Jñānāmṛtasārasaṃhitā · Chapter 1.8

iti śrī-nārada-pañca-rātre jñānāmṛta-sāre prathamaika-rātre
gaṇapati-stotraṃ nāma saptamo 'dhyāyaḥ
prathamaika-rātre aṣṭamo 'dhyāyaḥ
śrī-vyāsa uvāca
atha cābhyantaraṃ gatvā nārado hṛṣṭa-mānasaḥ /
dadarśa svāśramaṃ ramyam atīva sumanoharam

payaḥ phena-nibha-śayyā-sahitaṃ ratna-mandiram /
sākṣād gorocanābhaiś ca maṇi-stambhair vibhūṣitam

maṇīndra-sārasopānaiḥ kapāṭaiś ca pariṣkṛtam /
muktāmāṇikya-hīrāṇāṃ mālā-rāji-virājitam

śuddha-sphaṭika-saṃkāśaṃ prāṅgaṇaṃ maṇi-saṃskṛtam /
sundaraṃ mandira-cayaṃ sad-ratna-kalaśojjvalam

ratna-patra-paṭākīrṇaṃ vahni-śuddhāṃśukānvitam /
sudhānāṃ ca madhūnām ca pūrṇa-kumbhakaṃ śataṃ śatam

dāsa-dāsī-samūhaiś ca ratnālaṅkāra-bhūṣitaiḥ /
pārvatī-priya-saṅgaiś ca sva-karmākula-saṅkalpam

tad dṛṣṭvā ca muni-śreṣṭhas tat parābhyantaraṃ yayau /
ratna-siṃhāsana-sthaṃ ca śaṅkaraṃ ca dadarśa saḥ

vyāghra-carmāmbara-dharaṃ sasmitaṃ candra-śekharam /
prasanna-vadanaṃ svacchaṃ śāntaṃ śrīmantam īśvaram

vibhūti-bhūṣitāṅgaṃ ca paraṃ gaṅgā-jaṭā-dharam /
bhakta-priyaṃ ca bhakteśaṃ jvalantaṃ brahma-tejasā

tri-netraṃ pañca-vaktraṃ ca koṭi-candra-sama-prabham /
japantaṃ paramātmānaṃ brahma jyotiḥ sanātanam

nirliptaṃ ca nirīhaṃ ca dātāraṃ sarva-sampadām /
svecchā-mayaṃ sarva-bījaṃ śrī-kṛṣṇaṃ prakṛteḥ paraṃ

siddhendraiś ca munīndraiś ca devendraiḥ parisevitam /
pārśvada-pravara-śreṣṭha-sevitaṃ śveta-cāmaraiḥ

durgā-sevita-pādābjaṃ bhadra-kālī-pariṣṭutam /
purato hi vasantaṃ taṃ skandaṃ gaṇa-patīm tathā

gale baddhvā ca vasanaṃ bhakti-namrātmakaṃdharaḥ /
yogīndraṃ sva-guruṃ śaṃbhuṃ śirasā praṇanāma saḥ

tuṣṭāva parayā bhaktyā devarṣir jagatāṃ patim /
sva-guruṃ ca paśu-patiṃ vedoktena stavena ca

śrī-nārada uvāca
namas tubhyaṃ jagan-nātha mama nātha mama prabho /
bhava-rūpa-taror bīja phala-rūpa phala-prada

abījaja praja prāja sarva-bīja namo 'stu te /
sad-bhāva paramābhāva vibhāva bhāvanāśraya

bhaveśa bhava-bandheśa bhāvābdhināvināyaka /
sarvādhāra nirādhāra sādhāra dharaṇī-dhara

veda-vidyādhārādhāra gaṅādhara namo 'stu te /
jayeśa vijayādhāra jaya-bīja jayātmaka

jagad-āde jayānanda sarvānanda namo 'stu te/
ity evam uktvā devarṣiḥ śambhoś ca purataḥ sthitaḥ /
prasanna-vadanaḥ śrīmān bhagavāṃs tam uvāca saḥ

śrī-mahā-deva uvāca
varaṃ vṛṇu mahā-bhāga yat te manasi vartate /
dāsyāmi tvāṃ dhruvaṃ putra dātāhaṃ sarva-saṃpadām

sukhaṃ muktiṃ harer bhaktiṃ niścalām avināśinīm /
hareḥ pādaṃ tad-dāsyaṃ sālokyādi-catuṣṭayam

indratvam amaratvaṃ vā yamatvam anileśvaram /
prajā-patitvaṃ brahmatvaṃ siddhatvaṃ siddha-sādhanam

siddhaiśvaryaṃ siddhi-bījaṃ veda-vidyādhipaṃ param /
aṇimādika-siddhiṃ ca mano-yāyitvam īpsitam

hareḥ padaṃ ca gamanaṃ sa-śarīreṇa līlayā /
eteṣu vāñchitārtheṣu kiṃ vā te vāñchitaṃ suta

tan me brūhi muni-śreṣṭha sarvaṃ dātum ahaṃ kṣamaḥ /
śaṅkarasya vacaḥ śrutvā tam uvāca mahā-muniḥ

śrī-nārada uvāca
dehi me hari-bhaktiṃ ca tan-nāma-sevane ruciḥ /
ati-tṛṣṇā guṇākhyāne nityam astu mameśvara

nāradasya vacaḥ śrutvā jahāsa śaṅkaraḥ svayam /
pārvatī bhadra-kālī ca kārttikeyo gaṇeśvaraḥ

sarvaṃ dadau mahā-devo nāradāya ca dhīmate /
sarva-pradas tu sarveśaḥ sarva-kāraṇa-kāraṇaḥ

nāradena kṛtaṃ stotraṃ nityaṃ yaḥ prapaṭhet śuciḥ /
hari-bhaktir bhavet tasya tan-nāmni guṇato ruciḥ

daśa-vāra-japenaiva stotra-siddhir bhaven nṛṇām /
sarva-siddhir bhavet tasya siddha-stotro bhaved yadi

iha prāpnoti lakṣmīṃ ca niścalāṃ lakṣa-pauruṣīm /
pari-pūrṇam ahaiśvaryam ante yāti hareḥ padam

putraṃ viśiṣṭaṃ labhate hari-bhaktaṃ jitendriyam /
susādhyāṃ suvinītāṃ suvratāṃ ca pati-vratām

prajāṃ bhūmiṃ yaśaḥ kīrtiṃ vidyāṃ sa-kavitāṃ labhet /
prasūyate mahā-bandhyā varṣam ekaṃ śṛṇoti cet

galat-kuṣṭhī mahā-rogī sadyo rogāt pramucyate /
dhanī mahā-daridraś ca kṛpaṇaḥ satyavān bhavet /
viprad-grasto rāja-baddho mucyate nātra saṃśayaḥ