sanmātraci

aisā hā aṃtaraṃgu / sacchabdācā viniyogu /
jāṇā mhaṇe śrīraṃgu / mī nā mhaṇeṃ ho

nā mīci jarī ho mhaṇeṃ / tarī śrīraṃgīṃ dujeṃ heṃci uṇeṃ /
mhaṇauni heṃ bolaṇeṃ / devāceṃci

ātāṃ āṇikīhī parī / sacchabdu hā avadhārīṃ /
sāttvika karmā karī / upakāru jo

tarī satkarmeṃ cāṃgeṃ / cālilīṃ adhikārabageṃ /
parī ekādheṃ kāṃ āṃgeṃ / hiṇāvatī jaiṃ

taiṃ uṇeṃ ekeṃ avayaveṃ / śarīra ṭhāke āghaveṃ /
kāṃ aṃgahīna bhāṃḍāveṃ / rathācī gatī

taiseṃ ekeṃci guṇeṃvīṇa / sataci parī asatapaṇa /
karma dharī gā jāṇa / jiye veḻe

tevhāṃ oṃkāra tatkārīṃ / sāvāyilā hā cāṃgī parī /
sacchabdu karmā karī / jīrṇoddhāru

teṃ asatapaṇa pheḍī / āṇī sadbhāvāciye rūḍhī /
nijasattvāciye prauḍhī / sacchabdu hā

divyauṣadha jaiseṃ rogiyā / kāṃ sāvāvo ye bhaṃgaliyā /
sacchabdu karmā vyaṃgaliyā / taisā jāṇa

athavā kāṃhīṃ pramādeṃ / karma āpuliye maryāde /
cukoni paḍe niṣiddhe / vāṭe hana

cālatayāhī mārgu sāṃḍe / pārakhiyāci akhareṃ paḍe /
rāhāṭīmājīṃ na ghaḍe / kāi kāi ?

mhaṇauni taisī karmā / rābhasyeṃ sāṃḍe sīmā /
asādhutvāciyā durnāmā / yevoṃ pāhe jeṃ

tetha gā hā sacchabdu / yerāṃ dohīṃparīsa prabuddhu /
prayojilā karī sādhu / karmāteṃ yayā

lohā parīsācī ghṛṣṭī / vohaḻā gaṃgecī bheṭī /
kāṃ mṛtā jaisī vṛṣṭī / pīyūṣācī

paiṃ asādhukarmā taisā / sacchabduprayogu vīreśā /
heṃ aso gauravuci aisā / nāmācā yayā

gheūni yethiṃceṃ varma / jaiṃ vicārisī heṃ nāma /
taiṃ kevaḻa heṃci brahma / jāṇasī tūṃ

pāheṃ pāṃ ॐtatsat aiseṃ / heṃ bolaṇeṃ tetha netase /
jethūni kāṃ heṃ prakāśe / dṛśyajāta

teṃ taṃva nirviśiṣṭa / parabrahma cokhaṭa /
tayāceṃ heṃ āṃtuvaṭa / vyaṃjaka nāma

parī āśrayo ākāśā / ākāśaci kā jaisā /
yā nāmānāmī āśrayo taisā / abhedu ase

udayilā ākāśīṃ / ravīci ravīteṃ prakāśī /
he nāmavyaktī taisī / brahmaci karī

mhaṇauni tryakṣara heṃ nāma / navhe jāṇa kevaḻa brahma /
yayālāgīṃ karma / jeṃ jeṃ kīje

teṃ yāga athavā dāneṃ / tapādikeṃhī gahaneṃ /
tiyeṃ niphajatu kāṃ nyūneṃ / hoūni ṭhātu

parī parīsācā varakalī / nāhīṃ cokhākiḍācī bolī /
taisī brahmīṃ arpitāṃ kelīṃ / brahmaci hotī

uṇiyā puriyācī parī / nureci tetha avadhārīṃ /
nivaḍūṃ na yetī sāgarīṃ / jaisiyā nadī

evaṃ pārthā tujapratī / brahmanāmācī he śaktī /
sāṃgitalī upapattī / ḍoḻasā gā

āṇi yekekāhī akṣarā / vegaḻavegaḻā vīrā /
viniyogu nāgarā / boliloṃ rītī

evaṃ aiseṃ sumahima / mhaṇauni heṃ brahmanāma /
ātāṃ jāṇitaleṃ kīṃ suvarma / rāyā tuvāṃ ?

