Jnaneshwari · Chapter 15
// ॐ śrī paramātmane namaḥ //
// atha śrīmadbhagavadgītā //
/ atha pañcadaśo'dhyāyaḥ - adhyāya paṃdharāvā / /
/ puruṣottamayogaḥ /
ātāṃ hṛdaya heṃ āpuleṃ / cauphāḻuniyāṃ bhaleṃ /
varī baisaūṃ pāuleṃ / śrīgurūṃcīṃ
aikyabhāvācī aṃjuḻī / sarveṃdriya kuḍmuḻī /
bharūniyāṃ puṣpāṃjuḻī / arghyu devoṃ
ananyodakeṃ dhuvaṭa / vāsanā je tanniṣṭha /
te lāgalese aboṭa / caṃdanāceṃ
premāceni bhāṃgāreṃ / nirvāḻūni nūpareṃ /
levaūṃ sukumāreṃ / padeṃ tiyeṃ
ghaṇāvalī āvaḍī / avyabhicāreṃ cokhaḍī /
tiye ghālūṃ joḍī / āṃgoḻiyā
ānaṃdāmodabahaḻa / sāttvikāceṃ mukuḻa /
teṃ umalaleṃ aṣṭadaḻa / ṭheūṃ varī
tethe ahaṃ hā dhūpa jāḻūṃ / nāhaṃ tejeṃ vovāḻūṃ /
sāmarasyeṃ poṭāḻūṃ / niraṃtara
mājhī tanu āṇi prāṇa / iyā donī pāuvā leūṃ śrīgurucaraṇa /
karūṃ bhogamokṣa niṃbaloṇa / pāyāṃ tayāṃ
iyā śrīgurucaraṇasevā / hoṃ pātra tayā daivā /
je sakaḻārthameḻāvā / pāṭu bāṃdhe
brahmīṃceṃ visavaṇeṃvarī / unmekha lāhe ujarī /
jeṃ vāceteṃ iyeṃ karī / sudhāsiṃdhu
pūrṇacaṃdrāciyā koḍī / vaktṛtvā ghāpeṃ kuroṃḍī /
taisī āṇī goḍī / akṣarāṃteṃ
sūryeṃ adhiṣṭhilī prācī / jagā rāṇīva de prakāśācī /
taiśī vācā śrotayāṃ jñānācī / divāḻī karī
nādabrahma khujeṃ / kaivalyahī taiseṃ na saje /
aisā bolu dekhije / jeṇeṃ daiveṃ
śravaṇasukhācyā māṃḍavīṃ / viśva bhogī mādhavīṃ /
taisī sāsinnalī baravī / vācāvallī
ṭhāvo na pavatā jayācā / maneṃsī muraḍalī vācā /
to devo hoya śabdācā / camatkāru
jeṃ jñānāsi na cojave / dhyānāsihī jeṃ nāgave /
teṃ agocara phāve / goṭhīmājīṃ
yevaḍheṃ eka saubhaga / vaḻaghe vāceceṃ āṃga /
śrīgurupādapadmaparāga / lāhe jaiṃ kāṃ
tarī bahu bolūṃ kāī / āji teṃ ānīṃ ṭhāīṃ /
māteṃvācūni nāhīṃ / jñānadevo mhaṇe
je tānheni miyāṃ apatyeṃ / āṇi mājhe guru ekalauteṃ /
mhaṇauni kṛpeṃsi ekahāteṃ / jāleṃ tiye
pāhā pāṃ bharovarī āghavī / megha cātakāṃsī ricavī /
majalāgīṃ gosāvī / taiseṃ keleṃ
mhaṇauni rikāmeṃ toṃḍa / karūṃ geleṃ baḍabaḍa /
kīṃ gītā aiseṃ goḍa / ātuḍaleṃ
hoya adṛṣṭa āpaiteṃ / taiṃ vāḻūci ratneṃ parate /
ujū āyuṣya taiṃ māriteṃ / lobhu karī
ādhaṇīṃ ghātaliyā haraḻa / hotī amṛtāce tāṃduḻa /
jarī bhukecī rākhe veḻa / śrījagannāthu
tayāparī śrīguru / karitī jaiṃ aṃgīkāru /
taiṃ hoūni ṭhāke saṃsāru / mokṣamaya āghavā
pāhā pāṃ śrīnārāyaṇeṃ / tayā pāṃḍavāṃceṃ uṇeṃ /
kījeci nā purāṇeṃ / viśvavaṃdyeṃ ?
taiseṃ śrīnivṛttirājeṃ / ajñānapaṇa heṃ mājheṃ /
āṇileṃ vojeṃ / jñānāciyā
parī heṃ aso ātāṃ / prema ruḻatase bolatāṃ /
keṃ gurugaurava varṇitāṃ / unmeṣa ase ?
ātāṃ teṇeṃci pasāyeṃ / tumhāṃ saṃtāce mī pāyeṃ /
voḻagena abhiprāyeṃ / gīteceni
tarī toci prastutīṃ / caudāviyā adhyāyācyā aṃtīṃ /
nirṇayo kaivalyapatī / aisā kelā
jeṃ jñāna jayācyā hātīṃ / toci samarthu mukti /
jaisā śatamakha saṃpattī / svargīṃciye
kāṃ śata eka janmāṃ / jo janmoni brahmakarmā /
karī toci brahmā / ānu nohe
nānā sūryācā prakāśu / lāhe jevīṃ ḍoḻasu /
tevīṃ jñāneṃci saurasu / mokṣācā to
tarī tayā jñānālāgīṃ / kavaṇā pāṃ yogyatā āṃgīṃ /
heṃ pāhatāṃ jagīṃ / dekhilā eku
jeṃ pātāḻīṃceṃhī nidhāna / dāvīla kīra aṃjana /
parī hoāve locana / pāyāḻāce
taiseṃ mokṣa deīla jñāna / yetheṃ kīra nāhīṃ āna /
parī teṃci thāre aiseṃ mana / śuddha hoāveṃ
tarī viraktīvāṃcūni kahīṃ / jñānāsi tagaṇeṃci nāhīṃ /
heṃ vicārūni ṭhāīṃ / ṭhevileṃ deveṃ
ātāṃ viraktīcī kavaṇa parī / je yeūni manāteṃ varī /
heṃhī sarvajñeṃ śrīharī / dekhileṃ ase
je viṣeṃ rāṃdhilī rasasoye / jaiṃ jevaṇārā ṭhāuvī hoye /
taiṃ to tāṭaci sāṃḍūni jāye / jayāparī
taisī saṃsārā yā samastā / jāṇije jaiṃ anityatā /
taiṃ vairāgya davaḍitāṃ / pāṭhī lāge
ātāṃ anityatva yā kaiseṃ / teṃci vṛkṣākāramiṣeṃ /
sāṃgijata ase viśveśeṃ / paṃcadaśīṃ
upaḍileṃ kavatikeṃ / jhāḍa yerimoharā ṭhāke /
teṃ vegeṃ jaiseṃ suke / taiseṃ heṃ nohe
yāteṃ ekeparī / rūpakāciyā kusarī /
sārītase vārī / saṃsārācī
karūni saṃsāra vāvo / svarūpīṃ ahaṃte ṭhāvo /
hoāvayā adhyāvo / paṃdharāvā hā
ātāṃ heṃci āghaveṃ / graṃthagarbhīṃceṃ cāṃgāveṃ /
upalavijela jīveṃ / ākarṇije
tarī mahānaṃda samudra / jhaॊ pūrṇa pūrṇīmā caṃdra /
to dvārakecā nareṃdra / aiseṃ mhaṇe
agā paiṃ paṃḍukumarā / yetāṃ svarūpāciyā gharā /
karītase āḍavārā / viśvābhāsu jo
to hā jagaḍaṃbaru / nohe yetha saṃsāru /
hā jāṇije mahātaru / thāṃvalā ase
parī yerāṃ rukhāṃsārikhā / hā taḻīṃ mūḻeṃ varī śākhā /
taisā nohe mhaṇauni lekhā / nayeci kavaṇā
āgī kāṃ kuऱhāḍī / hoya rigāvā jarī buḍīṃ /
tarī ho kāṃ bhalatevaḍhī / varicīla vāḍhī
je tuṭaliyā mūḻāpāśīṃ / ulaṃḍela kāṃ śākhāṃśīṃ /
parī taiśī goṭhī kāyaśī / hā sopā navhe
arjunā heṃ kavatika / sāṃgatāṃ ase alaukika /
je vāḍhī adhomukha / rukhā yayā
jaisā bhānū uṃcī neṇoṃ keṃ / raśmijāḻa taḻīṃ phāṃke /
saṃsāra heṃ kāvarukheṃ / jhāḍa taiseṃ
āṇi āthī nāthī titukeṃ / ruṃdhaleṃ ase yeṇeṃci ekeṃ /
kalpāṃtīṃceni udakeṃ / vyoma jaiseṃ
kāṃ ravīcyā astamānīṃ / āṃdhāreni koṃde rajanī /
taisā hāci gaganīṃ / māṃḍalā ase
yayā phaḻa nā cuṃbitāṃ / phūla nā turaṃbitāṃ /
jeṃ kāṃhīṃ paṃḍusutā / teṃ rukhuci hā
hā ūrdhvamūḻa āhe / parī unmūḻilā nohe /
yeṇeṃci hā hoye / śāḍvaḻu gā
āṇi ūrdhvamūḻa aiseṃ / nigadileṃ kīra ase /
parī adhīṃhī asoseṃ / mūḻeṃ yayā
prabaḻalā caumerī / piṃpaḻā kāṃ vaḍāciyā parī /
je pāraṃbiyāṃmājhārīṃ / ḍahāḻiyā asatī
tevīṃci gā dhanaṃjayā / saṃsārataru yayā /
adhīṃci āthī khāṃdiyā / heṃhī nāhīṃ
tarī ūrdhvāhīkaḍe / śākhāṃce māṃdoḍe /
disatāti apāḍeṃ / sāsinnaleṃ
jāleṃ gaganaci pāṃ veliye / kāṃ vārā māṃḍalā rukhāceni āyeṃ /
nānā avasthātrayeṃ / udayalā ase
aisā hā eku / viśvākāra viṭaṃku /
udayalā jāṇa rukhu / ūrdhvamūḻu
ātāṃ ūrdhva yā kavaṇa / yetheṃ mūḻa teṃ kiṃ lakṣaṇa /
kāṃ adhomukhapaṇa / śākhā kaisiyā
athavā drumā yayā / adhīṃ jiyā mūḻiyā /
tiyā koṇa kaisiyā / ūrdhva śākhā
āṇi aśvatthu hā aisī / prasiddhī kāyasī /
ātmavidavilāsīṃ / nirṇayo kelā
heṃ āghaveṃci baraveṃ / tujhiye pratītīsi phāve /
taiseni sāṃgoṃ soliṃveṃ / vinyāseṃ gā
parī aikeṃ gā subhagā / hā prasaṃgu ase tujaci jogā /
kānaci karīṃ ho sarvāṃgā / hiyeṃ āthiliyā
aiseṃ premaraseṃ suraphureṃ / bolileṃ jaṃva yādavavīreṃ /
taṃva avadhāna arjunākāreṃ / mūrta jāleṃ
deva nirūpitī teṃ theṃkuleṃ / yevaḍheṃ śrotepaṇa phāṃkaleṃ /
jaise ākāśā kheṃva pasarileṃ / dāhī diśīṃ
śrīkṛṣṇoktisāgarā / hā agastīci dusarā /
mhanauni ghoṃṭu bharoṃ pāhe ekasarā / avagheyācā
aisī soya sāṃḍūni khavaḻilī / āvaḍī arjunīṃ deveṃ dekhilī /
tetha jāleni sukheṃ kelī / kuravaṃḍī tayā
maga mhaṇe dhanaṃjayā / teṃ ūrdhva gā tarū yayā /
yeṇeṃ rukheṃci kāṃ jayā / ūrdhvatā game
eऱhavīṃ madhyordhva adha / he nāhīṃ jetha bheda /
advayāsīṃ ekavada / jayā ṭhāyīṃ
jo nāikijatāṃ nādu / jo asaurabhya makaraṃdu /
jo āṃgāthilā ānaṃdu / surateviṇa
jayā jeṃ āऱhāṃ parauteṃ / jayā jeṃ puḍheṃ māgauteṃ /
disateviṇa disateṃ / adṛśya jeṃ
upādhīcā dusarā / ghālitāṃ vopasarā /
nāmarūpācā saṃsārā / hoya jayāteṃ
jñātṛjñeyāvihīna / nusadheṃci jeṃ jñāna /
sukhā bharaleṃ gagana / gāḻīṃva jeṃ
jeṃ kārya nā kāraṇa / jayā dujeṃ nā ekapaṇa /
āpaṇayāṃ jeṃ jāṇa / āpaṇaci
aiseṃ vastu jeṃ sāceṃ / teṃ ūrdhva gā yayā tarūceṃ /
tetha āra gheṇeṃ mūḻāceṃ / teṃ aiseṃ ase
