Jnaneshwari · Chapter 11

// ॐ śrī paramātmane namaḥ //
// atha śrīmadbhagavadgītā //
/ atha ekādaśo'dhyāyaḥ - adhyāya akarāvā / /
/ viśvarūpadarśanayogaḥ /
ātāṃ yāvarī ekādaśīṃ / kathā āhe dohīṃ rasīṃ /
yetha pārthā viśvarūpeṃsīṃ / hoīla bheṭī

jetha śāṃtāciyā gharā / adbhuta ālā āhe pāhuṇerā /
āṇi yerāṃhī rasāṃ pāṃtikarāṃ / jāhalā mānu

aho vadhuvarāṃciye miḻaṇīṃ / jaiśī varāḍiyāṃ lugaḍīṃ leṇīṃ /
taise deśiyecyā sukhāsanīṃ / miravile rasa

parī śāṃtādbhuta barave / je ḍoḻiyāṃcyā aṃjuḻīṃ ghyāveṃ /
jaise harihara premabhāveṃ / āle kheṃvā

nā tarī aṃvasecyā divaśīṃ / bheṭalīṃ biṃbeṃ donī jaiśīṃ /
tevīṃ ekavaḻā rasīṃ / kelā etha

mīnale gaṃgeyamunece ogha / taiseṃ rasāṃ jāhaleṃ prayāga /
mhaṇauni susnāta hota jaga / āghaveṃ etha

mājīṃ gītā sarasvatī gupta / āṇi donī rasa te ogha mūrta /
yālāgīṃ triveṇī he ucita / phāvalī bāpā

etha śravaṇāceni dvāreṃ / tīrthīṃ righatāṃ sopāreṃ /
jñānadevo mhaṇe dātāreṃ / mājheni keleṃ

tīreṃ saṃskṛtācīṃ gahaneṃ / toḍoni maऱhāṭhiyāṃ śabdasopāneṃ /
racilī dharmanidhāneṃ / śriinivṛttideveṃ

mhaṇauni bhalateṇeṃ etha sadbhāveṃ nāhāveṃ / prayāgamādhava viśvarūpa pahāveṃ /
yetuleni saṃsārāsi dyāveṃ / tiḻodaka

heṃ aso aiseṃ sāvayava / etha sāsinnale āthī rasabhāva /
tetha śravaṇasukhācī rāṇīva / joḍalī jagā

jetha śāṃtādbhuta rokaḍe / āṇi yerāṃ rasāṃ paḍapa joḍe /
heṃ alpaci parī ughaḍeṃ / kaivalya etha

to hā akarāvā adhyāyo / jo devācā āpaṇapeṃ visaṃvatā ṭhāvo /
parī arjuna sadaivāṃcā rāvo / jo ethahī pātalā

etha arjunaci kāya mhaṇoṃ pātalā / āji āvaḍatayāhī sukāḻu jāhalā /
je gītārthu hā ālā / maऱhāṭhiye

yācilāgīṃ mājheṃ / vinavileṃ āikije /
tarī avadhāna dīje / sajjanīṃ tumhī

tevīṃci tumhāṃ saṃtāṃciye sabhe / aisī salagī kīra karūṃ na labhe /
parī mānāveṃ jī tumhī lobheṃ / apatyā maja

aho puṃsā āpaṇaci paḍhavije / maga paḍhe tarī māthā tukije /
kāṃ karavileni cojeṃ na rijhe / bāḻakā māya

tevīṃ mī jeṃ jeṃ boleṃ / teṃ prabhu tumaceṃci śikavileṃ /
mhaṇauni avadhārijo āpuleṃ / āpaṇa devā

heṃ sārasvatāceṃ goḍa / tumhīṃci lāvileṃ jī jhāḍa /
tarī ātāṃ avadhānāmṛteṃ vāḍa / siṃponi kīje

maga heṃ rasabhāva phulīṃ phulela / nānārtha phaḻabhāreṃ phaḻā yeīla /
tumaceni dharmeṃ hoīla / suravāḍu jagā

yā bolā saṃta rijhale / mhaṇatī toṣaloṃ gā bhaleṃ keleṃ /
ātāṃ sāṃgaiṃ jeṃ bolileṃ / arjuneṃ tetha

taṃva nivṛttidāsa mhaṇe / jī kṛṣṇārjunāṃceṃ bolaṇeṃ /
mī prākṛta kāya sāṃgoṃ jāṇeṃ / parī sāṃgavā tumhī

aho rānīṃciyā pālekhāirā / nevāṇeṃ karavile laṃkeśvarā /
ekalā arjuna parī akṣauhiṇī akarā / na jiṇeci kāī ?

mhaṇauni samartha jeṃ jeṃ karī / teṃ na ho na ye carācarīṃ /
tumhī saṃta tayāparī / bolavā māteṃ

ātāṃ bolijataseṃ āikā / hā gītābhāva nikā /
jo vaikuṃṭhanāyakā- / mukhauni nighālā

bāpa bāpa graṃtha gītā / jo vedīṃ pratipādya devatā /
to śrīkṛṣṇa vaktā / jiye graṃthīṃ

tethiṃce gaurava kaiseṃ vānāveṃ / jeṃ śrīśaṃbhūciye matī nāgave /
teṃ ātāṃ namaskārije jīveṃbhāveṃ / heṃci bhaleṃ

maga āikā to kirīṭī / ghālūni viśvarūpīṃ diṭhī /
pahilī kaisī goṭhī / karitā jāhalā

heṃ sarvahī sarveśvaru / aisā pratītigata jo patikaru /
to bāherī hoāvā gocaru / locanāṃsī

he jivāāṃtulī cāḍa / parī devāsi sāṃgatāṃ sāṃkaḍa /
kāṃ jeṃ viśvarūpa gūḍha / kaiseni pusāveṃ ?

mhaṇe māgāṃ kavaṇīṃ kahīṃ / jeṃ paḍhiyaṃteneṃ pusileṃ nāhīṃ /
te sahasā kaiseṃ kāī / sāṃgā mhaṇoṃ ?

mī jarī salagīcā cāṃgu / tarī kāya āisīhūnī aṃtaraṃgu /
parī tehī hā prasaṃgu / bihālī pusoṃ

mājhī āvaḍe taisī sevā jāhalī / tarī kāya hoīla garuḍāciyā yetulī ? /
parī tohī heṃ bolī / karīcinā

mī kāya sanakādikāṃhūni javaḻāṃ / parī tayāṃhī nāgaveci hā cāḻā /
mī āvaḍena kāya premaḻāṃ / gokuḻīṃciyā aisā ?

tayāṃteṃhī lekurapaṇeṃ jhakavileṃ / ekāce garbhavāsahī sāhile /
parī viśvarūpa heṃ rāhavileṃ / na dāvīca kavaṇā

hā ṭhāyavarī guja / yāciye aṃtarīceṃ heṃ nija /
kevīṃ urāurī maja / pusoṃ ye pāṃ ?

āṇi na puseṃci jarī mhaṇe / tarī viśvarūpa dekhiliyāviṇeṃ /
sukha noheci parī jiṇeṃ / teṃhī vipāyeṃ

mhaṇauni ātāṃ pusoṃ aḻumāḻaseṃ / maga karūṃ devā āvaḍe taiseṃ /
yeṇeṃ pravartalā sādhvaseṃ / pārthu boloṃ

parī teṃci aiseni bhāveṃ / jeṃ ekā doṃ uttarāṃsaveṃ /
dāvī viśvarūpa āghaveṃ / jhāḍā deunī

aho vāṃsarūṃ dekhiliyācisāṭhīṃ / dhenu khaḍabaḍoni moheṃ uṭhī /
maga stanāmukhāciye bheṭī / kāya pānhā dhare ?

pāhā pāṃ tayā pāṃḍavāceni nāṃveṃ / jo kṛṣṇa rānīṃhī pratipāḻūṃ dhāve /
tayāṃteṃ arjuneṃ jaṃva pusāveṃ / taṃva sāhīla kāī ?

to sahajeṃci snehāceṃ avataraṇa / āṇi yeru snehā ghātaleṃ āhe mājavaṇa /
aisiye miḻavaṇī vegaḻepaṇa / ure heṃci bahu

mhaṇauni arjunāciyā bolāsarisā / deva viśvarūpa hoīla āpaisā /
toci pahilā prasaṃgu aisā / aikije tarī

maga pārthu devāteṃ mhaṇe / jī tumhī majakāraṇeṃ /
vācya keleṃ jeṃ na bolaṇeṃ / kṛpānidhe

jaiṃ mahābhūteṃ brahmīṃ āṭatī / jīva mahadādīṃce ṭhāva phiṭatī /
taiṃ jeṃ deva hoūni ṭhākatī / teṃ visavaṇeṃ śeṣīṃceṃ

hoteṃ hṛdayāciye parivarīṃ / roṃvileṃ kṛpaṇāciye parī /
śabdabrahmāsahī corī / jayācī kelī

teṃ tumhīṃ āji āpuleṃ / majapuḍhāṃ hiyeṃ phoḍileṃ /
jayā adhyātmā vovāḻileṃ / aiśvarya hareṃ

te vastu maja svāmī / ekiheḻāṃ didhalī tumhī /
heṃ boloṃ tarī āmhī / tuja pāvoni kaiṃce

parī sācaci mahāmohāciye purīṃ / buḍāleyā dekhoni sīsavarī /
tuvāṃ āpaṇapeṃ ghāloni śrīharī / maga kāḍhileṃ māteṃ

eka tūṃvāṃcūni kāṃhīṃ / viśvīṃ dujiyācī bhāṣa nāhīṃ /
kīṃ āmuceṃ karma pāhīṃ / je āmhīṃ āthī mhaṇoṃ

mī jagīṃ eka arjunu / aisā dehīṃ vāhe abhimānu /
āṇi kauravāṃteṃ iyāṃ svajanu / āpuleṃ mhaṇeṃ

yāhīvarī yāṃteṃ mī mārīna / mhaṇeṃ teṇeṃ pāpeṃ keṃ rigena /
aiseṃ dekhata hotoṃ duḥsvapna / toṃ cevavilā prabhu

devā gaṃdharvanagarīcī vastī / soḍūni nighāloṃ lakṣmīpatī /
hotoṃ udakāciyā ārtī / rohiṇī pīta

jī kiraḍūṃ tarī kāpaḍāceṃ / parī laharī yeta hotiyā sāceṃ /
aiseṃ vāyāṃ maratayā jīvāceṃ / śreya tuvāṃ ghetaleṃ

āpuleṃ pratibiṃba neṇatā / siṃha kuhāṃ ghālīla dekhoni ātāṃ /
aisā dharije tevīṃ anaṃtā / rākhileṃ māteṃ

eऱhavīṃ mājhā tarī yetulevarī / etha niścaya hotā avadhārīṃ /
jeṃ ātāṃci sātāṃhī sāgarīṃ / ekatra miḻije

heṃ jagaci āghaveṃ buḍāveṃ / varī ākāśahi tuṭoni paḍāveṃ /
parī jhuṃjaṇeṃ na ghaḍāveṃ / gotrajeśīṃ maja

aisiyā ahaṃkārāciye vāḍhī / miyāṃ āgrahajaḻīṃ didhalī hotī buḍī /
cāṃgaci tūṃ javaḻāṃ eऱhavīṃ kāḍhī / kavaṇu māteṃ

nāthileṃ āpaṇa pāṃ eka mānileṃ / āṇi navhatayā nāma gotra ṭhevileṃ /
thora piseṃ hoteṃ lāgaleṃ / pari rākhileṃ tumhī

māgāṃ jaḻata kāḍhileṃ joharīṃ / taiṃ teṃ dehāsīca bhaya avadhārīṃ /
ātāṃ he joharavāhara dusarī / caitanyāsakaṭa

durāgraha hiraṇyākṣeṃ / mājhī buddhi vasuṃdharā sūdalī kākhe /
maga māhārṇava gavākṣeṃ / righoni ṭhelā

tetha tujheni gosāvīpaṇeṃ / ekaveḻa buddhīciyā ṭhāyā yeṇeṃ /
heṃ dusareṃ varāha hoṇeṃ / paḍileṃ tuja

aiseṃ apāra tujheṃ keleṃ / ekī vācā kāya mī boleṃ /
parī pāṃcahī pālava mokalile / majapratī

teṃ kāṃhīṃ na vaceci vāyāṃ / bhaleṃ yaśa phāvaleṃ devarāyā /
je sādyaṃta māyā / nirasilī mājhī

ājīṃ ānaṃdasarovarīṃcīṃ kamaḻeṃ / taise he tujhe ḍoḻe /
āpuliyā prasādācīṃ rāuḻeṃ / jayālāgīṃ karitī

hāṃ ho tayāhī āṇi mohācī bheṭī / he kāyasī pābaḻī goṭhī ? /
keutī mṛgajaḻācī vṛṣṭī / vaḍavānaḻeṃsīṃ ?

āṇi mī taṃva dātārā / ye kṛpeciye righoni gābhārāṃ /
gheta āheṃ cārā / brahmarasācā

teṇeṃ mājhā jī moha jāye / etha vismo kāṃhīṃ āhe ? /
tarī uddharaloṃ kīṃ tujhe pāye / śivatale āhātī

paiṃ kamalāyataḍoḻasā / sūryakoṭitejasā /
miyāṃ tujapāsoni maheśā / parisileṃ ājīṃ

iyeṃ bhūteṃ jayāparī hotī / athavā layā hana jaiseni jātī /
te majapuḍhāṃ prakṛtī / vivaṃcilī deveṃ

āṇi prakṛtī kīra ugāṇā didhalā / vari puruṣācāhī ṭhāvo dāvilā /
jayācā mahimā pāṃgharoni jāhalā / dhaḍautā vedu

jī śabdarāśī vāḍhe jiye / kāṃ dharmāśiyā ratnāṃteṃ viye /
te ethiṃce prabhece pāye / voḻage mhaṇauni

aiseṃ agādha māhātmya / jeṃ sakaḻamārgaikagamya /
jeṃ svātmānubhavaramya / teṃ iyāparī dāvileṃ

jaisā keru phiṭaliyā ābhāḻīṃ / diṭhī rige sūryamaṃḍaḻīṃ /
kāṃ hāteṃ sārūni bābuḻīṃ / jaḻa dekhije

nātarī ukalatayā sāpāce veḍhe / jaiseṃ caṃdanā kheṃva deṇeṃ ghaḍe /
athavā vivasī paḻe maga caḍhe / nidhāna hātāṃ

taisī prakṛtī he āḍa hotī / te deveṃci sāroni parautī /
maga paratattva mājhiye matī / śejāra keleṃ

mhaṇauni iyeviṣayīṃcā maja devā / bharaṃvasā kīra jāhalā jīvā /
parī āṇīka eka hevā / upanalā ase

to bhiḍāṃ jarī mhaṇoṃ rāhoṃ / tarī ānā kavaṇā pusoṃ jāvoṃ /
kāya tujavāṃconi ṭhāvo / jāṇata āhoṃ āmhī ?

jaḻacaru jaḻācā ābhāru dharī / bāḻaka stanapānīṃ uparodhu karī /
tarī tayā jiṇayā śrīharī / āna upāyo ase ?

mhaṇauni bhīḍa sāṃkaḍī na dharave / jīvā āvaḍe teṃhī tujapuḍhāṃ bolāveṃ /
taṃva rāheṃ mhaṇitaleṃ deveṃ / cāḍa sāṃgaiṃ

maga bolilā to kirīṭī / mhaṇe tumhīṃ kelī je goṭhī /
tiyā pratītīcī diṭhī / nivālī mājhī

ātāṃ jayāceni saṃkalpeṃ / he lokaparaṃparā hoya hārape /
jayā ṭhāyāteṃ āpaṇapeṃ / mī aiseṃ mhaṇasī

teṃ muddala rūpa tujheṃ / jethūni iyeṃ dvibhujeṃ hana caturbhujeṃ /
surakāryāceni vyājeṃ / ghevoṃ ghevoṃ yesī

paiṃ jaḻaśayanāciyā avagaṇiyā / kāṃ matsya kūrma iyā miravaṇiyā /
kheḻu saraliyā tūṃ guṇiyā / sāṃṭhavisī jetha

upaniṣadeṃ jeṃ gātī / yogiye hṛdayīṃ rigoni pāhātī /
jayāteṃ sanakādika āhātī / poṭāḻuniyāṃ

aiseṃ agādha jeṃ tujheṃ / viśvarūpa kānīṃ aikije /
teṃ dekhāvayā citta mājheṃ / utāvīḻa devā

deveṃ pheḍūniyāṃ sāṃkaḍa / lobheṃ pusilī jarī cāḍa /
tarī heṃci ekīṃ vāḍa / ārtīṃ jī maja

tujheṃ viśvarūpapaṇa āghaveṃ / mājhiye diṭhīsi gocara hoāveṃ /
aisī thora āsa jīveṃ / bāṃdhoni āheṃ

parī āṇīka eka etha śāraṅgī / tuja viśvarūpāteṃ dekhāvayālāgīṃ /
paiṃ yogyatā mājhiyā āṃgīṃ / ase kīṃ nāhīṃ

heṃ āpaleṃ āpaṇa mī neṇeṃ / teṃ kāṃ neṇasī jarī deva mhaṇe /
tarī sarogu kāya jāṇe / nidāna rogāceṃ ?

