Jātakamālā · Verses 90-109

varam evaṃvidhaṃ śakra bhavantaṃ prārthayāmahe |
pratijñātārthavidhuraṃ ceṣṭante na hi sādhavaḥ

atha śakras tena tāsāṃ viṣayaprārthanākārpaṇyānapekṣāsvacchaśobhinā vacasā pravijṛmbhamāṇavismayaḥ prasādasaṃhṛṣitatanūruhaḥ prāha |
aśakyam arthaṃ khalu yācyamāno vighātadīnatvam upaiti lokaḥ |
varaṃ vṛṇīdhvaṃ naradevakanyā yad eva śakyeta mayā pradātum

atha tā dārikās tena tasyāntarnigūḍhaśāṭhyavikalpitena vacasā samupajātasaṃvegāmarṣāḥ śakram ūcuḥ |
upalāpayase kimartham asmān upagamyādya sahasralocanaivam |
sukhamātrakadurvidagdhabuddhe prakhalās tena vayaṃ na cāpi gamyāḥ

vidito bhavato na rājavaṃśaḥ kim asau dikṣu vikīrṇakīrtipuñjaḥ |
dhanado 'py ayathārthanāmadheyo dhanasāraṃ samavekṣya yasya nūnam

yam apāsya vayaṃ jarārtimṛtyuvyasanāyāsavighātadainyabhītāḥ |
suranātha daśām imāṃ prapannā na bhayān nāpi ca bālacāpalena

kṛtapuṇya viheṭhitābhir arthas tava ko 'smābhir atīva duḥkhitābhiḥ |
upajīva sabandhumitrabhṛtyo vibhavan nanda ca śakra dīrgharātram

sukṛtojjvalabhāgadheyayogād yadi devādhipatir bhavāṃs tataḥ kim |
na hi saṃpadam āpnuvanti santaḥ paraheṭhākaraṇāya devarāja

atha mahendras tāsāṃ sphuṭavicitramahārthasārasūcakair vacobhir āpyāyitavismayaḥ prasādābhivyajyamānavadanaśobhaḥ punar api bhāvajijñāsur arthāntarātiśayaśuśrūṣayā vācātyuvāca | mā tāvad bhaginyaḥ
nāthante darśanasyāpi mama loke tapodhanāḥ |
kimartham evaṃ varade mayi yūyaṃ tu niṣṭhurāḥ

atha tāḥ kumāryaḥ punar abhyadhikatarajanitamanyukopāḥ sāmarṣaṃ rūkṣākṣaraṃ tridaśapatim ūcuḥ |
anyathaiva sitāpāṅgamukhasmitavilokitam |
dṛśyate vadanaṃ śacyā dīyate varam anyathā

varapradāne yady asti śaktis tava purandara |
jahīhi prakhalāṃ tāvad viṣayāśāpiśācikām

athavā dustyajāḥ kāmā mithyāsaṃkalpalolupaiḥ |
ta eva santu te nityāḥ prabhāvo 'sti yadīdṛśaḥ

adhruveṣu sahasrākṣa kāmeṣv āsaktamānasaḥ |
varaṃ vada kathaṃ nāma tvam anyasmai pradāsyasi

uhyamānaḥ kathaṃ nāma saritā bhīmavegayā |
uttārayiṣyasy aparān parikṣāmajaḍāśrayaḥ

pāṃśukūlāmbaradharā vyapanītaśiroruhāḥ |
araṇyād grāmam eṣyāmaḥ kadā nas tad bhaviṣyati

yugamātravilokinyo mṛtpātravyagrapāṇayaḥ |
sāvadhānaṃ kadā bhikṣāṃ cariṣyāmaḥ kulāt kulam

asaktā lābhasatkārapaṅke saṃkleśasaṃkaṭe |
kadā viśodhayiṣyāmo deyadharmānurāgiṇaḥ

palālapuñjād utthāya nīhāragurucīvarāḥ |
yatheccham annapānārthe yāsyāmo niḥspṛhāḥ kadā

taror mūle śukaśyāme mṛduśādvalakañcuke |
kadā niṣadya prāpsyāmo dṛṣṭadharmasukhotsavam

kāyajīvitayos tyaktvā jarattṛṇalaveṣv iva |
apekṣāṃ sucirābhyastāḥ kadā lapsyāmahe sukham

kadā sarinnikuñjasthās taraṅgair udayavyayam |
ujjhāmo jīvalokasya bhidyamānair muhur muhuḥ