Jnaneshwari · Chapter 18

// ॐ śrī paramātmane namaḥ //
// atha śrīmadbhagavadgītā //
/ aśṭādaśo'dhyāyaḥ - adhyāya aṭharāvā / /
/ mokṣasaṃjñāsayogaḥ /
jayajaya deva nirmaḻa / nijajanākhilamaṃgaḻa /
janmajarājaladajāḻa / prabhaṃjana

jayajaya deva prabaḻa / vidaḻitāmaṃgaḻakuḻa /
nigamāgamadrumaphaḻa / phalaprada

jayajaya deva sakala / vigataviṣayavatsala /
kalitakāḻakautūhala / kalātīta

jayajaya deva niścaḻa / calitacittapānatuṃdila /
jagadunmīlanāvirala / kelipriya

jayajaya deva niṣkaḻa / sphuradamaṃdānaṃdabahaḻa /
nityanirastākhilamaḻa / mūḻabhūta

jayajaya deva svaprabha / jagadaṃbudagarbhanabha /
bhuvanodbhavāraṃbhastaṃbha / bhavadhvaṃsa

jayajaya deva viśuddha / vidudayodyānadvirada /
śamadama\-madanamadabheda / dayārṇava

jayajaya devaikarūpa / atikṛtakaṃdarpasarpadarpa /
bhaktabhāvabhuvanadīpa / tāpāpaha

jayajaya deva advitīya / parīṇatoparamaikapriya /
nijajanajita bhajanīya / māyāgamya

jayajaya deva śrīguro / akalpanākhyakalpataro /
svasaṃvidrumabījapraro / haṇāvanī

he kāya ekaika aisaiseṃ / nānāparībhāṣāvaśeṃ /
stotra karūṃ tujoddeśeṃ / nirviśeṣā

jihīṃṃ viśeṣaṇīṃ viśeṣije / teṃ dṛśya navhe rūpa tujheṃ /
heṃ jāṇeṃ mī mhaṇauni lājeṃ / vānaṇā ihīṃ

parī maryādecā sāgaru / hā taṃvaci tayā ḍagaru /
jaṃva na dekhe sudhākaru / udayā ālā

somakāṃtu nijanirjharīṃṃ / caṃdrā arghyādika na karī /
teṃ toci avadhārīṃ / karavī kīṃ jī

neṇoṃ kaisī vasaṃtasaṃgeṃ / avacitiyā vṛkṣācīṃ aṃgeṃ /
phuṭatī taiṃ he tayāṃhi jogeṃ / dharaṇeṃ nohe ?

padminī ravikiraṇa / lāhe maga lājeṃ kavaṇa ? /
kāṃ jaḻeṃ śivataleṃ lavaṇa / āṃga bhule

taisā tūteṃ jetha mī smareṃ / tetha mīpaṇa mī visareṃ /
maga jākaḻilā ḍheṃkareṃ / tṛptu jaisā

maja tuvāṃ jī keleṃ taiseṃ / mājheṃ mīpaṇa davaḍūni deśeṃ /
stutimiṣeṃca pāṃ piseṃ / bāṃdhaleṃ vāce

nā yeऱhavīṃṃ tarī āṭhavīṃ / rāhoni stuti jaiṃ karāvī /
taiṃ guṇāguṇiyā dharāvī / sarobharī kīṃṃṃ

tarī tūṃ jī ekarasāceṃ liṃga / kevīṃ karūṃ guṇāguṇīṃ vibhāga /
motīṃ phoḍoni sāṃdhitāṃ cāṃga / kīṃ taiseṃci bhaleṃ

āṇi bāpa tūṃ māya / ihīṃ bolīṃ nā stuti hoya /
ḍiṃbhopādhika āhe / viṭāḻu tetheṃ

jī jāleni pāikeṃ āleṃ / teṃ gosāvīpaṇa kevīṃ boleṃ ? /
aiseṃ upādhī uśiṭaleṃ / kāya varṇūṃ

jarī ātmā tūṃ ekasarā / heṃhī mhaṇatāṃ dātārā /
tarī āṃtula tūṃ bāherā / ghāpatāsī

mhaṇauni satyaci tujalāgīṃṃ / stuti na dekhoṃ jī jagīṃ /
maunāvāṃcūni leṇeṃ āṃgīṃ / susīnā mā

stuti kāṃhīṃ na bolaṇeṃ / pūjā kāṃhīṃṃ na karaṇeṃ /
sannidhī kāṃhīṃṃṃ na hoṇeṃ / tujhyā ṭhāyīṃ

tarī jiṃtaleṃ jaiseṃ bhulī / piseṃ ālāpu ghālī /
taiseṃ vānūṃ teṃ māūlī / upasāhāveṃ tuvāṃ

ātāṃ gītārthācī muktamudī / lāvīṃ mājhiye vāgvṛddhī /
je māne he sabhāsadīṃ / sajjanāṃcyā

tetha mhaṇitaleṃ śrīnivṛttī / nako heṃ puḍhatapuḍhatī /
parīsīṃ lohā ghṛṣṭī kitī / veḻaveḻāṃ kīje gā /

taṃva vinavī jñānadevo / mhaṇe ho kāṃ jī pasāvo /
tarī avadhāna detu devo / graṃthā ātāṃ

jī gītāratnaprāsādācā / kaḻasu arthaciṃtāmaṇīcā /
sarva gītādarśanācā / pāḍhāūṃ jo

lokīṃ tarī āthī aiseṃ / je durūni kaḻasu dise /
āṇī bheṭīci hātavase / devatecī tiye

taiseṃci ethahī āhe / je ekeci yeṇeṃ adhyāyeṃ /
āghavāci dṛṣṭa hoye / gītāgamu hā

mī kaḻasu yāci kāraṇeṃ / aṭharāvā adhyāyo mhaṇeṃ /
uvāilā bādarāyaṇeṃ / gītāprāsādā

nohe kaḻasāparateṃ kāṃhīṃ / prāsādīṃ kāma nāhīṃ /
teṃ sāṃgatase gītā hī / saṃpalepaṇeṃ

vyāsu sahajeṃ sūtrī baḻī / teṇeṃ nigamaratnācaḻīṃ /
upaniṣadārthācī māḻī\- / mājīṃ khāṃḍilī

tetha trivargācā aṇuāru / āḍaū nighālā jo apāru /
to mahābhārataprākāru / bhoṃvatā kelā

mājīṃ ātmajñānāceṃ ekavaṭa / daḻavāḍeṃ jhāḍūni cokhaṭa /
ghaḍileṃ pārthavaikuṃṭha\- / saṃvāda kusarī

nivṛttisūtra soḍavaṇiyā / sarva śāstrārtha puravaṇiyā /
āvo sādhilā māṃḍaṇiyā / mokṣarekhecā

aiseni karitāṃ ubhārā / paṃdharā adhyāyāṃta paṃdharā /
bhūmi nirvāḻaliyā purā / prāsādu jāhalā

uparī soḻāvā adhyāyo / to grīvaghaṃṭecā āvo /
saptadaśu toci ṭhāvo / paḍaghāṇiye

tayāhīvarī aṣṭādaśu / to apaisā māṃḍalā kaḻasu /
upari gītādikīṃ vyāsu / dhvajeṃ lāgalā

mhaṇauni māgīla je adhyāye / te caḍhate bhūmīce āye /
tayāṃceṃ pureṃ dāvitāhe / āpulyā āṃgīṃ

jālayā kāmā nāhīṃ corī / te kaḻaseṃ hoya ujarī /
tevīṃṃ aṣṭādaśu vivarī / sādyaṃta gītā

aisā vyāseṃ viṃdāṇiyeṃ / gītāprāsādu soḍavaṇiye /
āṇūni rākhile prāṇiye / nānāparī

eka pradakṣiṇā japāciyā / bāheroni karitī yayā /
eka te śravaṇamiṣeṃ chāyā / sevitī yayācī

eka te avadhānācā purā / viḍāpāūḍa bhītarāṃ /
gheūni righatī gābhārāṃ / arthajñānācyā

te nijabodheṃ urāurī / bheṭatī ātmayā śrīharī /
parī mokṣaprāsādīṃ sarī / sarvāṃhī āthī

samarthāciye paṃktibhojaneṃ / taḻilyā varīlyā ekaci pakvānneṃ /
tevīṃ śravaṇeṃ artheṃ paṭhaṇeṃ / mokṣuci lābhe

aisā gītā vaiṣṇavaprāsādu / aṭharāvā adhyāya kaḻasu viśadu /
myāṃ mhaṇitalā hā bhedu / jāṇoniyāṃ

ātāṃ saptadaśāpāṭhīṃ / adhyāya kaiseni uṭhī /
to saṃbaṃdhu sāṃgo diṭhī / dise taisā

kā gaṃgāyamunā udaka / voghabageṃ vegaḻika /
dāvī hoūni eka / pāṇīpaṇeṃ

na moḍitāṃ donhī ākāra / ghaḍileṃ eka śarīra /
heṃ ardhanārī naṭeśvara\- / rūpīṃ diseṃ

nānā vāḍhilī divaseṃ / kaḻā biṃbīṃ paise /
parī sināneṃ leve jaiseṃ / caṃdrīṃ nāhīṃ

taisīṃṃ sinānīṃ cārīṃ padeṃ / śloka to ślokāvacchedeṃ /
adhyāvo adhyāyabhedeṃ / game kīra

parī prameyācī ujarī / ānāna rūpa na dharī /
nānā ratnamaṇīṃ dorī / ekaci jaisī

motiyeṃ miḻoni bahuveṃ / ekāvaḻīcā pāḍu āhe /
parī śobhe rūpa hoye / ekaci tetha

phulāṃphulasarāṃ lekha caḍhe / drutīṃ dujī aṃguḻī na paḍe /
śloka adhyāya teṇeṃ pāḍeṃ / jāṇāve he

sāta śateṃ śloka / adhyāyāṃ aṭharāṃce lekha /
parī devo bolile eka / jeṃ dujeṃ nāhīṃ

āṇi myāṃhī na sāṃḍūni te soye / graṃtha vyakti kelī āhe /
prastuta teṇeṃ nirvāhe / nirūpaṇa āikā

tarī satarāvā adhyāvo / pāvatāṃ puratā ṭhāvo /
jeṃ saṃpatāṃ ślokīṃ devo / bolile aiseṃ

arjunā brahmanāmācyāvikhīṃ/ buddhi sāṃḍūni āstikīṃ /
karme kījatī titukīṃṃṃṃ / asaṃteṃ hotīṃ

hā aikoni devācā bolu / arjunā ālā ḍolu /
mhaṇe karmaniṣṭhāṃ maḻu / ṭhevilā dekhoṃ

to ajñānāṃdhu taṃva bāpuḍā / īśvaruci na dekhe evaḍhā /
tetha nāmaci eka puḍhāṃ / kāṃ sujhe tayā

āṇi rajatameṃ donhīṃ / geliyāvīṇa śraddhā sānī /
te kāṃ lāge abhidhānīṃ / brahmāciye ? /

maga kotā kheṃva deṇeṃ / vārtevarīla dhāvaṇeṃ /
sāṃḍī paḍe kheḻaṇeṃ / nāgiṇīceṃ teṃ

taisīṃ karmeṃ duvāḍeṃ / tayāṃ janmāṃtarācī kaḍe /
durmeḻāve yevaḍhe / karmāmājīṃ

nā vipāyeṃ heṃ ujū hoye / tarī jñānācī yogyatā lāhe /
yeऱhavīṃ yeṇeṃci jāye / nirayālayā

karmīṃ hā ṭhāyavarī / āhātī bahuvā avasarī /
ātāṃ karmaṭhāṃ kaiṃ vārī / mokṣācī he

tarī phiṭo karmācā pāṃgu / kījo avaghāci tyāgu /
ādarijo avyaṃgu / saṃnyāsu hā

karmabādhecī kahīṃ / jetha bhayācī goṭhī nāhīṃ /
teṃ ātmajñāna jihīṃ / svādhīna hoya

jñānāceṃ āvāhanamaṃtra / jeṃ jñāna pikateṃ sukṣetra /
jñāna ākarṣiteṃ sūtra / taṃtu je kā

te donī saṃnyāsa tyāga / anuṣṭhūni suṭe jaga /
tarī heṃci ātāṃ cāṃga / vyakta pusoṃ

aiseṃ mhaṇauni pārtheṃ / tyāgasaṃnyāsavyavasthe /
rūpa hoāvayā jetheṃ / praśnu kelā

tetha pratyuttareṃ bolī / śrīkṛṣṇeṃ je cāvaḻilī /
tayā vyakti jālī / aṣṭādaśā

evaṃ janyajanakabhāveṃ / adhyāvo adhyāyāteṃ prasave /
ātāṃ aikā baraveṃ / pusileṃ jeṃ

tarī paṃḍukumareṃ teṇeṃ / devāceṃ sarateṃ bolaṇeṃ /
jāṇoni aṃtaḥkaraṇeṃ / kāṇī ghetalī

yeऱhavīṃ tatvaviṣayīṃ bhalā / to niścitu ase kīra jāhalā /
parī devo rāhe ugalā / teṃ sāhāvenā

vatsa dhālayāhī varī / dhenū na vacāvī durī /
ananya prītīcī parī / aisī āhe

teṇeṃ kājevīṇahī bolāveṃ / teṃ dekhīleṃ tarī pāhāveṃ /
bhogitāṃ cāḍa duṇāve / paḍhiyaṃtayāṭhāyīṃ

aisī premācī he jātī / āṇi pārtha taṃva teci mūrtī /
mhaṇauni karūṃ lāhe khaṃtī / ugepaṇācī

āṇi saṃvādāceni miṣeṃ / je avyavahārī vastu ase /
te bhogije kīṃ jaiseṃ / ārisāṃ rūpa

maga saṃvādu tohī pārukhe / tarī bhogitāṃ bhogaṇeṃ thoke /
heṃ kāṃ sāhavela sukheṃ / lāṃcāvaleyā ?

yālāgīṃ tyāga saṃnyāsa / pusāvayāceṃ gheūni misa /
maga upalavileṃ dusa / gīteṃceṃ teṃ

aṭharāvā adhyāvo nohe / he ekādhyāyī gītāci āhe /
jaiṃ vāṃsaruci gāya duhe / taiṃ veḻu kāyasā

taisī saṃpatāṃ avasarīṃ / gītā ādaravilī māghārīṃ /
svāmī bhṛtyācā na karī / saṃvādu kāī ?

parī heṃ aso aiseṃ / arjuneṃ pusijata ase /
mhaṇe vinaṃtī viśveśeṃ / avadhārijo

hāṃ jī saṃnyāsu āṇi tyāgu / iyāṃ dohīṃ eka arthīṃ lāgu /
jaisā sāṃghātu āṇi saṃghu / saṃghāteṃci bolije

taiseṃci tyāgeṃ āṇi saṃnyāseṃ / tyāguci bolijatu ase /
āmaceni taṃva mānaseṃ / jāṇije heṃci

nā kāṃhīṃ āthī arthabhedu / to devo karotu viśadu /
tetha mhaṇatī śrīmukuṃdu / bhinnaci paiṃ

tarī arjunā tujhyā manīṃ / tyāga saṃnyāsa donī /
ekārtha gamaleṃ heṃ mānīṃ / mīhī sāca

ihīṃ dohīṃ kīra śabdīṃ / tyāguci bolije triśuddhī /
parī kāraṇa etha bhedīṃ / yetuleṃci

jeṃ nipaṭūni karma sāṃḍije / teṃ sāṃḍaṇeṃ saṃnyāsu mhaṇije /
āṇi phalamātra kā tyajije / to tyāgu gā

tarī koṇā karmāceṃ phaḻa / sāṃḍije koṇa karma kevaḻa /
heṃhī sāṃgoṃ vivaḻa / citta de pāṃ

tarī āpaisīṃ dāṃgeṃ ḍoṃgara / jhāḍeṃ ḍāḻatī apāra /
taiseṃ lāṃbe rājāgara / nuṭhitī te

na peritāṃ saiṃgha tṛṇeṃ / uṭhatī taiseṃ sāḻīceṃ hoṇeṃ /
nāhīṃ gā rābāuṇeṃ / jiyāparī

kāṃ aṃga jāhaleṃ sahajeṃ / parī leṇeṃ udyameṃ kīje /
nadī āpaisī āpādije / vihirī jevīṃ

taiseṃ nitya naimittika / karma hoya svābhāvika /
parī na kāmitāṃ kāmika / na niphaje jeṃ

kāṃ kāmaneceni daḻavāḍeṃ / jeṃ ubhārāvayā ghaḍe /
aśvamedhādika phuḍe / yāga jetha

vāpī kūpa ārāma / agrahāreṃ hana mahāgrāma /
āṇīkahī nānā saṃbhrama / vratāṃce te

aiseṃ iṣṭāpūrta sakaḻa / jayā kāmanā eka mūḻa /
jeṃ keleṃ bhogavī phaḻa / bāṃdhoniyāṃ

dehāciyā gāṃvā aliyā / janmamṛtyūciyā sohaḻiyā /
nā mhaṇoṃ naye dhanaṃjayā / jiyāparī

kā lalāṭīṃceṃ lihileṃ / na moḍe gā kāṃhīṃ keleṃ /
kāḻegorepaṇa dhutaleṃ / phiṭoṃ neṇe

keleṃ kāmya karma taiseṃ / phaḻa bhogāvayā dharaṇeṃ baise /
na pheḍitāṃ ṛṇa jaiseṃ / vosaṃḍīnā

kāṃ kāmanāhī na karitāṃ / avasāṃta ghaḍe paṃḍusutā /
tarī vāyakāṃḍeṃ na jhuṃjatāṃ / lāge jaiseṃ

gūḻa neṇatāṃ toṃḍīṃ / ghātalā deci goḍī /
āgī mānūni rākhoṃḍī / cepilā poḻī

kāmyakarmī heṃ eka / sāmarthya āthī svābhāvika /
mhaṇauni nako kautuka / mumukṣu etha

kiṃbahunā pārthā aiseṃ / jeṃ kāmya karma gā ase /
teṃ tyajije viṣa jaiseṃ / vokūniyāṃ

maga tayā tyāgāteṃ jagīṃ / saṃnyāsu aisayā bhaṃgīṃ /
bolije aṃtaraṃgīṃ / sarvadraṣṭā

heṃ kāmya karma sāṃḍaṇeṃ / teṃ kāmaneteṃci upaḍaṇeṃ /
dravyatyāgeṃ davaḍaṇeṃ / bhaya jaiseṃ

āṇi somasūryagrahaṇeṃ / yeūni karavitī pārvaṇeṃ /
kā mātāpitaramaraṇeṃ / aṃkita je divasa

athavā atithī hana pāve / heṃ aisaiseṃ paḍe jaiṃ karāveṃ /
taiṃ teṃ karma jāṇāveṃ / naumittika gā

vārṣiyā kṣome gagana / vasaṃteṃ duṇāve vana /
dehā śrṛṃgārī yauvana\- / daśā jaisī

kā somakāṃtu someṃ paghaḻeṃ / sūryeṃ phāṃkatī kamaḻeṃ /
etha ase teṃci pālhāḻe / āna naye

taiseṃ nitya jeṃ kā karma / teṃci nimittāce lāhe niyama /
etha uṃcāve teṇeṃ nāma / naimittika hoya

āṇi sāyaṃprātarmadhyānhīṃ / jeṃ kāṃ karaṇīya pratidinīṃ /
parī dṛṣṭi jaisī locanīṃ / adhika nohe

kāṃ nāpāditāṃ gatī / caraṇīṃ jaisī āthī /
nātarī te dīptī / dīpabiṃbīṃ

vāsu neditāṃ jaise / caṃdanīṃ saurabhya ase /
adhikārāce taiseṃ / rūpaci jeṃ

nitya karma aiseṃ janīṃ / pārthā bolije teṃ mānīṃ /
evaṃ nitya naimittika donhīṃ / dāvilīṃ tuja

heṃci nitya naimittika / anuṣṭheya āvaśyaka /
mhaṇauni mhaṇoṃṃ pāhatī eka / vāṃjha yayāteṃ

parī bhojanīṃ jaiseṃ hoye / tṛpti lāhe bhūka jāye /
taise nityanaimittikīṃ āhe / sarvāṃgīṃ phaḻa

kīḍa āgiṭhāṃ paḍe / tarī maḻu tuṭe vānī caḍhe /
yayā karmā tayā sāṃgaḍeṃ / phaḻa jāṇāveṃ

je pratyavāya taṃva gaḻe / svādhikāra bahuveṃ ujaḻe /
tetha hātophaḻiyā miḻe / sadgatīsī

yevaḍhevarī ḍhisāḻa / nityanaimittikīṃ āhe phaḻa /
parī teṃ tyajije mūḻa / nakṣatrīṃ jaiseṃ

latā pike āghavī / taṃva cyūta bāṃdhe pālavīṃ /
maga hāta na lāvita mādhavīṃ / soḍūni ghālī

taisī nolāṃḍitāṃ karmarekhā / citta dīje nityanaimittikā /
pāṭhīṃ phaḻā kīje aśekhā / vāṃtāce vānī

yayā karma phaḻatyāgāteṃ / tyāgu mhaṇatī paiṃ jāṇate /
evaṃ tyāga saṃnyāsa tūteṃ / parīsavile

hā saṃnyāsu jaiṃ saṃbhave / taiṃ kāmya bādhūṃ na pāve /
niṣiddha taṃva svabhāveṃ / niṣedheṃ geleṃ

āṇi nityādika jeṃ ase / teṃ yeṇeṃ phalatyāgeṃ nase /
śira loṭaliyā jaiseṃ / yera āṃga

maga sasya phaḻapākāṃta / taiseṃ nimāliyā karmajāta /
ātmajñāna giṃvasīta / apaiseṃ ye

aisiyā nigutī donī / tyāga saṃnyāsa anuṣṭhānīṃ /
paḍale gā ātmajñānīṃ / bāṃdhatī pāṭu

nātarī he nigutī cuke / maga tyāgu kīje hātatukeṃ /
taiṃ kāṃhīṃ na tyaje adhikeṃ / goṃvīṃci paḍe

jeṃ auṣadha vyādhī anoḻakha / teṃ ghetaliyā parateṃ vikha /
kāṃ anna na mānitāṃ bhūka / mārī nā kāya ?

mhaṇauni tyājya jeṃ nohe / tetha tyāgāteṃ na suvāveṃ /
tyājyālāgīṃ nohāveṃ / lobhāpara

cukaliyā tyāgāceṃ vejheṃ / kelā sarvatyāguhī hoya vojheṃ /
na dekhatī sarvatra dujeṃ / vītarāga te

ekāṃ phaḻābhilāṣa na ṭhake / te karmāṃte mhaṇatī baṃdhakeṃ /
jaiseṃ āpaṇa nagna bhāṃḍakeṃ / jagāteṃ mhaṇe

kāṃ jivhālaṃpaṭa rogiyā / anneṃ dūṣī dhanaṃjayā /
āṃgā na ruse koḍhiyā / māsiyāṃ kope

taise phaḻakāma durbaḻa / mhaṇatī karmaci kiḍāḻa /
maga nirṇayo detī kevaḻa / tyajāveṃ aisā

eka mhaṇatī yāgādika / karāveṃci āvaśyaka /
je yāvāṃcūni śodhaka / āna nase

manaśuddhīcyā mārgīṃ / jaiṃ vijayī vhāveṃ vegīṃ /
taiṃ karma sabaḻālāgīṃ / āḻasu na kīje

bhāṃgāra āthī śodhāveṃ / tarī āgī jevī nubagāveṃ /
kāṃ darpaṇālāgīṃ sāṃcāveṃ / adhika raja

nānā vastreṃ cokha hoāvīṃ / aiseṃ āthī jarī jīvīṃ /
tarī saṃvadaṇī na manāvī / malina jaisī

taisīṃ karmeṃ kleśakāreṃ / mhaṇauni na nyāvīṃ avhereṃ /
kāṃ annalābheṃ aruvāreṃ / rāṃdhitiye uṇeṃ

ihīṃ ihīṃ gā śabdīṃ / eka karmīṃ bāṃdhitī buddhī /
aisā tyāgu visaṃvādīṃ / paḍoni ṭhelā

tarī visaṃvādu to phiṭe / tyāgācā niścayo bheṭe /
taiseṃ boloṃ gomaṭeṃ / avadhāna deīṃ

tarī tyāgu etheṃ pāṃḍavā / trividhu paiṃ jāṇāvā /
tayā trividhāhī baravā / vibhāga karūṃ

tyāgāce tīnhī prakāra / kījatī jarī gocara /
tarī tūṃ ityarthāceṃ sāra / ituleṃ jāṇa

maja sarvajñāciye buddhī / jeṃ aloṭa māne triśuddhī /
niścayatatva teṃ ādhīṃ / avadhārīṃ pāṃ

tarī āpuliye soḍavaṇeṃ / jo mumukṣu jāgoṃ mhaṇe /
tayā sarvasveṃ karaṇeṃ / heṃci eka

jiyeṃ yajñadānatapādikeṃ / iyeṃ karmeṃ āvaśyakeṃ /
tiyeṃ na sāṃḍāvīṃ pāṃthikeṃ / pāuleṃ jaisīṃ

hārapaleṃ na dekhije / taṃva tayācā māgu na sāṃḍije /
kāṃ tṛpta na hotāṃ na loṭije / bhāṇeṃ jevīṃ

nāva thaḍī na pavatāṃ / na khāṃḍije keḻī na phaḻatāṃ /
kāṃ ṭhevileṃ na disatāṃ / dīpu jaisā

taisī ātmajñānavikhīṃ / jaṃva niścitī nāhīṃ nikī /
taṃva nohāveṃ yāgādikīṃ / udāsīna

tarī svādhikārānurupeṃ / tiyeṃ yajñadāneṃ tapeṃ /
anuṣṭhāvīṃci sākṣepeṃ / adhikeṃvara

jeṃ cālaṇeṃ vegāvata jāye / to vegu baisāvayāci hoye /
taisā karmātiśayo āhe / naiṣkarmyālāgīṃ

adhikeṃ jaṃva jaṃva auṣadhī / sevanecī māṃḍī bāṃdhī /
taṃva taṃva mukije vyādhī / tayāciye

taisīṃ karmeṃ hātopātīṃ / jaiṃ kījatī yathānigutī /
taiṃ rajatameṃ jhaḍatī / jhāḍā deūnī

kāṃ pāṭhovāṭīṃ puṭeṃ / bhāṃgārā khāru deṇeṃ ghaṭe /
taiṃ kīḍa jhaḍakarī tuṭe / nirvyāju hoya

taiseṃ niṣṭhā keleṃ karma / teṃ jhāḍī karūni rajatama /
satvaśuddhīceṃ dhāma / ḍoḻāṃ dāvī

mhaṇauniyāṃ dhanaṃjayā / satvaśuddhī giṃvasitayā /
tīrthāṃciyā sāvāyā / ālīṃ karmeṃ

tīrtheṃ bāhyamaḻu kṣāḻe / karmeṃ abhyaṃtara ujaḻe /
evaṃ tīrtheṃ jāṇa nirmaḻeṃ / satkarme.ci

tṛṣārtā marudeśīṃ / jhaḻe amṛteṃ voḻalīṃ jaisīṃṃ /
kīṃ aṃdhālāgīṃ ḍoḻyāṃsī / sūryu ālā

buḍatayā nadīca dhāvinnalī / paḍatayā pṛthvīca kaḻavaḻilī /
nimatayā mṛtyūneṃ didhalī / āyuṣyavṛddhī

taiseṃ karmeṃ karmabaddhatā / mumukṣu soḍavile paṃḍusutā /
jaisā rasarīti maratāṃ / rākhilā viṣeṃ

taisīṃ eke hātavaṭiyā / karmeṃ kījatī dhanaṃjayā /
baṃdhakeṃci soḍavāvayā / mukhyeṃ hotī

ātāṃ teci hātavaṭī / tuja sāṃgoṃ gomaṭī /
jayā karmāteṃ kirīṭī / karmaci ruse

tarī mahāyāgapramukheṃ / karme niphajatāṃhī acukeṃ /
kartepaṇāceṃ na ṭhāke / phuṃjaṇeṃ āṃgīṃ

jo moleṃ tīrthā jāye / tayā mī yātrā karitu āhe /
aisiye ślāghyatecā nohe / toṣu jevīṃ

kāṃ mudrā samarthāciyā / jo ekavaṭu jhoṃbe rāyā /
to mī jiṇatā aisiyā / na yeci garvā

jo kāseṃ lāgoni tare / tayā pohatī ūrmī nure /
purohitu nāviṣkare / dātepaṇeṃ

taiseṃ kartṛtva ahaṃkāreṃ / neghoni yathā avasareṃ /
kṛtyajātāṃceṃ mohareṃ / sārījatī

kelyā karmā pāṃḍavā / jo āthī phaḻācā yāvā /
tayā moharā hoṃ nedāvā / manorathu

ādhīṃci phaḻīṃ āsa tuṭiyā / karme āraṃbhāvīṃ dhanaṃjayā /
parāveṃ bāḻa dhāyā / pāhije jaiseṃ

piṃparuvāṃciyā āśā / na śiṃpije piṃpaḻu jaisā /
taisiyā phaḻanirāśā / kījatī karmeṃ

sāṃḍūni dudhācī ṭakaḻī / goṃvārī gāṃvadhenu veṃṭāḻī /
kiṃbahunā karmaphaḻīṃ / taiseṃ kīje

aisī he hātavaṭī / gheūni je kriyā uṭhī /
āpaṇā āpuliyā gāṃṭhī / lāhecī to

mhaṇauni phaḻīṃ lāgu / sāṃḍoni dehasaṃgu /
karmeṃ karāvīṃ hā cāṃgu / niropu mājhā

jo jīvabaṃdhīṃ śiṇalā / suṭake jāce āpalā /
teṇeṃ puḍhatapuḍhatīṃ yā bolā / āna na kīje

nātarī āṃdhārāceni rokheṃ / jaisīṃ ḍoḻāṃ roṃvijatī nakheṃ /
taisā karmadveṣeṃ aśekheṃ / karmeṃci sāṃḍī

tayāceṃ jeṃ karma sāṃḍaṇeṃ / teṃ tāmasa paiṃ mī mhaṇeṃ /
śisārāce rāgeṃ loṭaṇeṃ / śiraci jaiseṃ

hāṃ gā mārgu duvāḍu hoye / tarī nistaritīla pāye /
kīṃ teci khāṃḍaṇeṃ āhe / mārgāparādheṃ

bhukeliyāpuḍheṃ anna / ho kāṃ bhalataiseṃ unha /
tarī buddhī na ghetāṃ laṃghana / bhāṇeṃ pāparāṃ halyā

taisā karmācā bādhu karmeṃ / nistarīje kariteni varmeṃ /
he tāmasu neṇeṃ bhrameṃ / mājavilā

kīṃ svabhāveṃ āleṃ vibhāgā / teṃ karmaci vosaṃḍī paiṃ gā /
tarī jhaṇeṃ ātaḻā tyāgā / tāmasā tayā

athavā svādhikāru bujhe / āpale vihitahī suje /
parī karitayā umaje / nibarapaṇā

je karmācī ailīkaḍa / nāveka dise duvāḍa /
je vāhatiye veḻe jaḍa / śidorī jaisī

jaisā niṃba jibhe kaḍavaṭu / hiraḍā pahileṃ turaṭu /
taisā karmā aila śevaṭu / khaṇuvāḻā hoya

kāṃ dhenu duvāḍa śiṃga / śevaṃtīye aḍava āṃga /
bhojanasukha mahāga / pāku karitāṃ

taiseṃ puḍhatapuḍhatī karma / āraṃbhīṃca ati viṣama /
mhaṇauni to teṃ śrama / karitāṃ mānī

yeऱhavīṃ vihitatveṃ māṃḍī / parī ghālitāṃ asuravāḍīṃ /
tetha poḻalā aisā sāṃḍī / ādarileṃhī

mhaṇe vastu dehāsārikhī / ālī bahutīṃ bhāgyaviśekhīṃ /
mā jācūṃ kāṃ karmādikīṃ / pāpiyā jaisā ?

keleṃ karmīṃ je dyāveṃ / teṃ jhaṇeṃ maja hoāveṃ /
āji bhogūṃ nā kāṃ barave / hātīṃce bhoga ?

aisā śarīrāciyā kleśā / bheṇeṃ karmeṃ vīreśā /
sāṃḍī to parīyesā / rājasu tyāgu

yeऱhavīṃ tethahī karma sāṃḍe / parī tayā tyāgaphaḻa na joḍe /
jaiseṃ utaleṃ āgīṃ paḍe / teṃ nalageci homā

kāṃ buḍoni prāṇa gele / te ardhodakīṃ nimāle /
heṃ mhaṇoṃ naye jāhaleṃ / durmaraṇaci

taiseṃ dehāceni lobheṃ / jeṇeṃ karmā pāṇī subhe /
teṇeṃ sāca na labhe / tyāgāceṃ phaḻa

kiṃbahunā āpuleṃ / jaiṃ jñāna hoya udayā āleṃ /
taiṃ nakṣatrāteṃ pāhaleṃ / giḻī jaiseṃ

taiśā sakāraṇa kriyā / hārapatī dhanaṃjayā /
to karmatyāgu ye jayā / mokṣaphaḻāsī

teṃ mokṣaphaḻa ajñānā / tyāgiyā nāhīṃ arjunā /
mhaṇauni to tyāgu na mānā / rājasu jo

tarī koṇe pāṃ etha tyāgeṃ / teṃ mokṣaphaḻa ghara righe /
heṃhī āika prasaṃge / bolijela

tarī svādhikārāceni nāṃveṃ / jeṃ vāṃṭiyā āleṃ svabhāveṃ /
teṃ ācare vidhigauraveṃ / śṛṃgāroni

parī heṃ mī karitu aseṃ / aisā āṭhavu tyajī mānaseṃ /
taiseci pāṇī de āśe / phaḻāciye

paiṃ avajñā āṇi kāmanā / mātecyā ṭhāyīṃ arjunā /
keliyā donī patanā / kāraṇa hotī

tarī donīṃ yeṃ tyajāvīṃ / maga mātācī te bhajāvī /
vāṃcūni mukhālāgīṃ vāḻāvī / gāyaci sagaḻī ?

āvaḍatiyehī phaḻīṃ / asāreṃ sālī āṃṭhoḻīṃ /
tyāsāṭhīṃ avagaḻī / phaḻāteṃ koṇhī ?

taisā kartṛtvācā madu / āṇi karmaphaḻācā āsvādu /
yā dohīṃceṃ nāṃva baṃdhu / karmācā kīṃ

tarī yā dohīṃcyā vikhīṃ / jaisā bāpu nātaḻe leṃkīṃ /
taisā hoṃ na śake duḥkhī / vihitā kriyā

hā to tyāga taruvaru / jo gā mokṣaphaḻeṃ ye thoru /
sātvika aisā ḍagaru / yāsīṃca jagīṃ

ātāṃ jāḻūni bīja jaiseṃ / jhāḍā kīje nirvaṃśeṃ /
phaḻa tyāgūni karma taiseṃ / tyajileṃ jeṇeṃ

loha lāgatakheṃvo parīsīṃ / dhātūcī gaṃdhikāḻimā jaisī /
jātī rajatameṃ taisīṃ / tuṭalīṃ donhī

maga satveṃ cokhāḻeṃ / ughaḍatī ātmabodhāce ḍoḻe /
tetha mṛgāṃbu sāṃjaveḻe / hoya jaiseṃ

taisā buddhyādikāṃpuḍhāṃ / asatu viśvābhāsu hā yevaḍhā /
to na dekhe kavaṇīkaḍāṃ / ākāśa jaiseṃ

mhaṇauni prācināceni baḻeṃ / alaṃkṛteṃ kuśalākuśaleṃ /
tiyeṃ vyomāāṃgīṃ ābhāḻeṃ / jirālīṃ jaisīṃ

taisīṃ tayāciye diṭhī / karmeṃ cokhāḻalīṃ kirīṭī /
mhaṇauni sukhaduḥkhīṃ uṭhī / paḍenā to

teṇeṃ śubhakarma jāṇāveṃ / maga teṃ harṣeṃ karāveṃ /
kāṃ aśubhālāgīṃ hoāveṃ / dveṣiyā nā

tarī iyāviṣayīṃcā kāṃhīṃ / tayā ekuhī saṃdeho nāhīṃ /
jaisā svapnācyā ṭhāyīṃ / jāginnaliyā

mhaṇauni karma āṇi kartā / yā dvaitabhāvācī vārtā /
neṇeṃ to paṃḍusutā / sātvika tyāgu

aiseni karmeṃ pārthā / tyajilīṃ tyajitī sarvathā /
adhikeṃ bāṃdhitī anyathā / sāṃḍilīṃ tarī

āṇi hāṃ gā savyasācī / mūrti lāhoni dehācī /
khaṃtī karitī karmācī / te gāṃvaḍhe gā

mṛttikecā vīṭu / gheūni kāya karīla ghaṭu ? /
keutā tāthu paṭu / sāṃḍīla to ?

tevīṃci vanhitva āṃgīṃ / āṇi ube ubagaṇeṃ āgī /
kīṃ to dīpu prabhelāgīṃ / dveṣu karīla kāī ?

hiṃgu trāsilā ghāṇī / tarī kaiceṃ sugaṃdhatva āṇī ? /
dravapaṇa sāṃḍūni pāṇī / keṃ rāhe teṃ ?

taisā śarīrāceni ābhāseṃ / nāṃdatu jaṃva ase /
taṃva karmatyāgāceṃ piseṃ / kāiseṃ tarī ?

