Jātakamālā, 1-8, 11-12, 19-20, 22, 24, 26, 32, 35 · Chapter 32

tṛṇam api rakṣanti budhā yatnena mahīyasānyanikṣiptam /
prajñāguravaḥ kiṃ punar aśrāntāḥ prāṇinikṣepam //

avetya tasyātha nisargabhadratāṃ muner iva prāṇiṣu bhadracetasaḥ
svabhāvabhadrāḥ kamanīyalocanā mudā mṛgā bandhum ivainam anvayuḥ //

śamānvitaḥ kesaravalkalākulo mṛgānuyāto mṛgarājatāpasaḥ
śanaiḥ sa niṣkramya guhoṭajāntarāc cakhāda pakvāni phalāni śākhinām //

phalopayogāya vanāntare caran sa khelagāmī calacārukesaraḥ
mahāgṛhasthair atithipriyair iva pratīkṣyate smātithivan mahīruhaiḥ //

guhāntarān niṣpatato himātyaye prakāśatālor atimātrajṛmbhaṇāt
tatāna tasyāṅgasukhaṃ puraḥ śanair divākaraḥ prābhṛtavan navātapam //

ayaṃ mṛgāṇāṃ patir atra bhūdhare patatriṇāṃ tārkṣa ivoruvikramaḥ
itīva tasyopari jātasaṃbhramā niśākaracchattram adhārayan niśā //

papau sa yasyāṃ sariti kṣapākara prasannam ambhaḥ śiśiraṃ taṭasthitaḥ
kṛtārtham ātmānam amanyateva sā sphuṭaṃ jahāseva ca phenapaṅktibhiḥ //

himācalas tena viśuddhacetasā mahātmanā kesariṇā samāśritaḥ
mahāntam ātmānam atīva bhāsato mudeva mene kanakācalād api //

kva ca bhuvanabhayaṃkaraṃ haritvaṃ kva ca karuṇāsya garīyasī mṛgeṣu
iti munim iva taṃ sthitaṃ himādrau mṛgaripavo 'pi mṛgādhipaṃ praṇemuḥ //

aninditam aho karma tava vākkāyacetasām
aninditāṅga ity etat tvannāmānuguṇaṃ smṛtam //

aho tyāgakṣamāvīrya gāmbhīryakaruṇādayaḥ
tvadguṇāḥ guṇināṃ śreṣṭha munīn apy atiśerate //

aho vṛttena śuddhena bhavataḥ śuddhacetasaḥ
paraṃ mārdavam ānītaṃ krūrāṇām api mānasam //

dhanyo 'yaṃ dhanyahimavān himacchannaśilātalaḥ
iti dhīrasvabhāvena yas tvayā samupāśritaḥ //

tasmād imau śiśū bhīma vyāladarśanabhīrukau
nikṣipya tvayi gacchāvo vanam āvāṃ phalārthinau //

upādāya phalaṃ yāvad āvrajāvo vanāntarāt
rakṣaṇīyau tvayā tāvad etau capalagātrakau //

kāpeyaṃ capalatvaṃ ca tulyakālam idaṃ dvayam
tasmād ābhyāṃ kṛtā bādhā soḍhavyā bhavatā kṣaṇam //

duḥkhāny api garīyāṃsi parārthapratipattaye
sahanta eva dhīmanta ātmasaukhyānapekṣiṇaḥ //

bhayam icchati yo hartum atyantam bhīrucetasām
manaḥsaṃtāpinīṃ pīḍāṃ sa kathaṃ na sahiṣyate //

iti samabhihitaḥ sa tena siṃhaḥ kapimithunena sutābhirakṣaṇāya
nṛpa iva pararakṣaṇakṣamo 'pi kṣaṇam idam ākulatāṃ gataḥ pradadhyau //

tad gacchataṃ tuhinaśailam imaṃ vigāhya tuṅgaiḥ snubhir gaganamadhyam ivollikhantam
svādūni śīghrataram ānayataṃ phalāni premṇā śiśudvayam idaṃ paripālayāmi //

guhājiropāntavane manohare hareḥ suṣupsoḥ sukhaśītamārute
rutena tau vānaraśāvakau muhur muhūrtanidrāsukham asya jaghnatuḥ //

nidrānimīlite kiṃcit punas tasya vilocane
aṅgulibhyāṃ tutudatuḥ sphuliṅgāpiṅgatārake //

