Jātakamālā, 1-8, 11-12, 19-20, 22, 24, 26, 32, 35 · Chapter 24

ripum api nopekṣante karuṇāmṛducetaso gadagrastam /
lokasya bandhubhūtāḥ kiṃ punar acchinnajanmānam //

ālokayann atha bhujaṅgamaveṣṭitāni sāndrāṇi candanavanāni nidāghakāle
śṛṅgāgraviskhalanajarjaritāgrajālaṃ babhrāma siddhanilayaṃ malayaṃ kadā cit //

hārītatuṇḍaparikhaṇḍitavidyutāni paśyan navāni maricāni darīmukheṣu
jighran samīracalitaṃ kusumādhivāsam adhyāsta khedavigamāya śilāṃ sa dhīraḥ //

ālokya śāntam atha taṃ vinayāvalambī skandhān mahāntam avatārya sa mūlabhāram
bhaktiprasādabharam udgirateva dūrād ālagnabhūmirajasā śirasā vavande //

sa brāhmaṇaś cainam apṛcchad evaṃ paśyāmy ahaṃ glānaśarīram āryam
ārūḍharogābhibhavapratanvyā pratyekabuddhas tam uvāca vācā //

idaṃ ca valmīkasamaṃ śarīraṃ utpāditaṃ karmaparaṃparābhiḥ
kurvvadbhir ādhiṃ jagatām anekair adhyāsitaṃ vyādhibhujaṅgamaiś ca //

iyaṃ jarākeśariṇī yadā ca śarīram ākrāmati mānakasya
madaṃ viṣādād vigatendriyārthas tadāsya cittadvirado jahāti //

tato paro mṛtyur akāraṇāriḥ kuṭīrakaṃ dehamayaṃ bhanakti
bhagne hi yasmin bhavati kṣaṇena sarvakriyāṇāṃ viratir janasya //

imais tribhir mṛtyujarāgadāribhiḥ prabādhyate karmasamīritair janaḥ
anantarakleśahutāśasambhavo bhavo yam āryair ata eva neṣyate //

iti vicārya vicārapaṭur bhavān pratibhayān bhujagapratimān bhavān
śamapathe viniveśya manorathaṃ samadhirohatu vīryamayaṃ rathaṃ //

subhāṣitamaṇeḥ prāptir avidyātimiracchidaḥ
nānyatra svacchagambhīra dhītoyān sādhusāgarāt //

supuruṣaparicoditasya dharme paṭutaratāṃ puruṣasya yāti vīryaṃ
vahanam iva samīraṇapraṇunnaṃ salilanidhau sthitadakṣakarṇadhāraṃ //

sa palāśaiḥ palāśasya mahad ātapavāraṇam
kṛtvā pratyekabuddhasya dadhārātapaśāntaye //

na cintayati yaḥ khedam upāyakuśalo vaṇik
labhate vipulaṃ lābhaṃ catasraḥ saṃbhraman diśaḥ //

bodhisattvo vicintyeti tasya kartum upāsanām
na kṣudhaṃ nātapaṃ tīvraṃ na ca khedam ajīgaṇat //

budhān upāsīta na cej jagadgurūn āvāpnuyān naiva janaḥ subhāṣitam
dhanāya yo gacchati ratnamedinīṃ sa yujyate ratnaviśeṣasampadā //

iti sa paricaraṃs tam āryavṛttaṃ kuśalaphalopacayāya dhīrasattvaḥ
pratidivasam upācitaprasādaḥ saphalam amanyata sādhv ajanmalābham //

parivisphuradaṅśuparītatanuḥ payasīva tatāna nabhasy amale
śuśubhe ca suvarṇagiripratimaḥ kamalāsanamadhyagataḥ sa vaśī //

praviveśa muhuḥ paribhidya mahīm udiyāya śanaiḥ saviteva punaḥ
anayac ca sa yogabalād bahutāṃ yugapad bhujayoḥ salilajvalanau //

spṛśati sma vilolanakhadyutinā kamalapratimena kareṇa ravim
bahutām agamad gatajanmabhayas salileṣv iva śuddhavapus tapanaḥ //

tam iti prasamīkṣya maharddhibalaṃ dyutimantam anuṣṇamarīcim iva
suciraṃ stimitīkṛtanetrayugo dvijamukhyatamaḥ sa jagāda mudam //

taṃ prātihāryaramaṇīyataraprabhāvaṃ pratyekabuddham avalokya dṛḍhaprasādaiḥ
vidyādharair mumucire nabhasā vrajadbhiḥ puṣpāṇi keśararajaḥkapiśodarāṇi //

imām ālokya bhavataḥ prātihāryavatīṃ tanum
brahmāpi vismayaṃ yāyān mādṛk kim u pṛthagjanaḥ //

darśitaprātihāryeṇa bhavatā dīptatejasā
idam adhyāsitaṃ vyoma dvisūryam iva lakṣyate //

yogināṃ tvādṛśām etad ṛddhimāhātmyam adbhutam
parānugrahaniṣpatti paṭūnāṃ vyaktim archati //

ātmārthaṃ bhāsate nenduḥ prācīmukhaviśeṣakaḥ
parārthā eva mahatām udayāḥ śuddhacetasām //

yadi nāham upāgamiṣyam enaṃ malayaṃ candanapādapāndhakāram
na bhavatsamupāsanāsamutthaṃ kuśalaṃ muktipathasya bījam āpsyam //

madanugrahakāmyayā dadhānas tanum etām atanuprabhāvagurvvīm
malayādrivanāntare sthito 'si kṣapitakleśa gadacchalena nūnam //

dadhatīddharuco maṇiṃ samudrāḥ sphaṭikacchedasitaṃ payaḥ payodāḥ
mahatīṃ phalasampadaṃ ca vṛkṣāś ciram āyuś ca bhavādṛśāḥ parārtham //

vāktantubhis tava guṇastutipuṣpamālāṃ saṃgranthya yat kuśalamūlaphalaṃ mayāptam
prajñāspadaṃ daśabalatvam avāpya tena bhūyāsam asya jagato bhavabhaṅgahetuḥ //

pratyekabuddhapadapāṃsum asau niveśya mūrdhni prasādasamudīritaromakūpaḥ
āttauṣadhir malayaśailavanāntarālāl lokasya rogam apanetum agāj janāntam //