tarī māyā aisī khyātī / nasatīca yayā āthī /
kāṃ vāṃjhecī saṃtatī / vānaṇeṃ jaiśī
taiśī sat nā asat hoye / je vicārāceṃ nāma na sāhe /
aiseyā parīcī āhe / anādi mhaṇatī
je nānātattvāṃṃcī māṃdusa / je jagadabhrāceṃ ākāśa /
je ākārajātāceṃ dusa / ghaḍī keleṃ
je bhavadrumabījikā / je prapaṃcacitra bhūmikā /
viparīta jñānadīpikā / sāṃcalī je
te māyā vastūcyā ṭhāyīṃ / ase jaiseni nāhīṃ /
maga vastuprabhāci pāhī / pragaṭa hoye
jevhāṃ āpaṇayā ālī nida / karī āpaṇapeṃ jevīṃ mugdha /
kāṃ kājaḻī āṇī maṃda / prabhā dīpīṃ
svapnīṃ priyāpuḍheṃ taruṇāṃgī / nidelī cevavūni vegīṃ /
āliṃgilenivīṇa āliṃgī / sakāmu karī
taisī svarūpīṃ jālī māyā / āṇī svarūpa neṇe dhanaṃjayā /
teṃci rukhā yayā / mūḻa pahileṃ
vastūsī āpulā jo abodhu / to ūrdhvīṃ āṭhuḻaije kaṃdu /
vedāṃtīṃ hāci prasiddhu / bījabhāvo
ghana ajñāna suṣuptī / to bījāṃkurabhāvo mhaṇatī /
yera svapna hana jāgṛtī / hā phaḻabhāvo tiyecā
aisī yayā vedāṃtīṃ / nirūpaṇabhāṣāpratītī /
parī teṃ aso prastutīṃ / ajñāna mūḻa
teṃ ūrdhva ātmā nirmaḻeṃ / adhordhva sūcitī mūḻeṃ /
baḻiyā bāṃdhoni āḻeṃ / māyāyogāceṃ
maga ādhilīṃ sadehāṃtareṃ / uṭhatī jiyeṃ apāreṃ /
te caupāsi gheūni āgāreṃ / kholāvatī
aiseṃ bhavadrumāceṃ mūḻa / heṃ ūrdhvīṃ karī baḻa /
maga āṇiyāṃceṃ beṃcaḻa / adhīṃ dāvī
teth cidvṛtti pahileṃ / mahattattva umalaleṃ /
teṃ pāna vālheṃdulheṃ / eka nighe
maga sattvarajatamātmaku / trividha ahaṃkāru jo eku /
to tivaṇā adhomukhu / ḍiru phuṭe
to buddhīcī gheūni āgārī / bhedācī vṛddhi karī /
tethe manāce ḍāḻa dharī / sājepaṇeṃ
aisā mūḻāciyā gāḍhikā / vikalparasa koṃvaḻikā /
cittacatuṣṭaya ḍāhāḻikā / koṃbhaije to
maga ākāśa vāyu dyotaka / āpa pṛthvī heṃ pāṃca phoṃka /
mahābhūtāṃceṃ sarokha / saraḻe hotī
taisīṃ śrotrādi tanmātreṃ / tiyeṃ aṃgavasāṃ garbhapatreṃ /
luḻaluḻiteṃ vicitreṃ / umaḻatī gā
tetha śabdāṃkura varipaḍī / śrotrā vāḍhī devhaḍī /
hotā karita kāṃḍīṃ / ākāṃkṣecīṃ
aṃgatvacece velapallava / sparśāṃkurīṃ ghetī dhāṃva /
tetha bāṃbaḻa paḍe abhinava / vikārāṃceṃ
pāṭhīṃ rūpapatra pālovelīṃ / cakṣu lāṃba teṃ kāṃḍeṃ ghālī /
te veḻīṃ vyāmohatā bhalī / pāhāḻīṃ jāya
āṇi rasāceṃ āṃgavaseṃ / vāḍhatāṃ vegeṃ bahuvaseṃ /
jivhe ārtīcī asoseṃ / nighatī beṃceṃ
taiseṃci koṃbhaileni gaṃdheṃ / ghrāṇācī ḍirī thāṃbuṃ bāṃdhe /
tetha taḻu ghe svānaṃdeṃ / pralobhācā
evaṃ mahadahaṃbuddhi / maneṃ mahābhūtasamṛddhī /
iyā saṃsārāciyā avadhī / sāsanije
kiṃbahunā ihīṃ āṭheṃ / āṃgīṃ hā adhika phāṃṭe /
parī śiṃpīciyevaḍheṃ umaṭe / rupeṃ jevīṃ
kāṃ samudrāceni paisāreṃ / varī taraṃgatā āsāre /
taiseṃ brahmaci hoya vṛkṣākāreṃ / ajñānamūḻa
ātāṃ yācā hāci vistāru / hāci yayā paisāru /
jaisā āpaṇapeṃ svapnīṃ parivāru / yekākiyā
parī teṃ aso heṃ aiseṃ / kāvareṃ jhāḍa usase /
yayā mahadādi āravaseṃ / adhośākhā
āṇi aśvatthu aiseṃ yayāteṃ / mhaṇatī je jāṇate /
teṃhī parisa ho yetheṃ / sāṃgijaila
tarī śvaḥ mhaṇije ukhā / toṃvarī ekasārikhā /
nāhīṃ nirvāho yayā rukhā / prapaṃcarūpā
jaisā na loṭatāṃ kṣaṇu / meghu hoya nānāvarṇu /
kāṃ viju nase saṃpūrṇu / nimeṣabharī
nā kāṃpatayā padmadaḻā / varīliyā baisakā nāhīṃ jaḻā /
kāṃ citta jaiseṃ vyākuḻā / māṇusāceṃ
taisīci yayācī sthitī / nāsata jāya kṣaṇakṣaṇāpratī /
mhaṇauni yayāteṃ mhaṇatī / aśvatthu hā
āṇi aśvatthu yeṇeṃ nāṃveṃ / piṃpaḻu mhaṇatī svabhāveṃ /
parī to abhiprāya navhe / śrīharīcā
eऱhavīṃ piṃpaḻu mhaṇatāṃ vikhīṃ / miyāṃ gati dekhilī ase nikī /
parī teṃ aso kāya laukikīṃ / hetu kāja
mhaṇauni hā prastutu / alaukiku pariyesā graṃthu /
tarī kṣaṇikatveṃci aśvatthu / bolije hā
āṇīkuhī yeku thoru / yayā avyayatvācā ḍagaru /
āthī parī to bhītaru / aisā āhe
jaisā meghāṃceni toṃḍeṃ / siṃdhu eke āṃgeṃ kāḍhe /
āṇi nadī yerīkaḍe / bharitīca asatī
tetha vohaṭe nā caḍhe / aisā paripūrṇuci āvaḍe /
parī te phulī jaṃva nughaḍe / meghānadīṃcī
aiseṃ yā rukhāceṃ hoṇeṃ jāṇeṃ / na tarke hoteni vahilepaṇeṃ /
mhaṇauni yayāteṃ loku mhaṇe / avyayu hā
eऱhavīṃ dānaśīḻu puruṣu / veṃcakapaṇeṃci saṃcaku /
taisā vyayeṃci hā rukhu / avyayo game
jātāṃ vegeṃ bahuvaseṃ / na vace kāṃ bhūmīṃ rutaleṃ ase /
rathāceṃ cakra dise/ jiyāparī
taiseṃ kāḻātikrameṃ je vāḻe / te bhūtaśākhā jetha gaḻe/
tetha koḍīvarī umāḻe / uṭhatī āṇika
parī yekī kedhavāṃ gelī/ śākhākoḍī kedhavāṃ jālī /
heṃ neṇave jevīṃ umalalīṃ / āṣāḍhābhreṃ
mahākalpācyā śevaṭīṃ / udeliyā umaḻatī sṛṣṭī /
taiseṃci āṇikhīceṃ dāṃga uṭhī / sāsinnaleṃ
saṃhāravāteṃ pracaṃḍeṃ / paḍatī praḻayāṃtīṃcīṃ sālaḍeṃ /
taṃva kalpādīcīṃ juṃbāḍeṃ / pālhejatī
rige manvaṃtara manūpuḍheṃ / vaṃśāvarī vaṃśāṃce māṃḍe /
jaisī ikṣuvṛddhī kāṃḍeṃnakāṃḍeṃ / jiṃke jevīṃ
kaliyugāṃtīṃ koraḍīṃ / cahuṃ yugāṃcī sāleṃ sāṃḍī /
taṃva kṛtayugācī pelī devhaḍī / paḍe puḍhatī
vartateṃ varṣa jāye / teṃ puḍhilā muḻahārī hoye /
jaisā divasu jāta kīṃ yeta āhe / heṃ cojavenā
jaiśā vāriyācyā jhuḻakāṃ / sāṃdā ṭhāuvā navhe dekhā /
taisiyā uṭhatī paḍatī śākhā / neṇoṃ kitī
ekī dehācī ḍirī tuṭe / taṃva dehāṃkurīṃ bahuvī phuṭe /
aiseni bhavataru hā vāṭe / avyayo aisā
jaiseṃ vāhateṃ pāṇī jāya vegeṃ / taiseṃci āṇika miḻe māgeṃ /
yetha asaṃtaci asije jageṃ / mānije saṃta
kāṃ lāgoni ḍoḻāṃ ughaḍe / taṃva koḍīvarī ghaḍe moḍe /
neṇatayā taraṃgu āvaḍe / nityu aisā
vāyasā ekeṃ bubuḻeṃ dohīṃkaḍe / ḍoḻā cāḻītāṃ apāḍeṃ /
donhī āthī aisā paḍe / bhramu jevīṃ jagā
paiṃ bhiṃgorī nidhiye paḍalī / te game bhūmīsī jaisī jaḍalī /
aisā vegātiśayo bhulī / hetu hoya
heṃ bahu aso jhaḍatī / āṃdhāreṃ bhovaṃḍitāṃ kolatī /
te dise jaisī āyatī / cakrākāra
hā saṃsāravṛkṣu taisā / moḍatu māṃḍatu sahasā /
na dekhoni loku pisā / avyayo mānī
pari yayācā vegu dekhe / jo hā kṣaṇika aisā voḻakhe /
jāṇe koḍiveḻāṃ nimikheṃ / hota jāta
nāhīṃ ajñānāvāṃcūni mūḻa / yayāceṃ asileṃpaṇa ṭavāḻa /
aiseṃ jhāḍa sinasāḻa / dekhileṃ jeṇeṃ
tayāteṃ gā paṃḍusutā / mī sarvajñuhī mhaṇeṃ jāṇatā /
paiṃ vāgbrahma siddhāṃtā / vaṃdyu tocī
yogajātāceṃ joḍaleṃ / tayā ekāsīci upegā geleṃ /
kiṃbahunā jiyāleṃ / jñānahī tyācenī
heṃ aso bahu bolaṇeṃ / vānijaila to kavaṇeṃ /
jo bhavarukhu jāṇeṃ / ukhi aisā
maga yayāci prapaṃcarūpā / adhośākhiyā pādapā /
ḍāhāḻiyā jātī umapā / ūrdhvāhī ujū
āṇi adhīṃ phāṃkalī ḍāḻeṃ / tiye hotī mūḻeṃ /
tayāhī taḻīṃ paghaḻe / vela pālavu
aiseṃ jeṃ āmhīṃ / mhaṇitaleṃ upakramīṃ /
teṃhī pariseṃ sugamīṃ / bolīṃ sāṃgoṃ
tarī baddhamūḻa ajñāneṃ / mahadādikīṃ sāsineṃ /
vedāṃcīṃ thoravaneṃ / gheūniyāṃ
parī ādhīṃ taṃva svedaja / jāraja udbhija aṃḍaja /
he buḍauni mahābhuja / uṭhatī cārī
yayā ekaikāceni āṃgavaṭeṃ / cauryāṃśīṃ lakṣadhā phuṭe /
te veḻīṃ jīvaśākhīṃ phāṃṭe / saiṃdhaci hotī
prasavatī śākhā saraḻiyā / nānāsṛṣṭi ḍāhāḻiyā /
āḍa phuṭatī māḻiyā / jāticiyā
strī puruṣa napuṃsakeṃ / he vyaktibhedāṃce ṭake /
āṃdoḻatī āṃgikeṃ / vikārabhāreṃ
jaisā varṣākāḻu gaganīṃ / pālheje navaghanīṃ /
taiseṃ ākārajāta ajñānīṃ / velīṃ jāya
maga śākhāṃceni āṃgabhāreṃ / lavoni guṃphitī paraspareṃ /
guṇakṣobhāce vāre / udayajatī
tetha teṇeṃ acāṭeṃ / guṇāṃceni jhaḍajhaḍāṭeṃ /
tihīṃ ṭhāyīṃ hā phāṃṭe / ūrdhvamūḻa
aisā rajāciyā jhuḻukā / jhaḍāḍitāṃ āgaḻikā /
manuṣyajātī śākhā / thorāvatī