sukhaṃ tasyopaviṣṭasya sthitvācakitam antike
prānte lāṅgūlam ādāya samācakṛṣatur muhuḥ //

saṭāṃ vyālambya pṛṣṭhaṃ ca tasyāruhya punaḥ punaḥ
sahajāc cāpalād dūram utpatyotpatya petatuḥ //

vidyamāneṣv api puraḥ prabhūteṣu phaleṣu tau
jighatsor ānanāt tasya samācikṣipatuḥ phalam //

iti duśceṣṭitaṃ tat tat tayor vānaraśāvayoḥ
karuṇābhadracittatvāt sa sehe putrayor iva //

sarvatra samacittānāṃ sukhaduḥkhānapekṣiṇām
satāṃ sarvadhurīṇānāṃ na kvacit khidyate manaḥ //

abhivardhitavedanākulākṣaṃ virasavyāhṛtilakṣyatālurandhram
udarasrutaśonitārdraroma kṣudhitaśyenavilupyamānamāṃsam //

anena gṛdhreṇa viluptamāṃsake prakāmam asmin kapiśāvakadvaye
phalāny upādāya tayor upetayoḥ kim adya śakṣyāmy abhidhātum agrataḥ //

pātuṃ gatau capalakau saraso jalaṃ nu vṛkṣaṃ phalārtham abhiruhya nu kiṃ niviṣṭau
syātām imāṃ kim atha vādriguhāṃ praviṣṭau vyālena kenacid utātra vipāditau tau //

tūṣṇīṃ sthito mṛgapate kim adhomukhas tvam ācakṣva tāv iha śiśū kva gatau bhavetām
itthaṃ tayoḥ pravagayoḥ paridīnadṛṣṭyoḥ śroṣyāmi vihvalapadāni kathaṃ vacāṃsi //

upalabhya cirāt tayor abhāvaṃ sutayoḥ kundavipāṇḍudantapaṅktyoḥ
samupetya śucā kariṣyatas tau baḍiśottāritamīnavepanāni //

yāvad vyāghranakhāṅkurākṛtibhṛtā cañcvā vibhidyodare gṛdhro 'yaṃ kapiśāvayor bhayavator antrāṇi nākarṣati
gatvā tāvad ahaṃ himādriśikharaprāntaṃ niveśyonmukhaḥ sāntvenainam upāyapūrvakam ahaṃ neṣyāmi dharmyāṃ sthitim //

nūnaṃ tavāpy apatyāni bhūtapūrvāṇi santi vā
yādṛśo bhavatas teṣu sneho 'nyasyāpi tādṛśaḥ //

iti kāruṇyam ālambya mā vadhīḥ kapiśāvakau
tṛptir ātyantikī nāsti bhuktvāpy enau tavāturau //

dhig aho jīvitaṃ tasya dhig ātmasneham īdṛśam
yaḥ śarīrakaleḥ puṣṭiṃ karoti parahiṃsayā //

ajñānāj jāyate snehaḥ sadoṣe 'pi śarīrake
tatpuṣṭaye karoty ajño nimittakarma durgateḥ //

ātmātmīyavinābhāvād yaḥ śūnyaṃ sarvam īkṣate
tasyābhūtavikalpotthaṃ na ruṇaddhi manas tamaḥ //

tamo'bhāvād yadā tattvam āsādayati kovidaḥ
tadā bhavati mokṣāya śubhāśubhaparāṅmukhaḥ //

siṃhān nānyo māṃsabhuk kaścid asti krūro veti spaṣṭam etat pṛthivyām
saiṃhīṃ kaṣṭāṃ yonim apy āśrito 'haṃ necchāmy etāṃ prāṇihiṃsām adharmyām //

mṛgam iha gahane mṛgendrajuṣṭe mṛgaripuṇābhihataṃ svayaṃ mṛtaṃ vā
khagavara nabhasi bhraman nirīkṣya drutagatir atsyasi tasya māṃsam etya //

kṣudham api mahatīṃ tato 'dhivāsya jvalanaśikhām iva deham uttapantīm
narakanipatanāya mā sma kārṣīr akuśalam īdṛśam ujjhitāpramādaḥ //

antaḥsattvāsthisaṃdhisphuṭanataṭataṭāśabdahuṃkārabhīmāḥ saṃtanvantaḥ sphuliṅgānikaram uruśikhālohitadhyāmabhīmāḥ
lolajvālākalāpā narakahutabhujaḥ sūribhiḥ kathyamānāḥ kurvanty ādhiṃ janasya śravaṇam api gatāḥ kiṃ punaḥ saṃspṛśantaḥ //

