Jnaneshwari · Chapter 13

// ॐ śrī paramātmane namaḥ //
// atha śrīmadbhagavadgītā //
/ atha trayodaśo'dhyāyaḥ - adhyāya terāvā / /
/ kṣetrakṣetrajñayogaḥ /
ātmarūpa gaṇeśu keliyā smaraṇa / sakaḻa vidyāṃceṃ adhikaraṇa /
teci vaṃdūṃ śrīcaraṇa / śrīgurūṃce

jayāṃceni āṭhaveṃ / śabdasṛṣṭi āṃgave /
sārasvata āghaveṃ / jivhesi ye

vaktṛtvā goḍapaṇeṃ / amṛtāteṃ pārukheṃ mhaṇe /
rasa hotī voḻaṃgaṇeṃ / akśarāṃsī

bhāvāceṃ avataraṇa / avataravitī khūṇa /
hātā caḍhe saṃpūrṇa / tattvabheda

śrīgurūṃce pāya / jaiṃ hṛdaya giṃvasūni ṭhāya /
taiṃ yevaḍheṃ bhāgya hoya / unmekhāsī

te namaskārūni ātāṃ / jo pitāmahācā pitā /
lakṣmīyecā bhartā / aiseṃ mhaṇe

tarī pārthā parisije / deha heṃ kṣetra mhaṇije /
jo heṃ jāṇe to bolije / kṣetrajñu etheṃ

tari kṣetrajñu jo etheṃ / to mīci jāṇa niruteṃ /
jo sarva kṣetrāṃteṃ / saṃgoponi ase

kṣetra āṇi kṣetrajñāteṃ / jāṇaṇeṃ jeṃ niruteṃ /
jñāna aiseṃ tayāteṃ / mānūṃ āmhī

mayi cānanyayogena bhaktiravyabhicāriṇī /
viviktadeśasevitvamaratirjanasaṃsadi

adhyātmajñānanityatvaṃ tattvajñānārthadarśanam /
etadjñānamiti proktamajñānaṃ yadatonyathā

jñeyaṃ yattatpravakṣyāmi yajñātvā~mṛtamaśnute //
anādimatparaṃ brahma na sattannāsaducyate

sarvataḥ pāṇipādaṃ tatsarvato~kṣiśiromukham /
sarvataḥ śrutimalloke sarvamāvṛtya tiṣṭhati

sarvendriyaguṇābhāsaṃ sarvendriyavivarjitam /
asaktaṃ sarvabhṛccaiva nirguṇaṃ guṇabhoktṛ ca

bahirantaśca bhūtānāmacaraṃ carameva ca /
sūkṣamatvāttadavijñeyaṃ dūrasthaṃ cāntike ca tat

avibhaktaṃ ca bhūteṣu vibhaktamiva ca sthitaṃ /
bhūtabhartṛ ca tajñeyaṃ grasiṣṇu prabhaviṣṇu ca

jyotiṣāmapi tajjyotistamasaḥ paramucyate /
jñānaṃ jñeyaṃ jñānagamyaṃ hṛdi sarvasya visṭhitam

iti kṣetraṃ tathā jñānaṃ jñeyaṃ coktaṃ samāsataḥ /
madbhakta etadvijñāya madbhāvāyopapadyate

prakṛtiṃ puruṣaṃ caiva viddhyanādī ubhāvapi /
vikārāṃśca guṇāṃścaiva viddhi prakṛtisaṃbhavān

kāryakāraṇakartṛtve hetuḥ prakṛtirucyate /
puruṣaḥ sukhaduḥkhānāṃ bhoktṛtve heturucyate

puruṣaḥ prakṛtistho hi bhuṃkte prakṛtijānguṇān /
kāraṇaṃ guṇa saṃgo'sya sadasadyonijanmasu

upadraṣṭā'numantā ca bhartā bhoktā maheśvaraḥ /
paramātmeti cāpyukto dehe'smin puruṣaḥ paraḥ

ya evaṃ vetti puruṣaṃ prakṛtiṃ ca guṇaiḥ saha /
sarvathā vartamāno'pi na sa bhūyo'bhijāyate

dhyānenātmani paśyanti kecidātmānamātmanā /
anye sāṃkhyena yogena karmayogena cāpare

anye tvevamajānantaḥ śrutvā'nyebhya upāsate /
te'pi cātitaraṃtyeva mṛtyuṃ śrutiparāyaṇaḥ

yāvatsaṃjāyate kiṃcitsattvaṃ sthāvarajaṃgamam /
kṣetrakṣetrajñasaṃyogāttadviddhi bharatarṣabha

eka mhaṇatī heṃ sthaḻa / jīvāceṃci samūḻa /
maga prāṇa heṃ kūḻa / tayāceṃ etha

je prāṇāce gharīṃ / aṃgeṃ rābatī bhāū cārī /
āṇi manā aisā āvarī / kuḻavāḍīkaru

tayāteṃ iṃdriyabailāṃcī peṭī / na mhaṇe aṃvasīṃ pāhāṭīṃ /
viṣayakṣetrīṃ āṭī / kāḍhī bhalī

maga vidhīcī vāpha cukavī / āṇi anyāyāceṃ bīja vāphavī /
kukarmācā karavī / rābu jarī

tarī tayācisārikheṃ / asaṃbhaḍa pāpa pike /
maga janmakoṭī duḥkheṃ / bhogī jīvu

nātarī vidhīciye vāphe / satkriyā bīja ārope /
tarī janmaśatācīṃ māpeṃ / sukhaci mavīje

taṃva āṇika mhaṇatī heṃ navhe / heṃ jivāceṃci na mhaṇāveṃ /
āmuteṃ pusā āghaveṃ / kśetrāceṃ yā

aho jīvu etha ukhitā / vastīkaru vāṭe jātāṃ /
āṇi prāṇu hā balautā / mhaṇauni jāge

anādi je prakṛtī / sāṃkhya jiyeteṃ gātī /
kṣetra he vṛttī / tiyecī jāṇā

āṇi iyeteṃci āghavā / āthī gharameḻāvā /
mhaṇauni te vāhivā / gharīṃ vāhe

vāhyāciye rahāṭī / je kāṃ muddala tighe iye sṛṣṭīṃ /
te iyecyāci poṭīṃ / jahāle guṇa

rajoguṇa perī / tetuleṃ sattva soṃkarī /
maga ekaleṃ tama karī / saṃvagaṇī

racūni mahattattvāceṃ khaḻeṃ / maḻī eke kāḻugeni poḻeṃ /
tetha avyaktācī miḻe / sāṃja bhalī

taṃva ekīṃ mativaṃtīṃ / yā bolāciyā khaṃtīṃ /
mhaṇitaleṃ yā jñaptī / arvācīnā

hāṃ ho paratattvāāṃtu / keṃ prakṛtīcī mātu /
hā kṣetra vṛttāṃtu / ugeṃci āikā

śūnyasejeśāliye / sulīnateciye tuḻiye /
nidrā kelī hotī baḻiyeṃ / saṃkalpeṃ yeṇeṃ

to avasāṃta ceilā / udyamīṃ sadaiva bhalā /
mhaṇauni ṭhevā joḍalā / icchāvaśeṃ

nirālaṃbīṃcī vāḍī / hotī tribhuvanāyevaḍhī /
he tayāciye joḍī / rūpā ālī

maga mahābhūtāṃceṃ ekavāṭa / sairā veṃṭāḻūni bhāṭa /
bhūtagrāmāṃce āghāṭa / cirile cārī

yāvarī ādī / pāṃcabhūtikāṃcī māṃdī /
bāṃdhalī prabhedīṃ / paṃcabhūtikīṃ

karmākarmāce guṃḍe / bāṃdha ghātale dohīṃkaḍe /
napuṃsakeṃ baraḍeṃ / rāneṃ kelīṃ

tetha yerajhārelāgīṃ / janmamṛtyūcī suraṃgī /
suhāvilī nilāgī / saṃkalpeṃ yeṇeṃ

maga ahaṃkārāsi ekalādhī / karūni jīvitāvadhī /
vahāvileṃ buddhi / carācara

yāparī nirāḻīṃ / vāḍhe saṃkalpācī ḍāhāḻī /
mhaṇauni to muḻīṃ / prapaṃcā yayā

yāparī mattamugutakīṃ / tetha paḍighāyileṃ āṇikīṃ /
mhaṇatī hāṃ ho vivekīṃ / kaiseṃ tumhī

paratattvāciyā gāṃvīṃ / saṃkalpaseja dekhāvī /
tarī kāṃ pāṃ na manāvī / prakṛti tayācī ?

pari aso heṃ navhe / tumhī yā na lagāveṃ /
ātāṃci heṃ āghaveṃ / sāṃgijaila

tarī ākāśīṃ kavaṇeṃ / kelīṃ meghācīṃ bharaṇeṃ /
aṃtarikṣa tārāṃgaṇeṃ / dharī kavaṇa ?

gaganācā taḍāvā / koṇeṃ veḍhilā kedhavāṃ /
pavanu hiṃḍatu asāvā / heṃ kavaṇāceṃ mata ?

romāṃ kavaṇa perī / siṃdhū kavaṇa bharī /
parjanyāciyā karī / dhārā kavaṇa ?

taiseṃ kṣetra heṃ svabhāveṃ / he vṛttī kavaṇācī navhe /
heṃ vāhe tayā phāve / yerāṃ tuṭe

taṃva āṇikeṃ ekeṃ / kṣobheṃ mhaṇitaleṃ nikeṃ /
tarī bhogije ekeṃ / kāḻeṃ kevīṃ heṃ ?

tarī yayācā māru / dekhatāti anivāru /
parī svamatīṃ bharu / abhimāniyāṃ

heṃ jāṇoṃ mṛtyu rāgiṭā / siṃhāḍayācā darakuṭā /
parī kāya vāṃjaṭā / pūrijata ase ?

mahākalpāparautīṃ / kava ghālūni avacitīṃ /
satyalokabhadrajātī / āṃgīṃ vāje

lokapāḻa nitya nave / diggajāṃce meḻāve /
svargīṃciye āḍave / rigoni moḍī

yera yayāceni aṃgavāteṃ / janmamṛtyūciye garteṃ /
nirjiveṃ hoūni bhramateṃ / jīvamṛgeṃ

nyāhāḻīṃ pāṃ kevhaḍā / pasaralāse cavaḍā /
jo karūniyāṃ mājivaḍā / ākāragaju

mhaṇauni kāḻācī sattā / hāci bolu nirutā /
aise vāda paṃḍusutā / kṣetrālāgīṃ

he bahu ukhivikhī / ṛṣīṃ kelī naimiṣīṃ /
purāṇeṃ iyeviṣīṃ / matapatrikā

anuṣṭubhādi chaṃdeṃ / prabaṃdhīṃ jeṃ vividheṃ /
te patrāvalaṃbana madeṃ / karitī ajhunī

vedīṃceṃ bṛhatsāmasūtra / jeṃ dekhaṇepaṇeṃ pavitra /
parī tayāhī heṃ kṣetra / neṇaveci

āṇīka āṇīkīṃhī bahutīṃ / mahākavīṃ hetumaṃtīṃ /
yayālāgīṃ matī / veṃciliyā

parī aiseṃ heṃ evaḍheṃ / kīṃ amukeyāceṃci phuḍeṃ /
heṃ koṇāhī varapaḍeṃ / hoyacinā

ātāṃ yāvarī jaiseṃ / kṣetra heṃ ase /
tuja sāṃgoṃ taiseṃ / sādyaṃtu gā

tari mahābhūtapaṃcaku / āṇi ahaṃkāru eku /
buddhi avyakta daśaku / iṃdriyāṃcā

mana āṇīkahī eku / viṣayāṃcā daśaku /
sukha duḥkha dveṣu / saṃghāta icchā

āṇi cetanā dhṛtī / evaṃ kṣetravyaktī /
sāṃgitalī tujapratī / āghavīcī

ātāṃ mahābhūteṃ kavaṇeṃ / kavaṇa viṣayo kaisīṃ karaṇe /
heṃ vegaḻālepaṇeṃ / ekaika sāṃgoṃ

tarī pṛthvī āpa teja / vāyu vyoma iyeṃ tuja /
sāṃgitalīṃ bujha / mahābhūteṃ pāṃceṃ

āṇi jāgatiye daśe / svapna lapāleṃ ase /
nātarī aṃvase / caṃdra gūḍhu

nānā aprauḍhabāḻakīṃ / tāruṇya rāhe thokīṃ /
kāṃ na phulatāṃ kaḻikīṃ / āmodu jaisā

kiṃbahunā kāṣṭhīṃ / vanhi jevīṃ kirīṭī /
tevīṃ prakṛticiyā poṭīṃ / gopyu jo ase

jaisā jvaru dhātugatu / apathyāceṃ miṣa pahātu /
maga jāliyā āṃtu / bāherī vyāpī

taisī pāṃcāṃhī gāṃṭhīṃ paḍe / jaiṃ dehākāru ughaḍe /
taiṃ nācavī cahūṃkaḍe / to ahaṃkāru gā

navala ahaṃkārācī goṭhī / viśeṣeṃ na lage ajñānāpāṭhīṃ /
sajñānāce jhoṃbe kaṃṭhīṃ / nānā saṃkaṭīṃ nācavī

ātāṃ buddhi je mhaṇije / te aiśiyāṃ cinhīṃ jāṇije /
bolileṃ yadurājeṃ / teṃ āikeṃ sāṃgoṃ

tarī kaṃdarpāceni baḻeṃ / iṃdriyavṛttīceni meḻeṃ /
vibhāṃḍūni yetī pāḻe / viṣayāṃce

to sukhaduḥkhāṃcā nāgovā / jetha ugāṇoṃ lāge jīvā /
tetha dohīṃsī baravā / pāḍu je dharī

heṃ sukha heṃ duḥkha / heṃ puṇya heṃ doṣa /
kāṃ heṃ maiḻa heṃ cokha / aiseṃ je nivaḍī

jithe adhamottama sujhe / jiye sāneṃ thora bujhe /
jiyā diṭhī pārakhije / viṣo jīveṃ

je tejatattvāṃcī ādī / je sattvaguṇācī vṛddhī /
je ātmayā jīvācī saṃdhī / vasavīta ase je

arjunā te gā jāṇa / buddhi tūṃ saṃpūrṇa /
ātāṃ āikeṃ voḻakhaṇa / avyaktācī

paiṃ sāṃkhyāṃciyā siddhāṃtīṃ / prakṛtī je mahāmatī /
teci etheṃ prastutīṃ / avyakta gā

āṇi sāṃkhyayogamateṃ / prakṛtī parisavilī tūṃteṃ /
aisī dohīṃ parīṃ jetheṃ / vivaṃcilī

tetha dujī je jīvadaśā / tiye nāṃva vīreśā /
yetha avyakta aisā / paryāvo hā

taऱhī pāhālayā rajanī / tārā lopatī gaganīṃ /
kāṃ hārapeṃ astamānīṃ / bhūtakriyā

nātarī deho geliyā pāṭhīṃ / dehādika kirīṭī /
upādhi lape poṭīṃ / kṛtakarmācyā

kāṃ bījamudreāṃtu / thoke taru samastu /
kāṃ vastrapaṇe taṃtu- / daśe rāhe

taise sāṃḍoniyāṃ sthūḻadharma / mahābhūteṃ bhūtagrāma /
layā jātī sūkṣma / hoūni jethe

arjunā tayā nāṃveṃ / avyakta heṃ jāṇāveṃ /
ātāṃ āikeṃ āghaveṃ / iṃdriyabheda

tarī śravaṇa nayana / tvacā ghrāṇa rasana /
iyeṃ jāṇeṃ jñāna- / karaṇeṃ pāṃceṃ

iye tattvameḻāpaṃkīṃ / sukhaduḥkhāṃcī ukhivikhī /
buddhi karite mukhīṃ / pāṃceṃ ihīṃ

maga vācā āṇi kara / caraṇa āṇi adhodvāra /
pāyu he prakāra / pāṃca āṇika

karmeṃdriyeṃ mhaṇipatī / tīṃ iyeṃ jāṇijatī /
āikeṃ kaivalyapatī / sāṃgatase

paiṃ prāṇācī aṃtaurī / kriyāśakti je śarīrīṃ /
tiyeci riginigī dvārīṃ / pāṃce ihīṃ

evaṃ dāhāhī karaṇeṃ / sāṃgitalīṃ devo mhaṇe /
parisa ātāṃ phuḍepaṇeṃ / mana teṃ aiseṃ

jeṃ iṃdriyāṃ āṇi buddhi / mājhāriliye saṃdhīṃ /
rajoguṇācyā khāṃdīṃ / taraḻata ase

nīḻimā aṃbarīṃ / kāṃ mṛgatṛṣṇālaharī /
taiseṃ vāyāṃci pharārī / vāvo jāhaleṃ

āṇi śukraśoṇitācā sāṃdhā / miḻatāṃ pāṃcāṃcā bāṃdhā /
vāyutattva daśadhā / ekaci jāhaleṃ

maga tihīṃ dāhe bhāgīṃ / dehadharmācyā khaivaṃgīṃ /
adhiṣṭhileṃ āṃgīṃ / āpulālyā

tetha cāṃcalya nikhaḻa / ekaleṃ ṭheleṃ niḍhāḻa /
mhaṇauni rajāceṃ baḻa / dharileṃ teṇeṃ

teṃ buddhīsi bāherī / ahaṃkārācyā urāvarī /
aisāṃ ṭhāyīṃ mājhārīṃ / baḻiyāvaleṃ

vāyāṃ mana heṃ nāṃva / eऱhavīṃ kalpanāci sāveva /
jayāceni saṃgeṃ jīva- / daśā vastu

jeṃ pravṛttīsi mūḻa / kāmā jayāce baḻa /
jeṃ akhaṃḍa sūye chaḻa / ahaṃkārāsī

jeṃ iccheteṃ vāḍhavī / āśeteṃ caḍhavī /
jeṃ pāṭhī puravī / bhayāsi gā

dvaita jetheṃ uṭhī / avidyā jeṇeṃ lāṭhī /
jeṃ iṃdriyāṃteṃ loṭī / viṣayāṃmajī

saṃkalpeṃ sṛṣṭī ghaḍī / saveṃci vikalpūni moḍī /
manorathāṃcyā utaraṃḍī / utarī racī

jeṃ bhulīceṃ kuhara / vāyutattvāceṃ aṃtara /
buddhīceṃ dvāra / jhākavileṃ jeṇeṃ

teṃ gā kirīṭī mana / yā bolā nāhīṃ āna /
ātāṃ viṣayābhidhāna / bhedū āikeṃ

tarī sparśu āṇi śabdu / rūpa rasu gaṃdhu /
hā viṣayo paṃcavidhu / jñāneṃdriyāṃcā

ihīṃ pāṃcaiṃ dvārīṃ / jñānāsi dhāṃva bāherī /
jaisā kāṃ hirave cārīṃ / bhāṃbāve paśu

maga svara varṇa visargu / athavā svīkāra tyāgu /
saṃkramaṇa utsargu / viṇmūtrācā

he karmeṃdriyāṃce pāṃca / viṣaya gā sāca /
je bāṃdhoniyāṃ māca / kriyā dhāṃve

aise he dāhī / viṣaya gā iye dehīṃ /
ātāṃ icchā tehī / sāṃgijaila

tari bhūtaleṃ āṭhave / kāṃ boleṃ kāna jhāṃkave /
aisiyāvari cetave / je gā vṛttī

iṃdriyāviṣayāṃciye bheṭī- / sarasīca je gā uṭhī /
kāmācī bāhuṭī / dharūniyāṃ

jiyeceni uṭhilepaṇeṃ / manā saiṃgha dhāvaṇeṃ /
na rigāveṃ tetha karaṇeṃ / toṃḍeṃ sutī

jiye vṛttīciyā āvaḍī / buddhī hoya veḍī /
viṣayāṃ jiyā goḍī / te gā icchā

āṇī icchiliyā sāṃgaḍeṃ / iṃdriyāṃ āmiṣa na joḍe /
tetha joḍe aisā jo ḍāvo paḍe / toci dveṣu

ātāṃ yāvarī sukha / teṃ evaṃvidha dekha /
jeṇeṃ ekeṃci aśekha / visare jīvu

manā vāce kāye / jeṃ āpulī āṇa vāye /
dehasmṛtīcī trāye / moḍita jeṃ ye

jayāceni jālepaṇeṃ / pāṃguḻā hoīje prāṇeṃ /
sāttvikāsī duṇeṃ / varīhī lābhu

kāṃ āghaviyāci iṃdriyavṛttī / hṛdayāciyā ekāṃtīṃ /
thāpaṭūni suṣuptī / āṇī jeṃ gā

kiṃbahunā soye / jīva ātmayācī lāhe /
tetha jeṃ hoye / tayā nāma sukha

āṇi aisī he avasthā / na joḍatāṃ pārthā /
jeṃ jīje teṃci sarvathā / duḥkha jāṇe

teṃ manorathasaṃgeṃ navhe / eऱhavīṃ siddhī geleṃci āhe /
he donīci upāye / sukhaduḥkhāsī

ātāṃ asaṃgā sākṣibhūtā / dehīṃ caitanyācī je sattā /
tiye nāma paṃḍusutā / cetanā yetheṃ

je nakhauni keśavarī / ubhī jāge śarīrīṃ /
je tihīṃ avasthāṃtarī / pālaṭenā

manabuddhyādi āghavīṃ / jiyeceni ṭavaṭavīṃ /
prakṛtivanamādhavīṃ / sadāṃci je

jaḍājaḍīṃ aṃśīṃ / rāhāṭe je sarisī /
te cetanā gā tujasī / laṭikeṃ nāhīṃ

paiṃ rāvo parivāru neṇe / ājñāci paracakra jiṇe /
kāṃ caṃdrāceni pūrṇapaṇeṃ / siṃdhū bharatī

nānā bhrāmakāceṃ sannidhāna / loho karī sacetana /
kāṃ sūryasaṃgu jana / ceṣṭavī gā

agā mukha meḻeṃviiṇa / piliyāceṃ poṣaṇa /
karī nirīkṣaṇa / kūrmī jevīṃ

maga tiyeteṃ cetanā / mhaṇipe paiṃ arjunā /
ātāṃ dhṛtivivaṃcanā / bhedu āika

tarī bhūtāṃ paraspareṃ / ughaḍa jāti svabhāvavaireṃ /
navhe pṛthvīteṃ nīreṃ / na nāśije ?

nīrāteṃ āṭī teja / tejā vāyūsi jhuṃja /
āṇi gagana taṃva sahaja / vāyū bhakṣī

tevīṃci koṇehī veḻe / āpaṇa kāyisayāhī na miḻe /
āṃtu rigoni vegaḻeṃ / ākāśa heṃ

aisīṃ pāṃcahī bhūteṃ / na sāhatī ekamekāṃteṃ /
kīṃ tiyeṃhī aikyāteṃ / dehāsī yetī

dvaṃdvācī ukhivikhī / soḍūni vasatī ekīṃ /
ekekāteṃ pokhī / nijaguṇeṃ gā

aiseṃ na miḻe tayāṃ sājaṇeṃ / caḻe dhairyeṃ jeṇeṃ /
tayāṃ nāṃva mhaṇeṃ / dhṛtī mī gā