tiyā ūrdhvīṃ nā adhīṃ / mājhārīṃci koṃdākoṃdī /
āḍa phuṭatī khāṃdī / caturvarṇāṃcyā
tetha vidhiniṣedha sapallava / vedavākyāṃceṃ abhinava /
pālava ḍolatī barava / nīca nave
arthu kāmu pasare / agravaneṃ ghetī thāre /
tetha kṣaṇikeṃ padāṃtareṃ / ihabhogācīṃ
tetha pravṛttīceni vṛddhilobheṃ / khāṃkarejatī śubhāśubheṃ /
nānākarmāṃce khāṃbe / neṇoṃ kitī
tevīṃci bhogakṣīṇeṃ māgileṃ / paḍatī dehāṃtīṃcīṃ buḍasaḻeṃ /
taṃva puḍhāṃ vāḍhī pele / naveyā dehāṃcī
āṇi śabdādika suhāve / sahaja raṃgeṃ havāve /
viṣayapallava nave / nītya hotī
aise rajovāteṃ pracaṃḍeṃ / manuṣyaśākhāṃce māṃdoḍe /
vāḍhatī to etha ruḍhe / manuṣyaloku
taisāci to rajācā vārā / nāveka dharī vosarā /
maga vājoṃ lāge ghorā / tamācā to
tedhavāṃ yāciyā manuṣyaśākhā / nīca vāsanā adhīṃ dekhā /
palhejatī ḍāhāḻikā / kukarmāciyā
apravṛttīṃce khaṇuvāḻe / koṃbha nighatī saraḻe /
gheta pāna pālava ḍāḻe / pramādācīṃ
bolatī niṣedhaniyameṃ / jiyā ṛcā yajuḥsāmeṃ /
to pālā tayā ghumeṃ / ṭakeyāvarī
pratipāditī abhicāra / āgama je paramāra /
tihīṃ pānīṃ ghetī prasara / vāsanā velī
taṃva taṃva hotīṃ thorāḍeṃ / akarmāṃcīṃ taḻabuḍeṃ /
āṇi janmaśākhā puḍheṃ puḍheṃ / ghetī dhāṃva
tetha cāṃḍāḻādi nikṛṣṭā / doṣajātīcā thora phāṃṭā /
jāḻa paḍe karmabhraṣṭāṃ / bhuloniyāṃ
paśu pakṣī sūkara / vyāghra vṛścika vikhāra /
he āḍaśākhā prakāra / paisu ghetī
parī aiśā śākhā pāṃḍavā / sarvāṃgīṃhi nitya navā /
nirayabhoga yāvā / phaḻācā to
āṇi hiṃsāviṣayapuḍhārī / kukarmasaṃgeṃ dhura dhurī /
janmavarī āgārī / vāḍhatīci ase
aise hotī taru tṛṇa / loha loṣṭa pāṣāṇa /
iyā khāṃdiyā tevīṃ jāṇa / phaḻeṃhī heṃcī
arjunā gā avadhārīṃ / manuṣyālāgoni iyā parī /
vṛddhi sthāvarāṃtavarī / adhośākhāṃcī
mhaṇauni jīṃ manuṣyaḍāḻeṃ / tiyeṃ jāṇāvīṃ adhīṃci mūḻeṃ /
je ethūni hā paghaḻe / saṃsārataru
eऱhavīṃ ūrdhvīṃceṃ pārthā / muddala mūḻa pāhatāṃ /
adhīṃciyā madhyasthā / śākhā iyā
parī tāmasī sāttvikī / sukṛtaduṣkṛtātmakī /
viruḍhatī yā śākhīṃ / adhordhvīṃciyā
āṇi vedatrayāciyā pānā / naye anyatra lāgoṃ arjunā /
je manuṣyāvāṃcūni vidhānā / viṣaya nāhīṃ
mhaṇauni tanu mānuṣā / iyā ūrdhvamūḻauni jarī śākhā /
tarī karmavṛddhīsi dekhā / iyeṃci mūḻeṃ
āṇi ānīṃ tarī jhāḍīṃ / śākhā vāḍhatāṃ muḻeṃ gāḍhīṃ /
mūḻa gāḍheṃ taṃva vāḍhī / paisa āthī
taiseṃci iyā śarīrā / karma taṃva dehā saṃsārā /
āṇi deha taṃva vyāpārā / nā mhaṇoṃci naye
mhaṇauni deheṃ mānuṣeṃ / iyeṃ muḻeṃ hotī na cuke /
aiseṃ jagajjanakeṃ / bolileṃ teṇeṃ
maga tamāceṃ teṃ dāruṇa / sthirāvaleyā vāudhāṇa /
sattvācī suṭe satrāṇa / vāhuṭaḻī
taiṃ yāci manuṣyākārā / muḻīṃ suvāsanā nighatī ārā /
gheūni phuṭatī koṃbārā / sukṛtāṃkurīṃ
ukalateni unmekheṃ / prajñākuśalateṃcī tikheṃ /
ḍiriyā nighatī nimikheṃ / bābaḻaijunī
matīce soṭa vāṃve / ghālitī sphūrtīṃceni thāṃveṃ /
buddhi prakāśa ghe dhāṃve / vivekāvarī
tetha medhāraseṃ sagarbha / asthāpatrīṃ saboṃba /
saraḻa nighatī koṃbha / sadvṛttīce
sadācārāciyā sahasā / ṭakā uṭhatī bahuvasā /
ghumaghumiti ghoṣā / vedapadyācyā
śiṣṭāgamavidhāneṃ / vividhayāgavitāneṃ /
iye pānāvarī pāneṃ / pālejatī
aiśā yamadamīṃ ghoṃsāḻiyā / uṭhatī tapāciyā ḍāhāḻiyā /
detī vairāgyaśākhā koṃvaḻiyā / velhāḻapaṇeṃ
viśiṣṭāṃ vratāṃce phoka / dhīrācyā aṇagaṭī tikha /
janmavegeṃ ūrdhvamukha / uṃcāvatī
mājīṃ vedāṃcā pālā dāṭa / to karī suvidyecā jhaḍajhaḍāṭa /
jaṃva vāje acāṭa / sattvāniḻu to
tetha dharmaḍāḻa bāhāḻī / disatī janmaśākhā saraḻī /
tiyā āḍa phuṭatī phaḻīṃ / svargādikīṃ
puḍhāṃ uparati rāgeṃ lohivī / dharmamokṣācī śākhā pālavī /
pālhājata nitya navī / vāḍhatīci ase
paiṃ ravicaṃdrādi grahavara / pitṛ ṛṣī vidyādhara /
he āḍaśākhā prakāra / paisu ghetī
yāhīpāsūna uṃcavaḍeṃ / guḍhale phaḻāceni buḍeṃ /
iṃdrādika te māṃdoḍe / thora śākhāṃce
maga tayāṃhī uparī ḍāhāḻiyā / tapojñānīṃ uṃcāvaliyā /
marīci kaśyapādi iyā / uparī śākhā
evaṃ māḻovāḻī uttarottaru / ūrdhvaśākhāṃcā paisāru /
buḍīṃ sānā agrīṃ thoru / phaḻāḍhyapaṇeṃ
varī upariśākhāhī pāṭhīṃ / yetī phaḻabhāra je kirīṭī /
te brahmeśāṃta aṇagaṭīṃ / koṃbha nighatī
phaḻāceni vojhepaṇeṃ / ūrdhvīṃ vovāṃḍeṃ duṇeṃ /
jaṃva māghauteṃ baisaṇeṃ / mūḻīṃci hoya
prākṛtāhī tarī rukhā / jeṃ phaḻeṃ dāṭalīṃ hoya śākhā /
te vovāṃḍalī dekhā / buḍāsi ye
taiseṃ jethūni hā āghavā / saṃsāratarūcā uṭhāvā /
tiyeṃ mūḻīṃ ṭeṃkatī pāṃḍavā / vāḍhateni jñāneṃ
mhaṇauni brahmeśānāparauteṃ / vāḍhaṇeṃ nāhīṃ jīvāteṃ /
tethūni maga varauteṃ / brahmaci kīṃ
parī heṃ aso aiseṃ / brahmādika te āṃgavaseṃ /
ūrdhvamuḻāsariseṃ / na tukatī gā
āṇīkahī śākhā uparatā / jiyā sanakādika nāmeṃ vikhyātā /
tiyā phaḻīṃ mūḻīṃ nāḍaḻatā / bharaliyā brahmīṃ
aisī manuṣyāpāsūni jāṇāvī / ūrdhvīṃ brahmādiśeṣa pālavī /
śākhāṃcī vāḍhī baravī / uṃcāve paiṃ
pārthā ūrdhvīṃciyā brahmādi / manuṣyatvaci hoya ādi /
mhaṇauni iyeṃ adhīṃ / mhaṇitalīṃ mūḻeṃ
evaṃ tuja alaukiku / hā adhordhvaśākhu /
sāṃgitalā bhavarukhu / ūrdhvamūḻu
āṇi adhīṃcīṃ hīṃ mūḻeṃ / upapattī parisavilī savivaḻeṃ /
ātāṃ parisa unmūḻeṃ / kaiseni hā
parī tujhyā hana poṭīṃ / aiseṃ gamela kirīṭī /
je evaḍheṃ jhāḍa utpāṭī / aiseṃ kāyi ase ?
keṃ brahmayācyā śevaṭavarī / ūrdhva śākhāṃcī thorī /
āṇi mūḻa taṃva nirākārīṃ / ūrdhvīṃ ase
hā sthāvarāhī taḻīṃ / phāṃkata ase adhīṃcyā ḍāḻīṃ /
mājīṃ dhāṃvatase dujā mūḻīṃ / manuṣyarūpīṃ
aisā gāḍhā āṇi aphāṭu / ātāṃ koṇa karī yayā śevaṭu /
tarī jhaṇīṃ hā haḻuvaṭu / dharisī bhāvo
parī hā unmūḻāvayā doṣeṃ / yetha sāyāsaci kāyise /
kāya bāḻā bāgula deśeṃ / davaḍāvā āhe ?
gaṃdharvadurga kāyī pāḍāve / kāya śaśaviṣāṇa moḍāveṃ /
hoāveṃ maga toḍāveṃ / khapuṣpa kīṃ ?
taisā saṃsāru hā vīrā / rukha nāhīṃ sācokārā /
mā unmūḻaṇīṃ darārā / kāyisā tarī ?
āmhīṃ sāṃgitalī je parī / mūḻaḍāḻāṃcī ujarī /
te vāṃjhecīṃ gharabharī / lekureṃ jaiśīṃ
kaya kījatī ceilepaṇīṃ / svapnīṃcīṃ tiye bolaṇīṃ /
taiśī jāṇa te kāhāṇī / dugaḻīṃci te
vāṃcūni āmhīṃ nirūpileṃ jaiseṃ / yayāce acaḻa mūḻa ase taiseṃ /
āṇi taisāci jarī hā ase / sācokārā
tarī koṇāceni saṃtāneṃ / nipajatī tayā unmūḻaṇeṃ /
kāya phuṃkiliyā gaganeṃ / jāijela gā
mhaṇauni paiṃ dhanaṃjayā / āmhīṃ vānileṃ rūpa teṃ māyā /
kāsavīceni tupeṃ rāyā / vogarileṃ jaiseṃ
mṛgajaḻācīṃ gā taḻīṃ / tiye diṭhī durūni nyāhāḻīṃ /
vāṃcūni teṇeṃ pāṇiyeṃ sāḻī keḻī / lāvisī kāī ?
mūḻa ajñānaci taṃva laṭikeṃ / mā tayāceṃ kārya heṃ ketukeṃ /
mhaṇauni saṃsārarukha satukeṃ / vāvoci gā
āṇi aṃtu yayā nāhīṃ / aiseṃ bolije jeṃ kāṃhīṃ /
teṃhī sācaci pāhīṃ / yekeṃ parī
tarī prabodhu jaṃva nohe / taṃva nidre kāya aṃtu āhe ? /
kīṃ rātrī na sare taṃva na pāhe / tayā ārauteṃ ?
taisā jaṃva pārthā / viveku nudhavī māthā /
taṃva aṃtu nāhīṃ aśvatthā / bhavarūpā yā
vājateṃ vāreṃ nivāṃta / jaṃva na rāhe jethiṃceṃ tetha /
taṃva taraṃgatāṃ anaṃta / mhaṇāvīci kīṃ
mhaṇauni sūryu jaiṃ hārape / taiṃ mṛgajaḻābhāsu lope /
kāṃ prabhā jāya dīpeṃ / mālavaleni
taiseṃ mūḻa avidyā khāye / teṃ jñāna jaiṃ ubheṃ hoye /
taiṃci yayā aṃtu āhe / eऱhavīṃ nāhīṃ
tevīṃci hā anādī / aisī hī āthī śābdī /
to āḻu nohe anurodhī / bolāteṃ yā
jeṃ saṃsāravṛkṣācyā ṭhāyīṃ / sācokāra taṃva nāhīṃ /
mā nāhīṃ tayā ādi kāī / koṇa hoīla ?
