Jnaneshwari · Chapter 16

// ॐ śrī paramātmane namaḥ //
// atha śrīmadbhagavadgītā //
/ atha ṣoḍaśośo'dhyāyaḥ - adhyāya soḻāvā / /
/ daivāsurasaṃpattivibhāgayogaḥ /
māvaḻavīta viśvābhāsu / navala udayalā caṃḍāṃśu /
advayābjinīvikāśu / vaṃdūṃ ātāṃ

jo avidyārātī rusoniyāṃ / giḻī jñānājñānacāṃdaṇiyā /
jo sudinu karī jñāniyāṃ / svabodhācā

jeṇeṃ vivaḻatiye savaḻe / lāhoni ātmajñānāce ḍoḻe /
sāṃḍitī dehāhaṃtecīṃ avisāḻeṃ / jīvapakṣī

liṃgadehakamaḻācā / poṭīṃ veṃcu tayā cidbhramarācā /
baṃdimokṣu jayācā / udailā hoya

śabdāciyā āsakaḍīṃ / bheda nadīcyā dohīṃ thaḍīṃ /
āraḍāte virahaveḍīṃ / buddhibodhu

tayā cakravākāṃceṃ mithuna / sāmarasyāceṃ samādhāna /
bhogavī jo cidgagana / bhuvanadivā

jeṇeṃ pāhāliye pāhāṃṭe / bhedācī coraveḻa phiṭe /
righatī ātmānubhavavāṭe / pāṃthika yogī

jayāceni vivekakiraṇasaṃgeṃ / unmekhasūryakāṃtu phuṇage /
dīpale jāḻitī dāṃgeṃ / saṃsārācīṃ

jayācā raśmipuṃju nibaru / hotā svarūpa ukharīṃ sthiru /
ye mahāsiddhīcā pūru / mṛgajaḻa teṃ

jo pratyagbodhāciyā māthayā / so'haṃtecā madhyānhīṃ āliyā /
lape ātmabhrāṃtichāyā / āpaṇapāṃ taḻīṃ

te veḻīṃ viśvasvapnāsahiteṃ / koṇa anyathāmatī nidreteṃ /
sāṃbhāḻī nureci jetheṃ / māyārātī

mhaṇauni advayabodhapāṭaṇīṃ / tetha mahānaṃdācī dāṭaṇī /
maga sukhānubhūtīcīṃ gheṇīṃ deṇīṃ / maṃdāvo lāgatī

kiṃbahunā aisaiseṃ / muktakaivalya sudivaseṃ /
sadā lāhije kāṃ prakāśeṃ / jayāceni

jo nijadhāmavyomīṃcā rāvo / udailāci udaijatakheṃvo /
pheḍī pūrvādi diśāṃsi ṭhāvo / udoastūcā

na disaṇeṃ disaṇeṃnasīṃ māvaḻavī / dohīṃ jhāṃkileṃ te saiṃgha pālavī /
kāya bahu boloṃ te āghavī / ukhāci ānī

to ahorātrāṃcā pailakaḍu / koṇeṃ dekhāvā jñānamārtaṃḍu /
jo prakāśyeṃvīṇa suravāḍu / prakāśācā

tayā citsūryā śrīnivṛttī / ātāṃ namoṃ mhaṇoṃ puḍhatapuḍhatī /
je bādhakā yeijatase stutī / bolāciyā

devāceṃ mahimāna pāhoniyāṃ / stuti tarī yeije cāṃgāvayā /
jarī stavyabuddhīsīṃ layā / jāīje kāṃ

jo sarvaneṇivāṃ jāṇije / maunāciyā miṭhīyā vānije /
kāṃhīṃca na honi āṇije / āpaṇapayāṃ jo

tayā tujhiyā uddeśāsāṭhīṃ / paśyaṃtī madhyamā poṭīṃ /
sūni paresīṃhī pāṭhīṃ / vaikharī vire

tayā tūteṃ mī sevakapaṇeṃ / levavīṃ bolakeyā stotrāceṃ leṇeṃ /
heṃ upasāhāveṃhī mhaṇatāṃ uṇeṃ / advayānaṃdā

parī raṃkeṃ amṛtācā sāgaru / dekhiliyā paḍe ucitācā visaru /
maga karūṃ dhāṃve pāhuṇeru / śākāṃcā tayā

tetha śākuhī kīra bahuta mhaṇāvā / tayācā harṣaveguci to ghyāvā /
ujaḻoni divyatejā hātivā / te bhaktīci pāhāvī

bāḻā ucita jāṇaṇeṃ hoye / tarī bāḻapaṇaci keṃ āhe ? /
parī sācaci yerī māye / mhaṇauni toṣe

hāṃ gā gāṃvaraseṃ bharaleṃ / pāṇī pāṭhīṃ pāya deta āleṃ /
teṃ gaṃgā kāya mhaṇitaleṃ / parateṃ sara ?

jī bhṛgūcā kaisā apakāru / kīṃ to mānūni priyopacāru /
toṣecinā śāraṅgadharu / gurutvāsīṃ ?

kīṃ āṃdhāreṃ khateleṃ aṃbara / jhāleyā divasanāthāsamora /
teṇeṃ tayāteṃ paऱhā sara / mhaṇitaleṃ kāī ?

tevīṃ bhedabuddhīciye tuḻe / ghālūni sūryaśleṣāceṃ kāṃṭāḻe /
tukilāsi teṃ yekī veḻe / upasāhijo jī

jihīṃ dhyānācā ḍoḻāṃ pāhilāsī / vedādi vācāṃ vānilāsī /
jeṃ upasāhileṃ tayāsī / teṃ āmhāṃhī karīṃ

parī mī āji tujhyā guṇīṃ / lāṃcāvaloṃ aparādhu na gaṇīṃ /
bhalateṃ karīṃ parī ardhadhaṇīṃ / nuṭhī kadā

miyāṃ gītā yeṇeṃ nāṃveṃ / tujheṃ pasāyāmṛta suhāveṃ /
vānūṃ lādhaloṃ teṃ duṇena thāveṃ / daivaloṃ daiveṃ

mājhiyā satyavādāceṃ tapa / vācā keleṃ bahuta kalpa /
tayā phaḻāceṃ heṃ mahādvīpa / pātalī prabhu

puṇyeṃ pośilīṃ asādharaṇeṃ / tiyeṃ tujheṃ guṇa vānaṇeṃ /
deūni maja uttīrṇeṃ / jālīṃ ājī

jī jīvitvācyā āḍavīṃ / ātuḍaloṃ hotoṃ maraṇagāṃvīṃ /
te avadasācī āghavī / pheḍilī ājī

je gītā yeṇeṃ nāṃveṃ nāvāṇigī / je avidyā jiṇoni dāṭugī /
te kīrtī tujhī āmhāṃjogī / vānāvayā jālī

paiṃ nirdhanā gharīṃ vānivaseṃ / mahālakṣmī yeūni baise /
tayāteṃ nirdhana aiseṃ / mhaṇoṃ ye kāī ?

kāṃ aṃdhakārāciyā ṭhāyā / daiveṃ suryu āliyā /
to aṃdhāruci jagā yayā / prakāśu nohe ?

jayā devācī pāhatāṃ thorī / viśva paramāṇuhī daśā na dharī /
to bhāvāciye sarobharī / navheci kāī ?

taisā mī gītā vākhāṇī / he khapuṣpācī turaṃbaṇī /
parī samartheṃ tuvāṃ śirayāṇī / pheḍilī te

mhaṇauni tujheni prasādeṃ / mī gītāpadyeṃ agādheṃ /
nirūpīna jī viśadeṃ / jñānadevo mhaṇe

tarī adhyāyīṃ paṃdharāvā / śrīkṛṣṇeṃ tayā pāṃḍavā /
śāstrasiddhāṃtu āghavā / ugāṇilā

je vṛkṣarūpaka parībhāṣā / keleṃ upādhi rūpa aśeṣā /
sadvaidyeṃ jaiseṃ doṣā / aṃgalīnā

āṇi kūṭasthu jo akṣaru / dāvilā puruṣaprakāru /
teṇeṃ upahitāhī ākāru / caitanyā kelā

pāṭhīṃ uttama puruṣa / śabdāceṃ karūni miṣa /
dāvileṃ cokha / ātmatattva

ātmaviṣayīṃ āṃtuvaṭa / sādhana jeṃ āṃgadaṭa /
jñāna heṃhī spaṣṭa / cāvaḻalā

mhaṇauni iye adhyāyīṃ / nirūpya nureci kāṃhīṃ /
ātāṃ guruśiṣyāṃ dohīṃ / sneho lāhaṇā

evaṃ iyeviṣayīṃ kīra / jāṇate bujhāvale apāra /
parī mumukṣu itara / sākāṃkṣa jāle

tyā maja puruṣottamā / jñāneṃ bheṭe jo suvarmā /
to sarvajñu toci sīmā / bhaktīcīhī

aiseṃ heṃ trailokyanāyakeṃ / bolileṃ adhyāyāṃta ślokeṃ /
tetheṃ jñānaci bahutekeṃ / vānileṃ toṣeṃ

bharūni prapaṃcācā ghoṃṭu / kīje dekhatāṃci dekhatayā draṣṭu /
ānaṃdasāmrājyīṃ pāṭu / bāṃdhije jīvā

yevaḍheyā lāṭhepaṇācā upāvo / ānu nāhīṃci mhaṇe devo /
hā samyak‌jñānācā rāvo / upāyāṃmājīṃ

aise ātmajijñāsu je hote / tihīṃ toṣaleni citteṃ /
ādareṃ tayā jñānāteṃ / voṃvāḻileṃ jīveṃ