āṇi jīveṃsī pāṃḍavā / yā chattisāṃcā meḻāvā /
to hā etha jāṇāvā / saṃghātu paiṃ gā

evaṃ chattīsahī bheda / sāṃgitale tuja viśada /
yayā yetuliyāteṃ prasiddha / kṣetra mhaṇije

rathāṃgāṃcā meḻāvā / jevīṃ rathu mhaṇije pāṃḍavā /
kāṃ adhordhva avevāṃ / nāṃva deho

karīturaṃgasamājeṃ / senā nāma niphaje /
kāṃ vākyeṃ mhaṇipatī puṃje / akṣarāṃce

kāṃ jaḻadharāṃcā meḻā / vācya hoya ābhāḻā /
nānā lokāṃ sakaḻāṃ / nāma jaga

kāṃ snehasūtravanhī / meḻu ekici sthānīṃ /
dharije to janīṃ / dīpu hoya

taisīṃ chattīsahī iyeṃ tattveṃ / miḻatī jeṇeṃ ekatveṃ /
teṇeṃ samūha paratveṃ / kṣetra mhaṇipe

āṇi vāhateni bhautikeṃ / pāpa puṇya yetheṃ pike /
mhaṇauni āmhī kautukeṃ / kṣetra mhaṇoṃ

āṇi ekāceni mateṃ / deha mhaṇatī yayāteṃ /
parī aso heṃ anaṃteṃ / nāmeṃ yayā

paiṃ paratattvāārauteṃ / sthāvarāāṃtauteṃ /
jeṃ kāṃhīṃ hoteṃ jāteṃ / kṣetraci heṃ

pari sura nara uragīṃ / ghaḍata āhe yonivibhāgīṃ /
teṃ guṇakarmasaṃgīṃ / paḍileṃ sāteṃ

heci guṇavivaṃcanā / puḍhāṃ mhaṇipaila arjunā /
prastuta ātāṃ tuja jñānā / rūpa dāvūṃ

kṣetra taṃva savistara / sāṃgitaleṃ savikāra /
mhaṇauni ātāṃ udāra / jñāna āikeṃ

jayā jñānālāgīṃ / gagana giḻitātī yogī /
svargācī āḍavaṃgī / umaraḍoni

na karitī siddhīcī cāḍa / na dharitī ṛddhīcī bhīḍa /
yogāseṃ duvāḍa / heḻasitī

tapodurgeṃ volāṃḍita / kratukoṭi vovāṃḍita /
ulathūni sāṃḍita / karmavallī

nānā bhajanamārgī / dhāṃvata ughaḍiyā āṃgīṃ /
eka rigatāti suraṃgīṃ / suṣumneciye

aisī jiye jñānīṃ / munīśvarāṃcī utānhī /
vedatarūcyā pānovānīṃ / hiṃḍatātī

deīla gurusevā / iyā buddhi pāṃḍavā /
janmaśatāṃcā sāṃḍovā / ṭākita je

jayā jñānācī rigavaṇī / avidye uṇeṃ āṇī /
jīvā ātmayā bujhāvaṇī / māṃḍūni de

jeṃ iṃdriyāṃcīṃ dvāreṃ āḍī / pravṛttīce pāya moḍī /
jeṃ dainyaci pheḍī / mānasāceṃ

dvaitācā dukāḻu pāhe / sāmyāceṃ suyāṇeṃ hoye /
jayā jñānācī soye / aiseṃ karī

madācā ṭhāvoci pusī / jeṃ mahāmohāteṃ grāsī /
nedī āpaparu aisī / bhāṣa uroṃ

jeṃ saṃsārāteṃ unmūḻī / saṃkalpapaṃku pākhāḻī /
anāvarāteṃ veṃṭāḻī / jñeyāteṃ jeṃ

jayāceni jālepaṇeṃ / pāṃguḻā hoīje prāṇeṃ /
jayāceni viṃdāṇeṃ / jaga heṃ ceṣṭeṃ

jayāceni ujāḻeṃ / ughaḍatī buddhīce ḍoḻe /
jīvu doṃdāvarī loḻe / ānaṃdāciyā

aiseṃ jeṃ jñāna / pavitraikanidhāna /
jetha viṭāḻaleṃ mana / cokha kīje

ātmayā jīvabuddhī / je lāgalī hotī kṣayavyādhī /
te jayāciye sannidhī / nirujā kīje

teṃ anirūpya kīṃ nirūpije / aikatāṃ buddhī āṇije /
vāṃcūni ḍoḻāṃ dekhije / aiseṃ nāhīṃ

maga teci iye śarīrīṃ / jaiṃ āpulā prabhāvo karī /
taiṃ iṃdriyāṃciyā vyāpārīṃ / ḍoḻāṃhi dise

paiṃ vasaṃtāceṃ rigavaṇeṃ / jhāḍāṃceni sājepaṇeṃ /
jāṇije tevīṃ karaṇeṃ / sāṃgatī jñāna

agā vṛkṣāsi pātāḻīṃ / jaḻa sāṃpaḍe muḻīṃ /
teṃ śākhāṃciye bāhāḻīṃ / bāhera dise

kāṃ bhūmīceṃ mārdava / sāṃge koṃbhācī lavalava /
nānā ācāragaurava / sukulīnāceṃ

athavā saṃbhramāciyā āyatī / sneho jaisā ye vyaktii /
kāṃ darśanāciye praśastīṃ / puṇyapuruṣa

nātarī keḻīṃ kāpūra jāhalā / jevīṃ parimaḻeṃ jāṇoṃ ālā /
kāṃ bhiṃgārīṃ dīpu ṭhevilā / bāherī phāṃke

taiseṃ hṛdayīṃceni jñāneṃ / jiyeṃ dehīṃ umaṭatī cinheṃ /
tiyeṃ sāṃgoṃ ātāṃ avadhāneṃ / cāgeṃ āika

tarī kavaṇehī viṣayīṃceṃ / sāmya hoṇeṃ na ruce /
saṃbhāvitapaṇāceṃ / vojhe jayā

āthileci guṇa vānitāṃ / mānyapaṇeṃ mānitāṃ /
yogyateceṃ yetāṃ / rūpa āṃgā

taiṃ gajabajoṃ lāge kaisā / vyādheṃ ruṃdhalā mṛgu jaisā /
kāṃ bāhīṃ taratāṃ vaḻasā / dāṭalā jevīṃ

pārthā teṇeṃ pāḍeṃ / sanmāneṃ jo sāṃkaḍe /
garimeteṃ āṃgākaḍe / yevoṃci nedī

pūjyatā ḍoḻāṃ na dekhāvī / svakīrtī kānīṃ nāyakāvī /
hā amukā aisī nohāvī / seci lokāṃ

tetha satkārācī keṃ goṭhī / keṃ ādarā deīla bheṭī /
maraṇeṃsīṃ sāṭī / namaskāritāṃ

vācaspatīceni pāḍeṃ / sarvajñatā tarī joḍe /
parī veḍivemājīṃ daḍe / mahamebheṇeṃ

cāturya lapavī / mahattva hāravī /
pisepaṇa miravī / āvaḍoni

laukikācā udvegu / śāstrāṃvarī ubagu /
ugepaṇīṃ cāṃgu / āthī bharu

jageṃ avajñāci karāvī / saṃbaṃdhīṃ soyaci na dharāvī /
aisī aisī jīvīṃ / cāḍa bahu

taḻauṭepaṇa bāṇe / āṃgīṃ hiṇāvo khevaṇeṃ /
teṃ teṃci karaṇeṃ / bahutakarunī

hā jītu nā nohe / loka kalpī yeṇeṃ bhāveṃ /
taiseṃ jiṇeṃ hoāveṃ / aisī āśā

pai cālatu kāṃ nohe / kīṃ vāreni jātu āhe /
janā aisā bhramu jāye / taiseṃ hoīje

mājheṃ asatepaṇa lopo / nāmarūpa hārapo /
maja jhaṇeṃ vāsipo / bhūtajāta

aisīṃ jayācīṃ navasiyeṃ / jo nitya ekāṃtā jātu jāye /
nāmeṃci jo jiye / vijanāceni

vāyū āṇi tayā paḍe / gaganeṃsīṃ boloṃ āvaḍe /
jīveṃ prāṇeṃ jhāḍeṃ / paḍhiyaṃtīṃ jayā

kiṃbahunā aisīṃ / cinheṃ jayā dekhasī /
jāṇa tayā jñāneṃsīṃ / śeja jāhalī

paiṃ amānitva puruṣīṃ / teṃ jāṇāveṃ ihīṃ miṣīṃ /
ātāṃ adaṃbhāciyā voḻakhīsī / saurasu devoṃ

tarī adaṃbhitva aiseṃ / lobhiyāceṃ mana jaiseṃ /
jīvu jāvo parī numase / ṭhevilā ṭhāvo

tayāparī kirīṭī / paḍilāhī prāṇasaṃkaṭīṃ /
tarī sukṛta na prakaṭī / āṃgeṃ boleṃ

khaḍāṇeṃ ālā pānhā / paḻavī jevīṃ arjunā /
kāṃ lapavī paṇyāṃganā / vaḍilapaṇa

āḍhyu ātuḍe āḍavīṃ / maga āḍhyatā jevīṃ hāravī /
nātarī kuḻavadhū lapavī / avevāṃteṃ

nānā kṛṣīvaḻu āpuleṃ / pāṃghuravī perileṃ /
taiseṃ jhāṃkī nipajaleṃ / dānapuṇya

varivarī deho na pūjī / lokāṃteṃ na raṃjī /
svadharmu vāgdhvajīṃ / bāṃdhoṃ neṇe

paropakāru na bole / na miravī abhyāsileṃ /
na śake vikūṃ joḍaleṃ / sphītīsāṭhīṃ

śarīra bhogākaḍe / pāhatāṃ kṛpaṇu āvaḍe /
eऱhavīṃ dharmaviṣayīṃ thoḍeṃ / bahu na mhaṇe

gharīṃ dise sāṃkaḍa / dehīṃcī āyatī roḍa /
parī dānīṃ jayā hoḍa / suratarūsīṃ

kiṃbahunā svadharmīṃ thoru / avasarīṃ udāru /
ātmacarce caturu / eऱhavī veḍā

keḻīceṃ daḻavāḍeṃ / haḻū pokaḻa āvaḍe /
parī phaḻoniyāṃ gāḍheṃ / rasāḻa jaiseṃ

kāṃ meghāṃceṃ āṃga jhīla / dise vāreni jaiseṃ jāīla /
parī varṣatī navala / ghanavaṭa teṃ

taisā jo pūrṇapaṇīṃ / pāhatāṃ dhātī āyaṇī /
eऱhavīṃ tarī vāṇī / toci ṭhāvo

heṃ aso yā cinhāṃcā / naṭanācu ṭhāyīṃ jayācyā /
jāṇa jñāna tayācyā / hātāṃ caḍheṃ

paiṃ gā adaṃbhapaṇa / mhaṇitaleṃ teṃ heṃ jāṇa /
ātāṃ āīka khūṇa / ahiṃsecī

tarī ahiṃsā bahutīṃ parīṃ / bolilī ase avadhārīṃ /
āpulāliyā matāṃtarīṃ / nirūpilī

parī te aisī dekhā / jaiśā khāṃḍūniyāṃ śākhā /
maga tayāciyā buḍukhā / kūṃpa kīje

kāṃ bāhu toḍoni pacavije / maga bhūkecī pīḍā rākhije /
nānā deūḻa moḍoni kīje / pauḻī devā

taisī hiṃsāci karūni ahiṃsā / niphajavije hā aisā /
paiṃ pūrvamīmāṃsā / nirṇo kelā

je avṛṣṭīceni upadraveṃ / gādaleṃ viśva āghaveṃ /
mhaṇauni parjanyeṣṭī karāve / nānā yāga

taṃva tiye iṣṭīciyā buḍīṃ / paśuhiṃsā rokaḍī /
maga ahiṃsecī thaḍī / kaiṃcī dise ?

perije nusadhī hiṃsā / tetha ugavaila kāya ahiṃsā ? /
parī navala bāpā dhiṃvasā / yā yājñikāṃcā

āṇi āyurvedu āghavā / to yāca mohorā pāṃḍavā /
je jīvākāraṇeṃ karāvā / jīvaghātu

nānā rogeṃ āhāḻalīṃ / loḻatīṃ bhūteṃ dekhilīṃ /
te hiṃsā nivārāvayā kelī / cikitsā kāṃ

taṃva te cikitse pahileṃ / ekāce kaṃda khaṇavile /
ekā upaḍavileṃ / samūḻīṃ sapatrīṃ

ekeṃ āḍa moḍavilī / ajaṃgamācī khāla kāḍhavilī /
ekeṃ garbhiṇī ukaḍavilī / puṭāmājīṃ

ajātaśatru taruvarāṃ / sarvāṃgīṃ devavilyā śirā /
aise jīva gheūni dhanurdharā / koraḍe kele

āṇi jaṃgamāhī hāta / lāūni kāḍhileṃ pitta /
maga rākhile śiṇata / āṇika jīva

aho vasatīṃ dhavaḻāreṃ / moḍūni kelīṃ devhāreṃ /
nāgavūni vevhāreṃ / gavāṃdī ghātalī

mastaka pāṃghuravileṃ / taṃva taḻavaṭīṃ ughaḍeṃ paḍaleṃ /
ghara moḍoni kele / māṃḍava puḍheṃ

nānā pāṃghuraṇeṃ / jāḻūni jaiseṃ tāpaṇeṃ /
jāleṃ āṃgadhuṇeṃ / kuṃjarāceṃ

nātarī baila vikūni goṭhā / puṃsā lāvoni bāṃdhije gāṃṭhā /
iyā karaṇī kīṃ ceṣṭā ? / kāi hasoṃ

ekīṃ dharmāciyā vāhaṇī / gāḻūṃ ādarileṃ pāṇī /
taṃva gāḻitayā āhāḻaṇīṃ / jīva mele

eka na pacavitīci kaṇa / iye hiṃsece bheṇa /
tetha kadarthale prāṇa / teci hiṃsā

evaṃ hiṃsāci ahiṃsā / karmakāṃḍīṃ hā aisā /
siddhāṃtu sumanasā / voḻakheṃ tūṃ

pahileṃ ahiṃseceṃ nāṃva / āmhīṃ keleṃ jaṃva /
taṃva sphūrti bāṃdhalī hāṃva / iye matī

tari kaiseni iyeteṃ gāḻāveṃ / mhaṇauni paḍileṃ bolāveṃ /
tevīṃci tuvāṃhī jāṇāveṃ / aisā bhāvo

bahutakarūni kirīṭī / hāci viṣo iye goṭhī /
eऱhavī kāṃ āḍavāṭīṃ / dhāvijaila gā ?

āṇi svamatāciyā nirdhārā- / lāgoniyāṃ dhanurdharā /
prāptāṃ matāṃtarāṃ / nirvecu kīje

aisī he avadhārīṃ / nirūpitī parī /
ātāṃ yayāvarī / mukhya jeṃ gā

teṃ svamata bolijaila / ahiṃse rūpa kijaila /
jeṇeṃ uṭhaliyā āṃtula / jñāna dise

parii teṃ adhiṣṭhileni āṃgeṃ / jāṇije ācarateni bageṃ /
jaisī kasavaṭī sāṃge / vāniyāteṃ

tarī taraṃgu nolāṃḍitu / laharī pāyeṃ na phoḍitu /
sāṃcalu na moḍitu / pāṇiyācā

vegeṃ āṇi lesā / diṭhī ghālūni āṃvisā /
jaḻīṃ baku jaisā / pāula suye

kāṃ kamaḻāvarī bhramara / pāya ṭhevitī haḻuvāra /
kucuṃbaila kesara / iyā śaṃkā

taise paramāṇu pāṃ guṃtale / jāṇūni jīva sānule /
kāruṇyāmājīṃ pāuleṃ / lapavūni cāle

te vāṭa kṛpecī karitu / te diśāci sneha bharitu /
jīvātaḻīṃ āṃtharitu / āpulā jīvu

aisiyā jatanā / cālaṇeṃ jayā arjunā /
heṃ anirvācya parimāṇā / purijenā

paiṃ mohāceni sāṃgaḍeṃ / lāsī pilīṃ dharī toṃḍeṃ /
tetha dāṃtāṃce āgaraḍe / lāgatī jaise

kāṃ snehāḻu māye / tānhayācī vāsa pāhe /
tiye diṭhī āhe / haḻuvāra jeṃ

nānā kamaḻadaḻeṃ / ḍolavijatī ḍhāḻeṃ /
to jeṇeṃ pāḍeṃ bubuḻeṃ / vārā ghepe

taiseni mārdaveṃ pāya / bhūmīvarī nyasītu jāya /
lāgatī tetha hoya / jīvāṃ sukha

aisiyā laghimā cālatāṃ / kṛmi kīṭaka paṃḍusutā /
dekhe tarī māghautā / haḻūci nighe

mhaṇe pāvo dhaḍaphaḍīla / tarī svāmīcī nidrā moḍaila /
racalepaṇā paḍaila / jhotī hana

iyā kākuḻatī / vāhaṇī ghe māghautī /
koṇehī vyaktī / na vace varī

jīvāceni nāṃveṃ / tṛṇāteṃhī nolāṃḍave /
maga na lekhitāṃ jāveṃ / he keṃ goṭhī ?

muṃgiye meru nolāṃḍave / maśakā siṃdhu na tarave /
taisā bheṭaliyāṃ na karave / atikramu

aisī jayācī cālī / kṛpāphaḻī phaḻā ālī /
dekhasī jiyālī / dayā vāce

svayeṃ śvasaṇeṃci sukumāra / mukha mohāceṃ māhera /
mādhuryā jāhale aṃkura / daśana taise

puḍhāṃ sneha pājhare / māghāṃ cālatī akṣareṃ /
śabda pāṭhīṃ avatare / kṛpā ādhīṃ

taṃva bolaṇeṃci nāhīṃ / boloṃ mhaṇe jarī kāṃhīṃ /
tarī bola koṇāhī / khupela kāṃ

bolatāṃ adhikuhī nighe / tarī koṇhāhī varmīṃ na lage /
āṇi koṇhāsi na righe / śaṃkā manīṃ

māṃḍilī goṭhī hana moḍaila / vāsipaila koṇī uḍaila /
āikonici vovāṃḍila / koṇhī jarī

tarī duvāḻī koṇā nohāvī / bhuṃvaī kavaṇācī nucalāvī /
aisā bhāvo jīvīṃ / mhaṇauni ugā

maga prārthilā vipāyeṃ / jarī lobheṃ boloṃ jāye /
tarī parisatayā hoye / māyabāpu

kāṃ nādabrahmaci muse āleṃ / kīṃ gaṃgāpaya asalaleṃ /
pativrate āleṃ / vārdhakya jaise

taiseṃ sāca āṇi mavāḻa / mitale āṇi rasāḻa /
śabda jaise kalloḻa / amṛtāce

virodhuvādubaḻu / prāṇitāpaḍhāḻu /
upahāsu chaḻu / varmasparśu

āṭu vegu viṃdāṇu / āśā śaṃkā pratāraṇu /
he saṃnyāsile avaguṇu / jayā vācā

āṇi tayāci parī kirīṭī / thāu jayāciye diṭhī /
sāṃḍiliyā bhrukuṭī / mokaḻiyā

kāṃ je bhūtīṃ vastu āhe / tiyeṃ rupoṃ śake vipāyeṃ /
mhaṇauni vāsu na pāhe / bahutakarūnī

aisāhī koṇe eke veḻe / bhītarale kṛpeceni baḻeṃ /
ughaḍoniyāṃ ḍoḻe / dṛṣṭī ghālī

tarī caṃdrabiṃbauni dhārā / nighatāṃ navhatī gocarā /
pari ekasareṃ cakorāṃ / nighatī doṃdeṃ

taiseṃ prāṇiyāṃsi hoye / jarī to kahīṃvāsu pāhe /
tayā avalokanācī soye / kūrmīṃhī neṇe

kiṃbahunā aisī / diṭhī jayācī bhūtāṃsī /
karahī dekhasī / taiseci te

tarī hoūniyāṃ kṛtārtha / rāhile siddhāṃce manoratha /
taise jayāce hāta / nirvyāpāra

akṣameṃ āṇi saṃnyāsileṃ / kīṃ niriṃdhana āṇi vijhāleṃ /
mukeni ghetaleṃ / mauna jaiseṃ

tayāparī kāṃhīṃ / jayāṃ karāṃ karaṇeṃ nāhīṃ /
je akartayācyā ṭhāyīṃ / baisoṃ yetī

āsuḍaila vārā / nakha lāgela aṃbarā /
iyā buddhī karāṃ / caḻoṃ nedī

tetha āṃgāvarilīṃ uḍavāvīṃ / kāṃ ḍoḻāṃ rigateṃ jhāḍāvīṃ /
paśupakṣyāṃ dāvāvīṃ / trāsamudrā

iyā keutiyā goṭhī / nāvaḍe daṃḍu kāṭhī /
maga śastrāceṃ kirīṭī / bolaṇeṃ keṃ ?

līlākamaḻeṃ kheḻaṇeṃ / kāṃpuṣpamāḻā jhelaṇeṃ /
na karī mhaṇe gophaṇeṃ / aiseṃ hoīla

hālavatīla romāvaḻī / yālāgīṃ āṃga na kuravāḻī /
nakhāṃcī guṃḍāḻī / boṭāṃvarī

taṃva karaṇeyācāci abhāvo / parī aisāhī paḍe prastāvo /
tarī hātāṃ hāci sarāvo / je joḍijatī

kāṃ nābhikārā ucalije / hātu paḍiliyāṃ deije /
nātarī ārtāteṃ sparśije / aḻumāḻu

heṃhī uparodheṃ karaṇeṃ / tarī ārtabhaya haraṇeṃ /
neṇatī caṃdrakiraṇeṃ / jivhāḻā to

pāvoni to sparśu / malayāniḻu kharapusu /
teṇeṃ māneṃ paśu / kuravāḻaṇeṃ

je sadā rite mokaḻe / jaiśī caṃdanāṃgeṃ nisaḻeṃ /
na phaḻatāṃhī nirphaḻeṃ / hotīcinā

ātāṃ aso heṃ vāgjāḻa / jāṇeṃ teṃ karataḻa /
sajjanāṃce śīḻa / svabhāva jaise

ātāṃ mana tayāceṃ / sāṃgoṃ mhaṇoṃ jarī sāceṃ /
tarī sāṃgitale koṇāce / vilāsa he ?

kāi śākhā navhe taru ? / jaḻeṃvīṇa ase sāgaru ? /
teja āṇi tejākāru / āna kāī ?

avayava āṇi śarīra / he vegaḻāle kīra ? /
kīṃ rasu āṇi nīra / sinānīṃ āthī ?

mhaṇauni he je sarva / sāṃgitale bāhya bhāva /
te manaci gā sāvayava / aiseṃ jāṇeṃ

jeṃ bīja bhuīṃ khoṃvileṃ / teṃci varī rukha jāhaleṃ /
taiseṃ iṃdriyādvārīṃ phāṃkaleṃ / aṃtaraci kīṃ

paiṃ mānasīṃci jarī / ahiṃsecī avasarī /
tarī kaiṃcī bāherī / vosaṃḍela ?

