Jātakamālā, 1-8, 11-12, 19-20, 22, 24, 26, 32, 35 · Chapter 3

nānyatra bodhisattvād ajñānatamonirastaye yogyaḥ /
kaś cit subhāṣitamaṇiṃ cikrāya prāṇamūlyena //

yathā yathā saṃvavṛdhe jagatpriyaḥ śaśīva bhindaṃs timiraṃ marīcibhiḥ
tathā tathā tan mahatīm mahākulaṃ jalaṃ payodher iva vṛddhim āyayau //

kaś cid eva mahābhāgyo jāyate saṃmataḥsatām
tarulateva vaṃśaśrīr yam ālambya vivardhate //

prāyeṇa prāṇino loke guṇino vā guṇasya vā
nāmāpi puṇyanirjātaṃ prayāti ramaṇīyatām //

subhāṣitaṃ tasya subhāṣitārthinaḥ kutaś cid ākarṇayato vipaścitaḥ
nitāntam ānandathucitrakarmakṛc cakāra romodgamabinduvartanām //

pūtena lokam avabhāsayatā samantāt kāntena bhinnatamasā prathitāgamena
śuddhena kasya hṛdayaṃ śaśalakṣmaṇeva na hlādyate supuruṣasya subhāṣitena //

śuśrāva bhinnatimiraṃ timirāntakārī yasmāt subhāṣitam atīva subhāṣitajñaḥ
prakhyātabuddhimahimā mahatāṃ sadaḥsu prītaḥ paraṃ śatasahasram adāt sa tasmai //

asaṃprāpyānyataḥ pūjāṃ guṇalabhyām asajjanaḥ
anyasmai mānyamānāya paṇḍitāyābhyasūyati //

śrutaṃ mayātīva subhāṣitapriyo bhavān kila jñānaviśeṣavittagaḥ
ato 'smy avajñātajanas tvadantikaṃ subhāṣitaprābhṛtavān upāgataḥ //

paribhraman gandhavatīḥ śilīmukho vihāya phullāḥ sahakāramañjarīḥ
madaṃ pipāsuḥ samupaiti dantino guṇāntaraṃ tatra sa paśyati dhruvam //

śroṣyāmīti subhāṣitāni bhavato jātaṃ mukhaṃ sasmitaṃ śrutvā yāsyati sāśru locanayugaṃ prītyā śriyaṃ kām api
ahnaś chedavaśāt sugandhi kumudaṃ mandaṃ samunmīlati prāpyendoḥ kiraṇān apāstatamasaḥ śobhāṃ parāṃ puṣyati //

subhāṣitaṃ jagadudayāya sajjanān mahīruhāt phalam iva saṃcinomy ahaṃ
gate mayi jvalanavatīm mahākhadām ayaṃ janaḥ katham iva tad grahīṣyati //

anavatīrya cirāya duruttaraṃ suvipulaṃ vyavasāyamahodadhim
kṣapitamohamahātimiraḥ kathaṃ jagati bodhimaṇiḥ sulabho bhavet //

tad aham eṣa subhāṣitalālaso jalam iva praviśāmi hutāśanam
na mama dharmakathāhṛtacetaso hutavaho 'pi kariṣyati vedanām //

iti nigadya sukhātam akhānayaddahanavac ca nṛbhis tad akārayat /
niragamac ca bahirbhavanāntarāt sapadi tena saha dvijarakṣasā //

hutabhuji jvalite ca mahāmatir nipatituṃ kṛtaniścayamānasaḥ
sakhibhir aśruparītavilocanaiḥ sa rurudhe parirabhya suhṛttayā //

ye nāma vallabhatarās satataṃ janasya putrād apīṣṭaphaladād dayitāj janāc ca
krīṇāsi tair asubhir ātmasukhānapekṣī kasmāt subhāṣitam atīva subhāṣitajñaḥ //

vijñānam ujjvalayati pratibhāṃ tanoti tattvaṃ prakāśayati kāpatham ucchinatti
sādhoḥ subhāṣitam aho paricīyamānaṃ kalyāṇamitram iva kiṃ na hitaṃ karoti //

