Jātakamālā, 1-8, 11-12, 19-20, 22, 24, 26, 32, 35 · Chapter 22

na vinā vīryāt tanv api phalam īpsitam āpyate jagadbhūtyai /
iti khedam agaṇayitvā vyāyacchante mahābhāgāḥ //

hariṇaṃ harakaṇṭhanīlapṛṣṭhaṃ harisattvaṃ haritaṃ tṛṇaṃ daśantam
sadasatpathavedinaṃ mṛgās te tam upādhyāyam ivānvaguḥ suśiṣyāḥ //

vihāya romanthanam unmukhasthiraḥ sa kṛṣṇasāraḥ śarapātaśaṅkitān
mṛgān ninīṣuṃ śaragocaraṃ nṛpaṃ vilokayāmāsa camūpuraḥsaram //

vilokya saṃbhūtakhalīnanisvanaṃ jighāṃsu tat sainyam adhijyakārmukam
mṛgaiḥ parīto bhayaloladṛṣṭibhiḥ sa yūthabhartedam acintayad dhruvam //

mahīpatiḥ pāti sukhaṃ sukhārthinīṃ prajām anutpannabhayāṃ śubhāśrayāt
acintayitvātmagataṃ pariśramaṃ sa rakṣitā yo vyasane 'pi rakṣati //

amūn bhayabhrāntavilolalocanān parisravacchoṇitasiktabhūtalān
mṛgān purastāt patataḥ sphurattanūn vilokayiṣyāmi kathaṃ śarāhatān //

mṛgāṃs tad enān mṛgayāvinodino na yāvad āghnanti śitaiḥ śilīmukhaiḥ
balena tāvad bhayalolacakṣuṣāṃ prayatnam eṣāṃ karavāṇi rakṣaṇe //

pariplutya taṭād asmād dattvā pṛṣṭhe kramaṃ mama
yāta yātabhayāḥ śīghraṃ svayūthyāḥ saṃkaṭād itaḥ //

śarīraṃ viśarārutvād dharmābhāvāc ca phalgu me
yuṣmannirvāhaṇāt sāraṃ lapsyate sucirād idam //

paropakāravimukho yadā kāyaḥ kalis tadā
yadā tv anyaddhitālambī kāyaratnam idaṃ tadā //

paripātum ahaṃ bhayāt samartho yadi yuṣmān nṛpasainikānubaddhān
saphalo 'dya bhavet tataḥ pṛthivyāṃ mama yūthādhipatitvaśabda eṣaḥ //

āgamyatāṃ tad adhunā nanu tāvad eva yuṣmāsu yāvad iṣavo na patanti śātāḥ
pṛṣṭhaṃ mamācalasarijjalasetubhūtam āruhya nistarata sainyabhayād amuṣmāt //

yathā yathā tasya bhṛśaṃ nipetuḥ pṛṣṭhe mṛgās trāsavilolanetrāḥ
tathā tathāsau mṛgayūthabhartā khurān sthiratvaṃ prasabhaṃ nināya //

rudhiram atha mṛgāṇāṃ patyur utkhātamāṃsāt khurapuṭaparibhinnāt tasya cakṣāra pṛṣṭhāt
mṛgakulam acalāntaṃ gacchad ālokya cārāt sa rujam agaṇayitvā prītim evālalambe //

paripālitasattvānām upāyena balena vā
ruṇaddhi mahatāṃ duḥkhaṃ antaḥprītiparamparā //

athāvavādam ākarṇya sa janas tasya bhūpateḥ
bāṇaviśleṣiṇaḥ sadyaś cakāra dhanuṣo guṇān //

jahīhi śaṅkāṃ na hi bodhisattvo bhavantam utsrakṣyati bālam ekam
dvirephaśabdair iti puṣpavanta āśvāsayāmāsur iva drumās tam //

aṅgādhiruhya matpṛṣṭhaṃ vimuñca maraṇavyathām
bhavantaṃ saritaḥ pāraṃ neṣyāmy aham itas taṭāt //

uddhartuṃ vīryam ārabdhaṃ yena lokaṃ bhavārṇavāt
sa tvāṃ nottārayiṣyāmi katham ekaṃ nadījalāt //