āyasyāṃ kūṇitākṣaṃ jvalitahutavahasparśasaṃtāpitāyāṃ kumbhyāṃ gāḍhaṃ nadantaṃ kvathitaparicalattailapūrṇāsyakaṇṭham
ālokyālekhyabhittau likhitam api naraṃ nārakaṃ pacyamānaṃ hiṃsro 'pi krūrabhāvāt ka iva na viramed durgatiprāptihetoḥ //

śrutvā durgatiduḥkhāni viramaty aśubhān na yaḥ
so 'naddhāpuruṣākāraḥ pāṣāṇahṛdayo 'pi vā //

alābhe lābhe vā suhṛdi hitavāci dviṣati vā stutau nindāyāṃ vā mahati vibhave vā vipadi vā
vikāraṃ yo nāyāty upaśamaviśuddhena manasā sthitaḥ sa prājñānām upari saviteva dyutimatām //

tvam addhi māṃsaṃ piba śoṇitaṃ ca mamākṣiṇī coddhara niścalasya
itīdam uktvā vinimīlitekṣaṇaś ciraṃ viniṣkampatanur babhūva saḥ //

dadhvāna dundubhir atha dhvaninā digantān āpūrayan surapateḥ puramadhyavartī
gṛdhrāya dattatanum ānamitaiḥ śirobhiḥ siṃhaṃ sthitā nabhasi tuṣṭuvire ca siddhāḥ //

cacāla bhūś calitasuvarṇabhūdharā visismiye tridaśagaṇaḥ savāsavaḥ
udīritastutibhir ahīśvarair api prapātitās tadupari puṣpavṛṣṭayaḥ //

atha kesariṇo guhāntike nidadhau vānaraśāvakau khagaḥ
nakhabhinnatanū viniścalau bhayamūrcchāvinimīlitekṣaṇau //

śanair upāgamya ca bodhisattvam utthāpayāmāsa sa gṛdhravaryaḥ
sthito 'gratas tasya vinītabhāvo jagāda bhaktyā stutim īdṛśīṃ ca //

dayālutā kveyam aho tavocchritā kva siṃhateyaṃ jagato bhayaṃkarī
cirāya kenāpi viśeṣahetunā bhavān muniḥ ko 'pi mṛgādhipāyate //

prajñāvalambi yasyaiva samaduḥkhasukhaṃ manaḥ
sa eva prāṇamūlyena krīṇāty āpadgataṃ param //

tvādṛśā na bhaveyuś cet sthirāḥ sajjanasetavaḥ
duḥkhodanvati majjeyur agādhe mahati prajāḥ //

imām ākarṇya kalyāṇīṃ bhavato dharmadeśanām
adyārabhya kariṣyāmi vairiṣv api dayām aham //

anādisaṃsāravivartanaśrama prabādhanāduḥkhaparaṃparāhatam
jagat samuddhartum idaṃ bhavodadhes tathāgatatvāya mamāyam ādaraḥ //

gambhīrair adurāsadaiḥ sadasatāṃ vijñātṛbhiḥ karmaṇāṃ śāstrāviṣkṛtabuddhibhiḥ parahitavyāpārasaktātmabhiḥ
sādhvīnām avagantṛbhir bhavabhidāṃ tāthāgatīnāṃ girāṃ mohacchedi bhave bhave bhavatu no yuṣmadvidhaiḥ saṃgatam //

guhāntike mayā tatra sthāpitau kapiśāvakau
tasmān mām adhunā sādho visarjayitum arhasi //

bodhyaṃ bandhugirā sphuṭīkṛtam api sthūlaṃ na gṛhṇāti yaḥ sūkṣme vastuni tasya śāstraviṣaye vyarthaṃ matiḥ khidyate
draṣṭuṃ yasya na śaktir asti bhavanadvāraṃ prakāśe sati cchidraṃ sūkṣmataraṃ sa jātatimiraḥ sūcyāḥ kathaṃ drakṣyati //

upadeṣṭari saty api pramādī na hi bālo mativāmatāṃ jahāti
ṛjutām upanītam apy abhīkṣṇaṃ punar āgacchati vakratāṃ śvapuccham //