āṇi jī ārtīceni paḍibhareṃ / ārtu āpulī ṭhākī paiṃ visare /
jaisā tānhelā mhaṇe na pure / samudra maja

aiśā sacāḍapaṇāciye bhulī / na sāṃbhāḻave samasyā āpulī /
yālāgīṃ yogyatā jevīṃ māulī / bālakācī jāṇe

tayāparī śrījanārdanā / vicārijo mājhī saṃbhāvanā /
maga viśvarūpadarśanā / upakrama kīje

tarī aisī te kṛpā karā / eऱhavīṃ navhe heṃ mhaṇā avadhārā /
vāyāṃ paṃcamālāpeṃ badhirā / sukha keuteṃ deṇeṃ ?

eऱhavīṃ yekale bāpiyāce tṛṣe / megha jagāpurateṃ kāya na varṣe ? /
parī jahālīhī vṛṣṭi upakhe / jaऱhī khaḍakīṃ hoya

cakorā caṃdrāmṛta phāvaleṃ / yerā āṇa vāhūni kāya vārileṃ ? /
parī ḍoḻyāṃvīṇa pāhaleṃ / vāyāṃ jāya

mhaṇauni viśvarūpa tūṃ sahasā / dāvisī kīra hā bharavaṃsā /
kāṃ je kaḍāḍāṃ āṇi gahiṃsā- / mājī nītya navā tūṃ kīṃ

tujheṃ audārya jāṇoṃ svataṃtra / detāṃ na mhaṇasī pātrāpātra /
paiṃ kaivalyā aiseṃ pavitra / jeṃ vairiyāṃhī didhaleṃ

mokṣu durārādhyu kīra hoya / parī tohī ārādhī tujhe pāya /
mhaṇauni dhāḍisī tetha jāya / pāiku jaisā

tuvāṃ sanakādikāṃceni māneṃ / sāyujyīṃ saurasu didhalā pūtane /
je viṣāceni stanapāneṃ / mārūṃ ālī

hāṃ gā rājasūya yāgāciyā sabhāsadīṃ / dekhatāṃ tribhuvanācī māṃdī /
kaisā śatadhā durvākya śabdīṃ / nistejilāsī

aiśiyā aparādhiyā śiśupāḻā / āpaṇapeṃ ṭhāvo didhalā gopāḻā /
āṇi uttānacaraṇāciyā bāḻā / kāya dhruvapadīṃ cāḍa ?

to vanā ālā yācilāgīṃ / je baisāveṃ pitayāciyā utsaṃgīṃ /
kīṃ to caṃdrasūryādikāṃparisa jagīṃ / ślāghyu kelā

aisā vanavāsiyā sakaḻāṃ / detāṃ ekaci tūṃ dhasāḻā /
putrā āḻavitāṃ ajāmiḻā / āpaṇapeṃ desī

jeṇeṃ urīṃ hāṇitalāsi pāṃparā / tayācā caraṇu vāhāsī dātārā /
ajhunī vairiyāṃciyā kalevarā / visaṃbasīnā

aisā apakāriyāṃ tujhā upakāru / tūṃ apātrīṃhī parī udāru /
dāna mhaṇauni dāravaṃṭhekaru / jāhalāsī baḻīcā

tūṃteṃ ārādhī nā āyakeṃ / hotī puṃsā bolāvita kautukeṃ /
tiye vaikuṃṭhīṃ tuvāṃ gaṇike / suravāḍu kelā

aisīṃ pāhūni vāyāṇīṃ miṣeṃ / āpaṇapeṃ devoṃ lāgasī vānivaseṃ /
to tūṃ kāṃ anāriseṃ / majalāgīṃ karisī

hāṃ gā dubhatayāceni pavāḍeṃ / je jagāceṃ pheḍī sāṃkaḍeṃ /
tiye kāmadhenūce pāḍe / kāya bhukele ṭhātī ?

mhaṇauni miyāṃ jeṃ vinavileṃ kāṃhīṃ / teṃ deva na dākhavitī heṃ kīra nāhīṃ /
parī dekhāvayālāgīṃ deīṃ / pātratā maja

tujheṃ viśvarūpa ākaḻe / aise jarī jāṇasī mājhe ḍoḻe /
tarī ārtīce ḍohaḻe / puravīṃ devā

aisī ṭhāyeṃṭhāvo vinaṃtī / jaṃva karūṃ saralā subhadrāpatī /
taṃva tayā ṣaḍguṇacakravartī / sāhavecinā

to kṛpāpīyūṣasajaḻu / āṇi yeru javaḻāṃ ālā varṣākāḻu /
nānā kṛṣṇa kokiḻu / arjuna vasaṃtu

nātarī caṃdrabiṃba vāṭoḻeṃ / dekhoni kṣīrasāgara ucaṃbaḻe /
taisā duṇeṃhī varī premabaḻeṃ / ullasitu jāhalā

maga tiye prasannateceni āṭopeṃ / gājoni mhaṇitaleṃ sakṛpeṃ /
pārthā dekha dekha amupeṃ / svarūpeṃ mājhīṃ

eka viśvarūpa dekhāveṃ / aisā manorathu kelā pāṃḍaveṃ /
kīṃ viśvarūpamaya āghaveṃ / karūni ghātaleṃ

bāpa udāra devo aparimitu / yācaka svecchā sadoditu /
ase sahasravarī detu / sarvasva āpuleṃ

aho śeṣācehi ḍoḻe corile / veda jayālāgīṃ jhakavile /
lakṣmīyehī rāhavileṃ / jivhāra jeṃ

teṃ ātāṃ prakaṭunī anekadhā / karīta viśvarūpadarśanācā dhāṃdā /
bāpa bhāgyā agādhā / pārthāciyā

jo jāgatā svapnāvasthe jāye / to jevīṃ svapnīṃceṃ āghaveṃ hoye /
tevīṃ anaṃta brahmakaṭāha āhe / āpaṇaci jāhalā

te sahasā mudrā soḍilī / āṇi sthūḻadṛṣṭīcī javanikā pheḍilī /
kiṃbahunā ughaḍilī / yogaṛddhī

parī hā heṃ dekhela kīṃ nāhīṃ / aisī seci na karī kāṃhīṃ /
ekasarāṃ mhaṇatase pāhīṃ / snehātura

arjunā tuvāṃ eka dāvā mhaṇitaleṃ / āṇi teṃci dāvūṃ tarī kāya dāvileṃ /
ātāṃ dekheṃ āghaveṃ bharileṃ / mājhyāci rūpīṃ

ekeṃ kṛśeṃ ekeṃ sthūḻeṃ / ekeṃ ऱhasveṃ ekeṃ viśāḻeṃ /
pṛthutareṃ saraḻeṃ / aprāṃteṃ ekeṃ

ekeṃ anāvareṃ prāṃjaḻeṃ / savyāpāreṃ ekeṃ niścaḻeṃ /
udāsīneṃ snehāḻeṃ / tīvreṃ ekeṃ

eke ghūrṇiteṃ sāvadheṃ / asalageṃ ekeṃ agādheṃ /
ekeṃ udāreṃ atibaddheṃ / kruddheṃ ekeṃ

ekeṃ śāṃteṃ sanmadeṃ / stabdheṃ ekeṃ sānaṃdeṃ /
garjiteṃ niḥśabdeṃ / saumyeṃ ekeṃ

ekeṃ sābhilāṣeṃ virakteṃ / unnidriteṃ ekeṃ nidriteṃ /
parituṣṭeṃ ekeṃ ārteṃ / prasanneṃ ekeṃ

ekeṃ aśastreṃ saśastreṃ / ekeṃ raudreṃ atimitreṃ /
bhayānakeṃ ekeṃ pavitreṃ / layastheṃ ekeṃ

ekeṃ janalīlāvilāseṃ / ekeṃ pālanaśīleṃ lālaseṃ /
ekeṃ saṃhārakeṃ sāveśeṃ / sākṣibhūteṃ ekeṃ

evaṃ nānāvidheṃ parī bahuvaseṃ / āṇi divyatejaprakāśeṃ /
tevīṃci ekakā aiseṃ / varṇeṃhī navhe

ekeṃ tātaleṃ sāḍepaṃdhareṃ / taisīṃ kapilavarṇeṃ apāreṃ /
ekeṃ sarvāṃgīṃ jaiseṃ seṃdureṃ / ḍavaraleṃ nabha

ekeṃ sāviyāci cuḻukīṃ / jaiseṃ brahmakaṭāha khacileṃ māṇikīṃ /
ekeṃ aruṇodayāsārikhīṃ / kuṃkumavarṇeṃ

ekeṃ śuddhasphaṭikasojvaḻeṃ / ekeṃ iṃdranīḻasunīḻeṃ /
ekeṃ aṃjanavarṇeṃ sakāḻeṃ / raktavarṇeṃ ekeṃ

ekeṃ lasatkāṃcanasama piṃvaḻīṃ / ekeṃ navajaladaśyāmaḻīṃ /
ekeṃ cāṃpegaurīṃ kevaḻīṃ / hariteṃ ekeṃ

ekeṃ taptatāmratāṃbaḍīṃ / ekeṃ śvetacaṃdra cokhaḍīṃ /
aisīṃ nānāvarṇeṃ rūpaḍīṃ / dekheṃ mājhīṃ

he jaise kāṃ ānāna varṇa / taiseṃ ākṛtīṃhī anārisepaṇa /
lājā kaṃdarpa righālā śaraṇa / taisīṃ suṃdareṃ ekeṃ

ekeṃ atilāvaṇyasākāreṃ / ekeṃ snigdhavapu manohareṃ /
śṛṃgāraśriyecīṃ bhāṃḍāreṃ / ughaḍilī jaisīṃ

ekeṃ pīnāvayavamāṃsāḻeṃ / ekeṃ śuṣkeṃ ati vikrāḻeṃ /
ekeṃ dīrghakaṃṭheṃ vitāḻeṃ / vikaṭeṃ ekeṃ

evaṃ nānāvidhākṛtī / iyāṃ pāhatāṃ pāru nāhīṃ subhadrāpatī /
yayāṃcyā ekekīṃ aṃgaprāṃtīṃ / dekha pāṃ jaga

jetha unmīlana hota āhe diṭhī / tetha pasaratī ādityāṃciyā sṛṣṭī /
puḍhatī nimīlanīṃ miṭhīṃ / deta āhātī

vadanīṃciyā vāphesaveṃ / hota jvāḻāmaya āghaveṃ /
jetha pāvakādika pāve / samūha vasūṃcā

āṇi bhrūlatāṃce śevaṭa / kopeṃ miḻoṃ pāhatīṃ ekavaṭa /
tetha rudragaṇāṃce saṃghāṭa / avatarata dekheṃ

paiṃ saumyatecā bolāvā / mitī neṇije aśvinaudevāṃ /
śrotrīṃ hotī pāṃḍavā / aneka vāyu

yāparī ekekāciye līḻe / janmatī surasiddhāṃcīṃ kuḻeṃ /
aisīṃ apāreṃ āṇi viśāḻeṃ / rūpeṃ iyeṃ pāhīṃ

jayāṃteṃ sāṃgāvayā veda bobaḍe / pahāvayā kāḻāceṃhī āyuṣya thokaḍeṃ /
dhātayāhī parī na sāṃpaḍe / ṭhāva jayāṃcā

jayāṃteṃ devatrayī kadhīṃ nāyake / tiyeṃ iyeṃ pratyakṣa dekha anekeṃ /
bhogīṃ āścaryācī kavatikeṃ / mahāsiddhī

iyā mūrtīciyā kirīṭī / romamūḻīṃ dekheṃ pāṃ sṛṣṭī /
suratarutaḻavaṭīṃ / tṛṇāṃkura jaise

caṃḍavātāceni prakāśeṃ / uḍata paramāṇu disatī jaise /
bhramata brahmakaṭāha taiseṃ / avayavasaṃdhīṃ

etha ekaikāciyā pradeśīṃ / viśva dekha vistāreṃśī /
āṇi viśvāhī parauteṃ mānasīṃ / jarī dekhāveṃ varte

tarī iyehī viṣayīṃceṃ kāṃhīṃ / etha sarvathā sāṃkaḍeṃ nāhīṃ /
sukheṃ āvaḍe teṃ mājhiyā dehīṃ / dekhasī tūṃ

aiseṃ viśvamūrtī teṇeṃ / bolileṃ kāruṇyapūrṇeṃ /
taṃva dekhata āhe kīṃ nāhīṃ na mhaṇe / nivāṃtuci yeru

etha kāṃ pāṃ hā ugalā ? / mhaṇauni śrīkṛṣṇeṃ jaṃva pāhilā /
taṃva ārtīceṃ leṇeṃ leilā / taisāci āhe

maga mhaṇeṃ utkaṃṭhe vohaṭa na paḍe / ajhunī sukhācī soya na sāṃpaḍe /
parī dāvileṃ teṃ phuḍeṃ / nākaḻeci yayā

he boloni devo hāṃsile / hāṃsoni dekhaṇiyāteṃ mhaṇitaleṃ /
āmhīṃ viśvarūpa tarī dāvileṃ / parī na dekhasīca tūṃ

yayā bolā yereṃ vicakṣaṇeṃ / mhaṇitaleṃ hāṃ jī kavaṇāsī teṃ uṇeṃ ? /
tumhī bakākaravīṃ cāṃdiṇeṃ / caraūṃ pahā mā

hāṃ ho uṭoniyāṃ ārisā / āṃdhaḻiyā dāūṃ baisā /
bahiriyāpuḍheṃ hṛṣīkeśā / gāṇīva karā

makaraṃdakaṇācā cārā / jāṇatāṃ ghālūni dardurā /
vāyāṃ dhāḍā śāraṅgadharā / kopā kavaṇā

jeṃ atīṃdriya mhaṇauni vyavasthileṃ / kevaḻa jñānadṛṣṭīciyā bhāgā phiṭaleṃ /
teṃ tumhīṃ carmacakṣūṃpuḍheṃ sūdaleṃ / mī kaiseni dekheṃ

parī heṃ tumaceṃ uṇeṃ na bolāveṃ / mīci sāheṃ teṃci baraveṃ /
etha āthi mhaṇitaleṃ deveṃ / mānūṃ bāpā

sāca viśvarūpa jarī āmhī dāvāveṃ / tarī ādhīṃ dekhāvayā sāmarthya kīṃ dyāveṃ /
parī bolata bolata premabhāveṃ / dhasāḻa geloṃ

kāya jāhaleṃ na vāhatāṃ bhuī perije / tarī to velu vilayā jāije /
tarī ātāṃ mājheṃ nijarūpa dekhije / teṃ dṛṣṭī devoṃ tuja

maga tiyā dṛṣṭī pāṃḍavā / āmucā aiśvaryayogu āghavā /
dekhoniyāṃ anubhavā / mājivaḍā karīṃ

aiseṃ teṇeṃ vedāṃtavedyeṃ / sakaḻa loka ādyeṃ /
bolileṃ ārādhyeṃ / jagāceni

paiṃ kauravakulacakravartī / maja hāci vismayo puḍhatapuḍhatī /
je śriyehūni trijagatīṃ / sadaiva ase kavaṇī ?

nā tarī khuṇeceṃ vānāvayālāgīṃ / śrutīvāṃcūni dāvā pāṃ jagīṃ /
nā sevakapaṇa tarī āṃgīṃ / śeṣācyāci āthī

hāṃ ho jayāceni soseṃ / śiṇata āṭhahī pahāra yogī jaise /
anusaraleṃ garuḍāseṃ / kavaṇa āhe ?

parī teṃ āghaveṃci ekīkaḍe ṭheleṃ / sāpeṃ kṛṣṇasukha ekaṃdareṃ jāhaleṃ /
jiye divūni janmale / pāṃḍava he

parī pāṃcāṃhī āṃtu arjunā / śrīkṛṣṇa sāviyāci jāhalā adhīnā /
kāmuka kāṃ jaisā aṃganā / āpaitā kīje

paḍhavileṃ pākharūṃ aiseṃ na bole / yāparī krīḍāmṛgahī taisā na cale /
kaiseṃ daiva etheṃ suravāḍaleṃ / teṃ jāṇoṃ na ye