atha tenādhirūḍho 'sau mṛgaśāvena vīryavān
jagāhe karuṇālambī saritaṃ vīcimālinīm //

amūni pṛṣṭhe tava vikṣatāni rujaṃ na gāḍhāṃ janayanti kaccit
iti bruvāṇeva samuttarantaṃ parāmṛśat tam sarid ūrmihastaiḥ //

kṛtvātha jānunī bhūmau mṛgaśāvaḥ pipāsitaḥ
jagrāha tvaritaṃ mātuḥ saṃbhūtaprasrutī stanau //

sā cainaṃ parivṛttāsyā stanyapānacalānanam
ālileha muhuḥ snehāj jihvayā calitāgrayā //

kathaṃcid anviṣya khurāṅkaśādvalāṃ śanair mṛgāṇāṃ padavīṃ samākulaḥ
niviśya mandaṃ rudhirokṣitaḥ kṣitau kṣaṇaṃ viśaśrāma sa saṃbhṛtaśramaḥ //

imāṃ daśāṃ nirghṛṇayādya vatsa satyā jananyāpi mayāsi nītaḥ
iti kṣatāṅgaṃ karuṇānutāpād bhṛśaṃ rurodeva tam īkṣamāṇā //

abhyutthānārham ālokya yat tvāṃ nāhaṃ samutthitaḥ
nādākṣiṇyaṃ tad etan me śrameṇāsmy avasāditaḥ //

nirvrīḍaiḥ param upahantum udyatāstrair bhogecchātimiraniruddhabuddhinetraiḥ
dharmajño hariṇamuniḥ kṛpāsahāyo mādṛkṣair narapaśubhis tvam arcanīyaḥ //

bibharti bhṛtyān nṛpa ātmarakṣaṇaṃ vidhitsur āyodhanakālanirbhayān
svayūtharakṣāpaṭunā tu sarvathā nayena te bhūmibhujāṃ jito nayaḥ //

citraṃ kim atra bahavo yadi bhūmipālaṃ bhṛtyā raṇāntaragataṃ paripālayanti
ekena nāma hariṇā bahavas tvayāmī yat pālitāḥ khalu tad adbhutam etad atra //

bahuguṇakaruṇānvitā taveyaṃ guṇavikalāṃ karuṇāviyogalaghvīm
hariṇa hariṇatā viśeṣalābhād avahasatīva manuṣyatāṃ mamaitām //

buddhatvam adhigantuṃ me vīryaṃ vīryavatāṃ vara
yathāśakti mṛgatve 'pi satīdaṃ nāvasīdati //

yathā mayāmī hariṇā bhayākulāḥ pratāritā bhīmarayān nadījalāt
tathā bahukleśasamākulaṃ jagat pratārayeyaṃ bhavaduḥkhatoyadheḥ //

ālasyāt sasahāyo 'pi na gacchaty udayaṃ janaḥ
hastāgrāt skhalito bhūmau toyārdra iva kandukaḥ //

vipaścitāpy alasadhiyā sukhāśrayaṃ na śakyate padam abhigantum ucchritam
avāhitaṃ vahanam aritradhāribhiś cirād api vrajati na pāram ambudheḥ //

jātasyāpi kule viśuddhayaśasi prakhyātabhogodaye prāptasyāpi sabhāsu paṇḍitadhurām agryāṃ vipaścittayā
ālasyān na manorathaḥ sakṛd api prāpnoti puṃsaḥ phalaṃ lakṣyaṃ naiti guṇārpito 'pi viśikhaḥ kṣeptuḥ prayatnād vinā //

ye śāntaṃ padam ārurukṣava iha kleśair abhinnāśayās tvattaḥ prāk kṛtinaḥ kṛtapraṇidhayo bodhau ghaṭante janāḥ
teṣāṃ vartmani vājinām iva pariśrāntyā śanair dhāvatām ājāneya ivojjhitaśramabhayo bhāvī bhavān agrimaḥ //