āpaṇa lāvije ṭiḻā / mhaṇauni pusoṃ ye veḻoveḻā /
mā ghālī pheḍī niḍaḻā / kāṃ karūṃ ye gā ?

taiseṃ vihita svayeṃ ādarileṃ / mhaṇauni tyajūṃ ye tyajileṃ /
parī karmaci deha ātaleṃ / teṃ kāṃ sāṃḍīla gā ?

jeṃ śvāsocchvāsavarī / hota nijeliyāhīvarī /
kāṃhīṃ na karaṇeṃyāci parī / hotī jayācī

yā śarīrāceni misakeṃ / karmacī lāgaleṃ asikeṃ /
jitāṃ melayā na ṭhāke / iyā rītī

yayā karmāteṃ sāṃḍitī parī / ekīci te avadhārīṃ /
je karitāṃ na jāije hārīṃ / phaḻaśeciye

karmaphaḻa īśvarīṃ arpe / tatprasādeṃ bodhu uddīpeṃ /
tetha rajjujñāneṃ lope / vyāḻaśaṃkā

teṇeṃ ātmabodheṃ taiseṃ / avidyesīṃ karma nāśe /
pārthā tyajije jaiṃ aiseṃ / taiṃ tyajileṃ hoya

mhaṇauni iyāparī jagīṃ / karmeṃ karitāṃ mānūṃ tyāgī /
yera murchane nāṃva rogī / visāṃvā jaisā

taisā karmīṃ śiṇe ekīṃ / to visāṃvo pāhe āṇikīṃ /
dāṃḍeyāce ghāya bukī / dhāḍaṇeṃ jaiseṃ

parī heṃ aso puḍhatī / toci tyāgī trijagatīṃ /
jeṇeṃ phaḻatyāgeṃ niṣkṛtī / neleṃ karma

yeऱhavīṃ tarī dhanaṃjayā / trividhā karmaphaḻā gā yayā /
samartha te kīṃ bhogāvayā / je na sāṃḍitīci āśā

āpaṇaci viūni duhitā / kīṃ na mama mhaṇe pitā /
to suṭe kīṃ pratigrahītā / jāṃvaī śirake

viṣāce āgarahī vāhatī / teṃ vikitāṃ sukheṃ lābhe jitī /
yera nimāleṃ je ghetī / veṃconi moleṃ

taiseṃ kartā karma karū / akartā phaḻāśā na dharū /
etha na śake āvarūṃ / dohīṃteṃ karma

vāṭe pikaliyā rukhāceṃ / phaḻa apekṣī tayāceṃ /
tevīṃ sādhāraṇa karmāceṃ / phaḻa ghe tayā

parī karūni phaḻa neghe / to jagācyā kāmīṃ na righe /
je trividha jaga avagheṃ / karmaphaḻa heṃ

deva manuṣya sthāvara / yayā nāṃva jagaḍaṃbara /
āṇi he taṃva tinhī prakāra / karmaphaḻāṃce

teṃci eka gā aniṣṭa / eka teṃ kevaḻa iṣṭa /
āṇi eka iṣṭāniṣṭa / trividha aiseṃ

parī viṣayamaṃtīṃ buddhī / āṃgīṃ sūni avidhī /
pravartatī je niṣiddhīṃ / kuvyāpārīṃ

tetha kṛmi kīṭa loṣṭa / he deha lāhatī nikṛṣṭa /
tayā nāma teṃ aniṣṭa / karmaphaḻa

kāṃ svadharmā mānu detāṃ / svādhikāru puḍhāṃ sūtāṃ /
sukṛta kīje pusatāṃ / āmnāyāteṃ

taiṃ iṃdrādika devāṃcīṃ / deheṃ lāhijatī savyasācī /
tayā karmaphaḻā iṣṭācī / prasiddhi gā

āṇi goḍa āṃbaṭa miḻe / tetha rasāṃtara pharasāḻeṃ /
uṭhī doṃhī vegaḻeṃ / dohīṃ jiṇateṃ

recakuci yogavaśeṃ / hoya staṃbhāvayādoṣeṃ /
tevīṃ satyāsatya samaraseṃ / satyāsatyaci jiṇije

mhaṇauni samabhāgeṃ śubhāśubheṃ / miḻoni anuṣṭhānāceṃ ubheṃ /
teṇeṃ manuṣyatva lābhe / teṃ miśra phaḻa

aiseṃ trividha yayā bhāgīṃ / karmaphaḻa māṃḍaleseṃ jagīṃ /
heṃ na sāṃḍī tayāṃ bhogīṃ / jeṃ sūdale āśā

jetheṃ jivhecā hātu phāṃṭe / taṃva jevitāṃ vāṭe gomaṭeṃ /
maga parīṇāmīṃ śevaṭeṃ / avaśya maraṇa

saṃvacoramaitrī cāṃga / jaṃva na pavije teṃ dāṃga /
sāmānyā bhalī āṃga / na śive taṃva

taisīṃ karmeṃ karitāṃ śarīrīṃ / lāhatī mahattvācī pharārī /
pāṭhīṃ nidhanīṃ ekasarī / pāvatī phaḻeṃ

taisā samarthu āṇi ṛṇiyā / māgoṃ ālā bāiṇiyā /
na loṭe taisā prāṇiyā / paḍe to bhogu

maga kaṇisauni kaṇu jhaḍe / to virūḍhalā kaṇisā caḍhe /
puḍhatī bhūmī paḍe / puḍhatī uṭhī

taiseṃ bhogīṃ jeṃ phaḻa hoya / teṃ phaḻāṃtareṃ vīta jāya /
cālatāṃ pāvo pāya / jiṇije jaisā

utārāciye sāṃgaḍī / ṭhāke te ailīca thaḍī /
tevīṃ na mukījatī voḍhī / bhogyāciye

paiṃ sādhyasādhanaprakāreṃ / phaḻabhogu to pasare /
evaṃ goṃvile saṃsāreṃ / atyāgī te

yeऱhavīṃ jāīciyāṃ phulāṃ phāṃkaṇeṃ / tyāci nāma jaiseṃ sukaṇeṃ /
taiseṃ karmamiṣeṃ na karaṇeṃ / keleṃ jihīṃ

bījaci varosi veṃce / tetha vāḍhatī kuḻavāḍī khāṃce /
tevīṃ phaḻatyāgeṃ karmāceṃ / sārileṃ kāma

te satvaśuddhi sāhākāreṃ / gurukṛpāmṛtatuṣāreṃ /
sāsinnaleni bodheṃ vosare / dvaitadainya

tevhāṃ jagadābhāsamiṣeṃ / sphure teṃ trividha phaḻa nāśe /
etha bhoktā bhogya āpaiseṃ / nimāleṃ heṃ

ghaḍe jñānapradhānu hā aisā / saṃnyāsu jayāṃ vīreśā /
teci phalabhoga sosā / mukale gā

āṇi yeṇeṃ kīra saṃnyāseṃ / jaiṃ ātmarūpīṃ diṭhī paise /
taiṃ karma eka aiseṃ / dekhaṇeṃ āhe ?

paḍoni geliyā bhiṃtī / citrāṃcī kevaḻa hoya mātī /
kāṃ pāhāleyā rātī / āṃdhāreṃ ure ?

jaiṃ rūpaci nāhīṃ ubheṃ / taiṃ sāulī kāhyācī śobhe ? /
darpaṇevīṇa biṃbeṃ / vadana keṃ pāṃ ?

phiṭaliyā nidrecā ṭhāvo / kaicā svapnāsi prastāvo ? /
maga sāca kā vāvo / koṇa mhaṇe ?

taiseṃ gā saṃnyāseṃ yeṇeṃ / mūḻa avidyesīci nāhīṃ jiṇeṃ /
mā tiyeceṃ kārya koṇeṃ / ghepe dīje ?

mhaṇauni saṃnyāsī ye pāhīṃ / karmācī goṭhī kījela khaī /
parī avidyā āpulām dehīṃ / āhe jai kāṃ

jaiṃ kartepaṇāceni thāṃveṃ / ātmā śubhāśubhīṃ dhāṃveṃ /
dṛṣṭi bhedāciye rāṇive / racalīse jaiṃ

taiṃ tarī gā suvarmā / bijāvaḻī ātmayā karmā /
apāḍeṃ jaisī paścimā / pūrvesi kāṃ

nātarī ākāśā kā ābhāḻā / sūryā āṇi mṛgajaḻā /
bijāvaḻī bhūtaḻā / vāyūsi jaisī

pāṃgharauni naīceṃ udaka / ase naīcimājīṃ khaḍaka /
parī jāṇije kā vegaḻika / koḍīcī te

ho kāṃ udakājavaḻī / parī sinānīci te bābuḻī /
kāya saṃgāstava kājaḻī / dīpu mhaṇoṃ ye ?

jarī caṃdrīṃ jālā kalaṃku / tarī caṃdresīṃ navhe eku /
āhe dṛṣṭī ḍoḻyāṃ viveku / apāḍu jetulā

nānā vāṭā vāṭe jātayā / voghā voghīṃ vāhātayā /
ārasā ārasāṃ pāhātayā / apāḍu jetulā

pārthā gā tetuleni māneṃ / ātmeṃnisīṃ karma sineṃ /
parī ghevavije ajñāneṃ / teṃ kīra aiseṃ

vikāśeṃ ravīteṃ upajavī / drutī alīkaravī bhogavī /
te sarovarīṃ kāṃ baravī / abjinī jaisī

puḍhatapuḍhatī ātmakriyā / anyakāraṇakāci taiśiyā /
karūṃ pāṃcāṃhī tayāṃ / kāraṇāṃ rūpa

āṇi pāṃcahī kāraṇeṃ tiyeṃ / tūṃhī jāṇasīla vipāyeṃ /
jeṃ śāstreṃ ubhaūnī bāhe / bolatī tayāṃte

vedarāyāciyā rājadhānīṃ / sāṃkhyavedāṃtācyā bhuvanīṃ /
nirūpaṇācyā niśāṇadhvanīṃ / garjatī jiyeṃ

jeṃ sarvakarmasiddhīlāgīṃ / iyeṃci muddaleṃ ho jagīṃ /
tetha na suvāvā abhaṃgīṃ / ātmarāju

hyā bolāci ḍāṃguraṭī / tiyeṃ prasiddhīci ālī kirīṭī /
mhaṇauni tujhyā hana karṇapuṭīṃ / vasoṃ heṃ kāja

āṇi mukhāṃtarīṃ āikije / taiseṃ kāyaseṃ heṃ ojheṃ /
mī cidratna tujheṃ / asatāṃ hātīṃ

darpaṇu puḍhāṃ māṃḍaleyā / kāṃ lokāṃciyāṃ ḍoḻayāṃ /
mānu dyāvā pahāvayā / āpuleṃ nikeṃ

bhakta jaiseni jetha pāhe / tetha teṃ teṃci hota jāye /
to mī tujheṃ jāhāloṃ āheṃ / kheḻaṇeṃ ājī

aiseṃ heṃ prītīceni vegeṃ / devo bolatāṃ se neghe /
taṃva ānaṃdāmājīṃ āṃgeṃ / viratase yeru

cāṃdiṇiyācā paḍibharu / hotāṃ somakāṃtācā ḍoṃgaru /
vigharoni sarovaru / hoṃ pāhe jaisā

taiseṃ sukha āṇi anubhūtī / yā bhāvāṃcī moḍūni bhiṃtī /
ātaleṃ arjunākṛti / sukhaci jetha

tetha samarthu mhaṇauni devā / avakāśu jāhalā āṭhavā /
maga buḍatayācā dhāṃvā / jīveṃ kelā

arjunā yesaṇeṃ dheṃḍeṃ / prajñā pasareṃsīṃ buḍe /
āleṃ bharateṃ evaḍheṃ / teṃ kāḍhūni puḍhatī

devo mhaṇe hāṃ gā pārthā / tūṃ āpaṇapeṃ dekha sarvathā /
taṃva śvāsūni yereṃ māthā / tukiyelā

mhaṇe jāṇasī dātārā / mī tujaśīṃ vyaktiśejārā /
ubagalā ājī ekāhārā / yevoṃ pāheṃ

tayāhī hā aisā / lobheṃ detasāṃ jarī lālasā /
tarī kāṃ jī ghālītasāṃ / āḍa āḍa jīvā ?

tetha śrīkṛṣṇa mhaṇatī nikeṃ / adyāpi nāhīṃ mā ṭhāūkeṃ /
veḍayā caṃdrā āṇi caṃdrike / na miḻaṇeṃ āhe ?

āṇi hāhī boloni bhāvo / tuja dāūṃ āmhī bhivoṃ /
je rusatāṃ bāṃdhe thāṃvo / teṃ prema gā heṃ

etha ekamekāṃciye khuṇeṃ / visaṃvādu taṃvaci jiṇeṃ /
mhaṇauni aso heṃ bolaṇeṃ / iyeviṣayīṃceṃ

maga kaiśī kaiśī te ātāṃ / bolata hotoṃ paṃḍusutā /
sarva karmā bhinnatā / ātmenisīṃ

taṃva arjuna mhaṇe deveṃ / mājhiye manīṃceṃci svabhāveṃ /
prastāvileṃ baraveṃ / prameya teṃ jī

jeṃ sakaḻa karmāceṃ bīja / kāraṇapaṃcaka tuja /
sāṃgena aisī paija / ghetalī kāṃ

āṇi ātmayā etha kāṃhīṃ / sarvathā lāgu nāhīṃ /
heṃ puḍhāralāsi te deīṃ / lāhāṇeṃ mājheṃ

yayā bolā viśveśeṃ / mhaṇitaleṃ toṣeṃ bahuvase /
iyeviṣayīṃ dharaṇeṃ baise/ aiseṃ keṃ joḍe ?

tarī arjunā nirūpijela / teṃ kīra bhāṣeāṃtula /
parī mecu ye hoījela / ṛṇiyā tuja

taṃva arjuna mhaṇe devo / kāī visarale māgīla bhāvo ? /
iye goṃṭhīsa kīṃ rākhata āhoṃ / mītūṃpaṇa jī ?

etha śrīkṛṣṇa mhaṇatī ho kāṃ / ātāṃ avadhānācā pasaru nikā /
karūniyāṃ āikā / puḍhāraloṃ teṃ

tarī satyaci gā dhanurdharā / sarvakarmāṃcā ubhārā /
hotase bahirabāhirā / karaṇīṃ pāṃceṃ

āṇi pāṃca kāraṇa daḻavāḍeṃ / jihīṃ karmākāru māṃḍe /
te hetustava ghaḍe / pāṃca āthī

yera ātmatattva udāsīna / teṃ nā hetu nā upādāna /
nā te aṃgeṃ karī saṃvāhana / karmasiddhīceṃ

tetha śubhāśubhīṃ aṃśīṃ / niphajatī karmeṃ aisīṃ /
rātī divo ākāśīṃ / jiyāparī

toya teja dhūmu / yayāṃ vāyūsīṃ saṃgamu /
jāliyā hoya abhrāgamu / vyoma teṃ neṇeṃ

nānā kāṣṭhīṃ nāva miḻe / te nāvāḍeni caḻe /
cālavije aniḻeṃ / udaka teṃ sākṣī

kāṃ kavaṇe ekeṃ piṃḍe / veṃcitāṃ avatare bhāṃḍeṃ /
maga bhavaṃḍīje daṃḍeṃ / bhrame cakra

āṇi kartṛtva kulālāceṃ / tetha kāya teṃ pṛthvīyeceṃ /
ādhārāvāṃcūni veṃce / vicārīṃ pāṃ /

heṃhi aso lokāṃciyā / rāhāṭī hotāṃ āghaviyā /
koṇa kāma savitayā / āṃgā āleṃ ?

taiseṃ pāṃcahetumiḻaṇīṃ / pāṃceṃci ihīṃ kāraṇīṃ /
kīje karmalatāṃcī lāvaṇī / ātmā sinā

ātāṃ teṃci vegaḻālīṃ / pāṃcahī vivaṃcūṃ gā bhalīṃ /
tukoni ghetalīṃ / motiyeṃ jaisīṃ

taisīṃ yathā lakṣaṇeṃ / āikeṃ karma\-kāraṇeṃ /
tarī deha heṃ mī mhaṇeṃ / pahileṃ etha

yayāteṃ adhiṣṭhāna aiseṃ / mhaṇije teṃ yāci uddeśeṃ /
je svabhogyeṃsīṃ vase / bhoktā yetha

iṃdriyāṃcyā dāheṃ hātīṃ / jāconiyāṃ divorātī /
sukhaduḥkheṃ prakṛtī / joḍījatī jiyeṃ

tiyeṃ bhogāvayā purukhā / āna ṭhāvoci nāhīṃ dekhā /
mhaṇauni adhiṣṭhānabhākhā / bolije deha

heṃ covisāṃhī tatvāṃceṃ / kuṭuṃbaghara vastīceṃ /
tuṭe baṃdhamokṣāceṃ / guṃthāḍe etha

kiṃbahunā avasthātrayā / heṃ adhiṣṭhāna dhanaṃjayā /
mhaṇauni dehā yayā / heṃci nāma

āṇi kartā heṃ dujeṃ / karmāceṃ kāraṇa jāṇije /
pratibiṃba mhaṇije / caitanyāceṃ jeṃ

ākāśaci varṣe nīra / teṃ taḻavaṭīṃ bāṃdhe nāḍara /
maga biṃboni tadākāra / hoya jevīṃ

kāṃ nidrābhareṃ bahuveṃ / rāyā āpaṇapeṃ ṭhāuveṃ navhe /
maga svapnīṃciye sāmāve / raṃkapaṇīṃ

taiseṃ āpuleni visareṃ / caitanyaci dehākāreṃ /
ābhāsoni āviṣkareṃ / dehapaṇeṃ jeṃ

jayā visarācyā deśīṃ / prasiddhi gā jīvu aisī /
jeṇeṃ bhāṣa kelī deheṃsī / āghavāviṣayīṃ

prakṛti karī karmeṃ / tīṃ myāṃ kelīṃ mhaṇe bhrameṃ /
yetha kartā yeṇeṃ nāmeṃ / bolije jīvu

maga pāteyāṃcyā keśīṃ / ekīca uṭhī diṭhī jaisī /
mokaḻī cavarī aisī / cirīva game

kāṃ gharāāṃtula eku / dīpācā to avaloku /
gavākṣabhedeṃ aneku / āvaḍe jevīṃ

kāṃ ekuci puruṣu jaisā / anusarata navāṃ rasāṃ /
navavidhu aisā / āvaḍoṃ lāge

tevīṃ buddhīceṃ eka jāṇaṇeṃ / śrotrādibhedeṃ yeṇeṃ /
bāherī iṃdriyapaṇeṃ / phāṃke jeṃ kāṃ

teṃ pṛthagvidha karaṇa / karmāceṃ iyā kāraṇa /
tisareṃ gā jāṇa / nṛpanaṃdanā

āṇi pūrvapaścimavāhaṇīṃ / nighāliyā voghāciyā miḻaṇī /
hoya nadī nada pāṇī / ekaci jevīṃ

taisī kriyāśakti pavanīṃ / ase je anapāyinī /
te paḍilī nānāsthānīṃ / nānā hoya

jaiṃ vāce karī yeṇeṃ / taiṃ teṃci hoya bolaṇeṃ /
hātā ālī tarī gheṇeṃ / deṇeṃ hoya

agā caraṇācyā ṭhāyīṃ / tarī gati teci pāhīṃ /
adhodvārīṃ dohīṃ / kṣaraṇeṃ teci

kaṃdauni hṛdayavarī / praṇavācī ujarī /
karitāṃ teci śarīrīṃ / prāṇu mhaṇije

maga urdhvīṃciyā rigānigā / puḍhatī teci śakti paiṃ gā /
udānu aisiyā liṃgā / pātra jāhalī

adhoraṃdhrāceni vāheṃ / apānu heṃ nāma lāhe /
vyāpakapaṇeṃ hoye / vyānu teci

ārogileni raseṃ / śarīra bharī sariseṃ /
āṇi na sāṃḍitāṃ ase / sarvasaṃdhīṃ

aisiyā iyā rāhaṭīṃ / maga teci kriyā pāṭhīṃ /
samāna aisī kirīṭī / bolije gā

āṇi jāṃbhaī śiṃka ḍheṃkara / aisaisā hotase vyāpāra /
nāga kūrma kṛkara / ityādi hoya

evaṃ vāyūcī he ceṣṭā / ekīci parī subhaṭā /
vartanāstava pālaṭā / yetase je

teṃ bhedalī vṛttipaṃtheṃ / vāyuśakti gā etheṃ /
karmakāraṇa cautheṃ / aiseṃ jāṇa

āṇi ṛtu baravā śāradu / śāradīṃ puḍhatī cāṃdu /
caṃdrī jaisā saṃbaṃdhu / pūrṇimecā

kāṃ vasaṃtīṃ baravā ārāmu / ārāmīṃhī priyasaṃgamu /
saṃgamīṃ āgamu / upacārāṃcā

nānā kamaḻīṃ pāṃḍavā / vikāsu jaisā baravā /
vikāsīṃhī yāvā / parāgācā

vāce baraveṃ kavitva / kavitvīṃ baraveṃ rasikatva /
rasikatvīṃ paratatva / sparśu jaisā

taisī sarvavṛttivaibhavīṃ / buddhici ekalī baravī /
buddhihī barava navī / iṃdriyaprauḍhī

iṃdriyaprauḍhīmaṃḍaḻā / śṛṃgāru ekuci nirmaḻā /
jaiṃ adhiṣṭhātriyāṃ kāṃ meḻā / devatāṃcā jo

mhaṇauni cakṣurādikīṃ dāheṃ / iṃdriyāṃ pāṭhīṃ svānugraheṃ /
sūryādikāṃ kāṃ āhe / surāṃceṃ vṛṃda

teṃ devavṛṃda baraveṃ / karmakāraṇa pāṃcaveṃ /
arjunā etha jāṇāveṃ / devo mhaṇe

evaṃ māne tujhiye āyaṇī / taisī karmajātāṃcī he khāṇī /
paṃcavidha ākarṇīṃ / nirūpilī

ātāṃ heci khāṇī vāḍhe / maga karmācī sṛṣṭi ghaḍe /
jihīṃ te hetuhī ughaḍe / dāūṃ pāṃcai

tarī avasāṃta ālī mādhavī / te hetu hoya navapallavīṃ /
pallava puṣpapuṃja dāvī / puṣpa phaḻāteṃ

kāṃ vārṣiye āṇije meghu / megheṃ vṛṣṭiprasaṃgu /
vṛṣṭīstava bhogu / sasyasukhācā

nātarī prācī aruṇāteṃ viye / aruṇeṃ sūryodayo hoye /
sūryeṃ sagaḻā pāhe / divo jaisā

taiseṃ mana hetu pāṃḍavā / hoya karmasaṃkalpabhāvā /
to saṃkalpu lāvī divā / vācecā gā

maga vācecā to divaṭā / dāvī kṛtyajātāṃciyā vāṭā /
tevhāṃ kartā rige kāmaṭhāṃ / kartṛtvācyā

tetha śarīrādika daḻavāḍeṃ / śarīrādikāṃ hetuci ghaḍe /
lohakāma lokhaṃḍeṃ / nirvāḻije jaiseṃ

kāṃ tāṃthuvācā tāṇā / tāṃthu ghālitāṃ vairaṇā /
to taṃtuci vicakṣaṇā / hoya paṭu

taiseṃ manavācādehāceṃ / karma manādi hetuci race /
ratnīṃ ghaḍe ratnāceṃ / daḻavāḍeṃ jevīṃ

etha śarīrādikeṃ kāraṇeṃ / teṃci hetu kevīṃ heṃ koṇeṃ /
apekṣije tarī teṇeṃ / avadhārijo

āikā sūryāciyā prakāśā / hetu kāraṇa sūryuci jaisā /
kāṃ ūṃsāceṃ kāṃḍeṃ ūṃsā / vāḍhī hetu

nānā vāgdevatā vānāvī / taiṃ vācāci lāge kāmavāvī /
kāṃ vedāṃ vedeṃci bolāvī / pratiṣṭhā jevīṃ

taiseṃ karmā śarīrādikeṃ / kāraṇa heṃ kīra ṭhāukeṃ /
parī heṃci hetu na cuke / heṃhī etha

āṇi dehādikīṃ kāraṇīṃ / dehādi hetu miḻaṇīṃ /
hoya jayā ubhāraṇī / karmajātāṃ

teṃ śāstrārtheṃṃ mānileyā / mārgā anusare dhanaṃjayā /
tarī nyāya to nyāyā / hetu hoya

jaisā parjanyodakācā loṭu / vipāyeṃ dharī sāḻīcā pāṭu /
to jire parī acāṭu / upayogu āthī

kāṃ roṣeṃ nighāleṃ avacaṭeṃ / paḍileṃ dvārakeciyā vāṭe /
teṃ śiṇe parī sunāṭeṃ / na vacitī padeṃ

taiseṃ hetukāraṇa meḻeṃ / uṭhī karma jeṃ āṃdhaḻeṃ /
teṃ śāstrāceṃ lāhe ḍoḻe / taiṃ nyāya mhaṇipe

nā dūdha vāḍhitā ṭhāvo pāve / taṃva utoni jāya svabhāveṃ /
tohī veṃcu parī navhe / veṃcileṃ teṃ

taiseṃ śāstrasāhyeṃvīṇa / keleṃ nohe jarī akāraṇa /
tarī lāgo kāṃ nāgavaṇa / dānalekhīṃ

agā bāvannā varṇāṃparatā / koṇa maṃtru āhe paṃḍusutā /
kāṃ bāvannahī nuccāritāṃ / jīvu āthī ?

parī maṃtrācī kaḍasaṇī / jaṃva neṇije kodaṃḍapāṇī /
taṃva uccāraphaḻa vāṇī / na pave jevīṃ

tevīṃ kāraṇahetuyogeṃ / jeṃ bisāṭa karma nige /
teṃ śāstrāciye na lage / kāṃse jaṃva

karma hotaci ase tevhāṃhī / parī teṃ hoṇeṃ navhe pāhīṃ /
to anyāyo gā anyāyīṃ / hetu hoya

evaṃ paṃcakāraṇā karmā / pāṃcahī hetu he sumahimā /
ātāṃ etheṃ pāheṃ pāṃ ātmā / sāṃpaḍalā ase ?

bhānu na honi rūpeṃ jaisīṃ / cakṣurūpāteṃ prakāśī /
ātmā na honi karmeṃ taisīṃ / prakaṭita ase gā

paiṃ pratibiṃba ārisā / donhī na honi vīreśā /
dohīṃteṃ prakāśī jaisā / nyāhāḻitā to

kāṃ ahorātra savitā / na honi karī paṃḍusutā /
taisā ātmā karmakartā / na honi dāvī

parī dehāhaṃmāna bhulī / jayācī buddhi dehīṃci ātalī /
tayā ātmaviṣayīṃ jālī / madhyarātrī gā

jeṇeṃ caitanyā īśvarā brahmā / dehaci keleṃ paramasīmā /
tayā ātmā kartā he pramā / aloṭa upaje

ātmāci karmakartā / hāhī niścayo nāhīṃ tatvatāṃ /
dehoci mī karmakartā / mānito sāce

je ātmā mī karmātītu / sarvakarmasākṣibhūtu /
he āpulī kahīṃ mātu / nāyakeci kānīṃ

mhaṇauni umapā ātmayāteṃ / dehacivarī mavije etheṃ /
vicitra kāī rātri divasāteṃ / ḍuḍuḻa na karī ?

paiṃ jeṇeṃ ākāśīṃcā kahīṃ / satya sūryu dekhilā nāhīṃ /
to thillarīṃceṃ biṃba kāī / mānū na lāhe ?

thillarāceni jālepaṇeṃ / sūryāsi āṇī hoṇeṃ /
tyācyā nāśīṃ nāśaṇeṃ / kaṃpeṃ kaṃpū

āṇi nidristā cevo naye / taṃva svapna sāca hoṃ lāhe /
rajju neṇatāṃ sāpā bihe / vismo kavaṇa ?

jaṃva kavaḻa āthi ḍoḻāṃ / taṃva caṃdru dekhāvā kīṃṃ piṃvaḻā /
kāya mṛgīṃhīṃ mṛgajaḻā / bhāḻāveṃ nāhīṃ ?

taisā śāstragurūceni nāṃve / jo vārāhī ṭeṃkoṃ nedī siveṃ /
kevaḻa mauḍhyācenici jīveṃ / jiyālā jo

teṇeṃ dehātmadṛṣṭīmuḻeṃ / ātmayā ghāpe dehāceṃ jāḻeṃ /
jaisā abhrācā vegu kolheṃ / caṃdrīṃ mānīṃ

maga tayā mānaṇayāsāṭhīṃ / dehabaṃdīśāḻe kirīṭī /
karmācyā vajragāṃṭhī / kaḻāse to

pāhe pāṃ baddha bhāvanā dṛḍhā / naḻiyevarī to bāpuḍā /
kāya mokaḻeyāhī pāyācā cavaḍā / na ṭhakeci puṃsā /

mhaṇauni nirmaḻā ātmasvarūpīṃ / to prakṛtīceṃ keleṃ āropī /
to kalpakoḍīcyā māpīṃ / mavīci karmeṃ

ātā karmāmājīṃ ase / parī tayāteṃ karma na sparśe /
vaḍavānaḻāteṃ jaiseṃ / samudrodaka

taiseṃni vegaḻepaṇeṃ / jayāceṃ karmīṃ asaṇeṃ /
to kīra voḻakhāvā kavaṇeṃ / tarī sāṃgo

je muktāteṃ nirdhāritāṃ / lābhe āpalīca muktatā /
jaisī dīpeṃ diseṃ pāhatāṃ / āpalī vastu

nātarī darpaṇu jaṃva uṭije / taṃva āpaṇapayāṃ āpaṇa bheṭije /
kāṃ toya pāvatāṃ toya hoīje / lavaṇeṃ jeṃvīṃ

heṃ aso paratoni māguteṃ / pratibiṃba pāhe biṃbāteṃ /
taṃva pāhaṇeṃ jāunī āyiteṃ / biṃbaci hoya

taiseṃ hārapaleṃ āpaṇapeṃ pāve / taiṃ saṃtāṃteṃ pāhatāṃ giṃvasāveṃ /
mhaṇauni vānāve aikāve / teci sadā

parī karmīṃ asoni karmeṃ / jo nāvare sameṃviṣameṃ /
carmacakṣūṃceni cāmeṃ / dṛṣṭi jaisī

taisā soḍavalā jo āhe / tayāceṃ rūpa ātāṃ pāheṃ /
upapattīcī bāhe / ubhaūni sāṃgoṃ

tarī avidyeciyā nidā / viśvasvapnācā hā dhāṃdā /
bhogīta hotā prabuddhā / anādi jo

to mahāvākyāceni nāṃveṃ / gurukṛpeceni thāṃveṃ /
māthāṃ hātu ṭhevilā navhe / thāpaṭilā jaisā

taisā viśvasvapneṃsīṃ māyā / nīda sāṃḍūni dhanaṃjayā /
sahasā ceilā advayā\- / naṃdapaṇeṃ jo

tevhāṃ mṛgajaḻāce pūra / disate eka niraṃtara /
hārapatī kāṃ caṃdrakara / phāṃkatāṃ jaise

kāṃ bāḻatva nighoni jāya / taiṃ bāgulā nāhīṃ trāya /
paiṃ jaḻāliyā iṃdhana na hoya / iṃdhana jevīṃ

nānā cevo āliyā pāṭhīṃ / taiṃ svapna na dise diṭhī /
taisī ahaṃ mamatā kirīṭī / nureci tayā

maga sūryu āṃdhārālāgīṃ / righo kāṃ bhalate suraṃgīṃ /
parī to tayācyā bhāgīṃ / nāhīṃci jaisā

taisā ātmatveṃ veṣṭilā hoye / to jayā jayā dṛśyāteṃ pāheṃ /
teṃ dṛṣya draṣṭepaṇeṃsīṃ hota jāye / tayāceṃci rūpa

jaisā vanhi jayā lāge / teṃ vanhici jāliyā āṃgeṃ /
dāhyadāhakavibhāgeṃ / sāṃḍije teṃ

taisā karmākārā dujeyā / to kartepaṇācā ātmayā /
āḻu ālā to geliyā / kāṃhīṃ bāhīṃ jeṃ ure

tiye ātmasthitīcā jo rāvo / maga to dehīṃ iye jāṇela ṭhāvo ? /
kāya pralayāṃbūcā unnāho / voghu mānī ?

taisī te pūrṇa ahaṃtā / kāī dehapaṇeṃ paṃḍusutā /
āvare kāī savitā / biṃbeṃ dharilā ?

paiṃ mathūni loṇī ghepe / teṃ māgutī tākīṃ ghāpe /
tarī teṃ aliptapaṇeṃ siṃpe / teṇeṃsī kāī ?

nānā kāṣṭhauni vīreśā / vegaḻā keliyā hutāśā /
rāhe kāṣṭhāciyā māṃdusā / koṃḍalepaṇeṃ ?

kāṃ rātrīciyā udarāāṃtu / nighālā jo hā bhāsvatu /
to rātrī aisī mātu / aike kāyī ?

taiseṃ vedya vedakapaṇeṃsī / paḍileṃ kāṃ jayāce grāsīṃ /
tayā deha mī aisī / ahaṃtā kaiṃcī ?