upadiṣṭapathaḥ prasannaśāstrair anavācīnamatir na yāty amārgam
paṭubhadramanāḥ parītadehaḥ paṭubhir veṇudharair iva dvipendraḥ //

ayam akṣagaṇaḥ susaṃyato na vikāraṃ kurute vipaścitaḥ
sugṛhītaphaṇo bhujaṅgamo na hi śaknoty aparāddhum aṇv api //

apakāraphalaṃ janasya gāḍhaṃ padam aiśvaryam asajjane tanoti
haritālam aher niṣiktam antar vadane tīvrataraṃ viṣaṃ karoti //

jitam indriyavairibhiḥ pramādāj janam icchā vinipātayaty anarthe
pravilīnasuvarṇadarśanīyā śalabhaṃ dīptir iva sphurantam agnau //

avipaścitam indriyārthasaktiḥ puruṣaṃ pātayati svadharmamārgāt
ślathabandhanaruddhanābhimūlaṃ phalam agrād iva pādapasya paktiḥ //

na ced bhaveyuḥ prakṛtiprabādhanā viṣadrumāśīviṣaśastravahnayaḥ
asajjanasyāvilatīkṣṇacetasaḥ samā bhavet kena punaḥ sahopamā //

akāraṇakrodhaka uṣṇabhāṣaṇaḥ khalo bhṛkuṭyā viṣamīkṛtekṣaṇaḥ
anekarandhrotthitabhīmapannagaḥ karoti valmīka ivādhikaṃ bhayam //

niśātayā roṣaśilātale dṛḍhaṃ paropaghātāya mudābhyudīrṇayā
dunoti kaṃ nāma na gocaraṃ gataṃ gatatrapo vāgasidhārayā khalaḥ //

śaṭhatvasaṃnāhabhṛtaḥ khalāś ciraṃ durāvarāś cendriyasainyamadhyagāḥ
aruṃtudāḥ sādhujane 'pi niṣkṛpāḥ kṛpāṇadhārām iva pātayanti gām //

budho na viśvāsam iyād asajjane vinītaveṣe 'pi manojñavācy api
surūpadeho 'pi kalasvano 'pi san na kiṃ mayūraḥ sphurato 'tti pannagān //

yadīṣyate cittakuṭumbapoṣaṇaṃ cirāya vā dhīmahiṣīvivardhanam
ato vipaścijjaladodaye sati prakīryatāṃ sadguṇabījam ātmani //

cirāya satsaṃgataśuddhamānaso na yāty asatsaṃgatam ātmavān naraḥ
manoharendīvarapuṣpagocaro na jātu bhṛṅgaḥ kuṇape nilīyate //

raṇagatasya yathā ratir udbhavaty anaparāddhaśarasya dhanuṣmataḥ
guṇaśarair atidūranipātibhiḥ prahatadoṣaripoḥ sudhiyas tathā //

ativiśuddham ahāryam akṛtrimaṃ guṇavibhūṣaṇam āryajanārcitam
samupalabhya narasya na jāyate suravarābharaṇeṣv api vismayaḥ //

sukham atyantam anvicchan guṇānāṃ vā samudbhavam
asajjanam atas tyaktvā kalyāṇaṃ mitram āśrayet //

na jātu prītaye sādhor anāryajanasaṃgatam
snātasya tīrthasalilaiḥ śukletaram ivāmbaram //

saṃparkeṇa tamobhidām jagadaghapradhvaṃsināṃ dhīmatāṃ krūro 'pi prakṛtiṃ vihāya malinām ālambate bhadratām
yat tṛṣṇāglapito 'pi necchati janaḥ pātuṃ tad eva kṣaṇād ujjhaty ambudharodarasthitam apāṃ patyuḥ payaḥ kṣāratām //

śārdūle pramanasi tatra labdhatṛptau saṃgatyā svavasatim āgate salīlam
vārāhaṃ palam upayujya baddhamedaḥ śyeno 'pi svanilayam ājagāma tūrṇam //

mṛgapatir api bhānau kiṃśukottaṃsarāge sthitavati kanakādrer mūrdhni bhāsvanmayūkhe
taruviṭapakulāyālīnacañcadvihaṅga calitamṛdusaṭāntaḥ svaṃ nivāsaṃ jagāma //

niruddham ambhastaṭasevibhir vibhir nirantaram pallavavidrumair drumaiḥ
śanair upetāli kuśeśayāśayā vyagāhatāpiñjarakesaraḥ saraḥ //

avagāhya ca tat saro mahad drutam uttīrya vilambikesaraḥ
sa guhāntikam āgaman muhuś caraṇanyāsavibhugnaśādvalam //