āvaḍe te vṛttī kirīṭī / ādhīṃ manaunīci uṭhī /
maga te vāce diṭhī / karāṃsi ye

vāṃcūni manīṃci nāhīṃ / teṃ vācesi umaṭela kāī ? /
bīṃvīṇa bhuīṃ / aṃkura ase ?

mhaṇauni manapaṇa jaiṃ moḍe / taiṃ iṃdriya ādhīṃci ubaḍeṃ /
sūtradhāreṃvīṇa sāikhaḍeṃ / vāvo jaiseṃ

ugamīṃci vāḻūni jāye / teṃ voghīṃ kaiceṃ vāhe /
jīvu geliyā āhe / ceṣṭā dehīṃ ?

taiseṃ mana heṃ pāṃḍavā / mūḻa yā iṃdriyabhāvā /
heṃci rāhaṭe āghavāṃ / dvārīṃ ihīṃ

parī jiye veḻīṃ jaiseṃ / jeṃ hoūni āṃtu ase /
bāherī ye taiseṃ / vyāpārarūpeṃ

yālāgī sācokāreṃ / manīṃ ahiṃsā thāṃve thoreṃ /
pikalī drutī ādareṃ / bobhāta nighe

mhaṇauni iṃdriyeṃ teci saṃpadā / vecitāṃ hīṃ udāvādā /
ahiṃsecā dhaṃdā / kariteṃ āhātī

samudrīṃ dāṭe bhariteṃ / taiṃ samudraci bharī tariyāṃte /
taiseṃ svasaṃpattī citteṃ / iṃdriyāṃ keleṃ

heṃ bahu aso paṃḍitu / dharuni bāḻakācā hātu /
voḻī lihī vyaktu / āpaṇaci

taiseṃ dayāḻutva āpuleṃ / maneṃ hātāpāyāṃ āṇileṃ /
maga tetha upajavileṃ / ahiṃseteṃ

yākāraṇeṃ kirīṭī / iṃdriyāṃciyā goṭhī /
manāciye rāhāṭī / rūpa keleṃ

aisā maneṃ deheṃ vācā / sarva saṃnyāsu daṃḍācā /
jāhalā ṭhāyīṃ jayācā / dekhaśīla

to jāṇa velhāḻa / jñānāceṃ veḻāuḻa /
heṃ aso nikhaḻa / jñānaci to

je ahiṃsā kāneṃ aikije / graṃthādhāreṃ nirūpije /
te pāhāvī heṃ upaje / taiṃ toci pāhāvā

aiseṃ mhaṇitaleṃ deveṃ / teṃ boleṃ ekeṃ sāṃgāveṃ /
parī phāṃkalā heṃ upasāhāveṃ / tumhīṃ maja

mhaṇāla hiraveṃ cārīṃ gurūṃ / visare māgīla mohara dharūṃ /
kāṃ vārelageṃ pāṃkhirūṃ / gaganīṃ bhare

taisiyā premāciyā sphūrtī / phāvaliyā rasavṛttīṃ /
vāhavilā matī / ākaḻenā

tari taiseṃ nohe avadhārā / kāraṇa aseṃ vistārā /
eऱhavīṃ pada tarī akṣarāṃ / tihīṃceṃci

ahiṃsā mhaṇatāṃ thoḍī / parii te taiṃci hoya ughaḍī /
jaiṃ loṭijatī koḍī / matāṃciyā

eऱhavīṃ prāpteṃ matāṃtareṃ / thātaṃbūni āṃgabhareṃ /
bolijaila te na sare / tumhāṃpāśīṃ

ratnapārakhiyāṃcyā gāṃvīṃ / jāīla gaṃḍakī tarī soḍāvī /
kāśmīrīṃ na karāvī / miḍagaṇa jevīṃ

kāisā vāsu kāpurā / maṃda jetha avadhārā /
piṭhācā vikarā / tiye sāteṃ ?

mhaṇauni iye sabhe / bolakepaṇāceni kṣobheṃ /
lāga saruuṃ na labhe / bolā prabhu

sāmānyā āṇi viśeṣā / sakaḻai kījela dekhā /
tarī kānāceyā mukhā- / kaḍe nyāla nā tumhī

śaṃkeceni gadaḻeṃ / jaiṃ śuddha prameya maiḻe /
taiṃ māgutiyā pāulīṃ paḻe / avadhāna yeteṃ

kāṃ karūni bābuḻiyecī buṃthī / jaḻeṃ jiyeṃ ṭhātī /
tayāṃcī vāsa pāhātī / haṃsu kāī ?

kāṃ abhrāpailīkaḍe / jaiṃ yeta cāṃdiṇeṃ koḍeṃ /
taiṃ cakoreṃ cāṃcuvaḍeṃ / ucalitīnā

taiseṃ tumhī vāsa na pāhāla / graṃthu neghā varī kopāla /
jarī nirvivāda navhaila / nirūpaṇa

na bujhāvitāṃ mateṃ / na phiṭe ākṣepāceṃ lāgateṃ /
teṃ vyākhyāna jī tumateṃ / joḍūni nedī

āṇi mājheṃ taṃva āghaveṃ / grathana yeṇeci bhāveṃ /
je tumhīṃ saṃtīṃ hoāveṃ / sanmukha sadāṃ

eऱhavīṃ tarī sācokāreṃ / tumhī gītārthāce soire /
jāṇoni gītā ekasareṃ / dharilī miyāṃ

jeṃ āpuleṃ sarvasva dyāla / maga iyeteṃ soḍavūni nyāla /
mhaṇauni graṃthu navhe vola / sācaci he

kāṃ sarsvācā lobhu dharā / volīcā avheru karā /
tarī gīte maja avadhārā / ekaci gatī

kiṃbahunā maja / tumaciyā kṛpā kāja /
tiyelāgīṃ vyāja / graṃthāceṃ keleṃ

tarii tumhāṃ rasikāṃjogeṃ / vyākhyāna śodhāveṃ lāge /
mhaṇauni jī matāṃgeṃ / boloṃ geloṃ

taṃva kathesi pasaru jāhalā / ślokārthu dūrī gelā /
kījo kṣamā yayā bolā / apatyā maja

āṇi ghāṃsāāṃtila haraḻu / pheḍitāṃ lāge veḻu /
te dūṣaṇa navheṃ khaḍaḻu / sāṃḍāvā kīṃ

kāṃ saṃvacorā cukavitāṃ / divasa lāgaliyā mātā /
kopāveṃ kīṃ jīvitā / jitāṇeṃ kīje ?

parī yāvarīla heṃ navhe / tumhīṃ upasāhileṃ teṃci baraveṃ /
ātāṃ avadhārijo deveṃ / bolileṃ aiseṃ

mhaṇe unmekhasulocanā / sāvadha hoīṃ arjunā /
karūṃ tuja jñānā / voḻakhī ātāṃ

tarī jñāna gā teṃ etheṃ / voḻakha tūṃ niruteṃ /
ākrośeṃvīṇa jetheṃ / kṣamā ase

agādha sarovarīṃ / kamaḻiṇī jiyāparī /
kāṃ sadaivāciyā gharīṃ / saṃpatti jaisī

pārthā teṇeṃ pāḍeṃ / kṣamā jayāteṃ vāḍhe /
tehī lakṣe teṃ phuḍeṃ / lakṣaṇa sāṃgoṃ

tarī paḍhiyaṃte leṇeṃ / āṃgīṃ bhāveṃ jeṇeṃ /
dharije tevīṃ sāhaṇeṃ / sarvaci jayā

trividha mukhya āghave / upadravāṃce meḻāve /
varī paḍiliyā navhe / vāṃkuḍā jo

apekṣita pāve / teṃ jeṇeṃ toṣeṃ mānaveṃ /
anapekṣitāhī karave / toci mānu

jo mānāpamānāteṃ sāhe / sukhaduḥkha jetha sāmāye /
niṃdāstutī nohe / dukhaṃḍu jo

unhāḻeni jo na tape / himavaṃtī na kāṃpe /
kayasenihī na vāsipe / pātaleyā

svaśikharāṃcā bhāru / neṇeṃ jaisā meru /
kīṃ dharā yajñasūkaru / vojheṃ na mhaṇe

nānā carācarīṃ bhūtīṃ / dāṭaṇī navhe kṣitī /
taisā nānā dvaṃdvīṃ prāptīṃ / ghāmejenā

gheūnī jaḻāce loṭa / āliyā nadīnadāṃce saṃghāṭa /
karī vāḍa poṭa / samudra jevīṃ

taiseṃ jayāciyā ṭhāyīṃ / na sāhaṇeṃ kāhīṃci nāhīṃ /
āṇi sāhatu ase aiseṃhī / smaraṇa nure

āṃgā jeṃ pātaleṃ / teṃ karūni ghālī āpuleṃ /
yetha sāhateni navaleṃ / ghepijenā

he anākrośa kśamā / jayāpāśīṃ priyottamā /
jāṇa teṇeṃ mahimā / jñānāsi gā

to puruṣu pāṃḍavā / jñānācā volāvā /
ātāṃ parisa ārjavā / rūpa karūṃ

tarī ārjava teṃ aiseṃ / prāṇāceṃ saujanya jaiseṃ /
āvaḍe tayāhī doṣeṃ / ekaci gā

kāṃ toṃḍa pāhūni prakāśu / na karī jevīṃ caṃḍāṃśu /
jagā ekaci avakāśu / ākāśa jaiseṃ

taiseṃ jayāceṃ mana / māṇusāprati āna āna /
navhe āṇi vartana / aiseṃ paiṃ teṃ

je jageṃci sanoḻakha / jageṃsīṃ junāṭa soyarika /
āpapara heṃ bhākha / jāṇaṇeṃ nāhīṃ

bhalateṇeṃsīṃ meḻu / pāṇiyā aisā ḍhāḻu /
kavaṇevikhīṃ āḍaḻu / neghe citta

vāriyācī dhāṃva / taise saraḻa bhāva /
śaṃkā āṇi hāṃva / nāhīṃ jayā

māyepuḍheṃ bāḻakā / rigatāṃ na paḍe śaṃkā /
taiseṃ mana detāṃ lokāṃ / nālocī jo

phāṃkaliyā iṃdīvarā / parivāru nāhīṃ dhanurdharā /
taisā konakoṃparā / neṇeci jo

cokhāḻapaṇa ratnāceṃ / ratnāvarī kiraṇāceṃ /
taiseṃ puḍhāṃ mana jayāceṃ / karaṇeṃ pāṭhīṃ

ālocūṃ jo neṇe / anubhavaci jogāvaṇeṃ /
dharī mokaḻī aṃtaḥkaraṇeṃ / navheci jayā

diṭhī nohe miṇadhī / bolaṇeṃ nāhīṃ saṃdigdhī /
kavaṇeṃsīṃ hīnabuddhī / rāhāṭīje nā

dāhī iṃdriyeṃ prāṃjaḻeṃ / niṣprapaṃceṃ nirmaḻeṃ /
pāṃcahī pālava mokaḻe / āṭhahī pāhara

amṛtācī dhāra / taiseṃ ujūṃ aṃtara /
kiṃbahunā jo māhera / yā cinhāṃceṃ

to puruṣa subhaṭā / ārjavācā āṃgavaṭā /
jāṇa tetheṃci gharaṭā / jñāneṃ kelā

ātāṃ yayāvarī / gurubhaktīcī parī /
sāṃgoṃ gā avadhārīṃ / caturanāthā

āghaviyāci daivāṃ / janmabhūmi he sevā /
je brahma karī jīvā / śocyāteṃhi

heṃ ācāryopāstī / prakaṭijaila tujapratī /
baisoṃ de ekapāṃtī / avadhānācī

tarī sakaḻa jaḻasamṛddhī / gheūni gaṃgā nighālī udadhī /
kīṃ śruti he mahāpadīṃ / paiṭhī jāhālī

nānā veṃṭāḻūni jīviteṃ / guṇāguṇa ukhiteṃ /
prāṇanāthā uciteṃ / didhaleṃ priyā

taiseṃ sabāhya āpuleṃ / jeṇeṃ gurukuḻīṃ vopileṃ /
āpaṇapeṃ keleṃ / bhaktīceṃ ghara

gurugṛha jaye deśīṃ / to deśuci vase mānasīṃ /
virahiṇī kāṃ jaisī / vallabhāteṃ

tiyekaḍoni yetase vārā / dekhoni dhāṃve sāmorā /
āḍa paḍe mhaṇe gharā / bījeṃ kījo

sācā premāciyā bhulī / tayā diśesīci āvaḍe bolī /
jīvu thānapatī karūni ghālī / gurugṛhīṃ jo

parī guruājñā dharileṃ / deha gāṃvīṃ ase ekaleṃ /
vāṃsaruvā lāvileṃ / dāveṃ jaiseṃ

mhaṇe kaiṃ heṃ biraḍeṃ phiṭela / kaiṃ to svāmī bheṭela /
yugāhūni vaḍīla / nimiṣa mānī

aiseyā gurugrāmīṃceṃ āleṃ / kāṃ svayeṃ gurūṃnīṃci dhāḍileṃ /
tarī gatāyuṣyā joḍaleṃ / āyuṣya jaiseṃ

kāṃ sukatayā aṃkurā- / varī paḍaliyā pīyūṣadhārā /
nānā alpodakīṃcā sāgarā / ālā māsā

nātarī raṃkeṃ nidhāna dekhileṃ / kāṃ āṃdhaḻiyā ḍoḻe ughaḍale /
bhaṇaṃgāciyā āṃgā āleṃ / iṃdrapada

taiseṃ gurukuḻāceni nāṃveṃ / mahāsukheṃ ati thorāve /
jeṃ koḍeṃhī poṭāḻaveṃ / ākāśa kāṃ

paiṃ gurukuḻīṃ aisī / āvaḍī jayā dekhasī /
jāṇa jñāna tayāpāsīṃ / pāikī karī

āṇi abhyaṃtarīliyekaḍe / premāceni pavāḍe /
śrīgurūṃceṃ rūpaḍeṃ / upāsī dhyānīṃ

hṛdayaśuddhīciyā āvārīṃ / ārādhyu to niścala dhruva karī /
maga sarva bhāveṃsī parivārīṃ / āpaṇa hoya

kāṃ caitanyāṃciye povaḻī- / mājīṃ ānaṃdāciyā rāuḻīṃ /
śriiguruliṃgā ḍhāḻī / dhyānāmṛta

udayijatāṃ bodhārkā / buddhīcī ḍāḻa sāttvikā /
bharoniyāṃ tryaṃbakā / lākholī vāhe

kāḻaśuddhī trikāḻīṃ / jīvadaśā dhūpa jāḻīṃ/
nyānadīpeṃ voṃvāḻī / niraṃtara

sāmarasyācī rasasoya / akhaṃḍa arpitu jāya /
āpaṇa bharāḍā hoya / guru to liṃga

nātarī jīvāciye seje / guru kāṃtu karūni bhuṃje /
aisīṃ premāceni bhojeṃ / buddhī vāhe

koṇeke avasarīṃ / anurāgu bhare aṃtarīṃ /
kīṃ tayā nāma karī / kṣīrābdhī

tetha dhyeyadhyāna bahu sukha / teṃci śeṣatukā nirdokha /
varī jalaśayana dekha / bhāvī guru

maga voḻagatī pāya / te lakṣmī āpaṇa hoya /
garuḍa hoūni ubhā rāhe / āpaṇaci

nābhīṃ āpaṇaci janme / aiseṃ gurumūrtipremeṃ /
anubhavī manodharmeṃ / dhyānasukha

ekādhiye veḻeṃ / guru māya karī bhāvabaḻeṃ /
maga stanyasukheṃ loḻe / aṃkāvarī

nātarī gā kirīṭī / caitanyatarutaḻavaṭīṃ /
guru dhenu āpaṇa pāṭhīṃ / vatsa hoya

gurukṛpāsnehasalilīṃ / āpaṇa hoya māsoḻī /
koṇe eke veḻīṃ / heṃci bhāvīṃ

gurukṛpāmṛtāce vaḍapa / āpaṇa sevāvṛttīceṃ hoya ropa /
aisese saṃkalpa / viye mana

cakṣupakṣevīṇa / pilūṃ hoya āpaṇa /
kaiseṃ paiṃ apārapaṇa / āvaḍīceṃ

gurūteṃ pakṣiṇī karī / cārā ghe cāṃcūvarī /
guru tārū dharī / āpaṇa kāṃsa

aiseṃ premāceni thāveṃ / dhyānaci dhyānāteṃ prasave /
pūrṇasiṃdhu helāve / phuṭatī jaise

kiṃbahunā yāparī / śrīgurumūrtī aṃtarīṃ /
bhogī ātāṃ avadhārīṃ / bāhyasevā

tarī jivīṃ aise āvāṃke / mhaṇe dāsya karīna nikeṃ /
jaiseṃ guru kautukeṃ / māga mhaṇatī

taisiyā sācā upāstī / gosāvī prasanna hotī /
tetha mī vinaṃtī / aisī karīna

mhaṇena tumacā devā / parivāru jo āghavā /
tetuleṃ rūpeṃ hoāvā / mīci eku

āṇi upakaratīṃ āpulīṃ / upakaraṇeṃ āthi jetulīṃ /
mājhīṃ rūpeṃ tetulīṃ / hoāvīṃ svāmī

aisā māgena varu / tetha ho mhaṇatī śrīguru /
maga to parivāru / mīci hoīna

upakaraṇajāta sakaḻika / teṃ mīci hoīna ekaika /
tevhāṃ upāstīceṃ kavatika / dekhijaila

guru bahutāṃcī māye / parī ekalautī hoūni ṭhāye /
taiseṃ karūni āṇa vāyeṃ / kṛpe tiye

tayā anurāgā vedhu lāvīṃ / ekapatnīvrata ghevavīṃ /
kṣetrasaṃnyāsu karavīṃ / lobhākaravīṃ

caturdikṣu vārā / na lāhe nighoṃ bāhirā /
taisā gurukṛpeṃ pāṃjirā / mīci hoīna

āpuliyā guṇāṃcīṃ leṇīṃ / karīna guruseve svāmiṇī /
heṃ aso hoīna gaṃvasaṇī / mīci bhaktīsī

gurusnehāciye vṛṣṭī / mī pṛthvī hoīna taḻavaṭīṃ /
aisiyā manorathāṃciyā sṛṣṭī / anaṃtā racī

mhaṇe śrīgurūṃceṃ bhuvana / āpaṇa mī hoīna /
āṇi dāsa hoūni karīna / dāsya tethiṃceṃ

nirgamāgamīṃ dātāreṃ / je volāṃḍijatī uṃbare /
te mī hoīna āṇi dvāreṃ / dvārapāḻu

pāuvā mī hoīna / tiyāṃ mīci levavīna /
chatra mī āṇi karīna / bārīpaṇa

mī taḻa uparu jāṇavitā / caṃvaru dharu hātu detā /
svāmīpuḍheṃ kholatā / hoīna mī

mīci hoīna sāgaḻā / karūṃ suīna guruḻāṃ /
sāṃḍitī to nepāḻā / paḍighā mīci

haḍapa mī voḻagena / mīci ugāḻu gheīna /
uḻiga mī karīna / āṃghoḻīceṃ

hoīna gurūṃceṃ āsana / alaṃkāra paridhāna /
caṃdanādi hoīna / upacāra te

mīci hoīna suāru / vogarīna upahāru /
āpaṇapeṃ śrīguru / voṃvāḻīna

je veḻīṃ devo ārogitī / tevhāṃ pāṃtīkaru mīci pāṃtīṃ /
mīci hoīna puḍhatī / deīna viḍā

tāṭa mī kāḍhīna / seja mī jhāḍīna /
caraṇasaṃvāhana / mīci karīna

siṃhāsana hoīna āpaṇa / varī śrīguru karitī ārohaṇa /
hoīna purepaṇa / voḻageceṃ

śrīgurūṃceṃ mana / jayā deīla avadhāna /
teṃ mī puḍhāṃ hoīna / camatkāru

tayā śravaṇāce āṃgaṇīṃ / hoīna śabdāṃciyā ākṣauhiṇī /
sparśa hoīna ghasaṇī / āṃgāciyā

śrīgurūṃce ḍoḻe / avalokaneṃ snehāḻeṃ /
pāhātī tiyeṃ sakaḻeṃ / hoīna rūpeṃ

tiye rasane jo jo rucela / to to rasu myāṃ hoījaila /
gaṃdharūpeṃ kījela / ghrāṇasevā

evaṃ bāhyamanogata / śrīgurusevā samasta /
veṃṭāḻīna vastujāta / hoūniyāṃ

jaṃva deha heṃ asela / taṃva voḻagī aisī kījela /
maga dehāṃtīṃ navala / buddhi āhe

iye śarīrīṃcī mātī / meḻavīna tiye kṣitī /
jetha śrīcaraṇa ubhe ṭhātī / śrīgurūṃce

mājhā svāmī kavatikeṃ / sparśījati jiyeṃ udakeṃ /
tetha layā neīna nikeṃ / āpīṃ āpa

śrīguru voṃvāḻijatī / kāṃ bhuvanīṃ je ujaḻijatī /
tayāṃ dīpāṃciyā dīptīṃ / ṭhevīna teja

cavarī hana viṃjaṇā / tetha layo karīna prāṇā /
maga āṃgācā voḻaṃgaṇā / hoīna mī

jiye jiye avakāśīṃ / śrīguru asatī parivāreṃsīṃ /
ākāśa layā ākāśīṃ / neīna tiye

parī jītu melā na saṃḍīṃ / nimeṣu lokāṃ na dhāḍīṃ /
aiseni gaṇāvayā koḍī / kalpāṃciyā

yetuleṃvarī dhiṃvasā / jayāciyā mānasā /
āṇi karūniyāṃhi taisā / apāru jo

rātra divasa neṇe / thoḍeṃ bahu na mhaṇeṃ /
mhaṇiyāceni dāṭapaṇeṃ / sājā hoya

to vyāpāru yeṇeṃ nāṃveṃ / gaganāhūni thorāve /
ekalā karī āghaveṃ / ekeci kāḻīṃ

hṛdayavṛttī puḍhāṃ / āṃgaci ghe davaḍā /
kāja karī hoḍā / mānaseṃśīṃ

ekādiyāṃ veḻā / śrīguruciyā kheḻā /
loṇa karī sakaḻā / jīvitāceṃ

jo gurudāsyeṃ kṛśu / jo gurupremeṃ sapoṣu /
guruājñe nivāsu / āpaṇaci jo

jo guru kuḻeṃ sukulīnu / jo gurubaṃdhusaujanyeṃ sujanu /
jo gurusevāvyasaneṃ savyasanu / niraṃtara

gurusaṃpradāyadharma / teci jayāce varṇāśrama /
guruparicaryā nityakarma / jayāceṃ gā

guru kṣetra guru devatā / guru māya guru pitā /
jo guruseveparautā / mārga neṇeṃ

śrīgurūce dvāra / teṃ jayāceṃ sarvasva sāra /
gurusevakāṃ sahodara / premeṃ bhaje

jayāceṃ vaktra / vāhe gurunāmāce maṃtra /
guruvākyāvāṃcūni śāstra / hātīṃ na śive