jo sāca jethūni upaje / tayāteṃ ādi heṃ sāje /
ātāṃ nāhīṃci to mhaṇije / koṭhūniyāṃ ?
mhaṇauni janme nā āhe / aisiyā sāṃgoṃ kavaṇa māye /
yālāgīṃ nāhīṃpaṇeṃci hoye / anādi hā
vāṃjheciyā leṃkā / kaiṃcī janmapatrikā /
nabhīṃ niḻī bhūmikā / keṃ kalpūṃ pāṃ
vyomakusumāṃcā pāṃḍavā / kavaṇeṃ deṃṭhu toḍāvā /
mhaṇauni nāhīṃ aisiyā bhavā / ādi kaiṃcī ?
jaiseṃ ghaṭāceṃ nāhīṃpaṇa / asataci ase kelenivīṇa /
taisā samūḻa vṛkṣu jāṇa / anādi hā
arjunā aiseni pāhīṃ / ādyaṃtu yayāsi nāhīṃ /
mājīṃ sthitī ābhāse kāṃhīṃ / parī ṭavāḻa te
brahmagirīhūni na nige / āṇi samudrīṃhī kīra na rige /
mājīṃ dise vāugeṃ / mṛgāṃbu jaiseṃ
tesā ādyaṃtī kīra nāhīṃ / āṇi sācahī nohe kahīṃ /
parī laṭikepaṇācī navāī / paḍibhāse gā
nānā raṃgīṃ gajabaje / jaiseṃ iṃdradhanuṣya dekhije /
taisā neṇatayā āpaje / āhe aisā
aiseni sthitīciye veḻe / bhulavī ajñānāce ḍoḻe /
lāghavī harī mekhaḻe / loku jaisā
āṇi nasatīci śyāmikā / vyomīṃ dise taisī diso kāṃ /
tarī disaṇeṃhī kṣaṇā ekā / hoya jāya
svapnīṃhī mānileṃ laṭikeṃ / tarī nirvāho kāṃ ekasārikheṃ /
tevīṃ ābhāsu hā kṣaṇikeṃ / ritāci gā
dekhatāṃ āhe āvaḍeṃ / gheūṃ jāije tarī nātuḍe /
jaisā ṭiku kīje mākaḍeṃ / jaḻāmājīṃ
taraṃgabhaṃgu sāṃḍīṃ paḍe / vijūhī na pure hoḍe /
ābhāsāsi teṇeṃ pāḍeṃ / hoṇeṃ jāṇeṃ gā
jaisā grīṣmaśeṣīṃcā vārā / neṇije samora kīṃ pāṭhīmorā /
taisī sthitī nāhīṃ taruvarā / bhavarūpā yayā
evaṃ ādi nā aṃtu sthitī / nā rūpa yayāsi āthī /
ātāṃ kāyasī kuṃthākuṃthī / unmūḻaṇī gā
āpuliyā ajñānāsāṭhīṃ / navhatā thāṃvalā kirīṭī /
tarī ātāṃ ātmājñānācyā loṭīṃ / khāṃḍeni gā
vāṃcūṇi jñānevīṇa aikeṃ / upāya karisī jituke /
tihīṃ guṃphasi adhikeṃ / rukhīṃ iye
maga kitī khāṃdokhāṃdīṃ / yayā hiṃḍāveṃ ūrdhvīṃ adhīṃ /
mhaṇauni mūḻaci ajñāna chedīṃ / samyak jñāneṃ
eऱhavīṃ dorīciyā uragā / ḍāṃgā meḻavitāṃ paiṃ gā /
to śiṇuci vāugā / kelā hoya
tarāvayā mṛgajaḻācī gaṃgā / ḍoṇīlāgīṃ dhāṃvatāṃ dāṃgā- /
mājīṃ vohaḻeṃ buḍije paiṃ gā / sāca jevīṃ
tevīṃ nāthiliyā saṃsārā / upāīṃ jācatayā vīrā /
āpaṇapeṃ lope vārā / vikopīṃ jāya
mhaṇauni svapnīṃciyā ghāyā / okhada cevoci dhanaṃjayā /
tevīṃ ajñānamūḻā yayā / jñānaci khaḍga
parī teci līlā parajave / taiseṃ vairāgyāceṃ naveṃ /
abhaṃgabaḻa hoāveṃ / buddhīsī gā
uṭhaleni vairāgyeṃ jeṇeṃ / hā trivargu aisā sāṃḍaṇeṃ /
jaiseṃ vamuniyāṃ suṇeṃ / ātāṃci geleṃ
hā ṭhāyavarī pāṃḍavā / padārthajātīṃ āghavā /
viṭavī to hoāvā / vairāgya lāṭhu
maga dehāhaṃteceṃ daḻeṃ / sāṃḍūni ekeci veḻe /
pratyakbuddhī karataḻeṃ / hātavasāveṃ
nisaḻeṃ vivekasāhaṇeṃ / jeṃ brahmāhamasmibodheṃ saṇāṇeṃ /
maga purateni bodheṃ uṭaṇeṃ / ekaleci
parī niścayāceṃ muṣṭibaḻa / pāhāveṃ ekadonī veḻa /
maga tuḻāveṃ ati cokhāḻa / mananavarī
pāṭhīṃ hatiyerāṃ āpaṇayāṃ / nididhyāseṃ eka jāliyā /
puḍheṃ dujeṃ nurela ghāyā- / purateṃ gā
teṃ ātmajñānāceṃ khāṃḍeṃ / advaitaprabheceni vāḍeṃ /
nedīla uroṃ kavaṇekaḍe / bhavavṛkṣāsī
śaradāgamīṃcā vārā / jaisā keru pheḍī aṃbarā /
kā udayalā ravī āṃdhārā / ghoṃṭu bharī
nānā upavaḍha hotāṃ kheṃvo / nure svapnasaṃbhramācā ṭhāvo /
svapnapratītidhārecā vāho / karīla taiseṃ
tevhāṃ ūrdhvīṃceṃ mūḻa / kāṃ adhīṃceṃ hana śākhājāḻa /
teṃ kāṃhīṃci na dise mṛgajaḻa / cādiṇāṃ jevīṃ
aiseni gā vīranāthā / ātmajñānāciyā khaḍgalatā /
cheduniyā bhavāśvatthā / ūrdhvamūḻāteṃ
maga idaṃtesi vāḻaleṃ / jeṃ mīpaṇeṃvīṇa ḍāhāraleṃ /
teṃ rūpa pāhije āpaleṃ / āpaṇaci
parī darpaṇāceni ādhāreṃ / ekaci karūna dusareṃ /
mukha pāhātī gavhāreṃ / taiseṃ nako ho
heṃ pāhāṇeṃ aiseṃ ase vīrā / jaisā na boḍaliyā vihirā /
maga āpaliyā ugamīṃ jharā / bharoni ṭhāke
nātarī āṭaliyā aṃbha / nijabiṃbīṃ pratibiṃba /
nihaṭe kāṃ nabhīṃ nabha / ghaṭābhāvīṃ
nānā iṃdhanāṃśu saraleyā / vanhi parate jevīṃ āpaṇapayāṃ /
taiseṃ āpeṃāpa dhanaṃjayā / nyāhāḻaṇeṃ jeṃ gā
jivhe āpalī cavī cākhaṇeṃ / cakṣū nija bubuḻa dekhaṇeṃ /
āhe tayā aiseṃ nirīkṣaṇeṃ / āpuleṃ paiṃ
kāṃ prabhesi prabhā miḻe / gagana gaganāvarī loḻe /
nānā pāṇī bharaleṃ khoḻe / pāṇiyāciye
āpaṇaci āpaṇayāteṃ / pāhije jeṃ advaiteṃ /
teṃ aiseṃ hoya niruteṃ / bolijatu ase
jeṃ pāhijatenavīṇa pāhije / kāṃhīṃ neṇaṇāci jāṇije /
ādyapuruṣa kāṃ mhaṇije / jayā ṭhāyāteṃ
tethahī upādhīcā vothaṃbā / gheūni śruti ubhavitī jibhā /
maga nāmarūpācā vaḍaṃbā / karitī vāyāṃ
paiṃ bhavasvargā ubagale / mumukṣu yogajñānā vaḻaghale /
puḍhatī na yoṃ iyā nigāle / paijā jetha
saṃsārāciyā pāyāṃ puḍhāṃ / paḻatī vītarāga hoḍā /
olāṃḍoni brahmapadācā karmakaḍā / ghālitī māgāṃ
ahaṃtādibhāvāṃ āpuliyāṃ / jhāḍā deūni āghaveyā /
patra ghetī jñāniye jayā / mūḻagharāsī
paiṃ jethunī he evaḍhī / viśvaparaṃparecī velāṃḍī /
vāḍhatī āśā jaiśī koraḍī / nidaivācī
jiye kāṃ vastūceṃ neṇaṇeṃ / āṇileṃ thora jagā jāṇaṇeṃ /
nāhīṃ teṃ nāṃdavileṃ jeṇeṃ / mī tūṃ jagīṃ
pārthā teṃ vastu pahileṃ / āpaṇapeṃ āpuleṃ /
pāhije jaiseṃ hiṃvaleṃ / hiṃva hiṃveṃ
āṇīkahī eka tayā / voḻakhaṇa ase dhanaṃjayā /
tarī jayā kāṃ bheṭaliyā / yeṇeṃci nāhīṃ
parī tayā bheṭatī aiseṃ / je jñāneṃ sarvatra sarise /
mahāpraḻayāṃbūce jaiseṃ / bharalepaṇa
jayā puruṣāṃceṃ kāṃ mana / sāṃḍoni geleṃ moha māna /
varṣāṃtīṃ jaiseṃ ghana / ākāśāteṃ
nikavaḍyā niṣṭhurā / ubagije jevīṃ soyarā /
taiseṃ nāgavatī vikārāṃ / veṭāḻūṃ je
phaḻalī keḻī unmūḻe / taisī ātmalābheṃ prabaḻe /
tayācī kriyā ḍhāḻeṃḍhāḻeṃ / gaḻatī āhe
āgī lagaliyā rukhīṃ / dekhoni sairā paḻatī pakṣī /
taiseṃ sāṃḍileṃ aśekhīṃ / vikalpīṃ je
āikeṃ sakaḻa doṣatṛṇīṃ / aṃkurijatī jiye medinī /
tiye bhedabuddhīcī kāhāṇī / nāhīṃ jayāteṃ
sūryodayāsarisī / rātrī paḻoni jāya apaisī /
gelī dehāhaṃtā taisī / avidyesaveṃ
paiṃ āyuṣyahīnā jīvāteṃ / śarīra sāṃḍī jevīṃ avaciteṃ /
tevīṃ nidasureṃ dvaiteṃ / sāṃḍile je
lohāceṃ sāmkaḍeṃ parisā / na joḍe aṃdhāru ravi jaisā /
dvaitabuddhīcā taisā / sadā dukāḻa jayā
agā sukhaduḥkhākāreṃ / dvaṃdveṃ dehīṃ jiyeṃ gocareṃ /
tiyeṃ jayāṃ kāṃ samoreṃ / hotīcinā
svapnīṃceṃ rājya kāṃ maraṇa / nohe harṣaśokāṃsi kāraṇa /
upavaḍhaliyā jāṇa / jiyāparī
taisem sukhaduḥkharūpīṃ / dvaṃdvīṃ je puṇyapāpīṃ /
na ghepijatī sarpīṃ / garuḍa jaiseṃ
āṇi anātmavarganīra / sāṃḍūni ātmarasāceṃ kṣīra /
caratāti je savicāra / rājahaṃsu
jaisā varṣoni bhūtaḻīṃ / āpalā rasu aṃśumāḻī /
māgautā āṇī raśmijāḻīṃ / biṃbāsīci
taiseṃ ātmabhrāṃtīsāṭhīṃ / vastu vikhuralī bārāvāṭīṃ /
te ekavaṭitī jñānadṛṣṭī / akhaṃḍa je
kiṃbahunā ātmayācā / nirdhārīṃ viveku jayāṃcā /
buḍālā voghu gaṃgecā / siṃdhūmājīṃ jaisā
paiṃ āghaveṃci āpuleṃpaṇeṃ / nureci jayā abhilāṣaṇeṃ /
jaiseṃ yethūni paऱhāṃ jāṇeṃ / ākāśā nāhīṃ
jaisā agnīcā ḍoṃgaru / neghe koṇī bīja aṃkuru /
taisā manīṃ jayāṃ vikāru / udaijenā
jaisā kāḍhiliyā maṃdarācaḻu / rāhe kṣīrābdhi niścaḻu /
taisā nuṭhī jayāṃ saḻu / kāmormīcā
caṃdramā kaḻīṃ dhālā / na dise koṇeṃ āṃgī vosāvalā /
tevīṃ apekṣecā avakhaḻā / na paḍe jayāṃ
heṃ kitī bolūṃ asāṃgaḍeṃ / jevīṃ paramāṇu nure vāyūpuḍheṃ /
taiseṃ viṣayāṃceṃ nāvaḍe / nāṃvaci jayāṃ
evaṃ je je koṇī aise / kele jñānāgni hutāśeṃ /