śitagṛdhranakhakṣatāṅgayor atha śākhāmṛgaśāvayos tayoḥ
upari tvaritaṃ sa kesaraṃ salilasrāvi dudhāva kesarī //

harikesaravārisicyamānau gurumūrcchāpagamād upetasaṃjñau
udamīlayatāṃ vilocanāni sphuritottānamukhau pravaṅgaśāvau //

gṛdhrātibhītaparivepitakātarāṅgau tau tasthatur mṛgapateś caraṇāntam etya
ālolapallavamanoharayātha so 'pi snehena tau rasanayā muhur ālileha //

vṛntacyutaṃ pariṇataṃ phalam ādayitvā premṇā muhuḥ svatanayāv iva sāntvayitvā
khadyotadīpataralāṃ svaguhāṃ praviśya suṣvāpa tau sa parirabhya sukhaṃ niśāyām //

tapane tapanīyakumbhavad diśam ākrāmati śātamanyavīm
śanakaiḥ kapiśāvakānvitaḥ sphuritālambisaṭo viniryayau //

atha gṛhītaphalaṃ phalalubdhakau svatanayāv avalokayituṃ mudā
mṛgapater vasatiṃ drutam utsukaṃ pravagayor mithunaṃ drutam āgamat //

upagataṃ gatamānamadodayo mṛdupadaṃ mṛduvāk karuṇānvitam
kṛtanamaskṛti tan mithunaṃ hariḥ kuśalapūrvam abhāṣata lokavit //

kapiśāvakayoḥ sarvam yathāvṛttam anukramāt
tataś caramam ācakhyau gṛdhrāpaharaṇaṃ tayoḥ //

atikrāntām atha śrutvā vyāpadaṃ putrayoḥ śucā
gṛdhrakṣatāni gātrāṇi tayoḥ paspṛśatuḥ kapī //

ūcatuś cedam ārdrārdraṃ stutiyuktaṃ mṛgādhipam
bhavatā rakṣatā putrāv āvām api surakṣitau //

tanvan dharmakathāgaṅgāṃ cihnito guṇasānubhiḥ
yaśastuhinasaṃchanno jaṅgamas tvaṃ himācalaḥ //

ye na mānti tanor antar asaṃkhyā bhavato guṇāḥ
manye kesaratāṃ prāpya te 'mī bahir avasthitāḥ //

stimitam udadheḥ kṣubhṇāty ambhaḥ patatripatiḥ patañ jaladapaṭalacchannasyendoḥ prasarpati na dyutiḥ
tava punar aghavyucchedinyāṃ sthitau sthitam anyatāṃ na tu gamayituṃ cetaḥ śuddhaṃ rajastamasī kṣame //

pālayitvā sutāv etāv āvayor yac chubhaṃ tvayā
prāptaṃ tenātimahatā labhasva prārthitaṃ phalam //

tad imāv upagṛhya putrakau bhavatā yatnavatābhipālitau
bahubandhuparītagahvarāṃ vasatiṃ yāva vanāntare nijām //

tena proktau yātam ity utsukau tau kṛtvā bhaktyā vandanāṃ tasya sādhoḥ
śāntasthānāt putrakārūḍhapṛṣṭhau mandaṃ mandaṃ jagmatuḥ kānanāntam //

yātoḥ pitroḥ pṛṣṭhamadhyādhirūḍhau lagnau gāḍhaṃ skandharomṇāṃ samūhe
vyāvartyeṣal locanāny utsukau tau bhūyo bhūyo dṛṣṭavantau mṛgendram //

taṃ nikṣepaṃ sarvanikṣepasāraṃ sāraprajñāgocaraḥ so 'rpayitvā
skandhād bhāraṃ sthāpayitveva bhūmau khedacchedād bhūyasīṃ prītim āpa //

nānyat kaṣṭataraṃ kiṃcit prāṇinikṣepadhāraṇāt
pratyarpaṇāc ca tasyaiva nānyad asti sukham nṛṇām //

yas tena dharmanikṣepo nikṣiptaḥ sādhu tāyinā
pālanīyaḥ sa yuṣmābhir atyantaṃ sukham icchubhiḥ //