āji heṃ parabrahma sagaḻeṃ / bhogāvayā sadaiva yāceci ḍoḻe /
kaise vāceni hana laḻe / pāḻīta ase

hā kope kīṃ nivāṃtu sāhe / hā ruse tarī bujhāvīta jāye /
navala piseṃ lāgaleṃ āhe / pārthāceṃ devā

eऱhavīṃ viṣaya jiṇoni janmale / je śukādika dādule /
te viṣayoci vānitāṃ jāhale / bhāṭa yayāceṃ

hā yogiyāṃceṃ samādhidhana / kīṃ hoūni ṭhele pārthāādhīna /
yālāgīṃ vismayo mājheṃ mana / karītase rāyā

tevīṃci saṃjaya mhaṇe kāyasā / vismayo etheṃ kauraveśā /
śrīkṛṣṇeṃ svīkārije tayā aisā / bhāgyodaya hoya

mhaṇauni to devāṃcā rāvo / mhaṇe pārthāte tuja dṛṣṭi devoṃ /
jayā viśvarūpācā ṭhāvo / dekhasī tūṃ

aisī śrīmukhauni akṣareṃ / nighatī nā jaṃva ekasareṃ /
taṃva avidyece āṃdhāreṃ / jāvoṃci lāge

tīṃ akṣareṃ navhatī dekhā / brahmasāmrājyadīpikā /
arjunālāgīṃ citkaḻikā / ujaḻaliyā śrīkṛṣṇeṃ

maga divyacakṣuprakāśu pragaṭalā / tayā jñānadṛṣṭī phāṃṭā phuṭalā /
yayāparī dāvitā jāhalā / aiśvarya āpuleṃ

he avatāra je sakaḻa / te jiye samudrīṃce kāṃ kalloḻa /
viśva heṃ mṛgajaḻa / jayā raśmīstava dise

jiye anādibhūmike niṭe / carācara heṃ citra umaṭe /
āpaṇapeṃ śrīvaikuṃṭheṃ / dāvileṃ tayā

māgāṃ bāḻapaṇīṃ yeṇeṃ śrīpatī / jaiṃ eka veḻa khādalī hotī mātī /
taiṃ koponiyāṃ hātīṃ / yaśodāṃ dharilā

maga bheṇeṃ bheṇeṃ jaiseṃ / mukhīṃ jhāḍā dyāvayāceni miseṃ /
cavadāhī bhuvaneṃ sāvakāśeṃ / dāvilīṃ tiye

nā tarī madhuvanīṃ dhruvāsi keleṃ / jaiseṃ kapola śaṃkheṃ śivataleṃ /
āṇi vedāṃciyehī matīṃ ṭheleṃ / teṃ lāgalā boloṃ

taisā anugraho paiṃ rāyā / śrīharī kelā dhanaṃjayā /
ātāṃ kavaṇekaḍehī māyā / aisī bhāṣa neṇeṃci to

ekasareṃ aiśvaryatejeṃ pāhaleṃ / tayā camatkārāceṃ ekārṇava jāhaleṃ /
citta samājīṃ buḍoni ṭheleṃ / vismayāciyā

jaisā ābrahma pūrṇodakīṃ / pavhe mārkaṃḍeya ekākīṃ /
taisā viśvarūpa kautukīṃ / pārthu loḻe

mhaṇe kevaḍheṃ gagana etha hoteṃ / teṃ kavaṇeṃ neleṃ pāṃ keuteṃ /
tīṃ carācara mahābhūteṃ / kāya jāhalīṃ ?

diśāṃce ṭhāvahī hārapale / ādhordhva kāya neṇoṃ jāhale /
ceiliyā svapna taise gele / lokākāra

nānā sūryatejapratāpeṃ / sacaṃdra tārāṃgaṇa jaiseṃ lope /
taisīṃ giḻilīṃ viśvarūpeṃ / prapaṃcaracanā

tevhāṃ manāsī manapaṇa na sphure / buddhi āpaṇapeṃ na sāṃvareṃ /
iṃdriyāṃce raśmī māghāre / hṛdayavarī bharale

tetha tāṭasthyā tāṭasthya paḍileṃ / ṭakāsī ṭaka lāgale /
jaiseṃ mohanāstra ghātaleṃ / vicārajātāṃ

taisā vismitu pāhe koḍeṃ / taṃva puḍhāṃ hoteṃ caturbhuja rūpaḍeṃ /
teṃci nānārūpa cahūṃkaḍe / māṃḍoni ṭheleṃ

jaiseṃ varṣākāḻīṃce meghauḍe / kāṃ mahāpraḻayīṃceṃ teja vāḍhe /
taiseṃ āpaṇāvīṇa kavaṇīkaḍe / nedīci uroṃ

prathama svarūpasamādhāna / pāvoni ṭhelā arjuna /
saveci ughaḍī locana / taṃva viśvarūpa dekheṃ

ihīṃci dohīṃ ḍoḻāṃ / pāhāveṃ viśvarūpā sakaḻā /
to śrīkṛṣṇeṃ sohaḻā / puravilā aisā

maga tetha saiṃgha dekhe vadaneṃ / jaisī ramānāyakācīṃ rājabhuvaneṃ /
nānā pragaṭalīṃ nidhāneṃ / lāvaṇyaśriyecīṃ

kīṃ ānaṃdācī vaneṃ sāsinnalīṃ / jaisī sauṃdaryā rāṇīva joḍalī /
taisīṃ manohareṃ dekhilīṃ / harīcīṃ vaktreṃ

tayāṃhī mājīṃ ekaikeṃ / sāviyāci bhayānakeṃ /
kāḻarātrīcīṃ kaṭakeṃ / uṭhavalīṃ jaisīṃ

kīṃ mṛtyūsīci mukheṃ jāhalīṃ / ho kāṃ jeṃ bhayācīṃ durgeṃ pannāsilīṃ /
kīṃ mahākuṃḍeṃ ughaḍalīṃ / praḻayānaḻācīṃ

taisīṃ adbhuteṃ bhayāsureṃ / tetha vadaneṃ dekhilīṃ vīreṃ /
āṇikeṃ asādhāraṇeṃ sāḻaṃkāreṃ / saumyeṃ bahuteṃ

paiṃ jñānadṛṣṭīceni avalokeṃ / parī vadanāṃcā śevaṭu na ṭake /
maga locana teṃ kavatikeṃ / lāgalā pāhoṃ

taṃva nānāvarṇeṃ kamaḻavaneṃ / vikāsilīṃ taise arjuneṃ /
ḍoḻe dekhile pāliṃganeṃ / ādityāṃcīṃ

tetheṃci kṛṣṇameghāṃciyā dāṭī- / mājīṃ kalpāṃta vijūṃciyā sphuṭī /
taisiyā vanhi piṃgaḻā diṭhī / bhrūbhaṃgātaḻīṃ

heṃ ekaika āścarya pāhatāṃ / tiye ekeci rūpīṃ paṃḍusutā /
darśanācī anekatā / pratiphaḻalī

maga mhaṇe caraṇa te kavaṇekaḍe / keute mukuṭa keṃ dordaṃḍeṃ /
aisī vāḍhavitāhe koḍeṃ / cāḍa dekhāvayācī

tetha bhāgyanidhi pārthā / kāṃ viphalatva hoīla manorathā /
kāya pinākapāṇīciyā bhātāṃ / vāyakāṃḍīṃ āhātī ?

nā tarī caturānanāciye vāce / kāya āhātī laṭikiyā akṣarāṃce sāce ? /
mhaṇauni sādyaṃtapaṇa apārāṃce / dekhileṃ teṇeṃ

jayācī soya vedāṃ nākaḻe / tayāce sakaḻāvayava ekeci veḻe /
arjunāce donhī ḍoḻe / bhogite jāhale

caraṇauni mukuṭavarī / dekhata viśvarūpācī thorī /
je nānā ratna aḻaṃkārīṃ / miravata ase

parabrahma āpuleni āṃgeṃ / lyāvayā āpaṇaci jāhalā anegeṃ /
tiyeṃ leṇīṃ mī sāṃgeṃ / kāisayāsārikhīṃ

jiye prabheciye jhaḻāḻā / ujāḻu caṃdrādityamaṃḍaḻā /
je mahātejācā jivhāḻā / jeṇeṃ viśva pragaṭe

to divyateja śṛṃgāru / koṇāciye matīsī hoya gocaru /
deva āpaṇapeṃci leile aiseṃ vīru / dekhata ase

maga tetheṃci jñānāciyā ḍoḻāṃ / pahāta karapallavāṃ jaṃva saraḻā /
taṃva toḍita kalpāṃtīṃciyā jvāḻā / taisīṃ śastreṃ jhaḻakata dekhe

āpaṇa āṃga āpaṇa alaṃkāra / āpaṇa hāta āpaṇa hatiyāra /
āpaṇa jīva āpaṇa śarīra / dekheṃ carācara koṃdaleṃ deveṃ

jayāciyā kiraṇāṃce nikharapaṇeṃ / nakṣatrāṃce hota phuṭāṇe /
tejeṃ khiraḍalā vanhi mhaṇe / samudrīṃ righoṃ

maga kālakūṭakalloḻīṃ kavaḻileṃ / nānā mahāvijūṃceṃ dāṃga umaṭaleṃ /
taise apāra kara dekhile / uditāyudhīṃ

kīṃ bheṇeṃ tethūni kāḍhilī diṭhī / maga kaṃṭhamuguṭa pahātase kirīṭī /
taṃva suratarūcī sṛṣṭī / jayāṃpāsoni kāṃ jāhalī

jiye mahāsiddhīṃcīṃ mūḻapīṭheṃ / śiṇalī kamaḻā jetha vāvaṭe /
taisīṃ kusumeṃ ati cokhaṭeṃ / turaṃbilīṃ dekhilīṃ

muguṭāvarī stabaka / ṭhāyīṃ ṭhāyīṃ pūjābaṃdha aneka /
kaṃṭhīṃ ruḻatāti alaukika / māḻādaṃḍa

svargeṃ sūryateja veḍhileṃ / jaiseṃ paṃdhareneṃ merūteṃ maḍhileṃ /
taiseṃ nitaṃbāvarī gāḍhileṃ / pītāṃbaru jhaḻake

śrīmahādevo kāpureṃ uṭilā / kāṃ kailāsu pārajeṃ ḍavarilā /
nānā kṣīrodakeṃ pāṃgharavilā / kṣīrārṇavo jaisā

jaisī caṃdramayācī ghaḍī upalavilī / maga gaganākaravīṃ buṃthī ghevavilī /
taisīṃ caṃdanapiṃjarī dekhilī / sarvāṃgīṃ teṇeṃ

jeṇeṃ svaprakāśā kāṃtīṃ caḍhe / brahmānaṃdācā nidāghu moḍe /
jayāceni saurabhyeṃ jīvita joḍe / vedavatīye

jayāce nirlepa anulepu karī / je anaṃguhī sarvāṃgīṃ dharī /
tayā sugaṃdhācī thorī / kavaṇa vānī ?

aisī ekaika śṛṃgāraśobhā / pāhatāṃ arjuna jātaseṃ kṣobhā /
tevīṃci devo baisalā kīṃ ubhā / kā śayālu heṃ neṇaveṃ

bāhera diṭhī ughaḍoni pāhe / taṃva āghaveṃ mūrtimaya dekhata āhe /
maga ātāṃ na pāheṃ mhaṇauni ugā rāhe / tarī āṃtuhī taiseṃci

anāvareṃ mukheṃ samora dekhe / tayābheṇeṃ pāṭhīmorā jaṃva ṭhāke /
taṃva tayāhīkaḍe śrīmukheṃ / karacaraṇa taiseci

aho pāhatāṃ kīra pratibhāse / etha navalāvo kāya ase ? /
pari na pāhatāṃhī dise / coja āikā

kaiseṃ anugrahāceṃ karaṇeṃ / pārthāceṃ pāhaṇeṃ āṇi na pāhaṇeṃ /
tayāhī sakaṭa nārāyaṇeṃ / vyāpūni ghetaleṃ

mhaṇauni āścaryācyā purīṃ ekīṃ / paḍilā ṭhāyeṭhāva thaḍīṃ ṭhākī /
taṃva camatkārāciyā āṇikīṃ / mahārṇavīṃ paḍe

taisā arjunu asādhāraṇeṃ / āpuliyā darśanāceni viṃdāṇeṃ /
kavaḻūni ghetalā teṇeṃ / anaṃtarūpeṃ

to viśvatomukha svabhāveṃ / āṇi teci dāvāvayālāgīṃ pāṃḍaveṃ /
prārthilā ātāṃ āghaveṃ / hoūni ṭhelā

āṇi dīpeṃ kāṃ sūryeṃ pragaṭe / athavā nimuṭaliyā dekhāveṃci khuṃṭe /
taisī diṭhī navhe je vaikuṃṭheṃ / didhalī āhe

mhaṇauni kirīṭīsi dohīṃ parī / teṃ dekhaṇeṃ dekheṃ aṃdhārī /
heṃ saṃjayo hastināpurīṃ / sāṃgatase rāyā

mhaṇe kiṃbahunā avadhārileṃ / pārtheṃ viśvarūpa dekhileṃ /
nānā ābharaṇīṃ bharaleṃ / viśvatomukha

tiye aṃgaprabhecā devā / navalāvo kāisayā aisā sāṃgāvā /
kalpāṃtīṃ ekuci meḻāvā / dvādaśādityāṃcā hoya

taise te divyasūrya sahasravarī / jarī udayajatī kāṃ ekeci avasarīṃ /
taऱhī tayā tejācī thorī / upamūṃ naye

āghavayāci vijūṃcā meḻāvā kīje / āṇi praḻayāgnīcī sarva sāmagrī āṇije /
tevīṃci daśakuhī meḻavije / mahātejāṃcā

taऱhī tiye aṃgaprabheceni pāḍeṃ / heṃ teja kāṃhīṃ kāṃhīṃ hoīla thoḍeṃ /
āṇi tayā aiseṃ kīra cokhaḍeṃ / triśuddhī nohe

aiseṃ mahātmya yā śrīharīceṃ sahaja / phāṃkatase sarvāṃgīceṃ teja /
teṃ munikṛpā jī maja / dṛṣṭa jāhaleṃ

āṇi tiye viśvarūpīṃ ekīkaḍe / jaga āghaveṃ āpuleni pavāḍeṃ /
jaise mahodadhīmājīṃ buḍabuḍe / sināneṃ disatī

kāṃ ākāśīṃ gaṃdharvanagara / bhūtaḻīṃ pipīlikā bāṃdhe ghara /
nānā meruvarī sapūra / paramāṇu baisale

viśva āghaveṃci tayāparī / tayā devacakravartīciyā śarīrīṃ /
arjuna tiye avasarīṃ / dekhatā jāhalā

tetha eka viśva eka āpaṇa / aiseṃ aḻumāḻa hoteṃ jeṃ dujepaṇa /
teṃhī āṭoni geleṃ aṃtaḥkaraṇa / virāleṃ sahasā

āṃtu ānaṃdā ceireṃ jāhaleṃ / bāheri gātrāṃceṃ baḻa hāraponi geleṃ /
āpāda pāṃ guṃtaleṃ / pulakāṃcaleṃ

vārṣiye prathamadaśe / vohaḻalayā śailāṃceṃ sarvāṃga jaiseṃ /
virūḍhe komalāṃkurīṃ taise / romāṃca jāhale

śivatalā caṃdrakarīṃ / somakāṃtu drāvo dharī /
taisiyā svedakaṇikā śarīrīṃ / dāṭaliyā

mājīṃ sāpaḍaleni alikuḻeṃ / jaḻāvarī kamaḻakaḻikā jevīṃ āṃdoḻe /
tevīṃ āṃtuliyā sukhormīceni baḻeṃ / bāheri kāṃpe

karpūrakardaḻīcīṃ garbhapuṭeṃ / ukalatāṃ kāpurāceni koṃdāṭeṃ /
pulikā gaḻatī tevīṃ theṃbuṭeṃ / netrauni paḍatī

udayaleni sudhākareṃ / jaisā bharalāci samudra bhare /
taisā veḻoveḻāṃ urmibhareṃ / ucaṃbaḻata ase

aisā sāttvikāṃhī āṭhāṃ bhāvāṃ / paraspareṃ vartatase hevā /
tetha brahmānaṃdācī jīvā / rāṇīva phāvalī

taisāci tayā sukhānubhavāpāṭhīṃ / kelā dvaitācā sāṃbhāḻu diṭhī /
maga usāsauni kirīṭī / vāsa pāhilī

tetha baisalā hotā jiyā savā / tiyāciyā kaḍe mastaka khālavilā devā /
joḍūni karasaṃpuṭa baravā / bolatu ase

mhaṇe jayajayājī svāmī / navala kṛpā kelī tumhīṃ /
jeṃ heṃ viśvarūpa kīṃ āmhīṃ / prākṛta dekhoṃ

pari sācaci bhaleṃ keleṃ gosāviyā / maja paritoṣu jāhalā sāviyā /
jī dekhalāsi jo iyā / sṛṣṭīsī tūṃ āśrayo

devā maṃdarāceni aṃgalageṃ / ṭhāyīṃ ṭhāyīṃ śvāpadāṃcīṃ dāṃgeṃ /
taisīṃ iyeṃ tujhyā dehīṃ anegeṃ / dekhataseṃ bhuvaneṃ

aho ākāśaciye khoḻe / disatī grahagaṇāṃcīṃ kuḻeṃ /
kāṃ mahāvṛkṣīṃ avisāḻeṃ / pakṣijātīcīṃ

tayāparī śrīharī / tujhiyā viśvātmakīṃ iye śarīrīṃ /
svargu dekhataseṃ avadhārīṃ / suragaṇeṃsīṃ

prabhu mahābhūtāṃceṃ paṃcaka / yetha dekhata āhe aneka /
āṇi bhūtagrāma ekeka / bhūtasṛṣṭīceṃ

jī satyaloku tujamājīṃ āhe / dekhilā caturānanu hā nohe ? /
āṇi yerīkaḍe jaṃva pāheṃ / taṃva kailāsuhī dise