te tetha miḻatī jaiseṃ / hemīṃ hema
tetha mhaṇije kavaṇeṃ ṭhāīṃ / aiseṃhī pusasī kāṃhīṃ /
tarī teṃ pada gā nāhīṃ / veṃcu jayā
dṛśyapaṇeṃ dekhije / kāṃ jñeyatveṃ jāṇije /
amukeṃ aiseṃ mhaṇije / teṃ jeṃ navhe
paiṃ dīpāciyā baṃbāḻīṃ / kāṃ caṃdra hana jeṃ ujaḻī /
heṃ kāya boloṃ aṃśumāḻī / prakāśī jeṃ
teṃ āghaveṃci disaṇeṃ / jayāceṃ kāṃ na dekhaṇeṃ /
viśva bhāsatase jeṇeṃ / lapālenī
jaiseṃ śiṃpīpaṇa hārape / taṃva taṃva khareṃ hoya rupeṃ /
kāṃ dorī lopatāṃ sāpeṃ / phāra hoije
taisīṃ caṃdrasūryādi thoreṃ / iyeṃ tejeṃ jiyeṃ phāreṃ /
tiyeṃ jayāceni ādhāreṃ / prakāśatī
te vastu kīṃ tejorāśī / sarvabhūtātmaka sarisī /
caṃdrasūryācyā mānasīṃ / prakāśe je
mhaṇauni caṃdrasūrya kaḍavasāṃ / paḍatī vastūcyā prakāśā /
yālāgīṃ teja jeṃ tejasā / teṃ vastūceṃ āṃga
āṇi jayācyā prakāśīṃ / jaga hārape caṃdrārkeṃsīṃ /
sacaṃdra nakṣatreṃ jaisīṃ / dinodayīṃ
nātarī prabodhaliye veḻe / te svapnīṃcī ḍiṃḍīmā māvaḻe /
kāṃ nureci sāṃjaveḻe / mṛgatṛṣṇikā
taisā jiye vastūcyā ṭhāyīṃ / koṇhīca kāṃ ābhāsu nāhīṃ /
teṃ mājheṃ nijadhāma pāhīṃ / pāṭāceṃ gā
puḍhatī je tetha gele / te na ghetī māghautīṃ pāuleṃ /
mahodadhīṃ kāṃ minale / srota jaise
kāṃ lavaṇācī kuṃjarī / sūdaliyā lavaṇasāgarīṃ /
hoyaci nā māghārī / paratī jaisī
nānā geliyā aṃtarāḻā / na yetīci vanhijvāḻā /
nāhīṃ taptalohauni jaḻā / nighaṇeṃ jevīṃ
tevīṃ majasīṃ ekavaṭa / je jāle jñāneṃ cokhaṭa /
tayāṃ punarāvṛttīcī vāṭa / moḍalī gā
tetha prajñāpṛthvīcā rāvo / pārthu mhaṇe jī jī pasāvo /
parī vinaṃtī ekī devo / citta detu
tarī deveṃsi svayeṃ eka hotī / maga māghaute je na yetī /
te deveṃsi bhinna āthī / kīṃ abhinna jī
jarī bhinnaci anādisiddha / tarī na yetī heṃ asaṃbaddha /
je phulāṃ geleṃ ṣaṭpada / te phuleṃci hotī pāṃ
paiṃ lakṣyāhūni anārise / bāṇa lakṣyīṃ śivoni jaiseṃ /
māgute paḍatī taise / yetīci te
nātarī tūṃci te svabhāveṃ / tarī koṇeṃ koṇāsi miḻāveṃ /
āpaṇayāsī āpaṇa rupāveṃ / śastreṃ kevīṃ ?
mhaṇauni tujasī abhinnāṃ jīvāṃ / tujhā saṃyogaviyogu devā /
naye boloṃ avayavāṃ / śarīreṃsīṃ
āṇi je sadāṃ vegaḻeṃ tujasīṃ / tayāṃ miḻaṇīṃ nāhīṃ koṇe divaśīṃ /
mā yetī na yetī he kāyasī / vāyabuddhi ?
tarī koṇa gā te tūṃteṃ / pāvoni na yetī māghaute /
heṃ viśvatomukhā māteṃ / bujhāvīṃ jī
iye ākṣepīṃ arjunācyā / to śiromaṇi sarvajñāṃcā /
toṣalā bodha śiṣyācā / dekhoniyāṃ
maga mhaṇe gā mahāmatī / māteṃ pāvoni na yetī puḍhatī /
te bhinnābhinna ritī / āhātī donī
jaiṃ vivekeṃ kholeṃ pāhije / tarī mī teci te sahajeṃ /
nā āhācavāhāca tarī duje / aisehī gamatī
jaise pāṇiyāvarī vegaḻa / taḻapatāṃ disatī kalloḻa /
eऱhavīṃ tarī nikhiḻa / pāṇīci teṃ
kāṃ suvarṇāhuni āneṃ / leṇīṃ gamatī bhinneṃ /
maga pāhije taṃva soneṃ / āghaveṃci teṃ
taiseṃ jñānāciye diṭhī / majasīṃ abhinnaci te kirīṭī /
yera bhinnapaṇa teṃ uṭhī / ajñānāstava
āṇi sācokāreni vastuvicāreṃ / kaiceṃ maja ekāsi dusareṃ /
bhinnābhinnavyavahāreṃ / umasijela
āghaveṃci ākāśa sūni poṭīṃ / biṃbaci jaiṃ āte khoṭī /
taiṃ pratibiṃba keṃ uṭhī / keṃ raśmi śire ?
kāṃ kalpāṃtīṃciyā pāṇiyā / kāya vota bharitī dhanaṃjayā ? /
mhaṇauni kaiṃceṃ aṃśa avikriyā / ekā maja
parī oghāceni meḻeṃ / pāṇī ujū parī vāṃkuḍeṃ jāleṃ /
ravī dujepaṇa āleṃ / toyabageṃ
.vyoma cauphaḻeṃ kīṃ vāṭoḻeṃ / heṃ aiseṃ kāyisayāhī miḻe /
parī ghaṭamaṭhīṃ veṃṭāḻeṃ / taiseṃhī āthī
hāṃ gā nidreceni ādhāreṃ / kāya ekaleni jaga na bhare ? /
svapnīṃceni jaiṃ avatare / rāyapaṇeṃ
kāṃ minaleni kiḍāḻeṃ / vānibhedāsi ye soḻeṃ /
taisā svamāye veṃṭāḻeṃ / śuddha jaiṃ mī
taiṃ ajñāna eka rūḍhe / teṇeṃ ko'haṃvikalpāceṃ māṃḍe /
maga vivarūni kīje phuḍeṃ / deho mī aiseṃ
aiseṃ śarīrāci yevaḍheṃ / jai ātmajñāna vegaḻeṃ paḍe /
taiṃ mājhā aṃśu āvaḍe / thoḍepaṇeṃ
samudra kāṃ vāyuvaśeṃ / taraṃgākāra ullaseṃ /
to samudrāṃśu aisā dise / sānivā jevīṃ
tevīṃ jaḍāteṃ jīvavitā / dehāhaṃtā upajavitā /
mī jīva gameṃ paṃḍusutā / jīvalokīṃ
paiṃ jīvāciyā bodhā / gocaru jo hā dhāṃdā /
to jīvalokaśabdā / abhiprāvo
agā upajaṇeṃ nimaṇeṃ / heṃ sācaci je kāṃ mānaṇeṃ /
to jīvaloku mī mhaṇe / saṃsāru hana
evaṃvidha jīvalokīṃ / tūṃ māteṃ aisā avalokīṃ /
jaisā caṃdru kāṃ udakīṃ / udakātīta
paiṃ kāśmīrācā ravā / kuṃkumāvarī pāṃḍavā /
āṇikā game lohivā / to tarī navhe
taiseṃ anādipaṇa na moḍe / mājheṃ akriyatva na khaṃḍe /
parī kartā bhoktā aiseṃ āvaḍe / te jāṇa gā bhrāṃtī
kiṃbahunā ātmā cokhaṭu / hoūni prakṛtīsī ekavaṭu /
bāṃdhe prakṛtidharmācā pāṭu / āpaṇapayāṃ
paiṃ manādi sāhī iṃdriyeṃ / śrotrādi prakṛtikāryeṃ /
tiyeṃ mājhīṃ mhaṇauni hoye / vyāpārārūḍha
jaiseṃ svapnīṃ parivrājeṃ / āpaṇapayāṃ āpaṇa kuṭuṃba hoīje /
maga tayāceni dhāṃvije / moheṃ sairā
taisā āpaliyā vismṛtī / ātmā āpaṇaci prakṛtī- /
sārikhā gamoni puḍhatī / tiyesīci bhaje
manācyā rathīṃ vaḻaghe / śravaṇāciyā dvāreṃ nighe /
maga śabdāciyā righe / rānāmājīṃ
toci prakṛtīcā vāgorā / tvaceciyā moharā /
āṇi sparśāciyā ghorā / vanā jāya
koṇe eke avasarīṃ / righoni netrācyā dvārīṃ /
maga rūpācyā ḍoṃgarīṃ / sairā hiṃḍe
kāṃ rasaneciyā vāṭā / nighoni gā subhaṭā /
rasācā darakuṭā / bharoṃci lāge
nātarī yeṇeṃci ghrāṇeṃ / jaiṃ dehāṃśu karī nighaṇeṃ /
maga gaṃdhācī dāruṇeṃ / āḍaveṃ laṃghī
aiseni deheṃdriyanāyakeṃ / dharūni mana javaḻikeṃ /
bhogijatī śabdādikeṃ / viṣayabharaṇeṃ
parī kartā bhoktā aiseṃ / heṃ jīvāce taiṃci dise /
jaiṃ śarīrīṃ kāṃ paise / ekādhiye
jaisā āthilā āṇi vilāsiyā / taiṃci voḻakhoṃ ye dhanaṃjayā /
jaiṃ rājasevyā ṭhāyā / vastīsi ye
taisā ahaṃkartṛtvācā vāḍhu / kāṃ viṣayeṃdriyāṃcā dhumāḍu /
hā jāṇije taiṃ nivāḍu / jaiṃ deha pāvije
athavā śarīrāteṃ sāṃḍī / taऱhī iṃdriyāṃcī tāṃḍī /
he āpaṇayāṃsaveṃ kāḍhī / gheūni jāya
jaisā apamānilā atithī / ne sukṛtācī saṃpatti /
kāṃ sāikhaḍeyācī gatī / sūtrataṃtū
nānā māvaḻateni tapaneṃ / neijetī lokāṃcīṃ darśaneṃ /
heṃ aso drutī pavaneṃ / neīje jaisī
tevīṃ manaḥṣaṣṭhāṃ yayāṃ / iṃdriyāṃteṃ dhanaṃjayā /
deharāju ne dehā- / pāsūni gelā
maga yetha athavā svargīṃ / jetha jeṃ deha āpaṃgī /
tetha taiseṃci puḍhatī pāṃgī / manādika
jaisā mālavaliyā divā / prabhesī jāya pāṃḍavā /
maga ujaḻije tetha tedhavāṃ / taisāci phāṃke
tarī aisaisiyā rāhāṭī / avivekiyāṃce diṭhī /
yetuleṃ heṃ kirīṭī / gameci gā
je ātmā dehāsi ālā / āṇi viṣayo yeṇeṃci bhogilā /
athavā dehoni gelā / heṃ sācaci mānitī
eऱhavīṃ yeṇeṃ āṇi jāṇeṃ / kāṃ karaṇeṃ hā bhogaṇeṃ /
heṃ prakṛtīceṃ teṇeṃ / māniyeleṃ
parī dehāce moṭakeṃ ubheṃ / āṇi cetanā tetha upalabhe /
tiye caḻavaḻeceni lobheṃ / ālā mhaṇatī
taiseṃci tayāṃ saṃgatī / iṃdriyeṃ āpulālyā arthīṃ vartatī /
tayā nāṃva subhadrāpatī / bhogaṇeṃ jayā
pāṭhīṃ bhogakṣīṇa āpaise / deha geliyā te na dise /
tetheṃ gelā gelā aiseṃ / bobhātī gā
paiṃ rukhu ḍolatu dekhāvā / tarī vārā vājatu mānāvā /
rukhu nase tetheṃ pāṃḍavā / nāhīṃ to gā ?
kāṃ ārisā samora ṭhevije / āṇi āpaṇapeṃ tetha dekhije /
tarī tedhavāṃci jāleṃ mānije / kāya ādhīṃ nāhīṃ ?
kāṃ paratā keliyā ārisā / lopu jālā tayā ābhāsā /
tarī āpaṇapeṃ nāhīṃ aisā / niścayo karāvā ?
