Jñānāmṛtasārasaṃhitā · Chapter 1.11

iti śrī-nārada-pañca-rātre jñānāmṛta-sāre prathamaika-rātre
mahotsavārambho nāma daśamo 'dhyāyaḥ
prathamaika-rātre ekādaśo 'dhyāyaḥ
atha mahotsava-darśanam
śrī-vyāsa uvāca
atha gandharva-rājas tu bhagavān ājñayā vidheḥ /
saṃgītaṃ ca jagau tatra kṛṣṇa-rāsa-mahotsavam

susamaṃ tālamānaṃ ca sutānaṃ madhuraṃ śrutam /
vīṇā-mṛdaṅga-muraja-yuktaṃ dhvani-samanvitam

rāgiṇī-yukta-rāgeṇa samayoktena sundaram /
mādhuryaṃ mūrcchnāyuktaṃ manase harṣa-kāraṇam

vicitraṃ nṛtya-ruciraṃ rūpa-veśam uttamam /
lokānurāga-bījaṃ ca nāṭyopayukta-hastakam

dṛṣṭvā śrutvā surāḥ sarve munayaḥ sarva-yoṣitaḥ /
mūrcchāṃ prāyuś ca sahasā cetanāṃ ca punaḥ punaḥ

gopīnāṃ vastra-haraṇaṃ gopī-gaṇa-vilāpanaṃ /
tābhyo vastra-pradānaṃ ca saṃmānaṃ varadānakam

kātyāyanī-vrataṃ cāpi vipra-dārānna-bhojanam /
mahendra-darpa-pūjādi bhañjanaṃ śaila-pūjanam

punaś ca śuśruvuḥ sarve śrī-vṛndāvana-varṇanam /
saṃprāpuś ca punar mūrcchāṃ punaḥ prāpuś ca cetanām

tasmai dadau puro brahmā vahni-śuddhāṃśukaṃ param /
paraṃ śubhāśīr-vacanaṃ yat tan-mānasa-vāñchitam

amūlya-ratna-nirmāṇaṃ cāru-kuṇḍāla-yugmakam /
maṇīndra-sāra-mukuṭaṃ paraṃ ratnāṅgurīyakam

sugandhi candanaṃ puṣpaṃ sva-pāda-reṇum īpsitam /
amūlya-ratna-tilakaṃ ratna-bhūṣaṇam ujjvalam

pratyekaṃ vastu ruciraṃ tad-yoṣidbhyaś ca saṃdadau /
viśvakarmā ca nirmāṇa-maṇiṃ bhūṣaṇam uttamam

pratyekaṃ śaṅkha-sindūraṃ kastūrī-yukta-candanam /
sakarpūraṃ ca tāmbūlaṃ ratnendra-sāra-darpaṇam

maṇi-nirmāṇā-mañjoraṃ śveta-cāmara-śobhanam /
manoyāyi rathaṃ divyaṃ īsvarecchā-vinirmitam

muktā-māṇikya-hīrendrair maṇīndraiś ca pariṣkṛtam /
sad-ratna-mālā-jālaiś ca śveta-cāmara-darpaṇaiḥ

suśobhitaṃ ca parito lakṣaiḥ sundara-mandiraiḥ /
maṇi-mānikya-hīrāḍhyaṃ sad-ratna-kalaśojjvalam

sahasra-cakra-saṃsaktaṃ yojanāyata-sammitam /
dhanur lakṣocchritaṃ caiva sahasrāśvena yojitam

etad eva dadau brahmā prahṛṣṭas tuṣṭa eva ca /
śambhus tuṣṭo dadau hṛṣṭo hari-bhaktiṃ ca niścalām

jñānam adhyātmikaṃ caiva yoga-jñānaṃ sudurlabham /
nānā-janma-smṛti-jñānaṃ naipuṇyaṃ sarva-siddhiṣu

hareś carcāvidhānaṃ ca stavanaṃ pūjanaṃ tathā /
māṇikya-hīrāhāraṃ ca ratna-lakṣaṃ sudurlabham

nāga-hāraṃ dadau śeṣo nāgendramauli-maṇḍanam /
nāga-kanyā-śataṃ caiva vara-bhūṣaṇa-bhūṣitam

nāgebhyaś cābhyaṃ nityaṃ hisra-jantubhya eva ca /
nṛpālaya-gati-jñānaṃ sarva-loka-vilokanam

nirvighnatvaṃ dadau tasmai vighn-rājaś ca saṃsadi /
sudurlabhaṃ pāda-padma-yugma-reṇum abhīpsitam

amūlyaṃ ca nirupamaṃ grīṣma-sūrya-prabhopamam /
maṇi-rājaṃ sudīptaṃ ca triṣu lokeṣu durlabham

sarvatra vijayaṃ caiva vāñcchitaṃ nirmalaṃ yaśaḥ /
saṃgīta-vidyā-vijñānaṃ tan-naipuṇyaṃ manoharam

lakṣa-svarṇaṃ dhaneśaś ca dāsānāṃ ca śataṃ śatam /
dharmaḥ kīrtimayīṃ mālāṃ skando dhairyaṃ dadau tathā

viṣaya-jīrṇāpaharaṇaṃ dadau dhanvantarir manum /
sūryaḥ syamantaka-maṇiṃ svarṇā-bhārāṣṭakaprasum

candraḥ śvetāśva-ratnaṃ ca hy amūlyam uttamaṃ dadau /
vahni-śuddhāṃśuka-yugaṃ dadau vahniś ca saṃsadi

upendro ratna-koṭiṃ ca tad evendro dadau purā /
vīṇā-śilpaṃ viśvakarmā varuṇaś ca maṇi-srajam

smaraḥ śṛṅgāra-naipuṇyaṃ vīrya-stambhanam eva ca /
kāma-sandīpanaṃ jñānaṃ kāminī-prema-mūrchanam

kāminī-vaśa-gaṃ śilpaṃ rati-tattvaṃ dadau tathā /
pāpa-dāhana-mantraṃ ca ratna-chatraṃ samīraṇaḥ

yamaś ca dharma-tattvaṃ ca naraka-trāṇa-kāraṇam /
vasavaś ca vasūn divyān rudras tebhyo 'bhayaṃ dadau

madhu-pātraṃ sudhā-pātraṃ jayanto nalakūvaraḥ /
śukla-puṣpaṃ śukla-dhānyaṃ pāda-reṇum abhīpsitam

manobhirāṃ manuyo dadau tasmai śubhāśiṣam /
lakṣmīś ca paramaiśvaryaṃ bhāratī hāram uttamam

ratna-mālāṃ dadau durgā sarvatrābhayam īpsitam /
tat-patnībhyaś ca ratnāni sindūrābharaṇāni ca

krīḍā-padmaṃ rohinī ca ratiḥ sad-ratna-darpaṇam /
tulasī cātulaṃ mālyaṃ divyaṃ vasu vasundharā

gaṅgā ca vipulaṃ puṇyaṃ svāhā sad-ratna-pāśakam /
yamunā jalajaṃ padmam amlānaṃ sārvakālikam

vāruṇīṃ vāruṇī tuṣṭā ratna-pātraṃ śacī dadau /
manasā pradadau tasmai nāgānāṃ mauli-maṇḍanam

gandharvāś cāpi tat-patnyaḥ sva-śilpaṃ pradadus tathā /
paramānanda-yuktāś ca muni-patnyaḥ śubhāśiṣam