Jñānāmṛtasārasaṃhitā · Chapter 1.13

iti śrī-nārada-pañca-rātre jñānāmṛta-sāre prathamaika-rātre
gandharva-kṛta-stotraṃ nāma dvādaśo 'dhyāyaḥ
prathamaika-rātre trayodaśo 'dhyāyaḥ
śrī-śuka uvāca
stotrāntare ca kāle ca kiṃ rahasyaṃ babhūva ha /
tan me kathaya bhadraṃ te bhagavan bhagavad-vacaḥ

śrī-vyāsa uvāca
stotrāntare ca kāle ca gandharvaś copavarhaṇaḥ /
uvāca brahma-saṃsadi bhagavantaṃ sanātanam

sarvair devair ahaṃ śaptaś cādhunā deva-hetunā /
devānām agni-puñjaś ca pradīptaś ca sumeruvat

adhunā ca tvayi gate bhasmāsān māṃ kariṣyati /
ato rakṣa jagannātha māṃ samuddhartum arhasi

tvad-aṃśa-śūkareṇaiva dharoddhāraḥ kṛtaḥ purā /
hiraṇyākhyaṃ mahā-daityaṃ nihatya cāvalīlayā

pādma-padmārcita-pade padme te śaraṇāgatam /
mām anāthaṃ bhayākrāntaṃ rakṣa rakṣa surānalāt

gandharvasya vacaḥ śrutvā prahasya jagad-īśvaraḥ /
uvāca ślakṣṇayā vācā brahmeśo brahma-saṃsadi

atha gandharva-mokṣaṇam
śrī-bhagavān uvāca
gandharva-rāja-pravara sthiro bhava bhayaṃ tyaja /
śubhāśrayasya bhaktasya bhayaṃ kiṃ te mayi sthite

sarvebhyo 'pi bhayaṃ nāsti mad-bhaktānām akarmaṇām /
janma-mṛtyu-jarā-vyādhi-bhayaṃ teṣāṃ na vidyate

man-mantropāsakaś caiva svatantro nitya-vigrahaḥ /
punar na vidyate janma mantra-grahaṇa-mātrataḥ

nāsti kālād bhayaṃ tasya na niṣekād vidher api /
mantra-grahaṇa-mātreṇa mucyate sarva-karmaṇaḥ

man-mantro hi dehāt pāpaṃ koṭi-janma-kṛtaṃ ca yat /
sudīpto jvalad-agniś ca tṛṇa-puñjaṃ dehād yathā

man-mantra-grahaṇād yogān man-nāma-grahaṇasya vā /
teṣāṃ pāpāni vepante koṭi-janma-kṛtāni ca

yamas tan-nāma-likhanaṃ dūrī-bhūtaṃ karoti ca /
ante dāsyaṃ ca labhate gatvā golokam uttamam

yāvad āyur bhramet tāvat svatantro matta-kuñjaraḥ /
tataḥ pāpāḥ phalāyante vainateyād ivoragāḥ

teṣāṃ ca pāda-rajasā sadyaḥ pūtā vasundharā /
punāti sarva-tīrthāni dūrato darśanād api

pūtaś ca pavano vahnir jalaṃ ca tulasī-dalam /
pūtāny eva hi tīrthāni gaṅgādīni ca gāyana

pūtā suśīlā dharmiṣṭhā suvratā strī pati-vratā /
man-mantropāsakāś caiva tebhyaḥ pūtottamāḥ sadā

mantropāsakānāṃ ca tīrtha-sthānaṃ vrataṃ suta /
śrāddhaṃ dānaṃ pūjanaṃ ca yathā carvita-carvaṇam

bhaktyā tīrthāni pūtāni svataḥ pūto hi vaiṣṇavaḥ /
tat tantraṃ ca tathā dāna-malaṃ śrāddhaṃ ca niṣphalam

śrāddhasya sampradānaṃ ca kartuś ca puruṣa-trayam /
puruṣāṇāṃ śataṃ muktaṃ ko bhuṅkte śrāddha-vastu ca

kecid evaṃ vadantīti pitṛ-lokārtham eva ca /
tad-viruddhaṃ ca te tuṣṭā mantra-grahaṇa-mātrataḥ

teṣāṃ śubhāśiṣaṃ karma naiva bhogāya kalpate /
devān na prabhaved vatsa siddha-dhānye yathāṅkuraḥ

sākṣāt karoti teṣāṃ ca karma-mūla-nikṛntanam /
mantropāsakād anye karma-bhogaṃ ca bhuñjate

mayā svayaṃ pradattaś ca sva-mantraḥ puruṣāya ca /
para-dvārād grāhayitvā bhaktaṃ muktaṃ karomy aham

mayā pradatta-mantraś ca purā mṛtyuñjayas tathā /
mṛtyuñjayāya goloke śuddha-sattva-guṇāya ca

punaḥ sanat-kumārāya dharmāya brahmaṇe tathā /
kapilāya ca śeṣāya gaṇeśāya ca mahā-mate

nārāyaṇarṣaye caiva dharma-putrāya dhīmate /
punar mahā-viṣṇave ca viśvāni yasya lomasu

kālādhiṣṭhātṛ-devāya tasmai sarvāntakāya ca /
upendrāya ca kāmāya bhṛgave 'ṅgirase tathā

sarasvatyai ca padmāyai rādhāyai virajā-taṭe /
śavitryai viṣṇu-māyāyai pārṣadebhyaś ca putraka

tubhyaṃ na datto mantro 'tra śrūyatāṃ tan nimittakam /
janiṣyasi śūdra-yonau brahmaṇo vākya-pālanāt

ity evaṃ kathitaṃ sarvaṃ gaccha vatsa yathā sukham /
dvādaśābdāntare śūdra-yonau devāj janiṣyasi

pañca-varṣābhyantare ca man-mantraṃ prāpya viprataḥ /
daśābdānte vapus tyaktvā brahma-putro bhaviṣyasi

man-mantraṃ punar eveti śambhu-vaktrāl labhiṣyasi /
ity evam uktvā sarvātmā tatraivāntaradhīyata

gandharvaḥ prayayau tasmād yoṣidbhiḥ saha putraka /
ity evaṃ kathitaṃ sarvaṃ pūrva-vṛttāntam eva ca