śabda tarī ākāśācā / parī kapāḻīṃ piṭe meghācā /
kāṃ caṃdrīṃ vegu abhrācā / aropije
taiseṃ hoije jāije deheṃ / teṃ ātmasatte avikriye /
niṣṭaṃkitī gā moheṃ / āṃdhaḻe te
yetha ātmā ātmayācyā ṭhāyīṃ / dekhije dehīṃcā dharmu dehīṃ /
aiseṃ dekhaṇeṃ teṃ pāhīṃ / āna āhātī
jñāneṃ kāṃ jayāce ḍoḻe / dekhoni na rāhatī dehīṃce khoḻe /
sūryaraśmī āṇiyāḻe / grīṣmīṃ jaiseṃ
taise vivekāceni paiseṃ / jayāṃcī sphūrtī svarūpīṃ baise /
te jñāniye dekhatī aiseṃ / ātmayāteṃ
jaiseṃ tārāṃgaṇīṃ bharaleṃ / gagana samudrīṃ biṃbaleṃ /
parī teṃ tuṭoni nāhīṃ paḍileṃ / aiseṃ nivaḍe
gagana gaganīṃci āhe / heṃ ābhāse teṃ vāye /
taisā ātmā dekhatī deheṃ / gaṃvasilāhī
khaḻāḻācyā lagabagīṃ / pheḍūni khaḻāḻācyā bhāgīṃ /
dekhije caṃdrikā kāṃ ugī / caṃdrīṃ jevīṃ
kāṃ nāḍaraci bhare śoṣeṃ / sūryu to jaisā taisāci ase /
deha hotāṃ jātāṃ taiseṃ / dekhatī māteṃ
ghaṭu maṭhu ghaḍale / teci pāṭhīṃ moḍale /
parī ākāśa teṃ saṃcaleṃ / asataci ase
taiseṃ akhaṃḍe ātmasatte / ajñānadṛṣṭi kalpiteṃ /
heṃ dehaci hoteṃ jāteṃ / jāṇatī phuḍeṃ
caitanya caḍhe nā vohaṭe / ceṣṭavī nā ceṣṭe /
aiseṃ ātmajñāneṃ cokhaṭeṃ / jāṇatī te
āṇi jñānahī āpaiteṃ hoīla / prajñā paramāṇuhī ugāṇā gheīla /
sakaḻa śāstrāṃceṃ yeīla / sarvasva hātāṃ
parī te vyutpatti aisī / jarī virakti na rige mānasīṃ /
tarī sarvātmakā majasīṃ / navheci bheṭī
paiṃ toṃḍa bharo kāṃ vicārā / āṇi aṃtaḥkaraṇīṃ viṣayāṃsi thārā /
tarī nātuḍeṃ dhanurdharā / triśuddhī mī
hāṃ gā vosaṇatayācyā graṃthīṃ / kāī tuṭatī saṃsāraguṃtī ? /
kīṃ parivasiliyā pothī / vācilī hoya ?
nānā bāṃdhoniyāṃ ḍoḻe / ghrāṇīṃ lāvijatī muktāphaḻeṃ /
tarī tayāṃceṃ kāya kaḻe / mola māna ?
taisā cittīṃ ahaṃte ṭhāvo / āṇi jibhe sakaḻaśāstrāṃcā sarāvo /
aiseni koḍī eka janma jāvo / parī na pavije māteṃ
jo eka mī kāṃ samastīṃ / vyāpaku aseṃ bhūtajātīṃ /
aika tiye vyāptī / rūpa karūṃ
tarī sūryāsakaṭa āghavī / he viśvaracanā je dāvī /
te dīpti mājhī jāṇāvī / ādyaṃtīṃ āhe
jala śoṣūni geliyā savitā / olāṃśa puravītase je māghautā /
te caṃdrīṃ paṃḍusutā / jyosnā mājhī
āṇi dahana-pācanasiddhī / karītase jeṃ niravadhī /
te hutāśīṃ tejovṛddhī / mājhīci gā
mī rigāloṃ aseṃ bhūtaḻīṃ / mhaṇauni samudra mahājaḻīṃ /
he pāṃsūci ḍheṃpuḻī / virecinā
āṇī bhūteṃhī carācareṃ / he dharitase jiyeṃ apāreṃ /
tiyeṃ mīci dharī dhare / rigoniyāṃ
gaganīṃ mī paṃḍusutā / caṃdrāceni miseṃ amṛtā /
bharalā jāloṃ cālatā / sarovaru
tethūni phāṃkatī raśmikara / te pāṭa pelūni apāra /
sarvauṣadhīṃce āgara / bharita aseṃ mī
aiseni sasyādikāṃ sakaḻāṃ / karī dhānyajātī sukāḻā /
deṃ annadvārāṃ jivhāḻā / bhūtajātāṃ
āṇi nipajavileṃ anna / tarī taiseṃ kaiceṃ dīpana /
jeṇeṃ jirūni samādhāna / bhogitī jīva
mhaṇauni prāṇijātāṃcyā ghaṭīṃ / karūni kaṃdāvarī āgiṭhī /
dīpti jaṭharīṃhī kirīṭī / mīci jāloṃ
prāṇāpānācyā joḍabhātīṃ / phuṃkaphuṃkoniyāṃ ahorātī /
āṭītaseṃ neṇoṃ kitī / udarāmājīṃ
śuṣkeṃ athavā snigdheṃ / supakveṃ kāṃ vidagdheṃ /
parī mīci gā caturvidheṃ / anneṃ pacīṃ
evaṃ mīci āghaveṃ jana / janā niraviteṃ mīci jīvana /
jīvanīṃ mukhya sādhana / vanhihī mīci
ātāṃ aisiyāhīvarī kāī / sāṃgoṃ vyāptīcī navāī /
yetha dujeṃ nāhīṃci gheīṃ / sarvatra mī gā
tarī kaiseni pāṃ vekheṃ / sadā sukhiyeṃ ekeṃ /
ekeṃ tiyeṃ bahuduḥkheṃ / krāṃta bhūteṃ
jaisī sagaḻiye pāṭaṇīṃ / ekeṃci dīpeṃ divelāvaṇī /
jāliyā kāṃ na dekhaṇī / uralīṃ ekeṃ
aisī hana ukhivikhī / karita āhāsi mānasīṃ kīṃ /
tarī parisa tehī nikī / śaṃkā pheḍuṃ
paiṃ āghavā mīci aseṃ / yetha nāhīṃ kīra anāriseṃ /
parī prāṇiyāṃciyā ullāseṃ / buddhi aisā
jaiseṃ ekaci ākāśadhvanī / vādyaviśeṣīṃ ānānīṃ /
vājāveṃ paḍe bhinnīṃ / nādāṃtarīṃ
kāṃ lokaceṣṭīṃ vegaḻālāṃ / jo hā ekaci bhānu udailā /
to ānānī parī gelā / upayogāsī
nānā bījadharmānurūpa / jhāḍīṃ upajavileṃ āpa /
taiseṃ pariṇamaleṃ svarūpa / mājheṃ jīvāṃ
agā neṇā āṇi caturā / puḍhāṃ niḻayāṃcā dusarā /
neṇā sarpatveṃ jālā yerā / sukhālāgīṃ
heṃ aso svātīceṃ udaka / śuktīṃ motīṃ vyāḻīṃ vikha /
taisā sajñānāṃsī mī sukha / duḥkha toṃ ajñānāṃsī
eऱhavīṃ sarvāṃcyā hṛdayadeśīṃ / mī amukā āheṃ aisī /
je buddhi sphure aharniśīṃ / te vastu gā mī
parī saṃtāsaveṃ vasatāṃ / yogajñānīṃ paisatāṃ /
gurucaraṇa upāsitāṃ / vairāgyeṃsīṃ
yeṇeṃci satkarmeṃ / aśeṣahī ajñāna virame /
jayāṃceṃ ahaṃ viśrāme / ātmarūpīṃ
te āpeāpa dekhoni dekhīṃ / miyāṃ ātmeni sadā sukhī /
yetheṃ mīvāṃcūna avalokīṃ / āna hetu ase ?
agā sūryodayo jāliyā / sūryeṃ sūryaci pahāvā dhanaṃjayā /
tevīṃ māteṃ miyāṃ jāṇāvayā / mīci hetu
nā śarīraparāteṃ sevitāṃ / saṃsāragauravaci aikatāṃ /
dehīṃ jayāṃcī ahaṃtā / buḍoni ṭhelī
te svargasaṃsārālāgīṃ / dhāṃvatāṃ karmamārgīṃ /
duḥkhācyā selabhāgīṃ / vibhāgī hotī
parī heṃhī hoṇeṃ arjunā / majacistava tayā ajñānā /
jaisā jāgatāci hetu svapnā / nidreteṃ hoya
paiṃ abhreṃ divasu harapalā / tohi divaseṃci jāṇoṃ ālā /
tevīṃ mī neṇoni viṣayo dekhilā / majacistava bhūtīṃ
evaṃ nidrā kāṃ jāgaṇiyā / prabodhuci hetu dhanaṃjayā /
tevīṃ jñānā ajñānā jīvāṃ yāṃ / mīci mūḻa
jaiseṃ sarpatvā kāṃ dorā / doruci mūḻa dhanurdharā /
taisā jñānā ajñānāciyā saṃsārā / miyāṃci siddhu
mhaṇauni jaisā aseṃ taisayā / māteṃ neṇoni dhanaṃjayā /
vedu jāṇoṃ gelā taṃva tayā / jāliyā śākhā
tarī tihīṃ śākhābhedīṃ / mīci jāṇije triśuddhī /
jaisā pūrvāparā nadī / samudraci ṭhī
āṇi mahāsiddhāṃtāpāsīṃ / śruti hārapatīṃ śabdeṃsīṃ /
jaisiyā sagaṃdhā ākāśīṃ / vātalaharī
taiseṃ samastahī śrutijāta / ṭhāke lājile aiseṃ nivāṃta /
teṃ mīci karīṃ yathāvata / prakaṭoniyāṃ
pāṭhīṃ śrutisakaṭa aśeṣa / jaga hārape jetha niḥśeṣa /
teṃ nijajñānahī cokha / jāṇatā mīci
jaiseṃ nideliyā jāgije / tevhāṃ svapnīṃce kīra nāhīṃ dujeṃ /
parī ekatvahī dekhoṃ pāvije / āpaleṃci
taiseṃ āpaleṃ advayapaṇa / mī jāṇataseṃ dujenavīṇa /
tayāhī bodhākāraṇa / jāṇatā mīci
maga āgī lāgaliyā kāpurā / nā kājaḻī nā vaiśvānarā /
uraṇeṃ nāhīṃ vīrā / jayāparī
tevīṃ samūḻa avidyā khāye / teṃ jñānahī jaiṃ buḍoni jāye /
taऱhī nāhīṃ kīra nohe / āṇi na sāhe asaṇeṃhī
paiṃ viśva gheūni gelā māgeṃsīṃ / tayā corāteṃ kavaṇa keṃ giṃvasī ? /
je koṇī ekī daśā aisī / śuddha te mī
aisī jaḍājaḍavyāptī / rūpa karitāṃ kaivalyapatī /
ṭhī kelī nirupahitīṃ / āpulyā rūpīṃ
to āghavāci bodhu sahasā / arjunīṃ umaṭalā kaisā /
vyomīṃcā caṃdrodayo jaisā / kṣīrārṇavīṃ
kāṃ pratibhiṃtī cokhaṭe / samorīla citra umaṭe /
taisā arjuneṃ āṇi vaikuṃṭheṃ / nāṃdatase bodhu
tarī bāpa vastusvabhāvo / phāve taṃva taṃva goḍiye thāṃvo /
mhaṇauni anubhaviyāṃcā rāvo / arjuna mhaṇe
jī vyāpakapaṇa bolatāṃ / nirupādhika jeṃ ātāṃ /
svarūpa prasaṃgatā / bolile devo
te eka veḻa avyaṃgavāṇeṃ / kījo kāṃ majakāraṇeṃ /
tetha dvārakecā nāthu mhaṇe / bhaleṃ keleṃ
paiṃ arjunā āmhāṃhi vāḍeṃkoḍeṃ / akhaṃḍā boloṃ āvaḍe /
parī kāya kīje na joḍe / pusateṃ aiseṃ
āji manorathāṃsi phaḻa / joḍalāsi tūṃ kevaḻa /
je toṃḍa bharūni nikhaḻa / ālāsi pusoṃ
jeṃ advaitāhīvarī bhogije / teṃ anubhavīṃca tūṃ viraje /
pusoni maja mājheṃ / detāsi sukha
jaisā ārisā āliyā javaḻāṃ / dise āpaṇapeṃ āpalā ḍoḻā /
taisā saṃvādiyā tūṃ nirmaḻā / śiromaṇī
tuvāṃ neṇoni pusāveṃ / maga āmhī parisaūṃ baisāveṃ /
to gā hā pāḍu navhe / soyareyā
aiseṃ mhaṇauni āliṃgileṃ / kṛpādṛṣṭī avalokileṃ /
maga devo kāya bolile / arjuneṃsīṃ
paiṃ dohīṃ voṭhīṃ eka bolaṇeṃ / dohīṃ caraṇīṃ eka cālaṇeṃ /
taiseṃ pusaṇeṃ sāṃgaṇeṃ / tujheṃ mājheṃ
evaṃ āmhī tumhī yetheṃ / dekhāveṃ ekā arthāteṃ /
sāṃgateṃ pusateṃ yetheṃ / donhī eka
aisā bolata devo bhulalā moheṃ / arjunāteṃ āliṃgūni ṭhāye /
maga bihālā mhaṇe noheṃ / āvaḍī he
jāle ikṣurasāceṃ ḍhāḻa / tarī lavaṇa deṇeṃ kiḍāḻa /
je saṃvādasukhāceṃ rasāḻa / nāsela thiteṃ
ādhīṃca āmhāṃ yayā kāṃhīṃ / naranārāyaṇāsī bhinna nāhīṃ /
parī ātāṃ jiro mājhyā ṭhāīṃ / vegu hā mājhā
iyā buddhī sahasā / śrīkṛṣṇa mhaṇe vīreśā /
paiṃ gā to tuvāṃ kaisā / praśnu kelā ?
