Jātakamālā, 1-8, 11-12, 19-20, 22, 24, 26, 32, 35 · Chapter 26
dhyānapradīpabhāsā labdhāloko 'pi naiti nirvāṇam /
yad bodhiṃ prāptumanās tat sattvahitānubandhāya //
vibhave sati jāyate madaḥ sati tasmin praśamaḥ kuto bhavet
asati praśame gatatrapo malinaṃ karma samīhate janaḥ //
muhur apriyasaṃprayogaduḥkhaṃ muhur ādhiḥ priyaviprayogakāle
draviṇārjanakhinnamānasānāṃ yadi vāñchā viphalā tato viṣādaḥ //
gṛhiṇām iti nityam ākulānāṃ svajanasnehanibaddhamānasānām
sukham ity aphalābhimānabhājāṃ tanur apy asti na nirvṛtir gṛheṣu //
gṛhasaṃjñakam ity apāsya kaṣṭaṃ tvaritaṃ bandhanam etad ātmakāmaḥ
tapasām abhivṛddhaye vanāntaṃ praśamasthānam ahaṃ tataḥ śrayiṣye //
dhyānaikatānamanasā vijitendriyeṇa saṃtoṣalābhasukhinā karuṇānvitena
yas tena saṃśrita udāradhiyā dvijena mene mudeva sa tarus tarutāṃ kṛtārthām //
tṛṇāstaraṇam āstīrya nāsāprāhitalocanaḥ
dadhyau sa dhyāyinām agryo dhyeyam ekāgramānasaḥ //
vīryapāramitāmārga vāhanopacitaśramam
dhyānapāramitā dhīraṃ vyaśiśramad ivātha tam //
kāmebhyo 'kuśalebhyaś ca dharmebhyo 'vasthitaṃ pṛthak
savitarkavicāraṃ ca viśuddhātmā vivekajam //
kṛtaprītisukhāsvādam āsvāditaśamāmṛtaḥ
sa lebhe prathamaṃ dhyānaṃ dhyātā mārgasya labdhaye //
avitarkāvicāraṃ ca vicārakuśalas tataḥ
so 'dhyātmasaṃprasādāc ca dvitīyaṃ dhyānam ādade //
virajya ca śanaiḥ prīteḥ smṛtimān samupekṣakaḥ
dhīraḥ kāyasukhāsvādī tṛtīyaṃ dhyānam āpa saḥ //
upekṣāpariśuddhaṃ ca prahāṇāt sukhaduḥkhayoḥ
virāgāc ca tataḥ prīteś caturthaṃ dhyānam āyayau //
mṛgāḥ kapotāḥ śikhinaś cakorāḥ bhadrāśayā vyālamṛgāś ca te te
vihṛtya śiṣyā iva kānanānte viśaśramus tasya samīpam etya //
tataḥ kapotītanupiñchasaṃkule tadaṅgasaṃpīḍanasaṃbhṛtoṣmaṇi
kulāyake 'ṇḍāni vipāṭalāṅgakāḥ kapotapotāḥ paribhidya niryayuḥ //
vilokya śāvān atha tān kapotikā muhur jighatsāvivṛtāgratuṇḍakān
acintayitvā mahatīṃ nijāṃ kṣudhaṃ priyaṅgunīvāraphalaiḥ pupoṣa sā //
kapotakās te prabhavattanūruhā gṛhītabījām avalokya mātaram
muhur mukhāni praca(2)lāgrapakṣakāḥ prasārayām āsur udīritasvarāḥ //
dhyānāvasānasamaye 'tha samitphalārthaṃ śāntendriyo jigamiṣuḥ sa munir vanāntam
dṛṣṭvā gṛhītatṛṇavṛkṣaphalāṃ kapotīṃ tasthau kulāyavati mūrdhni nilīyamānām //
anīkṣamāṇādya kapotapotakān imān prakāśīkṛtatāmratālukān
nilīya vṛkṣeṣu śucā muhur muhur nabhaḥ samutpatya paribhramiṣyati //
aho janmaśatabhrānti vāsanaiṣānuvartate
tiraścām apy apatyeṣu saṃrūḍho yad apahnavaḥ //
yadi na syur apatyāni mitraṃ vā bandhur eva vā
svatākṣaḥ syāt svatābhāvān nirbījo 'pahnavaḥ kutaḥ //
asaty apahnave cetaḥ parivṛṇvanti nādhayaḥ
asatsv ādhiṣu niḥsaṅgaḥ sukham āste śamānvitaḥ //
utpādyāpatyasaṃjñāni duḥkhāni kleśamohitaḥ
khedam eti jano mūḍhaḥ paścāttāpena tāpitaḥ //
anasy anicchann api gaur balīyasā yathā balāc chākaṭikena yojyate
śubhāśubhenaiṣa kubuddhir asyate tathā bhavodanvati karmaṇā janaḥ //
tasmāt kapotaśiśavo na bhavanti yāvad asmajjaṭālayagatāḥ pravirūḍhapakṣāḥ
dhyānāmṛtopacitacittaśarīratuṣṭiḥ tiṣṭhāmi tāvad iha niścalamūrtir eva //
vikīrṇam antaḥ kva cid aṇḍakhaṇḍaiḥ sā taṃ kulāyaṃ munisattamasya
śanaiḥ śanaiḥ pallavakomalena karadvayenāpanināya mūrdhnaḥ //
prarūḍhapakṣeṣu kapotakeṣu gateṣu mātrā saha kānanāntam
kenāpi bhaktipravaṇena nūnaṃ tadālayo me śiraso 'panītaḥ //
hutvāgniṃ sphuraduditārciṣaṃ dinārdhe vyāpaṅkaṃ phalam upayujya baddhagandham
nāsāgrasthitanayanas taror adhastād ārebhe punar api yogam ekacittaḥ //
Original text: Jātakamālā, 1-8, 11-12, 19-20, 22, 24, 26, 32, 35 · Edition: Michael Hahn: "How it all began: I. Haribhaṭṭa's Prabhāsajātaka", Journal of the Centre of Buddhist Studies, Sri Lanka 4 (2006), pp. 1-81 Hahn, Michael: Haribhaṭṭa in Nepal. Ten Legends from His Jātakamālā and the Anonymous Śākyasiṃhajātaka. Tokyo 2007 (Studia Philologica Buddhica, Monograph Series 22) Hahn, Michael: Poetical Visions of the Buddha's Former Lives : Seventeen Legends from Haribhatta · Data entry Michael Hahn Klaus Wille (Jat. 1) · GRETIL (Göttingen) · CC BY-NC-SA 4.0