āṇi ākāśeṃ jetheṃ jethunī / jāije tetha ase bharonī /
mhaṇauni ṭheleṃ koṃdonī / āpeṃāpa

taiseṃ jeṃ teṇeṃ karāveṃ / to teṃci āhe svabhāveṃ /
mā koṇeṃ karmīṃ veṣṭāveṃ / kartepaṇeṃ ?

nureci gaganāvīṇa ṭhāvo / noheci samudrā pravāho /
nuṭhīci dhruvā jāvoṃ / taiseṃ jāhāleṃ

aiseni ahaṃkṛtibhāvo / jayācā bodhīṃ jāhalā vāvo /
taऱhī dehā jaṃva nirvāho / taṃva āthī karmeṃ

vārā jarī vājoni vosare / tarī to ḍola rukhīṃ ure /
kāṃ seṃdeṃ druti rāhe kāpureṃ / veṃcalenī

kāṃ saraleyā gītācā samāraṃbhu / na vace rāhavalepaṇācā kṣobhu /
bhūmī loḻoni geliyā aṃbu / vola thāre

agā māvaḻaleni arkeṃ / saṃdhyeciye bhūmike /
jyotidīpti kautukeṃ / dise jaisī

paiṃ lakṣa bhediliyāhīvarī / bāṇa dhāṃveci taṃvavarī /
jaṃva bharalī āthī urī / baḻācī te

nānā cakrīṃ bhāṃḍeṃ jāleṃ / teṃ kulāleṃ parateṃ neleṃ /
parī bhrameṃci teṃ māgile / bhovaṃḍilepaṇeṃ

taisā dehābhimānu geliyā / deha jeṇeṃ svabhāveṃ dhanaṃjayā /
jāleṃ teṃ apaisayā / ceṣṭavīca teṃ

saṃkalpeṃvīṇa svapna / na lāvitāṃ dāṃgīceṃ bana /
na racitāṃ gaṃdharvabhuvana / uṭhī jaiseṃ

ātmayāceni udyameṃvīṇa / taiseṃ dehādipaṃcakāraṇa /
hoya āpaṇayāṃ āpaṇa / kriyājāta

paiṃ prācīnasaṃskāravaśeṃ / pāṃcahī kāraṇeṃ sahetukeṃ /
kāmavījatī gā anekeṃ / karmākāreṃ

tayā karmāmājīṃ maga / saṃharo āghaveṃ jaga /
athavā naveṃ cāṃga / anukaro

parī kumuda kaiseni suke / kaiseṃ teṃ kamaḻa phāṃke /
hīṃ donhī ravī na dekhe / jayāparī

kāṃ vīju varṣoni ābhāḻa / ṭhikariyā āto bhūtaḻa /
athavā karūṃ śāḍvaḻa / prasannāvṛṣṭī

tarī tayā dohīṃteṃ jaiseṃ / neṇijeci kāṃ ākāśeṃ /
taisā dehīṃca jo ase / videhadṛṣṭī

to dehādikīṃ ceṣṭīṃ / ghaḍatāṃ moḍatāṃ he sṛṣṭī /
na dekhe svapna dṛṣṭī / ceilā jaisā

yeऱhavīṃ cāmāce ḍoḻevarī / je dekhatī dehacivarī /
te kīra to vyāpārī / aiseṃci mānitī

kāṃ tṛṇācā bāhulā / jo āgarāmereṃ ṭhevilā /
to sācaci rākhatā kolhā / mānije nā ?

piseṃṃ nesaleṃ kāṃ nāgaveṃ / heṃ lokīṃ yeūni jāṇāveṃ /
ṭhāṇoriyāṃceṃ mavāveṃ / āṇikīṃ ghāya

kāṃ mahāsatīce bhoga / dekhe kīra sakaḻa jaga /
parī te āgī nā āṃga / nā loku dekhe

taisā svasvarūpeṃ uṭhilā / jo dṛśyeṃsī draṣṭā āṭalā /
to neṇeṃ kāya rāhaṭalā / iṃdriyagrāmu

agā thorīṃ kalloḻīṃ kalloḻa sāne / lopatāṃ tirīṃceni janeṃ /
ekīṃ eka giḻileṃ heṃ maneṃ / mānije jaऱhī

taऱhī udakāprati pāhīṃ / koṇa grasitase kāī /
taiseṃ pūrṇā dujeṃ nāhīṃ / jeṃ to mārī

suvarṇāciyā caṃḍikā / suvarṇaśūḻeṃci dekhā /
suvarṇāciyā mahikhā / nāśu kelā

to devalavasiyā kaḍā / vyavahāru gamalā phuḍā /
vāṃcūni śūḻa mahiṣa cāmuṃḍā / suvarṇaci teṃ

paiṃ citrīṃceṃ jaḻa hutāṃśu / to dṛṣṭīcāci ābhāsu /
paṭīṃ āgī volāṃśu / donhī nāhīṃ

muktāceṃ deha taiseṃ / hālata saṃskāravaśeṃ /
teṃ dekhoni loka pise / kartā mhaṇatī

āṇi tayāṃ karaṇeyā āṃtu / ghaḍo tihīṃ lokāṃ ghātu /
parī teṇeṃ kelā he mātu / boloṃ naye

agā aṃdhāruci dekhāvā tejeṃ / maga to pheḍī heṃ bolije /
taiseṃ jñāniyā nāhīṃ dujeṃ / jeṃ to mārī /

mhaṇauni tayāci buddhī / neṇe pāpapuṇyācī gaṃdhī /
gaṃgā mīnaliyā nadī / viṭāḻu jaisā

āgīsī āgī jhagaṭaliyā / kāya poḻe dhanaṃjayā /
kīṃ śastra rupe āpaṇayā / āpaṇaci

taiseṃ āpaṇapayāparateṃ / jo neṇeṃ kriyājātāteṃ /
tetha kāya liṃpavī buddhīteṃ / tayāciye

mhaṇauni kārya kartā kriyā / heṃ svarūpaci jāhaleṃ jayā /
nāhīṃ śarīrādikīṃ tayā / karmī baṃdhu

je kartā jīva viṃdāṇīṃ / kāḍhūni pāṃcahī khāṇī /
ghaḍita āhe karaṇīṃ / āutīṃ dāheṃ

tetha nyāvo āṇi anyāvo / hā dvividhu sādhūni āvo /
ubhavitā na lavī kheṃvo / karmabhuvaneṃ

yā thorāḍā kīra kāmā / virajā nohe ātmā /
parī mhaṇasī hana upakramā / hātu lāvī

to sākṣī cidrūpu / karmapravṛttīcā saṃkalpu /
uṭhī to kāṃ niropu / āpaṇaci de ?

tarī karmapravṛttīhīlāgīṃ / tayā āyāsu nāhīṃ āṃgīṃ /
je pravṛttīcehī uḻigīṃ / lokuci āthī

mhaṇauni ātmayāceṃ kevaḻa / jo rūpaci jāhalā nikhiḻa /
tayā nāhīṃ baṃdiśāḻa / karmāci he

parī ajñānācyā paṭīṃ / anyathā jñānāceṃ citra uṭhī /
tetha citāraṇī he tripuṭī / prasiddha je kāṃ

jeṃ jñāna jñātā jñeya / heṃ jagāceṃ bīja traya /
te karmācī niḥsaṃdeha / pravṛtti jāṇa

ātāṃ yayāci gā trayā / vyakti vegaḻāliyā /
āikeṃ dhanaṃjayā / karūṃ rūpa

tarī jīvasūryabiṃbāce / raśmī śrotrādikeṃ pāṃceṃ /
dhāṃvoni viṣayapadmāce / phoḍitī maḍha

kīṃ jīvanṛpāce vāru upalāṇeṃ / gheūni iṃdriyāṃcīṃ kekāṇeṃ /
viṣayadeśīṃceṃ nāgavaṇeṃ / āṇīta je

heṃ aso ihīṃ iṃdriyīṃ rāhāṭe / jeṃ sukhaduḥkheṃsīṃ jīvā bheṭe /
teṃ suṣuptikālīṃ vohaṭe / jetha jñāna

tayā jīvā nāṃva jñātā / āṇi jeṃ heṃ sāṃgitaleṃ ātāṃ /
teṃci etha paṃḍusutā / jñāna jāṇa

jeṃ avidyeciye poṭīṃ / upajatakheṃvo kirīṭī /
āpaṇayāteṃ vāṃṭī / tihīṃ ṭhāyīṃ

āpuliye dhāṃve puḍhāṃ / ghālūni jñeyācā guṃḍā /
ubhārī māgilīkaḍāṃ / jñātṛtvāteṃ

maga jñātayā jñeyā doghāṃ / to nāṃdaṇukecā bagā /
mājīṃ jāleni paiṃ gā / vāhe jeṇeṃ

ṭhākūni jñeyācī śiṃva / pure jayācī dhāṃva /
sakaḻa padārthāṃ nāṃva / sūtase jeṃ

teṃ gā sāmānya jñāna / yā boalā nāhīṃ āna /
jñeyāceṃhī cinha / āika ātāṃ

tarī śabdu sparśu / rūpa gaṃdha rasu /
hā paṃcavidha ābhāsu / jñeyācā to

jaiseṃ ekeci cūtaphaḻeṃ / iṃdriyāṃ vegavegaḻe /
raseṃ varṇeṃ parīmaḻeṃ / bheṭije sparśeṃ

taiseṃ jñeya tarī ekasareṃ / parī jñāna iṃdriyadvāreṃ /
ghe mhaṇauni prakāreṃ / pāṃceṃ jāleṃ

āṇi samudrīṃ voghāceṃ jāṇeṃ / sare lāṇīpāsīṃ dhāvaṇeṃ /
kāṃ phaḻīṃ sare vāḍhaṇeṃ / sasyāceṃ jevīṃ

taiseṃ iṃdriyāṃcyā vāhavaṭīṃ / dhāṃvatayā jñānā jetha ṭhī /
hoya teṃ gā kirīṭī / viṣaya jñeya

evaṃ jñātayā jñānā jñeyā / tihīṃ rūpa keleṃ dhanaṃjayā /
he trividha sarva kriyā\- / pravṛtti jāṇa

je śabdādi viṣaya / heṃ paṃcavidha jeṃ jñeya /
teṃci priya kāṃ apriya / ekeparīceṃ

jñāna moṭakeṃ jñātayā / dāvī nā jaṃva dhanaṃjayā /
taṃva svīkārā kīṃ tyajāvayā / pravarteci to

parī mīnāteṃ dekhoni baku / jaisā nidhānāteṃ raṃku /
kāṃ strī dekhoni kāmuku / pravṛtti dharī

jaiseṃ khālārāṃ dhāṃve pāṇī / bhramara puṣpāciye ghāṇīṃ /
nānā suṭalā sāṃjavaṇīṃ / vatsuci pāṃ

agā svargīṃcī urvaśī / aikoni jeṃvī māṇusīṃ /
varātā lāvījatī ākāśīṃ / yāgāṃciyā

paiṃ pārivā jaisā kirīṭī / caḍhalā nabhāciye poṭīṃ /
pāravī dekhoni loṭī / āṃgaci sagaḻeṃ

heṃ nā ghanagarjanāsarisā / mayūra vovāṃḍe ākāśā /
jñātā jñeya dekhoni taisā / dhāṃvaci ghe

mhaṇauni jñāna jñeya jñātā / he trividha gā paṃḍusutā /
hoyaci karmā samastāṃ / pravṛtti yetha

parī teṃci jñeya vipāyeṃ / jarī jñātayāteṃ priya hoye /
tarī bhogāvayā na sāhe / kṣaṇahī vilaṃbu

nātarī avacaṭeṃ / teṃci viruddha hoūni bheṭe /
tarī yugāṃta vāṭe / sāṃḍāvayā

vyāḻā kāṃ hārā / varapaḍā jāleyā narā /
harikhu āṇi darārā / sarisāci uṭhī

taiseṃ jñeya priyāpriyeṃ / dekhileni jñātayā hoye /
maga tyāga svīkārīṃ vāhe / vyāpārāteṃ

tetha rāgī pratimallācā / gosāṃvī sarvadaḻācā /
rathu sāṃḍūni pāyāṃcā / hoya jaisā

taiseṃ jñātepaṇeṃ jeṃ ase / teṃ ye kartā aisiye daśe /
jeviteṃ baisaleṃ jaiseṃ / raṃdhana karūṃ

kāṃ bhaṃvareṃci kelā maḻā / varakaluci jālā aṃkasāḻā /
nānā devo rigālā deūḻā\- / ciyā kāmā

taisā jñeyāciyā hāṃvā / jñātā iṃdriyāṃcā meḻāvā /
rāhāṭavī tetha pāṃḍavā / kartā hoya

āṇi āpaṇa haunī kartā / jñānā āṇī karaṇatā /
tetheṃ jñeyaci svabhāvatāṃ / kārya hoya

aisā jñānāciye nijagati / pālaṭu paḍe gā sumati /
ḍoḻyācī śobhā rātīṃ / pālaṭe jaisī

kāṃ adṛṣṭa jāliyā udāsu / pālaṭe śrīmaṃtācā vilāsu /
punivepāṭhīṃ śītāṃśu / pālaṭe jaisā

taisā cāḻitāṃ karaṇeṃ / jñātā veṣṭije kartepaṇeṃ /
tethīṃcīṃ tiyeṃ lakṣaṇeṃ / aika ātāṃ

tarī buddhi āṇi mana / citta ahaṃkāra hana /
heṃ caturvidha cinha / aṃtaḥkaraṇāceṃ

bāhya tvacā śravaṇa / cakṣu rasanā ghrāṇa /
heṃ paṃcavidha jāṇa / iṃdriyeṃ gā

tetha āṃtule taṃva karaṇeṃ / kartā kartavyā ghe umāṇeṃ /
maga taiṃ jarī jāṇeṃ / sukhā yeteṃ

tarī bāherīleṃ tiyeṃhī / cakṣurādikeṃ dāhāhī /
uṭhauni lavalāhīṃ / vyāpārā sūye

maga to iṃdriyakadaṃṃbu / karavije taṃva rābu /
jaṃva kartavyācā lābhu / hātāsi ye

nā teṃ kartavya jarī duḥkheṃ / phaḻela aiseṃ dekhe /
to lāvī tyāgamukheṃ / tiyeṃ dāhāhī

maga phiṭe duḥkhācā ṭhāvo / taṃva rāhāṭavī rātridivo /
vikaṇavāteṃ kāṃ rāvo / jayāparī

taiseni tyāga svīkārīṃ / vāhātāṃ iṃdriyāṃcī dhurī /
jñātayāteṃ avadhārīṃ / kartā mhaṇipe

āṇi kartayācyā sarva karmīṃ / āutāṃciyā parī kṣamī /
mhaṇauni iṃdriyāṃteṃ āmhī / karaṇeṃ mhaṇoṃ

āṇi heci karaṇeṃvarī / kartā kriyā jyā ubhārī /
tiyā vyāpe teṃ avadhārīṃ / karma etha

sonārāciyā buddhi leṇeṃ / vyāpe caṃdrakarīṃ cāṃdaṇeṃ /
kāṃ vyāpe velhāḻapaṇeṃ / velī jaisī

nānā prabhā vyāpe prakāśu / goḍiyā ikṣurasu /
heṃ aso avakāśu / ākāśīṃ jaisā

taiseṃ kartayāciyā kriyā / vyāpaleṃ jeṃ dhanaṃjayā /
teṃ karma gā bolāvayā / āna nāhīṃ

evaṃ karma kartā karaṇa / yā tihīṃceṃhī lakṣaṇa /
sāṃgitaleṃ tuja vicakṣaṇa\- / śiromaṇī

etha jñātā jñāna jñeya / heṃ karmāceṃ pravṛttitraya /
taiseṃci kartā karaṇa kārya / hā karmasaṃcayo

vanhīṃ ṭhevilā ase dhūmu / āthī bījīṃ jevīṃ drumu /
kāṃ manīṃ joḍe kāmu / sadā jaisā

taisā kartā kriyā karaṇīṃ / karmāceṃ āhe jiṃtavaṇīṃ /
soneṃ jaiseṃ khāṇī / suvarṇāciye

mhaṇauni heṃ kārya mī kartā / aiseṃ āthi jetha paṃḍusutā /
tetha ātmā dūrī samastā / kriyāṃpāsīṃ

yālāgīṃ puḍhatapuḍhatī / ātmā vegaḻāci sumatī /
ātāṃ aso he kitī / jāṇatāsi tūṃ

parī sāṃgitaleṃ jeṃ jñāna / karma kartā hana /
te tinhī tihīṃ ṭhāyīṃ bhinna / guṇīṃ āhātī

mhaṇauni jñānā karmā kartayā / pātejoṃ naye dhanaṃjayā /
je donī bāṃdhatī soḍāvayā / ekaci prauḍha

teṃ sātvika ṭhāūveṃ hoye / to guṇabhedu sāṃgoṃ pāhe /
jo sāṃkhyaśāstrīṃ āhe / uvāilā

jeṃ vicārakṣīrasamudra / svabodhakumudinīcaṃdra /
jñānaḍoḻasāṃ nareṃdra / śāstrāṃcā jeṃ

kīṃ prakṛtipuruṣa donī / misaḻalīṃ divorajanīṃ /
tiyeṃ nivaḍitāṃ tribhuvanīṃ / mārtaṃḍu jeṃ

jetha apārā moharāśī / tatvācyā māpīṃ covisīṃ /
ugāṇā gheūni pareśīṃ / suravāḍije

arjunā teṃ sāṃkhyaśāstra / paḍhe jayāceṃ stotra /
teṃ guṇabhedacaritra / aiseṃ āhe

je āpuleni āṃgikeṃ / trividhapaṇāceni aṃkeṃ /
dṛśyajāta titukeṃ / aṃkita keleṃ

evaṃ satvarajatamā / tihīṃcī evaḍhī ase mahimā /
jeṃ traividhya ādī brahmā / aṃtīṃ kṛmī

parī viśvīṃcī āghavī māṃdī / jeṇeṃ bhedaleni guṇabhedīṃ /
paḍilī teṃ taṃva ādī / jñāna sāṃgo

je diṭhī jarī cokha kīje / tarī bhalateṃhī cokha suje /
taiseṃ jñāneṃ śuddheṃ lāhije / sarvahī śuddha

mhaṇauni teṃ sātvika jñāna / ātāṃ sāṃgoṃ de avadhāna /
kaivalyaguṇanidhāna / śrīkṛṣṇa mhaṇe

tarī arjunā gā teṃ phuḍeṃ / sātvika jñāna cokhaḍeṃ /
jayācyā udayīṃ jñeya buḍe / jñātenisīṃ

jaisā sūrya na dekhe aṃdhāreṃ / saritā neṇijatī sāgareṃ /
kāṃ kavaḻiliyā na dhare / ātmachāyā

tayāparī jayā jñānā / śivādi tṛṇāvasānā /
iyā bhūtavyakti bhinnā / nāḍaḻatī

jaiseṃ hāteṃ citra pāhātāṃ / hoya pāṇiyeṃ mīṭha dhutāṃ /
kāṃ cevoni svapnā yetāṃ / jaiseṃ hoya

taiseṃ jñāneṃ jeṇeṃ / karitāṃ jñātavyāteṃ pāhāṇeṃ /
jāṇatā nā jāṇaṇeṃ / jāṇāveṃ ure

paiṃ soneṃ āṭūni leṇīṃ / na kāḍhitī āpuliyā āyaṇī /
kāṃ taraṃga na ghepatī pāṇī / gāḻūni jaiseṃ

taisī jayā jñānāciyā hātā / na lageci dṛśyapathā /
teṃ jñāna jāṇa sarvathā / sātvika gā

ārisā pāhoṃ jātāṃ koḍeṃ / jaiseṃ pāhāteṃci kāṃ rige puḍheṃ /
taiseṃ jñeya loṭoni paḍe / jñātāci jeṃ

puḍhatī teṃci sātvika jñāna / jeṃ mokṣalakṣmīceṃ bhuvana /
heṃ aso aika cinha / rājasāceṃ

tarī pārthā parīyesa / teṃ jñāna gā rājasa /
jeṃ bhedācī kāṃsa / dharūni cāle

vicitratā bhūtāṃciyā / āpaṇa āṃtoni ṭhikariyā /
bahu cakai jñātayā / āṇilī jeṇeṃ

jaiseṃ sācā rūpāāḍa / ghālūni visarāceṃ kavāḍa /
maga svapnāceṃ kābāḍa / opī nidrā

taiseṃ svajñānāciye pauḻī / bāheri mithyā mahīṃ khaḻīṃ /
tihīṃ avasthāṃciyā vahyāḻī / dāvī jeṃ jīvā

alaṃkārapaṇeṃ jhāṃkaleṃ / bāḻā soneṃ kāṃ vāyāṃ geleṃ /
taiseṃ nāmīṃ rūpīṃ durāvaleṃ / advaita jayā

avataralī gāḍagyāṃ ghaḍāṃ / pṛthvī anoḻakha jālī mūḍhāṃ /
vanhi jālā kānaḍā / dīpatvāsāṭhīṃ

kāṃ vastrapaṇāceni āropeṃ / mūrkhāprati taṃtu hārape /
nānā mugdhā paṭu lope / dāūni citra

taiśī jayā jñānā / jāṇoni bhūtavyaktī bhinnā /
aikyabodhācī bhāvanā / nimoni gelī

maga iṃdhanīṃ bhedalā anaḻu / phulāṃvarī parīmaḻu /
kāṃ jaḻabhedeṃ śakalu / caṃdru jaisā

taiseṃ padārthabheda bahuvasa / jāṇoni lahānathora veṣa /
āṃtaleṃ teṃ rājasa / jñāna yetha

ātāṃ tāmasāceṃhī liṃga / sāṃgena teṃ voḻakha cāṃga /
ḍāvalāvayā mātaṃga\- / sadana jaiseṃ

tarī kirīṭī jeṃ jñāna / hiṃḍe vidhīceni vastreṃhīna /
śruti pāṭhamorī nagna / mhaṇauni tayā

yerīṃhī śāstra baṭikarīṃ / jeṃ niṃdece viṭāḻavarī /
boḻavileṃse ḍoṃgarīṃ / mleṃcchadharmācyā

jeṃ gā jñāna aiseṃ / guṇagraheṃ tāmaseṃ /
ghetaleṃ bhaveṃ piseṃ / hoūniyāṃ

jeṃ soyarikeṃ bādhu neṇeṃ / padārthīṃ niṣedhu na mhaṇe /
nirovileṃ jaiseṃ suṇeṃ / śūnyagrāmīṃ

tayā toṃḍīṃ jeṃ nāḍaḻe / kāṃ khātāṃ jeṇeṃ poḻe /
teṃci yeka vāḻe / yera gheṇeci

paiṃ soneṃ coritāṃ uṃdiru / na mhaṇe tharuvitharu /
neṇe māṃsakhāiru / kāḻeṃ goreṃ

nānā vanāmājīṃ boharī / kaḍasaṇī jevīṃ na karī /
kāṃ jīta meleṃ na vicārī / baisatāṃ māśī

agā vāṃtā kāṃ vāḍhileyā / sājuka kāṃ saḍaliyā /
viveku kāvaḻiyā / nāhīṃ jaisā

taiseṃ niṣiddha sāṃḍūni dyāveṃ / kāṃ vihita ādareṃ ghyāveṃ /
heṃ viṣayāṃceni nāṃveṃ / neṇeṃci jeṃ

jetuleṃ āḍa paḍe diṭhī / tetuleṃ gheci viṣayāsāṭhīṃ /
maga teṃ strī\-dravya vāṭī / śiśnodarāṃ

tīrthātīrtha he bhākha / udakīṃ nāhīṃ sanoḻakha /
tṛṣā voḻe teṃci sukha / vāṃcūniyāṃ

tayāciparī khādyākhādya / na mhaṇe niṃdyāniṃdya /
toṃḍā āvaḍe teṃ medhya / aisāci bodhu

āṇi strījāta titukeṃ / tvaceṃdriyeṃci voḻakhe /
tiyeviṣayīṃ soyarikeṃ / ekaci bodhu

paiṃ svārthīṃ jeṃ upakare / tayāci nāma soyireṃ /
dehasaṃbaṃdhu na sare / jiye jñānīṃ

mṛtyūceṃ āghaveṃci anna / āghaveṃci āgī iṃdhana /
taiseṃ jagaci āpaleṃ dhana / tāmasajñānā

aiseni viśva sakaḻa / jeṇeṃ viṣayoci mānileṃ kevaḻa /
tayā eka jāṇa phaḻa / dehabharaṇa

ākāśapatitā nīrā / jaisā siṃdhuci yeka thārā /
taiseṃ kṛtyajāta udarā\- / lāgiṃci bujhe

vāṃcūni svargu naraku āthī / tayā hetu pravṛtti nivṛttī /
iye āghaviyeci rātī / jāṇivecī jeṃ

jeṃ dehakhaṃḍā nāma ātmā / īśvara pāṣāṇapratimā /
yayāparautī pramā / ḍhaḻoṃ neṇeṃ

mhaṇe paḍileni śarīreṃ / kelenisīṃ ātmā sare /
mā bhogāvayā ure / koṇa veṣeṃ /

nā īśvaru pāhātāṃ āhe / to bhogavī heṃ jarī hoye /
tarī devaci khāye / vikūniyāṃ

gāṃvīṃceṃ devaḻeśvara / niyāmakaci hotī sācāra /
tarī deśīṃce ḍoṃgara / uge kāṃ asatī ?

aisā vipāyeṃ devo mānije / tarī pāṣāṇamātraci jāṇije /
āṇi ātmā taṃva mhaṇije / dehāteṃci

yereṃ pāpapuṇyādikeṃ / teṃ āghaveṃci karoni laṭikeṃ /
hita mānī agnimukhe / caraṇeṃ jeṃ kāṃ

jeṃ cāmāce ḍoḻe dāvitī / jeṃ iṃdriyeṃ goḍī lāvitī /
teṃci sāca he pratītī / phuḍī jayā

kiṃbahunā aisī prathā / vāḍhatī dekhasī pārthā /
dhūmācī velī vṛthā / ākāśīṃ jaisī

koraḍā nā volā / upegā āthī gelā /
to vāḍhoni moḍalā / bheṃḍu jaisā

nānā uṃsāṃcīṃ kaṇaseṃ / kāṃ napuṃsakeṃ māṇuseṃ /
vana lāgaleṃ jaiseṃ / sābarīceṃ

nātarī bāḻakāceṃ mana / kāṃ corāgharīṃceṃ dhana /
athavā gaḻāstana / śeḻiyece

taiseṃ jeṃ vāyāṇeṃ / vosāḻa dise jāṇaṇeṃ /
tayāteṃ mī mhaṇeṃ / tāmasa jñāna

teṃhī jñāna iyā bhāṣā / bolije to bhāvo aisā /
jātyaṃdhācā kāṃ jaisā / ḍoḻā vāḍu

kāṃ badhirāce nīṭa kāna / apeyā nāma pāna /
taiseṃ āḍanāṃva jñāna / tāmasā tayā

heṃ aso kitī bolāveṃ / tarī aiseṃ jeṃ dekhāveṃ /
teṃ jñāna nohe jāṇāveṃ / ḍoḻasa tama

evaṃ tihīṃ guṇīṃ / bhedaleṃ yathālakṣaṇīṃ /
jñāna śroteśiromaṇī / dāvileṃ tuja

ātāṃ yāci triprakārā / jñānāceni dhanurdharā /
prakāśeṃ hotī gocarā / kartayāṃcyā kriyā

mhaṇauni karma paiṃ gā / anusare tihīṃ bhāgāṃ /
mohare jāliyā voghā / toya jaise

teṃci jñānatrayavaśeṃ / trividha karma jeṃ ase /
tetha sātvika taṃva aiseṃ / parīse ādhīṃ

tarī svādhikārāceni mārgeṃṃ / āleṃ jeṃ mānileṃ āṃgeṃ /
pativrateceni parīṣvaṃgeṃ / priyāteṃ jaiseṃ

sāṃvaḻyā āṃgā caṃdana / pramadālocanīṃ aṃjana /
taiseṃ adhikārāsī maṃḍaṇa / nityapaṇeṃ jeṃ

teṃ nitya karma bhaleṃ / hoya naimittikīṃ sāvāileṃ /
sonayāsi joḍaleṃ / saurabhya jaiseṃ

āṇi āṃgā jīvācī saṃpattī / veṃcūni bāḻācī karī pāḻatī /
parī jīveṃ ubagaṇeṃ heṃ sthitī / na pāhe māya

taiseṃ sarvasveṃ karma anuṣṭhī / parī phaḻa na sūye diṭhī /
ukhitī kriyā paiṭhī / brahmīṃci karī

āṇi priya āliyā svabhāveṃ / śaṃbaḻa ure veṃce ṭhāuveṃ /
navhe taiseṃ satprasaṃgeṃ karāveṃ / pāruṣe jarī

tarī akaraṇāceni khedeṃ / dveṣāteṃ jīvīṃ na bāṃdhe /
jāliyāceni ānaṃdeṃ / phuṃjoṃ neṇeṃ

aisasiyā hātavaṭiyā / karma niphaje jeṃ dhanaṃjayā /
jāṇa sātvika heṃ tayā / guṇanāma gā

yayāvarī rājasāceṃ / lakṣaṇa sāṃgijela sāceṃ /
na karīṃ avadhānāceṃ / vāṇeṃpaṇa

tarī gharīṃ mātāpitarāṃ / dhaḍa bolī nāhīṃ saṃsārā /
yera viśva bharī ādarā / mūrkhu jaisā

kā tuḻaśīciyā jhāḍā / durūni na ghāpeṃ siṃtoḍā /
drākṣīciyā tarī buḍā / dūdhaci lāvije

taisī nityanaimittikeṃ / karmeṃ jiyeṃ āvaśyakeṃ /
tayāṃceviṣayīṃ na śake / baisalā uṭhūṃ

yerāṃ kāmyāceni tarī nāṃveṃ / deha sarvasva āghaveṃ /
vecitāṃhī na manave / bahu aiseṃ

agā devaḍhī vāḍhī lāhije / tetha mola detāṃ na dhāije /
peritāṃ pureṃ na mhaṇije / bīja jevīṃ

kāṃ parīsu āliyā hātīṃ / lohālāgīṃ sarvasaṃpattī /
vecitāṃ ye unnatī / sādhaku jaisā

taisīṃ phaḻeṃ dekhoni puḍheṃ / kāmyakarmeṃ duvāḍeṃ /
karī parī teṃ thokaḍeṃ / keleṃhī mānī

teṇeṃ phaḻakāmukeṃ / yathāvidhī neṭakeṃ /
kāmya kīje titukeṃ / kriyājāta

āṇi tayāhī keliyāceṃ / toṃḍīṃ lāvī dauṃḍīceṃ /
karmī yā nāṃvapāṭāceṃ / vāṇeṃ sārī

taisā bhare karmāhaṃkāru / maga pitā athavā guru /
te na manī kāḻajvaru / auṣadha jaiseṃ

taiseni sāhaṃkāreṃ / phaḻābhilāṣiyeṃ nareṃ /
kīje gā ādareṃ / jeṃ jeṃ kāṃhīṃ

parī teṃhī karaṇeṃ bahuvasā / vaḻaghoni karī sāyāsā /
jīvanopāvo kāṃ jaisā / kolhāṭiyāṃcā

ekā kaṇālāgīṃ.ṇ uṃdiru / āsakā upase ḍoṃgaru /
kāṃ śevāḻoddeśeṃ darduru / samudru ḍahuḻī

paiṃ bhikeparateṃ na lāhe / taऱhī gāruḍī sāpu vāhe /
kāya kīje śīṇuci hoye / goḍu yekāṃ

he aso paramāṇūceni lābheṃ / pātāḻa laṃghitī voḻaṃbe /
taiseṃ svargasukhalobheṃ / vicaṃbaṇeṃ jeṃ

teṃ kāmya karma sakleśa / jāṇāveṃ yetha rājasa /
ātāṃ cinha parisa / tāmasāceṃ

tarī teṃ gā tāmasa karma / jeṃ niṃdeceṃ kāḻeṃ dhāma /
niṣedhāceṃ janma / sāṃca jeṇeṃ

jeṃ nipajavilyāpāṭhīṃṃ / kāṃhīṃca na dise diṭhī /
regha kāḍhaliyā poṭīṃ / toyāce jevīṃ

kāṃ kāṃjī ghusaḻaliyā / kāṃ rākhoṃḍī phuṃkaliyā /
kāṃhīṃ na dise gāḻiliyā / vāḻughāṇā

nānā upaṇiliyā bhūṃsa / kāṃ viṃdhiliyā ākāśa /
nānā māṃḍiliyā pāśa / vārayāsī

heṃ āvagheṃci jaiseṃ / vāṃjheṃ hoūni nāse /
jeṃ keliyā pāṭhīṃ taiseṃ / vāyāṃci jāya

yeऱhavīṃ naradehāhī yevaḍheṃ / dhana āṭaṇīye paḍe /
jeṃ karma niphajavitāṃ moḍe / jagāceṃ sukha

jaisā kamaḻavanīṃ phāṃsu / kāḍhiliyā kāṃṭasu /
āpaṇa jhije nāśu / kamaḻāṃ karī

kāṃ āpaṇa āṃgeṃ jaḻe / āṇi nāgavī jagāce ḍoḻe /
pataṃgu jaisā saḻeṃ / dīpāceni

taiseṃ sarvasva vāyāṃ jāvo / varī dehāhī hoya ghāvo /
parī puḍhilāṃ apāvo / niphajavije jeṇeṃ

māśī āpaṇayāteṃ giḻavī / parī puḍhīlā vāṃtī śiṇavī /
teṃ kaśmaḻa āṭhavī / ācaraṇa jeṃ

teṃhī karāvayo doṣeṃ / maja sāmarthya ase kīṃ nase /
heṃhīṃ puḍhīla taiseṃ / na pāhatāṃ karī

kevaḍhā mājhā upāvo / karitāṃ koṇa prastāvo /
keliyāhī āvo / kāya yetha

iye jāṇivecī soye / avivekāceni pāyeṃ /
pusoniyāṃ hoye / sāṭopa karmīṃ

āpalā vasauṭā jāḻunī / bisāṭe jaisā vanhī /
kāṃ svamaryādā giḻoni / siṃdhu uṭhī

maga neṇeṃ bahu thoḍeṃ / na pāhe māgeṃ puḍheṃ /
mārgāmārga yekavaḍheṃ / karīta cāle

taiseṃ kṛtyākṛtya sarakaṭita / āpapara nuravita /
karma hoya teṃ niścita / tāmasa jāṇa

aisī guṇatrayabhinnā / karmācī gā arjunā /
he kelī vivaṃcanā / upapattīṃsīṃ

ātāṃ yayāci karmā bhajatāṃ / karmābhimāniyā kartā /
to jīvuhī trividhatā / pātalā ase

caturāśramavaśeṃ / eku puruṣu caturdhā dise /
kartayā traividhya taiseṃ / karmabhedeṃ

tarī tayāṃ tihīṃ āṃtu / sātvika taṃva prastutu /
sāṃgena dattacittu / ākarṇīṃ tūṃ

tarī phaḻoddeśeṃ sāṃḍiliyā / vāḍhatī jevīṃ saraḻiyā /
śākhā kāṃ caṃdanāciyā / bāvannayā

kāṃ na phaḻatāṃhī sārthakā / jaisiyā nāgalatikā /
taisiyā karī nityādikāṃ / kriyā jo kāṃ

parī phaḻaśūnyatā / nāhīṃ tayā viphaḻatā /
paiṃ phaḻāsīci paṃḍusutā / phaḻeṃ kāyisī /

āṇi ādareṃ karī bahuvaseṃ / parī kartā mī heṃ numase /
varṣākāḻīṃceṃ jaiseṃ / meghavṛṃda

tevīṃci paramātmaliṃgā / samarpāvayājogā /
karmakalāpu paiṃ gā / nipajāvayā

tayā kāḻāteṃ nulaṃghaṇeṃ / deśaśuddhihī sādhaṇeṃ /
kāṃ śāstrāṃcyā vātīṃ pāhaṇeṃ / kriyānirṇayo

vṛtti karaṇeṃ yekavaḻā / citta jāvoṃ na deṇeṃ phaḻā /
niyamāṃciyā sāṃkhaḻā / vāhaṇeṃ sadā

hā nirodhu sāhāvayālāgīṃ / dhairyāciyā cāṃgacāṃgīṃ /
ciṃtavaṇī jitī āṃgīṃ / vāhe jo kāṃ

āṇi ātmayāciye āvaḍī / karmeṃ karitāṃ varapaḍīṃ /
dehasukhāciye paravaḍīṃ / yevoṃ na lāhe

āḻasā nidrā duऱhāve / kṣudhā na bāṇave /
suravāḍu na pāve / āṃgācā ṭhāvo

taṃva adhikādhika / utsāho dharī āgaḻīka /
soneṃ jaiseṃ puṭīṃ tuka / tuṭaliyā kasīṃ

jarī āvaḍī āthī sāca / tarī jīvitahī salaṃca /
āgīṃ ghālitāṃ romāṃca / dekhijatī satiye /

mā ātmayā yevaḍhīyā priyā / vālabhelā jo dhanaṃjayā /
dehahī sidatāṃ tayā / kāya khedu hoīla ?

mhaṇauni viṣayasuravāḍu tuṭe / jaṃva jaṃva dehabuddhi āṭe /
taṃva taṃva ānaṃdu duṇavaṭe / karmīṃ jayā

aiseni jo karma karī / āṇi koṇe eke avasarīṃ /
teṃ ṭhāke aisī parī / vāhe jarī

tarī kaḍāḍīṃ loṭalā gāḍā / to āpaṇapeṃ na manī avaghaḍā /
taisā ṭhākalenihī thoḍā / nohe jo kāṃ

nātarī ādarileṃ / avyaṃga siddhī geleṃ /
tarī teṃhī jiṃtileṃ / miravūṃ neṇeṃ

iyā khuṇā karma karitāṃ / dekhije jo paṃḍusutā /
tayāteṃ mhaṇipe tattvatāṃ / sātviku kartā

ātāṃ rājasā karteyā / voḻakhaṇeṃ heṃ dhanaṃjayā /
je abhilāṣā jagāciyā / vasauṭā to

jaisā gāvīṃciyā kaśmaḻā / ukaraḍā hoya yekavaḻā /
kāṃ smaśānīṃ amaṃgaḻā / āghavayāṃcī

tayā parī jo aśeṣā / viśvāciyā abhilāṣā /
pāyapākhāḻaṇiyā doṣāṃ / gharaṭā jālā

mhaṇauni phaḻācā lāgu / dekhe jiye asalagu /
tiye karmīṃ cāṃgu / roho māṃḍī

āṇi āpaṇa jāliye joḍī / upakhoṃ nedī kavaḍī /
kṣaṇakṣaṇā kuroṃḍī / jīvācī karī

kṛpaṇu cittīṃ ṭhevā āpulā / taisā dakṣu parāviyā mālā /
baku jaisā khutalā / māseyāsī

āṇi goṃvī geliyā javaḻī / jhagaṭaliyā aṃga phāḻī /
phaḻeṃ tarī āṃtu poḻī / borāṃṭī jaisī

taiseṃ maneṃ vācā kāyeṃ / bhalatayā duḥkha detu jāye /
svārthu sādhitāṃ na pāhe / parāceṃ hita

tevīṃci āṃgeṃ karmīṃ / ācaraṇeṃ nohe kṣamī /
na nighe manodharmīṃ / arocaku

kanakāciyā phaḻā / āṃtu māja bāherī mauḻā /
taisā sabāhya dubaḻā / śucitveṃ jo

āṇi karmajāta keliyā / phaḻa lāhe jarī dhanaṃjayā /
tarī harikheṃ jagā yayā / vāṃkuliyā vāye

athavā jeṃ ādarileṃ / hīnaphaḻa hoya keleṃ /
tarīṃ śokeṃ teṇeṃ jiṃtileṃ / dhikkāroṃ lāge

karmīṃ rāhāṭī aisī / jayāteṃ hotī dekhasī /
toci jāṇa triśuddhīsī / rājasa kartā

ātāṃ yayā pāṭhīṃ yeru / jo kukarmācā āgaru /
tohī karūṃ gocaru / tāmasa kartā

tarī miyāṃ lāgaliyā kaiseṃ / puḍhīla jaḻata ase /
heṃ neṇije hutāśeṃ / jiyāparī

paiṃ śastreṃ miyāṃ tikhaṭeṃ / neṇije kaiseni nivaṭe /
kāṃ neṇije kāḻakūṭeṃ / āpuleṃ keleṃ

taisā puḍhīlayā āpulayā / ghātu karīta dhanaṃjayā /
ādarī vokhaṭiyā / kriyā jo kāṃ

tiyā karitāṃhī veḻīṃ / kāya jāleṃ heṃ na sāṃbhāḻī /
caḻalā vāyu vāhaṭuḻī / ceṣṭe taisā

paiṃ karaṇiyā āṇi jayā / meḻu nāhīṃ dhanaṃjayā /
to pāhunī piseyā / kaiṃcīṃ trāya ?