jo arjuna śrīkṛṣṇīṃ virata hotā / to paratoni māgutā /
praśnāvaḻīcī kathā / aikoṃ ālā
tetha sadgadeṃ boleṃ / arjuneṃ jī jī mhaṇitaleṃ /
nirupādhika āpuleṃ / rūpa sāṃgā
yayā bolā to śāraṅgī / teṃci sāṃgāvayālāgīṃ /
upādhī dohīṃ bhāgīṃ / nirūpīta ase
pusiliyā nirupahita / upādhi kāṃ sāṃge yetha /
heṃ koṇhāhī prastuta / game jarī
tarī tākāceṃ aṃśa pheḍaṇeṃ / yāci nāṃva loṇī kāḍhaṇeṃ /
cokhāciye śuddhī toḍaṇeṃ / kīḍaci jevīṃ
bābuḻīci sārāvī hāteṃ / parī pāṇī taṃva ase āiteṃ /
abhraci jāveṃ gagana teṃ / siddhaci kīṃ
varīla koṃḍiyācā guṃḍāḻā / jhāḍūni keliyā vegaḻā /
kaṇu ghetāṃ viraṃgoḻā / ase kāī ?
taisā upādhi upahitāṃ / śevaṭu jetha vicāritāṃ /
teṃ koṇāteṃhī na pusatāṃ / nirupādhika
jaiseṃ na sāṃgaṇeṃvarī / bāḻā patīsī rūpa karī /
bola nimālepaṇeṃ vivarī / acarcāteṃ
paiṃ sāṃgaṇeyā jogeṃ navhe / tethīṃceṃ sāṃgaṇeṃ aiseṃ āhe /
mhaṇauni upādhi lakṣmīnāhe / bolije ādīṃ
pāḍivyācī caṃdrarekhā / nirutī dāvāvayā śākhā /
dāvije tevīṃ aupādhikā / bolī iyā
maga to mhaṇe gā savyasācī / paiṃ iye saṃsārapāṭaṇīṃcī /
vastī sāviyā ṭāṃcī / dupuruṣīṃ
jaisī āghavāṃci gaganīṃ / nāṃdata divorātrī donhī /
taise saṃsāra rājadhānīṃ / donhīci he
āṇikahī tijā puruṣa āhe / parī to yā dohīṃceṃ nāṃva na sāhe /
jo udelā gāṃveṃsīṃ khāye / dohīṃteṃ yayāṃ
parī te taṃva goṭhī aso / ādhīṃ donhīṃcī he pariyesoṃ /
jeṃ saṃsāragrāmā vasoṃ / āle asatī
eka āṃdhaḻā veḍā paṃgu / yera sarvāṃgeṃ puratā cāṃgu /
parī grāmaguṇeṃ saṃgu / ghaḍalā doghāṃ
tayā ekā nāma kṣaru / yerāteṃ mhaṇatī akṣaru /
ihīṃ dohīṃci parī saṃsāru / koṃdalā ase
ātāṃ kṣaru to kavaṇu / akṣaru to kiṃ lakṣaṇu /
hā abhiprāyo saṃpūrṇu / vivaṃcūṃ gā
tarī mahadahaṃkārā- / lāguniyāṃ dhanurdharā /
tṛṇāṃtīṃcā pāṃgorā- / varī paiṃ gā
jeṃ kāṃhīṃ sāneṃ thora / cālateṃ athavā sthira /
kiṃbahunā gocara / manabuddhīṃsi jeṃ
jetuleṃ pāṃcabhautika ghaḍateṃ / jeṃ nāmarūpā sāṃpaḍateṃ /
guṇatrayācyā paḍateṃ / kāmaṭhāṃ jeṃ
bhūtākṛtīceṃ nāṇeṃ / ghaḍata bhāṃgāreṃ jeṇeṃ /
kāḻāsi jūṃ kheḻaṇeṃ / jihīṃ kavaḍāṃ
jāṇaṇeṃci viparīteṃ / jeṃ jeṃ kāṃhīṃ jāṇijeteṃ /
jeṃ pratikṣaṇīṃ nimateṃ / hoūniyāṃ
agā kāḍhūni bhrāṃtīce dāṃga / ubhavī sṛṣṭīceṃ āṃga /
heṃ aso bahu jaga / jayā nāma
paiṃ aṣṭadhā bhinna aiseṃ / jeṃ dāvileṃ prakṛtimiseṃ /
jeṃ kṣetradvārāṃ chattiseṃ / bhāgī keleṃ
heṃ māgīla sāṃgoṃ kitī / agā ātāṃci jeṃ prastutīṃ /
vṛkṣākāra rūpākṛtī / nirūpileṃ
teṃ āghaveṃci sākāreṃ / kalpunī āpaṇapayāṃ pure /
jāleṃ aseṃ tadanusāreṃ / caitanyaci
jaisā kuhāṃ āpaṇaci biṃbeṃ / siṃha pratibiṃba pāhatāṃ kṣobhe /
maga kṣobhalā samāraṃbheṃ / ghālī tetha
kāṃ salilīṃ asataci ase / vyomāvarī vyoma biṃbe jaiseṃ /
advaita hoūni taiseṃ / dvaita ghepe
arjunā gā yāparī / sākāra kalpūni purīṃ /
ātmā vismṛtīci karī / nidrā tetha
paiṃ svapnīṃ sejāra dekhije / maga pahuḍaṇeṃ jaiseṃ tetha kīje /
taiseṃ purīṃ śayana dekhije / ātmayāsī
pāṭhīṃ tiye nidreceni bhareṃ / mī sukhī duḥkhī mhaṇata ghoreṃ /
ahaṃmamateceni thoreṃ / vosaṇāyeṃ sādeṃ
hā janaku he mātā / hā mī gaura hīna puratā /
putra vitta kāṃtā / mājheṃ heṃ nā
aisiyā veṃghoni svapnā / dhāṃvata bhavasvargāciyā rānā /
tayā caitanyā nāma arjunā / kṣara puruṣu gā
ātāṃ aika kṣetrajñu yeṇeṃ / nāmeṃ jayāteṃ bolaṇeṃ /
jaga jīvu kāṃ mhaṇe / jiye daśeteṃ
jo āpuleni visareṃ / sarva bhūtatveṃ anukareṃ /
to ātmā bolije kṣareṃ / puruṣa nāmeṃ
je to vastusthitī puratā / mhaṇauni ālī puruṣatā /
varī dehapurīṃ nidaijatāṃ / puruṣanāmeṃ
āṇi kṣarapaṇācā nāthilā / āḻu yayā aiseni ālā /
je upādhīṃci ātalā / mhaṇauniyāṃ
jaisī khaḻāḻīciyā udakā- / sarasīṃ āṃdoḻe caṃdrikā /
taisā vikārāṃ aupādhikā / aisāci game
kāṃ khaḻāḻu moṭakā śoṣe / āṇi caṃdrikā taiṃ sarisīṃca bhraṃśe /
taisā upādhināśīṃ na dise / upādhiku
aiseṃ upādhīceni pāḍeṃ / kṣaṇikatva yāteṃ joḍe /
teṇeṃ khoṃkarapaṇeṃ ghaḍe / kṣara heṃ nāma
evaṃ jīvacaitanya āghaveṃ / heṃ kṣara puruṣa jāṇāveṃ /
ātāṃ rūpa karūṃ baraveṃ / akṣarāsī
tarī akṣaru jo dusarā / puruṣa paiṃ dhanurdharā /
to madhyasthu gā girivarāṃ / meru jaisā
je to pṛthvī pātāḻa svargīṃ / ihīṃ na bhede tihīṃ bhāgīṃ /
taisā dohīṃ jñānājñānāṃgīṃ / paḍenā jo
nā yathārthajñāneṃ eka hoṇeṃ / nā anyathātveṃ dujeṃ gheṇeṃ /
aiseṃ nikhiḻa jeṃ neṇaṇeṃ / teṃci teṃ rūpa
pāṃsutā niḥśeṣa jāye / nā ghaṭabhāṃḍādi hoye /
tayā mṛtpiṃḍā aiseṃ āhe / madhyastha jeṃ
paiṃ āṭoni geliyā sāgaru / maga taraṃgu nā nīru /
tayā aiśī anākāru / je daśā gā
pārthā jāgaṇeṃ tarī buḍe / parī svapnāceṃ kāṃhīṃ na māṃḍe /
taisiye nidre sāṃgaḍeṃ / nyāhāḻaṇeṃ jeṃ
viśva āghaveṃci māvaḻe / āṇi ātmabodhu tarī nujaḻe /
tiye ajñānadaśe kevaḻe / akṣaru nāma
sarvāṃ kaḻīṃ sāṃḍileṃ jaiseṃ / caṃdrapaṇa ure aṃvase/
rūpa jāṇāveṃ taiseṃ / akṣarāceṃ
paiṃ sarvopādhivināśeṃ/ he jīvadaśā jetha paise /
phaḻapākāṃta jaiseṃ / jhāḍa bījīṃ
taiseṃ upādhī upahita / thokoni ṭhāke jetha /
tayāteṃ avyakta / bolatī gā
ghana ajñāna suṣuptī / to bījabhāvo mhaṇatī /
yera svapna hana jāgṛtī / phaḻabhāvo tayācā
jayāsī kāṃ bījabhāvo / vedāṃtīṃ kelā aisā āvo /
to tayā puruṣā ṭhāvo / akṣarācā
jethūni anyathājñāna / phāṃkoni jāgṛti svapna /
nānābuddhīceṃ rāna / rigāleṃ ase
jīvatva jethunī kirīṭī / viśva uṭhataci uṭhī /
te ubhaya bhedāṃcī miṭhī / akṣaru puruṣu
yeru kṣara puruṣu kāṃ janīṃ / jihīṃ kheḻe jāgṛtīṃ svapnīṃ /
tiyā avasthā jo donhī / viyālā gā
paiṃ ajñānaghanasuṣuptī / aisaisī je kāṃ khyātī /
yā uṇī ekī prāptī / brahmācī je
sācaci puḍhatī vīrā / jarī na yetāṃ svapna jāgarā /
tarī brahmabhāvo sācokārā / mhaṇoṃ yetā
parī prakṛtipuruṣeṃ donī / abhreṃ jālīṃ jiyeṃ gaganīṃ /
kṣetrakṣetrajñu svapnīṃ / dekhilā jiyeṃ
heṃ aso adhośākhā / yā saṃsārarūpā rukhā /
mūḻa teṃ rūpa puruṣā / akṣarāceṃ
hā puruṣu kāṃ mhaṇije / je pūrṇapaṇeṃci nijeṃ /
paiṃ māyāpurīṃ pahuḍije / teṇeṃhī boleṃ
āṇi vikārāṃcī je vārī / te viparīta jñānācī parī /
neṇije jiye mājhārīṃ / te suṣuptī gā hā
mhaṇauni yayā āpaiseṃ / kṣaraṇeṃ yā nase /
āṇikeṃhī hā na nāśe / jñānāuṇeṃ
yālāgīṃ hā akṣaru / aisā vedāṃtīṃ ḍagaru /
kelā deśī thoru / siddhāṃtācyā
aiseṃ jīvakārya kāraṇa / jayā māyāsaṃguci lakṣaṇa /
akṣara puruṣu jāṇa / caitanya teṃ
ātāṃ anyathājñānīṃ / yā donī avasthā jayā janīṃ /
tayā harapatī ghanīṃ / ajñānatattvīṃ
teṃ ajñāna jñānīṃ buḍāliyā / jñāneṃ kīrtimukhatva keliyā /
jaisā vanhi kāṣṭha jāḻūniyāṃ / svayeṃ jaḻe
taiseṃ ajñāna jñāneṃ neleṃ / āpaṇa vastu deūni geleṃ /
aiseṃ jāṇaṇeṃnivīṇa uraleṃ / jāṇateṃ jeṃ
teṃ to gā uttama puruṣu / jo tṛtīya kāṃ niṣkarṣu /
dohīṃhūna āṇiku / māgilā jo
suṣuptīṃ āṇi svapnā- / pāsūni bahuveṃ arjunā /
jāgaṇeṃ jaiseṃ ānā / bodhāceṃci
kāṃ raśmī hana mṛgajaḻā- / pāsūni arkamaṃḍaḻā /