yatrodite vimaladhāmni vivasvatīva pumnāṃ matiḥ kamalinīva vibodham eti
atyantabhinnatimiraṃ sudhiyā parasmāt tad grāhyam ātmanimayenakathaṃ na sūktam //

tasmād ahaṃ dahanadāham acintayitvā tāthāgatīṃ gatim anupratipattum icchan
prajñāguruṃ gurum ivālaghusūktahetoḥ prītaḥ śarīragurudakṣiṇayārcayāmi //

mānuṣyaṃ devabhūyaṃ vā prāpyate sukṛtāśrayāt
kadācil labhyate pumbhiḥ subhāṣitarasāyanam //

pradānapaṭubhir nityaṃ śīle ca vimale sthitaiḥ
atyantavīryasaṃnāhaiḥ prāpyate padam akṣayam //

paraṃ pramodaṃ janayet punaḥ punaḥ tavaiva sūktaṃ kuśalāvalambinaḥ
viṣādahetutvam upāgataṃ yato duruktam asmākam idaṃ tato nanu //

sugandhinā vāṅmadhunādhivāsitaṃ parisphurandantamarīcikesaram
mukhāmbujaṃ śrīmad idaṃ hutāśanaḥ kathaṃ nv ayaṃ niṣkaruṇo 'sya dhakṣyati //

viśuddhacāmīkaragauram agninā parīyamāṇaṃ parikūṇitekṣaṇam
śarīram asyedam aho bhaviṣyati pradagdhadārupratimaṃ malīmasam //

udyatsimasimāśabdam analāntaravartinaḥ
śyāmībhavad idaṃ gātraṃ draṣṭuṃ ko 'syādya śakṣyati //

dvidheva kriyamāṇānāṃ veṇūnāṃ parvaniḥsvanam
bāndhavāḥ katham asyāsthnāṃ śroṣyanti sphuṭatāṃ dhvanim //

amī samīraṇāsaṅga calatpallavapāṇayaḥ
mā dhākṣīrenam ity agniṃ vārayantīva pādapāḥ //

bāṣpatoyāvilākṣāṇāṃ vidārayati no manaḥ
bandhūnām asya dīnānāṃ hā hety ekākṣaraṃ vacaḥ //

iha goṣṭhī kṛtānena dattaṃ dhanam ihārthine
ity asya suhṛdaḥ sādhor deśayiṣyanti sāsravaḥ //

jñāteyena vināsmākaṃ duḥkhaṃ dahati mānasam
suhṛdo jñātayo vāsya dhārayiṣyanty asūn katham //

na prārthaye padam ahaṃ śubhalabhyam aindraṃ vidyādharādhipatitāṃ na ca nāpi rājyam
bhūyāsam asya jagataḥ sugatatvam āpya duḥkhakṣayārtham amunā kuśalodayena //

kṛtārtham iva padmatvaṃ manyamāne kuśeśaye
so 'pi ca sthitam ātmānam adrākṣīd dhīmatāṃ varaḥ //

pādopāntabhrāntamattadvirephaḥ śānto dharmaṃ dharmakāmo bruvāṇaḥ
śobhāṃ gāḍhaṃ padmapattrāyatākṣaḥ padmāsīnaḥ padmayoner dadhāra //

eṣa svapnaḥ syād iyaṃ kiṃ nu māyā vahniḥ kvāyaṃ kvedamambhoruhatvam
ity āścaryaṃ vismayākṣiptacittāḥ taṃ paśyantas te janā vācam ūcuḥ //

teṣāṃ tam ālokayatāṃ janānām ambhojamadhyasthitam unnateccham
harṣāśruṇāsaṃbhavatā kṣaṇena ruṣeva śokāśrujalaṃ nirastam //

patitam atha nabhastaḥ kīrṇakiñjalkagandhaṃ samanugatam alīnāṃ paṅktibhiḥ puṣpavarṣam
abhavad api ca māraḥ pauṣpam ādhāyapārśve dhanur upahitaśokaḥpāṇivinyastavaktraḥ //