āṇi iṃdriyāṃceṃ vogarileṃ / caroni rākhe jo jiyāleṃ /
bailātaḻīṃ lāgaleṃ / gociḍa jaiseṃ

hāṃsayā rudanā veḻu / neṇatāṃ ādarī bāḻu /
rāhāṭe ucchṛṃkhaḻu / tayāparī

jo prakṛtī āṃtalepaṇeṃ / kṛtyākṛtyasvādu neṇe /
phuge kereṃ dhālepaṇeṃ / ukaraḍā jaisā

mhaṇauni mānyāceni nāṃveṃ / īśvarāhī parī na khālave /
stabdhapaṇeṃ na manave / ḍoṃgarāsī

āṇi mana jayāceṃ viṣakalloḻīṃ / rāhāṭī phuḍī corilī /
diṭhī kīra te volī / paṇyāṃganecī

kiṃbahunā kapaṭāceṃ / dehaci vaḻileṃ tayāceṃ /
teṃ jiṇeṃ kīṃ juṃvārāceṃ / ṭiṭeghara

nohe tayācā prādurbhāvo / to sābhilāṣa bhillāṃcā gāṃvo /
mhaṇauni naye yevoṃ jāvoṃ / tayā vāṭā

āṇi āṇikāṃceṃ nikeṃ keleṃ / viru hoya jayā āleṃ /
jaiseṃ apeya payā minaleṃ / lavaṇa karī

kāṃ hīṃva aisā padārthu / ghātaliyā āgīāṃtu /
teci kṣaṇīṃ dhaḍāḍitu / agni hoya

nānā sudravyeṃ gomaṭīṃ / jāliyā śarīrīṃ paiṭhīṃ /
hoūni ṭhātī kirīṭī / maḻuci jevīṃ

taiseṃ puḍhilāceṃ baraveṃ / jayācyā bhītarīṃ pāve /
āṇi viruddhaci āghaveṃ / hoūni nige

jo guṇa ghe de dokha / amṛtāceṃ karī vikha /
dūdha pājaliyā dekha / vyāḻu jaisā

āṇi aihikīṃ jiyāveṃ / jeṇeṃ paratrā sāca yāveṃ /
teṃ ucita kṛtya pāve / avasarīṃ jiye

tevhāṃ jayā āpaisī / nidrā ye ṭhevilī aisī /
durvyavahārīṃ jaisī / viṭāḻeṃ loṭe

paiṃ drākṣarasā āmrarasā / veḻe toṃḍa saḍe vāyasā /
kāṃ ḍoḻe phuṭatī divasā / ḍuḍuḻāce

taisā kalyāṇakāḻu pāhe / taiṃ tayāteṃ āḻasu khāye /
nā pramādīṃ tarī hoye / to mhaṇe taiseṃ

jevīṃci sāgarācyā poṭīṃ / jaḻe akhaṃḍa āgiṭhī /
taisā viṣādu vāhe gāṃṭhīṃ / jivāciye jo

leṃḍorāāgīṃ dhūmāvadhi / kāṃ apānā āṃgīṃ durgaṃdhi /
taisā jo jīvitāvadhi / viṣādeṃ kelā

āṇi kalpāṃtāciyā pārā / vegaḻeṃhī jo vīrā /
sūtra dharī vyāpārā / sābhilāṣā

agā jagāhī parautī / śucā vāhe paiṃ cittīṃ /
karitāṃ viṣīṃ hātīṃ / tṛṇahī na lage

aisā jo lokāāṃtu / pāpapuṃju mūrtu /
dekhasī to avyāhatu / tāmasu kartā

evaṃ karma kartā jñāna / yā tihīṃceṃ tridhā cinha /
dāvileṃ tuja sujana / cakravartī

ātāṃ avidyeciyā gāṃvīṃ / mohācī veḍhūni madavī /
saṃdehācīṃ āghavīṃ / leūni leṇīṃ

ātmaniścayācī barava / jayā ārisāṃ pāhe sāvayava /
tiye buddhīcīhī dhāṃva / tridhā ase

agā satvādi guṇīṃ ihīṃ / kāyī eka tihīṃ ṭhāyīṃ /
na kījeci yetha pāhīṃ / jagāmājīṃ

āgī na vasatāṃ poṭīṃ / kavaṇa kāṣṭha ase sṛṣṭīṃ /
taiseṃ teṃ kaiṃceṃ dṛśyakoṭīṃ / trividha jeṃ nohe

mhaṇauni tihīṃ guṇīṃ / buddhī kelī triguṇī /
dhṛtīsihī vāṃṭaṇī / taisīci ase

teṃci yeka vegaḻāleṃ / yathā cinhīṃ aḻaṃkāraleṃ /
sāṃgijaila upāileṃ / bhedalepaṇeṃ

parī buddhi dhṛti iyāṃ / dohīṃ bhāgāmājīṃ dhanaṃṃjayā /
ādhīṃ rūpa buddhīciyā / bhedāsi karūṃ

tarī uttamā madhyamā nikṛṣṭā / saṃsārāsi gā subhaṭā /
prāṇiyāṃ yetiyā vāṭā / tinī āthī

je akaraṇīya kāmya niṣiddha / te he mārga tinhī prasiddha /
saṃsārabhayeṃ sabādha / jīvāṃ yayāṃ

mhaṇauni adhikāreṃ mānileṃ / jeṃ vidhīceni vogheṃ āleṃ /
teṃ ekaci yetha bhaleṃ / nitya karma

teṃci ātmaprāpti phaḻa / diṭhī sūni kevaḻa /
kīje jaiseṃ kāṃ jaḻa / sevije tāhaneṃ

yetuleni teṃ karma / sāṃḍī janmabhaya viṣama /
karūni de ugama / mokṣasiddhi

aiseṃ karī to bhalā / saṃsārabhayeṃ sāṃḍilā /
karaṇīyatveṃ ālā / mumukṣubhāgā

tetha je buddhi aisā / baḻiyā bāṃdhe bharaṃvasā /
mokṣu ṭhevilā aisā / joḍela yetha

mhaṇauni nivṛttīcī māṃḍilī / sūni pravṛttitaḻīṃ /
iye karmīṃ buḍakuḻī / dyāvīṃ kīṃ nā ?

tṛṣārtā udakeṃ jiṇeṃ / kāṃ purīṃ paḍaliyā pohaṇeṃ /
aṃdhakūpīṃ gati kiraṇeṃ / sūryāceni

nānā pathyeṃsīṃ auṣadha lāhe / tarī rogeṃ dāṭalāhī jiye /
kā mīnā jivhāḻā hoye / jaḻācā jarī

tarī tayācyā jīvitā / nāhīṃ jevīṃ anyathā /
taiseṃ karmīṃ iye vartatāṃ / joḍeci mokṣu

heṃ karaṇīyāciyā kaḍe / jeṃ jñāna āthī cokhaḍeṃ /
āṇi akaraṇīya heṃ phuḍeṃ / aiseṃ jāṇa

jīṃ titheṃ kāmyādikeṃ / saṃsārabhayadāyakeṃ /
akṛtyapaṇāceṃ āṃbukheṃ / paḍileṃ jayāṃ

tiye karmīṃ akāryīṃ / janmamaraṇasamayīṃ /
pravṛtti paḻavī pāyīṃ / māgilīṃci

paiṃ āgīmājīṃ na righave / athāvīṃ na ghālave /
dhagadhagīta nāgave / śūḻa jevīṃ

kāṃ kāḻiyānāga dhuṃdhuvātu / dekhoni na ghālave hātu /
na vacave khopeāṃtu / vāghāciye

taiseṃ karma akaraṇīya / dekhoni mahābhaya /
upaje niḥsaṃdeha / buddhī jiye

vāḍhileṃ rāṃdhūni vikheṃ / tetheṃ jāṇije mṛtyu na cuke /
tevīṃ niṣedhīṃ kāṃ dekhe / baṃdhāteṃ je

maga baṃdhabhayabharitīṃ / tiyeṃ niṣiddhīṃ prāptī /
viniyogu jāṇe nivṛttī / karmāciye

aiseni kāryākāryavivekī / je pravṛtti nivṛtti māpakī /
kharā kuḍā pārakhī / jiyāparī

taisī kṛtyākṛtyaśuddhī / bujhe je niravadhī /
sātvika mhaṇipe buddhī / teci tūṃ jāṇa

āṇi bakācyā gāṃvīṃ / ghepe kṣīranīra sakalavī /
kāṃ ahorātrīṃcī goṃvī / āṃdhaḻeṃ neṇe

jayā phulācā makaraṃdu phāve / to kāṣṭheṃ korūṃ dhāṃve /
parī bhramarapaṇā navhe / avhāṃṭā jevīṃ

taisīṃ iyeṃ kāryākāryeṃ / dharmādharmarūpeṃ jiyeṃ /
tiyeṃ na cojavitāṃ jāye / jāṇatī je kāṃ

agā ḍoḻāṃvīṇa motiyeṃ / ghetāṃ pāḍu miḻe vipāyeṃ /
na miḻaṇeṃ teṃ āhe / ṭhevileṃ tetheṃ

taiseṃ akaraṇīya avacaṭeṃ / noḍave tarīca loṭe /
yeऱhavīṃ jāṇeṃ ekavaṭeṃ / donhī je kāṃ

te gā buddhi cokhaviṣīṃ / jāṇa yetha rājasī /
akṣata ṭākilī jaisī / māṃdiyevarī

āṇi rājā jiyā vāṭā jāye / te corāṃsi āḍava hoye /
kāṃ rākṣasāṃ divo pāhe / rātī hoūni

nānā nidhānaci nidaivā / hoye koḻasayācā uḍavā /
paiṃ asateṃ āpaṇapeṃ jīvā / nāhīṃ jāleṃ

taiseṃ dharmajāta titukeṃ / jiye buddhīsī pātakeṃ /
sāca teṃ laṭikeṃ / aiseṃci bujhe

te āghaveci artha / karūni ghālī anartha /
guṇa te te vyavasthita / doṣaci mānī

kiṃbahunā śrutijāteṃ / adhiṣṭhūni keleṃ sarateṃ /
tetuleṃhī uparateṃ / jāṇe je buddhī

te koṇāteṃhī na pusatāṃ / tāmasī jāṇāvī paṃḍusutā /
rātrī kāya dharmārthā / sāca karāvī /

evaṃ buddhīce bheda / tinhī tuja viśada /
sāṃgitale svabodha\- / kumudacaṃdrā

ātāṃ yayāci buddhivṛttī / niṣṭaṃkilā karmajātīṃ /
khāṃdu māṃḍije dhṛtī / trividhā tayā

tiye dhṛtīcehī vibhāga / tinhī yathāliṃga /
sāṃgijatī cāṃga / avadhāna deīṃ

tarī udeliyā dinakaru / corīsiṃ thoke aṃdhāru /
kāṃ rājājñā avyavahāru / kuṃṭhavī jevīṃ

nānā pavanācā sāṭu / vājīnaliyā nīṭu /
āṃgeṃsīṃ bobhāṭu / sāṃḍitī megha

kāṃ agastīceni darśaneṃ / siṃdhu gheūni ṭhātī mauneṃ /
caṃdrodayīṃ kamaḻavaneṃ / miṭhī detī

heṃ aso pāvo ucalilā / madamukha na ṭhevitī khālāṃ /
garjoni puḍhāṃ jālā / siṃhu jarī

taisā jo dhīru / uṭhaliyā aṃtaru /
manādikeṃ vyāpāru / sāṃḍitī ubhīṃ

iṃdriyāṃ viṣayāṃciyā gāṃṭhī / apaisayā suṭatī kirīṭī /
mana māyecyā poṭīṃ / rigatī dāhī

adhordhva gūḍheṃ kāḍhī / prāṇa navāṃcī peṃḍī /
bāṃdhoni ghālī uḍī / madhyamemājīṃ

saṃkalpavikalpāṃceṃ lugaḍe / sāṃḍūni mana ughaḍeṃ /
buddhi māgilekaḍe / ugīci baise

aisī dhairyarājeṃ jeṇeṃ / mana prāṇa karaṇeṃ /
svaceṣṭāṃcīṃ saṃbhāṣaṇeṃ / sāṃḍavijatī

maga āghavīṃci saḍīṃ / dhyānācyā āṃtulyā maḍhīṃ /
koṃḍijatī niravaḍī / yogāciye

parī paramātmayā cakravartī / ugāṇitī jaṃva hātīṃ /
taṃva lāṃcu na ghetāṃ dhṛtī / dharijatī jiyā

te gā dhṛtī yetheṃ / sātvika heṃ niruteṃ /
āīka arjunāteṃ / śrīkāṃtu mhaṇe

āṇi hoūniyāṃ śarīrī / svargasaṃsārācyā dohīṃ gharīṃ /
nāṃde jo poṭabharī / trivargopāyeṃ

to manorathāṃcyā sāgarīṃ / dharmārthakāmāṃcyā tāruvāvarī /
jeṇeṃ dhairyabaḻeṃ karī / kriyā\-vaṇija

jeṃ karma bhāṃḍavalā sūye / tayācī cauguṇī yetī pāhe /
yevaḍheṃ sāyāsa sāhe / jayā dhṛtī

te gā dhṛtī rājasa / pārthā yetha parīyesa /
ātāṃ āika tāmasa / tisarī je kāṃ

tarī sarvādhameṃ guṇeṃ / jayāceṃ kāṃ rūpā yeṇeṃ /
koḻasā kāḻepaṇeṃ / ghaḍalā jaisā

aho prākṛta āṇi hīnu / tayāhī kīṃ guṇatvācā mānu /
tarī na mhaṇije puṇyajanu / rākṣasu kāī ?

paiṃ grahāṃmājīṃ iṃgaḻu / tayāteṃ mhaṇije maṃgaḻu /
taisā tamīṃ dhasāḻu / guṇaśabdu hā

je sarvadoṣāṃcā vasauṭā / tamaci kāmaūni subhaṭā /
ubhārilā āṃgavaṭhā / jayā narācā

to āḻasu sūni ase kāṃkhe / mhaṇauni nidre kahīṃ na muke /
pāpeṃ poṣitāṃ duḥkheṃ / na sāṃḍije jevīṃ

āṇi dehadhanāciyā āvaḍī / sadā bhaya tayāteṃ na sāṃḍī /
visaṃbūṃ na sake dhoṃḍīṃ / kāṭhiṇya jaiseṃ

āṇi padārthajātīṃ sneho / bāṃdhe mhaṇauni to śokeṃ ṭhāvo /
kelā na śake pāpa jāvoṃ / kṛtaghnauni jaiseṃ

āṇi asaṃtoṣa jīveṃsīṃ / dharūni ṭhelā aharniśīṃ /
mhaṇauni maitrī teṇeṃsīṃ / viṣādeṃ kelī

lasaṇāteṃ na sāṃḍī gaṃdhī / kāṃ apathyaśīḻāteṃ vyādhī /
taisī kelī maraṇāvadhī / viṣādeṃ tayā

āṇi vayasā vittakāmu / yayāṃcā vāḍhavī saṃbhramu /
mhaṇauni madeṃ āśramu / toci kelā

āgīteṃ na sāṃḍī tāpu / saḻāteṃ jātīcā sāpu /
kāṃ jagācā vairī vāsipu / akhaṃḍu jaisā

nātarī śarīrāteṃ kāḻu / na visaṃbe kavaṇe veḻu /
taisā āthī aḍhaḻu / tāmasīṃ madu

evaṃ pāṃcahī he nidrādika / tāmasācyā ṭhāīṃ dokha /
jiyā dhṛtī dekha / dharileṃ āhātī

tiye gā dhṛtī nāṃveṃ / tāmasī yetha heṃ jāṇāveṃ /
mhaṇitaleṃ teṇeṃ deveṃ / jagācenī

evaṃ trividha je buddhi / kīje karmaniścayo ādhi /
to dhṛtī yā siddhi / neijo yetha

sūryeṃ mārgu gocaru hoye / āṇi to cālatī kīra pāye /
parī cālaṇeṃ teṃ āhe / dhairyeṃ jevīṃ

taisī buddhi karmāteṃ dāvī / te karaṇasāmagrī niphajavī /
parī niphajāvayā hoāvī / dhīratā je

te he gā tujapratī / sāṃgītalī trividha dhṛtī /
yayā karmatrayā niṣpattī / jāliyā maga

yetha phaḻa jeṃ eka niphaje / sukha jayāteṃ mhaṇije /
teṃhī trividha jāṇije / karmavaśeṃ

tarī phaḻarūpa teṃ sukha / triguṇīṃ bhedaleṃ dekha /
vivaṃcūṃ ātāṃ cokha / cokhīṃ bolīṃ

parī cokhī te kaisī sāṃge / paiṃ ghevoṃ jātāṃ bolabageṃ /
kānīṃciyehī lāge / hātīṃcā maḻu

mhaṇauni jayāceni avhereṃ / avadhānahī hoya bāhireṃ /
teṇeṃ āika ho āṃtareṃ / jīvāceni jīveṃ

aiseṃ mhaṇauni devo / trividhā sukhācā prastāvo /
māṃḍalā to nirvāho / nirūpita aseṃ

mhaṇe sukhatrayasaṃjñā / sāṃgoṃ mhaṇauni pratijñā /
boliloṃ teṃ prājñā / aika ātāṃ

tarī sukha teṃ gā kirīṭī / dāvijela tuja diṭhī /
jeṃ ātmayāciye bheṭī / jīvāsi hoya

parī mātreceni māpeṃ / divyauṣadha jaiseṃ ghepeṃ /
kāṃ kathilāceṃ kīje rupeṃ / rasabhāvanīṃ

nānā lavaṇāceṃ jaḻu / hoāvayā doni cāra veḻu /
deūni sāṃḍijatī ḍhāḻu / toyāceṃ jevīṃ

tevīṃ jāleni sukhaleśeṃ / jīvu bhāviliyā abhyāseṃ /
jīvapaṇāceṃ nāse / duḥkha jetheṃ

teṃ yetha ātmasukha / jāleṃ ase triguṇātmaka /
teṃhī sāṃgoṃ ekaika / rūpa ātāṃ

ātāṃ caṃdanāceṃ būḍa / sarpī jaiseṃ duvāḍa /
kāṃ nidhānāceṃ toṃḍa / vivasiyā jevīṃ

agā svargīṃceṃ gomaṭeṃ / āḍava yāgasaṃkaṭeṃ /
kāṃ bāḻapaṇa dāsaṭeṃ / trāsakāḻeṃ

heṃ aso dīpāciye siddhī / avaghaḍa dhū ādhīṃ /
nātarī to auṣadhīṃ / jibhecā ṭhāvo

tayāparī pāṃḍavā / jayā sukhācā rigāvā /
viṣama tetha meḻāvā / yamadamāṃcā

deta sarvasnehā miṭhī / āgīṃ aiseṃ vairāgya uṭhī /
svarga saṃsārā kāṃṭī / kāḍhitaci

vivekaśravaṇeṃ kharapuseṃ / jetha vratācaraṇeṃ karkaśeṃ /
karitāṃ jātī bhokase / buddhyādikāṃce

suṣumneceni toṃḍeṃ / giḻije prāṇāpānāce loṃḍhe /
bohaṇiyesīci yevaḍheṃ / bhārī jetha

jeṃ sārasāṃhī vighaḍatāṃ / hoya vohāhūni vasta kāḍhitāṃ /
nā bhaṇaṃgu davaḍitāṃ / bhāṇayāvarunī

paiṃ māyepuḍhauni bāḻaka / kāḻeṃ netāṃ ekulateṃ eka /
hoya kāṃ udaka / tuṭatāṃ mīnā

taiseṃ viṣayāṃceṃ ghara / iṃdriyāṃ sāṃḍitāṃ thora /
yugāṃtu hoya teṃ vīra / virāga sāhātī

aisā jayā sukhācā āraṃbhu / dāvī kāṭhiṇyācā kṣobhu /
maga kṣīrābdhī lābhu / amṛtācā jaisā

pahilayā vairāgyagaraḻā / dhairyaśaṃbhu voḍavī gaḻā /
tarī jñānāmṛteṃ sohaḻā / pāhe jetheṃ

paiṃ kolitāhī kope aiseṃ / drākṣāṃceṃ hiravepaṇa ase /
teṃ parīpākīṃ kāṃ jaiseṃ / mādhurya āte

teṃ vairāgyādika taiseṃ / pikaliyā ātmaprakāśeṃ /
maga vairāgyeṃsīṃhī nāśe / avidyājāta

tevhāṃ sāgarīṃ gaṃgā jaisī / ātmīṃ mīnalyā buddhi taisī /
advayānaṃdācī āpaisī / khāṇī ughaḍe

aiseṃ svānubhavaviśrāmeṃ / vairāgyamūḻa jeṃ pariṇame /
teṃ sātvika yeṇeṃ nāmeṃ / bolije sukha

āṇi viṣayeṃdriyāṃ / meḻu hotāṃ dhanaṃjayā /
jeṃ sukha jāya thaḍiyā / sāṃḍūni donhī

adhikāriyā rigatāṃ gāṃvo / hoya jaisā utsāho /
kāṃ riṇāvarī vivāho / vistārilā

nānā rogiyā jibhepāsīṃ / keḻeṃ goḍa sākharesīṃ /
kāṃ bacanāgācī jaisī / madhuratā pahilī

pahileṃ saṃvacorāceṃ maitra / hāṭabheṭīceṃ kalatra /
kāṃ lāghaviyāce vicitra / vinoda te

taiseṃ viṣayeṃdriyadokhīṃ / jeṃ sukha jīvāteṃ pokhī /
maga upaḍilā khaḍakīṃ / haṃsu jaisā

taisī joḍī āghavī āṭe / jīvitācā ṭhāya phiṭe /
sukṛtāciyāhī suṭe / dhanācī gāṃṭhī

āṇika bhogileṃ jeṃ kāṃhīṃ / teṃ svapna taiseṃ hoya nāhīṃ /
maga hānīcyāci ghāīṃ / loḻāveṃ ure

aiseṃ āpattī jeṃ sukha / aihikīṃ pariṇame dekha /
paratrīṃ kīra vikha / hoūni parate

je iṃdriyajātā laḻā / didhaliyā dharmācā maḻā /
jāḻūni bhogije sohaḻā / viṣayāṃcā jetha

tetha pātakeṃ bāṃdhitī thāvo / tiyeṃ narakīṃ detī ṭhāvo /
jeṇeṃ sukheṃ hā apāvo / paratrīṃ aisā

paiṃ nāmeṃ viṣa mahureṃ / parī mārūni aṃtīṃ khareṃ /
taiseṃ ādi jeṃ goḍireṃ / aṃtīṃ kaḍū

pārthā teṃ sukha sāceṃ / vaḻileṃ āhe rajāceṃ /
mhaṇauni na śiveṃ tayāceṃ / āṃga kahīṃ

āṇi apeyāceni pāneṃ / akhādyāceni bhojaneṃ /
svairastrīsaṃnidhāneṃ / hoya jeṃ sukha

kā puḍhilāṃceni māreṃ / nātarī parasvāpahāreṃ /
jeṃ sukha avatare / bhāṭācyā bolīṃ

jeṃ ālasyāvarī pokhije / nidremājīṃ jeṃ dekhije /
jayācyā ādyaṃtīṃ bhulije / āpulī vāṭa

teṃ gā sukha pārthā / tāmasa jāṇa sarvathā /
heṃ bahu na sāṃgoṃci jeṃ kathā / asaṃbhāvya he

aiseṃ karmabhedeṃ mudaleṃ / phaḻasukhahī tridhā jāleṃ /
teṃ heṃ yathāgameṃ keleṃ / gocara tuja

te kartā karma karmaphaḻa / ye tripuṭī yekī kevaḻa /
vāṃcūni kāṃhīṃci nase sthūla / sūkṣmīṃ iye

āṇi he taṃva tripuṭī / tihīṃ guṇīṃ ihīṃ kirīṭī /
guṃphilī ase paṭīṃ / tāṃtuvīṃ jaisī

mhaṇauni prakṛtīcyā āvalokīṃ / na baṃdhije ihīṃ satvādikīṃ /
taisī svargīṃ nā mṛtyulokīṃ / āthī vastu

kaiṃcā loṃvevīṇa kāṃbaḻā / mātiyevīṇa modaḻā /
kā jaḻeṃvīṇa kalloḻā / hoṇeṃ āhe ?

taiseṃ na honi guṇāceṃ / sṛṣṭīcī racanā race /
aiseṃ nāhīṃci gā sāceṃ / prāṇijāta

yālāgīṃ heṃ sakaḻa / tihīṃ guṇāṃceṃci kevaḻa /
ghaḍaleṃ āhe nikhiḻa / aiseṃ jāṇa

guṇīṃ devāṃ trayī lāvilī / guṇīṃ lokīṃ tripuṭī pāḍilī /
caturvarṇā ghātalī / sinānīṃ uḻigeṃ

teci cārī varṇa / pusasī jarī koṇa koṇa /
tarī jayāṃ mukhya brāhmaṇa / dhurece kāṃ

yera kṣatriya vaiśya donhī / tehī brāhmaṇācyāci mānije mānī /
je te vaidikavidhānīṃ / yogya mhaṇauni

cauthā śūdru jo dhanaṃjayā / vedīṃ lāgu nāhīṃ tayā /
taऱhīṃ vṛtti varṇatrayā / ādhīna tayācī

tiye vṛtticiyā javaḻikā / varṇā brāhmaṇādikāṃ /
śūdrahī kīṃ dekhā / cauthā jālā

jaisā phulāceni sāṃgāteṃ / tāṃtuṃ turaṃbije śrīmaṃteṃ /
taiseṃ dvijasaṃgeṃ śūdrāteṃ / svīkārī śrutī

aisaisī gā pārthā / he caturvarṇavyavasthā /
karūṃ ātāṃ karmapathā / yāṃciyā rūpā

jihīṃ guṇīṃ te varṇa cārī / janmamṛtyūṃciye kātarī /
cukoniyāṃ īśvarīṃ / paiṭhe hotī

jiye ātmaprakṛtīce ihīṃ / guṇīṃ sattvādikīṃ tihīṃ /
karmeṃ caughāṃ cahūṃ ṭhāīṃ / vāṃṭilīṃ varṇā

jaiseṃ bāpeṃ joḍileṃ leṃkā / vāṃṭileṃ sūryeṃ mārga pāṃthikā /
nānā vyāpāra sevakāṃ / svāmī jaiseṃ

taisī prakṛtīcyā guṇīṃ / jayā karmācī velhāvaṇī /
kelī āhe varṇīṃ / cahūṃ ihīṃ

tetha sattveṃ āpalyā āṃgīṃ / samīna\-nimīna bhāgīṃ /
doghe kele niyogī / brāhmaṇa kṣatriya

āṇi raja parī sāttvika / tetha ṭhevileṃ vaiśya loka /
rajaci tamabhesaka / tetha śūdra te gā

aisā yekāci prāṇivṛṃdā / bhedu caturvarṇadhā /
guṇīṃci prabuddhā / kelā jāṇa

maga āpuleṃ ṭhevileṃ jaiseṃ / āiteṃci dīpeṃ dise /
guṇabhinna karma taiseṃ / śāstra dāvī

teṃci ātāṃ koṇa koṇa / varṇavihitāceṃ lakṣaṇa /
heṃ sāṃgoṃ aika śravaṇa\- / saubhāgyanidhī

tarī sarveṃdriyāṃciyā vṛttī / gheūni āpulyā hātīṃ /
buddhi ātmayā miḻe yekāṃtīṃ / priyā jaisī

aisā buddhīcā uparamu / tayā nāma mhaṇipe śamu /
to guṇa gā upakramu / jayā karmācā

āṇi bāhyeṃdriyāṃceṃ dheṃḍeṃ / piṭūni vidhīceni daṃḍeṃ /
nedije adharmākaḍe / kahīṃci jāvoṃ

to paiṃ gā śamā virajā / damu guṇa jetha dujā /
āṇi svadharmāciyā vojā / jiṇeṃ jeṃ kāṃ

saṭavīciye rātīṃ / na visaṃbije jevīṃ vātī /
taisā īśvaranirṇayo cittīṃ / vāhaṇeṃ sadā

tayā nāma tapa / te tijayā guṇāceṃ rūpa /
āṇi śaucahī niṣpāpa / dvividha jetha

mana bhāvaśuddhī bharaleṃ / āṃga kriyā aḻaṃkārileṃ /
aiseṃ sabāhya jiyāleṃ / sājireṃ jeṃ kāṃ

tayā nāma śauca pārthā / to karmīṃ guṇa jaye cauthā /
āṇi pṛthvīciyā parī sarvathā / sarva jeṃ sāhāṇeṃ

te gā kṣamā pāṃḍavā / guṇa jetha pāṃcavā /
svarāṃmājīṃ suhāvā / paṃcamu jaisā

āṇi vāṃkaḍenī vogheṃsīṃ / gaṃgā vāhe ujūci jaisī /
kāṃ puṭīṃ vaḻalā ūsīṃ / goḍī jaisī

taisā viṣamāṃhī jīvāṃ- / lāgīṃ ujukāru baravā /
teṃ ārjava gā sāhāvā / jethīṃcā guṇa

āṇi pāṇiyeṃ prayatneṃ māḻī / akhaṃḍa jace jhāḍāmuḻīṃ /
parī teṃ āghaveṃci phaḻīṃ / jāṇe jevīṃ

taiseṃ śāstrācāreṃ teṇeṃ / īśvaruci yeku pāvaṇeṃ /
heṃ phuḍeṃ jeṃ kāṃ jāṇaṇeṃ / teṃ yetha jñāna

teṃ gā karmīṃ jiye / sātavā guṇa hoye /
āṇi vijñāna heṃ pāheṃ / evaṃrūpa

tarī satvaśuddhīciye veḻe / śāstreṃ kāṃ dhyānabaḻeṃ /
īśvaratattvīṃci miḻe / niṣṭaṃkabuddhī

heṃ vijñāna baraveṃ / guṇaratna jetha āṭhaveṃ /
āṇi āstikya jāṇāveṃ / navavā guṇa

paiṃ rājamudrā āthiliyā / prajā bhaje bhalatayā /
tevīṃ śāstreṃ svīkāriliyā / mārgamātrāteṃ

ādareṃ jeṃ kāṃ mānaṇeṃ / teṃ āstikya mī mhaṇeṃ /
to navavā guṇa jeṇeṃ / karma teṃ sāca

evaṃ navahī śamādika / guṇa jetha nirdokha /
teṃ karma jāṇa svābhāvika / brāhmaṇāceṃ

to navaguṇaratnākaru / yayā navaratnāṃcā hāru /
na pheḍīta le dinakaru / prakāśu jaisā

nānā cāṃpā cāṃpauḻī pūjilā / caṃdru caṃdrikā dhavaḻalā /
kāṃ caṃdanu nijeṃ carcilā / saurabhyeṃ jevīṃ

tevīṃ navaguṇaṭikalaga / leṇeṃ brāhmaṇāceṃ avyaṃga /
kahīṃci na saṃḍī āṃga / brāhmaṇāceṃ

ātāṃ ucita jeṃ kṣatriyā / teṃhīṃ karma dhanaṃjayā /
sāṃgoṃ aika prajñeciyā / bharovarī

tarī bhānu hā tejeṃ / nāpekṣī jevīṃ viraje /
kāṃ siṃheṃ na pāhije / jāvaḻiyā

aisā svayaṃbha jo jīveṃ lāṭhu / sāvāyeṃvīṇa udbhaṭu /
te śaurya gā jetha śreṣṭhu / pahilā guṇa

āṇi sūryāceni pratāpeṃ / koḍihī nakṣatra hārape /
nā to tarī na lope / sacaṃdrīṃ tihīṃ

taiseni āpule prauḍhīguṇeṃ / jagā yā vismayo deṇeṃ /
āpaṇa tarī na kṣobhaṇeṃ / kāyasenahī

teṃ prāgalbhyarūpa tejā / jiye karmīṃ guṇa dujā /
āṇi dhīru to tijā / jethīṃcā guṇa

varipaḍaliyā ākāśa / buddhīce ḍoḻe mānasa /
jhāṃkī nā te parīyesa / dhairya jetheṃ

āṇi pāṇī ho kāṃ bhalatetukeṃ / parī teṃ jiṇauni padma phāṃke /
kāṃ ākāśa uṃciyā jiṃke / āvaḍe tayāteṃ

tevīṃ vividha avasthā / pātaliyā jiṇauni pārthā /
prajñāphaḻa tayā arthā / vejha deṇeṃ jeṃ

teṃ dakṣatva gā cokha / jetha cauthā guṇa dekha /
āṇi jhuṃja alaukika / to pāṃcavā guṇa

ādityācīṃ jhāḍeṃ / sadā sanmukha sūryākaḍe /
tevīṃ samora śatrūpuḍheṃ / hoṇeṃ jeṃ kāṃ

māhevaṇī prayatneṃsī / cukavije seje jaisī /
ripū pāṭhī nedije taisī / samarāṃgaṇīṃ

hā kṣatriyāceyā ācārīṃ / pāṃcavā guṇeṃdru avadhārīṃ /
cahūṃ puruṣārthāṃ śirīṃ / bhakti jaisī

āṇi jāleni phuleṃ phaḻeṃ / śākhiyā jaisīṃ mokaḻe /
kāṃ udāra parīmaḻeṃ / padmākaru

nānā āvaḍīceni māpeṃ / cāṃdiṇeṃ bhalateṇeṃ ghepe /
puḍhilāṃceni saṃkalpeṃ / taiseṃ jeṃ deṇeṃ

teṃ umapa gā dāna / jetha sahāveṃ guṇaratna /
āṇi ājñe ekāyatana / hoṇeṃ jeṃ kāṃ

poṣūni avayava āpule / karavijatīṃ mānavile /
tevīṃ pālaṇeṃ lobhavileṃ / jaga jeṃ bhogaṇeṃ

tayā nāma īśvarabhāvo / jo sarvasāmarthyācā ṭhāvo /
to guṇāṃmājīṃ rāvo / sātavā jetha

aiseṃ jeṃ śauryādikīṃ / ihīṃ sāta guṇaviśekhīṃ /
aḻaṃkṛta saptaṛkhīṃ / ākāśa jaiseṃ

taiseṃ saptaguṇīṃ vicitra / karma jeṃ jagīṃ pavitra /
teṃ sahaja jāṇa kṣātra / kṣatriyāceṃ

nānā kṣatriya navhe naru / to sattvasonayācā meru /
mhaṇauni guṇasvargāṃ ādhāru / sātāṃ iyāṃ

nātarī saptaguṇārṇavīṃ / parīvāralī baravī /
he kriyā navhe pṛthvī / bhogītase to

kāṃ guṇāṃce sātāṃhī oghīṃ / he kriyā te gaṃgā jagīṃ /
tayā mahodadhīciyā āṃgīṃ / vilase jaisī

parī heṃ bahu aso dekha / śauryādi guṇātmaka /
karma gā naisargika / kṣātrajātīsī

ātāṃ vaiśyāciye jātī / ucita je mahāmatī /
te aikeṃ gā nirutī / kriyā sāṃgoṃ

tarī bhūmi bīja nāṃgaru / yayā bhāṃḍavalācā ādhāru /
gheūni lābhu apāru / meḻavaṇeṃ jeṃ

kiṃbahunā kṛṣī jiṇeṃ / godhaneṃ rākhoni vartaṇeṃ /
kāṃ samarghīcī vikaṇeṃ / maharghīvastu

yetulāci pāṃḍavā / vaiśyāteṃ karmācā meḻāvā /
hā vaiśyajātīsvabhāvā / āṃtulā jāṇa

āṇi vaiśya kṣatriya brāhmaṇa / he dvijanmeṃ tinhī varṇa /
yayāṃceṃ jeṃ śuśrūṣaṇa / teṃ śūdrakarma

paiṃ dvijaseveparauteṃ / dhāṃvaṇeṃ nāhīṃ śūdrāteṃ /
evaṃ caturvarṇociteṃ / dāvilīṃ karmeṃ

ātāṃ iyeci vicakṣaṇā / vegaḻāliyā varṇā /
ucita jaiseṃ karaṇāṃ / śabdādika

nātarī jaḻadacyutā / pāṇiyā ucita saritā /
saritesī paṃḍusutā / siṃdhu ucitu

taiseṃ varṇāśramavaśeṃ / jeṃ karaṇīya āleṃ ase /
goreyā āṃgā jaiseṃ / gorepaṇa

tayā svabhāvavihitā karmā / śāstrāceni mukheṃ vīrottamā /
pravartāvayālāgīṃ pramā / aḍhaḻa kīje

paiṃ āpuleṃci ratna thiteṃ / ghepe pārakhiyāceni hāteṃ /
taiseṃ svakarma āpaiteṃ / śāstreṃ karāvīṃ

jaisī diṭhī ase āpuliyā ṭhāyīṃ / parī dīpeṃvīṇa bhoga nāhīṃ /
mārgu na lāhatāṃ kāī / pāya asatāṃ hoya ?

mhaṇauni jñātivaśeṃ sācāru / sahaja ase jo adhikāru /
to āpuliyā śāstreṃ gocaru / āpaṇa kīje

maga gharīṃcāci ṭhevā / jevīṃ ḍoḻyāṃ dāvī divā /
tarī ghetāṃ kāya pāṃḍavā / āḍaḻu ase ?

taiseṃ svabhāveṃ bhāgā āleṃ / varī śāstreṃ khareṃ keleṃ /
teṃ vihita jo āpuleṃ / ācare gā

parī āḻasu sāṃḍunī / phaḻakāma davaḍunī /
āṃgeṃ jīveṃ māṃḍunī / tetheṃci bharu

voghīṃ paḍileṃ pāṇī / neṇeṃ ānānī vāhaṇī /
taisā jāya ācaraṇīṃ / vyavasthaunī

arjunā jo yāparī / teṃ vihita karma svayeṃ karī /
to mokṣācyā ailadvārīṃ / paiṭhā hoya

je akaraṇā āṇi niṣiddhā / na vaceci kāṃhīṃ saṃbaṃdhā /
mhaṇauni bhavā viruddhā / mukalā to

āṇi kāmyakarmāṃkaḍe / na parateci jetha koḍeṃ /
tetha caṃdanācehī khoḍe / na leci to

yera nitya karma taṃva / phaḻatyāgeṃ veṃcileṃ sarva /
mhaṇauni mokṣācī śīṃva / ṭhākūṃ lāhe

aiseni śubhāśubhīṃ saṃsārīṃ / sāṃḍilā to avadhārīṃ /
vaurāgyamokṣadvārīṃ / ubhā ṭhāke

jeṃ sakaḻa bhāgyācī sīmā / mokṣalābhācī jeṃ pramā /
nānā karmamārgaśramā / śevaṭu jetha

mokṣaphaḻeṃ didhalī vola / jeṃ sukṛtatarūceṃ phūla /
tayeṃ vairāgyīṃ ṭhevī pāūla / bhaṃvaru jaisā

pāhīṃ ātmajñānasudinācā / vādhāvā sāṃgatayā aruṇācā /
udayo tyā vairāgyācā / ṭhāvo pāve

kiṃbahunā ātmajñāna / jeṇeṃ hātā ye nidhāna /
teṃ vairāgya divyāṃjana / jīveṃ le to

aisī mokṣācī yogyatā / siddhī jāya tayā paṃḍusutā /
anusaroni vihitā / karmā yayā

heṃ vihita karma pāṃḍavā / āpulā ananya volāvā /
āṇi heci parama sevā / maja sarvātmakācī

paiṃ āghavāci bhogeṃsīṃ / pativratā krīḍe priyeṃsīṃ /
kīṃ tayācīṃ nāmeṃ jaisīṃ / tapeṃ tiyāṃ kelīṃ

kāṃ bāḻakā ekī māye / vāṃconi jiṇeṃ kāya āhe /
mhaṇauni sevije kīṃ to hoye / pāṭācā dharmu

nānā pāṇī mhaṇauni māsā / gaṃgā na sāṃḍitāṃ jaisā /
sarva tīrtha sahavāsā / varapaḍā jālā

taiseṃ āpuliyā vihitā / upāvo ase na visaṃbitāṃ /
aisā kīje kīṃ jagannāthā / ābhāru paḍe

agā jayā jeṃ vihita / teṃ īśvarāceṃ manogata /
mhaṇauni keliyā nibhrāṃta / sāṃpaḍeci to

paiṃ jīvāce kasīṃ utaralī / te dāsī kīṃ gosāvīṇa jālī /
sise veṃci tayā mavilī / vahī jevīṃ

taiseṃ svāmīciyā manobhāvā / na cukije heci paramasevā /
yera teṃ gā pāṃḍavā / vāṇijya karaṇeṃ

mhaṇauni vihita kriyā kelī / navhe tayācī khūṇa pāḻilī /
jayāpasūni kāṃ ālīṃ / ākārā bhūteṃ

jo avidyeciyā ciṃdhiyā / guṃḍūni jīva bāhuliyā /
kheḻavītase tiguṇiyā / ahaṃkārarajjū

jeṇeṃ jaga heṃ samasta / āṃta bāherī pūrṇa bharita /
jāleṃ āhe dīpajāta / tejeṃ jaiseṃ

tayā sarvātmakā īśvarā / svakarmakusumāṃcī vīrā /
pūjā kelī hoya apārā / toṣālāgīṃ

mhaṇauni tiye pūje / rijhaleni ātmarājeṃ /
vairāgyasiddhi deīje / pasāya tayā

jiye vairāgyadaśeṃ / īśvarāceni vedhavaśeṃ /
heṃ sarvahī nāvaḍe jaiseṃ / vāṃta hoya

prāṇanāthāciyā ādhī / virahiṇīteṃ jiṇeṃhī bādhī /
taiseṃ sukhajāta triśuddhī / duḥkhaci lāge

samyak‌jñāna nudaijatāṃ / vedheṃci tanmayatā /
upaje aisī yogyatā / bodhācī lāhe

mhaṇauni mokṣalābhālāgīṃ / jo vrateṃ vāhātaseṃ āṃgīṃ /
teṇeṃ svadharmu āsthā cāṃgī / anuṣṭhāvā

agā āpulā hā svadharmu / ācaraṇīṃ jarī viṣamu /
tarī pāhāvā to pariṇāmu / phaḻela jeṇeṃ

jaiṃ sukhālāgīṃ āpaṇapayāṃ / niṃbaci āthī dhanaṃjayā /
taiṃ kaḍuvaṭapaṇā tayāciyā / ubagijenā

phaḻaṇayā ailīkaḍe / keḻīteṃ pāhātāṃ āsa moḍe /
aisī tyajilī tarī joḍe / taiseṃ keṃ gomaṭeṃ

tevīṃ svadharmu sāṃkaḍu / dekhoni kelā jarī kaḍu /
tarī mokṣasuravāḍu / aṃtaralā kīṃ

āṇi āpulī māye / kubja jarī āhe /
tarī jīye teṃ nohe / sneha kuऱheṃ kīṃ

yerī jiyā parāviyā / raṃbhehuni baraviyā /
tiyā kāya karāviyā / bāḻakeṃ teṇeṃ ?

agā pāṇiyāhūni bahuveṃ / tupīṃ guṇa kīra āhe /
parī mīnā kāya hoye / asaṇeṃ tetha

paiṃ āghaviyā jagā jeṃ vikha / teṃ vikha kiḍiyāceṃ pīyūkha /
āṇi jagā gūḻa teṃ dekha / maraṇa tayā

mhaṇauni je vihita jayā jeṇeṃ / phiṭe saṃsārāceṃ dharaṇeṃ /
kriyā kaṭhora taऱhī teṇeṃ / teci karāvī

yerā parācārā baraviyā / aiseṃ hoīla ṭeṃkalayā /
pāyāṃceṃ cālaṇeṃ ḍoiyā / keleṃ jaiseṃ

yālāgīṃ karma āpule / jeṃ jātisvabhāveṃ ase āleṃ /
teṃ karī teṇeṃ jiṃtileṃ / karmabaṃdhāteṃ

āṇi svadharmuci pāḻāvā / paradharmu to gāḻāvā /
hā nemuhī pāṃḍavā / na kījeci pai gā ?

tarī ātmā dṛṣṭa nohe / taṃva karma karaṇeṃ kāṃ ṭhāye ? /
āṇi karaṇeṃ tetha āhe / āyāsu ādhīṃ

mhaṇauni bhalatiye karmīṃ / āyāsu jaऱhī upakramīṃ /
tarī kāya svadharmīṃ / doṣu / sāṃgeṃ ?