śivataleṃ gurucaraṇīṃ / bhalataiseṃ ho pāṇī /
tayā sakaḻa tīrtheṃ āṇī / trailokyīṃcīṃ

śrīgurūceṃ uśiṭeṃ / lāhe jaiṃ avacaṭeṃ /
taiṃ teṇeṃ lābheṃ viṭe / samādhīsī

kaivalyasukhāsāṭhīṃ / paramāṇu ghe kirīṭī /
udhaḻatī pāyāṃpāṭhīṃ / cālatāṃ je

heṃ aso sāṃgāveṃ kitī / nāhīṃ pāru gurubhaktī /
parī gā utkrāṃtamatī / kāraṇa heṃ

jayā iye bhaktīcī cāḍa / jayā iye viṣayīṃceṃ koḍa /
jo he sevevāṃcūna goḍa / na manī kāṃhīṃ

to tattvajñācā ṭhāvo / jñānā teṇeṃci āvo /
heṃ aso to devo / jñāna bhaktu

heṃ jāṇa pāṃ sācokāreṃ / tetha jñāna ughaḍeni dvāreṃ /
nāṃdata ase jagā pure / iyā rītī

jiye gurusevevikhīṃ / mājhā jīva abhilākhī /
mhaṇauni soyacukī / bolī kelī

eऱhavīṃ asatāṃ hātīṃ khuḻā / bhajanāvadhānīṃ āṃdhaḻā /
paricaryelāgīṃ pāṃguḻā- / pāsūni maṃdu

guruvarṇanīṃ mukā / āḻaśī pośije phukā /
parī manīṃ āthi nikā / sānurāgu

teṇeṃci paiṃ kāraṇeṃ / heṃ sthūḻa posaṇeṃ /
paḍaleṃ maja mhaṇe / jñānadevo

pari to bolu upasāhāvā / āṇi voḻage avasaru deyāvā /
ātāṃ mhaṇena jī baravā / graṃthārthuci

parisā parisā śrīkṛṣṇu / jo bhūtabhārasahiṣṇu /
to bolatase viṣṇu / pārthu aike

mhaṇe śucitva gā aiseṃ / jayāpāśīṃ dise /
āṃga mana jaiseṃ / kāpurāceṃ

kāṃ ratnāceṃ daḻavāḍeṃ / taiseṃ sabāhya cokhaḍeṃ /
āṃta bāheri ekeṃ pāḍeṃ / sūryu jaisā

bāherīṃ karmeṃ kṣāḻalā / bhitarīṃ jñāneṃ ujaḻalā /
ihīṃ dohīṃ parīṃ ālā / pākhāḻā ekā

mṛttikā āṇi jaḻeṃ / bāhya yeṇeṃ meḻeṃ /
nirmaḻu hoya boleṃ / vedācenī

bhalatetha buddhībaḻī / rajaārisā ujaḻī /
sauṃdaṇī pheḍī thigaḻī / vastrāṃciyā

kiṃbahunā iyāparī / bāhya cokha avadhārīṃ /
āṇi jñānadīpu aṃtarīṃ / mhaṇauni śuddha

eऱhavīṃ tarī paṃḍusutā / āṃta śuddha nasatāṃ /
bāheri karma to tattvatāṃ / viṭaṃbu gā

mṛta jaisā śṛṃgārilā / gāḍhava tīrthīṃ nhāṇilā /
kaḍududhiyā mākhilā / guḻeṃ jaisā

vosa gṛhīṃ toraṇa bāṃdhileṃ / kāṃ upavāsī anneṃ liṃpileṃ /
kuṃkumaseṃdura keleṃ / kāṃtahīneneṃ

kaḻasa ḍhimāce pokaḻa / jaḻo varīla teṃ jhaḻāḻa /
kāya karūṃ citrīṃva phaḻa / āṃtu śeṇa

taiseṃ karmavaricileṃkaḍāṃ / na sare thora moleṃ kuḍā /
navhe madirecā ghaḍā / pavitra gaṃge

mhaṇauni aṃtarīṃ jñāna vhāveṃ / maga bāhya lābhela svabhāveṃ /
varī jñāna karmeṃ saṃbhave / aiseṃ keṃ joḍe ?

yālāgī bāhya vibhāgu / karmeṃ dhutalā cāṃgu /
āṇi jñāneṃ phiṭalā vaṃgu / aṃtarīṃcā

tetha aṃtara bāhya gele / nirmaḻatva eka jāhaleṃ /
kiṃbahunā uraleṃ / śucitvaci

mhaṇauni sadbhāva jīvagata / bāherī disatī phāṃkata /
je sphaṭikagṛhīṃce ḍolata / dīpa jaise

vikalpa jeṇeṃ upaje / nāthilī vikṛti nipaje /
apravṛttīcīṃ bījeṃ / aṃkura ghetī

teṃ āike dekhe athavā bheṭe / parī manīṃ kāṃhīṃci numaṭe /
megharaṃgeṃ na kāṃṭe / vyoma jaiseṃ

eऱhavīṃ iṃdriyāṃceni meḻeṃ / viṣayāṃvarī tarī loḻe /
parī vikārāceni viṭāḻeṃ / liṃpijenā

bheṭaliyā vāṭevarī / cokhī āṇi māhārī /
tetha nātaḻeṃ tiyāparī / rāhāṭoṃ jāṇeṃ

kāṃ patiputrāṃteṃ āliṃgī / ekaci te taruṇāṃgī /
tetha putrabhāvācyā āṃgīṃ / na rige kāmu

taiseṃ hṛdaya cokha / saṃkalpavikalpīṃ sanoḻakha /
kṛtyākṛtya viśekha / phuḍeṃ jāṇeṃ

pāṇiyeṃ hirā na bhije / ādhaṇīṃ haraḻu na śije /
taisī vikalpajāteṃ na liṃpije / manovṛttī

tayā nāṃva śucipaṇa / pārthā gā saṃpūrṇa /
heṃ dekhasī tetha jāṇa / jñāna ase

āṇi sthiratā sāceṃ / ghara rigālī jayāceṃ /
to puruṣa jñānāceṃ / āyuṣya gā

deha tarī varicilīkaḍe / āpuliyā parī hiṃḍe /
parī baisakā na moḍe / mānasīṃcī

vatsāvarūni dhenūceṃ / sneha rānā na vace /
navhatī bhoga satiyece / premabhoga

kāṃ lobhiyā dūra jāye / parī jīva ṭhevilāci ṭhāye /
taisā deho cāḻitāṃ navhe / caḻu cittā

jātayā abhrāsaveṃ / jaiseṃ ākāśa na dhāṃve /
bhramaṇacakrīṃ na bhaṃve / dhruva jaisā

pāṃthikāciyā yerajhārā / saveṃ paṃthu na vace dhanurdharā /
kāṃ nāhīṃ jevīṃ taruvarā / yeṇeṃ jāṇeṃ

taisā caḻaṇavaḻaṇātmakīṃ / asoni ye pāṃcabhautikīṃ /
bhūtormī ekī / caḻijenā

vāhuṭaḻīceni baḻeṃ / pṛthvī jaisī na ḍhaḻe /
taisā upadrava umāḻeṃ / na loṭe jo

dainyaduḥkhīṃ na tape / bhavaśokīṃ na kaṃpe /
dehamṛtyu na vāsipe / pātalenī

ārti āśā paḍibhareṃ / vaya vyādhī gajareṃ /
ujū asatāṃ pāṭhimoreṃ / navhe citta

niṃdā nisteja daṃḍī / kāmalobhā varapaḍī /
parī romā navhe vāṃkuḍī / mānasācī

ākāśa heṃ vosaro / pṛthvī vari viro /
pari neṇe moharoṃ / cittavṛttī

hātī hālā phulīṃ / pāsavaṇā jevīṃ na ghālī /
taisā na loṭe durvākyaśelīṃ / śelilā sāṃtā

kṣīrārṇavāciyā kalloḻīṃ / kaṃpu nāhīṃ maṃdarācaḻīṃ /
kāṃ ākāśa na jaḻe jāḻīṃ / vaṇaviyācyā

taiśā ālyā gelyā ūrmī / navhe gajabaja manodharmīṃ /
kiṃbahunā dhairya kṣamī / kalpāṃtīṃhī

parī sthairya aisī bhāṣa / bolije je saviśeṣa /
te he daśā gā dekha / dekhaṇayā

heṃ sthairya nidhaḍeṃ / jetha āṃgeṃ jīveṃ joḍe /
teṃ jñānāceṃ ughaḍeṃ / nidhāna sāceṃ

āṇi isāḻu jaisā gharā / kāṃ daṃdiyā hatiyerā /
na visaṃbe bhāṃḍārā / baddhaku jaisā

kāṃ ekalautiyā bāḻakā- / vari paḍauni ṭhāke aṃbikā /
madhuviṣīṃ madhumakṣikā / lobhiṇī jaisī

arjunā jo yāparī / aṃtaḥkaraṇa jatana karī /
nedī ubheṃ ṭhākoṃ dvārīṃ / iṃdriyāṃcyā

mhaṇe kāma bāgula aikela / he āśā siyārī dekhaila /
tari jīvā ṭeṃkaila / mhaṇauni bihe

bāherī dhīṭa jaisī / dāṭugā pati kaḻāsī /
karī ṭehaṇī taisī / pravṛttīsīṃ

sacetanīṃ vāṇepaṇeṃ / dehāsakaṭa āṭaṇeṃ /
saṃyamāvarīṃ karaṇeṃ / bujhūni ghālī

manācyā mahādvārīṃ / pratyāhārāciyā ṭhāṇāṃtarīṃ /
jo yama dama śarīrīṃ / jāgavī ubhe

ādhārīṃ nābhīṃ kaṃṭhīṃ / baṃdhatrayācīṃ gharaṭīṃ /
caṃdrasūrya saṃpuṭīṃ / suye citta

samādhīce śejepāsīṃ / bāṃdhoni ghālī dhyānāsī /
citta caitanya samarasīṃ / āṃtu rate

agā aṃtaḥkaraṇanigraho jo / to hā heṃ jāṇijo /
hā āthī tetha vijayo / jñānācā paiṃ

jayācī ājñā āpaṇa / śirīṃ vāhe aṃtaḥkaraṇa /
manuṣyākāreṃ jāṇa / jñānaci to

āṇi viṣayāṃvikhīṃ / vairāgyācī nikī /
puravaṇī mānasīṃ kīṃ / jitī āthī

vamileyā annā / lāḻa na ghoṃṭī jevīṃ rasanā /
kāṃāṃga na sūye āliṃganā / pretāciyā

viṣa khāṇeṃ nāgave / jaḻata gharīṃ na rigave /
vyāghravivarāṃ na vacave / vastī jevīṃ

dhaḍāḍīta loharasīṃ / uḍī na ghālave jaisī /
na karave uśī / ajagarācī

arjunā teṇeṃ pāḍeṃ / jayāsī viṣayavārtā nāvaḍe /
nedī iṃdriyāṃceni toṃḍeṃ / kāṃhīṃca jāvoṃ

jayāce manīṃ ālasya / dehī atikārśya /
śamadamīṃ saurasya / jayāsi gā

tapovratāṃcā meḻāvā / jayācyā ṭhāyīṃ pāṃḍavā /
yugāṃta jayā gāṃvā- / āṃtu yetāṃ

bahu yogābhyāsīṃ hāṃva / vijanākaḍe dhāṃva /
na sāhe jo nāṃva / saṃghātāceṃ

nārācāṃcīṃ āṃthuraṇeṃ / pūyapaṃkīṃ loḻaṇeṃ /
taiseṃ lekhī bhogaṇeṃ / aihikīṃceṃ

āṇi svargāteṃ mānaseṃ / aikoni mānī aiseṃ /
kuhileṃ piśita jaiseṃ / śvānāceṃ kāṃ

teṃ heṃ viṣayavairāgya / jeṃ ātmalābhāceṃ sabhāgya /
yeṇeṃ brahmānaṃdā yogya / jīva hotī

aisā ubhayabhogīṃ trāsu / dekhasī jetha bahuvasu /
tetha jāṇa rahivāsu / jñānācā tūṃ

āṇi sacāḍāciye parī / iṣṭāpūrteṃ karī /
parī keleṃpaṇa śarīrīṃ / vasoṃ nedī

varṇāśramapoṣakeṃ / karmeṃ nityanaimittikeṃ /
tayāmājīṃ kāṃhīṃ na ṭhake / ācaratāṃ

pari heṃ miyāṃ keleṃ / kīṃ heṃ mājheni siddhī geleṃ /
aiseṃ nāhīṃ ṭhevileṃ / vāsanemājīṃ

jaiseṃ avacitapaṇeṃ / vāyūsi sarvatra vicaraṇeṃ /
kāṃ nirabhimāna udaijaṇeṃ / sūryāceṃ jaiseṃ

kāṃ śruti svabhāvatā bole / gaṃgā kājeṃviṇa cāle /
taiseṃ avaṣṭaṃbhahīna bhaleṃ / vartaṇeṃ jayāceṃ

ṛtukāḻīṃ tarī phaḻatī / parī phaḻaloṃ heṃ neṇatī /
tayāṃ vṛkṣāṃciye aisī vṛttī / karmīṃ sadā

evaṃ manīṃ karmīṃ bolīṃ / jetha ahaṃkārā ukhī jāhalī /
ekāvaḻīcī kāḍhilī / dorī jaisī

saṃbaṃdheṃvīṇa jaisīṃ / abhreṃ asatī ākāśīṃ /
dehīṃ karmeṃ taisīṃ / jayāsi gā

madyapāāṃgīṃceṃ vastra / lepāhātīṃceṃ śastra /
bailāvarī śāstra / bāṃdhaleṃ āhe

tayā pāḍeṃ dehīṃ / jayā mī āhe he seci nāhīṃ /
nirahaṃkāratā pāhīṃ / tayā nāṃva

heṃ saṃpūrṇa jetheṃ dise / tetheṃci jñāna ase /
iyeviṣīṃ anāriseṃ / boloṃ naye

āṇi janmamṛtyujarāduḥkheṃ / vyādhivārdhakyakaluṣeṃ /
tiyeṃ āṃgā na yetāṃ dekhe / durūni jo

sādhaku vivasiyā / kāṃ upasargu yogiyā /
pāve uṇeyāpureyā / vothaṃbā jevīṃ

vaira janmāṃtarīṃceṃ / sarpā manauni na vace /
tevīṃ atītā janmāceṃ / uṇeṃ jo vāhe

ḍoḻāṃ haraḻa na vire / ghāīṃ kota na jire /
taiseṃ kāḻīṃceṃ na visare / janmaduḥkha

mhaṇe pūyagarte rigālā / ahā mūtraraṃdhreṃ nighālā /
kaṭā re miyāṃ cāṭilā / kucasvedu

aisasiyā parī / janmācā kāṃṭāḻā dharī /
mhaṇe ātāṃ teṃ mī na karīṃ / jeṇeṃ aiseṃ hoya

hārī umacāvayā / juṃvārī jaisā ye ḍāyā /
kīṃ vairā bāpāceyā / putra jace

māriliyāceni rāgeṃ / pāṭhīcā jevīṃ sūḍa māgeṃ /
teṇeṃ ākṣepeṃ lāge / janmāpāṭhīṃ

parī janmatī te lāja / na sāṃḍī jayāceṃ nija /
saṃbhāvitā nisteja / na jire jevīṃ

āṇi mṛtyu puḍhāṃ āhe / toci kalpāṃtīṃ kāṃ pāhe /
parī ājīci hoye / sāvadhu jo

mājīṃ athāṃva mhaṇatā / thaḍiyeci paṃḍusutā /
pohaṇārā āitā / kāse jevīṃ

kāṃ na pavatāṃ raṇācā ṭhāvo / sāṃbhāḻije jaisā āvo /
voḍaṇa suije ghāvo / na lāgatāṃci

pāhecā peṇā vāṭavadhā / taṃva ājīci hoīje sāvadhā /
jīvu na vacatāṃ auṣadhā / dhāṃvije jevīṃ

yeऱhavīṃ aiseṃ ghaḍe / jo jaḻatāṃ gharīṃ sāṃpaḍe /
to maga na pavāḍe / kuhā khaṇoṃ

coṃḍhiye pātharu gelā / taiseni jo buḍālā /
to boṃbehisakaṭa nimālā / koṇa sāṃge

mhaṇauni samartheṃsīṃ vaira / jayā paḍileṃ hāḍakhāira /
to jaisā āṭhahī pāhara / parajūna ase

nātarī keḻavalī novarī / kā saṃnyāsī jiyāparī /
taisā na maratāṃ jo karī / mṛtyusūcanā

paiṃ gā jo yayāparī / janmeṃci janma nivārī /
maraṇeṃ mṛtyu mārī / āpaṇa ure

tayā gharīṃ jñānāceṃ / sāṃkaḍeṃ nāhīṃ sāceṃ /
jayā janmamṛtyuceṃ / nimāleṃ śalya

āṇi tayāciparī jarā / na ṭeṃkatāṃ śarīrā /
tāruṇyāciyā bharā- / mājīṃ dekhe

mhaṇe ājicyā avasarīṃ / puṣṭi je śarīrīṃ /
te pāhe hoīla kācarī / vāḻalī jaisī

nidaivyāce vyavasāya / taise ṭhākatī hātapāya /
amaṃtryā rājācī parī āhe / baḻā yayā

phulāṃciyā bhogā- / lāgīṃ prema ṭāṃgā /
teṃ kareyācā guḍaghā / taiseṃ hoīla

voḍhāḻācyā khurīṃ / ākharuāteṃ burī /
te daśā mājhyā śirīṃ / pāvela gā

padmadaḻeṃsī isāḻe / bhāṃḍatāti he ḍoḻe /
te hotī paḍavaḻeṃ / pikalīṃ jaisīṃ

bhaṃvaīcīṃ paḍaḻeṃ / vomathatī sinasāḻe /
uru kuhijaila jaḻeṃ / āṃsuvāceni

jaiseṃ bābhuḻīceṃ khoḍa / girabaḍūni jātī saraḍa /
taiseṃ picaḍīṃ toṃḍa / sarakaṭijaila

rāṃdhavaṇī culīpuḍheṃ / paऱhe unmādatī khātavaḍe /
taisīṃci yeṃ nākāḍeṃ / biḍabiḍatī

tāṃbuleṃ voṃṭha rāūṃ / hāṃsatāṃ dāṃta dāūṃ /
sanāgara miraūṃ / bola jeṇeṃ

tayāci pāhe yā toṃḍā / yeīla jaḻaṃbaṭācā loṃḍhā /
iyā umaḻatī dāḍhā / dātāṃsahita

kuḻavāḍī riṇeṃ dāṭalī / kāṃ vāṃkaḍiyā ḍhoreṃ baisalīṃ /
taisī nuṭhī kāṃhīṃ kelī / jībhaci he

kusaḻeṃ koraḍīṃ / vāreni jātī baraḍīṃ /
taisā āpadā toṃḍīṃ / dāḍhiyesī

āṣāḍhīṃceni jaḻeṃ / jaisīṃ jhirapatī śailācīṃ mauḻeṃ /
taiseṃ khāṃḍīhūni lāḻe / paḍatī pūra

vācesi apavāḍu / kānīṃ anughaḍu /
piṃḍa garuvā mākaḍu / hoīla hā

tṛṇāceṃ bujhavaṇeṃ / āṃdoḻe vārenaguṇeṃ /
taiseṃ yeīla kāṃpaṇeṃ / sarvāṃgāsī

pāyāṃ paḍatī veṃgaḍī / hāta vaḻatī murakuṃḍī /
baravapaṇā bāgaḍī / nācavijaila

maḻamūtradvāreṃ / hoūni ṭhātī khoṃkareṃ /
navasiyeṃ hotī itareṃ / mājhiyāṃ nidhanīṃ

dekhoni thuṃkīla jagu / maraṇācā paḍaila pāṃgu /
soiriyāṃ ubagu / yeīla mājhā

striyāṃ mhaṇatī vivasī / bāḻeṃ jātī mūrchī /
kiṃbahunā ciḻasī / pātra hoīna

ubhaḻīcā ujagarā / sejāriyāṃ sāiliyā gharā /
śiṇavīla mhaṇatī mhātārā / bahutāṃteṃ hā

aisī vārdhakyācī sūcaṇī / āpaṇiyā taruṇapaṇīṃ /
dekhe maga manīṃ / viṭe jo gā

mhaṇe pāhe heṃ yeīla / āṇi ātāṃceṃ bhogitāṃ jāīla /
maga kāya urela / hitālāgīṃ ?

mhaṇauni nāikaṇeṃ pāve / taṃva āīkoni ghālī āghaveṃ /
paṃgu na hotā jāveṃ / tetha jāya

dṛṣṭī jaṃva āhe / taṃva pāhāveṃ tetuleṃ pāhe /
mūkatvā ādhīṃ vācā vāhe / subhāṣiteṃ

hāta hotī khuḻe / heṃ puḍhīla moṭakeṃ kaḻe /
āṇi karūni ghālī sakaḻeṃ / dānādikeṃ

aisī daśā yeīla puḍheṃ / taiṃ mana hoīla veḍeṃ /
taṃva ciṃtūni ṭhevī cokhaḍeṃ / ātmajñāna

jaiṃ cora pāhe jhoṃbatī / taṃva ājīci rusije saṃpattī /
kā jhāṃkājhāṃkī vātī / na vacatāṃ kīje

taiseṃ vārdhakya yāveṃ / maga jeṃ vāyāṃ jāveṃ /
teṃ ātāṃci āghaveṃ / savateṃ karīṃ

ātāṃ moḍūni ṭhelīṃ durgeṃ / kāṃ vaḻita dharileṃ khageṃ /
tetha upekṣūni jo nighe / to nāgavalā kīṃ ?

taiseṃ vṛddhāpya hoye / ālepaṇa teṃ vāyāṃ jāye /
je to śatavṛddha āhe / neṇoṃ kaiṃcā

jhāḍilīṃci koḻeṃ jhāḍī / tayā na phaḻe jevīṃ boṃḍīṃ /
jāhalā agni tarī rākhoṃḍī / jāḻīla kāī ?