ātāṃ āvaḍī jetha paḍe / tayāci avasarīṃ puḍheṃ puḍheṃ /
rigoṃ lāgeṃ heṃ ghaḍe / prema aiseṃ

mhaṇauni jijñāsūṃcyā paikīṃ / jñānī pratītī hoya nā jaṃva nikī /
taṃva yoga kṣemu jñānavikhīṃ / sphurelaci kīṃ

mhaṇauni teṃci samyak jñāna / kaiseni hoya svādhīna /
jāliyā vṛddhiyat‌na / ghaḍela kevīṃ

kāṃ upajoṃci jeṃ na lāhe / jeṃ upajaleṃhī avhāṃṭā sūye /
teṃ jñānīṃ viruddha kāya āhe / heṃ jāṇāveṃ kīṃ

maga jāṇatayāṃ jeṃ virū / tayācīṃ vāṭa vāhatī karūṃ /
jñānā hita teṃci vicārūṃ / sarvabhāveṃ

aisā jñānajijñāsu tumhīṃ samastīṃ / bhāvo jo dharilā ase cittīṃ /
to puravāvayā lakṣmīpatī / bolijela

jñānāsi sujanma joḍe / āpalī viśrāṃtihī varī vāḍhe /
te saṃpattīce pavāḍe / sāṃgijela daivī

āṇi jñānāceni kāmākāreṃ / je rāgadveṣāṃsi de thāre /
tiye āsuriyehi ghore / karīla rūpa

sahaja iṣṭāniṣṭakaraṇī / doghīci iyā kavatukiṇī /
he navamādhyāyīṃ ubhāraṇī / kelī hotī

tetha sāumā gheyāvayā uvāvo / taṃva voḍavalā āna prastāvo /
tarī tayāṃ prasaṃgeṃ ātāṃ devo / nirūpīta ase

tayā nirūpaṇāceni nāṃveṃ / adhyāya pada soḻāveṃ /
lāvaṇī pāhatāṃ jāṇāveṃ / māgilāvarī

parī heṃ aso ātāṃ prastutīṃ / jñānācyā hitāhitīṃ /
samarthā saṃpattī / iyāci donhī

je mumukṣumārgīṃcī boḻāvī / je moharātrīcī dharmadivī /
te ādhīṃ taṃva daivī / saṃpattī aikā

jetha eka ekāteṃ pokhī / aise bahuta padārtha yekīṃ /
saṃpādijatī te lokīṃ / saṃpatti mhaṇije

te daivī sukhasaṃbhavī / tetha daivaguṇeṃ yekopajīvīṃ /
jālī mhaṇauni daivī / saṃpatti he

ātāṃ tayāci daivaguṇāṃ- / mājīṃ dhurecā baisaṇā /
baise tayā ākarṇā / abhaya aiseṃ

tarī na ghālūni mahāpurīṃ / na ghepe buḍaṇayācī śiyārī /
kāṃ rogu na gaṇije gharīṃ / pathyāciyā

taisā karmākarmāciyā moharā / uṭhūṃ nedūni ahaṃkārā /
saṃsārācā darārā / sāṃḍaṇeṃ yeṇeṃ

athavā aikyabhāvāceni paiseṃ / duje mānūni ātmā aiseṃ /
bhayavārtā deśeṃ / davaḍaṇeṃ jeṃ

pāṇī buḍa ye miṭhāteṃ / taṃva mīṭhaci pāṇī āteṃ /
tevīṃ āpaṇa jāleni advaiteṃ / nāśe bhaya

agā abhaya yeṇeṃ nāṃveṃ / bolije teṃ heṃ jāṇāveṃ /
samyak‌jñānāceṃ āghaveṃ / dhāṃvaṇeṃ heṃ

ātāṃ sattvaśuddhī je mhaṇije / te aiśā cinhīṃ jāṇije /
tarī jaḻe nā vijhe / rākhoṃḍī jaisī

kāṃ pāḍivā vāḍhī na mage / aṃvase tuṭī sāṃḍūni māge /
mājīṃ atisūkṣma aṃgeṃ / caṃdru jaisā rāhe

nātarī vārṣiyā nāhīṃ māṃḍilī / grīṣmeṃ nāhīṃ sāṃḍilī /
mājīṃ nijarūpeṃ nivaḍalī / gaṃgā jaisī

taisī saṃkalpavikalpācī voḍhī / sāṃḍūni rajatamācī kāvaḍī /
bhogitāṃ nijadharmācī āvaḍī / buddhi ure

iṃdriyavargīṃ dākhaviliyā / viruddhā athavā bhalīyā /
vismayo kāṃhīṃ keliyā / nuṭhī cittīṃ

gāṃvā geliyā vallabhu / pativratecā virahakṣobhu /
bhalatesaṇī hānilābhu / na manīṃ jevīṃ

tevīṃ satsvarūpa rucalepaṇeṃ / buddhī jeṃ aiseṃ ananya hoṇeṃ /
te sattvaśuddhī mhaṇe / keśihaṃtā

ātāṃ ātmalābhāvikhīṃ / jñānayogāmājīṃ ekīṃ /
je āpuliyā ṭhākī / hāṃveṃ bhare

tetha sagaḻiye cittavṛttī / tyāgu karaṇeṃ yā rītī /
niṣkāmeṃ pūrṇāhutī / hutāśīṃ jaisī

kāṃ sukuḻīneṃ āpulī / ātmajā satkuḻīṃci didhalī /
heṃ aso lakṣmī sthirāvalī / mukuṃdīṃ jaisī

taise nirvikalpapaṇeṃ / jeṃ yogajñānīṃca yā vṛttika hoṇeṃ /
to tijā guṇa mhaṇe / śrīkṛṣṇanāthu

ātāṃ dehavācācitteṃ / yathāsaṃpanneṃ vitteṃ /
vairī jāliyāhī ārtāteṃ / na vaṃcaṇe jeṃ kāṃ

patra puṣpa chāyā / phaḻeṃ mūḻa dhanaṃjayā /
vāṭecā na cuke āliyā / vṛkṣu jaisā

taiseṃ manauni dhanadhānyavarī / vidyamāneṃ ālyā avasarīṃ /
śrāṃtāciye manohārīṃ / upayogā jāṇeṃ

tayāṃ nāṃva jāṇa dāna / jeṃ mokṣanidhānāceṃ aṃjana /
heṃ aso āika cinha / damāceṃ teṃ

tarī viṣayeṃdriyāṃ miḻaṇī / karūni ghāpe vituṭaṇī /
jaiseṃ toḍije khaḍgapāṇī / pārakeyā

taisā viṣayajātāṃcā vārā / vājoṃ nedije iṃdriyadvārāṃ /
iye bāṃdhoni pratyāhārā / hātīṃ vopī

āṃtulā cittāceṃ aṃgavarīṃ / pravṛtti paḻe para bāherī /
āgī suyije dāhīṃhi dvārīṃ / vairāgyācī

śvāsośvāsāhunī bahuvaseṃ / vrateṃ ācare kharapuseṃ /
vosaṃtitā rātridivaseṃ / nārāṇuka jayā

paiṃ damu aisā mhaṇipe / to hā jāṇa svarūpeṃ /
yāgārthuhī saṃkṣepeṃ / sāṃgoṃ aika

tarī brāhmaṇa karūni dhure / striyādika paila mere /
mājhārīṃ adhikāreṃ / āpulāleni

jayā je sarvottama / bhajanīya devatādharma /
te teṇeṃ yathāgama / vidhī yajije

jaisā dvija ṣaṭkarmeṃ karī / śūdra tayāteṃ namaskārī /
kīṃ dohīṃsahī sarobharī / nipaje yāgu

taiseṃ adhikāraparyāloceṃ / heṃ yajña karaṇeṃ sarvāṃceṃ /
parī viṣaya viṣa phaḻāśeceṃ / na ghāpe mājīṃ

āṇi mī kartā aisā bhāvo / nedije dehāceni dvāreṃ jāvoṃ /
nā vedājñesi tarī ṭhāvo / hoije svayeṃ

arjunā evaṃ yajñu / sarvatra jāṇa sājñu /
kaivalyamārgīṃcā abhijñu / sāṃgātī hā

ātāṃ ceṃḍuveṃ bhūmī hāṇije / navhe to hātā āṇije /
kīṃ śetīṃ bīṃ vikhurije / parī pikīṃ lakṣa

nātarī ṭhevileṃ dekhāvayā / ādara kīje diviyā /
kāṃ śākhā phaḻeṃ yāvayā / siṃpije mūḻa

heṃ bahu aso ārisā / āpaṇapeṃ dekhāvayā jaisā /
puḍhatapuḍhatī bahuvasā / uṭije prītī

taisā vedapratipādyu jo īśvaru / to hoāvayālāgīṃ gocaru /
śrutīcā niraṃtaru / abhyāsu karaṇeṃ

teṃci dvijāṃsīca brahmasūtra / yerā stotra kāṃ nāmamaṃtra /
āvartavaṇeṃ pavitra / pāvāvayā tattva

pārthā gā svādhyāvo / bolije to hā mhaṇe devo /
ātāṃ tapa śabdābhiprāvo / āīka sāṃgoṃ

tarī dāneṃ sarvasva deṇeṃ / veṃcaṇeṃ teṃ vyartha karaṇeṃ /
jaise phaḻoni svayeṃ sukaṇeṃ / iṃdrāvaṇī jevīṃ

nānā dhūpācā agnipraveśu / kanakīṃ tukācā nāśu /
pitṛpakṣu poṣitā ऱhāsu / caṃdrācā jaisā

taisā svarūpāciyā prasarā -/ lāgīṃ prāṇeṃdriyaśarīrāṃ /
āṭaṇī karaṇeṃ jeṃ vīrā / teṃci tapa

athavā anāriseṃ / tapāceṃ rūpa jarī ase /
tarī jāṇa jevīṃ dudhīṃ haṃseṃ / sūdalī cāṃcū

taiseṃ dehajīvāciye miḻaṇīṃ / jo udayajata sūye pāṇī /
to viveka aṃtaḥkaraṇīṃ / jāgavīje

pāhatāṃ ātmayākaḍe / buddhīcā paisu sāṃkaḍeṃ /
sanidra svapna buḍe / jāgaṇīṃ jaiseṃ

taisā ātmaparyālocu / pravarte jo sācu /
tapācā hā nirvecu / dhanurdharā

ātāṃ bāḻācyā hitīṃ stanya / jaiseṃ nānābhūtīṃ caitanya /
taiseṃ prāṇimātrīṃ saujanya / ārjava teṃ