śrīmahādeva bhavāniyeśīṃ / tujhyā disatase eke aṃśīṃ /
āṇi tūṃteṃhī gā hṛṣīkeśī / tujamājīṃ dekhe

paiṃ kaśyapādi ṛṣikuḻeṃ / iyeṃ tujhiyā svarūpīṃ sakaḻeṃ /
dekhataseṃ pātāḻeṃ / pannageṃśīṃ

kiṃbahunā trailokyapatī / tujhiyā ekekāci avayavāciye bhiṃtī /
iyeṃ caturdaśabhuvaneṃ citrākṛtī / aṃkuralīṃ jāṇoṃ

āṇi tethiṃce je je loka / te citraracanā jī aneka /
aiseṃ dekhatase alokika / gāṃbhīrya tujheṃ

tyā divyacakṣūṃceni paiseṃ / cahuṃkaḍe jaṃva pāhāta aseṃ /
taṃva dordaṃḍīṃ kāṃ jaiseṃ / ākāśa koṃbhaileṃ

taise ekaci niraṃtara / devā dekhata aseṃ tujhe kara /
karīta āghaveci vyāpāra / ekeci kāḻīṃ

maga mahāśūnyāceni paisāreṃ / ughaḍalīṃ brahmakaṭāhācīṃ bhāṃḍāreṃ /
taisīṃ dekhataseṃ apāreṃ / udareṃ tujhīṃ

jī sahasraśīrṣayāceṃ dekhileṃ / koḍīvarī hotāti ekīveḻeṃ /
kīṃ parabrahmaci vadanaphaḻeṃ / moḍoni āleṃ

taisīṃ vaktreṃ jī jeutīṃ teutīṃ / tujhīṃ dekhitase viśvamūrtī /
āṇi tayāciparī netrapaṃktī / anekā saiṃgha

heṃ aso svarga pātāḻa / kīṃ bhūmī diśā aṃtarāḻa /
he vivakṣā ṭhelī sakaḻa / mūrtimaya dekhataseṃ

heṃ tujavīṇa ekādiyākaḍe / paramāṇūhi etulā koḍeṃ /
avakāśu pāhataseṃ pari na sāṃpaḍe / aiseṃ vyāpileṃ tuvāṃ

iye nānāparī aparimiteṃ / jetulīṃ sāṭhavilīṃ hotīṃ mahābhūteṃ /
tetulāhi pavāḍu tuvāṃ anaṃteṃ / koṃdalā dekhataseṃ

aisā kavaṇeṃ ṭhāyāhūni tūṃ ālāsī / etha baisalāsi kīṃ ubhā āhāsi /
āṇi kavaṇiye māyeciye poṭīṃ hotāsī / tujheṃ ṭhāṇa kevaḍheṃ

tujheṃ rūpa vaya kaiseṃ / tujapailīkaḍe kāya ase /
tūṃ kāisayāvarī āhāsi aiseṃ / pāhileṃ miyāṃ

taṃva dekhileṃ jī āghaveṃci / tari ātāṃ tuja ṭhāvo tūṃci /
tūṃ kavaṇācā navhesi aisāci / anādi āyatā

tūṃ ubhā nā baiṭhā / dighaḍu nā khujaṭā /
tuja taḻīṃ varī vaikuṃṭhā / tūṃci āhāsī

tūṃ rūpeṃ āpaṇayāṃci aisā / devā tujhī tūṃci vayasā /
pāṭhīṃ poṭa pareśā / tujheṃ tūṃ gā

kiṃbahunā ātāṃ / tujheṃ tūṃci āghaveṃ anaṃtā /
heṃ puḍhata puḍhatī pāhatāṃ / dekhileṃ miyāṃ

pari yā tujhiyā rūpāāṃtu / jī uṇīva eka ase dekhatu /
je ādi madhya aṃtu / tinhīṃ nāhīṃ

eऱhavīṃ giṃvasileṃ āghavāṃ ṭhāyīṃ / pari soya na lāheci kahīṃ /
mhaṇauni triśuddhī he nāhīṃ / tinhī etha

evaṃ ādimadhyāṃtarahitā / tūṃ viśveśvarā aparimitā /
dekhilāsi jī tattvatāṃ / viśvarūpā

tuja mahāmūrtīciyā āṃgī / umaṭaliyā pṛthak mūrtī anegī /
leilāsī vāneparīṃcī āṃgīṃ / aisā āvaḍatu āhāsī

nānā pṛthak mūrtī tiyā drumavallī / tujhiyā svarūpamahācaḻīṃ /
divyālaṃkāra phulīṃ phaḻīṃ / sāsinnaliyā

ho kāṃ je mahodadhīṃ tūṃ devā / jāhalāsi taraṃgamūrtī helāvā /
kīṃ tūṃ eka vṛkṣu baravā / mūrtiphaḻīṃ phaḻalāsī

jī bhūtīṃ bhūtaḻa māṃḍileṃ / jaiseṃ nakṣatrīṃ gagana guḍhaleṃ /
taiseṃ mūrtimaya bharaleṃ / dekhataseṃ tujheṃ rūpa

jī ekekīcyā aṃgaprāṃtīṃ / hoya jāya heṃ trijagatī /
evaḍhiyāhī tujhyā āṃgīṃ mūrtī / kīṃ romā jāliyā

aisā pavāḍu māṃḍūni viśvācā / tūṃ kavaṇa pāṃ etha koṇācā /
heṃ pāhileṃ taṃva āmucā / sārathī toci tūṃ

tarī maja pāhatāṃ mukuṃdā / tūṃ aisāci vyāpaku sarvadā /
maga bhaktānugraheṃ tayā mugdhā / rūpāteṃ dharisī

kaiseṃ cahūṃ bhujāṃceṃ sāṃvaḻeṃ / pāhatāṃ volhāvatī mana ḍoḻe /
kheṃva deūṃ jāije tarī ākaḻe / dohīṃci bāhīṃ

aisī mūrti koḍisavāṇī kṛpā / karūni hosī nā viśvarūpā /
kīṃ amuciyāci diṭhī salepā / jeṃ sāmānyatveṃ dekhitī

tarī ātāṃ diṭhīcā viṭāḻu gelā / tuvāṃ sahajeṃ divyacakṣū kelā /
mhaṇauni yathārūpeṃ dekhavalā / mahimā tujhā

parī makaratuṃḍāmāgilekaḍe / toci hotāsi tūṃ evaḍheṃ /
rūpa jāhalāsi heṃ phuḍeṃ / voḻakhileṃ miyāṃ

nohe toci hā śirīṃ ? / mukuṭa leilāsi śrīharī /
parī ātāṃceṃ teja āṇi thorī / navala kīṃ bahu heṃ

teṃci heṃ variliyeci hātīṃ / cakra parijitayā āyatī /
sāṃvaritāsi viśvamūrtī / te na moḍe khūṇa

yerīkaḍe teci he nohe gadā / āṇi taḻiliyā donī bhujā nirāyudhā /
vāgore sāṃvarāvayā goviṃdā / saṃsariliyā

āṇi teṇeṃci vegeṃ sahasā / mājhiyā manorathāsarisā /
jāhalāsi viśvarūpā viśveśā / mhaṇauni jāṇeṃ

parī kāyaseṃ bā heṃ coja / vismayo karāvayāhi pāḍū nāhīṃ maja /
citta hoūni jātaseṃ nirbuja / āścaryeṃ yeṇeṃ

heṃ etha āthi kāṃ yetha nāhīṃ / aiseṃ śvasoṃhī naye kāṃhīṃ /
navala aṃgaprabhecī navāī / kaisī koṃdalīṃ saiṃgha

etha agnīcīhī diṭhī karapata / sūrya khadyotu taisā hārapata /
aiseṃ tīvrapaṇa adbhuta / tejāceṃ yayā

ho kāṃ mahātejāciyā mahārṇavīṃ / buḍoni gelī sṛṣṭī āghavī /
kīṃ yugāṃtavijūṃcyā pālavīṃ / jhāṃkaleṃ gagana

nātarī saṃhāratejāciyā jvāḻā / toḍoni mācū bāṃdhalā aṃtarāḻāṃ /
ātāṃ divya jñānāciyā ḍoḻāṃ / pāhavenā

ujāḻu adhikādhika bahuvasu / dhaḍāḍīta āhe atidāhasu /
paḍata divyacakṣuṃsahī trāsu / nyāhāḻitāṃ

ho kāṃ je mahāpraḻayīṃcā bhaḍāḍu / hotā kāḻāgnirudrāciyā ṭhāyīṃ gūḍhu /
to tṛtīyanayanācā maḍhū / phuṭalā jaisā

taiseṃ pasaraleni prakāśeṃ / saiṃgha pāṃcavaniyā jvāḻāṃce vaḻase /
paḍatāṃ brahmakaṭāha koḻise / hota āhātī

aisā adbhuta tejorāśī / janmā navala myāṃ dekhilāsī /
nāhīṃ vyāptī āṇi kāṃtīsī / pāru jī tujhiye

devā tūṃ akṣara / auṭāviye mātresi para /
śrutī jayāceṃ ghara / giṃvasīta āhātī

jeṃ ākārāceṃ āyatana / jeṃ viśvanikṣepaikanidhāna /
teṃ avyaya tūṃ gahana / avināśa jī

tūṃ dharmācā volāvā / anādisiddha tūṃ nitya navā /
jāṇeṃ mī sadatisāvā / puruṣa viśeṣa tūṃ

tūṃ ādimadhyāṃtarahitu / svasāmarthyeṃ tūṃ anaṃtu /
viśvabāhu aparimitu / viśvacaraṇa tūṃ

paiṃ caṃdra caṃḍāṃśu ḍoḻāṃ / dāvitāsi kopaprasāda līḻā /
ekāṃ rusasī tamāciyā ḍoḻāṃ / ekāṃ pāḻitosi kṛpādṛṣṭī

jī evaṃvidhā tūṃteṃ / mī dekhataseṃ heṃ niruteṃ /
peṭaleṃ praḻayāgnīceṃ ujiteṃ / taiseṃ vaktra heṃ tujheṃ

vaṇiveni peṭale parvata / kavaḻūni jvāḻāṃce ubhaḍa uṭhata /
taisī cāṭīta dāḍhā dāṃta / jībha loḻe

iye vadanīṃciyā ubā / āṇi jī sarvāṃgakāṃtīciyā prabhā /
viśva tātaleṃ ati kṣobhā / jāta āhe

kāṃ je dyaurloka āṇi pātāḻa / pṛthivī āṇi aṃtarāḻa /
athavā daśadiśā samākuḻa / diśācakra

heṃ āghaveṃci tuṃvā ekeṃ / bharaleṃ dekhata āhe kautukeṃ /
pari gaganāhīsakaṭa bhayānakeṃ / āplavije jevīṃ

nātarī adbhutarasāciyā kalloḻīṃ / jāhalī cavadāhī bhuvanāṃsi kaḍiyāḻīṃ /
taiseṃ āścaryaci maga mī ākaḻīṃ / kāya eka ?

nāvare vyāptī he asādhāraṇa / na sāhave rūpāceṃ ugrapaṇa /
sukha dūrī geleṃ pari prāṇa / vipāyeṃ dharīje

devā aiseṃ dekhoni tūṃteṃ / neṇoṃ kaiseṃ āleṃ bhayāceṃ bhariteṃ /
ātāṃ duḥkhakalloḻīṃ jhaḻaṃbateṃ / tinhīṃ bhuvaneṃ

eऱhavīṃ tuja mahātmayāceṃ dekhaṇeṃ / tari bhayaduḥkhāsi kāṃ meḻavaṇeṃ ? /
pari heṃ sukha navheci jeṇeṃ guṇeṃ / teṃ jāṇavata āhe maja

jaṃva tujheṃ rūpa nohe diṭheṃ / taṃva jagāsi saṃsārika gomaṭeṃ /
ātāṃ dekhilāsi tarī viṣayaviṭeṃ / upanalā trāsu

tevīṃci tuja dekhiliyāsāṭhīṃ / kāya sahasā tuja devoṃ yeīla miṭhī /
āṇi nedīṃ tarī śokasaṃkaṭīṃ / rāhoṃ kevīṃ ?

mhaṇauni māgāṃ saroṃ taṃva saṃsāru / āḍavīta yetase anivāru /
āṇi puḍhāṃ tūṃ taṃva anāvaru / na yesi ghevoṃ

aisā mājhāraliyā sāṃkaḍāṃ / bāpuḍyā trailokyācā hotase huraḍā /
hā dhvani jī phuḍā / cojavalā maja

jaisā āraṃbaḻalā āgīṃ / to samudrā ye nivāvayālāgīṃ /
taṃva kalloḻapāṇiyāciyā taraṃgīṃ / āgaḻā bihe

taiseṃ yā jagāsi jāhaleṃ / tūṃteṃ dekhoni taḻamaḻita ṭheleṃ /
yāmājīṃ paila bhale / jñānaśūrāṃce meḻāve

he tujheni āṃgikeṃ tejeṃ / jāḻūni sarva karmāṃcīṃ bījeṃ /
miḻata tuja āṃtu sahajeṃ / sadbhāvesīṃ

āṇika eka sāviyāci bhayabhīru / sarvasveṃ dharūni tujhī moharu /
tuja prārthitāti karu / joḍoniyāṃ

devā avidyārṇavīṃ paḍiloṃ / jī viṣayavāgureṃ āṃtuḍaloṃ /
svargasaṃsārāciyā sāṃkaḍaloṃ / dohīṃ bhāgīṃ

aiseṃ āmuceṃ soḍavaṇeṃ / tujavāṃconi kījela kavaṇeṃ ? /
tuja śaraṇa gā sarvaprāṇeṃ / mhaṇata devā

āṇi maharṣī athavā siddha / kāṃ vidyādharasamūha vividha /
he bolata tuja svastivāda / karitī stavana

he rudrādityāṃce meḻāve / vasu hana sādhya āghave /
aśvinau deva viśvedeva vibhaveṃ / vāyuhī he jī

avadhārā pitara hana gaṃdharva / paila yakṣarakṣogaṇa sarva /
jī maheṃdramukhya deva / kāṃ siddhādika

he āghaveci āpulāliyā lokīṃ / sotkaṃṭhita avalokīṃ /
he mahāmūrtī daivikī / pāhāta āhātī

maga pāhāta pāhāta pratikṣaṇīṃ / vismita hoūni aṃtaḥkaraṇīṃ /
karita nijamukaṭīṃ vovāḻaṇī / prabhujī tuja

te jaya jaya ghoṣa kalaraveṃ / svarga gājavitātī āghave /
ṭhevita lalāṭāvarī barave / karasaṃpuṭa

tiye vinayadrumāciye āravīṃ / suravāḍalī sāttvikāṃcī mādhavī /
mhaṇauni karasaṃpuṭapallavīṃ / tūṃ hotāsi phaḻa

jī locanāṃ bhāgya udeleṃ / manā sukhāceṃ suyāṇeṃ pāhaleṃ /
je agādha tujheṃ dekhileṃ / viśvarūpa ihīṃ

heṃ lokatrayavyāpaka rūpaḍeṃ / pāhatāṃ devāṃhī vacaka paḍe /
yāceṃ sanmukhapaṇa joḍeṃ / bhalatayākaḍunī

aiseṃ ekaci parī vicitreṃ / āṇi bhayānakeṃ vaktreṃ /
bahulocana he saśastreṃ / anaṃtabhujā

anaṃta cāru bāhu caraṇa / bahūdara āṇi nānāvarṇa /
kaiseṃ prativadanīṃ mātalepaṇa / āveśāceṃ

ho kāṃ mahākalpāciyā aṃtīṃ / tavakaleni yameṃ jeutateutīṃ /
praḻayāgnīcīṃ ujitīṃ / āṃbukhilīṃ jaisīṃ

nātarī saṃhāratripurārīcīṃ yaṃtreṃ / kīṃ praḻayabhairavācīṃ kṣetreṃ /
nānā yugāṃtaśaktīcīṃ pātreṃ / bhūtakhicā voḍhavilīṃ

taisīṃ jiyetiyekaḍe / tujhīṃ vaktreṃ jīṃ pracaṃḍeṃ /
na samātī darīmājīṃ siṃvhāḍe / taise daśana disatī rāgīṭa

jaiseṃ kāḻarātrīceni aṃdhāreṃ / ulhāsata nighatīṃ saṃhārakheṃcareṃ /
taisiyā vadanīṃ praḻayarudhireṃ / kāṭaliyā dāḍhā

heṃ aso kāḻeṃ avaṃtileṃ raṇa / kāṃ sarva saṃhāreṃ mātaleṃ maraṇa /
taiseṃ atibhiṃguḻavāṇeṃpaṇa / vadanīṃ tujhiye

he bāpuḍī lokasṛṣṭī / moṭakīye vipāilī diṭhī /
āṇi duḥkhakāliṃdīciyā taṭīṃ / jhāḍa hoūni ṭhelī

tuja mahāmṛtyūciyā sāgarīṃ / ātāṃ he trailokya jīvitācī tarī /
śokadurvātalaharī / āṃdoḻata ase

etha koponi jarī vaikuṃṭheṃ / aiseṃ hana mhaṇipaila avacaṭeṃ /
jeṃ tuja lokāṃceṃ kāī vāṭe ? / tūṃ dhyānasukha heṃ bhogīṃ

tarī jī lokāṃceṃ kīra sādhāraṇa / vāyāṃ āḍa sūtase voḍaṇa /
kevīṃ sahasā mhaṇe prāṇa / mājheci kāṃpatī

jyā maja saṃhārarudra vāsipe / jyā majabheṇeṃ mṛtyu lape /
to mī etheṃ ahāḻabāhaḻīṃ kāṃpeṃ / aiseṃ tuvāṃ keleṃ

pari navala bāpā he mahāmārī / iyā nāma viśvarūpa jarī /
he bhyāsurapaṇeṃ hārī / bhayāsi āṇī