mhaṇauni vārdhakyāceni āṭhaveṃ / vārdhakyā jo nāgave /
tayācyā ṭhāyīṃ jāṇāveṃ / jñāna āhe

taiseṃci nānā roga / paḍighātī nā jaṃva puḍhāṃ āṃga /
taṃva ārogyāce upega / karūni ghālī

sāpācyā toṃḍī / paḍalī je uṃḍī /
te lāūni sāṃḍī / prabuddhu jaisā

taisā viyogeṃ jeṇeṃ duḥkhe / vipatti śoka pokhe /
teṃ sneha sāṃḍūni sukheṃ / udāsu hoya

āṇi jeṇeṃ jeṇeṃ kaḍe / doṣa sūtīla toṃḍeṃ /
tayāṃ karmaraṃdhrī guṃḍe / niyamāce dāṭī

aisasiyā āitī / jayācī parī asatī /
toci jñānasaṃpattī- / gosāvī gā

ātāṃ āṇīkahī eka / lakṣaṇa alaukika /
sāṃgena āika / dhanaṃjayā

tari jo yā dehāvarī / udāsu aisiyā parī /
ukhitā jaisā biḍhārīṃ / baisalā āhe

kāṃ jhāḍācī sāulī / vāṭe jātāṃ mīnalī /
gharāvarī tetulī / āsthā nāhīṃ

sāulī sarisīca ase / parī ase heṃ neṇije jaiseṃ /
striyeceṃ taiseṃ / lolupya nāhīṃ

āṇi prajā je jālī / tiyeṃ vastī kīra ālīṃ /
kāṃ goruveṃ baisalīṃ / rukhātaḻīṃ

jo saṃpattīmājī asatāṃ / aisā game paṃḍusutā /
jaisā kāṃ vāṭe jātāṃ / sākṣī ṭhevilā

kiṃbahunā puṃsā / pāṃjariyāmājīṃ jaisā /
vedājñesī taisā / bihūni ase

eऱhavīṃ dārāgṛhaputrīṃ / nāhīṃ jayā maitrī /
to jāṇa pāṃ dhātrī / jñānāsi gā

mahāsiṃdhū jaise / grīṣmavarṣīṃ sarise /
iṣṭāniṣṭa taiseṃ / jayācyā ṭhāyīṃ

kāṃ tinhī kāḻa hotāṃ / tridhā navhe savitā /
taisā sukhaduḥkhīṃ cittā / bhedu nāhīṃ

jetha nabhāceni pāḍeṃ / samatvā uṇeṃ na paḍe /
tetha jñāna rokaḍeṃ / voḻakha tūṃ

āṇi mīvāṃcūni kāṃhīṃ / āṇika gomaṭeṃ nāhīṃ /
aisā niścayoci tihīṃ / jayācā kelā

śarīra vācā mānasa / piyālīṃ kṛtaniścayācā kośa /
eka mīvāṃcūni vāsa / na pāhatī āna

kiṃbahunā nikaṭa nija / jayāceṃ jāhaleṃ maja /
teṇeṃ āpaṇayāṃ āmhāṃ seja / ekī kelī

rigatāṃ vallabhāpuḍheṃ / nāhīṃ āṃgīṃ jīvīṃ sāṃkaḍeṃ /
tiye kāṃteceni pāḍeṃ / ekasaralā jo

miḻoni miḻataci ase / samudrīṃ gaṃgājaḻa jaiseṃ /
mī hoūni maja taiseṃ / sarvasveṃ bhajatī

sūryācyā hoṇyāṃ hoīje / kāṃ sūryāsaveṃci jāije /
heṃ vikalepaṇa sāje / prabhesi jevīṃ

paiṃ pāṇiyāciye bhūmike / pāṇī taḻape kautukeṃ /
te laharī mhaṇatī laukikeṃ / eऱhavīṃ teṃ pāṇī

jo ananyu yāparī / mī jāhalāhi māteṃ varī /
toci to mūrtadhārī / jñāna paiṃ gā

āṇi tīrtheṃ dhauteṃ taṭeṃ / tapovaneṃ cokhaṭeṃ /
āvaḍatī kapāṭeṃ / vasavūṃ jayā

śailakakṣāṃcīṃ kuhareṃ / jaḻāśaya parisareṃ /
adhiṣṭhī jo ādareṃ / nagarā na ye

bahu ekāṃtāvarī prīti / jayā janapadācī khaṃtī /
jāṇa manuṣyākāreṃ mūrtī / jñānācī to

āṇikahi puḍhatī / cinheṃ gā sumatī /
jñānāciye nirutī- / lāgīṃ sāṃgoṃ

tarī paramātmā aiseṃ / jeṃ eka vastu ase /
teṃ jayā diseṃ / jñānāstava

teṃ ekavāṃcūni āneṃ / jiyeṃ bhavasvargādi jñāneṃ /
teṃ ajñāna aisā maneṃ / niścayo kelā

svargā jāṇeṃ heṃ sāṃḍī / bhavaviṣayīṃ kāna jhāḍī /
de adhyātmajñānīṃ buḍī / sadbhāvācī

bhaṃgaliye vāṭe / śodhūniyā avhāṃṭe /
nighije jevīṃ nīṭeṃ / rājapaṃtheṃ

taiseṃ jñānajātāṃ karī / āghaveṃci ekīkaḍe sārī /
maga mana buddhi moharī / adhyātmajñānīṃ

mhaṇe eka heṃci āthī / yera jāṇaṇeṃ te bhrāṃtī /
aisī nikureṃsī matī / meru hoya

evaṃ niścayo jayācā / dvārīṃ ādhyātmajñānācā /
dhruva devo gaganīṃcā / taisā rāhilā

tayācyā ṭhāyīṃ jñāna / yā bolā nāhīṃ āna /
je jñānīṃ baisaleṃ mana / tevhāṃci teṃ to mī

tarī baisalepaṇeṃ jeṃ hoye / baisatāṃci boleṃ na hoye /
tarī jñānā tayā āhe / sarisā pāḍu

āṇi tattvajñāna nirmaḻa / phaḻe jeṃ eka phaḻa /
teṃ jñeyahī varī saraḻa / diṭhī jayā

eऱhavīṃ bodhā āleni jñāneṃ / jarī jñeya na diseci maneṃ /
tarī jñānalābhuhī na mane / jāhalā sāṃtā

āṃdhaḻeni hātīṃ divā / gheūni kāya karāvā ? /
taisā jñānaniścayo āghavā / vāyāṃci jāya

jari jñānāceni prakāśeṃ / paratattvīṃ diṭhī na paise /
te sphūrtīci ase / aṃdha hoūnī

mhaṇauni jñāna jetuleṃ dāvīṃ / tetulī vastuci āghavī /
teṃ dekhe aiśī vhāvī / buddhi cokha

yālāgīṃ jñāneṃ nirdokheṃ / dāvileṃ jñeya dekhe /
taiseni unmekheṃ / āthilā jo

jevaḍhī jñānācī vṛddhī / tevaḍhīca jayācī buddhī /
to jñāna he śabdīṃ / karaṇeṃ na lage

paiṃ jñānāciye prabhesaveṃ / jayācī matī jñeyīṃ pāve /
to hātadharaṇiyā śive / paratattvāteṃ

toci jñāna heṃ bolatāṃ / vismo kavaṇa paṃḍusutā ? /
kāya savitayāteṃ savitā / mhaṇāveṃ aseṃ ?

taṃva śroteṃ mhaṇatī aso / na sāṃgeṃ tayācā atiso /
graṃthoktī tetha āḍaso / ghālitosī kāṃ ?

tujhā hāci āmhāṃ thoru / vaktṛtvācā pāhuṇeru /
je jñānaviṣo phāru / niropilā

rasu hoāvā atimātru / hā ghetāsi kavimaṃtru /
tarī avaṃtūni śatru / karitosi kāṃ gā ?

ṭhāyīṃ baisatiye veḻe / je rasasoya gheūni paḻe /
tiyecā yeru voḍava miḻe / koṇā arthā ?

āghavāci viṣayīṃ bhādī / parī sāṃjavaṇīṃ ṭeṃkoṃ nedī /
te khuratoḍī nusadhī / poṣī kavaṇa ?

taisī jñānīṃ matī na phāṃke / yera jalpatī neṇoṃ ketukeṃ /
pari teṃ aso nikeṃ / keleṃ tuvāṃ

jayā jñānaleśoddeśeṃ / kījatī yogādi sāyāseṃ /
teṃ dhaṇīceṃ āthī tujhiyā aiseṃ / nirūpaṇa

amṛtācī sātavāṃkuḍī / lāgo kāṃ anughaḍī /
sukhācyā divasakoḍī / gaṇijatu kāṃ

pūrṇacaṃdreṃsīṃ rātī / yuga eka asoni pahātī /
tarī kāya pāhāta āhātī / cakora te ?

taiseṃ jñānāceṃ bolaṇeṃ / āṇi yeṇeṃ rasāḻapaṇeṃ /
ātāṃ pure koṇa mhaṇe ? / ākarṇitāṃ

āṇi sabhāgyu pāhuṇā ye / subhagāci vāḍhatī hoye /
taiṃ saroṃ neṇeṃ rasasoye / aiseṃ āthī

taisā jāhalā prasaṃgu / je jñānīṃ āmhāṃsi lāgu /
āṇi tujahī anurāgu / āthi tetha

mhaṇauni yayā vākhāṇā- / pāsīṃ se ālī cauguṇā /
nā mhaṇoṃ nayesi dekhaṇā ? / hosī jñānī

tarī ātāṃ yayāvarī / prajñecyā mājagharīṃ /
padeṃ sāca karīṃ / nirūpaṇīṃ

yā saṃtavākyāsariseṃ / mhaṇitaleṃ nivṛttidāseṃ /
mājheṃhī jī aiseṃ / manogata

yāvarī ātāṃ tumhīṃ / ājñāpilā svāmī /
tarī vāyāṃ vāgū mī / vāḍhoṃ nedī

evaṃ iyeṃ avadhārā / jñānalakṣaṇeṃ aṭharā /
śrīkṛṣṇeṃ dhanurdharā / nirūpilī

maga mhaṇeṃ yā nāṃveṃ / jñāna etha jāṇāveṃ /
he svamata āṇi āghaveṃ / jñāniyehī mhaṇatī

karataḻāvarī vāṭoḻā / ḍolatu dekhije āṃvaḻā /
taiseṃ jñāna āmhīṃ ḍoḻāṃ / dāvileṃ tuja

ātāṃ dhanaṃjayā mahāmatī / ajñāna aisī vadaṃtī /
teṃhī sāṃgoṃ vyaktī / lakṣaṇeṃsīṃ

eऱhavīṃ jñāna phuḍeṃ jāliyā / ajñāna jāṇave dhanaṃjayā /
jeṃ jñāna navhe teṃ apaisayā / ajñānaci

pāheṃ pāṃ divasu āghavā sare / maga rātrīcī vārī ure /
vāṃcūni kāṃhīṃ tisareṃ / nāhīṃ jevīṃ

taiseṃ jñāna jetha nāhīṃ / teṃci ajñāna pāhīṃ /
tarī sāṃgoṃ kāṃhīṃ kāṃhīṃ / cinheṃ tiyeṃ

tarī saṃbhāvane jiye / jo mānācī vāṭa pāhe /
satkāreṃ hoye / toṣu jayā

garveṃ parvatācīṃ śikhareṃ / taisā mahattvāvarūni nutare /
tayāciyā ṭhāyīṃ pure / ajñāna āhe

āṇi svadharmācī māṃgaḻī / bāṃdhe vācecyā piṃpaḻīṃ /
ubhilā jaisā deuḻīṃ / jāṇoni kuṃcā

ghālī vidyecā pasārā / sūye sukṛtācā ḍāṃgorā /
karī tetuleṃ moharā / sphītīciyā

āṃga varivarī carcī / janāteṃ abhyarcitāṃ vaṃcī /
to jāṇa pāṃ ajñānācī / khāṇī etha

āṇi vanhī vanīṃ vicare / tetha jaḻatī jaisīṃ jaṃgameṃ sthāvareṃ /
taiseṃ jayāceni ācāreṃ / jagā duḥkha

kautukeṃ jeṃ jeṃ jalpe / teṃ sābaḻāhūni tīkha rupe /
viṣāhūni saṃkalpeṃ / māraku jo

tayāteṃ bahu ajñāna / toci ajñānāceṃ nidhāna /
hiṃsesi āyatana / jayāceṃ jiṇeṃ

āṇi phuṃkeṃ bhātā phuge / reciliyā saveṃci uphage /
taisā saṃyogaviyogeṃ / caḍhe vohaṭe

paḍalī vārayāciyā vaḻasā / dhuḻī caḍhe ākāśā /
harikhā vaḻaghe taisā / stutīveḻe

niṃdā moṭakī āike / āṇi kapāḻa dharūni ṭhāke /
theṃbeṃ vire vāroni śokhe / cikhalu jaisā

taisā mānāpamānīṃ hoye / jo koṇhīci urmī na sāhe /
tayācyā ṭhāyīṃ āhe / ajñāna pureṃ

āṇi jayāciyā manīṃ gāṃṭhī / varivarī mokaḻī vācā diṭhī /
āṃgeṃ miḻe jīveṃ pāṭhīṃ / bhalatayā de

vyādhāce cārā ghālaṇeṃ / taiseṃ prāṃjaḻa jogāvaṇeṃ /
cāṃgācīṃ aṃtaḥkaraṇeṃ / viru karī

gāra śevāḻeṃ guṃḍāḻalī / kāṃ niṃboḻī jaisī pikalī /
taisī jayācī bhalī / bāhya kriyā

ajñāna tayāciyā ṭhāyīṃ / ṭhevileṃ ase pāhīṃ /
yābolā āna nāhīṃ / satya mānīṃ

āṇi gurukuḻīṃ lāje / jo gurubhaktī ubhaje /
vidyā gheūni māje / gurūsīṃci jo

tayāceṃ nāma gheṇeṃ / teṃ vāce śūdrānna hoṇeṃ /
parī ghaḍaleṃ lakṣaṇeṃ / bolatāṃ iyeṃ

ātā gurubhaktāṃceṃ nāṃva ghevoṃ / teṇeṃ vācesi prāyaścita devoṃ /
gurusevakā nāṃva pāvoṃ / sūryu jaisā

yetuleni pāṃgu pāpācā / nistarela he vācā /
jo gurutalpagācā / nāmīṃ ālā

hā ṭhāyavarī / tayā nāmāceṃ bhaya harī /
maga mhaṇe avadhārīṃ / āṇikeṃ cinheṃ

tari āṃgeṃ karmeṃ ḍhilā / jo maneṃ vikalpeṃ bharalā /
aḍavīṃcā avagaḻalā / kuhā jaisā

tayā toṃḍīṃ kāṃṭivaḍe / āṃtu nusadhīṃ hāḍeṃ /
aśuci teṇeṃ pāḍeṃ / sabāhya jo

jaiseṃ poṭālāgīṃ suṇeṃ / ughaḍeṃ jhāṃkaleṃ na mhaṇe /
taiseṃ āpaleṃ parāveṃ neṇe / dravyālāgīṃ

iyā grāmasiṃhāciyā ṭhāyīṃ / jaisā miḻaṇī ṭhāvo aṭhāvo nāhīṃ /
taisā strīviṣayīṃ kāṃhīṃ / vicārīnā

karmācā veḻu cuke / kāṃ nitya naimittika ṭhāke /
teṃ jayā na dukhe / jīvāmājīṃ

pāpī jo nisugu / puṇyāviṣayīṃ atinilāgu /
jayāciyā manīṃ vegu / vikalpācā

to jāṇa nikhiḻā / ajñānācā putaḻā /
jo bāṃdhoni ase ḍoḻāṃ / vittāśeteṃ

āṇi svārtheṃ aḻumāḻeṃ / jo dhairyāpāsoni caḻe /
jaiseṃ tṛṇabīja ḍhaḻe / muṃgiyecenī

pāvo sūdaliyā saveṃ / jaiseṃ thillara kālave /
taisā bhayāceni nāṃveṃ / gajabaje jo

manorathāṃciyā dhārasā / vāhaṇeṃ jayāciyā mānasā /
pūrīṃ paḍilā jaisā / dudhiyā pāhīṃ

vāyūceni sāvāyeṃ / dhū digaṃtarā jāye /
duḥkhavārtā hoye / taseṃ jayā

vāudhaṇāciyā parī / jo āśro kahīṃci na dharī /
kṣetrīṃ tīrthīṃ purīṃ / thāroṃ neṇe

kāṃ mātaliyā saraḍā / puḍhatī buḍukha puḍhatī śeṃḍā /
hiṃḍaṇavārā koraḍā / taisā jayā

jaisā rovilyāviṇeṃ / rāṃjaṇu thāroṃ neṇe /
taisā paḍe taiṃ rāhaṇeṃ / eऱhavīṃ hiṃḍe

tayācyā ṭhāyīṃ udaṃḍa / ajñāna ase vitaṃḍa /
jo cāṃcalyeṃ bhāvaṃḍa / markaṭāceṃ

āṇi paiṃ gā dhanurdharā / jayāciyā aṃtarā /
nāhīṃ voḍhāvārā / saṃyamācā

leṃḍiye ālā loṃḍhā / na manī vāḻuvecā varavaṃḍā /
taisā niṣedhāciyā toṃḍā / bihenā jo

vratāteṃ āḍa moḍī / svadharmu pāyeṃ volāṃḍī /
niyamācī āsa toḍī / jayācī kriyā

nāhīṃ pāpācā kaṃṭāḻā / neṇeṃ puṇyācā jivhāḻā /
lājecā peṃḍavaḻā / khāṇoni ghālī

kuḻeṃsīṃ jo pāṭhamorā / vedājñesīṃ duऱhā /
kṛtyākṛtyavyāpārā / nivāḍu neṇe

vasū jaisā mokāṭu / vārā jaisā aphāṭu /
phuṭalā jaisā pāṭu / nirjanīṃ

āṃdhaḻeṃ hātirūṃ mātaleṃ / kāṃ ḍoṃgarīṃ jaiseṃ peṭaleṃ /
taiseṃ viṣayīṃ suṭaleṃ / citta jayāceṃ

paiṃ ubadhaḍāṃ kāya na paḍe / mokāṭu koṇāṃ nātuḍe /
grāmadvārīṃce āḍeṃ / nolāṃḍī koṇa

jaiseṃ satrīṃ anna jāleṃ / kīṃ sāmānyā bīka āleṃ /
vāṇasiyeceṃ ubhaleṃ / koṇa na rige ?

taiseṃ jayāceṃ aṃtaḥkaraṇa / tayācyā ṭhāyīṃ saṃpūrṇa /
ajñānācī jāṇa / ṛddhi āhe

āṇi viṣayāṃcī goḍī / jo jītu melā na saṃḍī /
svargīṃhī khāvayā joḍī / yethūnicī

jo akhaṃḍa bhogā jace / jayā vyasana kāmyakriyeceṃ /
mukha dekhoni viraktāceṃ / sacaila karī

viṣo śiṇoni jāye / pari na śiṇe sāvadhu nohe /
kuhīlā hātīṃ khāye / koḍhī jaisā

kharī ṭeṃkoṃ nedī uḍe / lātauni phoḍī nākāḍeṃ /
taऱhī jevīṃ na kāḍhe / māghautā kharu

taisā jo viṣayāṃlāgīṃ / uḍī ghālī jaḻatiye āgīṃ /
vyasanācī āṃgīṃ / leṇīṃ miravī

phuṭoni paḍe taṃva / mṛga vāḍhavī hāṃva /
parī na mhaṇe te māva / rohiṇīcī

taisā janmoni mṛtyūvarī / viṣayīṃ trāsitāṃ bahutīṃ parīṃ /
taऱhī trāsu neghe dharī / adhika prema

pahiliye bāḻadaśe / āī bā heṃci piseṃ /
teṃ sare maga strīmāṃseṃ / bhuloni ṭhāke

maga strī bhogitāṃ thāvoṃ / vṛddhāpya lāge yevoṃ /
tevhāṃ toci premabhāvo / bāḻakāṃsi āṇī

āṃdhaḻeṃ vyāleṃ jaiseṃ / taisā bāḻeṃ parivase /
pari jīveṃ mare toṃ na trāse / viṣayāṃsi jo

jāṇa tayācyā ṭhāyīṃ / ajñānāsi pāru nāhīṃ /
ātāṃ āṇīka kāṃhīṃ / cinheṃ sāṃgoṃ

tari deha hāci ātmā / aiseyā jo manodharmā /
vaḻaghoniyāṃ karmā / āraṃbhu karī

āṇi uṇeṃ kāṃ pureṃ / jeṃ jeṃ kāṃhīṃ ācare /
tayāceni āviṣkareṃ / kuṃthoṃ lāge

ḍoīye ṭhevileni bhojeṃ / devalaviseṃ jevīṃ phuṃje /
taisā vidyāvayasā māje / utāṇā cāle

mhaṇe mīci eku āthī / mājhyāṃci gharīṃ saṃpattī /
mājhī ācaratī rītī / koṇā āhe

nāhīṃ mājheni pāḍeṃ vāḍu / mī sarvajña ekaci rūḍhu /
aisā garvatuṣṭīgaṃḍu / gheūni ṭhāke

vyādhi lāgaliyā māṇusā / nayeci bhoga dāūṃ jaisā /
nikeṃ na sāhe jo taisā / puḍhilāṃceṃ

paiṃ guṇa tetulā khāya / sneha kīṃ jāḻitu jāya /
jetha ṭhevije tetha hoya / masīseṃ

jīvaneṃ śiṃpilā tiḍapiḍī / vijilā prāṇa sāṃḍīṃ /
lāgalā tarī kāḍī / uroṃ nedī

āḻumāḻa prakāśu karī / tetulenīca ubārā dharī /
taisiyā dīpāci parī / suvidyu jo

auṣadhāceni nāṃveṃ amṛteṃ / jaisā navajvaru āṃbuthe /
kāṃ viṣaci hoūni parateṃ / sarpā dūdha

taisā sadguṇīṃ matsaru / vyutpattī ahaṃkāru /
tapojñāneṃ apāru / tāṭhā caḍhe

aṃtyu rāṇive baisavilā / āreṃ dhāraṇu giḻilā /
taisā garveṃ phugalā / dekhasī jo

jo lāṭaṇeṃ aisā na lave / pātharu tevīṃ na drave /
guṇiyāsi nāgave / phoḍaseṃ jaiseṃ

kiṃbahunā tayāpāśī / ajñāna āhe vāḍhīsīṃ /
heṃ nikareṃ gā tujasīṃ / bolata asoṃ

āṇīkahī dhanaṃjayā / jo gṛhadeha sāmagriyā /
na dekhe kālaceyā / janmāteṃ gā

kṛtaghnā upakāru kelā / kāṃ corā vyavahāru didhalā /
nisugu stavilā / visare jaisā

voḍhāḻitāṃ lāvileṃ / teṃ taiseṃca kāna pūṃsa voleṃ /
kīṃ puḍhatī voḍhāḻuṃ āleṃ / suṇeṃ jaiseṃ

beḍūka sāpāciyā toṃḍīṃ / jātase sabuḍabuḍīṃ /
to makṣikāṃciyā koḍīṃ / smarenā kāṃhīṃ ?

