Jātakamālā, 1-8, 11-12, 19-20, 22, 24, 26, 32, 35 · Chapter 4

tiryagyonigatair api sadbhiḥ prāṇāḥ parārtham utsṛṣṭāḥ /
ko nāma puruṣabhūtaḥ saktiṃ dhanamātrake kuryāt //

śāntau samānadharmāṇau samaduḥkhasukhodayau
tāv anyonyam apaśyantau na remāte suhṛttamau //

bālye śaśena rahitaḥ kaṃcit kālaṃ bhavaty anuṣṇāṃśuḥ /
na tu tena śaśākṛtinā kadācid api sa vratī suhṛdā //

sāptapadīnaṃ sakhyaṃ bhavati satāṃ prakṛtiśuddhacittānām /
kim utānyonyaguṇakathāviśrambhanibaddhabhāvānām //

bhavati śamābhiratānāṃ puṃsāṃ dharmāya pāṭavaṃ buddheḥ /
pratanumanasāṃ tiraścāṃ dharmārambhe kutaḥ saṃjñā //

śaśajātir aho kveyaṃ kvedaṃ vāksauṣṭhavaṃ kva ca śamo 'yam /
abhavad iti devatānāṃ śaśa eva savismayaṃ cetaḥ //

āsāreṇa vibhinnacandrakamaṇiṃ tanvan kalāpaṃ mudā lāsyaṃ lāsakavat purā viracayan stautīva yaṃ kekayā
tasminn eva śikhī nirambhasi ghane cakṣuḥpradānālasaḥ prāyeṇodayavantam eva bhajate svārthapravīṇo janaḥ //

nistoyā viralībhavanti jaladā vicchinnam aindraṃ dhanuḥ śrūyante na kalāpināṃ giriguhāsaṃsargadīrghā giraḥ
sarvaṃ vastu nisargabhaṅguram iti dhyātveva śokāc ciraṃ vidyullāsikayā vilāsamadhuraṃ lāsyaṃ parityajyate //

jātaṃ kṣīṇaphalaṃ phaladrumavanaṃ śoṣaṃ gatā vīrudhaḥ pramlānāni śanair bisāni bisinīpaṅke kharatvaṃ gate
yo 'py āsīd badareṅgudīphalacayaḥ svalpo mamātroṭaje kṣīṇaḥ so 'pi suduṣkarāya tapase yātrāṃ kariṣye katham //

āhāreṇa vinā pratikṣaṇam ayaṃ dehaḥ klamaṃ gacchati klāntyā cetasi yoginaḥ pratihate sthairyaṃ samādheḥ kutaḥ
prājñasyāpi samādhihīnamanasas tattvābhimukhyaṃ kutas tattvādarśanabaddhamohatimiraḥ paścād vṛthā śrāmyati //

tyaktvā tato 'jinakamaṇḍaluvalkalāni sthāsyāmi bāndhavajanena saha svagehe
durbhikṣadoṣam apavāhya punar vanānte vatsyāmi vatsala ciraṃ bhavatā sahātra //

ālānam unmūlya sukhābhikāṅkṣī yātaḥ kathaṃcid dvirado vanāntam
vismṛtya bhūyo 'ṅkuśapātaduḥkhaṃ janāntam evecchati gantum ajñaḥ //

śamena medhāvitayā tapoguṇaiḥ śrutena ca jñeyapathānugāminā
munīṃs tvam anyān abhibhūya vartase raviḥ pradīpān iva dūram aṃśubhiḥ //

iti tvam ālokitaśāstraniścayo 'py anandhakāreṇa vivekacakṣuṣā
praveṣṭukāmo viṣayārigocaraṃ kathaṃ pramādyann iva nāma lakṣyase //

tamovinirbhedi pathāṃ prakāśakaṃ manaḥprasādaṃ janayac charīriṇām
na vetti dhandhaḥ sudhiyāṃ subhāṣitaṃ prasādi jātyandha ivendumaṇḍalam //

svabuddhidīpena vinā tamasvinīṃ sukhānuṣaktiṃ tyajatīti kā kathā
gṛhasthatāyāṃ ramayanti yan mano viśuddhasattvās tad asāṃprataṃ mahat //

dvisandhyam ājyāhutigandhavāsitair niveśitāntarbadareṅgudīphalaiḥ
jalāśayālīnaśarārisārasais tarūpagūḍhair uṭajair alaṃkṛtāḥ //

tapasvikanyoddhṛtakumbhavāriṇā prasicyamānodgatabālapādapāḥ
taṭadrumacchāyaniruddhasindhavaḥ samucchvasatpuṣpasugandhivāyavaḥ //

paribhramattāpasaputrakānugaiḥ kvacin mṛgaiḥ khaṇḍitavīraṇāṅkurāḥ
japāc calacchmaśruniruddhakandharais tapodhanair āśritaśailagahvarāḥ //

aho dṛḍhasnehanibaddhacetasām asatsukhāsvādalavānuṣaṅgiṇām
na nāma paryutsukayanti rāgiṇām amedhasāṃ cittam upatyakā bhuvaḥ //

akuśalajanasevyaṃ kāpathaṃ prāpya mohāt skhalati niyatam ajñaḥ snehapāśān amuktvā
sukṛtibhir anuyāte saṃvidāno 'pi mārge yad arajasi na tiṣṭhaty etad aprāptam atra //

indriyārthavaśagasya kāminīḥ paśyataḥ smitavilāsabhūṣaṇāḥ
apy akhaṇḍaphalade tapovane rāgikasya hṛdayaṃ nivekṣyate //

mṛgo mṛgayugītena nīyate śaragocaram
viṣayāsvādalubdhānāṃ bhavanty eva vipattayaḥ //