āṇi jagāciyā sukhoddeśeṃ / śarīravācāmānaseṃ /
rāhāṭaṇeṃ teṃ ahiṃse / rūpa jāṇa

ātāṃ tīkha hoūni mavāḻa / jaiseṃ jātīceṃ mukuḻa /
kāṃ teja parī śītaḻa / śaśāṃkāceṃ

śake dāvitāṃci roga pheḍūṃ / āṇi jibhe tarī navhe kaḍu /
te vokhadu nāhīṃ mā ghaḍū / upamā kaiṃcī

tarī maūpaṇeṃ bubuḻe / jhagaḍatāṃhī parī nāḍaḻe /
eऱhavīṃ phoḍī koṃrāḻeṃ / pāṇī jaiseṃ

taiseṃ toḍāvayā saṃdeha / tīkha jaiseṃ kāṃ loha /
śrāvyatveṃ tarī mādhurya / pāyīṃ ghālīṃ

aikoṃ ṭhātāṃ kautukeṃ / kānāteṃ nighatī mukheṃ /
jeṃ sācāriveceni bikeṃ / brahmahī bhedī

kiṃbahunā priyapaṇe / koṇāteṃhī jhaka neṇe /
yathārtha tarī khupaṇeṃ / nāhīṃ kavaṇā

eऱhavīṃ gorī kīra kānā goḍa / parī sācācā pākhāḻīṃ kīḍa /
āgīceṃ karaṇeṃ ughaḍa / parī jaḻoṃ teṃ sāca

kānīṃ lāgatāṃ mahūra / artheṃ vibhāṃḍī jivhāra /
teṃ vācā navhe suṃdara / lāṃvaci pāṃ

parī ahitīṃ koponi sopa / lālanīṃ maū jaiseṃ puṣpa /
tiye māteceṃ svarūpa / jaiseṃ kāṃ hoya

taiseṃ śravaṇasukha catura / parīṇamoni sācāra /
bolaṇeṃ jeṃ avikāra / teṃ satya yetheṃ

ātāṃ ghālitāṃhī pāṇī / pāṣāṇīṃ na nighe āṇī /
kāṃ mathiliyā loṇī / kāṃjī nedī

tvacā pāyeṃ śirīṃ / hāleyāhī phaḍe na karī /
vasaṃtīṃhī aṃbarīṃ / na hotī phuleṃ

nānā raṃbhecenihī rūpeṃ / śukīṃ nuṭhijeci kaṃdarpeṃ /
kāṃ bhasmīṃ vanhi na uddīpe / ghṛteṃhī jevīṃ

tevīṃci kumāru krodheṃ bhare / taisiyā maṃtrācīṃ bījākṣareṃ /
tiyeṃ nimitteṃhī apāreṃ / mīnaliyā

parī dhātayāhī pāyāṃ paḍatāṃ / nuṭhī gatāyu paṃḍusutā /
taisī nupaje upajavitāṃ / krodhormī gā

akrodhatva aiseṃ / nāṃva teṃ ye daśe /
jāṇa aiseṃ śrīnivāseṃ / mhaṇitaleṃ tayā

ātāṃ mṛttikātyāgeṃ ghaṭu / taṃtutyāgeṃ paṭu /
tyajije jevīṃ vaṭu / bījatyāgeṃ

kāṃ tyajuni bhiṃtimātra / tyajije āghaveṃci citra /
kāṃ nidrātyāgeṃ vicitra / svapnajāḻa

nānā jaḻatyāgeṃ taraṃga / varṣātyāgeṃ megha /
tyajijatī jaise bhoga / dhanatyāgeṃ

tevīṃ buddhimaṃtīṃ dehīṃ / ahaṃtā sāṃḍūni pāhīṃ /
sāṃḍije aśeṣahī / saṃsārajāta

tayā nāṃva tyāgu / mhaṇe to yajñāṃgu /
he mānūni subhagu / pārthu puse

ātāṃ śāṃtīceṃ liṃga / teṃ vyakta maja sāṃga /
devo mhaṇatī cāṃga / avadhāna deīṃ

tarī giḻoni jñeyāteṃ / jñātā jñānahī māghauteṃ /
hārapeṃ niruteṃ / te śāṃti paiṃ gā

jaisā praḻayāṃbūcā ubhaḍu / buḍavūni viśvācā pavāḍu /
hoya āpaṇapeṃ nibiḍu / āpaṇaci

maga ugama ogha siṃdhu / hā nureci vyavahārabhedu /
parī jalaikyācā bodhu / tohī kavaṇā ?

taisī jñeyā detāṃ miṭhī / jñātṛtvahī paḍe poṭīṃ /
maga ure teṃci kirīṭī / śāṃtīceṃ rūpa

ātāṃ kadarthavīta vyādhī / baḻīkaraṇāciyā ādhīṃ /
āpaparu na śodhī / sadvaidyu jaisā

kā cikhalīṃ rutalī gāye / dhaḍabhākaḍa na pāhe /
jo tiyeciyā glānī hoye / kālābhulā

nānā buḍatayāteṃ sakaruṇu / na puse aṃtyaju kāṃ brāhmaṇu /
kāḍhūni rākhe prāṇu / heṃci jāṇe

kīṃ māya vanīṃ pāpiyeṃ / ughaḍī kelī vipāyeṃ /
te nesavilyāvīṇa na pāhe / śiṣṭu jaisā

taise ajñānapramādādikīṃ / kāṃ prāktanahīna sadokhīṃ /
niṃdatvācyā sarvavikhīṃ / khiḻile je

tayāṃ āṃgīka āpuleṃ / deūniyāṃ bhaleṃ /
visaravijatī saleṃ / salatīṃ tiyeṃ

agā puḍhilācā dokhu / karūni āpuliye diṭhī cokhu /
maga ghāpe avaloku / tayāvarī

jaisā pujūni devo pāhije / perūni śetā jāije /
toṣauni prasādu gheije / atithīcā

taiseṃ āpuleni guṇeṃ / puḍhilāceṃ uṇeṃ /
pheḍuniyāṃ pāhaṇeṃ / tayākaḍe

vāṃcūni na viṃdhijeṃ varmīṃ / nātuḍavije akarmīṃ /
na bolavije nāmīṃ / sadoṣīṃ tihīṃ

varī koṇe ekeṃ upāyeṃ / paḍileṃ teṃ ubheṃ hoye /
teṃca kīje parī ghāye / nedāve varmīṃ

paiṃ uttamāciyāsāṭhīṃ / nīca mānije kirīṭī /
heṃ vāṃconi diṭhī / doṣu na ghepe

agā apaiśūnyāceṃ lakṣaṇa / arjunā heṃ phuḍeṃ jāṇa /
mokṣamārgīṃceṃ sukhāsana / mukhya heṃ gā

ātāṃ dayā te aisī / pūrṇacaṃdrikā jaisī /
nivavitāṃ na kaḍasī / sāneṃ thora

taiseṃ duḥkhitāceṃ śiṇaṇeṃ / hiratāṃ sakaṇavapaṇeṃ /
uttamādhama neṇeṃ / vivaṃcūṃ gā

paiṃ jagīṃ jīvanāsārikheṃ / vastu aṃgavarī upakheṃ /
parī jāteṃ jīvita rākhe / tṛṇāceṃhi

taiseṃ puḍhilāceni tāpeṃ / kaḻavaḻaliye kṛpeṃ /
sarvasveṃsīṃ didhaleṃhi āpaṇapeṃ / thoḍeṃci game

nimna bharaliyāviṇeṃ / pāṇī ḍhaḻoṃci neṇe /
tevīṃ śrāṃtā toṣauni jāṇeṃ / sāmoreṃ pāṃ

paiṃ pāyīṃ kāṃṭā nehaṭe / taṃva vyathā jīvīṃ umaṭe /
taisā poḻe saṃkaṭeṃ / puḍhilāṃceni

kāṃ pāvo śītaḻatā lāhe / kīṃ te ḍoḻyācilāgīṃ hoye /
taisā parasukheṃ jāye / sukhāvatu

kiṃbahunā tṛṣitālāgīṃ / pāṇī ārāyileṃ ase jagīṃ /
taiseṃ duḥkhitāṃce selabhāgīṃ / jiṇeṃ jayāceṃ

to puruṣu vīrarāyā / mūrtimaṃta jāṇa dayā /
mī udayajatāṃci tayā / ṛṇiyā lābheṃ

ātāṃ sūryāsi jīveṃ / anusaraliyā rājīveṃ /
parī teṃ to na śive / saurabhya jaiseṃ

kāṃ vasaṃtāciyā vāhāṇīṃ / āliyā vanaśrīcyā akṣauhiṇī /
te na karītuci gheṇī / nigālā to

heṃ aso mahāsiddhīsī / lakṣmīhī āliyā pāśīṃ /
parī mahāviṣṇu jaisī / na gaṇīca te

taise aihikīṃce kāṃ svargīṃce / bhoga pāīka jāliyā icchece /
parī bhogāve heṃ na ruce / manāmājīṃ

bahuveṃ kāya kautukīṃ / jīva nohe viṣayābhilākhī /
alolup‌tvadaśā ṭhāukī / jāṇa te he

ātāṃ māśiyāṃ jaiseṃ mohaḻa / jaḻacarāṃ jevīṃ jaḻa /
kāṃ pakṣiyāṃ aṃtarāḻa / mokaḻeṃ heṃ

nātarī bāḻakoddeśeṃ / māteceṃ sneha jaiseṃ /
kāṃ vasaṃtīcyā sparśeṃ / maū malayāniḻu