taisīṃ navahī dvāreṃ sravatī / āṃgīṃ dehācī lutī jitī /
jeṇeṃ jālī teṃ cittīṃ / salenā jayā

mātecyā udarakuharīṃ / pacūni viṣṭhecyā dātharīṃ /
jaṭharīṃ navamāsavarī / ukaḍalā jo

teṃ garbhīṃcī je vyathā / kāṃ jeṃ jāleṃ upajatāṃ /
teṃ kāṃhīṃci sarvathā / nāṭhavī jo

malamūtrapaṃkīṃ / je loḻateṃ bāḻa aṃkīṃ /
teṃ dekhoni jo na thuṃkīṃ / trāsu neghe

kālaci nā janma geleṃ / pāheci puḍhatī āleṃ /
aiseṃ heṃ kāṃhīṃ vāṭaleṃ / nāhīṃ jayā

āṇi paiṃ tayācī parī / jīvitācī pharārī /
dekhoni jo na karī / mṛtyuciṃtā

jiṇeyāceni viśvāseṃ / mṛtyu eka etha ase /
heṃ jayāceni mānaseṃ / mānijenā

alpodakīṃcā māsā / heṃ nāṭe aisiyā āśā /
na vaceci kāṃ jaisā / agādha ḍohāṃ

kāṃ gorīciyā bhulī / mṛga vyādhā dṛṣṭī na ghālī /
gaḻu na pāhatāṃ giḻilī / uṃḍī mīneṃ

dīpāciyā jhagamagā / jāḻīla heṃ pataṃgā /
neṇaveci paiṃ gā / jayāparī

gavhāru nidrāsukheṃ / ghara jaḻata ase teṃ na dekhe /
neṇatāṃ jeṃvī vikheṃ / rāṃdhileṃ anna

taisā jīvitāceni miṣeṃ / hā mṛtyuci ālā ase /
heṃ neṇeci rājaseṃ / sukheṃ jo gā

śarīrīṃcīṃ vāḍhī / ahorātrāṃcī joḍī /
viṣayasukhaprauḍhī / sācaci mānī

parī bāpuḍā aiseṃ neṇe / jeṃ veśyeceṃ sarvasva deṇeṃ /
teṃci teṃ nāgavaṇeṃ / rūpa etha

saṃvacorāceṃ sājaṇeṃ / teṃci teṃ prāṇa gheṇeṃ /
lepā snapana karaṇeṃ / toci nāśu

pāṃḍurogeṃ āṃga suṭaleṃ / teṃ tayāci nāṃve khuṃṭaleṃ /
taiseṃ neṇeṃ bhulaleṃ / āhāranidrā

sanmukha śūlā / dhāṃvatayā pāyeṃ capaḻā /
pratipadīṃ ye javaḻā / mṛtyu jevīṃ

tevīṃ dehā jaṃva jaṃva vāḍhu / jaṃva jaṃva divasāṃcā pavāḍu /
jaṃva jaṃva suravāḍu / bhogāṃcā yā

taṃva taṃva adhikādhikeṃ / maraṇa āyuṣyāteṃ jiṃke /
mīṭha jevīṃ udakeṃ / ghāṃsijata ase

taiseṃ jīvitva jāye / tayāstava kāḻu pāhe /
heṃ hātohātīṃceṃ navhe / ṭhāukeṃ jayā

kiṃbahunā pāṃḍavā / hā āṃgīṃcā mṛtyu nīca navā /
na dekhe jo māvā/ viṣayāṃciyā

to ajñānadeśīṃcā rāvo / yā bolā mahābāho/
na paḍe gā ṭhāvo / āṇikāṃcā

paiṃ jīvitāceni tokheṃ / jaisā kāṃ mṛtyu na dekhe /
taisāci tāruṇye pokheṃ / jarā na gaṇī

kaḍāḍīṃ loṭalā gāḍā / kāṃ śikharauni suṭalā dhoṃḍā /
taisā na dekhe jo puḍhāṃ / vārdhakya āhe

kāṃ āḍavohaḻā pāṇī āleṃ / kāṃ jaise mhaisayāceṃ jhuṃja mātaleṃ /
taiseṃ tāruṇyāce caḍhaleṃ / bhurareṃ jayā

puṣṭi lāge vigharoṃ / kāṃti pāhe nisaroṃ /
mastaka ādarīṃ śiroṃ- / bhāgīṃ kaṃpa

dāḍhī sāuḻa dharī / māna hālauni vārī /
tarī jo karī / māyecā paisu

puḍhīla urīṃ ādaḻe / taṃva na dekhe jevīṃ āṃdhaḻeṃ /
kāṃ ḍoḻyāvaraleṃ nigaḻe / āḻaśī toṣeṃ

taiseṃ tāruṇya ājiceṃ / bhogitāṃ vṛddhāpya pāheceṃ /
na dekhe toci sāceṃ / ajñānu gā

dekhe akṣameṃ kubjeṃ / kīṃ viṭāvūṃ lāge phuṃjeṃ /
parī na mhaṇe pāhe mājheṃ / aiseṃci bhave

āṇi āṃgīṃ vṛddhāpyatecī / saṃjñā ye maraṇācī /
parī jayā tāruṇyācī / bhulī na phiṭe

to ajñānāceṃ ghara / heṃ sācaci ghe uttara /
tevīṃci pariyesīṃ thora / cinheṃ āṇika

tari vāghāciye aḍave / eka veḻa ālā caroni daiveṃ /
teṇeṃ viśvāseṃ puḍhatī dhāṃve / vasū jaisā

kāṃ sarpagharāāṃtu / avacaṭeṃ ṭhevā āṇilā svasthu /
yetuliyāsāṭhīṃ niścitu / nāstiku hoya

taiseni avacaṭeṃ heṃ / ekadonī veḻāṃ lāhe /
etha roga eka āhe / heṃ mānīnā jo

vairiyā nīda ālī / ātāṃ dvaṃdveṃ mājhīṃ saralīṃ /
heṃ mānī to sapilī / mukalā jevīṃ

taisī āhāranidrecī ujarī / roga nivāṃtu joṃvarī /
taṃva jo na karī / vyādhī ciṃtā

āṇi strīputrādimeḻeṃ / saṃpatti jaṃva jaṃva phaḻe /
teṇeṃ rajeṃ ḍoḻe / jātī jayāce

saveṃci viyogu paḍaila / viḻaunī vipatti yeīla /
heṃ duḥkha puḍhīla / dekhenā jo

to ajñāna gā pāṃḍavā / āṇi tohī toci jāṇāvā /
jo iṃdriyeṃ avhāsavā / cārī etha

vayaseceni uvāyeṃ / saṃpattīceni sāvāyeṃ /
sevyāsevya jāye / sarakaṭitu

na karāveṃ teṃ karī / asaṃbhāvya manīṃ dharī /
ciṃtū naye teṃ vicārī / jayācī matī

righe jetha na righāveṃ / māge jeṃ na ghyāveṃ /
sparśe jetha na lāgāveṃ / āṃga mana

na jāveṃ tetha jāye / na pāhāveṃ teṃ jo pāhe /
na khāveṃ teṃ khāye / tevīṃci toṣe

na dharāvā to saṃgu / na lāgāveṃ tetha lāgu /
nācarāvā to mārgu / ācare jo

nāyakāveṃ teṃ āike / na bolāveṃ teṃ bake /
parī doṣa hotīla heṃ na dekhe / pravartatāṃ

āṃgā manāsi rucāveṃ / yetuleni kṛtyākṛtya nāṭhaveṃ /
jo karaṇeyāceni nāṃveṃ / bhalateṃci karī

pari pāpa maja hoīla / kāṃ narakayātanā yeīla /
heṃ kāṃhīṃci puḍhīla / dekhenā jo

tayāceni āṃgalageṃ / ajñāna jagīṃ dāṭugeṃ /
jeṃ sajñānāhī saṃgeṃ / jhoṃboṃ sake

parī aso heṃ āika / ajñāna cinheṃ āṇika /
jeṇeṃ tuja samyak / jāṇave teṃ

tarī jayācī prīti purī / guṃtalī dekhasī gharīṃ /
navagaṃdhakesarīṃ / bhramarī jaiśī

sākareciyā rāśī / baisalī nuṭhe māśī /
taiseni strīcitta āveśīṃ / jayāceṃ mana

ṭhelā beḍūka kuṃḍīṃ / maśaka guṃtalā śeṃbuḍīṃ /
jaisā ḍhoru sabuḍabuḍīṃ / rutalā paṃkīṃ

taiseṃ gharīṃhūni nighaṇeṃ / nāhīṃ jīveṃ maneṃ prāṇeṃ /
jayā sāpa hoūni asaṇeṃ / bhāṭīṃ tiyeṃ

priyottamāciyā kaṃṭhīṃ / pramadā ghe āṭī /
taiśī jīveṃsī koṃpaṭī / dharūni ṭhāke

madhurasoddeśeṃ / madhukara jace jaiseṃ /
gṛhasaṃgopana taiseṃ / karī jo gā

mhātārapaṇīṃ jāleṃ / mā āṇika eka vipāīleṃ /
tayāceṃ kāṃ jetuleṃ / mātāpitarāṃ

tetuleni pāḍeṃ pārthā / gharīṃ jayā prema āsthā /
āṇi strīvāṃcūni sarvathā / jāṇenā jo

taisā strīdehīṃ jo jīveṃ / paḍoniyā sarvabhāveṃ /
koṇa mī kāya karāveṃ / kāṃhīṃ neṇe

mahāpuruṣāceṃ citta / jāliyā vastugata /
ṭhāke vyavahārajāta / jayāparī

hāni lāja na dekhe / parāpavādu nāike /
jayācīṃ iṃdriyeṃ ekamukheṃ / striyā kelīṃ

citta ārādhī strīyeceṃ / āṇi tiyeceni chaṃdeṃ nāce /
mākaḍa gāruḍiyāceṃ / jaiseṃ hoya

āpaṇapeṃhī śiṇavī / iṣṭamitra dukhavī /
maga kavaḍāci vāḍhavī / lobhī jaisā

taisā dānapuṇyeṃ khāṃcī / gotrakuṭuṃbā vaṃcī /
parī gārī bharī striyecī / uṇī hoṃ nedī

pūjitī daivateṃ jogāvī / gurūteṃ boleṃ jhakavī /
māyabāpāṃ dāvī / nidārapaṇa

striyecyā tarī vikhīṃ / bhogusaṃpattī anekīṃ /
āṇī vastu nikī / je je dekhe

premāthileni bhakteṃ / jaiseni bhajije kuḻadaivateṃ /
taisā ekāgracitteṃ / strī jo upāsī

sāca āṇi cokha / teṃ striyesīci aśekha /
yerāṃviṣayīṃ jogāvaṇūka / tehī nāhīṃ

iyeteṃ hana koṇī dekhaila / iyesī vekhāseṃ jāīla /
tarī yugaci buḍaila / aiseṃ jayā

nāyaṭyāṃbheṇa / na moḍije nāgāṃcī āṇa /
taisī pāḻī uṇakhuṇa / strīyecī jo

kiṃbahunā dhanaṃjayā / strīci sarvasva jayā /
āṇi tiyeciyā jāliyā- / lāgīṃ prema

āṇikahī jeṃ samasta / tiyeceṃ saṃpattijāta /
teṃ jīvāhūni āpta / mānī jo kāṃ

to ajñānāsī mūḻa / ajñānā tyāceni baḻa /
heṃ aso kevaḻa / teṃci rūpa

āṇi mātaliyā sāgarīṃ / mokalaliyā tarī /
lāṭāṃcyā yerajhārīṃ / āṃdoḻe jevīṃ

tevīṃ priya vastu pāve / āṇi sukheṃ jo uṃcāve /
taisāci apriyāsaveṃ / taḻavaṭu ghe

aiseni jayāce cittīṃ / vaiṣamyasāmyācī vokhatī /
vāhe to mahāmatī / ajñāna gā

āṇi mājhyā ṭhāyīṃ bhaktī / phaḻālāgīṃ jayā ārtī /
dhanoddeśeṃ viraktī / naṭaṇeṃ jevīṃ

nātarī kāṃtācyā mānasī / rigoni svairiṇī jaisī /
rāhāṭe jāreṃsīṃ / jāvayālāgīṃ

taisā māteṃ kirīṭī / bhajatī gā pāuṭī /
karūni jo diṭhī / viṣo sūye

āṇi bhajinnaliyāsaveṃ / to viṣo jarī na pāve /
tarī sāṃḍī mhaṇe āghaveṃ / ṭavāḻa heṃ

kuṇabaṭa kuḻavāḍī / taisā āna āna deva māṃḍī /
ādilācī paravaḍī / karī tayā

tayā gurumārgā ṭeṃkeṃ / jayācā sugaravā dekhe /
tarī tayācā maṃtra śike / yeru neghe

prāṇijāteṃsīṃ niṣṭhuru / sthāvarīṃ bahu bharu /
tevīṃci nāhīṃ ekasaru / nirvāho jayā

mājhī mūrti niphajavī / te gharāce konīṃ baisavī /
āpaṇa devo devī / yātre jāya

nitya ārādhana mājheṃ / kājīṃ kuḻadaivatā bhaje /
parvaviśeṣeṃ kīje / pūjā ānā

mājheṃ adhiṣṭhāna gharīṃ / āṇi vovase ānāce karī /
pitṛkāryāvasarīṃ / pitarāṃcā hoya

ekādaśīcyā divaśīṃ / jetulā pāḍu āmhāṃsī /
tetulāci nāgāṃsī / paṃcamīcyā divaśīṃ

cautha moṭakī pāhe / āṇi gaṇeśācāci hoye /
cāvadasī mhaṇe māye / tujhāci vo durge

nitya naimittikeṃ karmeṃ sāṃḍī / maga baise navacaṃḍī /
ādityavārīṃ vāḍhī / bahiravāṃ pātrīṃ

pāṭhīṃ somavāra pāve / āṇi beleṃsī liṃgā dhāṃve /
aisā ekalāci āghave / jogāvī jo

aisā akhaṃḍa bhajana karī / ugā nohe kṣaṇabharī /
avaghena gāṃvadvārīṃ / aheva jaisī

aiseni jo bhaktu / dekhasī sairā dhāṃvatu /
jāṇa ajñānācā mūrtu / avatāra to

āṇi ekāṃteṃ cokhaṭeṃ / tapovaneṃ tīrthe taṭeṃ /
dekhoni jo gā viṭe / tohi toci

jayā janapadīṃ sukha / gajabajeceṃ kavatika /
vānūṃ āvaḍe laukika / tohi tocī

āṇi ātmā gocaru hoye / aisī je vidyā āhe /
te āikoni ḍaura vāhe / vidvāṃsu jo

upaniṣadāṃkaḍe na vace / yogaśāstra na ruce /
adhyātmajñānīṃ jayāceṃ / manaci nāhīṃ

ātmacarcā ekī āthī / aisiye buddhīcī bhiṃtī /
pāḍūni jayācī matī / voḍhāḻa jāhalī

karmakāṃḍa tarī jāṇe / mukhodgata purāṇeṃ /
jyotiṣīṃ to mhaṇe / taiseṃci hoya

śilpīṃ ati nipuṇa / sūpakarmīṃhī pravīṇa /
vidhi ātharvaṇa / hātīṃ āthī

kokīṃ nāhīṃ ṭheleṃ / bhārata karī mhaṇitaleṃ /
āgama āphāvile / mūrta hotīṃ

nītijāta sujhe / vaidyakahī bujhe /
kāvyanāṭakīṃ dujeṃ / catura nāhīṃ

smṛtīṃcī carcā / daṃśu jāṇe gāruḍiyācā /
nighaṃṭu prajñecā / pāikī karī

paiṃ vyākaraṇīṃ cokhaḍā / tarkīṃ atigāḍhā /
parī eka ātmajñānīṃ phuḍā / jātyaṃdhu jo

teṃ ekavāṃcūni āghavāṃ śāstrīṃ / siddhāṃta nirmāṇadhātrī /
parī jaḻoṃ teṃ mūḻanakṣatrīṃ / na pāheṃ gā

morāāṃgīṃ aśeṣeṃ / piseṃ asatīṃ ḍoḻaseṃ /
parī ekalī dṛṣṭi nase / taiseṃ teṃ gā

jarī paramāṇūvaḍheṃ / saṃjīvanīmūḻa joḍe /
tarī bahu kāya gāḍe / bharaṇeṃ yereṃ ?

āyuṣyeṃvīṇa lakṣaṇeṃ / siseṃvīṇa aḻaṃkaraṇeṃ /
vohareṃvīṇa vādhāvaṇeṃ / to viṭaṃbu gā

taiseṃ śāstrajāta jāṇa / āghaveṃci apramāṇa /
adhyātmajñāneṃviṇa / ekalenī

yālāgīṃ arjunā pāhīṃ / adhyātmajñānācyā ṭhāyīṃ /
jayā nityabodhu nāhīṃ / śāstramūḍhā

tayā śarīra jeṃ jāleṃ / teṃ ajñānāceṃ bīṃ viruḍhaleṃ /
tayāceṃ vyutpannatva geleṃ / ajñānavelīṃ

to jeṃ jeṃ bole / teṃ ajñānaci phulaleṃ /
tayāceṃ puṇya jeṃ phaḻaleṃ / teṃ ajñāna gā

āṇi adhyātmajñāna kāṃhīṃ / jeṇeṃ mānileṃci nāhīṃ /
to jñānārthu na dekhe kāī / heṃ bolāveṃ aseṃ ?

ailīci thaḍī na pavatāṃ / paḻe jo māghautā /
tayā pailadvīpīṃcī vārtā / kāya hoya ?

kāṃ dāravaṃṭhāci jayāceṃ / śīra roṃvileṃ khāṃce /
to kevīṃ parivarīṃceṃ / ṭhevileṃ dekhe ?

tevīṃ adhyātmajñānīṃ jayā / anoḻakha dhanaṃjayā /
tayā jñānārthu dekhāvayā / viṣo kāī ?

mhaṇauni ātāṃ viśeṣeṃ / to jñānāceṃ tattva na dekhe /
heṃ sāṃgāveṃ āṃkheṃlekheṃ / na lage tuja

jevhāṃ sagarbhe vāḍhileṃ / tevhāṃci poṭīṃceṃ dhāleṃ /
taiseṃ māgileṃ padeṃ bolileṃ / teṃci hoya

vāṃcūniyāṃ vegaḻeṃ / rūpa karaṇeṃ heṃ na miḻe /
jevīṃ avaṃtileṃ āṃdhaḻeṃ / teṃ dujenasīṃ ye

evaṃ iye uparatīṃ / ajñānacinheṃ māgutīṃ /
amānitvādi prabhṛtī / vākhāṇilīṃ

je jñānapadeṃ aṭharā / keliyāṃ yerī moharāṃ /
ajñāna yā ākārā / sahajeṃ yetī

māgāṃ ślokāceni ardhārdheṃ / aiseṃ sāṃgitaleṃ śrīmukuṃdeṃ /
nā upharāṭīṃ iyeṃ jñānapadeṃ / teṃci ajñāna

mhaṇauni iyā vāhaṇīṃ / kelī myāṃ upalavaṇī /
vāṃcūni dudhā meḻaūni pāṇī / phāra kīje ?

taiseṃ jī na baḍabaḍīṃ / padācī kora na sāṃḍī /
parī mūḻadhvanīṃciye vāḍhī / nimitta jāhaloṃ

taṃva śrote mhaṇatī rāheṃ / keṃ parihārā ṭhāvo āhe ? /
bihisī kāṃ vāyeṃ / kavipoṣakā ?

tūteṃ śrīmurārī / mhaṇitaleṃ āmhī prakaṭa karīṃ /
jeṃ abhiprāya gavharīṃ / jhāṃkile āmhīṃ

teṃ devāceṃ manogata / dāvita āhāsī tūṃ mūrta /
heṃhī mhaṇatāṃ citta / dāṭaila tujheṃ

mhaṇauni aso heṃ na boloṃ / pari sāviyā gā toṣaloṃ /
je jñānatariye meḻaviloṃ / śravaṇa sukhāciye

ātāṃ iyāvarī / je to śrīharī /
bolilā teṃ karīṃ / kathana vegāṃ

iyā saṃtavākyāsariseṃ / mhaṇitaleṃ nivṛttidāseṃ /
jī avadhārā tarī aiseṃ / bolileṃ deveṃ

mhaṇatī tuvāṃ pāṃḍavā / hā cinhasamuccayo āghavā /
āyakilā to jāṇāvā / ajñānabhāgu

iyā ajñānavibhāgā / pāṭhī deūni paiṃ gā /
jñānavikhīṃ cāṃgā / dṛḍhā hoīje

maga nirvāḻileni jñāneṃ / jñeya bheṭela maneṃ /
teṃ jāṇāvayā arjuneṃ / āsa kelī

taṃva sarvajñāṃcā rāvo / mhaṇe jāṇauni tayācā bhāvo /
pariseṃ jñeyācā abhiprāvo / sāṃgoṃ ātāṃ

tari jñeya aiseṃ mhaṇaṇeṃ / vastūteṃ yeṇeṃci kāraṇeṃ /
jeṃ jñāneṃvāṃcūni kavaṇeṃ / upāyeṃ naye

āṇi jāṇitaleyāvarauteṃ / kāṃhīṃca karaṇeṃ nāhīṃ jetheṃ /
jāṇaṇeṃci tanmayāteṃ / āṇī jayāceṃ

jeṃ jāṇitaleyāsāṭhīṃ / saṃsāra kāḍhūniyāṃ kāṃṭhīṃ /
jironi jāije poṭīṃ / nityānaṃdācyā

teṃ jñeya gā aiseṃ / ādi jayā nase /
parabrahma āpaiseṃ / nāma jayā

jeṃ nāhīṃ mhaṇoṃ jāije / taṃva viśvākāreṃ dekhije /
āṇi viśvaci aiseṃ mhaṇije / tari he māyā

rūpa varṇa vyaktī / nāhīṃ dṛśya dṛṣṭā sthitī /
tarī koṇeṃ kaiseṃ āthī / mhaṇāveṃ pāṃ

āṇi sācaci jarī nāhīṃ / tarī mahadādi koṇeṃ ṭhāīṃ /
sphurata kaiceṃ kāī / teṇeṃvīṇa ase ?

mhaṇauni āthī nāthī he bolī / jeṃ dekhoni mukī jāhalī /
vicāreṃsīṃ moḍalī / vāṭa jetheṃ

jaisī bhāṃḍaghaṭaśarāvīṃ / tadākāreṃ ase pṛthvī /
taiseṃ sarva hoūniyāṃ sarvīṃ / ase je vastu