ṭhelīṃ mahākāḻeṃsi haṭeṃtaṭeṃ / taisī kitīkeṃ mukheṃ rāgiṭeṃ /
ihīṃ vāḍhoniyāṃ dhākuṭeṃ / ākāśa keleṃ

gaganāceṃni vāḍapaṇeṃ nākaḻe / tribhuvanīṃciyāhī vāriyā na veṃṭāḻe /
yayāceni vāphā āgī jaḻe / kaiseṃ dhaḍāḍīta ase

tevīṃci ekasārikheṃ eka nohe / etha varṇāvarṇācā bhedu āhe /
ho kāṃ jeṃ praḻayīṃ sāvāvo lāhe / vanhṃ yayācā

jayāciye āṃgīṃcī dīptī yevaḍhī / je trailokya kīje rākhoṃḍī /
kīṃ tayāhī toṃḍeṃ āṇi toṃḍīṃ / dāṃta dāḍhā

kaisā vārayā dhanurvāta caḍhalā / samudra kīṃ mahāpurīṃ paḍilā /
viṣāgni mārā pravartalā / vaḍavānaḻāsī

haḻāhaḻa āgī piyāleṃ / navala maraṇa mārā pravartaleṃ /
taiseṃ saṃhāratejā yā jāhaleṃ / vadana dekhā

parī koṇeṃ māneṃ viśāḻa / jaiseṃ tuṭaliyā aṃtarāḻa /
ākāśāsi kavhaḻa / paḍoni ṭheleṃ

nātarī kākhe sūni vasuṃdharī / jaiṃ hiraṇyākṣu rigālā vivarīṃ /
taiṃ ughaḍale hāṭakeśvarīṃ / jevīṃ pātāḻakuhara

taisā vaktrāṃcā vikāśu / mājīṃ jivhāṃcā āgaḻāci āveśu /
viśva na pure mhaṇauni ghāṃsu / na bharīci koṃḍeṃ

āṇi pātāḻavyāḻāṃciyā phūtkārīṃ / garaḻajvāḻā lāgatī aṃbarīṃ /
taisī pasaraliye vadanadarī- / mājīṃ he jivhā

kāḍhūni praḻayavijūṃcīṃ juṃbāḍeṃ / jaiseṃ pannāsileṃ gaganāce huḍe /
taise āvāḻuvāṃvarī āṃkaḍe / dhagadhagīta dāḍhāṃce

āṇi lalāṭapaṭāciye khoḻe / kaiseṃ bhayāteṃ bheḍavitātī ḍoḻe /
ho kāṃ je mahāmṛtyūce umāḻe / kaḍavasāṃ rāhile

aiseṃ vāūni bhayāceṃ bhoja / etha kāya nipajavūṃ pāhātosi kāja /
teṃ neṇoṃ parī maja / maraṇabhaya āleṃ

devā viśvarūpa pahāvayāce ḍohaḻe / kele tiye pāvaloṃ pratiphaḻeṃ /
bāpā dekhilāsi ātāṃ ḍoḻe / nivāve taise nivāle

aho deho pārthiva kīra jāye / yayācī kākuḻatī kavaṇā āhe /
pari ātāṃ caitanya mājheṃ vipāyeṃ / vāṃce kīṃ na vāṃce

eऱhavīṃ bhayāstava āṃga kāṃpe / nāveka āgaḻeṃ tarī mana tāpe /
athavā buddhihī vāsipe / abhimānu visarije

parī yetuliyāhī vegaḻā / jo kevaḻa ānaṃdaikakaḻā /
tayā aṃtarātmayāhī niścaḻā / śiyārī ālī

bāpa sākṣātkārācā vedhu / kaisā deśadhaḍī kelā bodhu /
hā guruśiṣyasaṃbaṃdhu / vipāyeṃ nāṃde

devā tujhyā ye darśanīṃ / jeṃ vaikalya upajaleṃ āhe aṃtaḥkaraṇīṃ /
teṃ sāvarāvayālāgīṃ gaṃvasaṇī / dhairyācī karitaseṃ

taṃva mājheni nāmeṃ dhairya hārapaleṃ / kīṃ tayāhīvarī viśvarūpadarśana jāhaleṃ /
heṃ aso pari maja bhaleṃ ātuḍavileṃ / upadeśā iyā

jīva visaṃvāvayāciyā cāḍā / saiṃgha dhāṃvādhāṃvī karitase bāpuḍā /
pari soyahī kavaṇeṃkaḍāṃ / na labhe etha

aiseṃ viśvarūpāciyā mahāmārī / jīvitva geleṃ āheṃ carācarīṃ /
jī na boleṃ tari kāya karīṃ / kaiseni rāheṃ ?

paiṃ akhaṃḍa ḍoḻyāṃpuḍheṃ / phuṭaleṃ jaiseṃ mahābhayāceṃ bhāṃḍeṃ /
taiśīṃ tujhīṃ mukheṃ vitaṃḍeṃ / pasaralīṃ dekheṃ

aso dāṃta dāḍhāṃcī dāṭī / na jhāṃkave mā doṃ doṃ voṭhīṃ /
saiṃgha praḻayaśastrāṃciyā dāṭa kāṃṭī / lāgaliyā jaiśā

jaiseṃ takṣakā viṣa bharaleṃ / ho kāṃ je kāḻarātrīṃ bhūta saṃcaraleṃ /
kīṃ āgneyāstra parajileṃ / vajrāgni jaiseṃ

taiśīṃ tujhīṃ vaktreṃ pracaṃḍeṃ / vari āveśa hā bāherī vosaṃḍe /
āle maraṇarasāce loṃḍhe / āmhāṃvarī

saṃhārasamayīṃcā caṃḍāniḻu / āṇi mahākalpāṃta praḻayānaḻu /
yā dohīṃ jaiṃ hoya meḻu / taiṃ kāya eka na jaḻe ?

taisīṃ saṃhārakeṃ tujhīṃ mukheṃ / dekhoni dhīru kāṃ āmhāṃ pārukhe ? /
ātāṃ bhulaloṃ mī diśā na dekheṃ / āpaṇapeṃ neṇeṃ

moṭakeṃ viśvarūpa ḍoḻāṃ dekhileṃ / āṇi sukhāceṃ avarṣaṇa paḍileṃ /
ātāṃ jāpāṇīṃ jāpāṇīṃ āpuleṃ / astāvyasta heṃ

aiseṃ karisī mhaṇauni jarī jāṇeṃ / tarī he goṣṭī sāṃgāvīṃ kāṃ mī mhaṇeṃ /
ātāṃ eka veḻa vāṃcavī jī prāṇeṃ / yā svarūpapraḻayāpāsoni

jarī tūṃ gosāvī āmucā anaṃtā / tarī suīṃ voḍaṇa mājhiyā jīvitā /
sāṃṭavīṃ pasārā hā māgutā / mahāmārīcā

āikeṃ sakaḻa devāṃciyā paradevate / tuvāṃ caitanyeṃ gā viśva vasateṃ /
teṃ visaralāsī heṃ uparateṃ / saṃhārūṃ ādarileṃ

mhaṇauni vegīṃ prasanna hoīṃ devarāyā / saṃharīṃ saṃharīṃ āpulī māyā /
kāḍhīṃ māteṃ mahābhayā- / pāsoniyāṃ

hā ṭhāyavarī puḍhatapuḍhatīṃ / tūṃteṃ mhaṇije bahuvā kākuḻatī /
aisā mī viśvamūrtī / bheḍakā jāhaloṃ

jaiṃ amarāvatīye ālā dhāḍā / taiṃ myāṃ ekaleni kelā uveḍā /
jo mī kāḻāciyāhī toṃḍā / vāsipu na dharīṃ

parī tayā āṃtula navhe heṃ devā / etha mṛtyūsahī karūni caḍhāvā /
tuvāṃ āmucāci ghoṭū bharāvā / yā sakaḻa viśveṃsīṃ

kaisā navhatā praḻayācā veḻu / gokhā tūṃci minalāsi kāḻu /
bāpuḍā hā tribhuvanagoḻu / alpāyu jāhalā

ahā bhāgyā viparītā / vighna uṭhileṃ śāṃta karitāṃ /
kaṭākaṭā viśva geleṃ ātāṃ / tūṃ lāgalāsi grāsūṃ

heṃ navhe mā rokaḍeṃ / saiṃgha pasarūniyāṃ toṃḍeṃ /
kavaḻitāsi cahūṃkaḍe / sainyeṃ iyeṃ

noheti ? he kauravakuḻīṃce vīra / āṃdhaḻiyā dhṛtarāṣṭrāce kumara /
he gele gele sahaparivāra / tujhiyā vadanīṃ

āṇi je je yāṃceni sāvāyeṃ / āle deśodeśīṃce rāye /
tayāṃceṃ sāṃgāvayā jāvoṃ na lāhe / aiseṃ sarakaṭita āhāsī

madamukhāciyā saṃghaṭā / gheta āhāsi ghaṭaghaṭāṃ /
āraṇīṃ hana thāṭā / detāsi miṭhī

jaṃtrāvaricīla māra / padātīṃce mogara /
mukhāāṃta bhāra / hārapatāti mā

kṛtāṃtāciyā jāvaḻī / jeṃ ekaci viśvāteṃ giḻī /
tiyeṃ koṭīvarī sagaḻīṃ / giḻitāsi śastreṃ

caturaṃgā parivārā / saṃjoḍiyāṃ rahaṃvarāṃ /
dāṃta na lāvisī mā parameśvarā / kasā tuṣṭalāsi baravā

hāṃ gā bhīṣmāsā kavaṇu / satyaśauryanipuṇu /
tohī āṇi brāhmaṇa droṇu / grāsilāsi kaṭakaṭā

ahā sahasrakarācā kumaru / etha gelā gelā karṇavīru /
āṇi āmuciyā āghavayāṃcā keru / pheḍilā dekheṃ

kaṭakaṭā dhātayā / kaiseṃ jāhaleṃ anugrahā yayā /
miyāṃ prārthūni jagā bāpuḍiyā / āṇileṃ maraṇa

māgāṃ thoḍiyā bahuvā upapattī / yeṇeṃ sāṃgitaliyā vibhūtī /
taisā naseci mā puḍhatī / baisaloṃ pusoṃ

mhaṇauni bhogya teṃ triśuddhī na cuke / āṇi buddhihī hoṇārāsārikhī ṭhāke /
mājhyā kapāḻīṃ piṭāveṃ lokeṃ / teṃ loṭela kāṃhyāṃ

pūrvīṃ amṛtahī hātāṃ āleṃ / parī deva nasatīci ugale /
maga kāḻakūṭa uṭhavileṃ / śevaṭīṃ jaiseṃ

parī teṃ ekabagīṃ thoḍeṃ / keliyā pratikārāmājivaḍeṃ /
āṇi tiye avasarīceṃ teṃ sāṃkaḍeṃ / nistaravileṃ śaṃbhū

ātāṃ hā jaḻatāṃ vārā keṃ veṃṭāḻe ? / koṇā he viṣā bharaleṃ gagana giḻe ? /
mahākāḻeṃsi keṃ kheḻeṃ ? / āṃgavata ase

aisā arjuna duḥkheṃ śiṇatu / śocita ase jivāāṃtu /
parī na dekheṃ to prastutu / abhiprāya devācā

je mī māritā he kaurava marate / aiseni veṃṭāḻilā hotā moheṃ bahuteṃ /
to pheḍāvayālāgīṃ anaṃteṃ / heṃ dākhavileṃ nija

are koṇhī koṇāteṃ na mārī / etha mīci ho sarva saṃhārīṃ /
heṃ viśvarūpavyājeṃ harī / prakaṭita ase

parī vāyāṃci vyākulatā / te na cojaveci paṃḍusutā /
maga ahā kaṃpu navhatā / vāḍhavita ase

tetha mhaṇe pāhā ho eke veḻe / sāsikavaceṃsi donhī daḻeṃ /
vadanīṃ gelīṃ ābhāḻeṃ / gaganīṃ kāṃ jaisīṃ

kāṃ mahākalpāciyā śevaṭīṃ / jaiṃ kṛtāṃtu kopalā hoya sṛṣṭī /
taiṃ ekavisāṃhī svargāṃ miṭhī / pātāḻāsakaṭa de

nātarī udāsīneṃ daiveṃ / saṃcakācīṃ vaibhaveṃ /
jethīṃcīṃ tetha svabhāveṃ / vilayā jātī

taisīṃ sāsinnalīṃ sainyeṃ ekavaṭeṃ / iye mukhīṃ jāhalīṃ praviṣṭeṃ /
parī ekahī toṃḍauni na suṭe / kaiseṃ karma dekhā

aśokāce aṃgavase / caghaḻile kaऱheni jaise /
loka vaktrāmājīṃ taise / vāyāṃ gele

pari sisāḻeṃ mukuṭeṃsīṃ / paḍilī dāḍhāṃce sāṃḍasīṃ /
pīṭha hota kaisīṃ / disata āhātī

tiyeṃ ratneṃ dāṃtāṃciye savaḍīṃ / kūṭa lāgaleṃ jibhecyā buḍīṃ /
kāṃhīṃ kāṃhīṃ āgaraḍīṃ / draṃṣṭrāṃcīṃ mākhalīṃ

ho kāṃ je viśvarūpeṃ kāḻeṃ / grāsilīṃ lokāṃcīṃ śarīreṃ baḻeṃ /
pari jīvitva dehīṃcīṃ sisāḻeṃ / avaśya kīṃ rākhilīṃ

taisīṃ śarīrāmājīṃ cokhaḍīṃ / iyeṃ uttamāṃgeṃ hotīṃ phuḍīṃ /
mhaṇauni mahākāḻāciyāhī toṃḍīṃ / pari uralīṃ śekhīṃ

maga mhaṇe heṃ kāī / janmalayāṃ āna moharaci nāhīṃ /
jaga āpaiseṃci vadanaḍohīṃ / saṃcāratāhe

yayā āpeṃāpa āghaviyā sṛṣṭī / lāgaliyā āhāti vadanācyā vāṭīṃ /
āṇi hā jethiṃciyā tetha miṭhī / detase ugalā

brahmādika samasta / uṃcā mukhāmājīṃ dhāṃvata /
yera sāmānya he bharata / ailīca vadanīṃ

āṇīkahī bhūtajāta / teṃ upajaleci ṭhāyīṃ grāsita /
pari yāciyā mukhā nibhrāṃta / na suṭeci kāṃhīṃ

jaise mahānadīce vogha / vahile ṭhākitī samudrāceṃ āṃga /
taiseṃ āghavācikaḍūni jaga / praveśata mukhīṃ

āyuṣyapaṃtheṃ prāṇigaṇī / karoni ahorātrāṃcī movaṇī /
vegeṃ vaktrāmiḻaṇīṃ / sādhijata āhātī

jaḻatayā girīcyā gavakhā- / mājīṃ ghāpatī pataṃgāciyā jhākā /
taise samagra loka dekhā / iye vadanīṃ paḍatī

pari jetuleṃ yetha praveśaleṃ / teṃ tātaliyā loheṃ pāṇīci pāṃ giḻileṃ /
vahavaṭīṃhi pusileṃ / nāmarūpa tayāṃceṃ