ḍoḻyāṃ priyācī bheṭī / kāṃ piliyāṃ kūrmīcī diṭhī /
taisīṃ bhūtamātrīṃ rāhaṭī / mavāḻa te

sparśeṃ atimṛdu / mukhīṃ ghetāṃ susvādu /
ghrāṇāsi sugaṃdhu / ujāḻu āṃgeṃ

to āvaḍe tevaḍhā ghetāṃ / viruddha jarī na hotāṃ /
tarī upame yetā / kāpūra kīṃ

parī mahābhūteṃ poṭīṃ vāhe / tevīṃci paramāṇūmājīṃ sāmāye /
yā viśvānusāra hoye / gagana jaiseṃ

kāya sāṃgoṃ aiseṃ jiṇeṃ / jeṃ jagāceni jīveṃ prāṇeṃ /
tayā nāṃva mhaṇeṃ / mārdava mī

ātāṃ parājayeṃ rājā / jaisā kadarthije lājā /
kāṃ māniyā nistejā / nikṛṣṭāstava

nānā cāṃḍāḻa maṃdirāśīṃ / avacaṭeṃ āliyā saṃnyāśī /
maga lāja hoya jaisī / uttamā tayā

kṣatriyā raṇīṃ paḻoni jāṇeṃ / teṃ koṇa sāhe lājiravāṇeṃ /
kāṃ vaidhavyeṃ pācāraṇeṃ / mahāsatiyeteṃ

rūpasā udayaleṃ kuṣṭa / saṃbhāvitāṃ kuṭīceṃ boṭa /
tayā lājā prāṇasaṃkaṭa / hoya jaiseṃ

taiseṃ auṭahātapaṇeṃ / jeṃ śava hoūni jiṇeṃ /
upajoṃ upajoṃ maraṇeṃ / nāvānāvā

tiyeṃ garbhamedamuseṃ / raktamūtraraseṃ /
voṃtīva hoūni ase / teṃ lājiravāṇeṃ

heṃ bahu aso dehapaṇeṃ / nāmarūpāsi yeṇeṃ /
nāhīṃ gā lājiravāṇeṃ / tayāhūnī

aisaisiyā avakaḻā / ghepe śarīrācā kaṃṭāḻā /
te lāja paiṃ nirmaḻā / nisugā goḍa

ātāṃ sūtrataṃtu tuṭaliyā / ceṣṭāci ṭhāke sāyakhaḍiyā /
taiseṃ prāṇajayeṃ karmeṃdriyāṃ / khuṃṭe gatī

kīṃ māvaḻaliyā dinakaru / sare kiraṇāṃcā prasaru /
taisā manojayeṃ prakāru / jñāneṃdriyāṃcā

evaṃ manapavananiyameṃ / hotī dāhī iṃdriyeṃ akṣameṃ /
teṃ acāpalya varmeṃ / yeṇeṃ hoya

ātāṃ īśvaraprāptīlāgīṃ / pravartatāṃ jñānamārgīṃ /
dhiṃvaseyāci āṃgī / uṇīva nohe

vokhaṭeṃ maraṇāseṃ / teṃhī āleṃ agnipraveśeṃ /
parī prāṇeśvaroddeśeṃ / na gaṇīci satī

taiseṃ ātmanāthāciyā ādhī / lāūni viṣayaviṣācī bādhī /
dhāṃvoṃ āvaḍe pāṇadhī / śūnyāciye

na ṭhāke niṣedhu āḍa / na paḍe vidhīcī bhīḍa /
nupajeci jīvīṃ koḍa / mahāsiddhīceṃ

aiseṃ īśvarākaḍe nija / dhāṃve āpasayā sahaja /
tayā nāṃva teja / ādhyātmika teṃ

ātāṃ sarvahī sāhātiyā garimā / garvā na ye teci kṣamā /
jaiseṃ deha vāhoni romā / vāhaṇeṃ neṇeṃ

āṇi mātaliyā iṃdriyāṃce vega / kāṃ prācīneṃ khavaḻale roga /
athavā yogaviyoga / priyāpriyāṃce

yayā āghaviyāṃcāci thoru / eke veḻe āliyā pūru /
tarī agastya kāṃ hoūni dhīru / ubhā ṭhāke

ākāśīṃ dhūmācī rekhā / uṭhilī bahuvā āgaḻikā /
te giḻī yekī jhuḻukā / vārā jevīṃ

taiseṃ adhibhūtādhidaivāṃ / adhyātmādi upadravāṃ /
pātaleyāṃ pāṃḍavā / giḻuni ghālī

aiseṃ cittakṣobhācyā avasarīṃ / ucalūni dhairyā jeṃ cāṃgāveṃ karī /
dhṛti mhaṇipe avadhārīṃ / tiyeteṃ gā

ātāṃ nirvāḻūni kanakeṃ / bharilā gāṃgeṃ pīyūkheṃ /
tayā kalaśāciyāsārikheṃ / śauca aseṃ

je āṃgīṃ niṣkāma ācāru / jīvīṃ viveku sācāru /
to sabāhya ghaḍalā ākāru / śucitvācāci

kāṃ pheḍita pāpa tāpa / pokhīta tīrīṃce pādapa /
samudrā jāya āpa / gaṃgeceṃ jaiseṃ

kāṃ jagāceṃ āṃdhya pheḍitu / śriyecīṃ rāuḻeṃ ughaḍitu /
nighe jaisā bhāsvatu / pradakṣiṇe

taisīṃ bāṃdhilīṃ soḍitā / buḍālīṃ kāḍhitā /
sāṃkaḍī pheḍitā / ārtāṃciyā

kiṃbahunā divasarātī / puḍhilāṃceṃ sukha unnati /
āṇita āṇita svārthīṃ / praveśije

vāṃcūni āpuliyā kājālāgīṃ / prāṇijātācyā ahitabhāgīṃ /
saṃkalpācīhī āḍavaṃgī / na karaṇeṃ jeṃ

paiṃ adrohatva aiśiyā goṣṭī / aikasī jiyā kirīṭī /
teṃ sāṃgitaleṃ heṃ diṭhī / pāhoṃ ye taiseṃ

āṇi gaṃgā śaṃbhūcā māthāṃ / pāvoni saṃkoce jevīṃ pārthā /
tevīṃ mānyapaṇeṃ sarvathā / lājaṇeṃ jeṃ

teṃ heṃ puḍhata puḍhatī / amānitva jāṇa sumatī /
māgāṃ sāṃgitaleṃse kitī / teṃci teṃ boloṃ

evaṃ ihīṃ savviseṃ / brahmasaṃpadā he vasata ase /
mokṣacakravartīceṃ jaiseṃ / agrahāra hoya

nānā he saṃpatti daivī / yā guṇatīrthāṃcī nīca navī /
nirviṇṇasagarāṃcī daivī / gaṃgāci ālī

kīṃ gaṇakusumāṃcī māḻā / he gheūni muktibāḻā /
vairāgyanirapekṣācā gaḻā / giṃvasīta ase

kīṃ savviseṃ guṇajyotī / ihīṃ ujaḻūni āratī /
gītā ātmayā nijapatī / nīrāṃjanā ālī

ugaḻiteṃ nirmaḻeṃ / guṇa iyeṃci muktāphaḻeṃ /
daivī śuktikaḻeṃ / gītārṇavīṃcī

kāya bahu vānūṃ aisī / abhivyaktī ye apaisī /
keleṃ daivī guṇarāśī / saṃpattirūpa

ātāṃ duḥkhācī āṃtuvaṭa velī / doṣakāṭyāṃcī jarī bharalī /
tarī nijābhidhānī ghālī / āsurī te

paiṃ tyājya tyajāvayālāgīṃ / jāṇāvī jarī anupayogī /
tarī aikā te cāṃgī / śrotraśaktī

tarī narakavyathā thorī / āṇāvayā doṣīṃghorīṃ /
meḻu kelā te āsurī / saṃpatti he

nānā viṣavargu ekavaṭu / tayā nāṃva jaisā bāsaṭu /
āsurī saṃpattī hā khoṭu / doṣāṃcā taisā

tarī tayāci asurāṃ / doṣāṃmājīṃ jayā vīrā /
vāḍapaṇācā ḍāṃgorā / to daṃbhu aisā

jaisī āpulī jananī / nagna dāviliyā janīṃ /
te tīrthaci parī patanīṃ / kāraṇa hoya

kāṃ vidyā gurūpadiṣṭā / bobhāiliyā cohaṭāṃ /
tarī iṣṭadā parī aniṣṭā / hetu hotī

paiṃ āṃgeṃ buḍatāṃ mahāpūrīṃ / je vegeṃ kāḍhī pailatīrīṃ /
te nāṃvaci bāṃdhiliyā śirīṃ / buḍavī jaisī

kāraṇa jeṃ jīvitā / teṃ vānileṃ jarī sevitāṃ /
tarī annaci paṃḍusutā / hoya viṣa

taisā dṛṣṭādṛṣṭācā sakhā / dharmu jālā to phokārije dekhā /
tarī tāritā toci dokhā- / lāgīṃ hoya

mhaṇauni vācecā caubārā / ghātaliyā dharmācā pasārā /
dharmuci to adharmu hoya vīrā / to daṃbhu jāṇe

ātāṃ mūrkhāciye jibhe / akṣarāṃcā āṃbukhā subhe /
āṇi to brahmasabhe / na rijhe jaisā

kāṃ mādurī lokāṃcā ghoḍā / gajapatihī mānī thoḍā /
kāṃ kāṃṭiyevarilyā saraḍā / svarguhī nīca

tṛṇāceni iṃdhaneṃ / āgī dhāṃve gaganeṃ /
thillarabaḻeṃ mīneṃ / na gaṇije siṃdhu

taisā māje striyā dhaneṃ / vidyā stutī bahuteṃ māneṃ /
eke divasīṃceni parānneṃ / alpaku jaisā

abhracchāyeciyā joḍī / nidaivu ghara moḍī /
mṛgāṃbu dekhoni phoḍī / paṇiyāḍeṃ mūrkha

kiṃbahunā aisaiseṃ / utaṇeṃ jeṃ saṃpattimiseṃ /
to darpu gā anāriseṃ / na boleṃ gheīṃ