āgā ujū vāṭā cālāveṃ / taऱhī pāyaci śiṇavāve /
nā āḍarāneṃ dhāṃvāveṃ / taऱhī teṃci

paiṃ śiḻā kāṃ sidoriyā / dāṭaṇeṃ eka dhanaṃjayā /
parī jeṃ vāhatāṃ visāṃvayā / miḻije teṃ ghepe

yeऱhavīṃ kaṇā āṇi bhūsā / kāṃḍitāṃhī sosu sarisā /
jeṃci raṃdhana śvāna māṃsā / teṃci havī

dadhī jaḻāciyā ghusaḻaṇā / vyāpāra sārikheci vicakṣaṇā /
vāḻuve tiḻā ghāṇā / gāḻaṇeṃ eka

paiṃ nitya homa deyāvayā / kāṃ sairā āgī suvāvayā /
phuṃkitāṃ dhū dhanaṃjayā / sāhaṇeṃ teṃci

parī dharmapatnī dhāṃgaḍī / positāṃ jarī ekī voḍhī /
tarī kāṃ aparavaḍī / āṇāvī āṃgā ?

hāṃ gā pāṭhīṃ lāgalā ghāī / maraṇa na cukeci pāhīṃ /
tarī samoralā kāī / āgaḻeṃ na kīje ?

kulastrī dāṃḍyāce ghāye / paraghara rigālīhi jarī sāhe /
tarī svapatīteṃ vāyeṃ / sāṃḍileṃ kīṃ /

taiseṃ āvaḍateṃhī karaṇeṃ / na nipaje śiṇalyāviṇeṃ /
tarī vihita bā re koṇeṃ / boleṃ bhārī ?

varī thoḍeṃci amṛta ghetāṃ / sarvasva veṃco kāṃ paṃḍusutā /
jeṇeṃ joḍe jīvitā / akṣayatva

yera kāhyāṃ moleṃ veṃcūni / viṣa piyāve gheūni /
ātmahatyesi nimoni / jāije jeṇeṃ

taiseṃ jācūniyāṃ iṃdriyeṃ / veṃcūni āyuṣyāceni diye /
sāṃcaleṃ pāpīṃ āna āhe / duḥkhāvācūni ?

mhaṇauni karāvā svadharmu / jo karitāṃ hironi ghe śramu /
ucita deīla paramu / puruṣārtharāju

yākāraṇeṃ kirīṭī / svadharmāciye rāhāṭī /
na visaṃbije saṃkaṭīṃ / siddhamaṃtra jaisā

kāṃ nāva jaisī udadhīṃ / mahārogī divyauṣadhī /
na visaṃbije tayā buddhī / svakarma yetha

maga yayāci gā kapidhvajā / svakarmāciyā mahāpūjā /
toṣalā īśu tamarajā / jhāḍā karunī

śuddhasattvāciyā vāṭā / āṇī āpulī utkaṃṭhā /
bhavasvarga kāḻakūṭā / aiseṃ dāvī

jiyeṃ vairāgya yeṇeṃ boleṃ / māgāṃ saṃsiddhī rūpa keleṃ /
kiṃbahunā teṃ āpuleṃ / meḻavī khāgeṃ

maga jiṃtiliyā he bhoye / puruṣa sarvatra jaisā hoye /
kāṃ jālāhī jeṃ lāhe / teṃ ātāṃ sāṃgoṃ

tarī dehādika heṃ saṃsāreṃ / sarvahī māṃḍaleṃse jeṃ guṃphireṃ /
tetha nātuḍe to vāgureṃ / vārā jaisā

paiṃ paripākāciye veḻe / phaḻa deṭheṃ nā deṭhu phaḻeṃ /
na dhare taiseṃ sneha khuḻeṃ / sarvatra hoya

putra vitta kalatra / he jāliyāhī svataṃtra /
mājheṃ na mhaṇe pātra / viṣāceṃ jaiseṃ

heṃ aso viṣayajātī / buddhi poḻalī aisī māghautī /
pāuleṃ gheūni ekāṃtīṃ / hṛdayācyā rige

aisayā aṃtaḥkaraṇa / bāhya yetāṃ tayācī āṇa /
na moḍī samarthā bheṇa / dāsī jaisī

taiseṃ aikyāciye muṭhī / mājivaḍeṃ citta kirīṭī /
karūni vedhī nehaṭīṃ / ātmayācyā

tevhāṃ dṛṣṭādṛṣṭa spṛhe / nimaṇeṃ jāleṃci āhe /
āgīṃ daḍapaliyā dhuyeṃ / rāhije jaiseṃ

mhaṇauni niyamiliyā mānasīṃ / spṛhā nāsauni jāya āpaisīṃ /
kiṃbahunā to aisī / bhūmikā pāve

paiṃ anyathā bodhu āghavā / māvaḻoni tayā pāṃḍavā /
bodhamātrīṃci jīvā / ṭhāvo hoya

dharavaṇī veṃceṃ sare / taiseṃ bhogeṃ prācīna pure /
naveṃ taṃva nupakare / kāṃhīci karūṃ

aisīṃ karmeṃ sāmyadaśā / hoya tetha vīreśā /
maga śrīguru āpaisā / bheṭeci gā

rātrīcī caupāharī / veṃcaliyā avadhārīṃ /
ḍoḻyāṃ tamārī / miḻe jaisā

kā yeūni phaḻācā ghaḍu / pāruṣavī keḻīcī vāḍhu /
śrīguru bheṭoni karī pāḍu / bubhutsu taisā

maga āliṃgilā pūrṇimā / jaisā uṇīva sāṃḍī caṃdramā /
taiseṃ hoya vīrottamā / gurukṛpā tayā

tevhāṃ abodhumātra ase / to taṃva tayā kṛpā nāse /
tetha niśīsaveṃ jaiseṃ / āṃdhāreṃ jāya

taisī abodhāciye kuśī / karma kartā kārya aiśī /
tripuṭī ase te jaisī / gābhiṇī mārilī

taiseṃci abodhanāśāsaveṃ / nāśe kriyājāta āghaveṃ /
aisā samūḻa saṃbhave / saṃnyāsu hā

yeṇeṃ muḻājñānasaṃnyāseṃ / dṛśyācā jetha ṭhāvo puse /
tetha bujhāveṃ teṃ āpaiseṃ / toci āhe

ceiliyāvarī pāhīṃ / svapnīṃciyā tiye ḍohīṃ /
āpaṇayāteṃ kāī / kāḍhūṃ jāije ?

taiṃ mī neṇeṃ ātāṃ jāṇena / heṃ saraleṃ tayā duḥsvapna /
jālā jñātṛjñeyāvihīna / cidākāśa

mukhābhāseṃsī ārisā / parautā neliyā vīreśā /
pāhātepaṇeṃvīṇa jaisā / pāhātā ṭhāke

taiseṃ neṇaṇeṃ jeṃ geleṃ / teṇeṃ jāṇaṇeṃhī neleṃ /
maga niṣkriya uraleṃ / cinmātraci

tetha svabhāveṃ dhanaṃjayā / nāhīṃ koṇīci kriyā /
mhaṇauni pravādu tayā / naiṣkarmyu aisā

teṃ āpuleṃ āpaṇapeṃ / ase teṃci hoūni hārape /
taraṃgu kāṃ vāyulopeṃ / samudru jaisā

taiseṃ na hoṇeṃ niphaje / te naiṣkarmyasiddhi jāṇije /
sarvasiddhīṃta sahajeṃ / parama heci

deuḻāciyā kāmā kaḻasu / uparama gaṃgesī siṃdhu praveśu /
kāṃ suvarṇaśuddhī kasu / soḻāvā jaisā

taiseṃ āpuleṃ neṇaṇeṃ / pheḍije kā jāṇaṇeṃ /
teṃhi giḻūni asaṇeṃ / aisī je daśā

tiyeparateṃ kāṃhīṃ / nipajaṇeṃ āna nāhīṃ /
mhaṇauni mhaṇipe pāhīṃ / paramasiddhi te

parī heci ātmasiddhi / jo koṇī bhāgyanidhi /
śrīgurukṛpālabdhi\- / kāḻīṃ pāve

udayatāṃci dinakaru / prakāśuci āte āṃdhāru /
kāṃ dīpasaṃgeṃ kāpuru / dīpuci hoya

tayā lavaṇācī kaṇikā / miḻatakheṃvo udakā /
udakaci hoūni dekhā / ṭhāke jevīṃ

kāṃ nidritu cevaviliyā / svapneṃsi nīda vāyāṃ /
jāūni āpaṇapayāṃ / miḻe jaisā

taiseṃ jayā koṇhāsi daiveṃ / guruvākyaśravaṇāci saveṃ /
dvaita giḻoni visaṃve / āpaṇayā vṛttī

tayāsī maga karma karaṇeṃ / heṃ bolijailaci kavaṇeṃ /
ākāśā yeṇeṃ jāṇeṃ / āhe kāī ? /

mhaṇauni tayāsi kāṃhīṃ / triśuddhi karaṇeṃ nāhīṃ /
parī aiseṃ jarī heṃ kāṃhīṃ / navhe jayā

kānāvacanāciye bheṭī- / sarisāci paiṃ kirīṭī /
vastu hoūni uṭhī / kavaṇi eku jo

yeऱhavīṃ svakarmāceni vanhī / kāmyaniṣiddhāciyā iṃdhanīṃ /
rajatameṃ kīra donhī / jāḻilīṃ ādhīṃ

putra vitta paraloku / yayā tihīṃcā abhilākhu /
gharīṃ hoya pāiku / heṃhī jāleṃ

iṃdriyeṃ sairā padārthīṃ / rigatāṃ viṭāḻalīṃ hotīṃ /
tiye pratyāhāra tīrthīṃ / nhāṇilīṃ kīra

āṇi svadharmāceṃ phaḻa / īśvarīṃ arpūni sakaḻa /
gheūni keleṃ aḍhaḻa / vairāgyapada

aisī ātmasākṣātkārīṃ / lābhe jñānācī ujarī /
te sāmugrī kīra purī / meḻavilī

āṇi teci samayīṃ / sadguru bheṭale pāhīṃ /
tevīṃci tihīṃ kāṃhīṃ / vaṃcijenā

parī vokhada ghetakheṃvo / kāya lābhe āpalā ṭhāvo ? /
kāṃ udayajatāṃci divo / madhyānha hoya ?

sukṣetrīṃ āṇi volaṭeṃ / bījahī perileṃ gomaṭeṃ /
tarī āloṭa phaḻa bheṭe / parī veḻe kīṃ gā

joḍalā mārgu prāṃjaḻu / minalā susaṃgācāhī meḻu /
tarī pāvije vāṃcūni veḻu / lāgeci kīṃ

taisā vairāgyalābhu jālā / varī sadguruhī bheṭalā /
jīvīṃ aṃkuru phuṭalā / vivekācā

teṇeṃ brahma eka āthī / yera āghavīci bhrāṃtī /
hehī kīra pratītī / gāḍha kelī

parī teṃci jeṃ parabrahma / sarvātmaka sarvottama /
mokṣāceṃhī kāma / sare jetha

yayā tinhī avasthā poṭīṃ / jiravī jeṃ gā kirīṭī /
tayā jñānāsihī miṭhī / de je vastu

aikyāceṃ ekapaṇa sare / jetha ānaṃdakaṇuhī vire /
kāṃhīṃci nuroni ure / jeṃ kāṃhīṃ gā

tiyeṃ brahmīṃ aikyapaṇeṃ / brahmaci hoūni asaṇeṃ /
teṃ krameṃci karūni teṇeṃ / pāvije paiṃ

bhukeliyāpāsīṃ / vogarileṃ ṣaḍrasīṃ /
to tṛpti pratigrāsīṃ / lāhe jevīṃ

taisā vairāgyācā volāvā / vivekācā to divā /
āṃbuthitāṃ ātmaṭhevā / kāḍhīci to

tarī bhogije ātmaṛddhī / yevaḍhī yogyatecī siddhī /
jayācyā āṃgīṃ niravadhī / leṇeṃ jālī

to jeṇeṃ krameṃ brahma / hoṇeṃ karī gā sugama /
tayā kramāceṃ ātāṃ varma / āīka sāṃgoṃ

tarī guru dāviliyā vāṭā / yeūna vivekatīrthataṭā /
dhuūniyāṃ maḻakaṭā / buddhīcā teṇeṃ

maga rāhūneṃ ugaḻilī / prabhā caṃdreṃ āliṃgilī /
taisī śuddhatveṃ jaḍalī / āpaṇayāṃ buddhi

sāṃḍūni kuḻeṃ donhī / priyāsī anusare kāminī /
dvaṃdvatyāgeṃ svaciṃtanīṃ / paḍalī taisī

āṇi jñāna aiseṃ jivhāra / nevoṃ nevoṃ niraṃtara /
iṃdriyīṃ kele thora / śabdādika je

te raśmijāḻa kāḍhaleyā / mṛgajaḻa jāya layā /
taiseṃ vṛttirodheṃ tayāṃ / pāṃcāṃhī keleṃ

neṇatāṃ adhamāciyā annā / khādaliyā kīje vamanā /
taisīṃ vokavilī savāsanā / iṃdriyeṃ viṣayīṃ

maga pratyagāvṛttī cokhaṭeṃ / lāvilīṃ gaṃgeceni taṭeṃ /
aisīṃ prāyaścitteṃ dhuvaṭeṃ / kelīṃ yeṇeṃ

pāṭhīṃ sātvikeṃ dhīreṃ teṇeṃ / śodhāralīṃ tiyeṃ karaṇeṃ /
maga maneṃsīṃ yogadhāraṇeṃ / meḻavilīṃ

tevīṃci prācīneṃ iṣṭāniṣṭeṃ / bhogeṃsīṃ yeunī bheṭe /
tetha dekhiliyāhī vokhaṭeṃ / dveṣu na karī

nā gomaṭeṃci vipāyeṃ / teṃ āṇūni puḍhāṃ sūye /
tayālāgīṃ na hoye / sābhilāṣu

yāparī iṣṭāniṣṭīṃṃṃ / rāgadveṣa kirīṭī /
tyajūni girikapāṭīṃ / nikuṃjīṃ vase

gajabajā sāṃḍiliyā / vasavī vanasthaḻiyā /
aṃgāciyāci māṃdiyā / ekaleyā

śamadamādikīṃ kheḻe / na bolaṇeṃci cāvaḻe /
guruvākyāceni meḻeṃ / neṇe veḻu

āṇi āṃgā baḻa yāveṃ / nātarī kṣudhā jāveṃ /
kāṃ jibhīce puravāve / manoratha

bhojana karitāṃvikhīṃ / yayāṃ tihīṃteṃ na lekhī /
āhārīṃ mitī saṃtoṣīṃ / māpa na sūye

aśanāceni pāvakeṃ / hārapatāṃ prāṇu pokhe /
itukiyāci bhāgu moṭakeṃ / aśana karī

āṇi parapuruṣeṃ kāmilī / kuḻavadhū āṃga na ghālī /
nidrālasyā na mokalī / āsana taiseṃ

daṃḍavatāceni prasaṃgeṃ / bhuyīṃ hana aṃga lāge /
vāṃcūni yera neghe / rābhasya tetha

dehanirvāhāpurateṃ / rāhāṭavī hātāṃpāyāṃteṃ /
kiṃbahunā āpaiteṃ / sabāhya keleṃ

āṇi manācā uṃbarā / vṛttīsī dekhoṃ nedī vīrā /
tetha keṃ vāgvyāpārā / avakāśu ase ?

aiseni deha vācā mānasa / heṃ jiṇauni bāhyapradeśa /
ākaḻileṃ ākāśa / dhyānāceṃ teṇeṃ

guruvākyeṃ uṭhavilā / bodhīṃ niścayo āpulā /
nyāhāḻīṃ hātīṃ ghetalā / ārisā jaisā

paiṃ dhyātā āpaṇaci parī / dhyānarūpa vṛttimājhārīṃ /
dhyeyatveṃ ghe he avadhārīṃ / dhyānarūḍhī gā

tetha dhyeya dhyāna dhyātā / yayāṃ tihīṃ ekarūpatā /
hoya taṃva paṃḍusutā / kīje teṃ gā

mhaṇauni to mumukṣu / ātmajñānīṃ jālā dakṣu /
parī puḍhāṃ sūni pakṣu / yogābhyāsācā

apānaraṃdhradvayā / mājhārīṃ dhanaṃjayā /
pārṣṇīṃ piḍūniyāṃ / kāṃvarumūḻa

ākuṃcūni adha / deūni tinhī baṃdha /
karūni ekavada / vāyubhedī

kuṃḍalinī jāgavūni / madhyamā vikāśūni /
ādhārādi bhedūni / ājñāvarī

sahastradaḻācā meghu / pīyuṣeṃ varṣoni cāṃgu /
to mūḻavarī voghu / āṇūniyāṃ

nācatayā puṇyagirī / cidbhairavācyā khāparīṃ /
manapavanācī khīca purī / vāḍhūniyāṃ

jāliyā yogācā gāḍhā / meḻāvā sūni hā puḍhāṃ /
dhyāna māgilīkaḍāṃ / svayaṃbha keleṃ

āṇi dhyāna yoga donhī / iyeṃ ātmatatvajñānīṃ /
paiṭhā hoāvayā nirvighnīṃ / ādhīṃci teṇeṃ

vītarāgatesārikhā / joḍūni ṭhevilā sakhā /
to āghaviyāci bhūmikā- / saveṃ cāle

pahāveṃ dise taṃvavarī / diṭhīteṃ na saṃḍī dīpa jarī /
tarī keṃ āhe avasarī / dekhāvayā

taiseṃ mokṣīṃ pravartalayā / vṛttī brahmīṃ jāya layā /
taṃva vairāgya āthī tayā / bhaṃgu kaicā /

mhaṇauni savairāgyu / jñānābhyāsu to sabhāgyu /
karūni jālā yogyu / ātmalābhā

aisī vairāgyācī āṃgīṃ / bāṇūniyāṃ vajrāṃgīṃ /
rājayogaturaṃgīṃ / ārūḍhalā

varī āḍa paḍileṃ diṭhī / sāneṃ thora nivaṭī /
teṃ baḻīṃ vivekamuṣṭīṃ / dhyānāceṃ khāṃḍeṃ

aiseni saṃsāraraṇāāṃtu / āṃdhārīṃ sūrya taisā ase jātu /
mokṣavijayaśrīye varaitu / hoāvayālāgīṃ

tetha āḍavāvayā āle / doṣavairī je dhopaṭile /
tayāṃmājīṃ pahileṃ / dehāhaṃkāru

jo na mokalī mārunī / jīvoṃ nedī upajavoni /
vicaṃbavī khoḍāṃ ghālunī / hāḍāṃciyā

tayācā dehadurga hā thārā / moḍūni ghetalā to vīrā /
āṇi baḻa hā dusarā / mārilā vairī

jo viṣayāceni nāṃveṃ / cauguṇeṃhī varī thāṃve /
jeṇeṃ mṛtāvasthā dhāṃve / sarvatra jagā

to viṣaya viṣācā athāvo / āghaviyā doṣāṃcā rāvo /
parī dhyānakhaḍgācā ghāvo / sāhela kaiṃcā ?

āṇi priya viṣayaprāptī / karī jayā sukhācī vyaktī /
teci ghālūni buṃthī / āṃgīṃ jo vāje

jo sanmārgā bhulavī / maga adharmācyā āḍavīṃ /
sūni vāghāṃ sāṃpaḍavī / narakādikāṃ

to viśvāseṃ māritāṃ ripu / nivaṭūni ghātalā darpu /
āṇi jayācā ahā kaṃpu / tāpasāṃsī

krodhā aisā mahādokhu / jayācā dekhā paripāku /
bharije taṃva adhiku / ritā hoya jo

to kāmu koṇeca ṭhāyīṃ / nase aiseṃ keleṃ pāhīṃ /
kīṃ teṃci krodhāhī / sahajeṃ āleṃ

muḻāceṃ toḍaṇeṃ jaiseṃ / hoya kāṃ śākhoddeśeṃ /
kāmu nāśaleni nāśe / taisā krodhu

mhaṇauni kāma vairī / jālā jetha ṭhāṇorī /
tetha saralī vārī / krodhācīhī

āṇi samarthu āpulā khoḍā / śiseṃ vāhavī jaisā hoḍā /
taisā bhuṃjauni jo gāḍhā / parīgraho

jo māthāṃci pālāṇavī / aṃgā avaguṇa ghālavī /
jīveṃ dāṃḍī ghevavī / mamatvācī

śiṣyaśāstrādivilāseṃ / maṭhādimudreceni miseṃ /
ghātale āhātī phāṃse / niḥsaṃgā jeṇeṃ

gharīṃ kuṭuṃbapaṇeṃ sare / tarī vanīṃ vanya hoūni avatare /
nāgavīyāhī śarīreṃ / lāgalā āhe

aisā durjayo jo parīgraho / tayācā pheḍūni ṭhāvo /
bhavavijayācā utsāho / bhogītase jo

tetha amānitvādi āghave / jñānaguṇāce je meḻāve /
te kaivalyadeśīṃce āghave / rāvo jaise āle

tevhāṃ samyak‌jñānāciyā / rāṇivā ugāṇūni tayā /
parivāru hoūniyāṃ / rāhata āṃgeṃ

pravṛttīciye rājabidīṃ / avasthābhedapramadīṃ /
kījata āhe pratipadīṃ / sukhāceṃ loṇa

puḍhāṃ bodhāciye kāṃbīvarī / viveku dṛśyācī māṃdī sārī /
yogabhūmikā āratī karī / yetī jaisiyā

tetha ṛddhisiddhīṃcīṃ anegeṃ / vṛṃdeṃ miḻatī prasaṃgeṃ /
tiye puṣpavarṣīṃ āṃgeṃ / nāhātase to

aiseni brahmaikyāsārikheṃ / svarājya yetāṃ javaḻikeṃ /
jhaḻaṃbita āhe harikheṃ / tinhī loka

tevhāṃ vairiyāṃ kāṃ maitriyāṃ / tayāsi mājheṃ mhaṇāvayā /
samānatā dhanaṃjayā / urecihī nā

heṃ nā bhalateṇeṃ vyājeṃ / to jayāteṃ mhaṇe mājheṃ /
teṃ noḍaveci kāṃ dujeṃ / advitīya jālā

paiṃ āpuliyā ekī sattā / sarvahī kavaḻūniyā paṃḍusutā /
kahīṃ na lagatī mamatā / dhāḍilī teṇeṃ

aisā jiṃtiliyā ripuvargu / apamāniliyā heṃ jagu /
apaisā yogaturaṃgu / sthira jālā

vairāgyāceṃ gāḍhaleṃ / aṃgī trāṇa hoteṃ bhaleṃ /
teṃhī nāveka ḍhileṃ / tevhāṃ karī

āṇi nivaṭī dhyānāceṃ khāṃḍeṃ / teṃ dujeṃ nāhīṃci puḍheṃ /
mhaṇauni hātu āsuḍeṃ / vṛttīcāhī

jaiseṃ rasauṣadha khareṃ / āpuleṃ kāja karoni pureṃ /
āpaṇahī nure / taiseṃ hotase

dekhoni ṭhākitā ṭhāvo / dhāṃvatā thirāve pāvo /
taisā brahmasāmīpyeṃ thāvo / abhyāsu sāṃḍī

ghaḍatāṃ mahodadhīsī / gaṃgā vegu sāṃḍī jaisī /
kāṃ kāminī kāṃtāpāsīṃ / sthira hoya

nānā phaḻatiye veḻe / keḻīcī vāḍhī māṃṭuḻe /
kāṃ gāṃvāpuḍheṃ vaḻe / mārgu jaisā

taisā ātmasākṣātkāru / hoīla dekhoni gocaru /
aisā sādhanahatiyeru / haḻuci ṭhevī

mhaṇauni brahmeṃsī tayā / aikyācā samo dhanaṃjayā /
hotase taiṃ upāyā / vohaṭu paḍe

maga vairāgyācī goṃdhaḻuka / je jñānābhyāsāceṃ vārdhakya /
yogaphaḻācāhī paripāka / daśā je kāṃ

te śāṃti paiṃ gā subhagā / saṃpūrṇa ye tayāciyā āṃgā /
taiṃ brahma hoāvayā jogā / hoya to puruṣu

punavehunī caturdaśī / jetuleṃ uṇepaṇa śaśī /
kāṃ soḻe pāūni jaisī / paṃdharāvī vānī

sāgarīṃhī pāṇī vegeṃ / saṃcare teṃ rūpa gaṃge /
yera niścaḻa jeṃ ugeṃ / teṃ samudru jaisā

brahmā āṇi brahmahotiye / yogyate taisā pāḍu āhe /
teṃci śāṃtīceni lavalāheṃ / hoya to gā

paiṃ teṃci hoṇeṃnavīṇa / pratītī āleṃ jeṃ brahmapaṇa /
te brahma hotī jāṇa / yogyatā yetha

te brahmabhāvayogyatā / puruṣu to maga paṃḍusutā /
ātmabodhaprasannatā\- / padīṃ baise

jeṇeṃ nipaje rasasoya / to tāpuhī jaiṃ jāya /
taiṃ te kāṃ hoya / prasanna jaisī

nānā bharatiyā lagabagā / śaratkāḻīṃ sāṃḍije gaṃgā /
kāṃ gīta rahātāṃ upāṃgā / vohaṭu paḍe

taisā ātmabodhīṃ udyamu / karitāṃ hoya jo śramu /
tohī jetheṃ samu / hoūni jāya

ātmabodhapraśastī / he tiye daśecī khyātī /
te bhogitase mahāmatī / yogyu to gā

tevhāṃ ātmatveṃ śocāveṃ / kāṃhīṃ pāvāvayā kāmāveṃ /
heṃ saraleṃ samabhāveṃ / bhariteṃ tayā

udayā yetāṃ gabhastī / nānā nakṣatravyaktī /
hāravījatī dīptī / āṃgikā jevīṃ

tevīṃ uṭhatiyā ātmaprathā / he bhūtabhedavyavasthā /
moḍīta moḍīta pārthā / vāsa pāhe to

pāṭiyevarīla akṣareṃ / jaisīṃ pusatāṃ yetī kareṃ /
taisīṃ hārapatī bhedāṃtareṃ / tayāciye dṛṣṭī

taiseni anyathā jñāneṃ / jiyeṃ ghepatī jāgarasvapneṃ /
tiyeṃ donhī kelīṃ līneṃ / avyaktāmājīṃ

maga teṃhī avyakta / bodha vāḍhatāṃ jhijata /
puralāṃ bodhīṃ samasta / buḍoni jāya

jaisī bhojanācyā vyāpārīṃ / kṣudhā jirata jāya avadhārīṃ /
maga tṛptīcyā avasarīṃ / nāhīṃca hoya

nānā cālīciyā vāḍhī / vāṭa hota jāya thoḍī /
maga pātalā ṭhāyīṃ buḍī / deūni nime

kāṃ jāgṛti jaṃva jaṃva uddīpe / taṃva taṃva nidrā hārape /
maga jāgīnaliyā svarūpeṃ / nāhīṃca hoya

heṃ nā āpuleṃ pūrṇatva bheṭeṃ / jetha caṃdrāsīṃ vāḍhī khuṃṭe /
tetha śuklapakṣu āṭe / niḥśeṣu jaisā

taisā bodhyajāta giḻitu / bodhu bodheṃ ye maja āṃtu /
misaḻalā tetha sādyaṃtu / abodhu gelā

tevhāṃ kalpāṃtāciye veḻe / nadī siṃdhūceṃ peṃḍavaḻeṃ /
moḍūni bharaleṃ jaḻeṃ / ābrahma jaiseṃ

nānā geliyā ghaṭa maṭha / ākāśa ṭhāke ekavaṭa /
kāṃ jaḻoni kāṣṭheṃ kāṣṭha / vanhīci hoya

nātarī leṇiyāṃce ṭhase / āṭoni geliyā muse /
nāmarūpa bhedeṃ jaiseṃ / sāṃḍije soneṃ

heṃhī aso ceilayā / teṃ svapna nāhīṃ jālayā /
maga āpaṇaci āpaṇayāṃ / urije jaiseṃ

taisī mī ekavāṃcūni kāṃhīṃ / tayā tayāhīsakaṭa nāhīṃ /
he cauthī bhakti pāhīṃ / mājhī to lāhe

yera ārtu jijñāsu arthārthī / he bhajatī jiye paṃthīṃ /
te tinhī pāvonī cauthī / mhaṇipata āhe

yeऱhavīṃ tijī nā cauthī / he pahilī nā saratī /
paiṃ mājhiye sahajasthitī / bhakti nāma

jeṃ neṇaṇeṃ mājheṃ prakāśūni / anyathātveṃ māteṃ dāūni /
sarvahī sarvīṃ bhajauni / bujhāvītase je

jo jetha jaiseṃ pāhoṃ baise / tayā tetha taiseṃci ase /
heṃ ujiyeḍeṃ kāṃ dise / akhaṃḍeṃ jeṇeṃ

svapnāceṃ disaṇeṃ na disaṇeṃ / jaiseṃ āpaleni asalepaṇeṃ /
viśvāceṃ āhe nāhīṃ jeṇeṃ / prakāśeṃ taiseṃ

aisā hā sahaja mājhā / prakāśu jo kapidhvajā /
to bhakti yā vojā / bolije gā

mhaṇauni ārtācyā ṭhāyīṃ / he ārti hoūni pāhīṃ /
apekṣaṇīya jeṃ kāṃhīṃ / teṃ mīci kelā

jijñāsupuḍhāṃ vīreśā / heci hoūni jijñāsā /
mī kāṃ jijñāsyu aisā / dākhavilā

heṃci hoūni arthanā / mīci mājhyā arthīṃ arjunā /
karūni arthābhidhānā / āṇī māteṃ

evaṃ gheūni ajñānāteṃ / mājhī bhakti je he varte /
te dāvī maja draṣṭayāteṃ / dṛśya karūni

yetheṃ mukhaci dise mukheṃ / yā bolā kāṃhīṃ na cuke /
tarī dujepaṇa heṃ laṭikeṃ / ārisā karī

diṭhī caṃdraci ghe sāceṃ / parī yetuleṃ heṃ timirāceṃ /
je ekaci ase tayāce / donī dāvī

taisā sarvatra mīci miyāṃ / ghepataseṃ bhakti iyā /
parī dṛśyatva heṃ vāyāṃ / ajñānavaśeṃ

teṃ ajñāna ātāṃ phiṭaleṃ / mājheṃ dṛṣṭṛtva maja bheṭaleṃ /
nijabiṃbīṃ ekavaṭaleṃ / pratibiṃba jaiseṃ

paiṃ jevhāṃhī ase kiḍāḻa / tevhāṃhī soneṃci aḍhaḻa /
parī teṃ kīḍa geliyā kevaḻa / ure jaiseṃ

hāṃ gā pūrṇime ādhīṃ kāyī / caṃdru sāvayavu nāhīṃ ? /
parī tiye divaśīṃ bheṭe pāhīṃ / pūrṇatā tayā

taisā mīci jñānadvāreṃ / diseṃ parī hastāṃtareṃ /
maga dṛṣṭṛtva teṃ sare / miyāṃci mī lābheṃ

mhaṇauni dṛśyapathā- / atītu mājhā pārthā /
bhaktiyogu cavathā / mhaṇitalā gā

yā jñāna bhakti sahaja / bhaktu ekavaṭalā maja /
mīci kevaḻa heṃ tuja / śrutahī āhe

je ubhaūniyāṃ bhujā / jñāniyā ātmā mājhā /
he boliloṃ kapidhvajā / saptamādhyāyīṃ

te kalpādīṃ bhakti miyāṃ / śrībhāgavatamiṣeṃ brahmayā /
uttama mhaṇauni dhanaṃjayā / upadeśilī

jñānī iyeteṃ svasaṃvittī / śaiva mhaṇatī śaktī /
āmhī parama bhaktī / āpulī mhaṇo

he maja miḻatiye veḻe / tayā kramayogiyāṃ phaḻe /
maga samastahī nikhiḻeṃ / miyāṃci bhare

tetha vairāgya vivekeṃsī / āṭe baṃdha mokṣeṃsīṃ /
vṛttī tiye āvṛttīsīṃ / buḍoni jāya

gheūni ailapaṇāteṃ / paratva hārapeṃ jetheṃ /
giḻūni cāऱhī bhūteṃ / ākāśa jaiseṃ

tayā parī thaḍathāda / sādhyasādhanātīta śuddha /
teṃ mī hoūni ekavada / bhogito māteṃ

ghaḍoni siṃdhūciyā āṃgā / siṃdhūvarī taḻape gaṃgā /
taisā pāḍu tayā bhogā / avadhārī jo

kāṃ ārisayāsi ārisā / uṭūni dāviliyā jaisā /
dekhaṇā atiśayo taisā / bhogaṇā tiye

he aso darpaṇu neliyā / to mukha bodhuhī geliyā /
dekhaleṃpaṇa ekaleyā / āsvādije jevīṃ

ceiliyā svapna nāśe / āpaleṃ aikyaci dise /
te dujenavīṇa jaiseṃ / bhogije kā

toci jāliyā bhogu tayācā / na ghaḍe hā bhāvo jayāṃcā /
tihīṃ boleṃ kevīṃ bolācā / uccāru kīje

tayāṃcyā neṇoṃ gāṃvīṃ / ravī prakāśī hana divī /
kīṃ vyomālāgīṃ māṃḍavī / ubhilī tihīṃ

hāṃ gā rājanyatva navhatāṃ āṃgīṃ / rāvo rāyapaṇa kāya bhogī ? /
kāṃ āṃdhāru hana āliṃgī / dinakarāteṃ ?