āghavāṃci deśīṃ kāḻīṃ / navhatāṃ deśakāḻāṃvegaḻī /
je kriyā sthūḻāsthūḻīṃ / teci hāta jayāce

tayāteṃ yākāraṇeṃ / viśvabāhū aiseṃ mhaṇaṇeṃ /
jeṃ sarvaci sarvapaṇeṃ / sarvadā karī

āṇi samastāṃhī ṭhāyā / eke kāḻīṃ dhanaṃjayā /
āleṃ ase mhaṇauni jayā / viśvāṃghrīnāma

paiṃ savitayā āṃga ḍoḻe / nāhīṃta vegaḻe vegaḻe /
taiseṃ sarvadraṣṭe sakaḻeṃ / svarūpeṃ jeṃ

mhaṇauni viśvataścakṣu / hā acakṣūcyā ṭhāyīṃ pakṣu /
bolāvayā dakṣu / jāhalā vedu

jeṃ sarvāṃce śirāvarī / nitya nāṃde sarvāṃparī /
aisiye sthitīvarī / viśvamūrdhā mhaṇipe

paiṃ gā mūrti teṃci mukha / hutāśanā jaiseṃ dekha /
taiseṃ sarvapaṇeṃ aśekha / bhokte je

yālāgīṃ tayā pārthā / viśvatomukha he vyavasthā /
ālī vākpathā / śrutīciyā

āṇi vastumātrīṃ gagana / jaiseṃ ase saṃlagna /
taiseṃ śabdajātīṃ kāna / sarvatra jayā

mhaṇauni āmhīṃ tayāteṃ / mhaṇoṃ sarvatra āikateṃ /
evaṃ jeṃ sarvāṃteṃ / āvarūni ase

eऱhavīṃ tarī mahāmatī / viśvataścakṣu iyā śrutī /
tayāciyā vyāptī / rūpa keleṃ

vāṃcūni hasta netra pāye / heṃ bhāṣa tetha keṃ āhe ? /
sarva śūnyācā na sāhe / niṣkarṣu jeṃ

paiṃ kalloḻāteṃ kalloḻeṃ / grasijata ase aiseṃ kaḻe /
parī grasiteṃ grāsāvegaḻeṃ / ase kāī ?

taiseṃ sācaci jeṃ eka / tetha keṃ vyāpyavyāpaka ? /
parī bolāvayā nāveka / karāveṃ lāge

paiṃ śūnya jaiṃ dāvāveṃ jāhaleṃ / taiṃ biṃduleṃ eka pāhije keleṃ /
taiseṃ advaita sāṃgāveṃ boleṃ / taiṃ dvaita kīje

eऱhavīṃ tarī pārthā / guruśiṣyasatpathā /
āḍaḻu paḍe sarvathā / bola khuṃṭe

mhaṇauni gā śrutī / dvaitabhāveṃ advaitīṃ /
nirūpaṇācī vāhatī / vāṭa kelī

teṃci ātāṃ avadhārīṃ / iye netragocareṃ ākārīṃ /
teṃ jñeya jayāparī / vyāpaka ase

tarī teṃ gā kirīṭī aiseṃ / avakāśīṃ ākāśa jaiseṃ /
paṭīṃ paṭu hoūni ase / taṃtu jevīṃ

udaka hoūni udakīṃ / rasu jaisā avalokīṃ /
dīpapaṇeṃ dīpakīṃ / teja jaiseṃ

karpūratveṃ kāpurīṃ / saurabhya ase jayāparī /
śarīra hoūni śarīrīṃ / karma jevīṃ

kiṃbahunā pāṃḍavā / soneṃci sonayācā ravā /
taiseṃ jeṃ yā sarvāṃ / sarvāṃgīṃ ase

parī ravepaṇāmājivaḍe / taṃva ravā aiseṃ āvaḍe /
vāṃcūni soneṃ sāṃgaḍeṃ / sonayā jevīṃ

paiṃ gā voghuci vāṃkuḍā / pari pāṇī ujū suhāḍā /
vanhi ālā lokhaṃḍā / loha navhe kīṃ

ghaṭākāreṃ veṃṭāḻeṃ / tetha nabha game vāṭoḻeṃ /
maṭhīṃ tarī cauphaḻeṃ / āye dise

tari te avakāśa jaiseṃ / nohijatīci kāṃ ākāśeṃ /
jeṃ vikāra hoūni taiseṃ / vikārī nohe

mana mukhya iṃdriyāṃ / sattvādi guṇāṃ yayāṃ- /
sārikheṃ aiseṃ dhanaṃjayā / āvaḍe kīra

paiṃ guḻācī goḍī / nohe bāṃdhayā sāṃgaḍī /
taisīṃ guṇa iṃdriyeṃ phuḍīṃ / nāhīṃ tetha

agā kṣīrāciye daśe / ghṛta kṣīrākāreṃ ase /
parī kṣīraci nohe jaiseṃ / kapidhvajā

taiseṃ jeṃ iye vikārīṃ / vikāra nohe avadhārīṃ /
paiṃ ākārā nāma bhoṃvarī / yera sone teṃ soneṃ

iyā ughaḍa maऱhāṭiyā / teṃ vegaḻepaṇa dhanaṃjayā /
jāṇa guṇa iṃdriyāṃ- / pāsoniyāṃ

nāmarūpasaṃbaṃdhu / jātikriyābhedu /
hā ākārāsīca pravādu / vastūsi nāhīṃ

teṃ guṇa navhe kahīṃ / guṇā tayā saṃbaṃdhu nāhīṃ /
parī tayācyāci ṭhāyīṃ / ābhāsatī

yetuleyāsāṭhīṃ / saṃbhrāṃtācyā poṭīṃ /
aiseṃ jāya kirīṭī / je heṃci dharī

tarī teṃ gā dharaṇeṃ aiseṃ / abhrāteṃ jevīṃ ākāśeṃ /
kāṃ prativadana jaiseṃ / ārasenī

nātarī sūrya pratimaṃḍala / jaiseni dharī salila /
kāṃ raśmikarīṃ mṛgajaḻa / dharije jevīṃ

taiseṃ gā saṃbaṃdheṃvīṇa / yayā sarvāṃteṃ dharī nirguṇa /
parī teṃ vāyāṃ jāṇa / mithyādṛṣṭī

āṇi yāparī nirguṇeṃ / guṇāteṃ bhogaṇeṃ /
raṃkā rājya karaṇeṃ / svapnīṃ jaiseṃ

mhaṇauni guṇācā saṃgu / athavā guṇabhogu /
hā nirguṇīṃ lāgu / boloṃ naye

jeṃ carācara bhūtāṃ- / mājīṃ ase paṃḍusutā /
nānā vanhīṃ uṣṇatā / abhedeṃ jaisī

taiseni avināśabhāveṃ / jeṃ sūkṣmadaśe āghaveṃ /
vyāpūni ase teṃ jāṇāveṃ / jñeya etha

jeṃ eka āṃtubāherī / jeṃ eka javaḻa durī /
jeṃ ekavāṃcūni parī / dujīṃ nāhīṃ

kṣīrasāgarīṃcī goḍī / mājīṃ bahu thaḍiye thoḍī /
heṃ nāhīṃ tayā paravaḍī / pūrṇa jeṃ gā

svedajādiprabhṛtī / vegaḻālyāṃ bhūtīṃ /
jayāciye anusyūtīṃ / khomaṇeṃ nāhīṃ

paiṃ śrote mukhaṭiḻakā / ghaṭasahasrā anekāṃ- /
mājīṃ biṃboni caṃdrikā / na bhede jevīṃ

nānā lavaṇakaṇāciye rāśī / kṣāratā ekaci jaisī /
kāṃ koḍī ekīṃ ūsīṃ / ekaci goḍī

taiseṃ anekīṃ bhūtajātīṃ / jeṃ āhe ekī vyāptī /
viśvakāryā sumatī / kāraṇa jeṃ gā

mhaṇauni hā bhūtākāru / jethoni teṃci tayā ādhāru /
kalloḻā sāgaru / jiyāparī

bālyādi tinhīṃ vayasīṃ / kāyā ekaci jaisī /
taiseṃ ādisthitigrāsīṃ / akhaṃḍa jeṃ

sāyaṃprātarmadhyāna / hotāṃ jātāṃ dinamāna /
jaiseṃ kāṃ gagana / pālaṭenā

agā sṛṣṭiveḻe priyottamā / jayā nāṃva mhaṇatī brahmā /
vyāpti jeṃ viṣṇunāmā / pātra jāhaleṃ

maga ākāru hā hārape / tevhāṃ rudra jeṃ mhaṇipe /
teṃhī guṇatraya jevhāṃ lope / taiṃ jeṃ śūnya

nabhāceṃ śūnyatva giḻūna / guṇatrayāteṃ nuraūna /
teṃ śūnya teṃ mahāśūnya / śrutivacanasaṃmata

jeṃ agnīceṃ dīpana / jeṃ caṃdrāceṃ jīvana /
sūryāce nayana / dekhatī jeṇeṃ

jayāceni ujiyeḍeṃ / tārāṃgaṇa ubhaḍeṃ /
mahāteja suravāḍeṃ / rāhāṭe jeṇeṃ

jeṃ ādīcī ādī / jeṃ vṛddhīcī vṛddhī /
buddhīcī je buddhī / jīvācā jīvu

jeṃ manāceṃ mana / jeṃ netrāce nayana /
kānāce kāna / vācecī vācā

jeṃ prāṇācā prāṇa / jeṃ gatīce caraṇa /
kriyeceṃ kartepaṇa / jayāceni

ākāru jeṇeṃ ākāre / vistāru jeṇeṃ vistāre /
saṃhāru jeṇeṃ saṃhāre / paṃḍukumarā

jeṃ medinīcī medinī / jeṃ pāṇī piūni ase pāṇī /
tejā divelāvaṇī / jeṇeṃ tejeṃ

jeṃ vāyūcā śvāsośvāsu / jeṃ gaganācā avakāśu /
heṃ aso āghavācī ābhāsu / ābhāse jeṇeṃ

kiṃbahunā pāṃḍavā / jeṃ āghaveṃci ase āghavā /
jetha nāhīṃ rigāvā / dvaitabhāvāsī

jeṃ dekhiliyācisaveṃ / dṛśya draṣṭā heṃ āghaveṃ /
ekavāṭa kālave / sāmarasyeṃ

maga teṃci hoya jñāna / jñātā jñeya hana /
jñāneṃ gamije sthāna / teṃhi teṃcī

jaiseṃ saraliyāṃ lekha / āṃkha hotī eka /
taiseṃ sādhyasādhanādika / aikyāsi ye

arjunā jiye ṭhāyīṃ / na sare dvaitācī vahī /
heṃ aso jeṃ hṛdayīṃ / sarvāṃcyā ase

evaṃ tujapuḍhāṃ / ādīṃ kṣetra suhāḍā /
dāvileṃ phāḍovāḍāṃ / vivaṃcunī

taiseṃci kṣetrāpāṭhīṃ / jaiseni dekhasī diṭhī /
teṃ jñānahī kirīṭī / sāṃgitaleṃ

ajñānāhī kautukeṃ / rūpa keleṃ nikeṃ /
jaṃva āyaṇī tujhī ṭeṃke / pure mhaṇe

āṇi ātāṃ heṃ rokaḍeṃ / upapattīceni pavāḍeṃ /
nirūpileṃ ughaḍeṃ / jñeya paiṃ gā

he āghavīca vivaṃcanā / buddhī bharoni arjunā /
matsiddhibhāvanā / mājhiyā yetī

dehādi parigrahīṃ / saṃnyāsu karūniyāṃ jihīṃ /
jīvu mājhyā ṭhāīṃ / vṛttiku kelā

te māteṃ kirīṭī / heṃci jāṇauniyāṃ śevaṭīṃ /
āpaṇapayāṃ sāṭovāṭīṃ / mīci hotī

mīci hotī parī / he mukhya gā avadhārīṃ /
sohopī sarvāṃparī / racilīṃ āmhīṃ

kaḍāṃ pāyarī kīje / nirāḻīṃ mācu bāṃdhije /
athāvīṃ suije / tarī jaisī

eऱhavīṃ avagheṃci ātmā / heṃ sāṃgoṃ jarī vīrottamā /
parī tujhiyā manodharmā / miḻela nā

mhaṇauni ekaci saṃcaleṃ / caturdhā āmhīṃ keleṃ /
jeṃ adaḻapaṇa dekhileṃ / tujhiye prajñe

paiṃ bāḻa jaiṃ jevavije / taiṃ ghāṃsu visā ṭhāyīṃ kīje /
taiseṃ ekaci heṃcaturvyājeṃ / kathileṃ āmhīṃ

eka kṣetra eka jñāna / eka jñeya eka ajñāna /
he bhāga kele avadhāna / jāṇauni tujheṃ

āṇi aisenahī pārthā / jarī hā abhiprāvo tuja hātā /
naye tarī he vyavasthā / eka veḻa sāṃgoṃ

ātāṃ cauṭhāyīṃ na karūṃ / ekahī mhaṇauni na sarūṃ /
ātmānātmayā dharūṃ / sarisā pāḍu

pari tuvāṃ yetuleṃ karāveṃ / māgoṃ teṃ āmhāṃ deāveṃ /
je kānaci nāṃva ṭhevāveṃ / āpaṇa paiṃ gā

yā śrīkṛṣṇāciyā bolā / pārthu romāṃcitu jāhalā /
tetha devo mhaṇatī bhalā / ucaṃbaḻenā

aiseni to yetāṃ vegu / dharūni mhaṇe śrīraṃgu /
prakṛtipuruṣavibhāgu / pariseṃ sāṃgoṃ

jayā mārgāteṃ jagīṃ / sāṃkhya mhaṇatī yogī /
jayāciye bhāṭivelāgīṃ / mī kapila jāhaloṃ

to āika nirdokhu / prakṛtipuruṣaviveku /
mhaṇe ādipurukhu / arjunāteṃ

tarī puruṣa anādi āthī / āṇi taiṃci lāgoni prakṛti /
saṃsarisī divorātī / donī jaisī

kāṃ rūpa nohe vāyāṃ / parī rūpā lāgalī chāyā /
nikaṇu vāḍhe dhanaṃjayā / kaṇeṃsīṃ koṃḍā

taisīṃ jāṇa javaṭeṃ / donhīṃ iyeṃ ekavaṭe /
prakṛtipuruṣa pragaṭeṃ / anādisiddheṃ

paiṃ kṣetra yeṇeṃ nāṃveṃ / jeṃ sāṃgitaleṃ āghaveṃ /
teṃci etha jāṇāveṃ / prakṛti he gā

āṇi kṣetrajña aiseṃ / jayāteṃ mhaṇitaleṃ ase /
to puruṣa heṃ anārise / na boloṃ gheīṃ

iyeṃ ānāneṃ nāṃveṃ / parī nirūpya āna nohe /
heṃ lakṣaṇa na cukāveṃ / puḍhatapuḍhatī

tarī kevaḻa je sattā / to puruṣa gā paṃḍusutā /
prakṛtīteṃ samastāṃ / kriyā nāma

buddhi iṃdriyeṃ aṃtaḥkaraṇa / ityādi vikārabharaṇa /
āṇi te tinhī guṇa / sattvādika

hā āghavāci meḻāvā / prakṛtī jāhalā jāṇāvā /
heci hetu saṃbhavā / karmāciyā

tetha icchā āṇi buddhi / ghaḍavī ahaṃkāreṃsīṃ ādhīṃ /
maga tiyā lāvitī vedhīṃ / kāraṇācyā

teṃci kāraṇa ṭhākāvayā / jeṃ sūtra dharaṇeṃ upāyā /
tayā nāṃva dhanaṃjayā / kārya paiṃ gā

āṇi icchā madācyā thāvīṃ / lāgalī manāteṃ uṭhavī /
teṃ iṃdriyeṃ rāhāṭavī / heṃ kartṛtva paiṃ gā

mhaṇauni tīnhī yā jāṇā / kāryakartṛtvakāraṇā /
prakṛti mūḻa he rāṇā / siddhāṃcā mhaṇe

evaṃ tihīṃceni samavāyeṃ / prakṛti karmarūpa hoye /
parī jayā guṇā vāḍhe trāye / tyāci sārikhī

jeṃ sattvaguṇeṃ adhiṣṭhije / teṃ satkarma mhaṇije /
rajoguṇeṃ niphaje / madhyama teṃ

jeṃ kāṃ kevaḻa tameṃ / hotī jiyeṃ karmeṃ /
niṣiddheṃ adhameṃ / jāṇa tiyeṃ

aiseni saṃtāsaṃteṃ / karmeṃ prakṛtīstava hoteṃ /
tayāpāsoni nirvāḻateṃ / sukhaduḥkha gā

asaṃtīṃ duḥkha upaje / satkarmīṃ sukha niphaje /
tayā dohīṃcā bolije / bhogu puruṣā

sukhaduḥkheṃ jaṃvavarī / niphajatī sācokārīṃ /
taṃva prakṛti udyamu karī / puruṣu bhogī

prakṛtipuruṣāṃcī kuḻavāḍī / sāṃgatāṃ asaṃgaḍī /
je āṃbulī joḍī / āṃbulā khāya

āṃbulā āṃbuliye / saṃgatī nā soye /
kīṃ āṃbulī jaga viye / coja aikā

je anaṃgu to peṃdhā / nikavaḍā nusadhā /
jīrṇu ativṛddhā- / pāsoni vṛddhu

tayā āḍanāṃva puruṣu / eऱhavīṃ strī nā napuṃsaku /
kiṃbahunā eku / niścayo nāhīṃ

to acakṣu aśravaṇu / ahastu acaraṇu /
rūpa nā varṇu / nāma āthī

arjunā kāṃhīṃci jetha nāhīṃ / to prakṛtīcā bhartā pāhīṃ /
kīṃ bhogaṇeṃ aisayāhī / sukhaduḥkhāṃceṃ

to tarī akartā / udāsu abhoktā /
parī iyā pativratā / bhogavije

jiyeteṃ aḻumāḻu / rūpāguṇācā cāḻaḍhāḻu /
te bhalataisāhī kheḻu / lekhā āṇī

mā iye prakṛtī taṃva / guṇamayī heṃci nāṃva /
kiṃbahunā sāveva / guṇa teci he

he pratikṣaṇīṃ nītya navī / rūpā guṇācīca āghavī /
jaḍāteṃhī mājavī / iyecā māju

nāmeṃ iyeṃ prasiddheṃ / sneho iyā snigdheṃ /
iṃdriyeṃ prabuddheṃ / iyeceni

kāyi mana heṃ napuṃsaka / kīṃ te bhogavī tinhī loka /
aiseṃ aiseṃ alaukika / karaṇeṃ iyeceṃ

he bhramāce mahādvīpa / vyāptīceṃ rūpa /
vikāra umapa / iyā kele

he kāmācī māṃḍavī / he mohavanīṃcī mādhavī /
iye prasiddhaci daivī / māyā he nāma

he vāṅmayācī vāḍhī / he sākārapaṇācī joḍī /
prapaṃcācī dhāḍī / abhaṃga he

kaḻā ethuni jāliyā / vidyā iyecyā keliyā /
icchā jñāna kriyā / viyālī he

he nādācī ṭāṃkasāḻa / he camatkārāceṃ veḻāuḻa /
kiṃbahunā sakaḻa / kheḻu iyecā

je utpatti pralayo hota / te iyece sāyaṃprāta /
heṃ aso adbhuta / mohana he

he advayāceṃ dusareṃ / he niḥsaṃgāceṃ soyare /
nirāḻeṃsi ghareṃ / nāṃdata ase

iyeteṃ yetulāvarī / saubhāgyavyāptīcī thorī /
mhaṇauni tayā āvarī / anāvarāteṃ

tayācyā taṃva ṭhāyīṃ / nipaṭūni kāṃhīṃci nāhīṃ /
kīṃ tayā āghavehīṃ / āpaṇaci hoya

tayā svayaṃbhācī saṃbhūtī / tayā amūrtācī mūrtī /
āpaṇa hoya sthitī / ṭhāvo tayā

tayā anārtācī ārtī / tayā pūrṇācī tṛptī /
tayā akuḻācī jātī- / gota hoya

tayā acarcāceṃ cinha / tayā apārāceṃ māna /
tayā amanaskāceṃ mana / buddhīhī hoya

tayā nirākārācā ākāru / tayā nirvyāpārācā vyāpāru /
nirahaṃkārācā ahaṃkāru / hoūni ṭhāke

tayā anāmāceṃ nāma / tayā ajāceṃ janma /
āpaṇa hoya karma- / kriyā tayā

tayā nirguṇāce guṇa / tayā acaraṇāce caraṇa /
tayā aśravaṇāce śravaṇa / acakṣūce cakṣu

tayā bhāvātītāce bhāva / tayā niravayavāce avayava /
kiṃbahunā hoya sarva / puruṣāceṃ he

aiseni iyā prakṛtī / āpuliyā sarva vyāptī /
tayā avikārāteṃ vikṛtī- / mājīṃ kīje

tetha puruṣatva jeṃ ase / teṃ ye iye prakṛtidaśe /
caṃdramā aṃvase / paḍilā jaisā

vidaḻa bahu cokhā / mīnaliyā vālā ekā /
kasu hoya pāṃcakā / jayāparī

kāṃ sādhūteṃ goṃdhaḻī / saṃcāroni suye maiḻī /
nānā sudinācā ābhāḻīṃ / durdinu kīje

jevīṃ paya paśūcyā poṭīṃ / kāṃ vanhi jaisā kāṣṭhīṃ /
guṃḍūni ghetalā paṭīṃ / ratnadīpu

rājā parādhīnu jāhalā / kāṃ siṃhu rogeṃ ruṃdhalā /
taisā puruṣa prakṛtī ālā / svatejā muke

jāgatā naru sahasā / nidrā pāḍūni jaisā /
svapnīṃciyā sosā / vaśyu kīje

taiseṃ prakṛti jālepaṇeṃ / puruṣā guṇa bhogaṇeṃ /
udāsa aṃturīguṇeṃ / ātuḍe jevīṃ

taiseṃ ajā nityā hoye / āṃgīṃ janmamṛtyūce ghāye /
vājatī jaiṃ lāhe / guṇasaṃgāteṃ

pari teṃ aiseṃ paṃḍusutā / tātaleṃ loha piṭitāṃ /
jevīṃ vanhīsīci ghātā / bolatī tayā

kāṃ āṃdoḻaliyā udaka / pratibhā hoya aneka /
teṃ nānātva mhaṇatī loka / caṃdrīṃ jevīṃ

darpaṇāciyā javaḻikā / dujepaṇa jaiseṃ ye mukhā /
kāṃ kuṃkumeṃ sphaṭikā / lohitatva ye

taisā guṇasaṃgameṃ / ajanmā hā janme /
pāvatu aisā game / eऱhavīṃ nāhīṃ

adhamottamā yonī / yāsi aisiyā mānī /
jaisā saṃnyāsī hoya svapnīṃ / aṃtyajādi jātī

mhaṇauni kevaḻā puruṣā / nāhīṃ hoṇeṃ bhogaṇeṃ dekhā /
yetha guṇasaṃguci aśekhā- / lāgīṃ mūḻa

hā prakṛtimājīṃ ubhā / parī juī jaisā vothaṃbā /
iyā prakṛti pṛthvī nabhā / tetulā pāḍu

prakṛtisaritecyā taṭīṃ / meru hoya hā kirīṭī /
mājīṃ biṃbe parī loṭīṃ / loṭoṃ neṇe

prakṛti hoya jāye / hā to asatuci āhe /
mhaṇauni ābrahmāceṃ hoye / śāsana hā

prakṛti yeṇeṃ jiye / yāciyā sattā jaga viye /
iyālāgīṃ iye / varayetu hā

anaṃteṃ kāḻeṃ kirīṭī / jiyā miḻatī iyā sṛṣṭī /
tiyā rigatī yayācyā poṭīṃ / kalpāṃtasamayīṃ

hā mahadbrahmagosāvī / brahmagoḻa lāghavī /
apārapaṇeṃ mavī / prapaṃcāteṃ

paiṃ yā dehāmājhārīṃ / paramātmā aisī je parī /
bolije teṃ avadhārīṃ / yayāteṃci

agā prakṛtiparautā / eku āthī paṃḍusutā /
aisā pravādu to tattvatā / puruṣu hā paiṃ

jo nikhaḻapaṇeṃ yeṇeṃ / puruṣā yayā jāṇe /
āṇi guṇāṃceṃ karaṇeṃ / prakṛtīceṃ teṃ

heṃ rūpa he chāyā / paila jaḻa he māyā /
aisā nivāḍu dhanaṃjayā / jevīṃ kīje

teṇeṃ pāḍeṃ arjunā / prakṛtipuruṣavivaṃcanā /
jayāciyā manā / gocara jāhalī

to śarīrāceni meḻeṃ / karūṃ kāṃ karmeṃ sakaḻeṃ /
parī ākāśa dhuī na maiḻe / taisā ase