āṇi jagā vedīṃ viśvāsu / āṇi viśvāsīṃ pūjya īśu /
jagīṃ eka tejasu / sūryuci hā

jagaspṛhe āspada / eka sārvabhaumapada /
na maraṇeṃ nirvivāda / jagā paḍhiyeṃ

mhaṇauni jaga utsāheṃ / yāteṃ vānūṃ jāye /
kīṃ teṃ āikoni matsaru vāhe / phugoṃ lāge

mhaṇe īśvarāteṃ khāyeṃ / tayā vedā viṣa sūyeṃ /
gauravāmājīṃ trāye / bhaṃgīta ase

pataṃgā nāvaḍe jyotī / khadyotā bhānūcī khaṃtī /
ṭiṭibheneṃ āpāṃpatī / vairī kelā

taisā abhimānāceni moheṃ / īśvarāceṃhī nāma na sāhe /
bāpāteṃ mhaṇe maja he / savatī jālī

aisā mānyatecā puṣṭagaṃḍu / to abhimānī paramalaṃḍu /
rauravācā rūḍhu / mārguci pai

āṇi puḍhilāṃceṃ sukha / dekhaṇiyāceṃ hoya mikha /
caḍhe krodhāgnīceṃ vikha / manovṛttī

śītaḻāciye bheṭī / tātalā telīṃ āgī uṭhī /
caṃdru dekhoni jaḻe poṭīṃ / kolhā jaisā

viśvāceṃ āyuṣya jeṇeṃ ujaḻe / to sūryu udailā dekhoni savaḻe /
pāpiyā phuṭatī ḍoḻe / ḍuḍuḻāce

jagācī sukhapahāṃṭa / corāṃ maraṇāhūni nikṛṣṭa /
dudhāceṃ kāḻakūṭa / hoya vyāḻīṃ

agādheṃ samudrajaḻeṃ / prāśitāṃ adhika jaḻe /
vaḍavāgnī na miḻe / śāṃti kahīṃ

taisā vidyāvinodavibhaveṃ / dekhe puḍhilāṃcīṃ daiveṃ /
taṃva taṃva roṣu duṇāve / krodhu to jāṇa

āṇi mana sarpācī kuṭī / ḍoḻe nārācāṃcī suṭī /
bolaṇeṃ te vṛṣṭī / iṃgaḻāṃcī

yera jeṃ kriyājāta / teṃ tikhayāceṃ karvata /
aiseṃ sabāhya khasāsita / jayāceṃ gā

to manuṣyāṃta adhamu jāṇa / pāruṣyāceṃ avataraṇa /
ātāṃ āika khūṇa / ajñānācī

tarī śītoṣṇasparśā / nivāḍu neṇeṃ pāṣāṇu jaisā /
kāṃ rātrī āṇi divasā / jātyaṃdhu to

āgī uṭhilā ārogaṇeṃ / jaisā khādyākhādya na mhaṇe /
kāṃ parisā pāḍu neṇeṃ / sonayā lohā

nātarī nānārasīṃ / righoni darvī jaisī /
parī rasasvādāsī / cākhoṃ neṇeṃ

kāṃ vārā jaisā pārakhī / navheci gā mārgāmārgavikhīṃ /
taise kṛtyākṛtyavivekīṃ / aṃdhapaṇa jeṃ

heṃ cokha heṃ maiḻa / aiseṃ neṇoniyāṃ bāḻa /
dekhe teṃ kevaḻa / mukhīṃci ghālī

taiseṃ pāpapuṇyāceṃ khicaṭeṃ / karoni khātāṃ buddhiceṣṭe /
kaḍu madhura na vāṭe / aisī je daśā

tiye nāma ajñāna / yā bolā nāhīṃ āna /
evaṃ sāhī doṣāṃceṃ cinha / sāṃgitaleṃ

ihīṃca sāhī doṣāṃgīṃ / he āsurī saṃpatti dāṭugī /
jaiseṃ thora viṣaya subhage aṃgīṃ / aṃga sāneṃ

kāṃ tighā vanhīṃcyā pāṃtī / pāhatāṃ thoḍe ṭhāya gamatī /
parī viśvahī prāṇāhutī / karūṃ na pure

dhātayāhī geliyā śaraṇa / tridoṣīṃ na cuke maraṇa /
tayā tihīṃcī duṇī jāṇa / sāhī doṣa he

ihīṃ sāhī doṣīṃ saṃpūrṇīṃ / jālī iyeci ubhāraṇī /
mhaṇauni āsurī uṇī / saṃpadā navhe

parī krūragrahāṃcī jaisī / māṃdī miḻe ekeci rāśī /
kāṃ yetī niṃdakāpāsīṃ / aśeṣa pāpeṃ

maraṇārāceṃ āṃga / paḍighātī avagheci roga /
kāṃ kumuhūrtīṃ duryoga / ekavaṭatī

viśvāsalā ātuḍavīje corā / śiṇalā suije mahāpurā /
taiseṃ doṣīṃ ihīṃ narā / aniṣṭa kīje

kāṃ āyuṣya jātiye veḻe / śeḻiye sātaveuḻī miḻe /
taise sāhī doṣa sagaḻe / joḍatī tayā

mokṣamārgākaḍe / jaiṃ yāṃcā āṃbukhā paḍe /
taiṃ na nighe mhaṇauni buḍe / saṃsārīṃ to

adhamāṃ yonīṃcyā pāuṭīṃ / utarata jo kirīṭī /
sthāvarāṃhī taḻavaṭīṃ / baisaṇeṃ ghe

heṃ aso tayācyā ṭhāyīṃ / miḻoni sāhī doṣīṃ ihīṃ /
āsurī saṃpatti pāhīṃ / vāḍhavije

aisiyā yā donī / saṃpadā prasiddhā janīṃ /
sāṃgitaliyā cinhīṃ / vegaḻālyā

iyā donhīṃmājīṃ pahilī / daivī je mhaṇitalī /
te mokṣasūryeṃ pāhalī / ukhāci jāṇa

yerī je dusarī / saṃpatti kāṃ āsurī /
te mohalohācī kharī / sāṃkhaḻī jīvāṃ

parī heṃ āikoni jhaṇeṃ / bhaya ghesī ho maneṃ /
kāya rātrīcā dineṃ / dhāku dharije

he āsurī saṃpatti tayā / baṃdhālāgīṃ dhanaṃjayā /
jo sāhī doṣāṃ yayāṃ / āśrayo hoya

tūṃ taṃva pāṃḍavā / sāṃgitaleyā daivā /
guṇanidhī baravā / janmalāsī

mhaṇauni pārthā tūṃ yā / daivī saṃpattī svāmiyā /
hoūni yāveṃ uvāyā / kaivalyāciyā

āṇi daivāṃ āsurāṃ / saṃpattivaṃtāṃ narāṃ /
anādisiddha ujagarā / rāhāṭīcā āhe

jaiseṃ rātrīcyā avasarīṃ / vyāpārije niśācarīṃ /
divasā suvyavahārīṃ / manuṣyādikīṃ

taisiyā āpulāliyā rāhāṭīṃ / vartatī donhī sṛṣṭī /
daivī āṇi kirīṭī / āsurī yetha

tevīṃci vistārūni daivī / jñānakathanādi prastāvīṃ /
māgīla graṃthīṃ baravī / sāṃgitalī

ātāṃ āsurī je sṛṣṭī / tethiṃcī upalaūṃ goṭhī /
avadhānācī diṭhī / de pāṃ nikī

tarī vādyeṃvīṇa nādu / nedī kavaṇāhī sādu /
kāṃ apuṣpīṃ makaraṃdu / na labhe jaisā

taisī prakṛti he āsura / ekalī nohe gocara /
jaṃva ekādheṃ śarīra / mālhātīnā

maga āviṣkāralā lāṃkuḍeṃ / pāvaku jaisā joḍe /
taisī prāṇidehīṃ sāṃpaḍe / āṭopalī he

te veḻīṃ je vāḍhī ūṃsā / teci āṃtulā rasā /
dehākāru hoya taisā / prāṇiyāṃcā

ātāṃ tayāci prāṇiyāṃ / rūpa karūṃ dhanaṃjayā /
ghaḍale je āsurīyā / doṣavṛṃdīṃ

tarī puṇyālāgīṃ pravṛttī / kāṃ pāpāviṣayīṃ nivṛttī /
yā jāṇaṇeyācī rātī / tayāṃceṃ mana

nigaṇeyā āṇi praveśā / citta nedītu āveśā /
kośakiṭu jaisā / jācinnalā paiṃ

kāṃ didhaleṃ māgutī yeīla / kīṃ na ye heṃ puḍhīla /
na pāhātāṃ de bhāṃḍavala / mūrkha corāṃ

taisiyā pravṛtti nivṛtti donī / neṇijatī āsurīṃ janīṃ /
āṇi śauca te svapnīṃ / dekhatī nā te

kāḻimā sāṃḍīla koḻasā / varī cokhī hoīla vāyasā /
rākṣasahī māṃsā / viṭoṃ śake

parī āsurāṃ prāṇiyāṃ / śauca nāhīṃ dhanaṃjayā /
pavitratva jevīṃ bhāṃḍiyā / madyāciyā

vāḍhavitī vidhīcī āsa / kāṃ pāhātī vaḍilāṃcī vāsa /
ācārācī bhāṣa / neṇatīci te

jaiseṃ caraṇeṃ śeḻiyeceṃ / kāṃ dhāvaṇeṃ vāriyāceṃ /
jāḻaṇeṃ āgīceṃ / bhalateuteṃ

taiseṃ puḍhāṃ sūni svaira / ācaratī te gā āsura /
satyeṃsi kīra vaira / sadāci tayāṃ

jarī nāṃgiyā āpuliyā / viṃcū karī gudaguliyā /
tarī sācā bolī boliyā / bolatī te

āpānāceni toṃḍeṃ / jarī sugaṃdhā yeṇeṃ ghaḍe /
tarī satya tayāṃ joḍe / āsurāṃteṃ

aiseṃ te na karitāṃ kāṃhīṃ / āṃgeṃci vokhaṭe pāhīṃ /
ātāṃ bolatī te navāī / sāṃgijaila

eऱhavīṃ kareyācyā ṭhāyīṃ cāṃga / teṃ tayāsi kaiceṃ nīṭa āṃga /
taisā āsurāṃcā prasaṃga / prasaṃgeṃ parīsa

udhavaṇīceṃ jevīṃ toṃḍa / ubhaḻī dhuṃvāce ubhaḍa /
heṃ jāṇije tevīṃ ughaḍa / sāṃgoṃ te bola

tarī viśva hā anādi ṭhāvo / yetha niyaṃtā īśvararāvo /
cāvaḍiye nyāvo anyāvo / nivaḍī vedu

vedīṃ anyāyīṃ paḍe / to nirayabhogeṃ daṃḍe /
sanyāyī to suravāḍeṃ / svargīṃ jiye

aisī he viśvavyavasthā / anādi je pārthā /
iyeteṃ mhaṇatī te vṛthā / avagheṃci heṃ

yajñamūḍha ṭhakile yāgīṃ / devapiseṃ pratimāliṃgīṃ /
nāgavile bhagave yogī / samādhibhrameṃ

yetha āpuleni baḻeṃ / bhogije jeṃ jeṃ veṃṭāḻeṃ /
heṃ vāṃconi vegaḻeṃ / puṇya āhe ?