tarī yethūni yāci śraddhā / upalavilī ho sarvadā /
jayāceṃ jāleṃ baṃdhā / uroṃ nedī

jiye karmīṃ hā prayogu / anuṣṭhije sadviniyogu /
tetha anuṣṭhilā sāṃgu / veduci to

nā sāṃḍūni he soye / moḍūni śraddhecī bāhe /
durāgrahācī trāye / vāḍhaūniyāṃ

maga aśvamedha koḍī kīje / ratneṃ bharoni pṛthvī dīje /
ekāṃguṣṭhīṃhī tapije / tapasāhasrīṃ

jaḻāśayāceni nāṃveṃ / samudrahī kījatī nave /
parī kiṃbahunā āghaveṃ / vṛthāci teṃ

khaḍakāvarī varṣale / jaiseṃ bhasmīṃ havana keleṃ /
kāṃ kheṃva didhaleṃ / sāuliye

nātarī jaiseṃ caḍakaṇā / gaganā hāṇitaleṃ arjunā /
taisā samāraṃbhu sunā / gelāci to

ghāṇāṃ gāḻile guṃḍe / tetha tela nā peṃḍī joḍe /
taiseṃ daridra tevaḍheṃ / ṭheleṃci āṃgīṃ

gāṃṭhīṃ bāṃdhalī khāparī / yetha athavā pailatīrīṃ /
na saroni jaisī mārī / upavāsīṃ gā

taiseṃ karmajāteṃ teṇeṃ / nāhīṃ aihikīceṃ bhogaṇeṃ /
tetha paratra teṃ kavaṇeṃ / apekṣāveṃ

mhaṇauni brahmanāmaśraddhā / sāṃḍūni kīje jo dhāṃdā /
heṃ aso siṇu nusadhā / dṛṣṭādṛṣṭīṃ to

aiseṃ kaluṣakarikesarī / tritāpatimiratamārī /
śrīvara vīra naraharī / bolileṃ teṇeṃ

tetha nijānaṃdā bahuvasā-// mājīṃ arjuna to sahasā /
harapalā caṃdru jaisā / cāṃdiṇeni

aho saṃgrāmu hā vāṇiyā / māpeṃ nārācāṃciyā āṇiyā /
sūni māpa ghe mavaṇiyā / jīviteṃsī

aisiyā samayīṃ karkaśeṃ / bhogījata svānaṃdarājya kaiseṃ /
āji bhāgyodayo hā nase / ānī ṭhāīṃ

saṃjayo mhaṇe kauravarāyā / guṇā rijhoṃ ye ripūciyā /
āṇi guruhī hā āmuciyā / sukhācā yetha

hā na pusatā he goṭhī / tarī devo kāṃ soḍite gāṃṭhī /
tarī kaiseṃni āmhāṃ bheṭī / paramārtheṃsīṃ

hotoṃ ajñānācyā āṃdhārāṃ / vosaṃtīta janmavāharā /
toṃ ātmaprakāśamaṃdirā-// āṃtu āṇileṃ

evaḍhā āmhāṃ tumhāṃ thoru / kelā yeṇeṃ upakāru /
mhaṇauni hā vyāsasahodaru / gurutveṃ hoya

tevīṃci saṃjayo mhaṇe cittīṃ / hā atiśayo yā nṛpatī /
khupela mhaṇauni kitī / bolata asoṃ

aisī he bolī sāṃḍilī / maga yerīci goṭhī ādarilī /
je pārtheṃ kāṃ pusilī / śrīkṛṣṇāteṃ

yāceṃ jaiseṃ kāṃ karaṇeṃ / taiseṃ mīhī karīna bolaṇeṃ /
aikijo jñānadevo mhaṇe / nivṛttīcā

vāpheciyā sige / vātīhī lāvilyā lāge /
taiseṃ unha māge / rājasu to