āṇi ākāśa jeṃ navhe / tayā ākāśa kāya jāṇave ? /
ratnācyā rūpīṃ mirave / guṃjāṃceṃ leṇeṃ ?

mhaṇauni mī hoṇeṃ nāhīṃ / tayā mīci āheṃ kehīṃ /
maga bhajela heṃ kāyī / boloṃ kīra

yālāgīṃ to kramayogī / mī jālāci māteṃ bhogī /
tāruṇya kāṃ taruṇāṃgīṃ / jiyāparī

taraṃga sarvāṃgīṃ toya cuṃbī / prabhā sarvatra vilase biṃbīṃ /
nānā avakāśa nabhīṃ / luṃṭhatu jaisā

taisā rūpa hoūni mājheṃ / māteṃ kriyāvīṇa to bhaje /
alaṃkāru kā sahajeṃ / sonayāteṃ jevīṃ

kā caṃdanācī drutī jaisī / caṃdanīṃ bhaje apaisī /
kā akṛtrima śaśīṃ / caṃdrikā te

taisī kriyā kīra na sāhe / taऱhī advaitīṃ bhakti āhe /
heṃ anubhavācijogeṃ navhe / bolāseṃ

tevhāṃ pūrvasaṃskāra chaṃdeṃ / jeṃ kāṃhīṃ to anuvāde /
teṇeṃ āḻavileni vo deṃ / bolatāṃ mīci

bolatayā bolatāci bheṭe / tetheṃ bolileṃ heṃ na ghaṭe /
teṃ mauna taṃva gomaṭeṃ / stavana mājheṃ

mhaṇauni tayā bolatāṃ / bolī bolatāṃ mī bheṭatāṃ /
mauna hoya teṇeṃ tatvatāṃ / stavito māteṃ

taiseṃci buddhī kā diṭhī / jeṃ to dekhoṃ jāya kirīṭī /
teṃ dekhaṇeṃ dṛśya loṭī / dekhateṃci dāvī

ārisayā ādhīṃ jaiseṃ / dekhateṃci mukha disea /
tayāceṃ dekhaṇeṃ taiseṃ / meḻavī draṣṭeṃ

dṛśya jāuniyāṃ draṣṭeṃ / draṣṭayāsīci jaiṃ bheṭe /
taiṃ ekalepaṇeṃ na ghaṭe / draṣṭepaṇahī

tetha svapnīṃciyā priyā / cevoni jhoṃbo geliyā /
ṭhāyije donhī na honiyāṃ / āpaṇaci jaiseṃ

kā dohīṃ kāṣṭhāciye ghṛṣṭī\- / mājīṃ vanhi eka uṭhī /
to donhī he bhāṣa āṭī / āpaṇaci hoya

nānā pratibiṃba hātīṃ / gheūṃ geliyā gabhastī /
biṃbatāhī asatī / jāya jaisī

taisā mī hoūni dekhateṃ / to gheūṃ jāya dṛśyāteṃ /
tetha dṛśya ne thiteṃ / draṣṭṛtveṃsīṃ

ravi āṃdhāru prakāśitā / nureci jevīṃ prakāśyatā /
teṃvīṃ dṛśyīṃ nāhī draṣṭṛtā / mī jāliyā

maga dekhije nā na dekhije / aisī je daśā nipaje /
te teṃ darśana mājheṃ / sācokāreṃ

teṃ bhalatayāhī kirīṭī / padārthāciyā bheṭī /
draṣṭṛdṛśyātītā dṛṣṭī / bhogito sadā

āṇi ākāśa heṃ ākāśeṃ / dāṭaleṃ na ḍhaḻeṃ jaiseṃ /
miyāṃ ātmena āpaṇapeṃ taiseṃ / jāleṃ tayā

kalpāṃtīṃ udaka udakeṃ / ruṃdhiliyā vāhoṃ ṭhāke /
taisā ātmeni miyāṃ yekeṃ / koṃdalā to

pāvo āpaṇapayāṃ voḻaghe ? / kevīṃ vanhi āpaṇapayāṃ lāge ? /
āpaṇapāṃ pāṇī righe / snānā kaiseṃ ?

mhaṇauni sarva mī jālepaṇeṃ / ṭheleṃ tayā yeṇeṃ jāṇeṃ /
teṃci gā yātrā karaṇeṃ / advayā maja

paiṃ jaḻāvarīla taraṃgu / jarī dhāvinnalā savegu /
tarī nāhīṃ bhūmibhāgu / kramilā teṇeṃ

jeṃ sāṃḍāveṃ kāṃ māṃḍāveṃ / jeṃ cālaṇeṃ jeṇeṃ cālāveṃ /
teṃ toyaci eka āghaveṃ / mhaṇauniyāṃ

geliyāhī bhalateutā / udakapaṇeṃṃ paṃḍusutā /
taraṃgācī ekātmatā / na moḍeci jevīṃ

taisā mīpaṇeṃ hā loṭalā / to āghaveṃyāci majaāṃtu ālā /
yā yātrā hoya bhalā / kāpaḍī mājhā

āṇi śarīra svabhāvavaśeṃ / kāṃhīṃ yeka karūṃ jarī baise /
tarī mīci to teṇeṃ miṣeṃ / bheṭe tayā

tetha karma āṇi kartā / heṃ jāūni paṃḍusutā /
miyāṃ ātmeni maja pāhatāṃ / mīci hoya

paiṃ darpaṇāteṃṃ darpaṇeṃ / pāhiliyā hoya na pāhaṇeṃ /
soneṃ jhāṃkiliyā suvarṇeṃ / nā jhāṃkeṃ jevīṃ

dīpāteṃ dīpeṃ prakāśije / teṃ na prakāśaṇeṃci nipaje /
taiseṃ karma miyāṃ kīje / teṃ karaṇeṃ kaiṃceṃ ?

karmahī karitaci āhe / jaiṃ karāveṃ heṃ bhāṣa jāye /
taiṃ na karaṇeṃci hoye / tayāceṃ keleṃ

kriyājāta mī jālepaṇeṃ / ghaḍe kāṃhīṃci na karaṇeṃ /
tayāci nāṃva pūjaṇeṃ / khuṇeceṃ mājheṃ

mhaṇauni karītayāhī vojā / teṃ na karaṇeṃ heṃci kapidhvajā /
niphaje tiyā mahāpūjā / pūjī to māteṃ

evaṃ to bole teṃ stavana / to dekhe teṃ darśana /
advayā maja gamana / to cāle teṃci

to karī tetulī pūjā / to kalpī to japu mājhā /
to ase teci kapidhvajā / samādhī mājhī

jaiseṃ kanakeṃsī kāṃkaṇeṃ / asije ananyapaṇeṃ /
to bhaktiyogeṃ yeṇeṃ / majasīṃ taisā

udakīṃ kalloḻu / kāpurīṃ parīmaḻu /
ratnīṃ ujāḻu / ananyu jaisā

kiṃbahunā taṃtūṃsīṃ paṭu / kāṃ mṛttikesīṃ ghaṭu /
taisā to ekavaṭu / majasīṃ mājhā

iyā ananyasiddhā bhaktī / yā āghavāci dṛśyajātīṃ /
maja āpaṇapeṃyā sumatī / draṣṭayāteṃ jāṇa

tinhī avasthāṃceni dvāreṃ / upādhyupahitākāreṃ /
bhāvābhāvarūpa sphure / dṛśya jeṃ heṃ

teṃ heṃ āghaveṃci mī draṣṭā / aisiyā bodhācā mājivaṭā /
anubhavācā subhaṭā / dheṃḍā to nāce

rajju jāliyā gocaru / ābhāsatāṃ to vyāḻākāru /
rajjuci aisā nirdhāru / hoya jevīṃ

bhāṃgārāparateṃ kāṃhīṃ / leṇeṃ guṃjahībharī nāhīṃ /
heṃ āṭuniyāṃ ṭhāyīṃ / kīje jaise

udakā yekāparateṃ / taraṃga nāhīṃci heṃ niruteṃ /
jāṇoni tayā ākārāteṃ / na ghepe jevīṃ

nātarī svapnavikārāṃ samastāṃ / ceūniyāṃ umāṇeṃ ghetāṃ /
to āpaṇayāparautā / na dise jaisā

taiseṃ jeṃ kāṃhīṃ āthī nāthī / yeṇeṃ hoya jñeyasphurtī /
teṃ jñātāci mī heṃ pratītī / hoūni bhogī

jāṇe aju mī ajaru / akṣayo mī akṣaru /
apūrvu mī apāru / ānaṃdu mī

acaḻu mī acyutu / anaṃtu mī advaitu /
ādyu mī avyaktu / vyaktuhī mī

īśya mī īśvaru / anādi mī amaru /
abhaya mī ādhāru / ādheya mī

svāmī mī sadoditu / sahaju mī satatu /
sarva mī sarvagatu / sarvātītu mī

navā mī purāṇu / śūnyu mī saṃpūrṇu /
sthulu mī aṇu / jeṃ kāṃhīṃ teṃ mī

akriyu mī yeku / asaṃgu mī aśoku /
vyāpu mī vyāpaku / puruṣottamu mī

aśabdu mī aśrotru / arūpu mī agotru /
samu mī svataṃtru / brahma mī paru

aiseṃ ātmatveṃ maja ekāteṃ / iyā advayabhaktī jāṇoni niruteṃ /
āṇi yāhī bodhā jāṇateṃ / teṃhī mīci jāṇeṃ

paiṃ ceileyānaṃtareṃ / āpuleṃ ekapaṇa ure /
teṃhī toṃvarī sphure / tayāśīṃci jaiseṃ

kāṃ prakāśatāṃ arku / toci hoya prakāśaku /
tayāhī abhedā dyotaku / toci jaisā

taisā vedyāṃcyā vilayīṃ / kevaḻa vīdaku ure pāhīṃ /
teṇeṃ jāṇaveṃ tayā teṃhī / heṃhī jo jāṇe

tayā advayapaṇā āpuliyā / jāṇatī jñaptī je dhanaṃjayā /
te īśvaraci mī he tayā / bodhāsi ye

maga dvaitādvaitātīta / mīci ātmā eku nibhrāṃta /
heṃ jāṇoni jāṇaṇeṃ jetha / anubhavīṃ righe

tetha ceiliyāṃ yekapaṇa / dise je āpulayā āpaṇa /
teṃhī jātāṃ neṇoṃ koṇa / hoīje jevīṃ

kāṃ ḍoḻāṃ dekhatiye kṣaṇīṃ / suvarṇapaṇa suvarṇīṃ /
nāṭitāṃ hoya āṭaṇī / aḻaṃkārācīhī

nānā lavaṇa toya hoye / maga kṣāratā toyatveṃ rāhe /
tehī jiratāṃ jevīṃ jāye / jālepaṇa teṃ

taisā mī to heṃ jeṃ ase / teṃ svānaṃdānubhavasamaraseṃ /
kālavūniyā praveśe / majacimājīṃ

āṇi to he bhāṣa jetha jāye / tethe mī heṃ koṇhāsī āhe /
aisā mī nā to tiye sāmāye / mājhyāci rūpīṃ

jevhāṃ kāpura jaḻoṃ sare / tayāci nāma agni purī /
maga ubhayatātīta ure / ākāśa jevīṃ

kā dhāḍaliyā ekā eku / vāḍhe to śūnya viśekhu /
taisā āhe nāhīṃcā śekhu / mīci maga āthī

tetha brahmā ātmā īśu / yayā bolā moḍe saurasu /
na bolaṇeṃ yāhī paisu / nāhīṃ tetha

na bolaṇeṃhī na bolonī / teṃ bolije toṃḍa bharunī /
jāṇiva neṇiva neṇonī / jāṇije teṃ

tetha bujhije bodhu bodheṃ / ānaṃṃdu ghepe ānaṃdeṃ /
sukhāvarī nusadheṃ / sukhaci bhogije

tetha lābhu joḍalā lābhā / prabhā āliṃgilī prabhā /
vismayo buḍālā ubhā / vismayāmājīṃ

śamu tetha sāmāvalā / viśrāmu viśrāṃti ālā /
anubhavu veḍāvalā / anubhūtipaṇeṃ

kiṃbahunā aiseṃ nikhaḻa / mīpaṇa joḍe tayā phaḻa /
sevūni velī velhāḻa / kramayogācī te

paiṃ kramayogiyā kirīṭī / cakravartīcyā mukuṭīṃ /
mī cidratna teṃ sāṭovāṭīṃ / hoya to mājhā

kīṃ kramayogaprāsādācā / kaḻasu jo hā mokṣācā /
tayāvarīla avakāśācā / uvāvo jālā to

nānā saṃsāra āḍavīṃ / kramayoga vāṭa baravī /
joḍilī te madaikyagāṃvīṃ / paiṭhī jālīse

heṃ aso kramayogabodheṃ / teṇeṃ bhakticidgāṃgeṃ /
mī svānaṃdodadhī vegeṃ / ṭhākilā kīṃ gā

hā ṭhāyavarī suvarmā / kramayogīṃ āhe mahimā /
mhaṇauni veḻoveḻāṃ tumhāṃ / sāṃgatoṃ āmhī

paiṃ deśeṃ kāḻeṃ padārtheṃ / sādhūni gheije māteṃ /
taisā navhe mī āyateṃ / sarvāṃceṃ sarvahī

mhaṇauni mājhyā ṭhāyīṃ / jācāveṃ na lage kāṃhīṃ /
mī lābheṃ iyeṃ upāyīṃ / sācaci gā

eka śiṣya eka guru / hā rūḍhalā sāca vyavahāru /
to matprāptiprakāru / jāṇāvayā

agā vasudhecyā poṭīṃ / nidhāna siddha kirīṭī /
vanhi siddha kāṣṭhīṃ / vohāṃ dūdha

parī lābhe teṃ asateṃ / tayā kīje upāyāteṃ /
yera siddhaci taisā tetheṃ / upāyīṃ mī

hā phaḻahīvarī upāvo / kāṃ pāṃ prastāvītase devo /
he pusatāṃ parī abhiprāvo / yethiṃcā aisā

je gītārthāceṃ cāṃgāveṃ / mokṣopāyapara āghaveṃ /
āna śāstropāya kīṃ navhe / pramāṇasiddha

vārā ābhāḻaci pheḍī / vāṃcūni sūryāteṃ na ghaḍī /
kāṃ hātu bābuḻī dhāḍī / toya na karī

taisā ātmadarśanīṃ āḍaḻu / ase avidyecā jo maḻu /
to śāstra nāśī yeru nirmaḻu / mī prakāśeṃ svayeṃ

mhaṇauni āghavīṃci śāstreṃ / avidyāvināśācīṃ pātreṃ /
vāṃconi na hotīṃ svataṃtreṃ / ātmabodhīṃ

tayā adhyātmaśāstrāṃsīṃ / jaiṃ sācapaṇācī ye pusī /
taiṃ yeije jayā ṭhāyāsī / te he gītā

bhānubhūṣitā prāciyā / satejā diśā āghaviyā /
taisī śāstreśvarā gītā yā / sanātheṃ śāstreṃ

heṃ aso yeṇeṃ śāstreśvareṃ / māgāṃ upāya bahuve vistāreṃ /
sāṃgitalā jaisā kareṃ / ghevoṃ ye ātmā

parī prathamaśravaṇāsaveṃ / arjunā vipāyeṃ heṃ phāve /
hā bhāvo sakaṇave / dharūni śrīharī

teṃci prameya eka veḻa / śiṣyīṃ hoāvayā aḍhaḻa /
sāṃgatase mukula / mudrā ātāṃ

āṇi prasaṃgeṃ gītā / ṭhāvohī hā saṃpatā /
mhaṇauni dāvī ādyaṃtā / ekārthatva

je graṃthācyā madhyabhāgīṃ / nānā adhikāraprasaṃgīṃ /
nirūpaṇa anegīṃ / siddhāṃtīṃ keleṃ

tarī tetulehī siddhāṃta / iyeṃ śāstrīṃ prastuta /
he pūrvāpara neṇata / koṇhī jaiṃ mānī

taiṃ mahāsiddhāṃtācā āvāṃkā / siddhāṃtakakṣā anekā /
bhiḍaūni āraṃbhu dekhā / saṃpavītu ase

etha avidyānāśu heṃ sthaḻa / teṇeṃ mokṣopādāna phaḻa /
yā dohīṃ kevaḻa / sādhana jñāna

heṃ ituleṃci nānāparī / nirūpileṃ graṃthavistārīṃ /
teṃ ātāṃ dohīṃ akṣarīṃ / anuvādāveṃ

mhaṇauni upeyahī hātīṃ / jālayā upāyasthitī /
deva pravartale teṃ puḍhatī / yeṇeṃci bhāveṃ

maga mhaṇe gā subhaṭā / to kramayogiyā niṣṭhā /
mī haunī hoya paiṭhā / mājhyā rūpīṃ

svakarmācyā cokhauḻīṃ / maja pūjā karūni bhalīṃ /
teṇeṃ prasādeṃ ākaḻī / jñānaniṣṭheteṃ

te jñānaniṣṭhā jetha hātavase / tetha bhakti mājhī ullāse /
tiyā bhajana samaraseṃ / sukhiyā hoya

āṇi viśvaprakāśitayā / ātmayā maja āpuliyā /
anusare jo karūniyāṃ / sarvatratā he

sāṃḍūni āpulā āḍaḻa / lavaṇa āśrayī jaḻa /
kāṃ hiṃḍoni rāhe niścaḻa / vāyu vyomīṃ

taisā buddhī vācā kāyeṃ / jo māteṃ āśraūni ṭhāye /
to niṣiddheṃhī vipāyeṃ / karmeṃ karūṃ

parī gaṃgecyā saṃbaṃdhīṃ / bidī āṇi mahānadī /
yeka tevīṃ mājhyā bodhīṃ / śubhāśubhāṃsī

kāṃ bāvaneṃ āṇi dhureṃ / hā nivāḍu taṃvaci sare /
jaṃva na ghepatī vaiśvānareṃ / kavaḻūni donhī

nā pāṃcikeṃ āṇi soḻeṃ / heṃ sonayā taṃvaci āleṃ /
jaṃva parisu āṃgameḻeṃ / ekavaṭīnā

taiseṃ śubhāśubha aiseṃ / heṃ taṃvacivarī ābhāse /
jaṃva yeku na prakāśe / sarvatra mī

agā rātrī āṇi divo / hā taṃvaci dvaitabhāvo /
jaṃva na rigije gāṃvo / gabhastīcā

mhaṇauni mājhiyā bheṭī / tayācīṃ sarva karmeṃ kirīṭī /
jāūni baise to pāṭīṃ / sāyujyācyā

deśeṃ kāḻeṃ svabhāveṃ / veṃcu jayā na saṃbhave /
teṃ pada mājheṃ pāve / avināśa to

kiṃbahunā paṃḍusutā / maja ātmayācī prasannatā /
lāhe teṇeṃ na pavijatāṃ / lābhu kavaṇu ase

yākāraṇeṃ gā tuvāṃ iyā / sarva karmā āpuliyā /
mājhyā svarūpīṃ dhanaṃjayā / saṃnyāsu kīje

parī toci saṃnyāsu vīrā / karaṇīyecā jhaṇeṃ karā /
ātmavivekīṃ dharā / cittavṛtti he

maga teṇeṃ vivekabaḻeṃ / āpaṇapeṃ karmāvegaḻeṃ /
mājhyā svarūpīṃ nirmaḻeṃ / dekhijela

āṇi karmāci janmabhoye / prakṛti je kā āhe /
te āpaṇayāhūni bahuve / dekhasī dūrī

tetha prakṛti āpaṇayāṃ / vegaḻī nure dhanaṃjayā /
rūpeṃvīṇa kā chāyā / jiyāparī

aiseni prakṛtināśu / jālayā karmasaṃnyāsu /
niphajela anāyāsu / sakāraṇu

maga karmajāta gelayā / mī ātmā ureṃ āpaṇapayāṃ /
tetha buddhi ghāpe karūniyāṃ / pativratā

buddhi ananya yeṇeṃ yogeṃ / majamājīṃ jaiṃ rige /
taiṃ citta caityatyāgeṃ / māteṃci bhaje

aiseṃ caityajāteṃ sāṃḍileṃ / citta mājhyā ṭhāyīṃ jaḍaleṃ /
ṭhāke taiseṃ vahileṃ / sarvadā karī

maga abhinnā iyā sevā / citta miyāṃci bharela jedhavāṃ /
mājhā prasādu jāṇa tedhavāṃ / saṃpūrṇa jāhalā

tetha sakaḻa duḥkhadhāmeṃ / bhuṃjījatī jiyeṃ mṛtyujanmeṃ /
tiyeṃ durgameṃci sugameṃ / hotī tuja

sūryāceni sāvāyeṃ / ḍoḻā sāvāilā hoye /
taiṃ aṃdhārācā āhe / pāḍu tayā ?

taisā mājheni prasādeṃ / jīvakaṇu jayācā upamarde /
to saṃsarācenī bādhe / bāguleṃ kevīṃ ?

mhaṇauni dhanaṃjayā / tūṃ saṃsāradurgatī yayā /
tarasīla mājhiyā / prasādāstava

athavā hana ahaṃbhāveṃ / mājheṃ bolaṇeṃ heṃ āghaveṃ /
kānāmanāciye śiṃve / nedisī ṭeṃkoṃ

tarī nitya mukta avyayo / tūṃ āhāsi teṃ hoūni vāvo /
dehasaṃbaṃdhācā ghāvo / vājela āṃgīṃ

jayā dehasaṃbaṃdhā āṃtu / pratipadīṃ ātmaghātu /
bhuṃjatāṃ usaṃtu / kahīṃci nāhīṃ

yevaḍheni dāruṇeṃ / nimaṇenavīṇa nimaṇeṃ /
paḍela jarī bolaṇeṃ / neghasī mājheṃ

pathyadveṣiyā poṣī jvaru / kāṃ dīpadveṣiyā aṃdhakāru /
vivekadveṣeṃ ahaṃkāru / poṣūni taisā

svadehā nāma arjunu / paradehā nāma svajanu /
saṃgrāmā nāma malinu / pāpācāru

iyā matī āpuliyā / tighāṃ tīna nāmeṃ yayāṃ /
ṭheūniyāṃ dhanaṃjayā / na jhuṃjeṃ aisā

jīvāmājīṃ niṣṭaṃku / karisī jo ātyaṃtiku /
to vāyāṃ dhāḍīla naisargiku / svabhāvoci tujhā

āṇi mī arjuna he ātmika / yayāṃ vadhu karaṇeṃ heṃ pātaka /
he māyāvāṃcūni tāttvika / kāṃhīṃ āhe ?

ādhīṃ juṃjhāra tuvāṃ hoāveṃ / maga jhuṃjāvayā śastra gheyāveṃ /
kāṃ na juṃjhāvayā karāveṃ / devāṃgaṇa

mhaṇauni na jhuṃjaṇeṃ / mhaṇasī teṃ vāyāṇeṃ /
nā mānūṃ lokapaṇeṃ / lokadṛṣṭīhī

taऱhī na jhuṃjeṃ aiseṃ / niṣṭaṃkīsī jeṃ mānaseṃ /
teṃ prakṛti anāriseṃ / karavīlaci

paiṃ pūrve vāhatāṃ pāṇī / pavhije paścimece vāhaṇīṃ /
tarī āgrahoci ure teṃ āṇī / āpuliyā lekhā

kāṃ sāḻīcā kaṇu mhaṇe / mī nugaveṃ sāḻīpaṇeṃ /
tarī āhe āna karaṇeṃ / svabhāvāsī ?

taisā kṣātraṃskārasiddhā / prakṛtī ghaḍilāsī prabuddhā /
ātā nuṭhī mhaṇasī hā dhāṃdā / parī uṭhavījasīci tūṃ

paiṃ śaurya teja dakṣatā / evamādika paṃḍusutā /
guṇa didhale janmatāṃ / prakṛtī tuja

tarī tayāciyā samavāyā\- / anurūpa dhanaṃjayā /
na karitāṃ ugaliyāṃ / nayela asoṃ

mhaṇauniyāṃ tihīṃ guṇīṃ / bāṃdhilāsi tūṃ kodaṃḍapāṇī /
triśuddhī nighasī vāhaṇīṃ / kṣātrāciyā

nā heṃ āpuleṃ janmamūḻa / na vicārītaci kevaḻa /
na jhuṃjeṃ aiseṃ aḍhaḻa / vrata jarī ghesī

tarī bāṃdhoni hāta pāye / jo rathīṃ ghātalā hoye /
to na cāle tarī jāye / digaṃtā jevīṃ

taisā tūṃ āpuliyākaḍunī / mīṃ kāṃhīṃca na karīṃ mhaṇauni /
ṭhāsī parī bharaṃvaseni / tūṃci karisī

uttaru vairāṭīṃcā rājā / paḻatāṃ tūṃ kāṃ nighālāsī jhuṃjā ? /
hā kṣātrasvabhāvo tujhā / jhuṃjavīla tuja

mahāvīra akarā akṣauhiṇī / tuvāṃ yekeṃ nāgavile raṇāṃgaṇīṃ /
to svabhāvo kodaṃḍapāṇī / jhuṃjavīla tūṃteṃ

hāṃ gā rogu kāyī rogiyā / āvaḍe daridra daridriyā ? /
parī bhogavije baḻiyā / adṛṣṭeṃ jeṇeṃ

teṃ adṛṣṭa anāriseṃ / na karīla īśvaravaśeṃ /
to īśvaruhī ase / hṛdayīṃ tujhyā

sarva bhūtāṃcyā aṃtarīṃ / hṛdaya mahāaṃbarīṃ /
cidvṛttīcyā sahastrakarīṃ / udayalā ase jo

avasthātraya tinhīṃ loka / prakāśūni aśekha /
anyathādṛṣṭi pāṃthika / cevavile

vedyodakācyā sarovarīṃ / phāṃkatāṃ viṣayakalhārīṃ /
iṃdriyaṣaṭpadā cārī / jīvabhramarāteṃ

aso rūpaka heṃ to īśvaru / sakala bhūtāṃcā ahaṃkāru /
pāṃgharoni niraṃtaru / ulhāsata ase

svamāyeceṃ āḍavastra / lāvūni ekalā kheḻavī sūtra /
bāherī naṭī chāyācitra / cauryāśīṃ lakṣa

tayā brahmādikīṭāṃtā / aśeṣāṃhī bhūtajātāṃ /
dehākāra yogyatā / pāhoni dāvī

tetha jeṃ deha jayāpuḍheṃ / anurūpapaṇeṃ māṃḍe /
teṃ bhūta tayā ārūḍhe / heṃ mī mhaṇauni

sūta sūteṃ guṃtaleṃ / tṛṇa tṛṇaci bāṃdhaleṃ /
kāṃ ātmabiṃbā ghetaleṃ / bāḻakeṃ jaḻīṃ

tayāparī dehākāreṃ / āpaṇapeṃci dusareṃ /
dekhoni jīva āviṣkareṃ / ātmabuddhi

aiseni śarīrākārīṃ / yaṃtrīṃ bhūteṃ avadhārīṃ /
vāhūni hālavī dorī / prācīnācī

tetha jayā jeṃ karmasūtra / māṃḍūni ṭhevileṃ svataṃtra /
teṃ tiye gatī pātra / hoṃci lāge

kiṃbahunā dhanurdharā / bhūtāṃteṃ svargasaṃsārā /
\-mājīṃ bhovaṃḍī tṛṇeṃ vārā / ākāśīṃ jaisā

bhrāmakāceni saṃgeṃ / jaiseṃ loho veḍhā rige /
taisīṃ īśvarasattāyogeṃ / ceṣṭatī bhūteṃ

jaise ceṣṭā āpuliyā / samudrādika dhanaṃjayā /
ceṣṭatī caṃdrāciyā / sannidhī yekīṃ

tayā siṃdhū bhariteṃ dāṭeṃ / somakāṃtā pājharu phuṭe /
kumudāṃcakorāṃcā phiṭe / saṃkocu to

taisīṃ bījaprakṛtivaśeṃ / anekeṃ bhūteṃ yekeṃ īśeṃ /
ceṣṭavījatī to ase / tujhyā hṛdayīṃ

arjunapaṇa na ghetāṃ / mī aiseṃ jeṃ paṃḍusutā /
uṭhatase teṃ tatvatā / tayāceṃ rūpa

yālāgīṃ to prakṛtīteṃ / pravartavīla heṃ niruteṃ /
āṇi teṃ jhuṃjavīla tūṃteṃ / na jhuṃjaśī jaऱhī

mhaṇauni īśvara gosāvī / teṇeṃ prakṛtī he nemāvī /
tiyā sukheṃ rābavāvīṃ / iṃdriyeṃ āpulīṃ

tūṃ karaṇeṃ na karaṇeṃ donhīṃ / lāūni prakṛtīcyā mānīṃ /
prakṛtīhī kāṃ adhīnī / hṛdayasthā jayā

tayā ahaṃ vācā citta āṃga / deūniyā śaraṇa riga /
mahodadhī kāṃ gāṃga / rigāleṃ jaiseṃ

maga tayāceni prasādeṃ / sarvopaśāṃtipramade /
kāṃtu hoūniyā svānaṃdeṃ / svarūpīṃci ramasī

saṃbhūti jeṇeṃ saṃbhave / viśrāṃti jetheṃ visaṃve /
anubhūtihī anubhave / anubhavā jayā

tiye nijātmapadīṃcā rāvo / hoūni ṭhākasī avyavo /
mhaṇe lakṣmīnāho / pārthā tūṃ gā

heṃ gītā nāma vikhyāta / sarvavāṅgamayāceṃ mathita /
ātmā jeṇeṃ hastagata / ratna hoya

jñāna aisiyā rūḍhī / vedāṃtīṃ jayācī prauḍhī /
vānitāṃ kīrti cokhaḍī / pātalī jagīṃ

buddhyādikeṃ ḍoḻaseṃ / heṃ jayāceṃ kāṃ kaḍavaseṃ /
mī sarvadraṣṭāhī diseṃ / pāhalā jayā

teṃ heṃ gā ātmajñāna / maja gopyāceṃhī gupta dhana /
parī tūṃ mhaṇauni āna / kevīṃ karūṃ ?

yākāraṇeṃ gā pāṃḍavā / āmhīṃ āpulā hā guhya ṭhevā /
tuja didhalā kaṇavā / jākaḻilepaṇeṃ

jaisī bhulalī voraseṃ / māya bole bāḻā doṣeṃ /
prīti hī parī taiseṃ / na karūṃci ho

yetha ākāśa āṇi gāḻije / amṛtāhī sālī pheḍije /
kāṃ divyākaravīṃ karavije / divya jaise

jayāceni aṃgaprakāśeṃ / pātāḻīṃcā paramāṇu dise /
tayā sūryāhi kā jaise / aṃjana sūdaleṃ

taiseṃ sarvajñeṃhī miyāṃ / sarvahī nirdhārūniyāṃ /
nikeṃ hoya teṃ dhanaṃjayā / sāṃgitaleṃ tuja

ātāṃ tūṃ yayāvarī / nikeṃ heṃ nirdhārīṃ /
nirdhārūni karīṃ / āvaḍe taiseṃ

yayā devāciyā bolā / arjunu ugāci ṭhelā /
tetha devo mhaṇatī bhalā / avaṃcaku hosī

vāḍhatayāpuḍheṃ bhukelā / uparodheṃ mhaṇe mī dhālā /
taiṃ toci pīḍe āpulā / āṇi doṣuhī tayā

taisā sarvajñu śrīguru / bheṭaliyā ātmanirdhāru /
na pusije jaiṃ ābhāru / dharūniyāṃ

taiṃ āpaṇapeṃci vaṃce / āṇi pāpahī vaṃcanāceṃ /
āpaṇayāci sāceṃ / cukavileṃ teṇeṃ

paiṃ ugepaṇā tujhiyā / hā abhiprāvo kīṃ dhanaṃjayā /
jeṃ ekaveḻa āvāṃkuniyāṃ / sāṃgāveṃ jñāna

tetha pārthu mhaṇe dātārā / bhaleṃ jāṇasī mājhiyā aṃtarā /
heṃ mhaṇoṃ tarī dusarā / jāṇatā ase kāī ?

yera jñeya heṃ jī āghaveṃ / tūṃ jñātā ekaci svabhāveṃ /
mā sūryu mhaṇauni vānāveṃ / sūryāteṃ kāī ?

yā bolā śrīkṛṣṇeṃ / mhaṇitaleṃ kāya yeṇeṃ /
heṃci thoḍeṃ gā vānaṇeṃ / jeṃ bujhatāsi tūṃ

tarī avadhāna paghaḻa / karūniyām āṇika yeka veḻa /
vākya mājheṃ nirmaḻa / avadhārīṃ pāṃ

heṃ vācya mhaṇauni bolije / kāṃ śrāvya maga āyikije /
taiseṃ navheṃ parī tujheṃ / bhāgya baraveṃ

kūrmīciyā piliyāṃ / diṭhī pānhā ye dhanaṃjayā /
kāṃ ākāśa vāhe bāpiyā / gharīṃceṃ pāṇī

jo vyavahāru jetha na ghaḍe / tayāceṃ phaḻaci tetha joḍe /
kāya daiveṃ na sāṃpaḍe / sānukūḻeṃ ?

yeऱhavīṃ dvaitācī vārī / sārūni aikyācyā parīvarīṃ /
bhogije teṃ avadhārīṃ / rahasya heṃ

āṇi nirupacārā premā / viṣaya hoya jeṃ priyottamā /
teṃ dujeṃ navhe kīṃ ātmā / aiseṃci jāṇāveṃ

ārisāciyā dekhilayā / gomaṭeṃ kīje dhanaṃjayā /
teṃ tayā nohe āpaṇayāṃ / lāgīṃ jaiseṃ

taiseṃ pārthā tujheni miṣeṃ / mī boleṃ āpaṇayāci uddeśeṃ /
mājhyā tujhyā ṭhāīṃ ase / mītūṃpaṇa gā

mhaṇauni jivhārīṃceṃ guja / sāṃgatase jīvāsī tuja /
heṃ ananyagatīceṃ maja / āthī vyasana

paim jaḻā āpaṇapeṃ detāṃ / lavaṇa bhulaleṃ paṃḍusutā /
kīṃ āghaveṃ tayāceṃ hotāṃ / na lajeci teṃ

taisā tūṃ mājhyā ṭhāīṃ / rākhoṃ neṇasīci kāṃhīṃ /
tarī ātāṃ tuja kāī / gopya mī karūṃ ?

mhaṇauni āghavīṃci gūḍheṃ / jeṃ pāūni ati ughaḍeṃ /
teṃ gopya mājheṃ cokhaḍeṃ / vākya āika

tarī bāhya āṇi aṃtarā / āpuliyā sarva vyāpārā /
maja vyāpakāteṃ vīrā / viṣayo karīṃ

āghavā āṃgīṃ jaisā / vāyu miḻoni āhe ākāśā /
tūṃ sarva karmīṃ taisā / majasīṃci āsa

kiṃbahunā āpuleṃ mana / karīṃ mājheṃ ekāyatana /
mājheni śravaṇeṃ kāna / bharūni ghālīṃ

ātmajñāneṃ cokhaḍīṃ / saṃta je mājhīṃ rūpaḍīṃ /
tetha dṛṣṭi paḍo āvaḍī / kāminī jaisī

mīṃ sarva vastīceṃ vasauṭeṃ / mājhīṃ nāmeṃ jiyeṃ cokhaṭeṃ /
tiyeṃ jiyāvayā vāṭe / vāceciye lāvīṃ

hātāṃceṃ karaṇeṃ / kāṃ pāyāṃceṃ cālaṇeṃ /
teṃ hoya majakāraṇeṃ / taiseṃ karīṃ

āpulā athavā parāvā / ṭhāyīṃ upakarasī pāṃḍavā /
teṇeṃ yajñeṃ hoīṃ baravā / yājñiku mājhā

heṃ ekaika śikaūṃ kāī / paiṃ sevakeṃ āpulyā ṭhāīṃ /
urūni yera sarvahī / mī sevyaci karīṃ

tetha jāūniyā bhūtadveṣu / sarvatra namavaina mīci eku /
aiseni āśrayo ātyaṃtiku / lāhasī tūṃ mājhā

maga bharaleyā jagāāṃtu / jāūni tijayācī mātu /
hoūni ṭhāyīla ekāṃtu / āmhāṃ tumhāṃ

tevhāṃ bhalatiye āvasthe / mī tūteṃ tūṃ māteṃ /
bhogisī aiseṃ āiteṃ / vāḍhela sukha