āthileni deheṃ / jo na ghepe dehamoheṃ /
deha geliyā nohe / punarapi to

aisā tayā eku / prakṛtipuruṣaviveku /
upakāru alaukiku / karī paiṃ gā

parī hāci aṃtarīṃ / viveka bhānūciyā parī /
udaije teṃ avadhārīṃ / upāya bahuta

koṇī eku subhaṭā / vicārācā āgiṭāṃ /
ātmānātmakiṭā / puṭeṃ deunī

chattīsahī vānī bheda / toḍoniyāṃ nirvivāda /
nivaḍitī śuddha / āpaṇapeṃ

tayā āpaṇapayācyā poṭīṃ / ātmadhyānāciyā diṭhī /
dekhatī gā kirīṭī / āpaṇapeṃci

āṇika paiṃ daivabageṃ / citta detī sāṃkhyayogeṃ /
eka te aṃgalageṃ / karmācenī

yeṇeṃ yeṇeṃ prakāreṃ / nistaratī sācokāreṃ /
heṃ bhavā bheureṃ / āghaveṃci

parī te karitī aiseṃ / abhimānu davaḍūni deśeṃ /
ekāciyā viśvāseṃ / ṭeṃkatī bolā

je hitāhita dekhatī / hāni kaṇavā ghepatī /
pusoni śiṇu haritī / detī sukha

tayāṃceni mukheṃ jeṃ nighe / tetuleṃ ādareṃ cāṃgeṃ /
aikoniyāṃ āṃgeṃ / maneṃ hotī

tayā aikaṇeyāci nāṃveṃ / ṭhevitī gā āghaveṃ /
tayā akṣarāṃsīṃ jīveṃ / loṇa karitī

tehī aṃtīṃ kapidhvajā / iyā maraṇārṇavasamājā- /
pāsūni nighatī vojā / gomaṭiyā

aisese he upāye / bahuvasa etheṃ pāheṃ /
jāṇāvayā hoye / ekī vastu

ātāṃ pure he bahuta / paiṃ sarvārthāceṃ mathita /
siddhāṃtanavanīta / deūṃ tuja

yetuleni paṃḍusutā / anubhava lāhāṇā āyitā /
yera taṃva tuja hotāṃ / sāyāsa nāhīṃ

mhaṇauni te buddhi racūṃ / matavāda he khāṃcūṃ /
solīva nirvacūṃ / phalitārthucī

tarī kṣetrajña yeṇeṃ boleṃ / tuja āpaṇapeṃ jeṃ dāvileṃ /
āṇi kṣetrahī sāṃgitaleṃ / āghaveṃ jeṃ

tayā yerayerāṃcyā meḻīṃ / hoīje bhūtīṃ sakaḻīṃ /
anilasaṃgeṃ salilīṃ / kalloḻa jaise

kāṃ tejā āṇi ukharā / bheṭī jāliyā vīrā /
mṛgajaḻāciyā pūrā / rūpa hoya

nānā dhārādharadhārīṃ / jhaḻaṃbaliyā vasuṃdharī /
uṭhije jevīṃ aṃkurīṃ / nānāvidhīṃ

taiseṃ carācara āghaveṃ / jeṃ kāṃhīṃ jīvu nāveṃ /
teṃ toṃ ubhayayogeṃ saṃbhave / aiseṃ jāṇa

iyālāgīṃ arjunā / kṣetrajñā pradhānā- /
pāsūni na hotī bhinnā / bhūtavyaktī

paiṃ paṭatva taṃtu navhe / tarī taṃtūsīci teṃ āhe /
aisāṃ kholīṃ ḍoḻāṃ pāheṃ / aikya heṃ gā

bhūteṃ āghavīṃci hotī / ekācīṃ eka āhātī /
parī tūṃ pratītī / yāṃcī ghe pāṃ

yāṃcīṃ nāmeṃhī ānāneṃ / anārisīṃ vartaneṃ /
veṣahī sināne / āghaveyāṃce

aiseṃ dekhoni kirīṭī / bheda sūsī hana poṭīṃ /
tarī janmāciyā koṭī / na lāhasī nighoṃ

paiṃ nānāprayojanaśīḻeṃ / dīrgheṃ vakreṃ vartuḻeṃ /
hotī ekācīṃca phaḻeṃ / tuṃbiṇīyecīṃ

hotu kāṃ ujū vāṃkuḍeṃ / parī borīce heṃ na moḍe /
taisī bhūteṃ avaghaḍeṃ / parī vastu ujū

aṃgārakaṇīṃ bahuvasīṃ / uṣṇatā samāna jaiśī /
taisā nānā jīvarāśīṃ / pareśu ase

gaganabharī dhārā / parī pāṇī ekaci vīrā /
taisā yā bhūtākārā / sarvāṃgīṃ to

heṃ bhūtagrāma viṣama / parī vastū te etha sama /
ghaṭamaṭhīṃ vyoma / jiṃyāparī

hā nāśatāṃ bhūtābhāsu / etha ātmā to avināśu /
jaisā keyūrādikīṃ kasu / suvarṇācā

evaṃ jīvadharmahīnu / jo jīveṃsīṃ abhinnu /
dekha to sunayanu / jñāniyāṃmājīṃ

jñānācā ḍoḻā ḍoḻasāṃ- / mājīṃ ḍoḻasu to vīreśā /
he stuti nohe bahuvasā / bhāgyācā to

je guṇeṃdriya dhokoṭī / deha dhātūṃcī trikuṭī /
pāṃcameḻāvā vokhaṭī / dāruṇa he

heṃ ughaḍa pāṃcaveulī / paṃcadhāṃ āgī lāgalī /
jīvapaṃcānanā sāṃpaḍalī / hariṇakuṭī he

aisā asoni iye śarīrīṃ / koṇa nityabuddhīcī surī /
anityabhāvācyā udarīṃ / dāṭīcinā

parī iye dehīṃ asatāṃ / jo nayeci āpaṇayā ghātā /
āṇi śekhīṃ paṃḍusutā / tetheṃci miḻe

jetha yogajñānāciyā prauḍhī / volāṃḍūniyāṃ janmakoḍī /
na nigoṃ iyā bhāṣā buḍī / detī yogī

jeṃ ākārāceṃ paila tīra / jeṃ nādācī paila mera /
turyeceṃ mājaghara / parabrahma jeṃ

mokṣāsakaṭa gatī / jetheṃ yetī viśrāṃtī /
gaṃgādi āpāṃpatī / saritā jevīṃ

teṃ sukha yeṇeṃci deheṃ / pāya pākhāḻaṇiyā lāhe /
jo bhūtavaiṣamyeṃ nohe / viṣamabuddhī

dīpāṃciyā koḍī jaiseṃ / ekaci teja sariseṃ /
taisā jo asatuci ase / sarvatra īśu

aiseni samatveṃ paṃḍusutā / jiye jo dekhata sātā /
to maraṇa āṇi jīvitā / nāgave phuḍā

mhaṇauni to daivāgaḻā / vānīta asoṃ veḻoveḻāṃ /
je sāmyaseje ḍoḻāṃ / lāgalā tayā

āṇi manobuddhipramukheṃ / karmeṃdriyeṃ aśekheṃ /
karī prakṛtīci heṃ dekhe / sāca jo gā

gharīṃcīṃ rāhaṭatī gharīṃ / ghara kāṃhīṃ na karī /
abhra dhāṃve aṃbarīṃ / aṃbara teṃ ugeṃ

taisī prakṛti ātmaprabhā / kheḻe guṇīṃ vividhāraṃbhā /
yetha ātmā to vothaṃbā / neṇe koṇa

aiseni yeṇeṃ nivāḍeṃ / jayācyā jīvīṃ ujivaḍeṃ /
akartayāteṃ phuḍeṃ / dekhileṃ teṇeṃ

eऱhavīṃ taiṃci arjunā / hoīje brahmasaṃpannā /
jaiṃ yā bhūtākṛtī bhinnā / disatī ekī

laharī jaisiyā jaḻīṃ / paramāṇukaṇikā sthaḻīṃ /
raśmīkaramaṃḍaḻīṃ / sūryācyā jevīṃ ?

nātarī dehīṃ aveva / manīṃ āghaveci bhāva /
visphuliṃga sāveva / vanhīṃ ekīṃ

taise bhūtākāra ekāce / heṃ diṭhī rige jaiṃ sāceṃ /
taiṃci brahmasaṃpattīceṃ / tārūṃ lāge

maga jayā tayākaḍe / brahmeci diṭhī ughaḍe /
kiṃbahunā joḍe / apāra sukha

yetuleni tuja pārthā / prakṛtipuruṣavyavasthā /
ṭhāyeṃ ṭhāvo pratītipathā- / mājīṃ jāhalī ?

amṛta jaiseṃ ye cuḻā / kāṃ nidhāna dekhije ḍoḻāṃ /
tetulā jivhāḻā / mānāvā hā

jī jāhaliye pratītī / ghara bāṃdhaṇeṃ jeṃ cittīṃ /
teṃ ātāṃ nā subhadrāpatī / iyāvarī

tarī eka donhī te bola / bolijatī sakhola /
deīṃ manāteṃ vola / maga te gheīṃ

aiseṃ deveṃ mhaṇitaleṃ / maga boloṃ ādarileṃ /
tetheṃ avadhānāceci keleṃ / sarvāṃga yereṃ

tarī paramātmā mhaṇipe / to aisā jāṇa svarūpeṃ /
jaḻīṃ jaḻeṃ na liṃpe / sūryu jaisā

kāṃ je jaḻā ādīṃ pāṭhīṃ / to asatuci ase kirīṭī /
mājīṃ biṃbe teṃ dṛṣṭī / āṇikāṃciye

taisā ātmā dehīṃ / āthi mhaṇipe heṃ kāṃhīṃ /
sāceṃ tarī nāhīṃ / to jethiṃcā tetheṃ

ārisāṃ mukha jaiseṃ / biṃbaliyā nāma ase /
dehīṃ vasaṇeṃ taiseṃ / ātmatattvā

tayā dehā mhaṇatī bheṭī / he sapāyī nirjīva goṭhī /
vāriyā vāḻuve gāṃṭhī / keṃhī āhe ?

āgī āṇi kāpusā / dorā suvāvā kaisā /
keutā sāṃdā ākāśā / pāṣāṇeṃsī ?

eka nighe pūrvekaḍe / eka teṃ paścimekaḍe /
tiye bheṭīceni pāḍeṃ / saṃbaṃdhu hā

ujiyeḍā āṇi aṃdhāreyā / jo pāḍu mṛtā ubheyāṃ /
toci gā ātmayā / dehā jāṇa

rātrī āṇi divasā / kanakā āṇi kāpusā /
apāḍu kāṃ jaisā / taisāci yāsī

deha taṃva pāṃcāṃceṃ jāleṃ / heṃ karmāceṃ guṇīṃ guṃthale /
bhaṃvatase cākīṃ sūdaleṃ / janmamṛtyūcyā

heṃ kāḻānaḻācyā toṃḍīṃ / ghātalī loṇiyācī uṃḍī /
māśī pāṃkhu pākhaḍī / taṃva heṃ sare

heṃ vipāyeṃ āgīṃta paḍe / tarī bhasma hoūni uḍe /
jāhaleṃ śvānā varapaḍeṃ / tarī te viṣṭhā

yā cuke dohīṃ kājā / tarī hoya kṛmīṃcā puṃjā /
hā pariṇāmu kapidhvajā / kaśmalu gā

yā dehācī he daśā / āṇi ātmā to etha aisā /
paiṃ nitya siddha āpaisā / anādipaṇeṃ

sakaḻu nā niṣkaḻu / akriyu nā kriyāśīḻu /
kṛśa nā sthuḻu / nirguṇapaṇeṃ

ābhāsu nā nirābhāsu / prakāśu nā aprakāśu /
alpa nā bahuvasu / arūpapaṇeṃ

ritā nā bharitu / rahitu nā sahitu /
mūrtu nā amūrtu / śūnyapaṇeṃ

ānaṃdu nā nirānaṃdu / eka nā vividhu /
mukta nā baddhu / ātmapaṇeṃ

yetulā nā tetulā / āitā nā racilā /
bolatā nā ugalā / alakśapaṇeṃ

sṛṣṭīcyā hoṇā na race / sarvasaṃhāreṃ na veṃce /
āthī nāthī yā dohīṃceṃ / paṃcatva to

mave nā carce / vāḍhe nā khāṃce /
viṭe nā veṃce / avyayapaṇeṃ

evaṃ rūpa paiṃ ātmā / dehīṃ jeṃ mhaṇatī priyottamā /
teṃ maṭhākāreṃ vyomā / nāma jaiseṃ

taiseṃ tayāciye anusyūtī / hotī jātī dehākṛtī /
to ghe nā sāṃḍī sumatī / jaisā taisā

ahorātreṃ jaiśī / yetī jātī ākāśīṃ /
ātmasatteṃ taisīṃ / deheṃ jāṇa

mhaṇauni iyeṃ śarīrīṃ / kāṃhīṃ karavīṃ nā karī /
āyatāhī vyāpārīṃ / sajja na hoya

yālāgīṃ svarūpeṃ / uṇā purā na ghepe /
heṃ aso to na liṃpe / dehīṃ dehā

agā ākāśa keṃ nāhīṃ ? / heṃ na righeci kavaṇe ṭhāyīṃ ? /
parī kāyiseni kahīṃ / gādijenā

taisā sarvatra sarva dehīṃ / ātmā asatuci ase pāhīṃ /
saṃgadoṣeṃ ekeṃhī / lipta nohe

puḍhatapuḍhatī etheṃ / heṃci lakṣaṇa niruteṃ /
je jāṇāveṃ kṣetrajñāteṃ / kṣetravihīnā

saṃsargeṃ ceṣṭije loheṃ / parī loha bhrāmaku nohe /
kṣetrakṣetrajñāṃ āhe / tetulā pāḍu

dīpakācī arcī / rāhāṭī vāhe gharīṃcī /
parī vegaḻīka koḍīcī / dīpā āṇi gharā

paiṃ kāṣṭhācyā poṭīṃ / vanhi ase kirīṭī /
parī kāṣṭha nohe yā dṛṣṭī / pāhije hā

apāḍu nabhā ābhāḻā / ravi āṇi mṛgajaḻā /
taisāci hāhī ḍoḻāṃ / dekhasī jarī

heṃ āghaveṃci aso eku / gaganauni jaisā arku /
pragaṭavī loku / nāṃveṃ nāṃveṃ

etha kṣetrajñu to aisā / prakāśaku kṣetrābhāsā /
yāvaruteṃ heṃ na pusā / śaṃkā neghā

śabdatattvasārajñā / paiṃ dekhaṇeṃ teci prajñā /
je kṣetrā kṣetrajñā / apāḍu dekhe

iyā dohīṃceṃ aṃtara / dekhāvayā catura /
jñāniyāṃce dvāra / ārādhitī

yācilāgīṃ sumatī / joḍitī śāṃtisaṃpattī /
śāstrāṃcīṃ dubhatīṃ / positī gharīṃ

yogāciyā ākāśā / vaḻaghije yevaḍhāci dhiṃvasā /
yāciyāci āśā / puruṣāsi gā

śarīrādi samasta / mānitāti tṛṇavata /
jīveṃ saṃtāṃce hota / vāhaṇadharu

aisaisiyāparī / jñānāciyā bharovarī /
karūniyāṃ aṃtarīṃ / niruteṃ hotī

maga kṣetrakṣetrajñāṃceṃ / jeṃ aṃtara dekhatī sāceṃ /
jñāneṃ unmekha tayāṃceṃ / vovāḻūṃ āmhī

āṇi mahābhūtādikīṃ / prabhedalīṃ anekīṃ /
pasaralīse laṭikī / prakṛti je he

je śukanaḻikānyāyeṃ / na lagatī lāgalī āhe /
heṃ jaiseṃ taiseṃ hoye / ṭhāuveṃ jayāṃ

jaisī māḻā te māḻā / aisīci dekhije ḍoḻāṃ /
sarpabuddhi ṭavāḻā / ukhī haunī

kāṃ śukti te śuktī / he sāca hoya pratītī /
rupeyācī bhrāṃtī / jāūniyāṃ

taisī vegaḻī vegaḻepaṇeṃ / prakṛti je aṃtaḥkaraṇeṃ /
dekhatī te mī mhaṇeṃ / brahma hotī

jeṃ ākāśāhūni vāḍa / jeṃ avyaktācī paila kaḍa /
jeṃ bheṭaliyā apāḍā pāḍa / paḍoṃ nedī

ākāru jetha sare / jīvatva jetha vire /
dvaita jetha nure / advaya jeṃ

teṃ parama tattva pārthā / hotī te sarvathā /
je ātmānātmavyavasthā- / rājahaṃsu

aisā hā jī āghavā / śrīkṛṣṇeṃ tayā pāṃḍavā /
ugāṇā didhalā jīvā / jīvāciyā

yera kalaśīṃceṃ yerīṃ / ricavije jayāparī /
āpaṇapeṃ tayā śrīharī / didhaleṃ taiseṃ

āṇi koṇā detā koṇa / to nara taisā nārāyaṇa /
varī arjunāteṃ śrīkṛṣṇa / hā mī mhaṇe

parī aso teṃ nāthileṃ / na pusatāṃ kāṃ mī boleṃ /
kiṃbahunā didhaleṃ / sarvasva deveṃ

kīṃ to pārthu jī manīṃ / ajhunī tṛptī na manī /
adhikādhika utānhī / vāḍhavītu ase

snehāciyā bharovarī / āṃbuthilā dīpu ghe thorī /
cāḍa arjunā aṃtarīṃ / parisatāṃ taisī

tetha sugariṇī āṇi udāre / rasajña āṇi jevaṇāre /
miḻatī maga avatare / hātu jaisā

taiseṃ jī hotase devā / tayā avadhānāciyā lavalavā /
pāhatāṃ vyākhyāna caḍhaleṃ thāṃvā / cauguṇeṃ varī

suvāyeṃ meghu sāṃvare / jaisā caṃdreṃ siṃdhu bhare /
taisā mātulā rasu ādareṃ / śrotayāṃceni

ātāṃ ānaṃdamaya āghaveṃ / viśva kījela deveṃ /
teṃ rāyeṃ parisāveṃ / saṃjayo mhaṇe

evaṃ je mahābhāratīṃ / śrīvyāseṃ āprāṃtamatī /
bhīṣmaparvasaṃgatīṃ / mhaṇitalī kathā

to kṛṣṇārjunasaṃvādu / nāgarīṃ bolīṃ viśadu /
sāṃgoni dāūṃ prabaṃdhu / voviyecā

nusadhīci śāṃtikathā / āṇijela kīra vākpathā /
je śṛṃgārācyā māthāṃ / pāya ṭhevī

dāūṃ velhāḻe deśī navī / je sāhityāteṃ vojāvī /
amṛtāteṃ cukī ṭhevī / goḍiseṃpaṇeṃ

bola volhāvateni guṇeṃ / caṃdrāsi ghe umāṇe /
rasaraṃgīṃ bhulavaṇeṃ / nādu lopī

khecarāṃciyāhī manā / āṇīna sāttvikācā pānhā /
śravaṇāsaveṃ sumanā / samādhi joḍe

taisā vāgvilāsa vistārū / gītārtheṃsī viśva bharūṃ /
ānaṃdāceṃ āvārūṃ / māṃḍūṃ jagā

phiṭo vivekācī vāṇī / ho kānāmanācī jiṇī /
dekho āvaḍe to khāṇī / brahmavidyecī

diso paratattva ḍoḻāṃ / pāho sukhācā sohaḻā /
righo mahābodha sukāḻā- / mājīṃ viśva

heṃ niphajela ātāṃ āghaveṃ / aiseṃ bolijela baraveṃ /
jeṃ adhiṣṭhilā aseṃ paramadeveṃ / śrīnivṛttīṃ mī

mhaṇauni akṣarīṃ subhedīṃ / upamā śloka koṃdākoṃdī /
jhāḍā deīna pratipadīṃ / graṃthārthāsī

hā ṭhāvovarī māteṃ / puratayā sārasvateṃ /
keleṃ ase śrīmaṃteṃ / śrīgururāyeṃ

teṇeṃ jī kṛpāsāvāyeṃ / mī boleṃ tetuleṃ sāmāye /
āṇi tumaciye sabhe lāheṃ / gītā mhaṇoṃ

varī tumhā saṃtāṃce pāye / āji mī lādhaloṃ āheṃ /
mhaṇauni jī nohe / aṭaku kāhīṃ

prabhu kāśmirīṃ mukeṃ / nupaje heṃ kāya kautukeṃ /
nāhīṃ uṇīṃ sāmudrikeṃ / lakṣmīyesī

taisī tumhāṃ saṃtāṃpāsīṃ / ajñānācī goṭhī kāyasī /
yālāgīṃ navarasīṃ / varuṣena mī

kiṃbahunā ātāṃ devā / avasaru maja deyāvā /
jñānadeva mhaṇe baravā / sāṃgena graṃthu