gambhīre kṣitivivare parisphurantaṃ paśyāmi jvalanam ivāgrato mahāntam
eṣā ca jvaraparitarjitātiduḥkhā medinyāṃ mama vinimajjatīva mūrtiḥ //

tīvrāgniṃ narakam imaṃ patiṣyato me tvaṃ bhūyāḥ śaraṇam ihādya dharmakāma
tuṅgecchāḥ parahitavedhaso mahāntas tvādṛṣkāḥ suhṛdi ripau ca tulyabhāvāḥ //

yena satyena sattvārthaṃ bodhicaryāṃ carāmy aham
tena mā sma gamad vipro narakaṃ jvalitānalam //

kalyāṇamitram āgamya jagadarthavicakṣaṇam
prayāti vilayaṃ sadyaḥ pāpaṃ pāpakṛtām api //

āgamato 'numānāc ca dvayāniścayakāraṇāt
viśeṣaniścayotpatteḥ pratyakṣaṃ balavattaram //

mahāparityāgam imaṃ savismayaś ciraṃ vilokyeva mama sphuracchikhaḥ
kṛśānur anvakṣam ayaṃ śarīriṇāṃ praphullapadmākaratām upāgataḥ //

tataḥ samālokya mahāntam adbhutaṃ prabhāvam enaṃ vipulasya karmaṇaḥ
śubhāśubhasyāsti phalaṃ sukhāsukhaṃ vicintya cedaṃ vijahīta kāpatham //

pramādanidrāvinimīlitātmanāṃ śarīriṇāṃ saupāyikī prabodhanā
vipaścitāṃ tu sphuṭabuddhicakṣuṣāṃ sati prabodhe kim iva prabodhyate //

hitonmukhānām api dharmyayā girā bhṛśaṃ prabodhaṃ janayanti sādhavaḥ
gater viśeṣo bhavati prasarpatāṃ pratodasaṃcodanayā hi vājinām //

bahucchalaṃ pālayatā gṛhāśramaṃ na dhīmatā viśvasanīyam aṇv api
na yujyate svaptum anāhitāṅkuśa pracaṇḍamattadviradādhirohiṇaḥ //

sutapralāpā bhavanaṃ samṛddhimad vilāsalāvaṇyavibhūṣitāḥ striyaḥ
prasaṅgināṃ sarvam amedhasām idaṃ śamānukūlasya nirodhakaṃ pathaḥ //

kathaṃ cid aṣṭābhir apoḍham akṣaṇair avāpya mānuṣyam idaṃ sudurlabham /
śamāya yo na tvarate pramādabhāg niyojanīyo 'naḍuhām asau dhuri //

idam avāptam avāpyam idaṃ punaḥ kṛtam idaṃ karaṇīyam idaṃ nṛṇām
iti manogṛhacitraṇayā kṣayaṃ vrajati naiva manorathavartikā //

viṣayopabhogam avasānadāruṇaṃ parirabhya candanam ivāhiveṣṭitam
sukham ity abhūtaparikalpanānugā bahuduḥkhajālam adhiśerate janāḥ //

dhig aho tiraskṛtam avidyayā jagat sakalaṃ kalaṅkitam anaṅgajair malaiḥ
yad idaṃ sametya maraṇārigocaraṃ gajasuptikām iva vidhāya tiṣṭhati //

hṛtasatpathaṃ nivaraṇāribhiḥ śaṭhair avicintya saṃtatam anityatābhayam
anuśāsanaṃ plavam apāsya saugataṃ vinimajjati vyasanasāgare jagat //

pratikṣaṇaṃ kṣayam upayātijīvitaṃ praśāmyato vapur iva kṛṣṇavartmanaḥ
ataḥ sadā viṣayaparāṅmukhīm imāṃ tvarāvatīṃ kurutamatiṃ hitaṃ prati //

iti vacanam ayuktanyāyam uktam mayā ced anubhavata yatheṣṭaṃ kāmasaukhyānubandham
atha tu guṇavad etat sādhavaḥ cintayitvā śrayata viṣayatṛṣṇāṃ rodhinīṃśāntim agryām //