bibhrāṇaṃ pariveṣiṇīṃ vitamasāṃ dehatviṣāṃ saṃhatiṃ dharmaṃ dharmakathābhilāṣiṇi muhuḥ prakhyāpayantaṃ jane
chinnakleśanibandhanaṃ guṇadhanair abhyarcitaṃ sūribhis tvāṃ buddhatvam upāgataṃ gatabhavaṃ drakṣyanti dhanyā janāḥ //

tad ācakṣva mahābuddhe dharmaṃ dharmavidāṃ vara
sevyamānena śuddhena yena yāyāṃ na durgatim //

avadyād vinivṛttiś ca pravṛttiś ca śubhāśraye
dharmatattvam idaṃ samyag ākhyātaṃ khyātabuddhibhiḥ //

sphuṭīkṛte 'pi tattve 'smin prakāśitaśubhāśubhe
yo gacchati vimārgeṇa so 'ndhaḥ saty api cakṣuṣi //

iti prajñāpradīpena vilokitamahāpathaḥ
bhajasva bhajamānāni karmāṇi kleśahānaye //

kṣitīśa kṣapitājñāna kṣitiṃ dharmeṇa pālaya
tīkṣṇadaṇḍād bhūmipālān nityam udvijate janaḥ //

yadi yaśasi mṛṇālabhaṅgaśukle jagadavabhāsini te 'sti kācid icchā
phalam abhimatam āptukāmatā vā bibhṛhi guṇābharaṇaṃ tato viśuddham //

tato yūthapates tasya khurakṣatasamutthayā
āviṣṭasya rujā gurvyā nimimīlatur akṣiṇī //

tasyātha nṛpatiḥ kṛtvā -citāṃ candanadārubhiḥ
agnisaṃskāram akarot kṛtinaḥ puṇyajanmanaḥ //

atha tatra gate suhṛdīva divaṃ hariṇe karuṇāvimalaprakṛtau
anuśocya ciraṃ vasudhādhipatiḥ puram āgamad āśu vitānamanāḥ //

tasmin mṛge mṛgavadhūsadṛśekṣaṇābhiḥ sattvopakārakuśale kuśalānvitābhiḥ
jñātāv iva vyuparate viratakriyābhir acchinnam aśru mumuce vanadevatābhiḥ //

prāvepatātha vasudhā calitādriśṛṅgā vātānilena parivardhitasāgarormiḥ
bhrāntadvirephaśabalaś ca vikīrṇagandho mandārapuṣpanikaro nabhasaḥ papāta //

mṛgayūthādhipas tatra vane 'bhūvam ahaṃ tadā
parivrāṭ ca subhadro 'yaṃ babhūva mṛgaśāvakaḥ //

kāśyapo nāma buddho 'bhūj jñeyasāgarapāragaḥ
nāmnāśoko 'bhavad bhikṣuḥ svasrīyas tasya tāyinaḥ //

sulabhaṃ me paraṃ jyotir mātule sugate sati
aśokaḥ paricintyeti na vyāyacchata muktaye //

deśāntaram aśoke 'tha gate gatapunarbhavaḥ
kāśyapo nirvṛtau cetaḥ kṛtavān kṛtiṇāṃ varaḥ //

tataḥ sthite 'śokataror adhastād aśokabhikṣau vinibaddhaśokā
mahīruhe tatra kṛtādhivāsā mumoca muktādyuti devatāśru //

bhaviṣyatīty adya vicintayantyā jinasya nirvāṇam anirvṛtāyāḥ
papāta pārāśariṇaḥ śarīre tasyāsram uṣṇaṃ vanadevatāyāḥ //

nirabhram etad gaganaṃ kuto nu mamedam ambhaḥ patitaṃ śarīre
iti bruvann unmukham īkṣamāṇaḥ sa devatāṃ tāṃ rudatīm apaśyat //

papraccha caināṃ paridīnadīnāṃ kiṃ devate rodiṣi jātaśokā
sā cāsya kaṇṭhaskhalitābhidhānā bhikṣoḥ kathaṃcit kathayāṃ babhūva //

mahāmuniḥ kāruṇiko jagaddhitaṃ vihāya dagdhānuśayendhano vaśī
pradāya nirvāsyati kāśyapo 'dhunā janāya śokaṃ kṛpaṇeti rodimi //