āṇi yetulāhī ārogaṇa / karitāṃ bhuke nāhīṃ uṇepaṇa /
kaiseṃ dīpana asādhāraṇa / udayaleṃ yayā

jaisā rogiyā jvarāhūni uṭhilā / kā bhaṇagā dukāḻu pāhalā /
taisā jibhāṃcā laḻalaḻāṭu dekhilā / āvāḻuveṃ cāṭitāṃ

taiseṃ āhārāce nāṃveṃ kāṃhīṃ / toṃḍāpāsūni uraleṃci nāhīṃ /
kaisī samasamīta navāī / bhukelepaṇācī

kāya sāgarācā ghoṃṭu bharāvā ? / kīṃ parvatācā ghāṃsu karāvā ? /
brahmakaṭāho ghālāvā / āghavāci dāḍhe

diśā sagaḻiyāci giḻāviyā / cāṃdiṇiyā cāṭūni ghyāviyā /
aiseṃ vartata āhe sāviyā / lolupya bā tujheṃ

jaisā bhogīṃ kāmu vāḍhe / kāṃ iṃdhaneṃ āgīsi hākāka caḍhe /
taisī khātakhātāṃci toṃḍeṃ / khākhāṃteṃ ṭhelīṃ

kaiseṃ ekaci kevaḍheṃ pasaraleṃ / tribhuvana jivhāgrīṃ āhe ṭekaleṃ /
jaiseṃ kāṃ kavīṭha ghātaleṃ / vaḍavānaḻīṃ

aisīṃ apāra vadaneṃ / ātāṃ yetulīṃ kaiṃcīṃ tribhuvaneṃ /
kāṃ āhāru na miḻatāṃ yeṇeṃ māneṃ / vāḍhavilīṃ saiṃgha

agā hā loku bāpuḍā / jāhalā vadanajvāḻāṃ varapaḍā /
jaisī vaṇaveyāciyā veḍhāṃ / sāṃpaḍatī mṛgeṃ

ātāṃ taiseṃ yāṃ viśvā jāhāleṃ / deva navhe heṃ karma āleṃ /
kāṃ jaga caḻacaḻāṃ pāṃgileṃ / kāḻajāḻeṃ

ātāṃ iye aṃgaprabheciye vāgure / koṇīkaḍūni nigijaila carācareṃ /
hīṃ vaktreṃ nohetī johāreṃ / voḍavalīṃ jagā

āgī āpuleni dāhakapaṇeṃ / kaiseni poḻije teṃ neṇe /
parī jayā lāge tayā prāṇeṃ / suṭikācī nāhīṃ

nātarī mājheni tikhaṭapaṇeṃ / kaiseṃ nivaṭe heṃ śastra kāyi jāṇeṃ /
kāṃ āpuliyāṃ mārā neṇeṃ / viṣa jaiseṃ

taisī tuja kāṃhīṃ / āpuliyā ugrapaṇācī seci nāhīṃ /
parī ailīkaḍile mukhīṃ khāī / ho saralī jagācī

agā ātmā tūṃ eku / sakaḻa viśvavyāpaku /
tarī kāṃ āmhāṃ aṃtaku / taisā voḍavalāsī ?

tarī miyāṃ sāṃḍilī jīvitvācī cāḍa / āṇi tuvāṃhī na dharāvī bhīḍa /
manīṃ āhe teṃ ughaḍa / bola pāṃ sukheṃ

kitī vāḍhavisī yā ugrarūpā / āṃgīṃceṃ bhagavaṃtapaṇa āṭhavīṃ bāpā /
nāhīṃ tarī kṛpā / majapuratī pāhī

tarī eka veḻa vedavedyā / jī tribhuvanaika ādyā /
vinavaṇī viśvavaṃdyā / āikeṃ mājhī

aiseṃ boloni vīreṃ / caraṇa namaskārileṃ śireṃ /
maga mhaṇeṃ tarī sarveśvareṃ / avadhārijo

miyāṃ hoāvayā samādhāna / jī pusileṃ viśvarūpadhyāna /
āṇi ekeṃci kāḻeṃ tribhuvana / giḻituci uṭhilāsī

tarī tūṃ koṇa kāṃ yetulīṃ / iyeṃ bhyāsureṃ mukheṃ kāṃ meḻavilīṃ /
āghaviyāci karīṃ parijilīṃ / śastreṃ kāṃhyā

jī jaṃva taṃva rāgīṭapaṇeṃ / vāḍhoni gaganā āṇitosi uṇeṃ /
kāṃ ḍoḻe karūni bhiṃguḻavāṇe / bheḍasāvīta āhāsī

etha kṛtāṃteṃsi devā / kāsayā kijatase hevā /
hā āpulā tuvāṃ sāṃgāvā / abhiprāya maja

yā bolā mhaṇe anaṃtu / mī koṇa heṃ āhāsī pusatu /
āṇi kāyisayālāgīṃ ase vāḍhatu / ugratesī

tarī mī kāḻu gā heṃ phuḍeṃ / loka saṃhārāvayālāgīṃ vāḍheṃ /
saiṃgha pasarilīṃ āhātīṃ toṃḍeṃ / ātāṃ grāsīna heṃ āghaveṃ

etha arjuna mhaṇe kaṭakaṭā / ubagiloṃ māgilyā saṃkaṭā /
mhaṇauni āḻavilā taṃva vokhaṭā / uvāilā hā

tevīṃci kaṭhiṇa boleṃ āsatuṭī / arjuna hoīla hiṃpuṭī /
mhaṇauni saveṃci mhaṇe kirīṭī / pari āna eka ase

tarī ātāṃciye saṃhāravāhare / tumhīṃ pāṃḍava asā bāhire /
tetha jātajātāṃ dhanurdhareṃ / sāṃvarile prāṇa

hotā maraṇamahāmārīṃ gelā / to māgutā sāvadhu jāhalā /
maga lāgalā bolā / citta deūṃ

aiseṃ mhaṇijata āhe deveṃ / arjunā tumhī mājheṃ heṃ jāṇāveṃ /
yera jāṇa mī āghaveṃ / saraloṃ grāsūṃ

vajrānaḻīṃ pracaṃḍīṃ / jaisī ghāpe loṇiyācī uṃḍī /
taiseṃ jaga heṃ mājhiyā toṃḍīṃ / tuvāṃ dekhileṃ jeṃ

tarī tayāmājhārīṃ kāṃhīṃ / bharaṃvaseni uṇeṃ nāhīṃ /
iye vāyāṃci sainyeṃ pāhīṃ / baravateṃ āhātī

aisā caturaṃgāciyā saṃpadā / karita mahākāḻeṃsīṃ spardhā /
vāṃṭiveciyā madā / vaghaḻale je

he je miḻoniyāṃ meḻe / kuṃthatī vīravṛttīceni baḻeṃ /
yamāvarī gajadaḻeṃ / vākhāṇijatātī

mhaṇatī sṛṣṭīvarī sṛṣṭī karūṃ / āṇa vāhūni mṛtyūteṃ mārūṃ /
āṇi jagācā bharūṃ / ghoṃṭu yayā

pṛthvī sagaḻīci giḻūṃ / ākāśa varicyāvarī jāḻūṃ /
kāṃ bāṇavarī khiḻūṃ / vārayāteṃ

bola hatiyerāhūni tikhaṭa / disatī agniparisa dāsaṭa /
mārakapaṇeṃ kāḻakūṭa / mahura mhaṇata

tarī he gaṃdharvanagarīṃce umāḻe / jāṇa pokaḻīce peṃḍavaḻeṃ /
agā citrīva phaḻeṃ / vīra he dekheṃ

hāṃ gā mṛgajaḻācā pūra ālā / daḻa navhe kāpaḍācā sāpa kelā /
iyā śṛṃgārūniyāṃ khālā / māṃḍiliyā paiṃ

yera ceṣṭaviteṃ jeṃ baḻa / teṃ māgāṃci miyāṃ grāsileṃ sakaḻa /
ātāṃ kolhārice vetāḻa / taise nirjīva he āhātī

hālavitī dorī tuṭalī / tarī tiyeṃ khāṃbāvarīla bāhulīṃ /
bhalateṇeṃ loṭilīṃ / ulathoni paḍatī

taisā sainyācā yayā bagā / moḍatāṃ veḻū na lagela paiṃ gā /
mhaṇauni uṭhīṃ uṭhīṃ vegāṃ / śāhāṇā hoīṃ

tuvāṃ gograhaṇāceni avasareṃ / ghātaleṃ mohanāstra ekasareṃ /
maga virāṭāceni mahābheḍeṃ uttareṃ / āsaḍūni nāgāvileṃ

ātāṃ heṃ tyāhūni nipaṭāreṃ jahāleṃ / nivaṭīṃ āyiteṃ raṇa paḍileṃ /
gheīṃ yaśa ripu jiṃtile / ekaleni arjuneṃ

āṇi koraḍeṃ yaśaci nohe / samagra rājyahī āleṃ āhe /
tūṃ nimittamātraci hoyeṃ / savyasācī

droṇācā pāḍu na karīṃ / bhīṣmāceṃ bhaya na dharīṃ /
kaiseni karṇāvarī / parajūṃ heṃ na mhaṇa

koṇa upāyo jayadrathā kīje / heṃ na ciṃtūṃ citta tujheṃ /
āṇikahī āthi je je / nāvāṇige vīra

tehī eka eka āghaveṃ / citrīṃce siṃhāḍe mānāve /
jaise voleni hāteṃ ghyāveṃ / pusoniyāṃ

yāvarī pāṃḍavā / kāisā yuddhācā meḻāvā ? /
hā ābhāsu gā āghavā / yera grāsileṃ miyāṃ

jevhāṃ tuvāṃ dekhile / he mājhiyā vadanīṃ paḍile /
tevhāṃci yāṃceṃ āyuṣya saraleṃ / ātāṃ ritīṃ sopeṃ

mhaṇauni vahilā uṭhīṃ / miyāṃ mārile tūṃ nivaṭīṃ /
na rige śokasaṃkaṭīṃ / nāthiliyā

āpaṇaci āḍakhiḻā kīje / to kautukeṃ jaisā viṃdhoni pāḍije /
taiseṃ dekheṃ gā tujheṃ / nimitta āhe

bāpā viruddha jeṃ jāhaleṃ / teṃ upajatāṃci vāgheṃ neleṃ /
ātāṃ rājyeṃśīṃ saṃcaleṃ / yaśa tūṃ bhogīṃ

sāviyāci utata hote dāyāda / āṇi baḻiye jagīṃ durmada /
te vadhile viśada / sāyāsu na lāgatāṃ

aisiyā iyā goṣṭī / viśvācyā vākpaṭīṃ /
lihūni ghālī kirīṭī / jagāmājīṃ

aisī āghavīci he kathā / tayā apūrṇa manorathā /
saṃjayo sāṃge kurunāthā / jñānadevo mhaṇe

maga satyalokauni gaṃgājaḻa / suṭaliyā vājata khaḻāḻa /
taiśī vācā viśāḻa / bolatāṃ tayā

nātarī mahāmeghāṃce umāḻe / ghaḍaghaḍīta eke veḻe /
kāṃ ghumaghumilā maṃdarācaḻeṃ / kṣīrābdhī jaisā

taiseṃ gaṃbhīreṃ mahānādeṃ / heṃ vākya viśvakaṃdeṃ /
bolileṃ agādheṃ / anaṃtarūpeṃ

teṃ arjuneṃ moṭakeṃ aikileṃ / āṇi sukha kīṃ bhaya duṇāvaleṃ /
heṃ neṇoṃ pari kāṃpinnaleṃ / sarvāṃga tayāceṃ

sakholapaṇeṃ vaḻalī moṭa / āṇi taiseci joḍale karasaṃpuṭa /
veḻoveḻāṃ lalāṭa / caraṇīṃ ṭhevī

tevīṃci kāṃhīṃ boloṃ jāye / taṃva gaḻā bujālāci ṭhāye /
heṃ sukha kīṃ bhaya hoye / heṃ vicārā tumhīṃ

pari tevhāṃ devāceni boleṃ / arjunā heṃ aiseṃ jāhaleṃ /
miyāṃ padāṃvarūni dekhileṃ / ślokīṃciyā

maga taisāci bheṇabheṇa / puḍhatī johārūni caraṇa /
maga mhaṇe jī āpaṇa / aiseṃ boliletī

nā tarī arjunā mī kāḻu / āṇi grāsije to mājhā kheḻu /
hā bolu tujhā kīra aḍhaḻu / mānūṃ āmhī

pari tuvāṃ jī kāḻeṃ / āji sthitīciye veḻe /
grāsije heṃ na miḻe / vicārāsī

kaiseni āṃgīṃceṃ tāruṇya kāḍhāveṃ ? / kaiceṃ navhe teṃ vārdhakya āṇāveṃ ? /
mhaṇauni karūṃ mhaṇasī teṃ navhe / bahutakarunī

hāṃ jī caupāhārī na bharatāṃ / koṇehī veḻe śrīanaṃtā /
kāya mādhyānhīṃ savitā / māvaḻatu āhe ?

paiṃ tuja akhaṃḍitā kāḻā / tinhī āhātī jī veḻā /
tyā tinhī parī sabaḻā / āpulāliyā samayīṃ

je veḻīṃ hoṃ lāge utpattī / te veḻīṃ sthiti praḻayo hārapatī /
āṇi sthitikāḻīṃ na miravitī / utpatti praḻayo

pāṭhīṃ praḻayāciye veḻe / utpatti sthiti māvaḻe /
heṃ kāyasenahī na ḍhaḻe / anādi aiseṃ

mhaṇauni āji taṃva bhareṃ bhogeṃ / sthiti vartijata āhe jageṃ /
etha grasisī tūṃ heṃ na lage / mājhyā jīvīṃ

taṃva saṃketeṃ deva bole / agā yā donhī sainyāṃsīci maraṇa puraleṃ /
teṃ pratyakṣaci tuja dāvileṃ / yera yathākāḻeṃ jāṇa

hā saṃketu jaṃva anaṃtā / veḻu lāgalā bolatāṃ /
taṃva arjuneṃ loku māgutā / dekhilā yathāsthiti

maga mhaṇatase devā / tūṃ sūtrīṃ viśvalāghavā /
jaga ālā mā āghavā / pūrvasthiti puḍhatī

parī paḍiliyā duḥkhasāgarīṃ / tūṃ kāḍhisī kāṃ jayāparī /
te kīrti tujhī śrīharī / āṭhavita ase

kīrti āṭhavitāṃ veḻoveḻāṃ / bhogitaseṃ mahāsukhācā sohaḻā /
tetha harṣāmṛtakalloḻā / varī loḻata āheṃ

devā jiyālepaṇeṃ jaga / dharī tujhyā ṭhāyīṃ anurāga /
āṇi duṣṭāṃ tayāṃ bhaṃga / adhikādhika

paiṃ tribhuvanīṃciyā rākṣasāṃ / mahābhaya tūṃ hṛṣīkeśā /
mhaṇauni paḻatātī dāhī diśāṃ / pailīkaḍe

yetha sura nara siddha kinnara / kiṃbahunā carācara /
te tuja dekhoni harṣanirbhara / namaskārita asatī

etha gā kavaṇā kāraṇā / rākṣasa he nārāyaṇā /
na lagatīci caraṇā / paḻate jāhale

āṇi heṃ kāya tūṃteṃ pusāveṃ / yetuleṃ āmhāṃsihī jāṇave /
tarī sūryodayīṃ rāhāveṃ / kaiseni tameṃ ?

jī tūṃ prakāśācā āgaru / āṇi jāhalā āmhāsi gocarū /
mhaṇauniyā niśācarāṃ keru / phiṭalā sahajeṃ

heṃ yetule divasa āmhāṃ / kāṃhīṃ neṇaveci śrīrāmā /
ātāṃ dekhatasoṃ mahimā / gaṃbhīra tujhā

jethūni nānā sṛṣṭīṃciyā voḻī / pasaratī bhūtagrāmāciyā velī /
tayā mahadbrahmāteṃ vyālī / daivikī icchā

devo niḥsīma tattva sadoditu / devo niḥsīma guṇa anaṃtu /
devo niḥsīma sāmya satatu / nareṃdra devāṃcā

jī tūṃ trijagatiye volāvā / akṣara tūṃ sadāśivā /
tūṃci sadasat devā / tayāhī atīta teṃ tūṃ

tūṃ prakṛtipuruṣāṃciyā ādī / jī mahattatvāṃ tūṃci avadhī /
svayeṃ tūṃ anādi / purātanu

tūṃ sakaḻa viśvajīvana / jīvāṃsi tūṃci nidhāna /
bhūtabhaviṣyāceṃ jñāna / tujhyāci hātīṃ

jī śrutīciyāṃ locanāṃ / svarūpasukha tūṃci abhinnā /
tribhuvanāciyā āyatanā / āyatana tūṃ

mhaṇauni jī parama / tūṃteṃ mhaṇije mahādhāma /
kalpāṃtīṃ mahadbrahma / tujamājīṃ rige

kiṃbahunā tuvāṃ deveṃ / viśva vistārileṃ āhe āghaveṃ /
tari anaṃtarūpā vānāveṃ / kavaṇeṃ tūṃteṃ

jī kāya eka tūṃ navhasī / kavaṇe ṭhāyīṃ nasasī /
heṃ aso jaisā āhāsī / taisiyā namo

vāyu tūṃ anaṃtā / yama tūṃ niyamitā /
prāṇigaṇīṃ vasatā / agni to tūṃ

varuṇa tūṃ soma / sraṣṭā tūṃ brahma /
pitāmahācāhī parama / ādi janaka tūṃ

āṇikahī jeṃ jeṃ kāṃhīṃ / rūpa āthi athavā nāhīṃ /
tayā namo tuja taisayāhī / jagannāthā

aiseṃ sānurāgeṃ citteṃ / namana keleṃ paṃḍusuteṃ /
maga puḍhatī mhaṇe namaste / namaste prabho

pāṭhīṃ tiye sādyaṃte / nyāhāḻī śrīmūrtīteṃ /
āṇi puḍhatī mhaṇe namaste / namaste prabho

pāhatāṃ pāhatāṃ prāṃteṃ / samādhāna pāve citteṃ /
āṇi puḍhatī mhaṇe namaste / namaste prabho

iye carācarīṃ jīṃ bhūteṃ / sarvatra dekhe tayāṃteṃ /
āṇi puḍhatī mhaṇe namaste / namaste prabho

aisīṃ rūpeṃ tiyeṃ adbhuteṃ / āścaryeṃ sphuratī anaṃteṃ /
taṃva taṃva namaste / namasteci mhaṇe

