Jñānāmṛtasārasaṃhitā · Chapter 1.9

iti śrī-nārada-pañca-rātre jñānāmṛta-sāre prathamaika-rātre aṣṭamo 'dhyāyaḥ
prathamaika-rātre navamo 'dhyāyaḥ
śrī-vyāsa uvāca
varaṃ datvā mahā-devo bhaktyā taṃ brāhmaṇātithim /
pūjāṃ cakāra vedoktāṃ svayaṃ veda-vidāṃ varaḥ

bhuktvā pītvā muni-śreṣṭho mahā-devasya mandire /
tiṣṭhann upāsānāṃ cakre pārvatī-parameśayoḥ

ekadā cira-kālānte tam uvāca mahā-munim /
mahā-devaḥ sabhā-madhye kṛpayā ca kṛpā-nidhiḥ

śrī-mahā-deva uvāca
kiṃ vā te vāñchitaṃ vatsa brūhi māṃ yadi rocate /
varo dattaḥ kim aparaṃ yat te manasi vartate

mahā-deva-vacaḥ śrutvā tam uvāca mahā-muniḥ /
kailāse ca sabhā-madhye yat tan-manasi vāñchitam

śrī-nārada uvāca
jñānam ādhyātmikaṃ nāma veda-sāraṃ manoharam /
hari-bhakti-pradaṃ jñānaṃ muktidaṃ jñānam īpsitam

yoga-yuktaṃ ca yaj jñānaṃ jñānaṃ yat siddhidaṃ tathā /
saṃsāra-viṣaya-jñānam eva pañca-vidhaṃ smṛtam

āśramāṇāṃ samācāraṃ teṣāṃ dharma-pariṣkṛtam /
vidhavānāṃ ca bhikṣūṇāṃ yatīnāṃ brahma-cāriṇāṃ

pūjā-vidhānaṃ kṛṣṇasya tat-stotraṃ kavacaṃ manum /
puraścaryā-vidhānaṃ ca sarvāhnikam abhīpsitam

jīva-karma-vipākaṃ ca karma-mūla-nikṛntanam /
saṃsāra-vāsanāṃ kāṃ vā lakṣaṇaṃ prakṛtīśayoḥ

tayoḥ paraṃ vā kiṃ vastu tasyāvatāra-varṇamam /
ko vā tad-aṃśaḥ kaḥ pūrṇaḥ paripūrṇatamaś ca kaḥ

nārāyaṇarṣi-kavacaṃ subhadra-pravarāya ca /
yad dattaṃ kiṃ tad deveśa tad ārādhyaṃ prayatnataḥ

mayā jñānaṃm anāpṛṣṭhaṃ yad yad asti surottama /
tan me kathaya tattvena mām evānugrahaṃ kuru

guroś ca jñānodgiraṇāj jñānaṃ syān mantra-tantrayoḥ /
tat tantraṃ sa ca mantraḥ syād yato bhaktir adhokṣaje

jñānaṃ syād viduṣāṃ kiṃcid veda-vyākhyāna-cintayā /
svayaṃ bhavān veda-kartā jñānādhiṣṭhātṛ-devatā

nāradasya vacaḥ śrutvā sasmitaḥ pārvatī-patiḥ /
nirīkṣya pārvatī-vaktraṃ gaja-vaktram uvāca saḥ

atha nāradopadeśa-grahaṇam
śrī-mahā-deva uvāca
aho ananta-dāsānāṃ māhātmyaṃ paramādbhutam /
kurvanty ahaitukīṃ bhaktiṃ ye ca śaśvad dhareḥ pade

padma-nābha-pāda-padmaṃ padmā-padmeśvarārcitam /
divāniśaṃ ye dhyāyante śeṣādi-sura-vanditam

ālāpaṃ gātra-saṃsparśaṃ pāda-reṇum abhīpsitam /
vāñchanty eva hi tīrthāni vasudhā cātma-śuddhaye

kṛṣṇa-mantropāsakānāṃ śuddhaṃ pādodakaṃ suta /
punāti sarva-tīrthāni vasudhām api pārvati

kṛṣṇa-mantro dvija-mukhād yasya karṇaṃ prayāti ca /
taṃ vaiṣṇavaṃ jagat-pūtaṃ pravadanti purā-vidaḥ

mantra-grahaṇa-mātreṇa naro nārāyanātmakaḥ /
punāti līlā-mātreṇa puruṣāṇāṃ śataṃ śatam

yaj janma-mātrāt pūtaṃ ca tat pitṛṇāṃ śataṃ śatam /
prayāti sadyo golokaṃ karma-bhogāt pramucyate

mātā-mahādikān sapta janma-mātrāt samuddharet /
yat kanyāṃ pratigṛhṇāti tasya saptāvalīlayā
mātaraṃ tat-praśūṃ bhāryāṃ putrāc ca sapta-pūruṣam /
bhrātaraṃ bhaginīṃ kanyāṃ kṛṣṇa-bhaktaḥ samuddharet

sa snātaḥ sarva-tīrtheṣu sarva-yajñeṣu dīkṣitaḥ /
phalaṃ sa lebhe pūjānāṃ vratī sarva-vrateṣu ca

viṣṇu-mantraṃ yo labhet vaiṣṇavāc ca dvijottamāt /
koṭi-janmārjitāt pāpān mucyate nātra saṃśayaḥ

kṛṣṇa-mantropāsakānāṃ sadyo darśana-mātrataḥ /
śata-janmārjitāt pāpān mucyate nātra saṃśayaḥ

vaiṣṇavād darśanenaiva sparśanena ca pārvati /
sadyaḥ pūtaṃ jalaṃ vahnir jagat pūtaḥ samīraṇaḥ

darśanaṃ vaiṣṇavānāṃ ca devā vāñchanti nityaśaḥ /
na vaiṣṇavāt paraḥ pūto viśveṣu nikhileṣu ca

ity uktvā saṅkaraḥ śīghraṃ nāradena sahātmajaḥ /
yayau mandākinī-tīraṃ nīraṃ kṣīropamaṃ param

tatra snāto mahā-devī nāradaś ca mahā-muniḥ /
samācāntaḥ śucis tatra dhṛtvā dhaute ca vāsavī

kṛṣṇa-mantraṃ dadau tasmai nāradāya maheśvaraḥ /
paraṃ kapla-taru-varaṃ sarva-siddhi-pradaṃ śuka

lakṣmīr māyā-kāma-bījaṃ ṅentaṃ kṛṣṇa-padaṃ tataḥ /
jagat-pūta-priyāntaṃ ca mantra-rājaṃ prakīrtitam

mantraṃ gṛhītvā sa muniḥ śivaṃ kṛtvā pradakṣiṇam /
sapta vārān namas kṛtya svātmānaṃ dakṣiṇāṃ dadau

tat-pāda-padme vikrītamājanma mastakaṃ param /
muninā bhakti-yuktena svarga-mandākinī-taṭe

etasminn antare vatsa puṣpa-vṛṣṭir babhūva ha /
nāradopari tatraiva suśrāva dundubhir muniḥ

nanarta brahmaṇaḥ putro brahma-loke nirāmaye /
brahmā jagāma tatraiva suprasannaś ca sasmitaḥ

putraṃ śubhāśiṣaṃ kṛtvā tuṣṭāva candra-śekharam /
śambhuś ca pūjayām āsa brāhmaṇam atithiṃ tathā /
śambhuṃ śubhāśiṣaṃ kṛtvā brahma-lokaṃ yayau vidhiḥ