aphāṭu tevīṃ vegaḻā / uttamu gā
heṃ nā kāṣṭhīṃcā kāṣṭhāhunī / anārisā jaisā vanhī /
taisā kṣarākṣarāpāsunī / ānaci to
paiṃ grāsūni āpalī maryādā / eka karīta nadīnadāṃ /
uṭhī kalpāṃtīṃ udāvādā / ekārṇavācā
taiseṃ svapna nā suṣuptī / nā jāgarācī goṭhī āthī /
jaisī giḻilī divorātī / praḻayatejeṃ
maga ekapaṇa nā dujeṃ / aseṃ nāhīṃ heṃ neṇije /
anubhava nirbuje / buḍālā jetheṃ
aiseṃ āthi jeṃ kāṃhīṃ / teṃ to uttama puruṣu pāhīṃ /
jeṃ paramātmā ihīṃ / bolije nāmīṃ
teṃhī etha na misaḻatāṃ / bolaṇeṃ jīvatveṃ paṃḍusutā /
jaisī buḍaṇeyācī vārtā / thaḍiyecā kīje
taiseṃ vivekāciye kāṃṭhīṃ / ubheṃ ṭhākaliyā kirīṭī /
parāvarāciyā goṭhī / karaṇeṃ vedāṃ
mhaṇauni puruṣu kṣarākṣaru / donhī dekhoni avaru /
yāteṃ mhaṇatī paru / ātmarūpa
arjunā aisiyā parī / paramātmā śabdavarī /
sūcije gā avadhārīṃ / puruṣottamu
eऱhavīṃ na bolaṇeṃci bolaṇeṃ / jethiṃceṃ sarva neṇivā jāṇaṇeṃ /
kāṃhīṃca na honi hoṇeṃ / je vastu gā
so'haṃ teṃhī astavaleṃ / jetha sāṃgateṃci sāṃgaṇeṃ jāleṃ /
draṣṭatveṃsī geleṃ / dṛśya jetha
ātāṃ biṃbā āṇi pratibiṃbā- / mājīṃ kaiṃcī heṃ mhaṇoṃ naye prabhā ? /
jaऱhī kaiseni he lābhā / jāyeci nā
kāṃ ghrāṇā phulā dohīṃ / drutī ase je mājhārilāṃ ṭhāyīṃ /
te na dise tarī nāhīṃ / aiseṃ boloṃ naye
taiseṃ draṣṭā dṛśya heṃ jāye / maga koṇa mhaṇe kāya āhe /
heṃci anubhaveṃ teṃci pāheṃ / rūpa tayā
jo prakāśyeṃvīṇa prakāśu / īśitavyeṃvīṇa īśu /
āpaṇeṃnīci avakāśu / vasavīta ase jo
jo nādeṃ aikijatā nādu / svādeṃ cākhijatā svādu /
jo bhogijatase ānaṃdu / ānaṃdeṃci
jo pūrṇatecā pariṇāmu / puruṣu gā puruṣottamu /
viśrāṃtīcāhī viśrāmu / virālā jetheṃ
sukhāsi sukha joḍileṃ / jeṃ teja tejāsi sāṃpaḍaleṃ /
śūnyahī buḍāleṃ / mahāśūnyīṃ jiye
jo vikāsāhīvarī uratā / grāsāteṃhī grāsūni puratā /
jo bahuteṃ pāḍeṃ bahutāṃ- / pāsūni bahu
paiṃ neṇatayāpratī / rupepaṇācī pratītī /
rupeṃ na honi śuktī / dāvī jevīṃ
kāṃ nānā alaṃkāradaśe / soneṃ na lapata lapāleṃ ase /
viśva na honiyāṃ taiseṃ / viśva jo dharī
heṃ aso jalataraṃgā / nāhīṃ sinānepaṇa jevīṃ gā /
tevīṃ disatā prakāśu jagā / āpaṇaci jo
āpuliyā saṃkocavikāśā / āpaṇaci rūpa vīreśā /
hā jaḻīṃ caṃdra hana jaisā / samagra gā
taisā viśvapaṇeṃ kāṃhīṃ hoye / viśvalopīṃ kahīṃ na jāye /
jaisā rātrīṃ divaseṃ nohe / dvidhā ravi
taisā kāṃhīṃci koṇīkaḍe / kāyisenihi veṃcīṃ na paḍe /
jayāceṃ sāṃgaḍeṃ / jayāsīci
jo āpaṇapeṃci āpaṇayā / prakāśītase dhanaṃjayā /
kāya bahu boloṃ jayā / nāhīṃ dujeṃ
to gā mī nirupādhiku / kṣarākṣarottamu eku /
mhaṇauni mhaṇe veda loku / puruṣottamu
parī heṃ aso aisiyā / maja puruṣottamāteṃ dhanaṃjayā /
jāṇe jo pāhaleyā / jñānamitreṃ
ceiliyā āpuleṃ jñāna / jaiseṃ nāhīṃci hoya svapna /
taiseṃ sphurateṃ tribhuvana / vāvoṃ jāleṃ
kāṃ hātīṃ ghetaliyā māḻā / phiṭe sarpābhāsācā kāṃṭāḻā /
taisā mājheni bodheṃ ṭavāḻā / nāgave to
leṇeṃ soneṃci jo jāṇeṃ / to leṇeṃpaṇa teṃ vāvo mhaṇe /
tevīṃ mī jāṇoni jeṇeṃ / vāḻilā bhedu
maga mhaṇe sarvatra saccidānaṃdu / mīci eku svataḥsiddhu /
jo āpaṇenasīṃ bhedu / neṇoniyāṃ jāṇe
teṇeṃci sarva jāṇitaleṃ / heṃhī mhaṇaṇeṃ theṃkuleṃ /
je tayā sarva uraleṃ / dvaita nāhīṃ
mhaṇauni mājhiyā bhajanā / ucitu toci arjunā /
gagana jaiseṃ āliṃganā / gaganāciyā
kṣīrasāgarā paraguṇeṃ / kīje kṣīrasāgaracipaṇeṃ /
amṛtaci hoūni miḻaṇeṃ / amṛtīṃ jevīṃ
sāḍepaṃdharā misaḻāveṃ / taiṃ sāḍepaṃdhareṃci hoāveṃ /
tevīṃ mī jāliyā saṃbhave / bhakti mājhī
hāṃ gā siṃdhūsi ānī hotī / tarī gaṃgā kaiseni miḻatī ? /
mhaṇauni mī na hotāṃ bhaktī / anvayo āhe ?
aisiyālāgīṃ sarva prakārīṃ / jaisā kalloḻu ananyu sāgarīṃ /
taisā māteṃ avadhārīṃ / bhajinnalā jo
sūryā āṇi prabhe / ekavaṃkī jeṇeṃ lobheṃ /
to pāḍu mānūṃ lābhe / bhajanā tayā
evaṃ kathilayādārabhya / heṃ jeṃ sarva śāstraikalabhya /
upaniṣadāṃ saurabhya / kamaḻadaḻāṃ jevīṃ
heṃ śabdabrahmāceṃ mathiteṃ / śrīvyāsaprajñeceṃni hāteṃ /
mathuni kāḍhileṃ āyiteṃ / sāra āmhīṃ
je jñānāmṛtācī jāhnavī / je ānaṃdacaṃdrīṃcī satarāvī /
vicārakṣīrārṇavīṃcī navī / lakṣmī je he
mhaṇauni āpuleni padeṃ varṇeṃ / arthāceni jīveṃprāṇeṃ /
mīvāṃconi hoṃ neṇeṃ / āna kāṃhīṃ
kṣarākṣaratveṃ samora jāleṃ / tayāṃceṃ puruṣatva vāḻileṃ /
maga sarvasva maja didhaleṃ / puruṣottamīṃ
mhaṇauni jagīṃ gītā / miyāṃ ātmeni pativratā /
je he prastuta tuvāṃ ātāṃ / ākarṇilī
sācaci bolāceṃ navhe heṃ śāstra / paiṃ saṃsāru jiṇateṃ heṃ śastra /
ātmā avataravite maṃtra / akṣareṃ iyeṃ
parī tujapuḍhāṃ sāṃgitaleṃ / teṃ arjunā aiseṃ jāleṃ /
jeṃ gaupyadhana kāḍhileṃ / mājheṃ āji
maja caitanyaśaṃbhūcā māthāṃ / jo nikṣepu hotā pārthā /
tayā gautamu jālāsi āsthā- / nidhī tūṃ gā
cokhaṭivā āpuliyā / puḍhilā ugāṇā gheyāvayā /
tayā darpaṇācīci parī dhanaṃjayā / kelī āmhāṃ
kāṃ bharaleṃ caṃdratārāṃgaṇīṃ / nabha siṃdhū āpaṇayāmājīṃ āṇī /
taisā gītesīṃ mī aṃtaḥkaraṇīṃ / sūdalā tuvāṃ
je trividhamaḻikaṭā / tūṃ sāṃḍilāsi subhaṭā /
mhaṇauni gītesīṃ maja vasauṭā / jālāsi gā
parī heṃ boloṃ kāya gītā / je he mājhī unmeṣalatā /
jāṇe to samastā / mohā muke
sevilī amṛtasaritā / rogu davaḍūni paṃḍusutā /
amarapaṇa ucitāṃ / deūni ghālī
taisī gītā he jāṇitaliyā / kāya vismayo moha jāvayā /
parī ātmajñāneṃ āpaṇāpayāṃ / miḻije yetha
jayā ātmajñānācyā ṭhāyīṃ / karma āpuleyā jīvitā pāhīṃ /
hoūniyāṃ utarāī / layā jāya
harapaleṃ dāūni jaisā / māgu sare vīravilāsā /
jñānaci kaḻasa vaḻaghe taisā / karmaprāsādācā
mhaṇauni jñāniyā puruṣā / kṛtya karūṃ saraleṃ dekhā /
aisā anāthāṃcā sakhā / bolilā to
teṃ śrīkṛṣṇavacanāmṛta / pārthīṃ bharoni ase vosaṃḍata /
maga vyāsakṛpā prāpta / saṃjayāsī
to dhṛtarāṣṭra rāyā / sūtase pāna karāvayā /
mhaṇauni jīvitāṃtu tayā / noheci bhārī
eऱhavīṃ gītāśravaṇa avasarīṃ / āvaḍoṃ lāgatāṃ anadhikārī /
pari sekhīṃ teci ujarī / pātalā bhalī
jevhāṃ drākṣīṃ dūdha ghātaleṃ / tevhāṃ vāyāṃ geleṃ gamaleṃ /
parī phaḻapākīṃ duṇāvaleṃ / dekhije jevīṃ
taisī śrīharīvaktrīṃcīṃ akṣareṃ / saṃjayeṃ sāṃgitalīṃ ādareṃ /
tihīṃ aṃdhu tohī avasareṃ / sukhiyā jālā
teṃci maऱhāṭeni vinyāseṃ / miyāṃ unmeṣeṃ ṭhaseṃṭhoṃbaseṃ /
jī jāṇeṃ neṇeṃ taiseṃ / niropileṃ
sevaṃtīye arisi kāṃhīṃ / āṃga pāhatāṃ viśeṣu nāhīṃ /
parī saurabhya neleṃ tihīṃ / bhramarīṃ jāṇije
taiseṃ ghaḍateṃ prameya gheije / uṇeṃ teṃ maja deije /
jeṃ neṇaṇeṃ heṃci sahajeṃ / rūpa kīṃ bāḻā
tarī neṇateṃ jaऱhī hoye / taऱhī dekhoni bāpa kīṃ māye /
harṣa keṃhi na samāye / coja karitī
taiseṃ saṃta māhera mājheṃ / tumhī minaliyā mī lāḍaijeṃ /
teṃci graṃthāceni vyājeṃ / jāṇijo jī
ātāṃ viśvātmaku hā mājhā / svāmī śrīnivṛttirājā /
to avadhārū vā pūjā / jñānadevo mhaṇe
Original text: jñāneśvarī · Marathi Wikisource contributors · Sanskrit Wikisource · CC BY-SA 4.0