akampite vādivacaḥpataṅgakaiḥ pariprakāśīkṛtasatpathāpathe
munipradīpe parinirvṛtiṃ gate jagattrayavyāpi tamo bhaviṣyati //

niśamya cedaṃ vanadevatāvacaḥ sa marmaṇīvābhihataḥ śiteṣuṇā
papāta bhūmau vinimīlitekṣaṇaś cirāt samutthāya ca paryadevata //

apṛcchad enaṃ vanadevatotsukā pracakṣva bhikṣo kim iti prarudyate
sa mātulo me bhagavān iti vyathāṃ kathaṃ na yāsyāmi sa cedam abravīt //

manoharaṃ vākkusumaṃ jinadrumād gṛhītam atyalpam idaṃ pramādinā
jagattrayakleśaparaṃparāharaṃ mayā na labdhaṃ phalam alpabuddhinā //

idam manaḥsadmani me kṛtāśrayaṃ nirodhakaṃ muktipathasya dāruṇam
vibhidya kasmān na gato 'si nirvṛtiṃ tathāgatendor vacanāṃśubhis tamaḥ //

athānvagāt tāṃ nabhasā sa devatām aśokapuṣpāñjalibaddhalocanaḥ
kṣaṇena cāgamya tathāgatāntikaṃ jagāda bāṣpaṃ visṛjan muhur muhuḥ //

pramādinaṃ bālam apetadhīplavaṃ nimagnam ajñānamahāpayonidhau
munīndra māṃ duḥkhamahormipīḍitaṃ kṣaṇād anuttārya kathaṃ nu gacchasi //

iti bruvāṇaṃ parigadgadākṣaraṃ kṣarantam asraṃ kaluṣīkṛtekṣaṇam
kṣaṇād vimokṣāya nivartya kāpathāt pathā viśuddhena nināya taṃ jinaḥ //

siṃhāsanopaviṣṭasya vākpuṣpāni vimuñcataḥ
kasya śroṣyati loko 'yaṃ dharmārthī dharmadeśanām //

tvayi nātha paraṃ jyotiḥ prāpte 'stam iva bhāskare
tamasā durnivāreṇa nimīlitam idaṃ jagat //

adya tvayi gate śāntim aśāntena manobhuvā
jagan mohayituṃ nūnaṃ punar āropitaṃ dhanuḥ //

gate munau śāntim anāśrayā vayaṃ kva viśramiṣyāma udīrṇamanyavaḥ
guṇair iti jñeyapathānugāminā munīndra vikruṣṭam iva tvayā vinā //

bhavantaṃ bodhāya praṇidhim avalambya tribhuvane bhramantaṃ sattvārthaṃ sthiradhiyam ahaṃ nojjhitavatī
parityajya tvaṃ māṃ kim iti jananīṃ vatsala gataḥ prayāte tvayy evaṃ ruditam iva dīnaṃ karuṇayā //

mām āgamya yathānena bhikṣuṇāsāditaṃ phalam
tathā śākyamuneḥ śiṣyaḥ paścimaḥ syām ahaṃ tadā //

arhatphalaṃ samāsādya nirvāṇasamaye muneḥ
tasmāt prāk parinirvāyāṃ soḍhuṃ śokam aśaknuvan //

yāsāv aśokanilayā babhūva vanadevatā
sa parivrāṭ subhadro 'yaṃ bhadracetā mahāmatiḥ //

praṇidhānavaśād eṣa mama śrāvakatāṃ gataḥ
prathamaṃ mama nirvāṇāt tasmād eva ca nirvṛtaḥ //

iti jātakam etad adbhutaṃ vidhivac chākyamuniprakāśitam
viduṣāṃ manasaḥ praśāntaye prathanīyaṃ madhurābhidhāyinā //

parahitakaraṇārthaṃ khyāpitātipratijñair api vipadi na mukto vīryasaṃnāhabandhaḥ
iti parivigaṇayya prāptum atyantaniṣṭhāṃ bhuvanahitavidhāne mā sma gātālasatvam //