āṇika stutihī nāṭhave / āṇi nivāṃtuhī na baisave /
neṇeṃ kaisā premabhāveṃ / gājoṃci lāge

kiṃbahunā iyāparī / namana keleṃ sahasravarī /
kīṃ puḍhatī mhaṇe śrīharī / tuja sanmukhā namo

devāsi pāṭhī poṭa āthi kīṃ nāhīṃ / yeṇeṃ upayogu āmhāṃ kāī /
tari tuja pāṭhimoreyāhī / namo svāmī

ubhā mājhiye pāṭhīsīṃ / mhaṇauni pāṭhīmoreṃ mhaṇāveṃ tumhāṃsī /
sanmukha vinmukha jageṃsīṃ / na ghaḍeṃ tuja

ātāṃ vegaḻāliyā avayavāṃ / neṇeṃ rūpa karūṃ devā /
mhaṇauni namo tuja sarvā / sarvātmakā

jī anaṃtabaḻasaṃbhramā / tuja namo amita vikramā /
sakaḻakāḻīṃ samā / sarvarūpā

āghaviyā ākāśīṃ jaiseṃ / avakāśaci hoūni ākāśa ase /
tūṃ sarvapaṇeṃ taiseṃ / pātalāsi sarva

kiṃbahunā kevaḻa / sarva heṃ tūṃci nikhiḻa /
parī kṣīrārṇavīṃ kalloḻa / payāce jaise

mhaṇauniyā devā / tūṃ vegaḻā navhasī sarvāṃ /
heṃ āleṃ maja sadbhāvā / ātāṃ tūṃci sarva

pari aisiyā tūteṃ svāmī / kahīṃca neṇoṃ jī āmhī /
mhaṇauni soyare saṃbaṃdhadharmīṃ / rāhāṭaloṃ tujasīṃ

ahā thora vāura jāhaleṃ / amṛteṃ saṃmārjana myāṃ keleṃ /
vārikeṃ gheūni didhaleṃ / kāmadhenūteṃ

parisācā khaḍavāci joḍalā / kīṃ phoḍoni āmhī gāḍorā ghātalā /
kalpatarū toḍoni kelā / kūṃpa śetā

ciṃtāmaṇīcī khāṇī lāgalī / teṇeṃ kareṃ voḍhāḻeṃ volhāṃḍilī /
taisī tujhī javaḻika dhāḍilī / sāṃgātīpaṇeṃ

heṃ ājiceṃci pāheṃ pāṃ rokaḍeṃ / kavaṇa jhuṃja heṃ kevaḍheṃ /
etha parabrahma tūṃ ughaḍeṃ / sārathī kelāsī

yayā kauravāṃciyā gharā / śiṣṭāī dhāḍilāsi dātārā /
aisā vaṇijesāṭhīṃ jāgeśvarā / vikalāsi āmhīṃ

tūṃ yogiyāṃceṃ samādhisukha / kaisā jāṇecinā mī mūrkha /
uparodhu jī sanmukha / tujasīṃ karūṃ

tūṃ yā viśvācī anādi ādī / baisasī jiye sabhāsadīṃ /
tetheṃ soyarīkīciyā saṃbaṃdhīṃ / raḻīṃ boloṃ

vipāyeṃ rāuḻā yevoṃ / tari tujheni aṃgeṃ mānu pāvoṃ /
na mānisī tarī jāvoṃ / rusoni salagī

pāyāṃ lāgoni bujhāvaṇī / tujhyā ṭhāyīṃ śāraṅgapāṇī /
pāhije aiśī karaṇī / bahu kelī āmhīṃ

sajaṇapaṇāciyā vāṭā / tujapuḍheṃ baiseṃ upharāṭā /
hā pāḍu kāya vaikuṃṭhā ? / pari cukaloṃ āmhīṃ

deveṃsi kolakāṭhī dharūṃ / ākhāḍā jhoṃbīloṃbī karūṃ /
sārī kheḻatāṃ āviṣkarūṃ / nikareṃhī bhāṃḍoṃ

cāṃga teṃ urāurīṃ māgoṃ / devāsi kīṃ buddhi sāṃgoṃ /
tevīṃci mhaṇoṃ kāya lāgoṃ / tujheṃ āmhī

aisā aparādhu hā āhe / jo tribhuvanīṃ na samāye /
jī neṇatāṃci kīṃ pāye / śivatile tujhe

devo bonayācyā avasarīṃ / lobheṃ kīra āṭhavaṇa karī /
parī mājhā nisuga garva avadhārīṃ / je phugūnaci baiseṃ

devāciyā bhogāyatanīṃ / kheḻatāṃ āśaṃkenā manīṃ /
jī rigoniyāṃ śayanīṃ / sarisā pahuḍeṃ

'kṛṣṇa mhaṇauni hākārije / yādavapaṇeṃ tūṃteṃ lekhije /
āpalī āṇa ghālije / jātāṃ tuja

maja ekāsanīṃ baisaṇeṃ / kāṃ tujhā bolu na mānaṇeṃ /
heṃ votaṭīceni dāṭapaṇeṃ / bahuta ghaḍaleṃ

mhaṇauni kāya kāya ātāṃ / nivedijela anaṃtā /
mī rāśi āheṃ samastāṃ / aparādhāṃci

yālāgīṃ puḍhāṃ athavā pāṭhīṃ / jiyeṃ rāhaṭaloṃ bahuveṃ vokhaṭīṃ /
tiyeṃ māyeciyā parī poṭīṃ / sāmāvīṃ prabho

jī koṇhī eke veḻe / saritā gheūna yetī khaḍuḻeṃ /
tiyeṃ sāmāvijeti siṃdhujaḻeṃ / āna upāyo nāhīṃ

taisī prītī kāṃ pramādeṃ / deveṃsīṃ maja viruddheṃ /
bolavilīṃ tiyeṃ mukuṃdeṃ / upasāhāvīṃ jī

āṇi devāceni kṣamatveṃ kṣamā / ādhāru jālī āhe yā bhūtagrāmā /
mhaṇauni jī puruṣottamā / vinavūṃ teṃ thoḍeṃ

tarī ātāṃ aprameyā / maja śaraṇāgatā āpuliyā /
kṣamā kījo jī yayā / aparādhāṃsi

jī jāṇitaleṃ miyāṃ sāceṃ / mahimāna ātāṃ devāceṃ /
je devo hoya carācarāceṃ / janmasthāna

hariharādi samastāṃ / devā tūṃ parama devatā /
vedāṃteṃhī paḍhavitā / ādiguru tūṃ

gaṃbhīra tūṃ śrīrāmā / nānā bhūtaikasamā /
sakaḻaguṇīṃ apratimā / advitīyā

tujasī nāhīṃ sariseṃ / heṃ pratipādanaci kāyaseṃ ? /
tuvāṃ jāleni ākāśeṃ / sāmāvileṃ jaga

tayā tujheni pāḍeṃ dujeṃ / aiseṃ bolatāṃci lājije /
tetha adhikācī kīje / goṭhī kevīṃ

mhaṇauni tribhuvanīṃ tūṃ eku / tujasarikhā nā adhiku /
tujhā mahimā alaukiku / neṇije vānūṃ

aiseṃ arjuneṃ mhaṇitaleṃ / maga puḍhatī daṃḍavata ghātaleṃ /
tetheṃ sāttvikāceṃ āleṃ / bharateṃ tayā

maga mhaṇatase prasīda prasīda / vācā hotase sadgada /
kāḍhī jī aparādha- / samudrauni māteṃ

tuja viśvasuhṛdāteṃ kahīṃ / soyarepaṇeṃ na manūṃci pāhīṃ /
tuja viīśveśvarāciyā ṭhāyīṃ / aiśvarya keleṃ

tūṃ varṇanīya parī lobheṃ / māteṃ varṇisī pāṃ sabhe /
tari miyāṃ valgije kṣobheṃ / adhikādhika

ātāṃ aisiyā aparādhāṃ / maryādā nāhīṃ mukuṃdā /
mhaṇauni rakṣa rakṣa pramādā / pāsoniyāṃ

jī heṃci vinavāvayālāgīṃ / kaiṃcī yogyatā mājhiyā āṃgīṃ /
parī apatya jaiseṃ salagī / bāpeṃsīṃ bole

putrāce aparādha / jarī jāhale agādha /
tarī pitā sāhe nirdvaṃdva / taiseṃ sāhijo jī

sakhyāceṃ uddhata / sakhā sāhe nivāṃta /
taiseṃ tuvāṃ samasta / sāhijo jī

priyāciyā ṭhāyīṃ sanmāna / priya na pāheṃ sarvathā jāṇa /
tevīṃ ucchiṣṭa kāḍhileṃ āpaṇa / te kṣamā kījo jī

nātarī prāṇāceṃ soyareṃ bheṭe / maga jīveṃ bhūtalīṃ jiyeṃ saṃkaṭeṃ /
tiyeṃ niveditāṃ na vāṭe / saṃkocu kāṃhīṃ

kāṃ ukhiteṃ āṃgeṃ jīveṃ / āpaṇapeṃ didhaleṃ jiyā manobhāveṃ /
tiyā kāṃtu minaliyā na rāhaveṃ / hṛdaya jevīṃ

tayāparī jī miyāṃ / heṃ vinavileṃ tumateṃ gosāviyā /
āṇi kāṃhīṃ eka mhaṇāvayā / kāraṇa ase

tarī deveṃsīṃ salagī kelī / je viśvarūpācī āḻī ghetalī /
te māyabāpeṃ puravilī / snehāḻāceni

suratarūṃcī jhāḍeṃ / āṃgaṇīṃ lāvāvīṃ koḍeṃ /
deyāveṃ kāmadhenuceṃ pāḍeṃ / kheḻāvayā

miyāṃ nakṣatrīṃ ḍāva pāḍāvā / caṃdra ceṃḍuvālāgīṃ āṇāvā /
hā chaṃdu siddhī nelā āghavā / māuliye tuvāṃ

jiyā amṛtaleśālāgīṃ sāyāsa / tayācā pāūsa kelā cārī māsa /
pṛthvī vāhūna cāsecāsa / ciṃtāmaṇī perile

aisā kṛtakṛtya kelā svāmī / bahuve laḻā pāḻilā tumhīṃ /
dāvileṃ jeṃ harabrahmīṃ / nāyakije kānīṃ

mā dekhāvayācī keutī goṭhī / jayācī upaniṣadāṃ nāhīṃ bheṭī /
te jivhārīṃcī gāṃṭhī / majalāgīṃ soḍilī

jī kalpādīlāgoni / ājicī ghaḍī dharunī /
mājhīṃ jetulīṃ haunī / gelīṃ janmeṃ

tayāṃ āghaviyāṃci āṃtu / gharaḍoḻī gheūni aseṃ pāhatu /
pari hī dekhilī aikilī mātu / ātuḍecinā

buddhīceṃ jāṇaṇeṃ / kahīṃ na vaceci yāceni āṃgaṇeṃ /
he sādahī aṃtaḥkaraṇeṃ / karavecinā

tethā ḍoḻyāṃ dekhī hoāvī / hī goṭhīci kāyasayā karāvī /
kiṃbahunā pūrvīṃ / dṛṣṭa nā śruta

teṃ heṃ viśvarūpa āpuleṃ / tumhīṃ maja ḍoḻāṃ dāvileṃ /
tarī mājheṃ mana jhāleṃ / hṛṣṭa devā

pari ātāṃ aisī cāḍa jīvīṃ / je tujasīṃ goṭhī karāvī /
javaḻīka he bhogāvī / āliṃgāvāsī

te yāci rūpīṃ karūṃ mhaṇije / tari koṇe eke mukheṃsī cāvaḻije /
āṇi kavaṇā kheṃva deīje / tuja lekha nāhīṃ

mhaṇauni vāriyāsaveṃ dhāvaṇeṃ / na ṭhake gaganā kheṃva deṇeṃ /
jaḻakelī kheḻaṇeṃ / samudrīṃ keuteṃ ?

yālāgīṃ jī devā / ethiṃceṃ bhaya upajatase jīvā /
mhaṇauni yetulā laḻā pāḻāvā / je pure heṃ ātāṃ

paiṃ carācara vinodeṃ pāhije / maga teṇeṃ sukheṃ gharīṃ rāhije /
taiseṃ caturbhuja rūpa tujheṃ / to visāṃvā āmhāṃ

āmhīṃ yogajāta abhyāsāveṃ / teṇeṃ yāci anubhavā yāveṃ /
śāstrāṃteṃ āloḍāveṃ / pari siddhāṃtu to hāci

āmhīṃ yajaneṃ kijatī sakaḻeṃ / pari tiyeṃ phaḻāvīṃ yeṇeṃci phaḻeṃ /
tīrtheṃ hotu sakaḻeṃ / yācilāgīṃ

āṇīkahī kāṃhīṃ jeṃ jeṃ / dāna puṇya āmhīṃ kīje /
tayā phaḻīṃ phaḻa tujheṃ / caturbhuja rūpa

aisī tethiṃcī jīvā āvaḍī / mhaṇauni teṃci dekhāvayā lavaḍasavaḍī /
vartata ase te sāṃkaḍī / pheḍīje vegīṃ

agā jīvīṃceṃ jāṇateyā / sakaḻa viśvavasaviteyā /
prasanna hoīṃ pūjitayā / devāṃciyā devā

kaiseṃ nīlotpalāteṃ rāṃvita / ākāśāhī raṃgu lāvita /
tejācī voja dāvita / iṃdranīḻā

jaisā parimaḻa jāhalā maragajā / kāṃ ānaṃdāsi nighāliyā bhujā /
jyāce jānuvarī makaradhvajā / joḍalī barava

mastakīṃ mukuṭāteṃ ṭhevileṃ / kīṃ mukuṭā mukuṭa mastaka jhāleṃ /
śṛṃgārā leṇeṃ lādhaleṃ / āṃgāceni jayā

iṃdradhanuṣyāciye āḍaṇī / mājīṃ megha gaganaraṃgaṇīṃ /
taiseṃ āvarileṃ śāraṅgapāṇī / vaijayaṃtiyā

ātāṃ kavaṇī te udāra gadā / asurāṃ deta kaivalya padā /
kaiseṃ cakra hana goviṃdā / saumyatejeṃ mirave

kiṃbahunā svāmī / teṃ dekhāvayā utkaṃṭhita pāṃ mī /
mhaṇauni ātāṃ tumhīṃ / taisayā hoāveṃ

he viśvarūpāce sohaḻe / bhogūni nivāle jī ḍoḻe /
ātāṃ hotāti āṃdhale / kṛṣṇamūrtīlāgīṃ

teṃ sākāra kṛṣṇarūpaḍeṃ / vāṃcūni pāhoṃ nāvaḍe /
teṃ na dekhatāṃ thoḍeṃ / mānitātī he

āmhāṃ bhogamokṣāciyā ṭhāyīṃ / śrīmūrtīvāṃcūni nāhīṃ /
mhaṇauni taisāci sākāru hoīṃ / heṃ sāṃvarīṃ ātāṃ

yā arjunāciyā bolā / viśvarūpā vismayo jāhalā /
mhaṇe aisā nāhīṃ dekhilā / dhasāḻa koṇī

koṇa he vastu pāvalā āhāsī / tayā lābhācā toṣu na ghesī /
mā bheṇeṃ kāya neṇoṃ bolasī / hekāḍu aisā

