જાતકમાલા · શ્લોક 90-109

વરમ્ એવંવિધં શક્ર ભવન્તં પ્રાર્થયામહે ।
પ્રતિજ્ઞાતાર્થવિધુરં ચેષ્ટન્તે ન હિ સાધવઃ

અથ શક્રસ્ તેન તાસાં વિષયપ્રાર્થનાકાર્પણ્યાનપેક્ષાસ્વચ્છશોભિના વચસા પ્રવિજૃમ્ભમાણવિસ્મયઃ પ્રસાદસંહૃષિતતનૂરુહઃ પ્રાહ ।
અશક્યમ્ અર્થં ખલુ યાચ્યમાનો વિઘાતદીનત્વમ્ ઉપૈતિ લોકઃ ।
વરં વૃણીધ્વં નરદેવકન્યા યદ્ એવ શક્યેત મયા પ્રદાતુમ્

અથ તા દારિકાસ્ તેન તસ્યાન્તર્નિગૂઢશાઠ્યવિકલ્પિતેન વચસા સમુપજાતસંવેગામર્ષાઃ શક્રમ્ ઊચુઃ ।
ઉપલાપયસે કિમર્થમ્ અસ્માન્ ઉપગમ્યાદ્ય સહસ્રલોચનૈવમ્ ।
સુખમાત્રકદુર્વિદગ્ધબુદ્ધે પ્રખલાસ્ તેન વયં ન ચાપિ ગમ્યાઃ

વિદિતો ભવતો ન રાજવંશઃ કિમ્ અસૌ દિક્ષુ વિકીર્ણકીર્તિપુઞ્જઃ ।
ધનદો ઽપ્ય્ અયથાર્થનામધેયો ધનસારં સમવેક્ષ્ય યસ્ય નૂનમ્

યમ્ અપાસ્ય વયં જરાર્તિમૃત્યુવ્યસનાયાસવિઘાતદૈન્યભીતાઃ ।
સુરનાથ દશામ્ ઇમાં પ્રપન્ના ન ભયાન્ નાપિ ચ બાલચાપલેન

કૃતપુણ્ય વિહેઠિતાભિર્ અર્થસ્ તવ કો ઽસ્માભિર્ અતીવ દુઃખિતાભિઃ ।
ઉપજીવ સબન્ધુમિત્રભૃત્યો વિભવન્ નન્દ ચ શક્ર દીર્ઘરાત્રમ્

સુકૃતોજ્જ્વલભાગધેયયોગાદ્ યદિ દેવાધિપતિર્ ભવાંસ્ તતઃ કિમ્ ।
ન હિ સંપદમ્ આપ્નુવન્તિ સન્તઃ પરહેઠાકરણાય દેવરાજ

અથ મહેન્દ્રસ્ તાસાં સ્ફુટવિચિત્રમહાર્થસારસૂચકૈર્ વચોભિર્ આપ્યાયિતવિસ્મયઃ પ્રસાદાભિવ્યજ્યમાનવદનશોભઃ પુનર્ અપિ ભાવજિજ્ઞાસુર્ અર્થાન્તરાતિશયશુશ્રૂષયા વાચાત્યુવાચ । મા તાવદ્ ભગિન્યઃ
નાથન્તે દર્શનસ્યાપિ મમ લોકે તપોધનાઃ ।
કિમર્થમ્ એવં વરદે મયિ યૂયં તુ નિષ્ઠુરાઃ

અથ તાઃ કુમાર્યઃ પુનર્ અભ્યધિકતરજનિતમન્યુકોપાઃ સામર્ષં રૂક્ષાક્ષરં ત્રિદશપતિમ્ ઊચુઃ ।
અન્યથૈવ સિતાપાઙ્ગમુખસ્મિતવિલોકિતમ્ ।
દૃશ્યતે વદનં શચ્યા દીયતે વરમ્ અન્યથા

વરપ્રદાને યદ્ય્ અસ્તિ શક્તિસ્ તવ પુરન્દર ।
જહીહિ પ્રખલાં તાવદ્ વિષયાશાપિશાચિકામ્

અથવા દુસ્ત્યજાઃ કામા મિથ્યાસંકલ્પલોલુપૈઃ ।
ત એવ સન્તુ તે નિત્યાઃ પ્રભાવો ઽસ્તિ યદીદૃશઃ

અધ્રુવેષુ સહસ્રાક્ષ કામેષ્વ્ આસક્તમાનસઃ ।
વરં વદ કથં નામ ત્વમ્ અન્યસ્મૈ પ્રદાસ્યસિ

ઉહ્યમાનઃ કથં નામ સરિતા ભીમવેગયા ।
ઉત્તારયિષ્યસ્ય્ અપરાન્ પરિક્ષામજડાશ્રયઃ

પાંશુકૂલામ્બરધરા વ્યપનીતશિરોરુહાઃ ।
અરણ્યાદ્ ગ્રામમ્ એષ્યામઃ કદા નસ્ તદ્ ભવિષ્યતિ

યુગમાત્રવિલોકિન્યો મૃત્પાત્રવ્યગ્રપાણયઃ ।
સાવધાનં કદા ભિક્ષાં ચરિષ્યામઃ કુલાત્ કુલમ્

અસક્તા લાભસત્કારપઙ્કે સંક્લેશસંકટે ।
કદા વિશોધયિષ્યામો દેયધર્માનુરાગિણઃ

પલાલપુઞ્જાદ્ ઉત્થાય નીહારગુરુચીવરાઃ ।
યથેચ્છમ્ અન્નપાનાર્થે યાસ્યામો નિઃસ્પૃહાઃ કદા

તરોર્ મૂલે શુકશ્યામે મૃદુશાદ્વલકઞ્ચુકે ।
કદા નિષદ્ય પ્રાપ્સ્યામો દૃષ્ટધર્મસુખોત્સવમ્

કાયજીવિતયોસ્ ત્યક્ત્વા જરત્તૃણલવેષ્વ્ ઇવ ।
અપેક્ષાં સુચિરાભ્યસ્તાઃ કદા લપ્સ્યામહે સુખમ્

કદા સરિન્નિકુઞ્જસ્થાસ્ તરઙ્ગૈર્ ઉદયવ્યયમ્ ।
ઉજ્ઝામો જીવલોકસ્ય ભિદ્યમાનૈર્ મુહુર્ મુહુઃ