āṇi tijeṃ āḍaḻa kariteṃ / nimāleṃ arjunā jetheṃ /
teṃ mīci mhaṇauni tūṃ māteṃ / pāvasī śekhīṃ

jaisī jaḻīṃcī pratibhā / jaḻanāśīṃ biṃbā /
yetāṃ gābhāgobhā / kāṃhīṃ āhe ?

paiṃ pavanu aṃbarā / kāṃ kalloḻu sāgarā /
miḻatāṃ āḍavārā / koṇācā gā ?

mhaṇauni tūṃ āṇi āmhīṃ / heṃ disatāhe dehadharmīṃ /
maga yayācyā virāmīṃ / mīci hosī

yayā bolāmājhārīṃ / hoya navhe jhaṇeṃ karīṃ /
yetha āna āthī tarī / tujhīci āṇa

paiṃ tujhī āṇa vāhaṇeṃ / heṃ ātmaliṃgāteṃ śivaṇeṃ /
prītīcī jāti lājaṇeṃ / āṭhavoṃ nedī

yeऱhavīṃ vedyu niṣprapaṃcu / jeṇeṃ viśvābhāsu hā sācu /
ājñecā naṭanācu / kāḻāteṃ jiṇeṃ

to devo mī satyasaṃkalpu / āṇi jagācyā hitīṃ bāpu /
mā āṇecā ākṣepu / kāṃ karāvā ?

parī arjunā tujheni vedheṃ / miyāṃ devapaṇācīṃ birudeṃ /
sāṃḍilīṃ gā mī he ādheṃ / sagaḻeni tuvāṃ

paiṃ kājā āpuliyā / rāvo āpulī āpaṇayā /
āṇa vāhe dhanaṃjayā / taiseṃ heṃ kīṃ

tetha arjunu mhaṇe deveṃ / acāṭa heṃ na bolāveṃ /
je āmaceṃ kāja nāṃveṃ / tujheni eke

yāvarī sāṃgoṃ baisasī / kāṃ sāṃgatāṃ bhāṣahī desī /
yā tujhiyā vinodāsī / pāru āhe jī ?

kamaḻavanā vikāśu / karī ravīcā eka aṃśu /
tetha āghavāci prakāśu / nitya de to

pṛthvī nivaūni sāgara / bharījatī yevaḍheṃ thora /
varṣe tetha miṣāṃtara / cātaku kīṃ

mhaṇauni audāryā tujheyā / maja nimitta nā mhaṇāvayā /
prāpti ase dānīrāyā / kṛpānidhī

taṃva devo mhaṇatī rāheṃ / yā bolācā prastāvo nohe /
paiṃ māteṃ pāvasī upāyeṃ / sācaci yeṇeṃ

saiṃdhava siṃdhū paḍaliyā / jo kṣaṇu dhanaṃjayā /
teṇeṃ vireci kīṃ urāvayā / kāraṇa kāyī ?

taiseṃ sarvatra māteṃ bhajatāṃ / sarva mī hotāṃ ahaṃtā /
niḥśeṣa jāūni tatvatā / mīci hosī

evaṃ mājhiye prāptīvarī / karmālāgoni avadhārīṃ /
dāvilī tuja ujarī / upāyāṃcī

je ādhīṃ taṃva paṃḍusutā / sarva karmeṃ maja arpitāṃ /
sarvatra prasannatā / lāhije mājhī

pāṭhīṃ mājhyā iye prasādīṃ / mājheṃ jñāna jāya siddhī /
teṇeṃ misaḻije triśuddhī / svarūpīṃ mājhyā

maga pārthā tiye ṭhāyīṃ / sādhya sādhana hoya nāhīṃ /
kiṃbahunā tuja kāṃhīṃ / ureci nā

tarī sarva karmeṃ āpalīṃ / tuvāṃ sarvadā maja arpilīṃ /
teṇeṃ prasannatā lādhalī / āji he mājhī

mhaṇauni yeṇeṃ prasādabaḻeṃ / navhe jhuṃjāceni āḍaḻeṃ /
na ṭhākeci yekaveḻe / bhāḻaloṃ tuja

jeṇeṃ saprapaṃca ajñāna jāye / eku mī gocaru hoye /
teṃ upapattīceni upāyeṃ / gītārūpa heṃ

miyāṃ jñāna tuja āpuleṃ / nānāparī upadeśileṃ /
yeṇeṃ ajñānajāta sāṃḍī viyāleṃ / dharmādharma jeṃ

āśā jaisī duḥkhāteṃ / vyālīṃ niṃdā duriteṃ /
he aso jaiseṃ dainyāteṃ / durbhagatva

taiseṃ svarganarakasūcaka / ajñāna vyāleṃ dharmādika /
teṃ sāṃḍūni ghālīṃ aśekha / jñāneṃ yeṇeṃ

hātīṃ gheūna to doru / sāṃḍije jaisā sarpākāru /
kāṃ nidrātyāgeṃ gharācāru / svapnīṃcā jaisā

nānā sāṃḍileni kavaḻeṃ / caṃdrīṃceṃ dhuye piṃvaḻeṃ /
vyādhityāgeṃ kaḍuvāḻeṃ\- / paṇa mukhāceṃ

agā divasā pāṭhīṃ deunī / mṛgajaḻa ghāpe tyajunī /
kāṃ kāṣṭhatyāgeṃ vanhī / tyajije jaisā

taiseṃ dharmādharmāceṃ ṭavāḻa / dāvī ajñāna jeṃ kāṃ mūḻa /
teṃ tyajūni tyajīṃ sakaḻa / dharmajāta

maga ajñāna nimāliyā / mīci yeku ase apaisayā /
sanidra svapna gelayā / āpaṇapeṃ jaiseṃ

taisā mī ekavāṃcūni kāṃhīṃ / maga bhinnābhinna āna nāhīṃ /
so'haṃbodheṃ tayācyā ṭhāyīṃ / ananyu hoya

paiṃṃ āpuleni bhedeṃviṇa / mājheṃ jāṇije jeṃ ekapaṇa /
tayāci nāṃva śaraṇa / maja yīṇeṃ gā

jaiseṃ ghaṭāceni nāśeṃ / gaganīṃ gagana praveśe /
maja śaraṇa yeṇeṃ taiseṃ / aikya karī

suvarṇamaṇi sonayā / ye kalloḻu jaisā pāṇiyā /
taisā maja dhanaṃjayā / śaraṇa ye tūṃ

vāṃcūni sāgarācyā poṭīṃ / vaḍavānaḻu śaraṇa ālā kirīṭī /
jāḻūni ṭhāke tayā goṭhī / vāḻūni de pāṃ

majahī śaraṇa righije / āṇi jīvatveṃci asije /
dhig bolī yiyā na laje / prajñā kevīṃ

agā prākṛtāhī rāyā / āṃgīṃ paḍe jeṃ dhanaṃjayā /
teṃ dāsirūṃhi kīṃ tayā / samāna hoya

mā mī viśveśvaru bheṭe / āṇi jīvagraṃthī na suṭe /
he bola nako vokhaṭeṃ / kānīṃ lāūṃ

mhaṇauni mī hoūni māteṃ / sevaṇeṃ āhe āyiteṃ /
teṃ karīṃ hātāṃ yeteṃ / jñāneṃ yeṇeṃ

maga tākauniyāṃ kāḍhileṃ / loṇī māgauteṃ tākīṃ ghātaleṃ /
parī na ghepeci kāṃhīṃṃ keleṃ / teṇeṃ jevīṃ

taiseṃ advayatveṃ maja / śaraṇa righāliyā tuja /
dharmādharma he sahaja / lāgatīla nā

loha ubheṃ khāya mātī / teṃ parīsāciye saṃgatīṃ /
soneṃ jālayā puḍhatī / na śivije maḻeṃ

heṃ aso kāṣṭhāpāsoni / mathūni ghetaliyā vanhī /
maga kāṣṭheṃhī koṃḍonī / na ṭhake jaisā

arjunā kāya dinakaru / dekhata āhe aṃdhāru /
kīṃ prabodhīṃ hoya gocaru / svapnabhramu /

taiseṃ majasī yekavaṭaleyā / mī sarvarūpa vāṃcūniyāṃ /
āna kāṃhīṃ urāvayā / kāraṇa ase ?

mhaṇauni tayāceṃ kāṃhīṃ / ciṃtīṃ na āpulyā ṭhāyīṃ /
tujheṃ pāpapuṇya pāhīṃ / mīci hoīna

tetha sarvabaṃdhalakṣaṇeṃ / pāpeṃ urāveṃ dujepaṇeṃ /
teṃ mājhyā bodhīṃ vāyāṇeṃ / hoūni jāīla

jaḻīṃ paḍiliyā lavaṇā / sarvahī jaḻa hoīla vicakṣaṇā /
tuja mī ananyaśaraṇā / hoīna taisā

yetuleni āpaisayā / suṭalāci āhasī dhanaṃjayā /
gheīṃ maja prakāśoniyāṃ / soḍavīna tūṃteṃ

yākāraṇeṃ puḍhatī / he ādhī na vāhe cittīṃ /
maja ekāsi ye sumatī / jāṇoni śaraṇa

aiseṃ sarvarūparūpaseṃ / sarvadṛṣṭiḍoḻaseṃ /
sarvadeśanivāseṃ / bolileṃ śrīkṛṣṇeṃ

maga sāṃvaḻā sakaṃkaṇu / bāhu pasaroni dakṣiṇu /
āliṃgilā svaśaraṇu / bhaktarāju to

na pavatāṃ jayāteṃ / kākhe sūni buddhīteṃ /
boṃlaṇeṃ māgauteṃ / vosaraleṃ

aiseṃ jeṃ kāṃhīṃ yeka / bolā buddhīsihī aṭaka /
teṃ dyāvayā miṣa / khevāceṃ keleṃ

hṛdayā hṛdaya yeka jāle / ye hṛdayīṃceṃ te hṛdayīṃ ghātaleṃ /
dvaita na moḍitāṃ keleṃ / āpaṇāseṃ arjunā

dīpeṃ dīpa lāvilā / taisā parīṣvaṃgu to jālā /
dvaita na moḍitāṃ kelā / āpaṇapeṃ pārthuṃ

tevhāṃ sukhācā maga tayā / pūru ālā jo dhanaṃjayā /
tetha vāḍu taऱhīṃ buḍoniyāṃ // ṭhelā devo

siṃdhu siṃdhūteṃ pāvoṃ jāye / teṃ pāvaṇeṃ ṭhāke duṇā hoye /
varī rige puravaṇiye / ākāśahī

taiseṃ tayāṃ doghāṃceṃ miḻaṇeṃ / doghāṃ nāvare jāṇāveṃ kavaṇeṃ /
kiṃbahunā śrīnārāyaṇeṃ / viśva koṃdaleṃ

evaṃ vedāceṃ mūḻasūtra / sarvādhikāraikapavitra /
śrīkṛṣṇeṃ gītāśāstra / prakaṭa keleṃ

yetha gītā mūḻa vedāṃ / aiseṃ kevīṃ pāṃ āleṃ bodhā /
heṃ mhaṇāla tarī prasiddhā / upapatti sāṃgoṃ

tarī jayācyā niḥśvāsīṃ / janma jhāle vedarāśī /
to satyapratijña paijesīṃ / bolalā svamukheṃ

mhaṇauni vedāṃ mūḻabhūta / gītā mhaṇoṃ heṃ hoya ucita /
āṇikahī yekī yetha / upapatti ase

jeṃ na naśatu svarūpeṃ / jayācā vistāru jetha lape /
teṃ tayāṃceṃ mhaṇipe / bīja jagīṃ

tarī kāṃḍatrayātmaku / śabdarāśī aśekhu /
gītemājīṃ ase rukhu / bījīṃ jaisā

mhaṇauni vedāṃceṃ bīja / śrīgītā hoya heṃ maja /
game āṇi sahaja / disatahī āhe

je vedāṃce tinhī bhāga / gīte umaṭale asatī cāṃga /
bhūṣaṇaratnīṃ sarvāṃga / śobhaleṃ jaiseṃ

tiyeci karmādikeṃ tinhī / kāṃḍeṃ koṇakoṇe sthānīṃ /
gīte āhāti teṃ nayanīṃ / dākhaūṃ āīka

tarī pahilā jo adhyāvo / to śāstrapravṛttiprastāvo /
dvitīyīṃ sāṅkhyasadbhāvo / prakāśilā

mokṣadānīṃ svataṃtra / jñānapradhāna heṃ śāstra /
yetulāleṃ dujīṃ sūtra / ubhārileṃ

maga ajñāneṃ bāṃdhaleyāṃ / mokṣapadīṃ baisāvayā /
sādhanāraṃbhu to tṛtīyā\- / dhyāyīṃ bolilā

je dehābhimāna baṃdheṃ / sāṃḍūni kāmyaniṣiddheṃ /
vihita parī apramādeṃ / anuṣṭhāveṃ

aiseni sadbhāveṃ karma karāveṃ / hā tijā adhyāvo jo deveṃ /
nirṇaya kelā teṃ jāṇāveṃ / karmakāṃḍa yetha

āṇi teṃci nityādika / ajñānāceṃ āvaśyaka /
ācaratāṃ moṃcaka / kevīṃ hoya pāṃ

aisī apekṣā jāliyā / baddha mumukṣute āliyā /
deveṃ brahmārpaṇatveṃ kriyā / sāṃgitalī

je dehavācāmānaseṃ / vihita nipaje jeṃ jaiseṃ /
teṃ eka īśvaroddeśeṃ / kīje mhaṇitaleṃ

heṃci īśvarīṃ karmayogeṃ / bhajanakathanāceṃ khāgeṃ /
ādarileṃ śeṣabhāgeṃ / caturthācenī

teṃ viśvarūpa akarāvā / adhyāvo saṃpe jaṃva āghavā /
taṃva karmeṃ īśu bhajāvā / heṃ jeṃ bolileṃ

teṃ aṣṭādhyāyīṃ ughaḍa / jāṇa yetheṃ devatākāṃḍa /
śāstra sāṃgatase āḍa / moḍūni boleṃ

āṇi teṇeṃci īśaprasādeṃ / śrīgurusaṃpradāyalabdheṃ /
sāca jñāna udbodhe / koṃvaḻeṃ jeṃ

teṃ adveṣṭādiprabhṛtikīṃ / athavā amānitvādikīṃ /
vāḍhavije mhaṇauni lekhī / bārāvā gaṇūṃ

to bārāvā adhyāya ādī / āṇi paṃdharāvā avadhī /
jñānaphaḻapākasiddhī / nirūpaṇāsīṃ

mhaṇauni cahūṃhī ihīṃ / ūrdhvamūḻāṃtīṃ adhyāyīṃ /
jñānakāṃḍa ye ṭhāyīṃ / nirūpije

evaṃ kāṃḍatrayanirūpaṇī / śrutīci he koḍisavāṇī /
gītāpadyaratnāṃcīṃ leṇīṃ / leyilī āhe

heṃ aso kāṃḍatrayātmaka / śruti mokṣarūpa phaḻa yeka /
bobhāve jeṃ āvaśyaka / ṭhākāveṃ mhaṇauni

tayāceni sādhana jñāneṃsīṃ / vaira karī jo pratidivaśīṃ /
to ajñānavarga ṣoḍaśīṃ / pratipādije

toci śāstrācā boḻāvā / ghevoni vairī jiṇāvā /
hā niropu to satarāvā / adhyāya yetha

aisā prathamālāgoni / satarāvā lāṇī karūnī /
ātmaniśvāsa vivarūnī / dāvilā deveṃ

tayā arthajātāṃ aśeṣāṃ / kelā tātparyācā āvāṃkā /
to hā aṭharāvā dekhā / kalaśādhyāyo

evaṃ sakaḻasaṃkhyāsiddhu / śrībhāgavadgītā prabaṃdhu /
hā audāryeṃ āgaḻā vedu / mūrtu jāṇa

vedu saṃpannu hoya ṭhāīṃ / parī kṛpaṇu aisā ānu nāhīṃ /
je kānīṃ lāgalā tihīṃ / varṇāṃcyāci

yerāṃ bhavavyāthā ṭheliyāṃ / strīśūdrādikāṃ prāṇiyāṃ /
anavasarū māṃḍūniyāṃ / rāhilā āhe

tarī maja pāhatāṃ teṃ māgīla uṇeṃ / pheḍāvayā gītāpaṇeṃ /
vedu veṭhalā bhalateṇeṃ / sevya hoāvayā

nā he arthu rigoni manīṃ / śravaṇeṃ lāgoni kānīṃ /
japamiṣeṃ vadanīṃ / vasoniyāṃ

ye gītecā pāṭhu jo jāṇe / tayāceni sāṃgātīpaṇeṃ /
gītā lihoni vāhāṇeṃ / pustakamiṣeṃ

aisaisā misakaṭāṃ / saṃsārācā cohaṭā /
gavādī ghālīta cokhaṭā / mokṣasukhācī

parī ākāśīṃ vasāvayā / pṛthvīvarī baisāvayā /
ravidīpti rāhāṭāvayā / āvāru nabha

tevīṃ uttama adhama aiseṃ / sevitāṃ kavaṇāteṃhī na puse /
kaivalyadāneṃ sariseṃ / nivavīta jagā

yālāgīṃ māgilī kuṭī / bhyālā vedu gītecyā poṭīṃ /
rigālā ātāṃ gomaṭī / kīrti pātalā

mhaṇauni vedācī susevyatā / te he mūrta jāṇa śrīgītā /
śrīkṛṣṇeṃ paṃḍusutā / upadeśilī

parī vatsāceni voraseṃ / dubhateṃ hoya gharoddeśeṃ /
jāleṃ pāṃḍavāceni miṣeṃ / jagaduddharaṇa

cātakāciyeṃ kaṇaveṃ / meghu pāṇiyesiṃ dhāṃve /
tetha carācara āghaveṃ / nivāleṃ jevīṃ

kāṃ ananyagatikamaḻā\- / lāgīṃ sūrya ye veḻoveḻāṃ /
kīṃ sukhiyā hoīje ḍoḻāṃ / tribhuvanīṃcā

taiseṃ arjunāceni vyājeṃ / gītā prakāśūni śrīrājeṃ /
saṃsārāyevaḍheṃ thora ojheṃ / pheḍileṃ jagāceṃ

sarvaśāstraratnadīptī / ujaḻitā hā trijagatīṃ /
sūryu navheṃ lakṣmīpatī / vaktrākāśīṃcā

bāpa kuḻa teṃ pavitra / jethiṃcā pārthu yā jñānā pātra /
jeṇeṃ gītā keleṃ śāstra / āvāru jagā

heṃ aso maga teṇeṃ / sadguru śrīkṛṣṇeṃ /
pārthāceṃ misaḻaṇeṃ / āṇileṃ dvaitā

pāṭhīṃ mhaṇatase pāṃḍavā / śāstra heṃ mānaleṃ kīṃ jīvā /
tetha yeru mhaṇe devā / āpuliyā kṛpā

tarī nidhāna joḍāvayā / bhāgya ghaḍe gā dhanaṃjayā /
parī joḍileṃ bhogāvayā / vipāyeṃ hoya

paiṃ kṣīrasāgarāyevaḍheṃ / avirajī dudhāceṃ bhāṃḍeṃ /
surāṃ asurāṃ kevaḍheṃ / mathitāṃ jāleṃ

teṃ sāyāsahī phaḻā āleṃ / jeṃ amṛtahī ḍoḻāṃ dekhileṃ /
parī varicilī cukaleṃ / jataneteṃ

tetha amaratvā vogarileṃ / teṃ maraṇācilāgīṃ jāleṃ /
bhogoṃ neṇatāṃ joḍaleṃ / aiseṃ āhe

nahuṣu svargādhipati jāhalā / parī rāhāṭīṃ bhāṃbāvalā /
to bhujaṃgatva pāvalā / neṇasī kāyī ?

mhaṇauni bahuta puṇya tuvāṃ / keleṃ teṇeṃ dhanaṃjayā /
āji śāstrarājā iyā / jālāsi viṣayo

tarī yayāci śāstrāceni / saṃpradāyeṃ pāṃghurauni /
śāstrārtha hā nikeni / anuṣṭhīṃ ho

yeऱhavīṃ amṛtamaṃthanā\- / sārikheṃ hoīla arjunā /
jarī righasī anuṣṭhānā / saṃpradāyeṃvīṇa

gāya dhaḍa joḍe gomaṭī / te taiṃci pivoṃ ye kirīṭī /
jaiṃ jāṇije hātavaṭī / sāṃjavaṇīcī

taisā śrīguru prasanna hoye / śiṣya vidyāhī kīra lāhe /
parī te phaḻe saṃpradāyeṃ / upāsiliyā

mhaṇauni śāstrīṃ jo iye / ucitu saṃpradāyo āhe /
to aika ātāṃ bahuveṃ / ādareṃsīṃ

tarī tuvāṃ heṃ jeṃ pārthā / gītāśāstra lādhaleṃ āsthā /
teṃ tapohīnā sarvathā / sāṃgāveṃ nā ho

athavā tāpasuhī jālā / parī gurūbhaktīṃ jo ḍhilā /
to vedīṃ aṃtyaju vāḻiḻā / taisā vāḻīṃ

nātarī puroḍāśu jaisā / na ghāpe vṛddha tarī vāyasā /
gītā nedī taisī tāpasā / gurubhaktihīnā

kāṃ tapahī joḍe dehīṃ / bhaje gurudevāṃcyā ṭhāyīṃ /
parī ākarṇanīṃ nāhīṃ / cāḍa jarī

tarī māgīla donhīṃ āṃgīṃ / uttama hoya kīra jagīṃ /
parī yā śravaṇālāgīṃ / yogyu nohe

muktāphaḻa bhalataiseṃ / ho parī mukha nase /
taṃva guṇa praveśe / tetha kāyī ?

sāgaru gaṃbhīru hoye / heṃ koṇa nā mhaṇata āhe /
parī vṛṣṭi vāyāṃ jāye / jālī tetha

dhāliyā divyānna suvāveṃ / maga jeṃ vāyāṃ dhāḍāveṃ /
teṃ ārtīṃ kāṃ na karāveṃ / udārapaṇa

mhaṇauni yogya bhalataiseṃ / hotu parī cāḍa nase /
tarī jhaṇeṃ vānivaseṃ / desī heṃ tayāṃ

rūpācā sujāṇu ḍoḻā / voḍhavūṃ ye kāyi parimaḻā ? /
jetha jeṃ māne te phaḻā / tethaci te gā

mhaṇauni tapī bhakti / pāhāve te subhadrāpatī /
parī śāstraśravaṇīṃ anāsaktī / vāḻāveci te

nātarī tapabhakti / hoūni śravaṇīṃ ārti /
āthī aisīhī āyatī / dekhasī jarī

tarī gītāśāstranirmitā / jo mī sakaḻalokaśāstā /
tayā māteṃ sāmānyatā / bolela jo

mājhyā sajjaneṃsiṃ māteṃ / paiśunyāceni hāteṃ /
yeka āhātī tayāṃteṃ / yogya na mhaṇa

tayāṃcī yera āghavī / sāmagrī aisī jāṇāvī /
dīpeṃvīṇa ṭhāṇadivī / rātrīcī jaisī

aṃga goreṃ āṇi taruṇeṃ / varī leīleṃ āhe leṇeṃ /
parī yekaleni prāṇeṃ / sāṃḍileṃ jevīṃ

sonayāceṃ suṃdara / nirvāḻileṃ hoya ghara /
parī sarpāṃganā dvāra / ruṃdhaleṃ āhe

nipaje divyānna cokhaṭa / parī mājīṃ kāḻakūṭa /
aso maitrī kapaṭa\- / garbhiṇī jaisī

taisī tapabhaktimedhā / tayācī jāṇa prabuddhā /
jo mājhayāṃcī kāṃ niṃdā / mājhīci karī

yākāraṇeṃ dhanaṃjayā / to bhaktu medhāvīṃ tapiyā /
tarī nako bāpā iyā / śāstrā ātaḻoṃ devoṃ

kāya bahu boloṃ niṃdakā / yogya sraṣṭayāhīsārikhā /
gītā he kavatikā\- / lāgīṃhī nedīṃ

mhaṇauni tapācā dhanurdharā / taḻīṃ dāṭoni gāḍorā /
varī gurubhaktīcā purā / prāsādu jo jālā

āṇi śravaṇecchecā puḍhāṃ / dāravaṃṭā sadā ughaḍā /
varī kalaśu cokhaḍā / aniṃdāratnāṃcā

aiśā bhaktālayīṃ cokhaṭīṃ / gītāratneśvaru hā pratiṣṭhīṃ /
maga mājhiyā saṃvasāṭī / tukasī jagīṃ

kāṃ je ekākṣarapaṇeṃsīṃ / trimātrakeciye kuśīṃ /
praṇavu hotāṃ garbhavāsīṃ / sāṃkaḍalā

to gīteciyā bāhāḻīṃṃ / vedabīja geleṃ pāhāḻī.ṇ /
kīṃ gāyatrī phulīṃphaḻīṃ / ślokāṃcyā ālī

te he maṃtrarahaya gītā / meḻavī jo mājhiyā bhaktā /
ananyajīvanā mātā / bāḻakā jaisī

taisī bhaktāṃ gītesīṃ / bheṭī karī jo ādareṃsīṃ /
to dehāpāṭhīṃ majasīṃ / yekaci hoya

āṇi dehāceṃhī leṇeṃ / leūni vegaḻepaṇeṃ /
ase taṃva jīveṃprāṇeṃ / toci paḍhiye

jñāniyāṃ karmaṭhāṃ tāpasāṃ / yayā khuṇeciyā māṇusāṃ\- /
mājīṃ to yeku gā jaisā / paḍhiye maja

taisā bhūtaḻīṃ āghavā / āna na dekhe pāṃḍavā /
jo gītā sāṃgeṃ meḻāvā / bhaktajanāṃcā

maja īśvarāceni lobheṃ / he gītā paḍhatāṃ akṣobheṃ /
jo maṃḍana hoya sabhe / saṃtāṃciye

netrapallavīṃ romāṃcitu / maṃdāniḻeṃ kāṃpavitu /
āmodajaḻeṃ volavitu / phulāṃce ḍoḻeṃ

kokiḻā kalaravāceni miṣeṃ / sadgada bolavīta jaiseṃ /
vasaṃta kā praveśe / madbhakta ārāmīṃ

kāṃ janmāceṃ phaḻa cakorāṃ / hota jaiṃ caṃdra ye aṃbarā /
nānā navaghana mayūrāṃ / vo deta pāve

taisā sajjanāṃcyā meḻāpīṃ / gītāpadyaratnīṃ umapīṃ /
varṣe jo mājhyā rūpīṃ / hetu ṭheūni

maga tayāceni pāḍeṃ / paḍhiyaṃteṃ maja phuḍeṃ /
nāhīṃci gā māgeṃpuḍheṃ / nyāhāḻitāṃ

arjunā hā ṭhāyavarī / mī tayāteṃ sūyeṃ jivhārīṃ /
jo gītārthāceṃ karī / paraguṇeṃ saṃtāṃ

paiṃ mājhiyā tujhiyā miḻaṇīṃ / vāḍhinalī je he kahāṇī /
mokṣadharma kā jiṇīṃ / ālāse jetheṃ

to hā sakaḻārthaprabodhu / āmhāṃ doghāṃcā saṃvādu /
na karitāṃ padabhedu / pāṭheṃci jo paḍhe

teṇeṃ jñānānaḻīṃ pradīptīṃ / mūḻa avidyeciyā āhutī /
toṣavilā hoya sumatī / paramātmā mī

gheūni gītārtha ugāṇā / jñāniye jeṃ vicakṣaṇā /
ṭhākatī teṃ gāṇāvāṇā / gītecā to lāhe

gītā pāṭhakāsi ase / phaḻa arthajñāci sariseṃ /
gītā māuliyesi nase / jāṇeṃ tānheṃ

āṇi sarvamārgīṃ niṃdā / sāṃḍūni āsthā paiṃ śuddhā /
gītāśravaṇīṃ śraddhā / ubhārī jo

tayācyā śravaṇapuṭīṃ / gītecīṃ akṣareṃ jaṃva paiṭhīṃ /
hotīnā taṃva uṭhāuṭhīṃ / paḻeci pāpa

aṭaviyemājīṃ jaisā / vanhi righatāṃ sahasā /
laṃghitī kā diśā / vanaukeṃ tiyeṃ

kāṃ udayācaḻakuḻīṃ / jhaḻakatāṃ aṃśumāḻī /
timireṃ aṃtarāḻīṃ / hārapatī

taisā kānācyā mahādvārīṃ / gītā gajara jetha karī /
tetha sṛṣṭīciye ādivarī / jāyaci pāpa

aisī janmavelī dhuvaṭa / hoya puṇyarūpa cokhaṭa /
yāhīvarī acāṭa / lāhe phaḻa

jeṃ iye gītecīṃ akṣareṃ / jetulīṃ kāṃ karṇadvāreṃ /
righatī tetule hotī pure / aśvamedha kīṃ

mhaṇauni śravaṇeṃ pāpeṃ jātī / āṇi dharma dharī unnatī /
teṇeṃ svargarāja saṃpattī / lāheci śekhīṃ

to paiṃ maja yāvayālāgīṃ / pahileṃ peṇeṃ karī svargīṃ /
maga āvaḍe taṃva bhogī / pāṭhīṃ majaci miḻe

aisī gītā dhanaṃjayā / aikatayā āṇi paḍhatayā /
phaḻe mahānaṃdeṃ miyāṃ / bahu kāya boloṃ

yākāraṇeṃ heṃ aso / parī jayālāgīṃ śāstrātiso /
kelā teṃ taṃva tuja pusoṃ / kāja tujheṃ

tarī sāṃga pāṃ pāṃḍavā / hā śāstrasiddhāṃtu āghavā /
tuja ekacitteṃ phāvā / gelā āhe ?

āmhīṃ jaiseṃ jayā rītīṃ / ugāṇileṃ kānāṃcyā hātīṃ /
yerīṃ taiseṃci tujhyā cittīṃ / peṭheṃ keleṃ kīṃ ?

athavā mājhārīṃ / geleṃ sāṃḍīvikhurī /
kiṃvā upekṣevarī / vāḻūni sāṃḍileṃ /

jaiseṃ āmhīṃ sāṃgitaleṃ / taiseṃci hṛdayīṃ phāvaleṃ /
tarī sāṃga pāṃ vahileṃ / pusena teṃ mī

tarī svājñānajaniteṃ / māgileṃ moheṃ tūteṃ /
bhulavileṃ to yetheṃ / ase kīṃ nāhīṃ ?

heṃ bahu pusoṃ kāī / sāṃgeṃ tūṃ āpalyā ṭhāyīṃ /
karmākarma kāṃhīṃ / dekhatāsī ?

pārthu svānaṃdaikaraseṃ / virela aisā bhedadaśe /
āṇilā yeṇeṃ miṣeṃ / praśnāceni

pūrṇabrahma jālā pārthu / tarī puḍhīla sādhāvayā kāryārthu /
maryādā śrīkṛṣṇanāthu / ullaṃghoṃ nedī

yeऱhavīṃ āpuleṃ karaṇeṃ / sarvajña kāya to neṇeṃ ? /
parī keleṃ pusaṇeṃ / yāci lāgīṃ

evaṃ karoniyāṃ praśna / nasateṃci arjunapaṇa /
āṇūniyāṃ jāleṃ pūrṇapaṇa / teṃ bolavī svayeṃ

maga kṣīrābdhīteṃ sāṃḍitu / gaganīṃ puṃju maṃḍitu /
nivaḍe jaisā na nivaḍitu / pūrṇacaṃdru

taisā brahma mī heṃ visare / tetha jagaci brahmatveṃ bhare /
heṃhī sāṃḍī tarī vire / brahmapaṇahī

aisā moḍatu māṃḍatu brahmeṃ / to duḥkheṃ dehāciye sīme /
mī arjuna yeṇeṃ nāmeṃ / ubhā ṭhelā

maga kāṃpatāṃ karataḻīṃ / daḍapūni romāvaḻī /
pulikā svedajaḻīṃ / jiraūniyāṃ

prāṇakṣobheṃ ḍolatayā / āṃgā āṃgaci ṭeṃkayā /
sūni staṃbhu cāḻayā / bhulauniyāṃ

netrayuguḻāceni voteṃ / ānaṃdāmṛtāceṃ bhariteṃ /
vosaṃḍata teṃ māguteṃ / kāḍhūniyāṃ

vividhā autsukyāṃcī dāṭī / cīpa dāṭata hotī kaṃṭhīṃ /
te karūniyāṃ paiṭhī / hṛdayāmājīṃ

vāceceṃ vituḻaṇeṃ / sāṃvarūni prāṇeṃ /
akramāceṃ śvasaṇeṃ / ṭheūni ṭhāyīṃ

maga arjuna mhaṇe kāya devo / pusatāti āvaḍe moho /
tarī to sakuṭuṃba gelā jī ṭhāvo / gheūni āpalā

pāsīṃ yeūni dinakareṃ / ḍoḻyāteṃ aṃdhāreṃ /
pusije heṃ kāyi sare / koṇe gāṃvīṃ ?

taisā tūṃ śrīkṛṣṇarāyā / āmuciyā ḍoḻayāṃ /
gocara heṃci kāyisayā / na pure taṃva

varī lobheṃ māyepāsūnī / teṃ sāṃgasī toṃḍa bharūnī /
jeṃ kāyisenihī karūnī / jāṇūṃ naye

ātāṃ moha ase kīṃ nāhīṃ / heṃ aiseṃ jī pusasī kāī /
kṛtakṛtya jāhaloṃ pāhīṃ / tujhepaṇeṃ

guṃtaloṃ hotoṃ arjunaguṇeṃ / to mukta jāloṃ tujhepaṇeṃ /
ātāṃ pusaṇeṃ sāṃgaṇeṃ / donhī nāhīṃ

mī tujheni prasādeṃ / lādhaleni ātmabodheṃ /
mohāce tayā kāṃde / nedīca uroṃ

ātāṃ karaṇeṃ kāṃ na karaṇeṃ / heṃ jeṇeṃ uṭhī dujepaṇeṃ /
teṃ tūṃ vāṃcūni neṇeṃ / sarvatra gā

ye viṣayīṃ mājhyā ṭhāyīṃ / saṃdehāce nureci kāṃhīṃ /
triśuddhi karma jetha nāhīṃ / teṃ mī jāloṃ

tujheni maja mī pāvonī / kartavya geleṃ nipaṭūnī /
parī ājñā tujhī vāṃconi / āna nāhīṃ prabho

kāṃ jeṃ dṛśya dṛśyāteṃ nāśī / jeṃ dujeṃ dvaitāteṃ grāsī /
jeṃ eka parī sarvadeśīṃ / vasavī sadā

jayāceni saṃbaṃdheṃ baṃdhu phiṭe / jayāciyā āśā āsa tuṭe /
jeṃ bheṭalayā sarva bheṭe / āpaṇapāṃci

teṃ tūṃ guruliṃga jī mājheṃ / jeṃ yekalepaṇīṃceṃ virajeṃ /
jayālāgīṃ volāṃḍije / advaitabodhu

āpaṇaci hoūni brahma / sārije kṛtyākṛtyāṃceṃ kāma /
maga kīje kā niḥsīma / sevā jayācī

gaṃgā siṃdhū sevūṃ gelī / pāvatāṃci samudra jālī /
tevīṃ bhaktāṃ sela didhalī / nijapadācī

to tūṃ mājhā jī nirupacāru / śrīkṛṣṇā sevya sadguru /
mā brahmatecā upakāru / hāci mānīṃ

jeṃ maja tumhāṃ āḍa / hoteṃ bhedāceṃ kavāḍa /
teṃ pheḍoni keleṃ goḍa / sevāsukha

tarī ātāṃ tujhī ājñā / sakaḻa devādhidevarājñā /
karīna deīṃ anujñā / bhalatiyeviṣayīṃ

yayā arjunāciyā bolā / devo nāce sukheṃ bhulalā /
mhaṇe viśvaphaḻā jālā / phaḻa hā maja

uṇeni umacalā sudhākaru / dekhunī āpalā kumaru /
maryādā kṣīrasāgaru / visarecinā ?

aise saṃvādāciyā bahulāṃ / lagna doghāṃciyāṃ āṃtulā /
lāgaleṃ dekhoni jālā / nirbharu saṃjayo

teṇeṃ mhaṇatase saṃjayo / bāpa kṛpānidhī rāvo /
to āpulā manobhāvo / arjuneṃsī kelā

teṇeṃ ucaṃbaḻalepaṇeṃ / saṃjaya dhṛtarāṣṭrāteṃ mhaṇe /
jī kaise bādarāyaṇeṃ / rakṣiloṃ doghe ?