āmhīṃ sāviyāci jaiṃ prasanna hoṇeṃ / taiṃ āṃgacivarī mhaṇeṃ deṇeṃ /
vāṃconi jīva ase veṃcaṇeṃ / kavaṇāsi gā

teṃ heṃ tujhiye cāḍe / āji jivāceṃci daḻavāḍeṃ /
kāmaūniyāṃ yevaḍheṃ / racileṃ dhyāna

aisī kāya neṇoṃ tujhiye āvaḍī / jāhalī prasannatā āmucī veḍī /
mhaṇauni gaupyācīhī guḍhī / ubhavilī jagīṃ

teṃ heṃ apārāṃ apāra / svarūpa mājheṃ parātpara /
ethūni te avatāra / kṛṣṇādika

heṃ jñānatejāceṃ nikhiḻa / viśvātmaka kevaḻa /
anaṃta he aḍhaḻa / ādya sakaḻāṃ

heṃ tujavāṃconi arjunā / pūrvīṃ śruta dṛṣṭa nāhīṃ ānā /
je jogeṃ navhe sādhanā / mhaṇauniyāṃ

yācī soya pātale / āṇi vedīṃ maunaci ghetaleṃ /
yājñikī māghaute āle / svargauniyāṃ

sādhakīṃ dekhilā āyāsu / mhaṇauni vāḻilā yogābhyāsu /
āṇi adhyayaneṃ saurasu / nāhīṃ etha

sīgecīṃ satkarme / dhāvinnalīṃ saṃbhrameṃ /
tihīṃ bahutekīṃ śrameṃ / satyaloku ṭhākilā

tapīṃ aiśvarya dekhileṃ / āṇi ugrapaṇa ubhayāṃci sāṃḍileṃ /
eka tapasādhana jeṃ ṭheleṃ / apārāṃtareṃ

teṃ heṃ tuvāṃ anāyāseṃ / viśvarūpa dekhileṃ jaiseṃ /
iye manuṣyalokīṃ taiseṃ / na phaveci kavaṇā

āji dhyānasaṃpattīlāgīṃ / tūṃci eku āthilā jagīṃ /
heṃ parama bhāgya āṃgīṃ / viraṃcīhī nāhīṃ

mhaṇauni viśvarūpalābheṃ ślāgha / ethiceṃ bhaya negha negha /
heṃ vāṃcūni anya cāṃga / na manīṃ kāṃhīṃ

hāṃ gā samudra amṛtācā bharalā / āṇi avasāṃta varapaḍā jāhalā /
maga koṇīhī āthi vosaṃḍilā / buḍijaila mhaṇauni ?

nātarī sonayācā ḍoṃgaru / yesaṇā na cale hā thoru /
aiseṃ mhaṇauni avheru / karaṇeṃ ghaḍe ?

daiveṃ ciṃtāmaṇī leīje / kīṃ heṃ ojheṃ mhaṇauni sāṃḍije ? /
kāmadhenu davaḍije / na posave mhaṇauni ?

caṃdramā āliyā gharā / mhaṇije nige karitosi ubārā /
paḍisāyi pāḍitosi dinakarā / paratā sara

taiseṃ aiśvarya heṃ mahāteja / āji hātāṃ āleṃ āhe sahaja /
kīṃ etha tuja gajabaja / hoāvī kāṃ ?

pari neṇasīca gāṃvaḍhiyā / kāya kopoṃ ātāṃ dhanaṃjayā /
āṃga sāṃḍoni chāyā / āliṃgitosi mā ?

heṃ navhe jo mī sāceṃ / etha mana karūniyāṃ kāceṃ /
prema dharisī avagaṇiyeceṃ / caturbhuja jeṃ

tari ajhunivarī pārthā / sāṃḍīṃ sāṃḍīṃ he vyavasthā /
iyeviṣayīṃ āsthā / karisī jhaṇeṃ

heṃ rūpa jarī ghora / vikṛti āṇi thora /
tarī kṛtaniścayāceṃ ghara / heṃci karīṃ

kṛpaṇa cittavṛtti jaisī / roṃvoni ghālīṃ ṭhevayāpāsīṃ /
maga nusadheni deheṃsīṃ / āpaṇa ase

kāṃ ajātapakṣiyā javaḻā / jīva baisavūni avisāḻāṃ /
pakṣiṇī aṃtarāḻā- / mājīṃ jāya

nānā gāya care ḍoṃgarīṃ / pari citta bāṃdhileṃ vatseṃ gharīṃ /
prema ethiṃceṃ karīṃ / sthānapatī

yereṃ varicileni citteṃ / bāhya sakhya sukhāpurateṃ /
bhogijo kāṃ śrīmūrtīṃteṃ / caturbhuja

pari puḍhatapuḍhatī pāṃḍavā / hā eka bolu na visarāvā /
je iye rūpīṃhūni sadbhāvā / nedāveṃ nighoṃ

heṃ kahīṃ navhateṃci dekhileṃ / mhaṇauni bhaya jeṃ tuja upajaleṃ /
teṃ sāṃḍīṃ etha saṃcaleṃ / asoṃ de prema

ātāṃ karūṃ tujayāsārakheṃ / aiseṃ mhaṇitaleṃ viśvatomukheṃ /
tari māgīla rūpa sukheṃ / nyāhāḻīṃ pāṃ tūṃ

aiseṃ vākya bolatakheṃvo / māgutā manuṣya jāhalā devo /
heṃ nā pari navalāvo / āvaḍīcā tiye

śrīkṛṣṇaci kaivalya ughaḍeṃ / vari sarvasva viśvarūpāyevaḍheṃ /
hātīṃ didhaleṃ kīṃ nāvaḍe / arjunāsi

vastu gheūni vāḻije / jaiseṃ ratnāsi dūṣaṇa ṭhevije /
nātarī kanyā pāhūniyāṃ mhaṇije / manā na ye he

tayā viśvarūpāyevaḍhī daśā / karitāṃ prītīcā vāḍhū kaisā /
sela dīdhalīse upadeśā / kirīṭīsiṃ deveṃ

moḍoni bhāṃgārācā ravā / leṇeṃ ghaḍileṃ āpaliyā savā /
maga nāvaḍe jarī jīvā / tarī āṭije puḍhatī

taiseṃ śiṣyāciye prītī jāhaleṃ / kṛṣṇatva hoteṃ teṃ viśvarūpa keleṃ /
teṃ manā nayeci maga āṇileṃ / kṛṣṇapaṇa māguteṃ

hā ṭhāvavarī śiṣyācī nikasī / sahāteṃ guru āhātī kavaṇe deśīṃ ? /
pari neṇije āvaḍī kaiśī / saṃjayo mhaṇe

maga viśvarūpa vyāpuni bhoṃvateṃ / jeṃ divya teja pragaṭaleṃ hoteṃ /
teṃci sāmāvaleṃ māguteṃ / kṛṣṇarūpīṃ taye

jaiseṃ tvaṃpada heṃ āghaveṃ / tatpadīṃ sāmāve /
athavā drumākāru sāṃṭhave / bījakaṇike jevīṃ

nātarī svapnasaṃbhramu jaisā / giḻī ceilī jīvadaśā /
śrīkṛṣṇeṃ yogu hā taisā / saṃhārilā to

jaisī prabhā hārapalī biṃbīṃ / kīṃ jaḻadasaṃpattī nabhīṃ /
nānā bharateṃ siṃdhugarbhīṃ / rigāleṃ rāyā

ho kāṃ je kṛṣṇākṛtīciye moḍī / hotī viśvarūpapaṭācī ghaḍī /
te arjunāciye āvaḍī / ukalūni dāvilī

taṃva parimāṇā raṃgu / teṇeṃ dekhileṃ sāviyā cāṃgu /
tetha grāhakīye navheci lāgu / mhaṇauni ghaḍī kelī puḍhatī

taiseṃ vāḍhīceni bahuvasapaṇeṃ / rūpeṃ viśva jiṃtileṃ jeṇeṃ /
teṃ saumya koḍisavāṇeṃ / sākāra jāhaleṃ

kiṃbahunā anaṃteṃ / dharileṃ dhākuṭapaṇa māguteṃ /
pari āśvāsileṃ pārthāteṃ / bihāliyāsī

jo svapnīṃ svargā gelā / to avasāṃta jaisā ceilā /
taisā vismayo jāhalā / kirīṭīsī

nātarī gurukṛpesaveṃ / vosaraleyā prapaṃcajñāna āghaveṃ /
sphure tattva tevīṃ pāṃḍaveṃ / śrīmūrti dekhilī

tayā pāṃḍavā aiseṃ cittīṃ / āḍa viśvarūpācī javanikā hotī /
te phiṭoni gelī parautī / heṃ bhaleṃ jāhaleṃ

kāya kāḻāteṃ jiṇoni ālā / kīṃ mahāvātu māgāṃ sāṃḍilā /
āpuliyā bāhī utaralā / sātahī siṃdhu

aisā saṃtoṣa bahu citteṃ / gheijata ase paṃḍusuteṃ /
viśvarūpāpāṭhīṃ kṛṣṇāteṃ / dekhoniyāṃ

maga sūryāciyā astamānīṃ / māgutī tārā ugavatī gaganīṃ /
taisī dekhoṃ lāgalā avanīṃ / lokāṃsahita

pāhe taṃva teṃci kurukṣetra / taiseṃci dekhe dohīṃ bhāgīṃ gotra /
vīra varṣatātī śastrāstra / saṃghāṭavarī

tayā bāṇāṃciyā māṃḍavāāṃtu / taisāci rathu dekhe nivāṃtu /
dhure baisalā lakṣmīkāṃtu / āpaṇa taḻīṃ

evaṃ māgīla jaiseṃ taiseṃ / teṇeṃ dekhileṃ vīravilāseṃ /
maga mhaṇe jiyāloṃ aiseṃ / jāhaleṃ ātāṃ

buddhīteṃ sāṃḍoni jñāna / bheṇeṃ vaḻaghaleṃ rāna /
ahaṃkāreṃsī mana / deśodhaḍī jāhaleṃ

iṃdriyeṃ pravṛttī bhulalīṃ / vācā prāṇā cukalī /
aiseṃ āpāṃparī hotī jālī / śarīragrāmīṃ

tiyeṃ āghavīṃci māgutīṃ / jivaṃta bheṭalīṃ prakṛtī /
ātāṃ jitāṇeṃ śrīmūrtī / jāhaleṃ miyāṃ

aiseṃ sukha jīvīṃ ghetaleṃ / maga śrīkṛṣṇāteṃ mhaṇitaleṃ /
miyāṃ tumaceṃ rūpa dekhileṃ / mānuṣa heṃ

heṃ rūpa dākhavaṇeṃ devarāyā / kīṃ maja apatyā cukaliyā /
bujhāvoni tuvāṃ māyā / stanapāna didhaleṃ

jī viśvarūpāciyā sāgarīṃ / hotoṃ taraṃga mavita vāṃvevarī /
to iye nijamūrtīcyā tīrīṃ / nigāloṃ ātāṃ

āikeṃ dvārakāpurasuhāḍā / maja sukatiyā jī jhāḍā /
he bheṭī navhe bahuḍā / meghācā kelā

jī sāviyācī tṛṣā phuṭalā / tayā maja amṛtasiṃdhu hā bheṭalā /
ātāṃ jiṇayācā jāhalā / bharaṃvasā maja

mājhiyā hṛdayaraṃgaṇīṃ / hotāhe harikhalatāṃcī lāvaṇī /
sukheṃsīṃ bujhāvaṇī / jāhalī maja

yayā pārthāciyā bolāsaveṃ / heṃ kāya mhaṇitaleṃ deveṃ /
tuvāṃ prema ṭhevūni yāveṃ / viśvarūpīṃ kīṃ

maga iye śrīmūrtī / bheṭāveṃ saḍiyā āyatī /
te śikavaṇa subhadrāpatī / visaralāsi mā

agā āṃdhaḻiyā arjunā / hātā āliyā merūhī hoya sānā /
aisā āthī manā / cukīcā bhāvo

tarī viśvātmaka rūpaḍeṃ / jeṃ dāvileṃ āmhī tujapuḍheṃ /
teṃ śaṃbhūhī pari na joḍe / tapeṃ karitāṃ

āṇi aṣṭāṃgādisaṃkaṭīṃ / yogī śiṇatāti kirīṭī /
pari avasaru nāhīṃ bheṭī / jayāciye

teṃ viśvarūpa ekāde veḻa / kaiseni dekhoṃ aḻumāḻa /
aiseṃ smaratāṃ kāḻa / jātase devāṃ

āśeciye aṃjuḻī / ṭheūni hṛdayāciyā niḍaḻīṃ /
cātaka nirāḻīṃ / lāgale jaise

taise utkaṃṭhā nirbhara / hoūniyāṃ suravara /
ghokīta āṭhahī pāhāra / bheṭī jayācī

pari viśvarūpāsārikheṃ / svapnīṃhī koṇhī na dekhe /
teṃ pratyakṣa tuvāṃ sukheṃ / dekhileṃ heṃ

paiṃ upāyāṃsi vāṭā / na vāhatī etha subhaṭā /
sāhīsahita vohaṭā / vāhilā vedīṃ

maja viśvarūpāciyā moharā / cālāvayā dhanurdharā /
tapāṃciyāhī saṃbhārā / navheci lāgu

āṇi dānādi kīra kānaḍeṃ / mī yajñīṃhī taisā na sāṃpaḍeṃ /
jaiseni kāṃ suravāḍeṃ / dekhilā tuvāṃ

taisā mī ekīci pari / āṃtuḍeṃ gā avadhārīṃ /
jarī bhakti yeūni varī / cittāteṃ gā

pari teci bhakti aisī / parjanyācī suṭikā jaisī /
dharāvāṃcūni anārisī / gatīci neṇeṃ

kāṃ sakaḻa jaḻasaṃpattī / gheūni samudrāteṃ giṃvasitī /
gaṃgā jaisī ananyagatī / miḻālīci miḻe

taiseṃ sarvabhāvasaṃbhāreṃ / na dharata prema ekasareṃ /
majamājīṃ saṃcare / mīci hoūni

āṇi tevīṃci mī aisā / thaḍiye mājhārīṃ sarisā /
kṣīrābdhi kāṃ jaisā / kṣīrācāci

taiseṃ majalāguni muṃgīvarī / kiṃbahunā carācarīṃ /
bhajanāsi kāṃ dusarī / parīci nāhīṃ

tayāci kṣaṇāsaveṃ / evaṃvidha mī jāṇaveṃ /
jāṇitalā tarī svabhāveṃ / dṛṣṭahī hoya

maga iṃdhanīṃ agni uddīpeṃ / āṇi iṃdhana heṃ bhāṣa hārape /
teṃ agnici hoūni āropeṃ / mūrta jevīṃ

kāṃ udaya na kīje tejākāreṃ / taṃva gaganaci hoūni ase āṃdhāreṃ /
maga udaīliyā ekasareṃ / prakāśu hoya

taiseṃ mājhiye sākṣātkārīṃ / sare ahaṃkārācī vārī /
ahaṃkāralopīṃ avadhārīṃ / dvaita jāya

maga mī to heṃ āghaveṃ / eka mīci āthī svabhāveṃ /
kiṃbahunā sāmāve / samaraseṃ to

jo majaci ekālāgīṃ / karmeṃ vāhātase āṃgīṃ /
jayā mīvāṃconi jagīṃ / gomaṭeṃ nāhīṃ

dṛṣṭādṛṣṭa sakaḻa / jayāceṃ mīci kevaḻa /
jeṇeṃ jiṇayāceṃ phaḻa / majaci nāma ṭhevileṃ

maga bhūteṃ he bhāṣa visaralā / je diṭhī mīci āheṃ sūdalā /
mhaṇauni nirvaira jāhalā / sarvatra bhaje

aisā jo bhaktu hoye / tayāceṃ tridhātuka heṃ jaiṃ jāye /
taiṃ mīci hauni ṭhāyeṃ / pāṃḍavā gā

aiseṃ jagadudaradoṃdileṃ / teṇeṃ karuṇārasarasāḻeṃ /
saṃjayo mhaṇe bolileṃ / śrīkṛṣṇadeveṃ

yayāvarī to paṃḍukumaru / jāhalā ānaṃdasaṃpadā thoru /
āṇi kṛṣṇacaraṇacaturu / eka to jagīṃ

teṇeṃ devāciyā donahī mūrtī / nikiyā nyāhāḻiliyā cittīṃ /
taṃva viśvarūpāhūni kṛṣṇākṛtīṃ / dekhilā lābhu

pari tayāciye jāṇive / mānu na kījeci deveṃ /
jeṃ vyāpakāhūni navhe / ekadeśī

heṃci samarthāvayālāgīṃ / eka dona cāṃgī /
upapattī śāraṅgī / dāvitā jāhalā

tiyā aikoni subhadrākāṃtu / cittīṃ āhe mhaṇatu /
tari hoya baraveṃ donhīṃ āṃtu / teṃ puḍhatī pusoṃ

aisā ālocu karūni jīvīṃ / ātāṃ pusatī voja baravī /
ādarīla te parisāvī / puḍheṃ kathā

prāṃjaḻa oṃvīprabaṃdheṃ / goṣṭī sāṃgijela vinodeṃ /
teṃ parisā ānaṃdeṃ / jñānadevo mhaṇe

bharoni sadbhāvācī aṃjuḻī / miyāṃ voṃviyāphuleṃ mokaḻīṃ /
arpilīṃ aṃghriyugulīṃ / viśvarūpācyā