śalabhaḥ prayāti patito vibhāvasau gurudāhaduḥkham upagamya pañcatām
kamanīyarūpahṛtacetasāṃ kathaṃ na bhaviṣyati vyasanam aṅgināṃ punaḥ //

yadi nādadīta baḍiśastham āmiṣaṃ śakalī ka enam udakāt samuddharet
sukhalubdhabuddhir anubaddham agrato na bhayaṃ vilokayati bāliśo janaḥ //

kamale nimīlati śilīmukhaḥ sthitaḥ samupaiti kṛcchram atigandhalālasaḥ
gajabandhakīm anusaran vanāt karī sahate pratodaniśitāṅkuśavyathām //

vipadāṃ padaṃ tanudhiyāṃ vimohanaṃ sthirabuddhibhiḥ parihṛtaṃ mahātmabhiḥ
yadi vaḥ sanātanasukhaspṛhāsty ato viṣavaj jahīta viṣayāhigocaram //

śaśa suhṛttama śīlayaśonidher bhavata eva guṇā nanu tādṛśāḥ
mama bhaviṣyati yair hṛtacetasaḥ punar ihāgamanaṃ śamam icchataḥ //

jambūvanaṃ kvacid anena phalābhirāmaṃ dṛṣṭaṃ bhavet kim athavā phalito 'tra cūtaḥ
pākābhitāmrasukumāraphalādhivāso śailāntare kvacid udumbarapādapo vā //

asminn abhuktavati sakṣudhi durbalāṅge śānte munau samasukhavyasane susakhyau
bhokṣye tṛṇaṃ katham ahaṃ haritaṃ vanānte pāsyāmi śītavimalaṃ salilaṃ kathaṃ vā //

yathārthinaḥ kṣudupaśamāya nirvyathas tyajāmy asūn hutabhuji cañcalārciṣi
tathā jagadvyasananirastikāriṇīṃ sudurlabhāṃ daśabalatām avāpnuyām //

muktaḥ svātmā parārthe pramuditamanasā cintayitveti tena kleśacchedāya śāntaṃ padam abhilaṣatā prāṇināṃ bāndhavena
śāntajvālākalāpaḥ sa ca vanadahanas tasya puṇyānubhāvāt preṅkhattoyormilekhaṃ pracaladalikulaṃ prāpa padmākaratvam //

adhiṣṭhitaṃ tena bhṛśaṃ śaśena rarāja tad vāriṇi puṇḍarīkam
śaratprasanne nabhasi prasannaṃ prakāśalakṣmeva śaśāṅkabimbam //

aho parārthapratipattidakṣiṇaṃ yaśonidheḥ karma tavedam adbhutam
acintyamāhātmyaviśeṣasaṃśrayo mahāmatiḥ ko 'pi śaśāyate bhavān //

ayaṃ pradīptaḥ kva samīrasārathiḥ kva cātra rājīvavanatvam īdṛśam
mahātmanāṃ puṇyabalair adhiṣṭhito viṣadrumo 'py oṣadhivṛkṣatām iyāt //

tato vavuḥ pracalitavāriśīkarāḥ samantataḥ kuṭajabhidaḥ samīraṇāḥ
virejire samuditapaṅktibhiḥ phalaiḥ śukāśritā girisahakārapādapāḥ //

samudgate madhukaraveṇunisvane mṛdaṅgavad dhvanati ca vārinirjhare
nanarta khaṃ navajaladaṃ vilokayan sthito girer upari mayūralāsakaḥ //

manoharaṃ dhanur avatatya vajriṇo nipātitasphuṭabahuśīkareṣavaḥ
vitenire sphuradaciraprabhāsayaḥ payodharāḥ kṣapitanidāghavidviṣaḥ //

paribhramadbhramaranipātakopitaḥ samucchvasatprataruṇaketakāśritaḥ
śvasann ayovalayasarūpavigrahaḥ punaḥ punaḥ phaṇam atanod bhujaṅgamaḥ //

dayitāvirahotsukotsukaiḥ pathikaiḥ śailapathadrumāśritaiḥ
pariśuśruvire 'lpayācināṃ jaladhārāntaracāriṇāṃ giraḥ //

dadṛśuḥ pathikāṅganāḥ sphurantīṃ taḍitaṃ vārimuci pravepitākṣyaḥ
upari dviradasya vāyununnāṃ dhvajabaddhām iva kauṅkumīṃ patākām //

śikhicandrakamiśrakāśavaṃśaṃ kvacid āvartaparibhramacchilīndhram
abhavaj jalam āvilaṃ nadīnāṃ taṭajambūphalapātabhinnaphenam //

jambūphalaiḥ śabalitāni sarittaṭāni paśyan bhuvaś ca mṛduśādvalaramyaśobhāḥ
parṇoṭaje kvaṇati vārikaṇābhighātāt tiṣṭhan saha pramumude sa muniḥ śaśena //

papraccha tam athānena vyavasāyena bhūyasā
sthānaṃ divyasukhākāṅkṣī kim aindraṃ vijigīṣase //

ācacakṣe śaśas tasmai dhīracetās tapasvine
buddhatvam aham icchāmi prāṇināṃ duḥkhaśāntaye //

sa munis tam uvācātha yadā buddho bhaviṣyasi
tadā syāṃ tava śiṣyo 'haṃ sa cāsmai pratyapadyata //