āji tumateṃ avadhārā / nāhīṃ carmacakṣūhī saṃsārā /
kīṃ jñānadṛṣṭivyavahārā āṇiletī

āṇi rathīṃciye rāhāṭī / gheī jo ghoḍeyāsāṭhīṃ /
tayā āmhāṃ yā goṣṭī / gocarā hotī

varī juṃjhāceṃ nirvāṇa / māṃḍaleṃ ase dāruṇa /
dohīṃ hārīṃ āpaṇa / hārapije jaiseṃ

yevaḍhā jiye sāṃkaḍāṃ / kaisā anugraho paiṃ gāḍhā /
je brahmānaṃdu ughaḍā / bhogavītase

aiseṃ saṃjaya bolilā / parī na drave yeru ugalā /
caṃdrakiraṇīṃ śivatalā / pāṣāṇu jaisā

he dekhoni tayācī daśā / maga karīcinā sarisā /
parī sukheṃ jālā pisā / bolatase

bhulavilā harṣavegeṃ / mhaṇauni dhṛtarāṣṭrā sāṃge /
yeऱhavīṃ navhe tayājogeṃ / heṃ kīra jāṇeṃ

maga mhaṇe paiṃ kururājā / aisā baṃdhuputra to tujhā /
bolilā teṃ adhokṣajā / goḍa jāleṃ

agā pūrvāpara sāgara / yayāṃ nāmasīci sināra /
yera āghaveṃ teṃ nīra / eka jaiseṃ

taisā śrīkṛṣṇa pārtha aiseṃ / heṃ āṃgācipāsīṃ dise /
maga saṃvādīṃ jī nase / kāṃhīṃci bhedu

paiṃ darpaṇāhūni cokheṃ / donhī hotī sanmukheṃ /
tetha yerī yera dekhe / āpaṇapeṃ jaiseṃ

taisā devesīṃ paṃḍusutu / āpaṇapeṃ devīṃ dekhatu /
pāṃḍaveṃsīṃ dekhe anaṃtu / āpaṇapeṃ pārthīṃ

deva devo bhaktālāgīṃ / jiye vivarūni dekhe āṃgīṃ /
yeru tiyecehī bhāgīṃ / donhī dekhe

āṇika kāṃhīṃca nāhīṃ / mhaṇauni karitī kāī /
doghe yekapaṇeṃ pāhīṃ / nāṃdatātī

ātāṃ bhedu jarī moḍe / tarī praśnottara kāṃ ghaḍe ? /
nā bheduci tarī joḍe / saṃvādasukha kāṃ ?

aiseṃ bolatāṃ dujepaṇeṃ / saṃvādīṃ dvaita giḻaṇeṃ /
teṃ aikileṃ bolaṇeṃ / doghāṃceṃ miyāṃ

uṭūni donhī ārise / voḍavilīyā sarise /
koṇa koṇā pāhātase / kalpāveṃ pāṃ ?

kāṃ dīpāsanmukhu / ṭhevilayā dīpaku /
koṇa koṇā arthiku / koṇa jāṇeṃ

nānā arkāpuḍheṃ arku / udayaliyā āṇiku /
koṇa mhaṇe prakāśaku / prakāśya kavaṇa ?

heṃ nirdhārūṃ jātāṃ phuḍeṃ / nirdhārāsi ṭhaka paḍe /
te doghe jāle evaḍhe / saṃvādeṃ sarise

jī miḻatāṃ donhī udakeṃ / mājī lavaṇa vārūṃ ṭhāke /
kīṃ tayāsīṃhī nimikheṃ / teṃci hoya

taise śrīkṛṣṇa arjuna donhī / saṃvādale teṃ manīṃ /
dharitāṃ majahī vānī / teṃci hotase

aiseṃ mhaṇe nā moṭakeṃ / taṃva hironi sātvikeṃ /
āṭhava nelā neṇoṃ keṃ / saṃjayapaṇācā

romāṃca jaṃva pharake / taṃva taṃva āṃga surake /
staṃbha svedāṃteṃ jiṃke / ekalā kaṃpu

advayānaṃdasparśeṃ / diṭhī rasamaya jālī ase /
te aśru navhatī jaiseṃ / dravatvaci

neṇoṃ kāya na māya poṭīṃ / neṇoṃ kāya guṃphe kaṃṭhīṃ /
vāgarthā paḍata miṭhī / usasāṃciyā

kiṃbahunā sātvikāṃ āṭhāṃ / cācaru māṃḍatāṃ umeṭhā /
saṃjayo jālāse cohaṭāṃ / saṃvādasukhācā

tayā sukhācī aisī jātī / je āpaṇaci dharī śāṃtī /
maga puḍhatī dehasmṛtī / lādhalī teṇeṃ

tevhāṃ baisateni ānaṃdeṃ / mhaṇe jī jeṃ upaniṣadeṃ /
neṇatī teṃ vyāsaprasādeṃ / aikileṃ miyāṃ

aikatāṃci te goṭhī / brahmatvācī paḍilī miṭhī /
mītūṃpaṇeṃsīṃ dṛṣṭī / vironi gelī

he āghaveci kā yoga / jayā ṭhāyā yetī mārga /
tayāceṃ vākya savaṃga / keleṃ maja vyāseṃ

aho arjunāceni miṣeṃ / āpaṇapeṃci dujeṃ aiseṃ /
naṭoni āpaṇayā uddeśeṃ / bolileṃ jeṃ deva

tetha kīṃ mājheṃ śrotra / pāṭāceṃ jāleṃ jī pātra /
kāya vānūṃ svataṃtra / sāmarthya śrīguruceṃ

rāyā heṃ bolatāṃ vismita hoye / teṇeṃci moḍāvalā ṭhāye /
ratnīṃ kīṃ ratnakiḻā ye / jhāṃkoḻita jaisī

himavaṃtīṃcīṃ sarovareṃ / caṃdrodayīṃ hotī kāśmīreṃ /
maga sūryāgamīṃ māghāreṃ / dravatva ye

taisā śarīrāciyā smṛtī / to saṃvādu saṃjaya cittīṃ /
dharī āṇi puḍhatī / teṃci hoya

maga uṭhoni mhaṇe nṛpā / śrīharīciyā viśvarūpā /
dekhilayā ugā kāṃ pāṃ / asoṃ lāhasī ?

na dekhaṇeni jeṃ dise / nāhīṃpaṇeṃci jeṃ ase /
visareṃ āṭhave teṃ kaiseṃ / cukaūṃ ātāṃ /

dekhoni camatkāru / kīje to nāhīṃ paisāru /
majahīsakaṭa mahāpūru / neta āhe

aisā śrīkṛṣṇārjuna- / saṃvāda saṃgamīṃ snāna /
karūni detase tiḻadāna / ahaṃteceṃ

tetha asaṃvareṃ ānaṃdeṃ / alaukikahī kāṃhīṃ sphuṃde /
śrīkṛṣṇa mhaṇe sadgadeṃ / veḻoveḻāṃ

yā avasthāṃcī kāṃhīṃ / kauravāṃteṃ parī nāhīṃ /
mhaṇauni rāyeṃ teṃ kāṃhīṃ / kalpāveṃ jaṃva

taṃva jālā sukhalābhu / āpaṇayā karūni svayaṃbhu /
bujhāvilā avaṣṭaṃbhu / saṃjayeṃ teṇeṃ

tetha koṇī yekī avasarī / hoāvī te karūni durī /
rāvo mhaṇe saṃjayā parī / kaisī tujhī gā ?

teṇeṃ tūṃteṃ yetheṃ vyāseṃ / baisavileṃ kāsayā uddeśeṃ /
aprasaṃgāmājīṃ aiseṃ / bolasī kāī ?

rānīṃceṃ rāuḻā neliyā / dāhī diśā mānī suniyā /
kāṃ rātrī hoya pāhalayā / niśācarāṃ

jo jethiṃceṃ gaurava neṇeṃ / tayāsi teṃ bhiṃguḻavāṇeṃ /
mhaṇauni aprasaṃgu teṇeṃ / mhaṇāvā kīṃ to

maga mhaṇe sāṃgeṃ prastuta / udayaleṃse jeṃ utkaḻita /
teṃ koṇāsi bā re jaita / deīla śekhīṃ ?

yeऱhavīṃ viśeṣeṃ bahuteka / āmuceṃ aiseṃ mānasika /
je duryodhanāce adhika / pratāpa sadā

āṇi yerāṃceni pāḍeṃ / daḻahī yāceṃ devhaḍeṃ /
mhaṇauni jaita phuḍeṃ / āṇīla nā teṃ ?

āmhāṃ taṃva game aiseṃ / mā tujheṃ jyotiṣa kaiseṃ /
teṃ neṇoṃ saṃjayā ase / taiseṃ sāṃga pāṃ

yayā bolā saṃjayo mhaṇe / jī yerayerāṃceṃ mī neṇeṃ /
parī āyuṣya tetheṃ jiṇeṃ / heṃ phuḍeṃ kīṃ gā

caṃdru tetheṃ caṃdrikā / śaṃbhu tetheṃ aṃbikā /
saṃta tetheṃ vivekā / asaṇeṃ kīṃ jī

rāvo tetheṃ kaṭaka / saujanya tetheṃ soyarīka /
vanhi tetheṃ dāhaka / sāmarthya kīṃ

dayā tetheṃ dharmu / dharmu tetheṃ sukhāgamu /
sukhīṃ puruṣottamu / ase jaisā

vasaṃta tetheṃ vaneṃ / vana tetheṃ sumaneṃ /
sumanīṃ pāliṃganeṃ / sāraṃgāṃcīṃ

guru tetha jñāna / jñānīṃ ātmadarśana /
darśanīṃ samādhāna / āthī jaiseṃ

bhāgya tetha vilāsu / sukha tetha ullāsu /
heṃ aso tetha prakāśu / sūrya jetheṃ

taise sakala puruṣārtha / jeṇeṃ svāmī kāṃ sanātha /
to śrīkṛṣṇa rāvo jetha / tetha lakṣmī

āṇi āpuleni kāṃteṃsīṃ / te jagadaṃbā jayāpāsīṃ /
aṇimādikīṃ kāya dāsī / navhatī tayāteṃ ?

kṛṣṇa vijayasvarūpa nijāṃgeṃ / to rāhilā ase jeṇeṃ bhāgeṃ /
taiṃ jayo lāgavegeṃ / tetheṃci āhe

vijayo nāmeṃ arjuna vikhyātu / vijayasvarūpa śrīkṛṣṇanāthu /
śriyesīṃ vijaya niścitu / tetheṃci ase

tayāciye deśīṃcyā jhāḍīṃ / kalpatarūteṃ hoḍī /
na jiṇāveṃ kāṃ yevaḍhīṃ / māyabāpeṃ asatāṃ ?

te pāṣāṇahī āghaveṃ / ciṃtārat‌neṃ kāṃ nohāve ? /
tiye bhūmike kāṃ na yāveṃ / suvarṇatva ?

tayāciyā gāṃvīṃciyā / nadī amṛteṃ vāhāviyā /
navala kāyi rāyā / vicārīṃ pāṃ

tayāce bisāṭa śabda / sukheṃ mhaṇoṃ yetī veda /
sadeha saccidānaṃda / kāṃ na vhāve te ?

paiṃ svargāpavarga donhī / iyeṃ padeṃ jayā adhīnīṃ /
to śrīkṛṣṇa bāpa jananī / kamaḻā jayā

mhaṇauni jiyā bāhīṃ ubhā / to lakṣmīyecā vallabhā /
tetheṃ sarvasiddhī svayaṃbhā / yera mī neṇeṃ

āṇi samudrācā meghu / upayogeṃ tayāhūni cāṃgu /
taisā pārthīṃ āji lāgu / āhe taye

kanakatvadīkṣāgurū / lohā parisu hoya kīrū /
parī jagā positā vyavahāru / teṃci jāṇeṃ

yetha gurutvā yetase uṇeṃ / aiseṃ jhaṇeṃ koṇhī mhaṇe /
vanhi prakāśa dīpapaṇeṃ / prakāśī āpulā

taisā devāciyā śaktī / pārthu devāsīci bahutī /
parī māne iye stutī / gaurava ase

āṇi putreṃ mī sarva guṇīṃ / jiṇāvā he bāpā śirāṇī /
tarī te śāraṅgapāṇī / phaḻā ālī

kiṃbahunā aisā nṛpā / pārthu jālāse kṛṣṇakṛpā /
to jayākaḍe sākṣepā / rīti āhe

toci gā vijayāsi ṭhāvo / yetha tuja koṇa saṃdeho ? /
tetha na ye tarī vāvo / vijayoci hoya

mhaṇauni jetha śrī tetheṃ śrīmaṃtu / jetha to paṃḍūcā sutu /
tetha vijaya samastu / abhyudayo tetha

jarī vyāsāceni sāceṃ / dhire mana tumaceṃ /
tarī yā bolāceṃ / dhruvaci mānā

jetha to śrīvallabhu / jetha bhaktakadaṃbu /
tetha sukha āṇi lābhu / maṃgaḻācā

yā bolā āna hoye / tarī vyāsācā aṃku na vāhe /
aiseṃ gājoni bāheṃ / ubhilī teṇeṃ

evaṃ bhāratācā āvāṃkā / āṇūni ślokā yekā /
saṃjayeṃ kurunāyakā / didhalā hātīṃ

jaisā neṇoṃ kevaḍhā vanhī / parī guṇāgrīṃ ṭheūnī /
āṇije sūryācī hānī / nistarāvayā

taiseṃ śabdabrahma anaṃta / jāleṃ savālakṣa bhārata /
bhāratāceṃ śateṃ sāta / sarvasva gītā

tayāṃhī sātāṃ śatāṃcā / ityarthu hā śloka śeṣīṃcā /
vyāsaśiṣya saṃjayācā / pūrṇodgāru jo

yeṇeṃ yekeṃci ślokeṃ / rāhe teṇeṃ asakeṃ /
avidyājātāceṃ nikeṃ / jiṃtaleṃ hoya

aiseṃ śloka śateṃ sāta / gītecīṃ padeṃ āṃgeṃ vāhata /
padeṃ mhaṇoṃ kīṃ paramāmṛta / gītākāśīṃceṃ

kīṃ ātmarājāciye sabhe / gīte voḍavale he khāṃbe /
maja śloka pratibhe / aise yeta

kīṃ gītā he saptaśatī / maṃtrapratipādya bhagavatī /
mohamahiṣā mukti / ānaṃdalī ase

mhaṇauni maneṃ kāyeṃ vācā / jo sevaku hoīla iyecā /
to svānaṃdāsāmrājyācā / cakravartī karī

kīṃ avidyātimiraroṃkheṃ / śloka sūryāteṃ paijā jiṃkeṃ /
aise prakāśile gītāmiṣeṃ / rāyeṃ śrīkṛṣṇeṃ

kīṃ ślokākṣaradrākṣalatā / māṃḍava jālī āhe gītā /
saṃsārapathaśrāṃtā / visaṃvāvayā

kīṃ sabhāgyasaṃtīṃ bhramarīṃ / kele te ślokakalhārīṃ /
śrīkṛṣṇākhyasarovarīṃ / sāsinnalī he

kīṃ śloka navhatī āna / game gīteceṃ mahimāna /
vākhāṇite baṃdījana / udaṃḍa jaise

kīṃ ślokāṃciyā āvārā / sāta śateṃ karūni suṃdarā /
sarvāgama gītāpurā / vasoṃ āle

kīṃ nijakāṃtā ātmayā / āvaḍī gītā miḻāvayā /
śloka navhatī bāhyā / pasaru kā jo

kīṃ gītākamaḻīṃce bhṛṃga / kīṃ he gītāsāgarataraṃga /
kīṃ harīce he turaṃga / gītārathīṃce

kīṃ śloka sarvatīrtha saṃghātu / ālā śrīgītegaṃge āṃtu /
je arjuna nara siṃhasthu / jālā mhaṇauni

kīṃ nohe he ślokaśreṇī / aciṃtyacittaciṃtāmaṇī /
kīṃ nirvikalpāṃ lāvaṇī / kalpatarūṃcī

aisiyā śateṃ sāta ślokāṃ / parī āgaḻā yekayekā /
ātāṃ koṇa vegaḻikā / vānāvāṃ pāṃ /

tānhī āṇi pāraṭhī / iyā kāmadhenūteṃ diṭhī /
sūni jaisiyā goṭhī / kījatī nā

dīpā āgilu māgilu / sūryu dhākuṭā vaḍīlu /
amṛtasiṃdhu kholu / uthaḻu kāyasā /

taise pahile sarate / śloka na mhaṇāve gīte /
junīṃ navīṃ pārijāteṃ / āhātī kāī ?

āṇi ślokā pāḍu nāhīṃ / heṃ kīra samarthu kāī /
yetha vācya vācakahī / bhāgu na dharī

je iye śāstrīṃ yeku / śrīkṛṣṇaci vācya vācaku /
heṃ prasiddha jāṇe loku / bhalatāhī

yetheṃ artheṃ teṃci pāṭheṃ / joḍe yevaḍheni dhaṭeṃ /
vācyavācaka yekavaṭeṃ / sādhiteṃ śāstra

mhaṇauni maja kāṃhīṃ / samarthanīṃ ātāṃ viṣaya nāhīṃ /
gītā jāṇā he vāṅgmayī / śrīmūrti prabhūci

śāstra vācyeṃ artheṃ phaḻe / maga āpaṇa māvaḻe /
taiseṃ navheṃ heṃ sagaḻeṃ / parabrahmaci

kaisā viśvāciyā kṛpā / karūni mahānaṃda sopā /
arjunavyājeṃ rūpā / āṇilā deveṃ

cakorāceni nimitteṃ / tinhī bhuvaneṃ saṃtapteṃ /
nivavilīṃ kaḻāṃvateṃ / caṃdreṃ jevīṃ

kāṃ gautamāceni miṣeṃ / kaḻikāḻajvarītoddeśeṃ /
pāṇiḍhāḻu girīśeṃ / gaṃgeṃcā kelā

taiseṃ gīteceṃ heṃ dubhateṃ / vatsa karūni pārthāteṃ /
dubhinnalī jagāpurateṃ / śrīkṛṣṇa gāya

yethe jīveṃ jarī nāhāla / tarī heṃci kīra hoāla /
nātarī pāṭhamiṣeṃ tiṃbāla / jībhaci jarī

tarī loha ekeṃ aṃśeṃ / jhagaṭaliyā parīseṃ /
yerīkaḍe apaiseṃ / suvarṇa hoya

taisī pāṭhācī te vāṭī / ślokapāda lāvā nā jaṃva voṭhīṃ /
taṃva brahmatecī puṣṭī / yeīla āṃgā

nā yeṇesīṃ mukha vāṃkaḍeṃ / karūni ṭhākāla kānavaḍeṃ /
tarī kānīṃhī ghetāṃ paḍe / teci lekha

je he śravaṇeṃ pāṭheṃ artheṃ / gītā nedī mokṣāārauteṃ /
jaisā samarthu dātā koṇhāteṃ / nāsti na mhaṇe

mhaṇauni jāṇatayā savā / gītāci yekī sevā /
kāya karāla āghavāṃ / śāstrīṃ yerīṃ

āṇi kṛṣṇārjunīṃ mokaḻī / goṭhī cāvaḻilī je nirāḻī /
te śrīvyāseṃ kelī karataḻīṃ / ghevoṃ ye aisī

bāḻakāteṃ voraseṃ / māya jaiṃ jevaūṃ baise /
taiṃ tayā ṭhākatī taise / ghāṃsa karī

kāṃ aphāṭā samīraṇā / āpaiteṃpaṇa śāhāṇā /
keleṃ jaiseṃ viṃjaṇā / nirmūniyāṃ

taiseṃ śabdeṃ jeṃ na labhe / teṃ ghaḍūniyā anuṣṭubheṃ /
strīśūdrādi pratibhe / sāmāvileṃ

svātīceni pāṇiyeṃ / na hotī jarī motiyeṃ /
tarī aṃgīṃ suṃdarāṃciye / kāṃ śobhitī tiyeṃ ?

nādu vādyā na yetāṃ / tarī kāṃ gocaru hotā /
phuleṃ na hotāṃ ghepatā / āmodu kevīṃ ?

goḍīṃ na hotī pakvānneṃ / tarī kāṃ phāvatī rasaneṃ ? /
darpaṇāvīṇa nayaneṃ / nayanu kāṃ dise ?

draṣṭā śrīgurumūrtī / na rigatā dṛśyapaṃthīṃ /
tarī kāṃ hyā upāstī / ākaḻatā to ?

taiseṃ vastu jeṃ asaṃkhyāta / tayā saṃkhyā śateṃ sāta /
na hotī tarī koṇā yetha / phāvoṃ śakateṃ ?

megha siṃdhūceṃ pāṇī vāhe / tarī jaga tayāteṃci pāhe /
kāṃ je umapa te noheṃ / ṭhākateṃ koṇhā

āṇi vācā jeṃ na pave / teṃ he śloka na hote barave /
tarī kāneṃ mukheṃ phāve / aiseṃ kāṃ hoteṃ ?

mhaṇauni śrīvyāsācā hā thoru / viśvā jālā upakāru /
je śrīkṛṣṇa uktī ākāru / graṃthācā kelā

āṇi toci hā mī ātāṃ / śrīvyāsācīṃ padeṃ pāhatāṃ pāhatāṃ /
āṇilā śravaṇapathā / maऱhāṭhiyā

vyāsādikāṃce unmekha / rāhāṭatī jetha sāśaṃka /
tetha mīhī raṃka yeka / cāvaḻī karīṃ

parī gītā īśvaru bhoḻā / le vyāsoktikusumamāḻā /
tarī mājhiyā durvādaḻā / nā na mhaṇe kīṃ

āṇi kṣīrasiṃdhūciyā taṭā / pāṇiyā yetī gajaghaṭā /
tetha kāya murakuṭā / vārijata ase ?

pāṃkha phuṭe pāṃkhirūṃ / nuḍe tarī nabhīṃca sthirū /
gagana ākramī satvarū / to garuḍahī tetha

rājahaṃsāceṃ cālaṇeṃ / bhūtaḻīṃ jāliyā śāhāṇeṃ /
āṇikeṃ kāya koṇeṃ / cālāvecinā ?

jī āpuleni avakāśeṃ / agādha jaḻa ghepe kalaśeṃ /
cuḻīṃ cūḻapaṇa aiseṃ / bharūni na nighe ?

divaṭīcyā āṃgīṃ thorī / tarī te bahu teja dharī /
vātī āpuliyā parī / āṇīca kīṃ nā ?

jī samudrāceni paiseṃ / samudrīṃ ākāśa ābhāse /
thillarīṃ thillarāseṃ / biṃbeci paiṃ

tevīṃ vyāsādika mahāmatī / vāvaroṃ yetī iye graṃthīṃ /
mā āmhī ṭhākoṃ he yukti / na miḻe kīra ?

jiye sāgarīṃ jaḻacareṃ / saṃcaratī maṃdarākāreṃ /
tetha dekhoni śaphareṃ yereṃ / pohoṃ na lāhatī ?

aruṇa āṃgājavaḻike / mhaṇauni sūryāteṃ dekheṃ /
mā bhūtaḻīṃcī na dekhe / muṃgī kāī ?

yālāgīṃ āmhāṃ prākṛtāṃ / deśikāreṃ baṃdheṃ gītā /
mhaṇaṇeṃ heṃ anucitā / kāraṇa nohe

āṇi bāpu puḍhāṃ jāye / te gheta pāulācī soye /
bāḻa ye tarī na lāhe / pāvoṃ kāyī ?

taisā vyāsācā māgovā ghetu / bhāṣyakārāteṃ vāṭa pusatu /
ayogyahī mī na pavatu / keṃ jāīna ?

āṇi pṛthvī jayāciyā kṣamā / nubage sthāvara jaṃgamā /
jayāceni amṛteṃ caṃdramā / nivavī jaga

jayāceṃ āṃgika asikeṃ / teja lāhoni arkeṃ /
āṃdhārāceṃ sāvāikeṃ / loṭijata āhe

samudrā jayāceṃ toya / toyā jayāceṃ mādhurya /
mādhuryā sauṃdarya / jayāceni

pavanā jayāceṃ baḻa / ākāśa jeṇeṃ paghaḻa /
jñāna jeṇeṃ ujvaḻa / cakravartī

veda jeṇeṃ subhāṣa / sukha jeṇeṃ sollāsa /
heṃ aso rūpasa / viśva jeṇeṃ

to sarvopakārī samarthu / sadguru śrīnivṛttināthu /
rāhāṭata ase majahī āṃtu / righoniyāṃ

ātāṃ āyatī gītā jagīṃ / mī sāṃgeṃ maऱhāṭhiyā bhaṃgīṃ /
yetha keṃ vismayālāgīṃ / ṭhāvo āhe

śrīguruceni nāṃveṃ mātī / ḍoṃgarīṃ jayāpāsīṃ hotī /
teṇeṃ koḻiyeṃ trijagatīṃ / yekavada kelī

caṃdaneṃ vedhalīṃ jhāḍeṃ / jālīṃ caṃdanāceni pāḍeṃ /
vasiṣṭheṃ māṃnilī kīṃ bhāṃḍe / bhānūsīṃ śāṭī

mā mī tava cittāthilā / āṇi śrīguru aisā dādulā /
jo diṭhīveni āpulā / baisavī padīṃ

ādhīṃci dekhaṇī diṭhī / varī sūrya puravī pāṭhī /
taiṃ na dise aisī goṭhī / keṃhī āhe ?

mhaṇauni mājheṃ nitya nave / śvāsośvāsahī prabaṃdha hoāve /
śrīgurukṛpā kāya nohe / jñānadevo mhaṇe

yākāraṇeṃ miyāṃ / śrīgītārthu maऱhāṭhiyā /
kelā lokāṃ yayā / diṭhīcā viṣo

parī maऱhāṭhe bolaraṃgeṃ / kavaḻitāṃ paiṃ gītāṃgeṃ /
taiṃ gātayāceni pāṃgeṃ / yekāḍhatāṃ nohe

mhaṇauni gītā gāvoṃ mhaṇe / teṃ gāṇiveṃ hotī leṇeṃ /
nā mokaḻe tarī uṇeṃ / gītāhī āṇita

suṃdara āṃgīṃ leṇeṃ na sūye / taiṃ to mokaḻā śṛṃgāru hoye /
nā leileṃ tarī āhe / taiseṃ keṃ ucita ?

kāṃ motiyāṃcī jaisī jātī / sonayāhī māna detī /
nātarī mānavitī / aṃgeṃci saḍīṃ

nānā guṃphilīṃ kāṃ mokaḻīṃ / uṇīṃ na hotī parīmaḻīṃ /
vasaṃtāgamīṃcīṃ vāṭoḻīṃ / mogarīṃ jaisīṃ

taisā gāṇiveteṃ miravī / gītevīṇahī raṃgu dāvīṃ /
to lābhācā prabaṃdhu oṃvī / kelā miyāṃ

teṇeṃ ābālasubodheṃ / ovīyeceni prabaṃdheṃ /
brahmarasasusvādeṃ / akṣareṃ guṃthilīṃ

ātāṃ caṃdanācyā taruvarīṃ / parīmaḻālāgīṃ phulavarīṃ /
pārukhaṇeṃ jiyāparī / lāgenā kīṃ

taisā prabaṃdhu hā śravaṇīṃ / lāgatakheṃvo samādhi āṇī /
aikiliyāhī vākhāṇī / kāya vyasana na lavī ?

pāṭha karitāṃ vyājeṃ / pāṃḍityeṃ yetī veṣaje /
taiṃ amṛtāteṃ neṇije / phāvaliyā

taiseṃni āitepaṇeṃ / kavitva jāleṃ heṃ upeṇeṃ /
manana nididhyāsa śravaṇeṃ / jiṃtileṃ ātāṃ

he svānaṃdabhogācī sela / bhalatayasīci deīla /
sarveṃdriyāṃ poṣavīla / śravaṇākaravīṃ

caṃdrāteṃ āṃgavaṇeṃ / bhogūni cakora śāhāṇe /
parī phāve jaiseṃ cāṃdiṇeṃ / bhalatayāhī

taiseṃ adhyātmaśāstrīṃ yiye / aṃtaraṃgaci adhikāriye /
parī loku vākcāturyeṃ / hoīla sukhiyā

aiseṃ śrīnivṛttināthāceṃ / gaurava āhe jī sāceṃ /
graṃthu nohe heṃ kṛpeceṃ / vaibhava tiye

kṣīrasiṃdhu parisarīṃ / śaktīcyā karṇakuharīṃ /
neṇoṃ kaiṃ śrītripurārīṃ / sāṃgitaleṃ jeṃ

teṃ kṣīrakalloḻāāṃtu / makarodarīṃ guptu /
hotā tayācā hātu / paiṭheṃ jāleṃ

to matsyeṃdra saptaśṛṃgīṃ / bhagnāvayavā cauraṃgī /
bheṭalā kīṃ to sarvāṃgīṃ / saṃpūrṇa jālā

maga samādhi avyutthayā / bhogāvī vāsanā yayā /
te mudrā śrīgorakṣarāyā / didhalī mīnīṃ

teṇeṃ yogābjinīsarovaru / viṣayavidhvaṃsaikavīru /
tiye padīṃ kāṃ sarveśvaru / abhiṣekilā

maga tihīṃ teṃ śāṃbhava / advayānaṃdavaibhava /
saṃpādileṃ saprabhava / śrīgahinīnāthā

teṇeṃ kaḻikaḻitu bhūtāṃ / ālā dekhoni nirutā /
te ājñā śrīnivṛttināthā / didhalī aisī

nā ādiguru śaṃkarā\- / lāgoni śiṣyaparaṃparā /
bodhācā hā saṃsarā / jālā jo āmuteṃ

to hā tūṃ gheūni āghavā / kaḻīṃ giḻitayāṃ jīvāṃ /
sarva prakārīṃ dhāṃvā / karīṃ pāṃ vegīṃ

ādhīṃca taṃva to kṛpāḻu / varī guruājñecā bolū /
jālā jaisā varṣākāḻū / khavaḻaṇeṃ meghāṃ

maga ārtāceni voraseṃ / gītārthagraṃthanamiseṃ /
varṣalā śāṃtaraseṃ / to hā graṃthu

tetha puḍhāṃ mī bāpiyā / māṃḍalā ārtī āpuliyā /
kīṃ yāsāṭhīṃ yevaḍhiyā / āṇiloṃ yaśā

evaṃ gurukrameṃ lādhaleṃ / samādhidhana jeṃ āpuleṃ /
teṃ graṃtheṃ bodhauni didhaleṃ / gosāvī maja

vāṃcūni paḍhe nā vācī / nā sevāhī jāṇeṃ svāmīcī /
aiśiyā maja graṃthācī / yogyatā keṃ ase ?

parī sācaci gurunātheṃ / nimitta karūni māteṃ /
prabaṃdhavyājeṃ jagāteṃ / rakṣileṃ jāṇā

taऱhī purohitaguṇeṃ / mī boliloṃ pureṃ uṇeṃ /
teṃ tumhīṃ māulīpaṇeṃ / upasāhijo jī

śabda kaisā ghaḍije / prameyīṃ kaiseṃ pāṃ caḍhijeṃ /
aḻaṃkāru mhaṇije / kāya teṃ neṇeṃ

sāyikhaḍeyāceṃ bāhuleṃ / cālavityā sūtrāceni cāle /
taisā māteṃ dāvīta bole / svāmī to mājhā

yālāgīṃ mī guṇadoṣa\- / viṣīṃ kṣamāvinā viśeṣa /
je mī saṃjāta graṃthaloṃ dekha / ācāryeṃ kīṃ

āṇi tumhāṃ saṃtāṃciye sabhe / jeṃ uṇīveṃsī ṭhāke ubheṃ /
teṃ pūrṇa nohe tarī taiṃ lobheṃ / tumhāṃsīci kopeṃ

sivataliyāhī parīseṃ / lohatvāciye avadase /
na mukije āyaseṃ / taiṃ kavaṇā bolu /

vohaḻeṃ heṃci karāveṃ / je gaṃgeceṃ āṃga ṭhākāveṃ /
magahī gaṃgā jarī nohāveṃ / taiṃ to kāya karī ?

mhaṇauni bhāgyayogeṃ bahuveṃ / tumhāṃ saṃtāṃceṃ mī pāye /
pātaloṃ ātāṃ keṃ lāhe / uṇeṃ jagīṃ /

aho jī mājheni svāmī / maja saṃta joḍuni tumhīṃ /
didhaleti teṇeṃ sarvakāmīṃ / parīpūrṇa jāloṃ

pāhā pāṃ māteṃ tumhāṃ sāṃgaḍeṃ / māhera teṇeṃ suravāḍeṃ /
graṃthāceṃ āḻiyāḍeṃ / siddhī geleṃ

jī kanakāceṃ nikhaḻa / votūṃ yeīla bhūmaṃḍaḻa /
ciṃtārat‌nīṃ kuḻācaḻa / nirmūṃ yetī

sātāṃhī ho sāgarāṃteṃ / sopeṃ bharitāṃ amṛteṃ /
duvāḍa nohe tārāṃteṃ / caṃdra karitāṃ

kalpatarūce ārāma / lāvitāṃ nāhīṃ viṣama /
parī gītārthāceṃ varma / nivaḍūṃ na ye

to mī yeku sarva mukā / boloni maऱhāṭhiyā bhākhā /
karī ḍoḻevarī lokāṃ / ghevoṃ ye aiseṃ jeṃ

hā graṃthasāgaru yevhaḍhā / utaroni pailīkaḍā /
kīrtivijayācā dheṃḍā / nāce jo kāṃ

gītārthācā āvāru / kalaśeṃsīṃ mahāmeru /
racūni mājīṃ śrīguru\- / liṃga jeṃ pūjīṃ

gītā niṣkapaṭa māya / cukoni tānheṃ hiṃḍe jeṃ vāya /
teṃ māyapūtā bheṭī hoya / hā dharma tumacā

tumhāṃ sajjanāṃceṃ keleṃ / ākaḻunī jī mī boleṃ /
jñānadeva mhaṇe theṃkuleṃ / taiseṃ noheṃ

kāya bahu boloṃ sakaḻāṃ / meḻaviloṃ janmaphaḻā /
graṃthasiddhīcā sohaḻā / dāvilā jo hā

miyāṃ jaisajaisiyā āśā / kelā tumacā bharaṃvasā /
te puravūni jī bahuvasā / āṇiloṃ sukhā

majalāgīṃ graṃthācī svāmī / dujīṃ sṛṣṭī je he kelī tumhī /
teṃ pāhoni hāṃsoṃ āmhīṃ / viśvāmitrāteṃhī

je asoni triśaṃkudoṣeṃ / dhātayāhī āṇāveṃ voseṃ /
teṃ nāsateṃ kīje kīṃ aiseṃ / nirmāveṃ nāhīṃ

śaṃbhū upamanyuceni moheṃ / kṣīrasāgarūhī kelā āhe /
yetha tohī upame sarī nohe / je viṣagarbha kīṃ

aṃdhakāru niśācarāṃ / giḻitāṃ sūryeṃ carācarāṃ /
dhāṃvā kelā tarī kharā / tāunī kīṃ to

tātaliyāhī jagākāraṇeṃ / caṃdreṃ veṃcileṃ cāṃdaṇeṃ /
tayā sadoṣā kevīṃ mhaṇe / sārikheṃ heṃ

mhaṇauni tumhīṃ maja saṃtīṃ / graṃtharūpa jo hā trijagatīṃ /
upayoga kelā to puḍhatī / nirupama jī

kiṃbahunā tumaceṃ keleṃ / dharmakīrtana heṃ siddhī neleṃ /
yetha mājheṃ jī uraleṃ / pāīkapaṇa

ātāṃ viśvātmakeṃ deveṃ / yeṇeṃ vāgyajñeṃ toṣāveṃ /
toṣoni maja dyāveṃ / pasāyadāna heṃ

je khaḻāṃcī vyaṃkaṭī sāṃḍo / tayāṃ satkarmīṃ ratī vāḍho /
bhūtāṃ paraspareṃ paḍo / maitra jīvāceṃ

duritāceṃ timira jāvo / viśva svadharmasūryeṃ pāho /
jo jeṃ vāṃchīla to teṃ lāho / prāṇijāta

varṣata sakaḻamaṃgaḻīṃ / īśvaraniṣṭhāṃcī māṃdiyāḻī /
anavarata bhūmaṃḍaḻīṃ / bheṭatu bhūtāṃ

calāṃ kalpatarūṃce arava / cetanā ciṃtāmaṇīceṃ gāṃva /
bolate je arṇava / pīyūṣāce

caṃdrame je alāṃchana / mārtaṃḍa je tāpahīna /
te sarvāṃhī sadā sajjana / soyare hotu

kiṃbahunā sarvasukhīṃ / pūrṇa hoūni tihīṃ lokīṃ /
bhajijo ādipurukhīṃ / akhaṃḍita

āṇi graṃthopajīviye / viśeṣīṃ lokīṃyeṃ /
dṛṣṭādṛṣṭa vijayeṃ / hoāveṃ jī

tetha mhaṇe śrīviśveśarāvo / hā hoīla dānapasāvo /
yeṇeṃ vareṃ jñānadevo / sukhiyā jhālā

aiseṃ yugīṃ parī kaḻīṃ / āṇi mahārāṣṭramaṃḍaḻīṃ /
śrīgodāvarīcyā kūlīṃ / dakṣiṇaliṃgīṃ

tribhuvanaikapavitra / anādi paṃcakrośa kṣetra /
jetha jagāceṃ jīvanasūtra / śrīmahālayā ase

tetha yaduvaṃśavilāsu / jo sakaḻakaḻānivāsu /
nyāyāteṃ poṣī kṣitīśu / śrīrāmacaṃdru

tetha maheśānvayasaṃbhūteṃ / śrīnivṛttināthasuteṃ /
keleṃ jñānadeveṃ gīte / deśīkāra leṇeṃ

evaṃ bhāratācyā gāṃvīṃ / bhīṣmanāma prasiddha parvīṃ /
śrīkṛṣṇārjunīṃ baravī / goṭhī je kelī

jeṃ upaniṣadāṃceṃ sāra / sarva śāstrāṃceṃ māhera /
paramahaṃsīṃ sarovara / sevije jeṃ

tiyeṃ gītecā kalaśu / saṃpūrṇa hā aṣṭādaśu /
mhaṇe nivṛttidāsu / jñānadevo

puḍhatī puḍhatī puḍhatī / iyā graṃthapuṇyasaṃpattī /
sarvasukhīṃ sarvabhūtīṃ / saṃpūrṇa hoīje

śake bārāśateṃ bārottareṃ / taiṃ ṭīkā kelī jñāneśvareṃ /
saccidānaṃdabābā ādareṃ / lekhaku jāhalā