nā aśaktapaṇeṃ āṃgikeṃ / vegaḻaveṃṭāḻīṃ na ṭakeṃ /
aisā gādijevīṇa viṣayasukheṃ / teṃci pāpa

prāṇa ghepatī saṃpannāṃce / te pāpa jarī sāceṃ /
tarī sarvasva hātā ye tayāṃceṃ / heṃ puṇyaphaḻa kīṃ ?

baḻī abaḻāteṃ khāya / heṃci bādhita jarī hoya /
tarī māsayāṃ kāṃ na hoya / nisaṃtāna ?

āṇi kuḻeṃ śodhūni donhī / kumāreṃci śubhalagnīṃ /
meḻavījatī prajāsādhanīṃ / hetu jarī

tarī paśupakṣādi jātī / jayā mitī nāhīṃ saṃtatī /
tayāṃ koṇeṃ pratipattīṃ / vivāha kele ?

coriyeceṃ dhana āleṃ / tarī teṃ koṇāsi viṣa jāleṃ ? /
vālabheṃ paradvāra keleṃ / koḍhī koṇī hoya ?

mhaṇauni devo gosāṃvī / to dharmādharmu bhogavī /
āṇi paratrācyā gāṃvīṃ / karī to bhogī

parī paratra nā devo / na dise mhaṇauni teṃ vāvo /
āṇi kartā nime mā ṭhāvo / bhogyāsi kavaṇu ?

yetha urvaśiyā iṃdra sukhī / jaisā kāṃ svargalokīṃ /
taisāci kṛmihī narakīṃ / loḻatu ślāghe

mhaṇauni naraka svargu / navhe pāpapuṇyabhāgu /
je dohīṃ ṭhāyīṃ sukhabhogu / kāmācāci to

yākāraṇeṃ kāmeṃ / strīpuruṣayugmeṃ /
miḻatī tetha janme / āghaveṃ jaga

āṇi jeṃ jeṃ abhilāṣeṃ / svārthālāgīṃ heṃ poṣe /
pāṭhīṃ parasparadveṣeṃ / kāmaci nāśī

evaṃ kāmāvāṃcūni kāṃhīṃ / jagā mūḻaci āna nāhīṃ /
aiseṃ bolatī pāhīṃ / āsura gā te

ātāṃ aso heṃ kiḍāḻa / bolī na karūṃ paghaḻa /
sāṃgatāṃci saphola / hotase vācā

āṇi īśvarāciyā khaṃtī / nusadhiyāci karitī cāṃthī /
heṃhī nāhīṃ cittīṃ / niścayo eku

kiṃbahunā ughaḍa / āṃgī lāūniyāṃ pākhāṃḍa /
nāstikapaṇāceṃ hāḍa / roṃvileṃ jīvīṃ

te veḻīṃ svargālāgīṃ ādaru / kāṃ narakācā aḍadaru /
yā vāsanāṃcā aṃkuru / jaḻoni gelā

maga kevaḻa ye dehakhoḍāṃ / amedhyodakācā buḍabuḍā /
viṣayapaṃkīṃ suhāḍā / buḍāle gā

jaiṃ āṭāveṃ hotī jaḻacara / taiṃ ḍohīṃ miḻatīṃ ḍhīvara /
kāṃ paḍāveṃ hoya śarīra / taiṃ rogā udayo

udaijaṇeṃ ketūceṃ jaiseṃ / viśvā aniṣṭoddeśeṃ /
janmatī te taise / lokāṃ āṭūṃ

virūḍhaliyā aśubha / phuṭatī taiṃ te koṃbha /
pāpāce kīrtistaṃbha / cālate te

āṇi māgāṃpuḍhāṃ jāḻaṇeṃ / vāṃcūni āgī kāṃhīṃ neṇeṃ /
taiseṃ viruddhaci eka karaṇeṃ / bhalateyāṃ

parī teṃci gā karaṇeṃ / ādaritī saṃbhrameṃ jeṇeṃ /
to āika pārthā mhaṇe / śrīnivāsu

tarī jāḻa pāṇiyeṃ na bhare / āgī iṃdhana na pure /
tayāṃ durbharāṃciye dhure / bhukāḻu jo

tayā kāmācā volāvā / jīvīṃ dharuniyā pāṃḍavā /
daṃbhamānācā meḻāvā / meḻavitī

mātaliyā kuṃjarā / āgaḻī jālī madirā /
taisā madācā tāṭhā taṃva jarā / caḍhatāṃ āṃgīṃ

āṇi āgrahā toci ṭhāvo / varī mauḍhyāsā sāvāvo /
maga kāya vānūṃ nirvāho / niścayācā

jihīṃ paropatāpu ghaḍe / parāvā jīvu ragaḍe /
tihīṃ karmīṃ hoūni gāḍhe / janmavṛttī

maga āpuleṃ keleṃ phokāritī / āṇi jagāteṃ dhikkāritī /
dāhīṃ diśīṃ pasaritī / spṛhājāḻa

aiseni gā āṭopeṃ / thoriyeṃ āṇatī pāpeṃ /
dharmadhenu khurapeṃ / suṭaleṃ jaiseṃ

yāci ekā āyatī / tayāciyā karmapravṛttī /
āṇi jiṇiyāhī parautī / vāhatī ciṃtā

pātāḻāhūni nimna / jiyeciye uṃcīye sāneṃ gagana /
jeṃ pāhātāṃ tribhuvana / aṇuhī nohe

te yogapaṭācī mavaṇī / jīvīṃ aniyama ciṃtavaṇī /
je sāṃḍūṃ neṇeṃ maraṇīṃ / vallabhā jaisī

taisī ciṃtā apāra / vāḍhavitī niraṃtara /
jīvīṃ sūni asāra / viṣayādika

striyā gāileṃ āikāveṃ / strīrūpa ḍoḻāṃ dekhāveṃ /
sarveṃdriyeṃ āliṃgāveṃ / striyeteṃci

kuravaṃḍī kīje amṛteṃ / aiseṃ sukha striyeparauteṃ /
nāhīṃci mhaṇauni citteṃ / niścayo kelā

maga tayāci strībhogā- / lāgīṃ pātāḻa svargā /
dhāṃvatī digvibhāgā / parautehī

āmiṣakavaḻu thorī āśā / na vicāritāṃ giḻī māsā /
taiseṃ kīje viṣayāśā / tayāṃsi gā

vāṃchita taṃva na pavatī / maga koraḍiyeci āśecī saṃtatī /
vāḍhaūṃ vāḍhaūṃ hotī / kośakiḍe

āṇi pasarilā abhilāṣu / apūrṇu hoya toci dveṣu /
evaṃ kāmakrodhāṃhūni adhiku / puruṣārthu nāhīṃ

dihā kholaṇeṃ rātrīṃ jāgovā / ṭhāṇāṃtarīyāṃ jaisā pāṃḍavā /
ahorātrīṃhī visāṃvā / bheṭecinā

taiseṃ uṃcauni loṭileṃ kāmeṃ / nehaṭatī krodhāciye ḍheme /
tarī rāgadveṣa premeṃ / na mātī keṃhī

tevīṃci jīvīṃciyā hāṃvā / viṣayavāsanāṃcā meḻāvā /
kelā tarī bhogāvā / artheṃ kīṃ nā ?

mhaṇauni bhogāvayājogā / puratā arthu paiṃ gā /
āṇāvayā jagā / jhoṃbatī sairā

ekāteṃ sādhūni māritī / ekāci sarvasveṃ haritī /
ekālāgīṃ ubhāritī / apāyayaṃtreṃ

pāśikeṃ potīṃ vāgurā / suṇīṃ sasāṇeṃ cikāṭī khoṃcārā /
gheūni nighatī ḍoṃgarā / pāradhī jaiseṃ

te posāvayā poṭa / mārūni prāṇiyāṃce saṃghāṭa /
āṇitī aiseṃ nikṛṣṭa / teṃhī karitī

paraprāṇaghāteṃ / meḻavitī vitteṃ /
miḻālyā citteṃ / toṣaṇeṃ kaiseṃ

mhaṇe āji miyāṃ / saṃpatti bahutekāṃciyā /
āpulyā hātīṃ keliyā / dhanyu nā mī ?

