Jñānāmṛtasārasaṃhitā · Chapter 1.5

iti śrī-nārada-pañca-rātre jñānāmṛta-sāre brahmā-nārada-saṃvāde
prathamaika-rātre kavaca-praśno nāma caturtho 'dhyāyaḥ
prathamaika-rātre pañcamo 'dhyāyaḥ
śrī-sanat-kumāra uvāca
tavecchā yatra kavace dhyāne tad vada sāmpratam /
yac chṛṇomi śubhaṃ tac ca kena śreyasi tṛpyate

bramovāca
dhyānaṃ sāma-vedoktaṃ dattam nārāyaṇena vai /
kavacaṃ ca subhadrāya dharmiṣṭhāya mahātmane

navīna-jalada-śyāmaṃ pīta-kauśeya-vāsasam /
candanokṣita-sarvāṅgaṃ sasmitaṃ śyāmasundaram

mālatī-mālya-bhūṣāḍhyaṃ ratna-bhūṣaṇa-bhūṣitam /
munīndreśa-susiddheśa-brahmeśa-śeṣa-vanditam

sarva-svarūpaṃ sarveśaṃ sarva-bījaṃ sanātanam /
sarvādyaṃ sarva-jñaṃ puruṣaṃ prakṛteḥ param

nirguṇaṃ ca nirīhaṃ ca nirliptam īsvaraṃ bhaje /
dhyātvā mūlena tasmai ca dadyāt pādyādikaṃ mudā

tataḥ stotraṃ ca kavacaṃ bhaktyā ca prapaṭhen naraḥ /
japtvā ca mantraṃ bhaktyā daṇḍavat praṇamed bhuvi /
iti te kathitaṃ vatsa kiṃ bhūyaḥ śrotum icchasi

śrī-sanatkumāra uvāca
brūhi me kavacaṃ brahman jagan-maṅgala-maṅgalam /
pūjyaṃ puṇya-svarūpaṃ ca kṛṣṇasya paramātmanaḥ

atha jagan-maṅgala-maṅgala-kavacam
brahmovāca
śṛṇu vakṣyāmi viprendra kavacaṃ paramādbhutaṃ /
śrī-kṛṣṇenaiva kathitaṃ mahyaṃ ca kṛpayā parā

mayā dattaṃ ca dharmāya tena nārāyaṇarṣaye /
ṛṣiṇā tena tad dattaṃ subhadrāya mahātmane

ati-guhyatamaṃ śuddhaṃ paraṃ snehād vadāmy aham /
yad dhṛtvā paṭhanāt siddhāḥ siddhāni prāpnuvanti ca

evam indrādayaḥ sarve sarvaiśvaryam āpnuyuḥ /
ṛṣiś chandaś ca sāvitrī devo nārāyaṇaḥ svayam

dharmārtha-kāma-mokṣeṣu viniyogaḥ prakīrtitaḥ /
rādheśo me śiraḥ pātu kaṇṭhaṃ radheśvaraḥ

gopīśaś cakṣuṣī pātu tālu ca bhagavān svayam /
gaṇḍa-yugmaṃ ca govindaḥ karṇa-yugmaṃ ca keśavaḥ

galaṃ gadādharaḥ pātu skandhaṃ kṛṣṇaḥ svayaṃ prabhuḥ /
vakṣa-sthalaṃ vāsudevaś codaraṃ cāpi so 'cyutaḥ

nabhiṃ pātu padma-nābhaḥ kaṅkālaṃ kaṃsa-sūdanaḥ /
puruṣottamaḥ pātu pṛṣṭhaṃ nityānando nitambakam

puṇḍarīkaḥ pāda-yugmaṃ hasta-yugmaṃ hariḥ svayam /
nāsāṃ ca nakharaṃ pātu narasiṃhaḥ svayaṃ prabhuḥ

sarveśvaraś ca sarvāṅgaṃ santataṃ madhu-sūdanaḥ /
prācyāṃ pātu ca rāmaś ca vahnau ca vaṃśī-dharaḥ svayam

pātu dāmodaro dakṣe nairṛte ca narottmaḥ /
paścime puṇḍarīkākṣo vāyavyāṃ vāmanaḥ svayam

anantaś cottare pātu aiśānyām īśvaraḥ svayam /
jale sthale cāntarīkṣe svapne jāgaraṇe tathā

pātu vṛndāvaneśaś ca māṃ bhaktaṃ śaraṇāgatam /
iti te kathitaṃ vatsa kavacaṃ paramādbhutam

sukhadaṃ mokṣadaṃ sāraṃ sarva-siddhi-pradaṃ satām /
idaṃ kavacam iṣṭaṃ ca pūjā-kāle ca yaḥ paṭhet

hari-dāsyam avāpnoti goloke vāsam uttamam /
ihaiva hari-bhaktiṃ ca jīvan-mukto bhaven naraḥ

nārada uvāca
nārāyaṇarṣiṇā dattaṃ kavacaṃ yat sudurlabham /
subhadrāya brāhmaṇāya tan me vaktum ihārhasi

brahmovāca
mad-iṣṭa-devyāḥ kavacaṃ kathaṃ tat kathayāmi te /
mat-kaṇṭhe paśya kavacaṃ sad-ratna-guṭikānvitam

nārāyaṇarṣiṇā dattaṃ kavacaṃ guṭikānvitam /
tathāpīdaṃ na kathitaṃ niṣiddhaṃ hariṇā smṛtam

tasyarṣeś ceṣṭa-devyāś ca noktaṃ tenedam īpsitam /
mahyaṃ na dattā guṭikā bāndhavair bhartsitena ca

ātmanaḥ kavacaṃ mantraṃ svayaṃ dātuṃ na cārhati /
prāṇā naṣṭāś ca dānena ceti veda-vido viduḥ

śaṅkaraṃ gaccha bhagavan janmāntara-guruṃ tava /
sa eva tubhyaṃ kavacaṃ dāsyasy eva na saṃśayaḥ

tvat-prāktanena viprendra sat-vareṇa śubhena ca /
dhruvaṃ prāpsyasi tvaṃ vatsa kavacaṃ tat sudurlabham

kumāra gaccha vaikuṇṭhaṃ sva-guruṃ paśya sat-varam /
nārāyaṇaś ca kavacaṃ tubhyaṃ dāsyasi niścitam

sanat-kumāro bhagavān gatvā vaikuṇṭham īpsitam /
saṃprāpya kavacaṃ vatsa kavacaṃ tat sudurlabham

ājñayā brahmaṇaś cāpi nārado gantum udyataḥ /
brahmā yayau brahma-lokaṃ janma-mṛtyu-jarāpaham