aisā ślāghoṃ jaṃva jāye / taṃva mana āṇīkahī vāhe /
saveṃci mhaṇe pāhe / āṇikāṃceṃhī āṇūṃ

heṃ jetuleṃ ase joḍileṃ / tayāceni bhāṃḍavaleṃ /
lābhā gheīna uraleṃ / carācara heṃ

aiseni dhanā viśvāciyā / mīci hoīna svāmiyā /
maga diṭhī paḍe tayā / uroṃ nedī

he mārile vairī thoḍe / āṇīkahī sādhīna gāḍhe /
maga nāṃdena pavāḍeṃ / yekalāci mī

maga mājhī hotīla kāmārīṃ / tiyeṃvāṃcūni yereṃ mārīṃ /
kiṃbahunā carācarīṃ / īśvaru to mī

mī bhogabhūmīcā rāvo / āji sarvasukhāsī ṭhāvo /
mhaṇauni iṃdruhī vāvo / māteṃ pāhuni

mī maneṃ vācā deheṃ / karīṃ te kaiseṃ nohe /
keṃ majavāṃcūni āhe / ājñāsiddha āna ?

taṃvaci baḻiyā kāḻu / jaṃva na diseṃ mī aturbaḻu /
sukhācā kīra nikhiḻu / rāsivā mīci

kuberu āthilā hoye / parī to neṇeṃ mājhī soye /
saṃpattī majasama navhe / śrīnāthāhī

mājhiyā kuḻācā ujāḻū / kāṃ jātigotāṃcā meḻū /
pāhatāṃ brahmāhī haḻū / uṇāci dise

mhaṇauni miravitī nāṃveṃ / vāyāṃ īśvarādi āghave /
nāhīṃ majasīṃ sarī pāve / aiseṃ koṇhī

ātāṃ lopalā abhicāru / tayā karīna mī jīrṇoddhāru /
pratiṣṭhīna paramāru / yāgavarī

māteṃ gātī vānitī / naṭanāceṃ rijhavitī /
tayāṃ deīna māgatī / te te vastu

mājirā annapānīṃ / pramadāṃcyā āliṃganīṃ /
mī hoīna tribhuvanīṃ / ānaṃdākāru

kāya bahu sāṃgoṃ aiseṃ / te āsurīprakṛtī piseṃ /
turaṃbitī asoseṃ / gaganauḻeṃ tiyeṃ

jvarāceni āṭopeṃ / rogī bhalataiseṃ jalpe /
cāvaḻatī saṃkalpeṃ / jāṇa te taiseṃ

ajñāna ātule dhuḻī / mhaṇauni āśā vāhaṭuḻī /
bhovaṃḍījatī aṃtarāḻīṃ / manorathāṃcyā

aniyama āṣāḍha megha / kāṃ samudrormī abhaṃga /
taise kāmitī anega / akhaṃḍa kāma

maga paiṃ kāmanāci tayā / jīvīṃ jālyā velariyā /
vorapilī kāṃṭiyā / kamaḻeṃ jaisīṃ

kāṃ pāṣāṇāciyā māthāṃ / hāṃḍī phuṭalī pārthā /
jīvīṃ taiseṃ sarvathā / kuṭake jāle

tevhāṃ caḍhatiye rajanī / tamācī hoya puravaṇī /
taisā moho aṃtaḥkaraṇīṃ / vāḍhoṃci lāge

āṇi vāḍhe jaṃva jaṃva moho / taṃva taṃva viṣayīṃ roho /
viṣaya tetha ṭhāvo / pātakāsī

pāpeṃ āpaleni thāṃveṃ / jaṃva karitī meḻāve /
taṃva jitāṃci āghave / yetī narakāṃ

mhaṇauni gā sumatī / je kumanorathāṃ pāḻitī /
te āsura yetī vastī / tayā ṭhāyā

jetha asipatrataruvara / khadirāṃgārāce ḍoṃgara /
tātalā telīṃ sāgara / utatātī

jetha yātanāṃcī śreṇī / he nitya navī yamajācaṇī /
paḍatī tiye dāruṇīṃ / narakalokīṃ

aise narakāciye śele / bhāgīṃ je je janmale /
tehī dekhoṃ bhulale / yajitī yāgīṃ

eऱhavīṃ yāgādika kriyā / āhāṇa teci dhanaṃjayā /
parī viphaḻatī ācaroniyāṃ / nāṭakī jaisī

vallabhāciyā ujariyā / āpaṇayāprati kustriyā /
joḍoni toṣitī jaisiyāṃ / ahevapaṇeṃ

taiseṃ āpaṇayāṃ āpaṇa / mānitāṃ mahaṃtapaṇa /
phugatī asādhāraṇa / garveṃ teṇeṃ

maga lavoṃ neṇatī kaise / āṭivā lohāce khāṃba jaise /
kāṃ udhavale ākāśeṃ / śiḻārāśī

taiseṃ āpuliye barave / āpaṇaci rijhatāṃ jīveṃ /
tṛṇāhīhūni āghaveṃ / mānitī nīca

varī dhanāciyā madirā / mājūni dhanurdharā /
kṛtyākṛtyavicārā / savateṃ keleṃ

jayā āṃgīṃ āyatī aisī / tetha yajñācī goṭhī kāyasī /
tarī kāya kāya pisīṃ / na karitī gā ?

mhaṇauni koṇe eke veḻe / mauḍhyamadyāceni baḻeṃ /
yāgācīṃhī ṭavāḻeṃ / ādaritī

nā kuṃḍa maṃḍapa vedī / nā ucita sādhanasamṛddhī /
āṇi tayāṃsī taṃva vidhī / dvaṃdvaci sadā

devāṃ brāhmaṇāṃceni nāṃveṃ / āḍavārenahi nohāveṃ /
aiseṃ āthī tetha yāveṃ / lāge kavaṇā ?

paiṃ vāsaruvācā bhokasā / gāīpuḍheṃ ṭhevūni jaisā /
ugāṇā ghetī kṣīrarasā / buddhivaṃta

taiseṃ yāgāceni nāṃveṃ / jaga vāūni hāṃveṃ /
nāgavitī āghaveṃ / aherāvārī

aiśā kāṃhīṃ āpuliyā / homitī je ujariyā /
teṇeṃ kāmitī prāṇiyā / sarvanāśu

maga puḍhāṃ bherī niśāṇa / lāunī te dīkṣitapaṇa /
jagīṃ phokāritī āṇa / vāvo vāvo

tevhāṃ mahattveṃ teṇeṃ adhamā / garvā caḍhe mahimā /
jaise leve didhale tamā / kājaḻāce

taiseṃ mauḍhya ghaṇāve / auddhatya uṃcāve /
ahaṃkāru duṇāve / avivekuhī

maga dujayācī bhāṣa / nuravāvayā niḥśeṣa /
baḻīyepaṇā adhika / hoya baḻa

aisā ahaṃkāra baḻā / jāliyā ekavaḻā /
darpasāgaru maryādaveḻā / sāṃḍūni ute

maga vosaṃḍileni darpeṃ / kāmāhī pitta kurupe /
tayā dhagīṃ saiṃgha paḻipe / krodhāgni to

tetha unhāḻā āgī kharamarā / telātupāciyā koṭhārā /
lāgalā āṇi vārā / suṭalā jaisā

taisā ahaṃkāru baḻā ālā / darpu kāmakrodhīṃ gūḍhalā /
yā dohīṃcā meḻu jālā / jayāṃcyā ṭhāyīṃ

te āpuliyā saveśā / maga koṇī koṇī hiṃsā /
yā prāṇiyāṃte vīreśā / na sādhatī gā ?

pahileṃ taṃva dhanurdharā / āpuliyā māṃsarudhirā /
veṃcu karitī abhicārā- / lāgoniyāṃ

tetha jāḻitī jiyeṃ deheṃ / yāmājīṃ jo mī āheṃ /
tayā ātmayā maja ghāye / vājatī te

āṇi abhicārakīṃ tihīṃ / upadravije jetuleṃ kāṃhīṃ /
tetha caitanya mī pāhīṃ / sīṇu pāve

āṇi abhicārāvegaḻeṃ / vipāyeṃ je avagaḻeṃ /
tayā ṭākitī iṭāḻeṃ / paiśūnyācīṃ

satī āṇi satpurukha / dānaśīḻa yājñika /
tapasvī alaukika / saṃnyāsī je

kāṃ bhakta hana mahātme / iyeṃ mājhīṃ nijācīṃ dhāmeṃ /
nirvāḻalīṃ homadharmeṃ / śrautādikīṃ

tayāṃ dveṣāceni kāḻakūṭeṃ / bāsaṭoni tikhaṭeṃ /
kubolāṃcīṃ sadaṭeṃ / sūti kāṃḍeṃ

aise āghavāci parī / pravartale mājhyā vairī /
tayāṃ pāpiyāṃ jeṃ mī karīṃ / teṃ āika pāṃ

tarī manuṣyadehācā tāgā / gheūni rusatī je jagā /
te padavī hironi paiṃ gā / aise ṭhevīṃ

je kleśagāṃvīṃcā ukaraḍā / bhavapurīṃcā pānavaḍā /
te tamoyoni tayāṃ mūḍhāṃ / vṛttīci deṃ

maga āhārāceni nāṃveṃ / tṛṇahī jetha nugave /
te vyāghra vṛścika āḍave / taisiye karīṃ

tetha kṣudhāduḥkheṃ bahuteṃ / toḍūni khātī āpaṇayāteṃ /
maramaroṃ māguteṃ / hotaci asatī

kāṃ āpulā garaḻajāḻīṃ / jaḻitī āṃgācī peṃdaḻī /
te sarpaci karīṃ biḻīṃ / niruṃdhalā

parī ghetalā śvāsu ghāpe / yetulenahī māpeṃ /
visāṃvā tayāṃ nāṭope / durjanāṃsī

aiseni kalpāṃciyā koḍī / gaṇitāṃhī saṃkhyā thoḍī /
tetulā veḻu na kāḍhī / kleśauni tayāṃ

tarī tayāṃsī jetha jāṇeṃ / tethiṃceṃ heṃ pahileṃ peṇeṃ /
teṃ pāvoni yereṃ dāruṇeṃ / na hotī duḥkheṃ

hā ṭhāyavarī / saṃpatti te āsurī /
adhogatī avadhārīṃ / joḍilī tihīṃ

pāṭhīṃ vyāghrādi tāmasā / yonī to aḻumāḻu aisā /
dehādhārācā usāsā / āthī johī

tohī mī volhāvā hireṃ / maga tamaci hotī ekasareṃ /
jethe geleṃ āṃdhāreṃ / kāḻavaṃḍaije

jayāṃcī pāpā ciḻasī / naraka ghetī vivasī /
śīṇa jāya mūrcchī / siṇeṃ jeṇeṃ

maḻu jeṇeṃ maiḻe / tāpu jeṇeṃ poḻe /
jayāceni nāṃveṃ saḻe / mahābhaya

pāpā jayācā kaṃṭāḻā / upaje amaṃgaḻa amaṃgaḻā /
viṭāḻuhī viṭāḻā / bihe jayā

aiseṃ viśvāceyā vokhaṭeyā / adhama je dhanaṃjayā /
teṃ te hotī bhogūniyāṃ / tāmasā yonī

ahā sāṃgatāṃ vācā raḍe / āṭhavitāṃ mana khiraḍe /
kaṭāre mūrkhīṃ kevaḍhe / joḍile niraya

kāyisayā te āsura / saṃpatti poṣitī vāura /
jiyā didhaleṃ ghora / patana aiseṃ

mhaṇauni tuvāṃ dhanurdharā / nohāveṃ gā tiyā moharā /
jeutā vāsu āsurā / saṃpattivaṃtā

āṇi daṃbhādi doṣa sāhī / he saṃpūrṇa jayāṃcyā ṭhāyīṃ /
te tyajāve heṃ kāī / mhaṇoṃ kīra ?

parī kāma krodha lobha / yā tihīṃceṃhī thoṃba /
thāṃve tetheṃ aśubha / pikaleṃ jāṇa

sarva duḥkhāṃ āpuliyā / darśanā dhanaṃjayā /
pāḍhāū he bhalatayā / didhaleṃ āhātī

kāṃ pāpiyāṃ narakabhogīṃ / suvāvayālāgīṃ jagīṃ /
pātakāṃcī dāṭugī / sabhāci he

te raurava gā taṃvacivarī / āikijatī paṭāṃtarīṃ /
jaṃva he tinhī aṃtarīṃ / uṭhatī nā

apāya tihīṃ āsalaga / yātanā ihīṃ savaṃga /
hāṇī hāṇī nohe he tigha / heci hāṇī

kāya bahu boloṃ subhaṭā / sāṃgitaliyā nikṛṣṭā /
narakācā dāravaṃṭā / triśaṃku hā

yā kāmakrodhalobhāṃ- / mājīṃ jīveṃ jo hoya ubhā /
to nirayapurīcī sabhā / sanmānu pāve

mhaṇauni puḍhata puḍhatīṃ kirīṭī / he kāmādi doṣa tripuṭī /
tyajāvīṃci gā vokhaṭī / āghavā viṣayīṃ

etairvimuktaḥ kaunteya tamodvāraistribhirnaraḥ /
ācaratyātmanaḥ śreyastato yāti parāṃ gatim २२//
dharmādikāṃ cauṃhī āṃtu / puruṣārthācī taiṃci mātu /
karāvī jaiṃ saṃghātu / sāṃḍīla hā

he tinhī jīvīṃ jaṃva jāgatī / taṃvavarī nikiyācī prāptī /
he mājhe kāna nāikatī / devohī mhaṇe

jayā āpaṇapeṃ paḍhiye / ātmanāśā jo bihe /
teṇeṃ na dharāvī he soye / sāvadhu hoīje

poṭīṃ bāṃdhoni pāṣāṇa / samudrīṃ bāhīṃ āṃgavaṇa /
kāṃ jiyāvayā jevaṇa / kāḻakūṭāceṃ

ihīṃ kāmakrodhalobheṃsī / kāryasiddhi jāṇa taisī /
mhaṇauni ṭhāvoci pusīṃ / yayāṃcā gā

jaiṃ kahīṃ avacaṭeṃ / he tikaḍī sāṃkhaḻa tuṭe /
taiṃ sukheṃ āpuliye vāṭe / cāloṃ lābhe

tridoṣīṃ sāṃḍileṃ śarīra / trikuṭīṃ phiṭaliyā nagara /
tridāha nimāliyā aṃtara / jaiseṃ hoya

taisā kāmādikīṃ tighīṃ / sāṃḍilā sukha pāvoni jagīṃ /
saṃgu lāhe mokṣamārgīṃ / sajjanāṃcā

maga satsaṃgeṃ prabaḻeṃ / sacchāstrāceni baḻeṃ /
janmamṛtyūcīṃ nimāḻeṃ / nistareṃ rāneṃ

te veḻīṃ ātmānaṃdeṃ āghaveṃ / jeṃ sadā vasateṃ baraveṃ /
teṃ taiseṃci pāṭaṇa pāve / gurukṛpeceṃ

tetha priyācī paramasīmā / to bheṭe māulī ātmā /
tayeṃ khevīṃ āṭe ḍiṃḍimā / sāṃsārika he

aisā jo kāmakrodhalobhāṃ / jhāḍī karūni ṭhāke ubhā /
to yevaḍhiyā lābhā / gosāvī hoya

nā heṃ nāvaḍoni kāṃhīṃ / kāmādikāṃcyāci ṭhāyīṃ /
dāṭilī jeṇeṃ ḍoī / ātmacoreṃ

jo jagīṃ samāna sakṛpu / hitāhita dāvitā dīpu /
to amānyu kelā bāpu / vedu jeṇeṃ

na dharīci vidhīcī bhīḍa / na karīci āpalī cāḍa /
vāḍhavīta gelā koḍa / iṃdriyāṃceṃ

kāmakrodhalobhāṃcī kāsa / na soḍīca pāḻilī bhāṣa /
svairācārāceṃ asosa / vaḻaghalā rāna

to suṭakeciyā vāhiṇīṃ / maga pivoṃ na lāhe pāṇī /
svapnīṃhī te kahāṇī / dūrīci tayā

āṇi paratra taṃva jāye / heṃ kīra tayā āhe /
parī aihikahī na lāhe / bhoga bhogūṃ

tarī māśālāgīṃ bhulalā / brāhmaṇa pāṇabuḍāṃ righālā /
kīṃ tethahī pāvalā / nāstikavādu

taiseṃ viṣayāṃceni koḍeṃ / jeṇeṃ paratrā keleṃ ubaḍeṃ /
taṃva toci āṇikīkaḍe / maraṇeṃ nelā

evaṃ paratra nā svargu / nā aihikahī viṣayabhogu /
tetha keutā prasaṃgu / mokṣācā to ?

mhaṇauni kāmāceni baḻeṃ / jo viṣaya sevūṃ pāhe saḻeṃ /
tayā viṣayo nā svargu miḻe / nā uddhare to

yākāraṇeṃ paiṃ bāpā / jayā āthī āpulī kṛpā /
teṇeṃ vedāṃciyā niropā / āna na kīje

patīciyā matā / anusaroni pativratā /
anāyāseṃ ātmahitā / bheṭeci te

nātarī śrīguruvacanā / diṭhī detu jatanā /
śiṣya ātmabhuvanā- / mājīṃ paise

heṃ aso āpulā ṭhevā / hātā āthī jarī yāvā /
tarī ādareṃ jevīṃ divā / puḍhāṃ kīje

taisā aśeṣāṃhī puruṣārthā / jo gosāvī ho mhaṇe pārthā /
teṇeṃ śrutismṛti māthāṃ / baisaṇeṃ ghāpe

śāstra mhaṇela jeṃ sāṃḍāveṃ / teṃ rājyahī tṛṇa mānāveṃ /
jeṃ ghevavī teṃ na mhaṇāveṃ / viṣahī viru

aisiyā vedaikaniṣṭhā / jāliyā jarī subhaṭā /
tarī keṃ āhe aniṣṭā / bheṭaṇeṃ gā ?

paiṃ ahitāpāsūni kāḍhitī / hita deūni vāḍhavitī /
nāhīṃ gā śrutiparautī / māulī jagā

mhaṇauni brahmeṃśīṃ meḻavī / taṃva he koṇeṃ na sāṃḍāvī /
agā tuvāṃhī aisīci bhajāvī / viśeṣeṃsīṃ

je āji arjunā tūṃ yetheṃ / karāvayā satya śāstreṃ sārtheṃ /
janmalāsi baḻārtheṃ / dharmāceni

āṇi dharmānuja heṃ aiseṃ / bodheṃci āleṃ apaiseṃ /
mhaṇauni ānāriseṃ / karūṃ naye

kāryākāryavivekīṃ / śāstreṃci karāvīṃ pārakhīṃ /
akṛtya teṃ kuḍeṃ lokīṃ / vāḻāveṃ gā

maga kṛtyapaṇeṃ khareṃ nige / teṃ tuvāṃ āpuleni āṃgeṃ /
ācaroni ādareṃ cāṃgeṃ / sārāveṃ gā

je viśvaprāmāṇyācī mudī / āji tujhyā hātīṃ aseṃ subuddhī /
lokasaṃgrahāsi triśuddhī / yogyu hosī

evaṃ āsuravargu āghavā / sāṃgoni tethiṃcā nigāvā /
tohi deveṃ pāṃḍavā / nirūpilā

iyāvarī to paṃḍūcā / kumaru sadbhāvo jīvīṃcā /
pusela to caitanyācā / kānīṃ aikā

saṃjayeṃ vyāsāciyā niropā / to veḻu pheḍilā tayā nṛpā /
taisā mīhi nivṛttikṛpā / sāṃgena tumhāṃ

tumhī saṃta mājhiyā kaḍā / diṭhīcā karāla bahuḍā /
tarī tumhāṃ māne yevaḍhā / hoīna mī

mhaṇauni nija avadhāna / maja voḻage pasāyadāna /
dījo jī sanāthu hoīna / jñānadevo mhaṇe